قصص وروايات مريم نصار

قصص وروايات مريم نصار: المدونة الرسمية للكاتبة والروائية المصرية مريم نصار. هنا تقرئين حكايات تلمس القلب وتشبه تفاصيل حياتنا: روايات وقصص تجمع بين الرومانسية والدراما والتشويق، بأسلوب قريب من القارئ وشخصيات تعيش معك بعد الفصل الأخير. تُنشر كل رواية فصلًا بفصل بترتيب منظم ومريح للقراءة، وتقدرين تتابعين الفصول الجديدة أولًا بأول. أهلًا بك في عالم مريم نصار.

الفصل السادس. زاد الآسمر


 


الفصل السادس زاد الآسمر..


قبل الظهيرة، كان فارس داخل غرفة العمليات، يجري عملية جراحية لطفلة. انشغل بكل تركيزه في تفاصيلها الدقيقة، متابعًا كل خطوة بعين الطبيب الذي لا يسمح لأي شائبة أن تشتت انتباهه أو تهز ثبات يده.

وفي الجانب الآخر من المستشفى، كانت حبيبة تؤدي نوبتها في قسم الأطفال. وبعد مرور ساعات من العمل المتواصل، شعرت برغبة ملحة في استراحة قصيرة، فتوجهت إلى الاستراحة الخاصة، وجلست عند طاولتها المعتادة تحتسي كوبًا دافئًا من النسكافيه.

لم تكد ترتشف منه بضع رشفات حتى اهتز هاتفها برنين متواصل.

ألقيت نظرة على الشاشة، وما إن أطل اسم رضوان حتى أشرقت ملامحها بابتسامة تلقائية، وأجابت بلهفة دافئة:

ـ ألو.


جاءها صوته الأبوي الحنون يفيض حماية:

ـ إزيك يا بيبو؟ عاملة إيه؟


ابتسمت وهي تستند إلى المقعد براحة:

ـ الحمد لله يا حبيبي، إنت عامل إيه؟


ـ أنا كويس، إنتِ بس طمنيني عليكِ.


تنهدت بهدوء، وأراحت ظهرها للوراء:

ـ الحمد لله، النهارده أحسن بكتير.


نسج صوته عتابًا أخويًا صريحًا:

ـ مش كنتِ يا بنتي تريحي في البيت يومين كمان؟ إنتِ لسه تعبانه. 


هزت رأسها بالرفض بعفوية كأنه يراها:

ـ لأ، كفاية كده يا رضوان... أنا أخدت راحة يومين، وعشان نوفل ما يطلعش عيني.


ابتسم رضوان من الطرف الآخر، ثم سألها باهتمام وصادق:

ـ يعني إنتِ كويسة يا حبيبة؟


ـ بخير يا حبيبي، اطمن والله.


سألته مستفسرة:

ـ إنت فين؟ في المكتبة ولا المصنع؟


ـ لأ، في المصنع. في شوية حسابات كده أخلصها، وممكن ما أفتحش المكتبة النهارده.


سكتت لحظة تزن فكرتها، ثم اقترحت بدلال:

ـ طب إيه رأيك أعزمك على الغدا النهارده؟


ارتفعت ضحكته الخفيفة:

ـ وده بمناسبة إيه إن شاء الله؟


ضحكت هي الأخرى بنبرة مرحة:

ـ ده العادي بتاعي على فكرة، إنت بس اللي مش واخد بالك!


قهقه رضوان مداعبًا:

ـ فعلًا فعلًا... أنا أكتر واحد ما بياخدش باله!


ثم استطرد متسائلًا:

ـ عمومًا يا ستي، موافق... بس قولي لي، عندك شغل تاني؟


ـ لأ، أنا ساعتين وأكون في البيت، وعندي إن شاء الله مناوبة من بعد الساعة اتناشر بالليل.


أومأ رضوان وقال بنبرة هادئة:

ـ خلاص يا حبيبتي، تمام.


ابتسمت بفخر:

ـ قشطة... على العموم أنا هعزمك في مكان فخم.


ضحك قائلًا بثقة لم تتبدل:

ـ والله عارف... ما أنا اللي بتدبس في الآخر!


ـ لأ لأ، المرة دي صدقني أنا اللي هدفع.


ـ لما نشوف.


وقبل أن تستطرد في حوارها، تعالي جرس هاتفها باتصال آخر مجدول.


ألقيت نظرة سريعة على الشاشة ثم قالت:

ـ طيب يا رضوان، أنا هقفل دلوقتي عشان في حد من التمريض بترن عليا.


ـ ماشي يا حبيبتي.


أنهت المكالمة، ثم قفزت فورًا إلى الخط الثاني.

أتت نبرة إحدى الممرضات مضطربة ومتعجلة:

ـ دكتورة حبيبة، الدكتور فارس عايزك في مكتبه.


تجمّدت حركة حبيبة لثانية.

تلاشت الابتسامة عن وجهها، وحل مكانها وجوم وتوتر خفيف حاول المداراة.

طافت في ذاكرتها فورًا ملامح لقائهما الأخير؛ تلك اللحظة الحرجة في نوبة الهلع حين شلتها رؤية الدماء واستحضرت جرح فقد أمها الراحلة. تذكرت وقفته الصلبة بجوارها، وكيف طوق ذعرها بهدوء حازم وساعدها على استعادة أنفاسها.

كان ذلك السبب الدفين الذي جعلها تعتكف في بيتها يومين كاملين، فرارًا من وقفة مواجهة تُعرّي ضعفها أمامه.

والآن، ها هو يطلبها رسميًا!

تنفست الصعداء بعمق، وجمعت شتات ثباتها، ثم تحركت بخطوات متزنة نحو مكتبه.


كان فارس يجلس بمهابة خلف مكتبه، بين يديه ملف طبي لطفل، بينما جلست أمامه سيدة ترتدي عباءة بسيطة وتحتضن بين ذراعيها طفلًا صغيرًا.

طرقت حبيبة الباب بنقرات خفيفة، ثم ولجت وقالت بحرج موارب:

ـ دكتور فارس، حضرتك طلبتني؟


رفع عينيه ونظر إليها بثبات لثانية أطول مما ينبغي، استكشف فيها شحوب وجهها قبل أن يشير إلى المقعد المقابل بجفاف دون كلمة.

جلست حبيبة وعيناها تتنقلان بريبة بينه وبين الحالة، حتى جاءها صوته الرخيم المتزن:

ـ عايزك تفحصي الحالة دي يا دكتورة.


انتابتها الدهشة، لكنها لم تجادل. تقدمت نحو الطفل، وفحصت مجرى تنفسه وحلقه بدقة طبية، ثم التفتت إلى فارس وقالت بتأكيد:

ـ الالتهاب اللي عنده ممكن تكون أعراضه حساسية، إنما ما أظنش إنها لحمية.


استقام فارس في جلسة حادة، وعيناه تنطقان بالاستنكار وهو يلتفت إلى السيدة:

ـ لما هو كده... بعتالي الست دي وبتقولي إنك موصية عليها عشان أعمله عملية؟!


اتسعت عينا حبيبة بصدمة جليّة، والتفتت إلى المرأة مستنكرة:

ـ أنا قلت لك يا ست إنتِ إن ابنك محتاج عملية؟ ولا شوفتك أصلًا؟!


انتفضت المرأة متوسلة برجاء عامي:

ـ يا دكتور، أبوس إيدك اعمل للواد العملية... الواد بيخنفر!


تبادل فارس وحبيبة نظرة حيرة خطفت دهشتهما، ثم هتفا في صوت واحد:

ـ إيه؟ بيخنفر؟!


ردت المرأة بيقين ومبالغة:

ـ آه، بيخنفر... بيشخر يعني، ونَفَسه مكتوم طول الليل.


وضعت حبيبة كفها على فمها تستر ابتسامة انفجرت في جوفها، بينما هز فارس رأسه بأسى على قلة الحيلة، وعاد يكتب الوصفة الطبية بصرامة محترفة.

سلمها الورقة وقال بلهجة حاسمة:

ـ اللي عند ابنك ده حساسية، ومش مستدعي لأي عملية.


لكن المرأة اعترضت بإصرار عجيب:

ـ طب يا دكتور ما تعملهاله ونخلص، أنا زهقت!


رفع فارس عينيه إليها بذهول ساخر:

ـ يعني حضرتك علشان زهقتي، أشيل لابنك جزء من جسمه،وهو مش محتاجة يتشال؟!


ثم أشار إلى العبوة المكتوبة:

ـ خدي الدوا ده وامشي عليه بانتظام، وهيتحسن.


تأملت السيدة الورقة بجهل تام وسألت بجدية:

ـ أنا اللي آخده ولا هو اللي ياخده؟


كتمت حبيبة ضحكةً مليئة بالسحر والشقاوة أربكته، بينما أغمض هو عينيه لثانية يمارس ضبط النفس الصارم، ثم قال برزانة خالية من التوتر:

ـ لأ، الطفل المريض هو اللي ياخد النقط والعلاج ده. إنما حضرتك المطلوب منك تديه سوائل سخنة، وتبعديه عن أي دخان وروايح زي ما قولتلك... وبس كده.


هزت المرأة رأسها بغير اقتناع، وجمعت أشياءها وطفلها وانسحبت، تاركة خلفها أثرًا من الضجيج الكوميدي، ليحل الهدوء فجأة على المساحة الفاصلة بينهما.

التقت عين حبيبة بعيني فارس.

ولثوانٍ، لم يستطع كلاهما منع ابتسامة صغيرة دافئة من التسرب إلى الملامح.

كسرت حبيبة الصمت بمحاولة خفيفة لملمة المشهد:

ـ شكله كان سوء تفاهم.


هز فارس رأسه بنظرة هادئة لم تخلُ من لمعة خاصة:

ـ فعلًا.


شعرت حبيبة بأن مهمتها انتهت، فاستعدت للانسحاب وقالت محاولة إبداء الهدوء:

ـ طيب بما أني طلعت مظلومة... بعد إذنك هروح على القسم.


تحركت نحو الباب بخطوات متزنة حذرة.

وما إن لامست يدها مقبض الباب، حتى شق الصوت الرخيم صمت الغرفة:

ـ دكتورة حبيبة... استني.


تسمرت في مكانها.

تجمدت يدها على المقبض، واستدارت ببطء كشخص ينتظر المواجهة، والتوتر يعود ليرتسم على ملامحها.

كان فارس واقفًا بشموخه المعتاد، يطوقها بنظرة مختلفة تمامًا؛ لم تكن عين استشاري يراقب مرؤوسه، بل نظرة رجل يبحث في تفاصيلها عن إجابة سؤال واحد: هل استعادت ثباتها حقًا؟


ـ عامله ايه دلوقتِ؟


ـ انا. انا بخير 


قال بهدوء نافذ:

ـ رجعتي شغلك إمتى؟


عقدت حبيبة حاجبيها باستغراب:

ـ النهارده... ليه؟


ـ بسأل.


ضيقت عينيها وقالت بنبرة ساخرة تحتمي بها:

ـ مش غريبة شوية إن حضرتك تسأل عني؟


رفع فارس حاجبًا واحدًا، وأجاب ببرود رزين:

ـ غريبة ليه؟ إنتِ غبتي يومين، فكان طبيعي أعرف رجعتي ولا لسه.


نظرت إليه بدهشة حقيقية:

ـ حضرتك عارف إني مجتش يومين؟


رُسمت شبه ابتسامة عند طرف شفتيه:

ـ مش محتاجة ذكاء يا دكتورة. آخر مرة شوفتك يوم الطوارئ، وجيتي النهارده. يبقى الفرق إيه؟


رفعت حبيبة كفها وضربت جبهتها بخفة بقلة حيلة ممتزجة بالخجل:

ـ يومين صح.


تطلع إليها بمكر خفيف وأردف:

ـ وبرضه في سبب تاني عرفت منه إنك رجعتي.


رفعت حاجبها بفضول:

ـ إيه هو؟


قال بنبرة استفزازية هادئة:

ـ لما جالي طفل مريض حساسية، ومتحوّلي  بتشخيص غلط... عرفت فورًا إنك رجعتي.


رمقته بنظرة غيظ لطيفة، ولم تستطع منع ابتسامة باهتة من الانفلات:

ـ والله! ، عموماً أنا رجعت. بس الست دي مجتليش ولا شوفتها قبل كده. وكل حالة بتجيلك بكون مظلومة فيها.


تلاشت ابتسامته تدريجيًا، ليصل إلى هدفه المستتر منذ البداية.

تأمل تقاطيع وجهها بتأني، ثم سألها كأنه يلقي استفسارًا عاديًا:

ـ سيبك من كل ده. المهم بقيتي أحسن؟


توقفت نظراتها، وأدركت فورًا المرمى الدفين لسؤاله، فتلاشى مرحها.

لكنه لم يضغط، ولم ينكأ جرح يوم الطوارئ، بل ترك لها خط الرجوع كما تشاء.

سألت بتحفظ وهروب:

ـ أحسن إزاي؟


ثبت عينيه في عينيها وقال بنبرة دافئة تحت جلباب الهدوء:

ـ كنتِ خايفة!


ارتبكت حبيبة، وسارعت إلى تحصين كبريائها الأخير:

ـ وهخاف من إيه! كل الحكاية إني وقتها كنت مجهده شوية.


واصل فارس تأملها بنظرة عميقة. لم يناقشها، ولم يكشف قناع هلعها، بل اكتفى بامتصاص تعثرها وقال بصوت أملس:

ـ تمام... حبيت أطمن عليكِ.


رفعت عينيها إليه بذهول صريح:

ـ ها! تطمن عليا أنا؟!


رسم ابتسامة خفيفة تحمل دلالتها وقال ببساطة حاسمة:

ـ طبعًا.


دق قلبها بدقات متسارعة أربكت حساباتها. لم تكن الكلمات بحد ذاتها، بل تلك النبرة العميقة والنظرة الشاخصة التي جعلت للعبارة ثقلاً خاصًا.

شعرت بالحرارة تسري في وجنتيها، ولم تعد تجد مخرجًا بصريًا لمواجهته.

قالت بصوت خافت متلعثم:

ـ أنا ممكن أروح على مكتبي؟


لم يرفع عينيه عنها، ولم يزدها حصارًا، بل اكتفى بتلك الابتسامة وقال:

ـ اتفضلي.


التفتت سريعًا وغادرت الغرفة بخطوات متسارعة تهرب بها من طيف حضورها المخيف، بينما ظل هو واقفًا في منتصف المكتب لثوانٍ بعد خروجها.


كان يتساءل في سرّه عن سر هذا الاهتمام الخفي، ولماذا منحته كلمة "أنا بخير" كل هذا السكون النفسي.


جلس خلف مكتبه، وأسند ظهره للكرسي، لكن تركيزه المهني انفرط؛ كانت ملامحها المرتبكة، ونبرة خجلها، ومحاولتها المستميتة لارتداء درع الصلابة تتراءى أمامه بوضوح.


وللمرة الأولى، انتبه إلى تفاصيل وجهها الدقيقة؛ لون عينيها الدافئ، وتقاطيعها حين تتوتر، وتلك الفتنة بين الكبرياء والانكسار.


حاول استعادة جديته، حتى قاطع سكونه دخول نوفل وهو يحمل فنجان قهوة تفوح منه رائحة البن المحوج.

استعاد فارس هيبته الصارمة فورًا، واستوى في جلسة حازمة:

ـ خير يا نوفل؟


وضع نوفل الفنجان بابتسامة متملقة:

ـ خير إن شاء الله يا دكتور فارس... أنا جايبلك فنجان قهوة محوجة زي ما الكتاب بيقول. تظبط دماغك.


رد فارس ببرود مستقر:

ـ اممم... متشكر.


ثم أضاف بمكر نافذ وهو يراقب ردة فعله:

ـ تاعبينك معانا.


استغرب نوفل وسأل:

ـ معانا مين؟


ابتسم فارس بذكاء:

ـ أنا...و. مهاب مثلاً.


ضحك نوفل بارتباك محاولًا التملص:

ـ لأ لأ ولا تعب ولا حاجة... مهاب بيه وحضرتك على رأسنا، دي المستشفى نورت من ساعة ما حضرتك شرفتها.


حرك فارس رأسه بجفاف:

ـ اممم، متشكر... في حاجة يا نوفل؟


سارع نوفل بالإجابة:

ـ أبدًا أبدًا مفيش، أنا ماشي اهو... تؤمر بأي حاجة؟

ـ لأ.


لكن نوفل أراد التأكيد على الولاء:

ـ حضرتك لو احتجت لأي حاجة بس رن عليا، وكل طلباتك أوامر.


رفع فارس عينيه إليه، ونطق باسم واحد بحزم:

ـ حبيبة!


جفل نوفل وتراجعت عيناه بفزع مكتوم:

ـ حبيبة؟ حبيبة مين؟!


رد فارس بنبرة آمرة لا تقبل مراجعة:

ـ عايز ملف الدكتورة حبيبة العطار.


اتسعت عينا نوفل بقلق صادق على حبيبة، وانطلق يدافع بلهفة عفوية:

ـ ليه يا دكتور فارس؟ هي عملت إيه تاني؟!


واستطرد بحسن نية:

ـ بص حضرتك، حبيبة دي طيبة أوي والله واللي في قلبها على لسانها، وبتحب شغلها أوي... ولو عملت حاجة أكيد هي مقصدش، وسيب موضوع حبيبة ده عليا أنا، هديها جزا لو ده يريحك، واـ...


قاطعه فارس بنظرة حادة كالسيف، وقال بصوت خفيض آمر:

ـ قلت عايز ملف الدكتورة حبيبة، ويكون قدامي النهارده... فاهم يا نوفل؟


ابتلع نوفل غصته القاسية وأومأ برأسه:

ـ فاهم... فاهم، خمس دقائق ويكون عندك.


تحرك نوفل مسرعًا نحو الباب، وبينما همّ بالإمساك بالمقبض، رفع فارس فنجان القهوة ليرتشف منه، ثم نطق بإنذار شديد اللهجة:

ـ كل حاجة توصلها لمهاب عادي... إلا الموضوع ده.


ارتجفت فكوك نوفل، وأومأ بسرعة وذعر:

ـ حاضر... حاضر.


أكمل فارس وهو يضع فنجانه على الطاولة برنة حاسمة:

ـ أنا بسيب كل حاجة عايز أعديها بتعدي... إنما لو حاجة تخصني وطلعت من بقك لمهاب، ساعتها أنا مش هشيلك اللحمية واللوز وبس! أنا هشيل زورك كله يا نوفل!


شهق نوفل بذعر حقيقي، ووضع يده على رقبته، وهز رأسه نفيًا بإذعان كامل، ثم اندفع خارج الغرفة يلملم بقايا شتاته.

أُغلق الباب، فعاد السكون التام يلف المكتب.

أسند فارس ظهره ورأسه إلى المقعد الجلدي، وحدق في الفراغ.


كان يعلم في أعماقه أنه يطلب ملفها لسبب يتجاوز قواعد العمل؛ أراد فقط أن يقرأ بين سطوره عن عالمها، وأن يفسر لماذا جعل غيابها ليومين أروقة المشفى تبدو خاوية في عينيه.


أغمض عينيه للحظة، فرآها مجددًا بوضوح: نظرتها المرتبكة، وعزة نفسها المتظاهرة بالصلابة، وكلمتها الدافئة:

«تطمن عليا أنا.» 


فتح عينيه ببطء، مدركًا أنه لم يصدق كبرياءها لحظة، لكنه أدرك أيضًا أنه لم يعد يكتفي بمراقبة طيفها من بعيد... لقد بدأ يسحب خيوطها إلى عالمه، دون أن يدري إلى أي مدٍّ قد يستدرجه هذا التحول! 


حلّ وقت الظهيرة، وكان فريد قد عاد من السفر بالأمس. وكانت زاد تريد أن تتحدث معه، لكنها كانت تخشى أن تتصاعد المشادة بينهما ككل مرة، وأن يقع قاسم مجدداً تحت وطأة الخوف والاضطراب.

التفتت إلى عواطف وقالت بنبرة خافتة:

ـ بقولك إيه يا دادة؟


ردت عواطف بحنان:

ـ نعم يا بنتي؟


ـ خدي قاسم اتمشي بيه في آخر الجنينة... خليه يلعب.


فهمت عواطف مقصدها، فقالت بنصح دافئ:

ـ اتكلمي معاه بهداوه، يمكن لما يلاقي منك ريق حلو ربنا يهديه.


لم تقتنع زاد، لكنها اضطرت إلى التجاوب لأجل طفلها:

ـ هحاول يا دادة... هحاول علشان خاطر قاسم.


دعَت عواطف من قلبها:

ـ ربنا يهديلك العاصي يا بنتي.


خرجت عواطف ممسكة بيد قاسم، بينما رفعت زاد نظراتها بوجل نحو طابق غرفتهما العلوي. أخذت نفساً عميقاً وزفرته ببطء، ثم صعدت الدرجات بخطوات ثقيلة. فتحت الباب، فوجدت فريد واقفاً أمام المرآة يرتدي ساعته استعداداً للذهاب إلى عمله.

لمح طيفها في المرآة، فالتفت إليها. تقدمت هي بارتباك، محاولة إجبار شفتيها على الابتسام، لكن البغض الذي تكنه له في أعماقها كان أثقل من أي تصنّع.

ابتسم فريد بتهكم وقال:

ـ إيه ده؟ واقفة قدامي مرة واحدة ومن نفسك؟ يا ترى بقى الوقفة دي وراها سر؟!


ابتلعت لعابها، وجاهدت حتى نجحت في رسم ابتسامة واهية وهي تنظر إليه:

ـ أبداً، ولا سر ولا حاجة... أنا، أنا جيت أشكرك على اللي عملته.


ضم حاجبيه باستغراب وقال:

ـ تشكريني؟!


ثم تذكر وقال ببرود:

ـ اممم... أكيد العقد الألماس عجبك؟ بس غريبة، أول مرة تشكريني على...


قاطعته زاد بهدوء:

ـ بشكرك على إنك جبتلي دادة عواطف.


رفع حاجبه باستنكار وقال:

ـ يااااه! للدرجة دي هي مهمة قوي عندك؟


تراجعت زاد مسرعة خوفاً من أن ينال عواطف أي أذى، وقالت مبررة:

ـ لأ لأ خالص... احم، هي عادي يعني. أنا، أنا بس بشكرك عشان هي شالت عني كتير في تربية قاسم.


اقترب منها بخطوات متصلدة، فتراجعت حتى اصطدم ظهرها بالجدار. مدّ يده ووضعها على وجنتها؛ كانت لمسته كجمرة نار تحرق جلدها، ثم قال ببرود مستفز:

ـ لسه بدري عليكِ علشان تكدبي على فريد الشامي يا زاد.


ارتجف قلبها رعباً، لكنها حاولت استجماع شتات نفسها:

ـ كل ده علشان عملتلي حاجة أنا حباها؟ وبشكرك عليها! خلاص، لو مضايقك مشيها من هنا.


ضحك فريد بسخرية:

ـ تؤ تؤ... فريد بيمشي اللي عايزه يمشي، بمزاجه مباخدش أوامر من حد.


أنزل يده، فتحاملت زاد على خوفها وقالت:

ـ عايزة أتكلم معاك.


قال متحمساً بلؤم:

ـ إيه؟ عايزاني أطلقك؟ ده أنا لسه راجع من السفر الفجر!


ـ لأ، ده مش موضوعنا.


اقترب منها ليتنشق عبير شعرها رغماً عنها، فارتجفت من دنوه الجبرية واستنزفت ما تبقى من جراءتها، فدفعته من صدره خطوة للخلف، ثم تحركت مبتعدة وهي توليه ظهرها، وقالت بترقب خائف:

ـ أنا... أنا عايزة أشتغل.


رفع حاجبه بدهشة حادة:

ـ إيه؟! مسمعتش!


التفتت إليه وقالت بنبرة ترجٍّ:

ـ فريد أريد... أرجوك، أنا فعلاً محتاجة أشتغل.


قهقه فريد بتهكم:

ـ نعم؟ تشتغلي؟! ليه، حد قالك ناقصنا فلوس؟!


اقتربت خطوة، واغرورقت عينها بالدموع وهي تستحضر في مخيلتها صورة رضوان وعزته، وقالت:

ـ الموضوع مش موضوع فلوس... قد ما هو إني عايزة أثبت ذاتي لنفسي.


اقترب منها بنفاد صبر قاطماً إياها:

ـ اسمعي... أنا هعتبر نفسي مسمعتش حاجة من الهبل ده.

قاطعته بضعف شديد:

ـ فريد... بابا محتاجلي، لازم أكون جنبه.


قبض على ذراعها بقوة عاتية حتى أطلقت صرخة ألم مكتومة، وقال بقسوة:

ـ أنا مش قفلت معاكِ موضوع شغلك مع أبوكِ ده قبل كده؟ بتفتحيه ليه تاني؟!


هبطت دموعها ساخنة على وجنتيها وقالت:

ـ حرام عليك! من سنين بقولك أساعده وأنت رافض،... بس دلوقتي بابا كبر ومريض ومحتاجلي، أنا بنته الوحيدة وأنا اللي هخاف عليه أكتر من أي حد.


صك على أسنانه وهو يزيد من ضغطته المؤلمة على ذراعها:

ـ مش شغلي ولا موضوعي... اللي تعبان يقعد في بيته يا هانم.


نظرت إليه بصدمة وذهول:

ـ معقول تفكيرك يوصل للدرجة دي؟! مش صعبان عليك بابا؟ ده حتى بيثق فيك! خليك مرة واحدة قد الثقة اللي ادهالك.


اشتعل غضبه، فجذبها من شعرها بقسوة وسط صراخها ومحاولاتها المستميتة للدفاع عن نفسها، لكن بنيته الضخمة جعلت مقاومتها مجرد هباء. قال وهو ينفث غضبه في وجهها:

ـ أنا قلت مفيش شغل، ومش هتخطي خطوة برة البيت ده تاني غير رجلي على رجلك!


جمعت زاد كل ما بقي فيها من قوة ودفعته بكل جوارحها، وهي تصرخ فيه بانهيار تام:

ـ أنت حيوووان! بقولك بابا مالوش غيري وانت قلبك ده جبروت! انت حيوووان يا فريد! أنا زهقت منك... أنا هسيبلك البيت ده كله واللي يحصل يحصل! أنا بكررررهك!


قبض على يديه وضاعف من ضربه لها بقسوة عمياء، قائلاً مع كل ضربة:

ـ يبقى وقتها أبوكي اللي خايفة عليه هموّتهولك... علشان تبطلي تجيبي سيرته وتقرفيني بيه كل شوية! طلقة واحدة ما تساويش... هخلّيها تخلّص عليه، فاهمة؟ إنتِ شكلك لسه ما تعرفيش مين هو فريد الشامي.


تهاوت زاد وسقطت مغشياً عليها من شدة الصفعة والإنهاك. وقف فريد يلهث بحدة، ثم ألقى عليها نظرة سخط باردة، وتركها غارقة في غيبوبتها ونزل إلى أسفل دون أن يرف له جفن.


ما إن لمحت عواطف فريد وهو يركب سيارته ويغادر المكان، حتى أسرعت بالدخول إلى المنزل. نادت على سناء وطلبت منها الانتباه لقاسم، ثم صعدت إلى الطابق العلوي بقلب وجل.


فتحت الباب لتجد زاد ملقاة على الأرض فاقدة الوعي. شهقت عواطف بصدمة، وأغلقت الباب سريعاً كي لا يرى قاسم هذا المشهد المفجع. اندفعت نحوها وجلست بجوارها تحاول إفاقتها، فلاحظت الكدمات الزرقاء التي بدأت تتشكل على ذراعيها ورقبتها.

فاضت دموع عواطف أسىً وحزناً، وقالت بصوت متهدج:

ـ إنتِ لازم تقومي معايا وتسيبي البيت ده. بيت أبوكي مفتوحلك!


فتحت زاد عينيها ببطء وسط نوبة بكاء مريرة، وهزت رأسها بالرفض القاطع خوفاً من تهديد فريد الصريح وما يمكن أن يلحقه بوالدها المريض.


في تلك اللحظة القاسية، مرّ طيف رضوان في عقلها... تذكرت احترامه الشديد لها ولأنوثتها، وتذكرت الموقف الذي رفض فيه أن يمد يده على رباب رغم كل شيء... تذكرت مواقفه ونبله ونقاء معدنه.

أغمضت زاد عينيها بوجع، وألقت بجسدها المنهك في حضن عواطف، وانخرطت في بكاء نادمٍ ومُرّ، يمزق الصدر على كل لحظة فرطت فيها في ذلك الأمان القديم.


في أحدى الصالات الرياضية كان فارس يركض على جهاز المشي الرياضي بانتظام شديد، ونبضات قلبه تتسارع مع كل خطوة على الحزام الناقل، لكن ذهنه كان يتخلف عن جسده تمامًا، غارقًا في حالة من التعجب والدهشة الذاتية.

لم يكن يفهم ما الذي يحدث له... لماذا لا يستطيع أن يطرد طيفها من رأسه؟ كلما حاول أن يشغل نفسه بالتمارين الشاقة أو بضغوط المشفى، تعود ملامحها لتستقر في مخيلته بوضوح مريب. ارتباكها الأخير، الابتسامة المزيفة التي حاولت أن تداري بها خوفها، ونظرة عينها المحتارة حين وقف أمامها... كل تلك التفاصيل ظلت محفورة في ذاكرته، ترفض المغادرة كأنها انطبعت في عقله للأبد.


وفي وسط سيل أفكاره وشروده التام، قطع صمت تأمله صوت رنين هاتفه المربوط بسماعة الأذن.


ضغط فارس على زر إيقاف المشاية ببطء حتى تهدأت خطواته تمامًا، ثم ضغط على زر الإجابة في سماعة أذنه ليأتيه صوت مهاب المباشر:

ـ أيوه يا فارس، أنت في الشغل؟


مسح فارس العرق عن جبهته بنبرة هادئة وهو يلهث خفيفًا:

ـ لأ، في الچيم. بس عندي مناوبة بليل... في حاجة؟


رد مهاب من الطرف الآخر:

ـ عندي عشاء عمل وكنت عايزك معايا، بس خلاص مادام عندك شغل...


قال فارس بمسؤولية واهتمام:

ـ لو محتاجني ضروري أجيلك.


أجابه مهاب بنبرة عادية:

ـ لا لا متعطلش نفسك، ده عشا عادي.


رد فارس بنبرة حاسمة:

ـ تمام.


أغلق الخط، ثم عاد ليعيد تشغيل الجهاز تدريجيًا. زاد من سرعتها واستأنف الركض بقوة أكبر، بينما كانت عيناه شاخصتين إلى الفراغ أمامه، يحاول أن يهرب من طيف حبيبة الذي لا يزيده الركض إلا اقترابًا منه.


في أحد المطاعم الراقية، جلس رضوان إلى الطاولة المقابلة بهدوء ورزانة، بينما كانت حبيبة تتجاذب معه أطراف الحديث بحماس ونشاط:

ـ قولي بقى، إيه رأيك في المطعم؟


ابتسم رضوان، وألقى نظرة فاحصة حول المكان قبل أن يجيب بأسلوبه البسيط:

ـ لا، حاجة فخمة بصراحة... إنتِ قابضة ولا إيه؟


ضحكت حبيبة وردت وهي تشير إلى حقيبتها بثقة:

ـ وحياتك الجيب عمران! وأول ما مسكت القرشين قولت: يلا يا بت يا بيبو، شبرّقي على أخوكي وفسّحيه.


ـ قلبك كبير!


ـ أمال إيه؟ إن شاله محد حوش! حاكم المثل بيقولك إيه؟


رفع رضوان حاجبًا، وردد بثقة المعتاد:

ـ اصرف ما في الجيب، يأتيك ما في الغيب.


لوحت حبيبة بإصبعها أمامه بنفي طريف:

ـ لا لا، ده كان زمان... إنما دلوقتي: اصرف ما في الجيب واشحت تاني يوم، مش عيب!


قهقه رضوان بصوت دافئ:

ـ هنشحت كلنا.


دفعت حبيبة قائمة الطعام نحوه:

ـ يلا خد المنيو اهو واختار، وبقلب جامد متخافش من حاجة... أختك في ضهرك، من جنيه لعشرة!


رفع رضوان حاجبه وهو يفتح القائمة بابتسامة سائرة:

ـ بقيتي مبذرة يا بيبو؟


ـ أمال!


ظل يقلب في الصفحات بتمهل، ثم سألها بعناية:

ـ هتخلصي المناوبة امتى؟


تأففت وهي تتذكر ثقل ساعات العمل المقبولة:

ـ آه، متفكرنيش... هرجع الصبح. وهروح تاني يوم  الساعه أربعة. 


رفع عينيه إليها بنظرة أخوية دافئة:

ـ أول ما تخلصي رني عليا، أجيلك.


وقبل أن تكمل حبيبة حديثها، اقتربت ريناد بابتسامة متكلفة، وقالت بنبرة تمثل المفاجأة:

ـ حبيبة؟ مش معقول! تصدقي من بعيد أقول هي ولا مش هي!


ابتسمت حبيبة، وقامت تسلم عليها بدفء وترحاب:

ـ دكتورة ريناد! إيه المفاجأة الحلوة دي؟ تعالي.


في تلك اللحظة، شعر رضوان بنغزة شك حادة؛ فحركة حبيبة ودعوتها لم تكن عفوية بالمرة. وبحركة خاطفة لم تلاحظها ريناد، سحب رضوان هاتف شقيقته الملقى على الطاولة وفتح الشاشة، لتقع عيناه على أحدث مكالمة صادرة منها إلى ريناد قبل أقل من ساعة.


انعقد حاجبا رضوان بضيق مكتوم، وأدرك اللعبة فورًا؛ حبيبة خططت للجمع بينهما عمدًا وساقته إلى الفخ.

سلمت ريناد على رضوان بحديث الرسميات:

ـ احم... إزيك يا أستاذ رضوان؟


أجابها بجفاف ورسمية هادئة:

ـ أهلاً يا فندم.


ردت ريناد كأنها تستأذن بالحرج:

ـ طيب يا جماعة أسيبكم مع بعض.


قالت حبيبة، وهي تنظر إلى رضوان بنظرات رجاء في انتظار أن يعزم عليها:

ـ لأ، رايحة فين؟ وده كلام برضه!


ابتسم رضوان ابتسامة صغيرة مكظومة، وهمس من بين أسنانه وهو ينظر لشقيقته:

ـ لأ طبعاً، ما ينفعش.


أكملت حبيبة بسرعة لتفرض الواقع:

ـ تعالي تعالي اقعدي معانا.


قالت ريناد، وهي تسرق نظرة خاطفة إلى ملامح رضوان الرصينة:

ـ ميرسي يا حبيبة، بس مش عايزة أزعجكم...


قاطعتها حبيبة بسرعة، وهي تمسك يدها وتدعوها للجلوس:

ـ إزعاج إيه بس! ولا إزعاج ولا حاجة، اتفضلي اقعدي معانا... أخويا رضوان معندوش أي مانع، ولا إيه يا رضوان؟


التفت إليها رضوان، ورمق حبيبة بنظرة نارية كادت تشتعل بها، لكنه ضبط انفعاله وقدر الموقف بنبل، فقال بنبرة هادئة ورسمية:

ـ لا أبدًا... مفيش إزعاج، اتفضلي حضرتك. دي حتى حبيبة هتفرح، مش كده يا حبيبة؟


ضغط على كلماته الأخيرة بصرامة مكتومة جعلت حبيبة تبتلع ريقها بحرج وتجلس، بينما انضمت ريناد إليهما.


تبادل الثلاثة حديثًا عابرًا، وكانت ريناد بين الحين والآخر تسرق نظرات متأملة إلى رضوان وملامحه الأسميرة الشهمة، بينما كان هو يغلي من الداخل، رغبةً في توبيخ شقيقته على تصرفها، لكنه آثر الصمت.

وفجأة، قامت حبيبة وهي تدّعي العفوية والتنصل:

ـ عن إذنكم يا جماعة... هروح التواليت أظبط حجابي وأرجع فوريرة.


أغمض رضوان عينيه بقلة حيلة وأسى على حركاتها، بينما أسرعت حبيبة مبتعدة، تاركة إياهما بمفردهما.


ساد الصمت للحظات، قبل أن تبدأ ريناد الحديث بنبرة دافئة، وهي تنظر إلى الطقس من خلف زجاج المطعم محاولةً كسر الجليد:

ـ الجو بدأ يتغير، والصيف خلاص ع الأبواب، وأنا مبحبش الصيف.


رد رضوان بهدوء ورزانة دون أن يرفع عينيه عن فنجانه:

ـ كتير من الناس من محبي الشتا.


ـ وإنت بتحب إيه؟ قصدي صيف ولا شتا؟


تنهد وقال بجمود خفيف:

ـ مبتفرقش معايا.


نظرت إليه باستغراب:

ـ إزاي؟


ثم أضاف، وكأنه يجيبها عن سؤال عادي دون أن يقصد تصنيع الأحداث:

ـ أصل أنا اتعودت على النار من زمان... كنت بقضي شغلي كله وسطها. فامش هتفرق معايا.


كشرت عيناها باستغراب وجاهلية:

ـ شغلك! ده شغل إيه ده؟


أجابها ببساطة وصراحة متناهية:

ـ شغلي في الحدادة؛ أصل أنا كنت شغال حداد.


اتسعت عينا ريناد، وخرجت منها الكلمة بعفوية صادمة تجرح الكبرياء:

ـ إيه! حداد؟ مش معقول!


نظر إليها رضوان بهدوء وثبات:

ـ هو إيه اللي مش معقول؟


أدركت ريناد وقع كلمتها واستعلاءها غير المقصود، فسارعت إلى التوضيح والتبرير:

ـ لأ، مقصدش حاجة، لكن حبيبة عمرها ما قالت حاجة زي كده.


أسند رضوان يديه أمامه على الطاولة، وظل يراقبها بذكاء ونفاذ بصيرة. لم يكن يريد أن يحرجها، ولا أن يحكم عليها من مجرد دهشة عابرة؛ هو نفسه كان قد وافق على الجلوس معها رغم ضيقه من تدبير حبيبة، ليمنح نفسه وفرصتها حقها في التعارف المكشوف.

لذلك سألها بهدوء يختبر القشور:

ـ هتفرق؟


ابتلعت ريناد ريقها بتوتر:

ـ هتفرق في إيه؟


ـ هتفرق إن كنت حداد أو ظابط؟

ضيقت ريناد عينيها، وشعرت بضيق من تعريته للمستور لم تستطع إخفاءه، لكنها لم تجد ردًا مناسبًا.


لاحظ رضوان صمتها المحرج، ولم يتعجل الحكم عليها، بل تابع بوضوح وثقة:

ـ وكنت شغال في فراشة. وكمان كملت تعليمي وأنا كبير... تلاتين سنة. زائد إني كنت عايش في حارة.


فتحت ريناد عينيها بعدم استيعاب، وتجمدت ابتسامتها اللبقة، كأنها تلقت مفاجأة ثقيلة لم تكن في حساباتها كطبيبة ورئيسة قسم:

ـ فراشة! وكملت تعليمك على كبر؟


ـ بالظبط؛ كملت تعليمي. زائد إني كنت شغال وبدرس في نفس الوقت.


ظلت تنظر إليه للحظات بشعور استعلاء زحف إلى داخلها، ثم قالت باستنكار:

ـ بس حبيبة قالتلي إنك معاك بكالوريوس إدارة أعمال، وإنك فاتح مكتبة ونفسك تفتح مشروع خاص!


أومأ رضوان بثبات:

ـ أيوه، ده اللي وصلتله دلوقتي. هي مكدبتش عليكي.


ثم تابع ببساطة تجرد الأمور:

ـ سبت الحدادة من تلات سنين. إنما حوار المكتبة ده من سنتين تقريبًا.


سألته ريناد، وكأنها تحاول أن تستوعب هذا الفارق الشاسع:

ـ وتلات سنين بس كفاية إن حياتك تتغير بالشكل ده؟


ابتسم رضوان ابتسامة خفيفة تحمل فلسفة حياته الصارمة:

ـ لأ، هي الحسبة معايا غير كده... وحسابات خاصة. لكن أقل من كده ممكن يعملوا كتير، لو الواحد قرر ما يفضلش واقف مكانه.


سكتت قليلًا، ثم قالت بصراحة باردة:

ـ بصراحة... أنا مكنتش متخيلة إن البداية كانت كده.


لم يضغط عليها، بل سألها بوقار:

ـ وكنتِ متخيلاها إزاي؟


ترددت ريناد وهي تختط أفكارها:

ـ مش عارفة... يمكن كنت متخيلة إنك بدأت من مستوى قريب من اللي إنت فيه دلوقتي.


ـ يعني إيه مستوى قريب؟


ـ يعني تعليم... شغل... بيئة... حاجات زي كده.


ظل رضوان ينظر إليها، محاولاً أن يقرأ ما خلف المفردات البراقة:

ـ وإيه المشكلة إن الواحد يبدأ من مكان بعيد ويوصل؟


ـ مفيش مشكلة.


ـ أمال إيه اللي مضايقك؟


رفعت عينيها إليه وتنهدت بمكابرة:

ـ أنا مش مضايقة.


ابتسم رضوان بهدوء أشد:

ـ تمام. أنا بس بسأل.


ساد الصمت الثقيل من جديد، حتى حركته ريناد بتساؤل:

ـ بس أكيد الفترة دي كانت صعبة عليك.


رفع رضوان كوب القهوة وأخذ منه رشفة هادئة:

ـ كانت صعبة، آه.


حاولت ريناد أن تتقبل الأمر وتقترب:

ـ وشغل الحدادة نفسه أكيد مش سهل.


ابتسم رضوان:

ـ ولا يوم قلت إنه سهل. بس كان جزء من مهم من عمري. 


ـ وكمان تسيب الورشة وتكمل تعليمك وإنت عندك تلاتين سنة... أكيد الناس حواليك استغربت.


ـ ناس كتير استغربت... وأنا كملت برضه.


نظرت إليه ريناد، ثم قالت بعجب:

ـ يعني إنت عمرك ما حسيت إنك بدأت متأخر؟


هز رضوان رأسه بنفي قاطع:

ـ أنا مشيت في طريقي، ومكنتش بحاول أسابق حد... إنك توصل أخيرًا، أفضل من إنك ما توصلش... ولا إيه؟


سكتت ريناد، وظلت كلمة "ورشة وحداد" تتردد في ذهنها بضيق طبقي لم تستطع مجاوزته، فقالت بتردد واضح:

ـ بس أنا بصراحة... متعودة على شكل معين للحياة.


ـ عارف.


ـ وإنت مش شايف إن ده ممكن يعمل فرق؟


هنا فقط، استقرت الصورة كاملة في عيني رضوان. لم يغضب ولم تتغير ملامحه، لكنه مال إلى الخلف برزانة وقال:

ـ ممكن... وعلشان كده أنا بسألك.


ـ بتسألني إيه؟


ـ عايز أعرف إنتِ شايفة الإنسان منين بيبدأ، ولا بتبصي هو وصل لفين.


ترددت ريناد، ثم أجابت بما تمليه عليها نظرتها:

ـ أكيد اللي وصله مهم.


ـ والبداية؟


صمتت برهة ثم قالت:

ـ مهمة برضه.


ـ طيب، وإنتِ بالنسبة لك البداية ممكن تمنعك تتقبلي النهاية؟


عجزت ريناد عن الإجابة، بينما ظل رضوان هادئاً كالبحر، وابتسم بوقار:

ـ أنا مش بسألك علشان أحطك في اختبار... إحنا بنتكلم مجرد دردشة عادية. لحد ما حبيبة ترجع. بس أهم حاجة حبيبة تعقل، ياريت ماتشمتيش ورا حركاتها المجنونة دي.


خفضت ريناد عينيها بحرج شديد بعد أن تيقنت أنه كشف خطتها مع حبيبة.

ظل رضوان صامتاً للحظة، ثم قال بكل أدب:

ـ وعلى فكرة، إنتِ إنسانة خلوقة وراقية.


رفعت ريناد عينيها إليه، فأكمل بصدق شديد:

ـ حبيت أدي نفسي فرصة الأول... وأديكي فرصة تعرفيني زي ما أنا.


سكت برهة، ثم أضاف:

ـ بس واضح إن اللي عرفتيه عني النهارده أهم عندك من اللي بقيت عليه دلوقتي.


تغيرت ملامح ريناد وحاولت الدفاع عن كبريائها:

ـ أنا ما قلتش كده.


ـ إنتِ مش محتاجة تقولي... أنا شايف.


تنفست ببطء وقالت:

ـ أنا بس اتفاجئت... حبيبة مهدتلي إنك معاك بكالوريوس إدارة أعمال، وإنك فاتح مكتبة، وإنك عايز تفتح مشروع... فمكنتش متوقعة إنك كنت حداد وشغال في فراشة كمان؟ قصدي يعني مقالتش حاجه من الماضي.


قال رضوان بغير خجل ولا تراجع:

ـ حضرتك قولتي أهو، ماضي! بس برضه دي حاجة أنا عمري ما أنكرتها، ولا اتكسفت منها.


ثم نظر إلى يديه الصلبتين بقناعة حقيقية:

ـ بالعكس، دي أكتر حاجة أنا فخور بيها... الورشة علمتني الشغل، والصبر، وقوة التحمل ،وإن الواحد يعتمد على نفسه. والتعليم علمني حاجات تانية... وكل حاجة في حياتي خدتني للي أنا عليه دلوقتي.


لم تجبه ريناد، واستقرت في عينيها الحيرة والتردد.

في تلك اللحظة، ظهرت حبيبة من بعيد تتطلع إليهما بعينين حذرتين. لاحظ رضوان اقترابها، فعاد بنظره إلى ريناد وقال بنبرة إنهاء ناعمة:

ـ عمومًا... أنا مبسوط إننا اتكلمنا.


ابتسمت ريناد ابتسامة باهتة:

ـ اممم وأنا كمان.


ـ بتمنالك التوفيق في حياتك.


ـ متشكره.


اقتربت حبيبة منهما، بينما ظل رضوان ثابتاً في مكانه؛ لم يكن ينبض بغضب تجاه ريناد، بل كان مرتاحاً لأنه منح الطرفين فرصة أظهرت الحقيقة بلا رتوش.

وفي تلك اللحظة بالذات، اهتز هاتف رضوان برنين مفاجئ.


ألقى نظرة على الشاشة، ثم عاد بنظره إليهما بينما حبيبة تقف بفضول تتفحص وجوههما. نهض رضوان بهدوء، وضبط سوار ساعته الفضية وقال:

ـ عن إذنكم... هعمل مكالمة شغل مهمة بره وراجع.


تحرك نحو الخارج بخطوات متسارعة، بينما كان عقله يغلي مما فعلته حبيبة. وأثناء خروجه من الباب الزجاجي، اصطدم بقوة بامرأة تدلف إلى الداخل برفقة رجل.

سقطت حقيبتها على الأرض وتناثرت محتوياتها، فالتفتت إليه بضيق وقالت بنبرة حادة:

ـ مش تفتح يا بني آدم؟!


تقدم الرجل الواقف بجوارها خطوة حازمة، ونظر إلى رضوان بنظرات متكبرة وباردة... كان هو فريد الشامي، وإلى جواره سما، التي لا يعرف رضوان شكلها إطلاقاً، ولا تعرفه هي الأخرى!


نظر رضوان إلى فريد بثبات وكبرياء يوازي قساوة عينيه، ودون أن يظهر عليه أي انكسار، خفض نظره إلى الحقيبة وقال بنبرة هادئة ورزينة تحمل كبرياءً مماثلاً:

ـ آسف.


تلاقت عينا رضوان وفريد في نظرة خاطفة ثقيلة، و بصمت غريب ورهبة خفية، كأن الأقدار نسجت خيط تصادمهما الأول في تلك اللحظة دون أن يدركا سر هذا العبور!


في طريق العودة داخل السيارة، كان الصمت أثقل من الجبال.

كان رضوان يقود بسرعة، وعيناه مثبتتان على الطريق بجمود يخفي خلفه غضبًا مشتعلًا، بينما جلست حبيبة إلى جواره متوترة، تعبث بأصابعها ولا تجد ما تقوله.

ما إن فتح رضوان باب الشقة ودخلا، حتى التفت إليها، وعيناه تشتعلان غضبًا:

ـ إنتِ إزاي تتصرفي من دماغك وتعملي الحركة الزفت دي؟


ردت حبيبة بمكابرة:

ـ وأنا عملت إيه غلط يا رضوان؟


ـ كل تصرفاتك غلط في غلط! مفكراني عيل صغير تجرجريني وراكي بكذبة رخيصة؟ وإزاي تتدخلي في حياتي بالأسلوب ده يا حبيبة؟!


وقفت حبيبة تواجهه بعدما فاض بها الكيل، وصاحت بنبرة متوترة ومختنقة:

ـ في إيه بقى؟! أنا زهقت! هو أنت مش هتتغير؟


ـ زهقتِ من إيه يا دكتورة؟!


ـ زهقت من سلبيتك! سايب نفسك خالص كده ليه؟ إنت مش هتفوق لنفسك بقى؟! اللي قدك اتجوزوا وخلفوا وعايشين حياتهم، وإنت واقف مكانك بتندب على اللي راح!


لم تستكمل كلماتها...

ارتفعت يد رضوان في لحظة غضب أعمى شلت تفكيره، ولطمت وجنتها بصفعة قوية أرجعت رأسها إلى الخلف!

ساد صمت مرعب في الصالة...


وضعت حبيبة يدها على خدها المشتعل، واتسعت عيناها بذهول وصدمة وهي تنظر إلى أخيها الذي لم يرفع يده عليها يومًا منذ صغرها.


قال رضوان بنبرة ترتجف من الغيظ والندم المكتوم:

ـ إنتِ قليلة الأدب! الظاهر إني دلعتك زيادة عن اللزوم وما عرفتش أربيكي يا حبيبة!


انهمرت دموعها حرّاقة، ودون أن تنطق بحرف، خطفت حقيبتها من فوق الطاولة، وهرولت إلى الخارج خابطة الباب خلفها بقوة عاتية.


ظل رضوان واقفًا في منتصف الصالة، ينظر إلى يده المرتجفة بذهول، وقد انقبض صدره من هول ما فعله بقطعة من روحه.


في الواحدة صباحًا،في الممر الخلفي الهادئ بقسم الأطفال، كانت حبيبة تجلس في صدر الغرفة على مقعد جانبي، تضم قدميها إلى صدرها، وتجهش ببكاء مكتوم، وقد بدا عليها أثر صدمة وجرح عميق لم تستطع إخفاءهما مهما حاولت.


هبط فارس من سيارته ودخل المشفى بخطوات مستقيمة واثقة لا تلتفت حولها. وصل إلى مكتبه، خلع سترته وجلس يرتب بعض الأوراق الفائتة، قبل أن يلقي نظرة على ساعة يده؛ لقد حان موعد مناوبته. استقام في وقفته، ارتدى معطفه الأبيض وخرج ليكمل عمله.

وأثناء مروره بالصدفة في الممر الخلفي، أوقفه صوت ونشيج خافت لشهقات تحاول الصمود. تراجع للخلف خطوتين، وتبت خطواته وهدأت حين لمس انكسار صدى البكاء. لم يستطع أن يمنع نفسه من الاطمئنان عليها، فاقترب بهدوء، ومال برأسه قليلاً وقال بنبرة تحمل اهتمامًا حاول أن يغلفه بالرسمية:

ـ دكتورة حبيبة... إنتِ كويسة؟


رفعت حبيبة رأسها سريعًا عندما فاجأها صوته، ومسحت دموعها بارتباك، محاولة أن تستعيد ملامحها الصلبة المعتادة قبل أن تجيبه:

ـ دكتور فارس! أيوه... كويسة.


نظر إليها فارس للحظات يتأمل ملامحها المجهدة، ثم اعتدل في وقفته وقال ببساطة:

ـ كويسة وبتعيطي؟


تنهدت بضيق مكسور، ومسحت دمعة أخرى تسللت إلى وجنتها رغمًا عنها:

ـ عادي... إيه الغريب فيها دي كمان؟ ما كل الناس بتعيط.


زم شفتيه وحرك رأسه موافقًا بطريقة هادئة:

ـ اممم... عندك حق.


استغربت رده السريع وحياده، ونظرت إليه للحظات قبل أن تسأله بوجل:

ـ هو حضرتك جاي هنا ليه؟


رفع حاجبًا باستنكار خفيف، فداركت موقفها سريعًا وقالت:

ـ قصدي يعني... حضرتك مناوبتك في الدور هنا ولا جاي بالصدفة؟


وضع يديه في جيبي معطفه الأبيض وقال بنبرة تلامس المزاح:

ـ أبداً... حبيت أتمشى.


فهمت أنه يداعب قلقها ويسخر من توترها، فتنهدت بسكون وسكتت. كسر هو الصمت متسائلاً بصوت أهدأ:

ـ قاعدة ليه لوحدك؟


اغرورقت عيناها بفيض من حزنها الدفين:

ـ أنا بحب أقعد لوحدي.


ابتسم فارس ابتسامة خفيفة، ونطق برصانة:

ـ طبيعي الواحد يحب القعدة لوحده؛ بس لما يكون عنده سبب قوي يخليه يرمي العالم وراه ويكتفي بركن صغير.


تنهدت بوهن وشفتان ترتجفان:

ـ أهو الركن ده عندي دلوقتي... أكبر من الحياة كلها.


شعر فارس بألمها الصادق، وأن ما بها ليس مجرد إرهاق عابر؛ فسحب كرسياً مجاوراً وجلس قبالتها تماماً. اتعدلت حبيبة في جلستها واستغربت تصرفه المباشر، لكنه بادرها بنبرة دافئة مليئة بالاحتواء:

ـ أحياناً بتيجي علينا أوقات بنحس إن طاقتنا خلصت تماماً... بس المهم مانستسلمش لليأس. أي ضيق بيعدي، وأي خنقة بتختفي مع الوقت.


لامست كلماته جرحها الغائر وذكرتها بصفعتها لرضوان، فسألته بنبرة خافضة تحمل رجاءً خفياً:

ـ طيب... واللي جرح حد غالي قوي عليه، يعمل إيه؟


رد فارس بثبات ونظرة متفهمة:

ـ يعتذر... الجرح دايمًا بيكون على قدر الغلاوة. لو جرحتي حد غالي عندك، الجرح ده هيألمك إنتِ قبل ما يألمه هو. بس لما تقدمي خطوة وتعتذري وتقولي "حقك عليا" أو "آسف"... صدقيني الجرح بيبدأ يلم، وكل ألم بينتهي.


همست بقلة حيلة:

ـ الكلام سهل يا دكتور...


ابتسم وقال بذكاء:

ـ فاكرة لما دخلتي عليا المكتب قبل كده وكنتي متعصبة جداً مني؟


قالت محاولة التذكر:

ـ أنهي مرة بالظبط؟


ضحك بخفة ناعمة وقال:

ـ أيوه... هما كتير فعلاً! فيهم مرة قولتيلي فيها: "أنت قللت مني". وأنا طبعاً مقصدش ده خالص، لكن وقتها قولتلك بدون تردد: "آسف".


نظرت إليه حبيبة وقالت بعتاب رقيق:

ـ ايوه حضرتك قولتها وقتها علشان تنهي الجدال!


رد بهدوء واثق:

ـ بالظبط... الاعتذار بينهي الجدال وبيصلح النفوس، ناهيكِ عن الأسباب والظروف. الاعتذار كفيل يداوي أي جرح جواكي.


ارتبكت من تحديقه ونبرته الصريحة وقالت:

ـ جوايا أنا؟!


ابتسم وقال بثقة هادئة:

ـ للأسف...


كشرت عينيها وقالت متصنعة الضيق لتداري حرجها:

ـ هو حضرتك لازم تضايقني؟


قال فوراً بنبرة خفيفة:

ـ آسف!


ابتسمت رغماً عنها وسكتت.


علق فارس ببراعة:

ـ شفتي؟ كلمة صغيرة محت أي حاجة ضايقتك حتى لو بدون قصد.


فهمت حبيبة في تلك اللحظة أنه كان يقدم لها درساً عملياً؛ يضايقها ليبتسم ويعتذر، لتدرك أن الاعتذار ليس مجرد كلمة تقال، بل هو بلسم يطيب القلوب ويزيل ثقل الخطأ.


نظر إليها فارس، ورأى عينيها المحمرتين الشفافتين يمتزج فيهما الحزن بالرقة، ولمس كم هي جميلة بشكل آسر ومربك. في هذه اللحظة بالذات، شعر بوميض شعور داهم يقتحم قلبه؛ إعجاب صادق وبداية حب لم يعد يستطيع إنكاره أمام نفسه. واجه اعتراف قلبه الصريح أمام جمال ملامحها وانكسارها، لكنه ضبط انفعاله، واعتدل واقفاً وقال بنبرة مهذبة:

ـ بما إنك هديتي شوية... هروح أتابع شغلي.


تحرك خطوتين للرحيل، فقالت هي بامتنان دافئ:

ـ دكتور فارس...


التفت إليها مستفهماً، فقالت بارتباك جميل وهي تتهرب من عينيه:

ـ شكراً.


ابتسم وقال بهدوء:

ـ على إيه؟


ـ إنك سألت..


ابتسم فارس أعمق وقال بنبرة هادئة:

ـ ده واجبي يا دكتورة.


تركها وغادر الممر. وما إن ابتعد قليلاً حتى اختفت ابتسامته وحلت محلها حيرة ثقيلة؛ كان يتساءل في سرّه عما يوجعها، ولماذا تبكي، وما سر تلك النوبة التي أصابتها؟ تساءل إن كان هذا الوجه الثابت الصلب يخفي خلفه كل هذا الألم. اعترف لنفسه بأنه رجل لم يعتد إخفاء ما يريده، وإذا أحب أو أراد شيئاً سعى إليه بشرف ومباشرة. مسح وجه بيده، ومضى ليكمل مناوبته والفكره تحاصره.


أما حبيبة، فقد خرجت من الغرفة ومشت في الممر الآخر وهي تمسح آخر قطرات دموعها. كانت قد هدأت كثيراً، وشعرت برغم حديثهما البسيط، أن كلام فارس وضع على قلبها ضمادة خفيفة خففت عنها ثقل الجرح وشجعتها على مواجهة خطئها.


بعد مرور بعض الوقت، وقبيل الثالثة فجرًا... كانت حبيبة تجلس خلف مكتبها بالمستشفى، تراجع شاشة هاتفها الصامت كل دقيقة بأمل تخفيه خلف كبريائها الجريح. كانت خنقتها تتضاعف مع كل ثانية تمر دون أن تتلقى اتصالاتٍ أو رسالة واحدة من رضوان يطمئن فيها عليها بعد ما حدث بينهما.

وفجأة... انفتح باب الغرفة ببطء وسكون.

رفعت عينيها بوجل، لتتفاجأ برضوان يقف عند العتبة، يحمل في يده أكياسًا ورقية، وعلى ملامحه يتجلى ألم حانٍ ودفء أبوي لا يتقنه أحدٌ غيره.

خطا إلى الداخل بخطوات موزونة، وابتسامة باهتة تطوف على شفتيه يحاول بها إماضة غضبها وامتصاص كبريائها:

ـ ممكن أدخل؟


تسمرت عيناها عليه، واغرورقت بالدموع دون أن تجيب.

تقدم نحوها بثبات، وجلس على المقعد المجاور لها تمامًا. وضع الأكياس جانبًا على الأرض، ثم أمال رأسه نحوها، يطالع وجهها الشاحب، وعينيه تتفقدان وجنتها التي ما زال أثر الصفعة يرسم عليها حمرة خفيفة.

سالت دموع حبيبة حارقة، وخفضت رأسها نحو الأرض خجلاً وألماً لم تستطع مجابهته.

تكلم رضوان بصوت مبحوح ومحمل برعشة الحنين:

ـ عاملة إيه دلوقت؟


حركت رأسها إيجاباً بنعومة وهي تبلع غصتها، وكأنها تخبره أنها بخير دون أن تسعفها الحروف؛ كانت تشعر بالخجل الشديد من نفسها، وهي تدرك في الوقت ذاته كيف أصابت قلبه الكبير بكلماتها الطائشة في موضع عميق.


مد رضوان يده، ورفع وجهها برفق شديد حتى قابلت عيناه عينيها المبللتين، وقال بنبرة تتكسر حناناً:

ـ حقك عليا يا حبيبة... أول مرة أمد إيدي عليكِ، صدقيني مقصدش خالص، محستش بنفسي.


ثم تنهد بتعب وأكمل:

ـ متزعليش مني.


خفضت عينيها وقالت بصوت خافت متهدج:

ـ أنا زعلانة من نفسي أوي يا رضوان... عمري ما كنت أتخيل إني أجرحك أو أوجعك كده.


سكت رضوان وعيناه تفيضان بالمسامحة، بينما امتدت يد حبيبة لتتشبث بيده، وأردفت بدموع متواصلة:

ـ أقسم بالله ما قصدي أي كلمة من اللي قولتها... والله العظيم أنا عايزاك أحسن وأسعد واحد في الدنيا. صعبان عليا حالك أوي، إنت ضحيت بعمرك كله علشاني... طيب وإنت؟ هو ده السؤال اللي مش بيفارقني! أنا من حقي أخاف عليك، ومن حقي أشيل همك... إنت كل حاجة ليا، ومن غيرك أضيع وأتوه.


ثم انهمرت في بكاء حار وأكملت:

ـ سامحني يا رضوان... حقك عليا.


تنهد رضوان بقلب مثقل بالحب، ورفع يده الحنون يمسح دموعها المتساقطة على وجنتيها وقال بنبرة دافئة:

ـ بنتي ما تعيطش...


ثم سكت لبرهة وأكمل برعشة صادقة تخرج من أعماق روحه:

ـ إنتِ قولتي اللي قدّي خلفوا دلوقتي! طيب ما أنا مخلف برضه! هو أنتِ مش بنتي؟ لأ، مش بنتي وبس... ده إنتِ بنت عمري كله. كبرتي قدامي سِنّة سِنّة من لما كنتي بفستان قد كف إيدي.


أخذ نفسًا عميقًا مفعماً بالحرص والاحتواء وقال بوضوح:

ـ حبيبة... أنا فاهم إنك خايفة عليا، بس حبيبتي، خوفك عليا ما يخليكيش تتصرفي من دماغك وتحطيني في موقف حرج. أنا لا عايز أحرج حد ولا حد يحرجني... وموضوع ريناد ده يتقفل نهائي، فاهماني؟


أومأت برأسها سريعاً وهي تمسح أنفها:

ـ فاهمة... آسفة، حقك عليا.


أعادت عينا رضوان تفقد خدها، ثم ابتسم ابتسامة خفيفة ليخرجها من جو الحزن:

ـ وريني كده!


وضعت حبيبة يدها مكان الصفعة وقالت بعتاب لطيف:

ـ إيدك مطرقة يا رضوان!


ابتسم وقبّل رأسها بحنان أبوي أذاب كل الرواسب بينهما:

ـ حتى وإنتِ زعلانة بتهزري يا فقر؟!


ـ أعمل إيه بقى!


ـ زعلانة مني؟


حركت كتفها بدلال الطفلة التي استعادت أمانها:

ـ على حسب... جايب إيه في الكيس اللي جنبك؟


ضحك رضوان بصوت دافئ:

ـ ما بتضيعيش فرصة إنتِ أبداً!


رفع الكيس ووضعه أمامها على المكتب، لتخرج منه علب "السوشي" التي تعشقها.


وكان يرتدي ساعته الفضية الأنيقة، فرفع يده أمامها وحرك معصمه بنبرة ينكش بها حزنها المتبقي:

ـ شفتِ الساعة دي؟ إيه رأيك فيها؟


تجاهلت الساعة وظلت صامتة، فتنهد رضوان وقال بعفوية:

ـ بفكر أبيعها...


التفتت إليه أخيراً وقالت بعتاب حاد:

ـ وماله... اعملها، ما أنت تعمل أي حاجة!


ابتسم رضوان بهدوء ورصانة:

ـ أومال هكمل تمن الشقة الجديدة منين بس؟


ضيقت حبيبة عينيها بنظرة شك ومداعبة:

ـ ساعتها بقى تكتبلي النص!


رد رضوان بضحكة صافية:

ـ لا، ما تطمعيش أوي كده... إنتِ آخرك فيها أوضة والمطبخ والحمام مشترك.


فتحت علبة الطعام وقالت بابتسامة عريضة:

ـ وماله يا أبويا، كُل حق بنتك كُل... ولسه يا دنيا ياما هنشوف!


ثم شهقت بصوت عالٍ من المفاجأة والفرحة لما رأت محتوى العلبة:

ـ سوووشي! حلاوتك يا رضوان!


ضحك رضوان يهز رأسه:

ـ والله القلم ده جه عليا بخسارة!


ضحكت هي الأخرى وهي تتناول القطعة الأولى بتمتع:

ـ لأ... إذا كان كده بقى اضرب براحتك، المهم تعبئة الكرش!


تناولت قطعة وقدمتها لقمته، فأمال رأسه بعيداً بملامح معقودة:

ـ بطلي قرف بقى!


لوت فمها بسخرية:

ـ قرف؟! خليك إنت في الفول والطعمية!


واصلا تناوُل الطعام وسط حوارات دافئة وضحكات خفيفة أعادت الدماء إلى وجهها. وفي لحظة صفاء تام، ألقت حبيبة رأسها على كتف أخيها بامتنان عميق، وارتسمت على شفتيها ابتسامة صافية وشعور بالطمأنينة.


في تلك اللحظة بالذات...

كان فارس يمر أمام الباب المفتوح مواربة؛ كان قادماً بخطوات هادئة ليطمئن عليها، وفي يده كوب قهوة ساخن أحضره لها علّه يخفف عنها ثقل ليلتها.

توقف فجأة!


تسمرت عيناه في الفراغ المفتوح أمامه... حبيبة التي تركها قبل ساعات باكية، منهارة، وتحيط نفسها بأسوار من الجليد والكبرياء أمام محاولاته للاطمئنان عليها... تجلس الآن ملاصقة لذكر آخر! تبتسم له بملامح لم يرها منها من قبل، وتسمح لنفسها بتلك الألفة العميقة والارتماء المريح على كتفه!


انقبض حاجبا فارس بشرارة غيرة عاتية لم يستوعب مصدرها، وتسربت إلى صدره ضائقة حارقة وغموض ثقيل. اعترته صدمة جرحت كبرياءه ورجولته؛ كيف لهذه الطبيبة التي ادعت الوجع والعزلة أن تكون بهذه الرقة مع غريب؟!


استدار فارس فوراً وغادر المكان بخطوات سريعة ومضطربة... وفي زحمة غضبه واشتعال صدره، انضغط كوب الورق المشتعل بين أصابعه دون أن ينتبه، فسالت القهوة الساخنة على يده تحرق جلده... لكنه لم يبالِ بحرارتها إطلاقاً؛ فقد كان هناك حريق أشد وأعتى يلتهم قلبه من الداخل.


في اليوم التالي، لم يذهب فارس إلى المشفى.


قضى الصباح في غرفته، يحاول أن يشغل نفسه بأي شيء، لكن مشهد البارحة ظل يعود إلى ذهنه بين الحين والآخر، فيجد نفسه شاردًا فيه دون قصد. ورأسه يغلي .


كانت صورة حبيبة وهي ترتمي في أحضان ذلك الغريب وتبتسم له بتلك الألفة تُعاد في ذهنه كشريط سينمائي لا يتوقف، تشعل في صدره جحيماً من الغيرة لم يعتد عليه. حاول إقناع نفسه بأنه لا يهتم، وأن حياتها الشخصية لا تعنيه في شيء، لكن كبرياءه المجروح وغيرته التي اندلعت فجأة هزمتا كل محاولات التماسك والبرود.


ألقى هاتفه على فراشه، وجلس على طرف السرير يمسك رأسه بين كفيه. حاول أن يشغل عقله الشارد؛ فتح حاسوبه ثم أغلقه فوراً، أمسك كتاباً فلم يقرأ منه سطرًا واحداً، فعاد إلى هاتفه يفتحه ويغلقه دون هدف.


وبحلول المساء، لم يعد يحتمل البقاء في أسر جدرانه الخانقة. التقط مفاتيح سيارته بسرعة، وهبط السلالم بخطوات حثيثة دون أن يفكر في وجهته بعقلانية.


انطلق بالسيارة بسرعة ناهزت الجنون نحو المشفى، وتوقف على بُعد مسافة قصيرة من البوابة الرئيسية، يقبض على عجلة القيادة بعينين تشتعلان ترقباً. وظل ينظر في ساعته بقلة صبر ينهشها التوتر حتى حان موعد انتهاء مناوبتها.


وفجأة... ظهرت حبيبة وهي تخرج من الباب الجانبي، تبدو سعيدة ومشرقة وهي تتحدث عبر هاتفها.


ضغط فارس على دواسة البنزين بقوة، فانطلقت السيارة بصفير حاد حتى توقفت بجانب الطريق. هبط منها فوراً ووقف في طريقها بصلابة مفاجئة!


شهقت حبيبة وتراجعت خطوة إلى الخلف، ووضعت يدها على قلبها من الفزع، قبل أن تنكمش ملامحها بارتباك وهي تراه قد ظهر فجأة كأنه خرج من الأرض.


عدّلت وقفتها وقالت بنبرة حادة تحاول بها إخفاء خفقان قلبها المتسارع:

ـ دكتور فارس؟!


اقترب منها خطوة ونطق بصوت مبحوح ومباشر:

ـ حبيبة... عايز أسألك سؤال.


تلفتت حولها باستغراب من اندفاعه وقالت:

ـ تسألني أنا؟! خير... في إيه؟


نظر إليها بحدة وقال بصراحة جافة:

ـ كان مين؟


تغيرت ملامح حبيبة فوراً ولم تفهم للوهلة الأولى، فسألته بوجوم:

ـ مين إيه؟ هو إيه اللي مين؟


ثبّت فارس عينيه في عينيها وقال بصرامة:

ـ مين اللي كنتِ قاعدة معاه امبارح؟


نظرت إليه بحدة، وقبل أن تجيب تذكرت حضور رضوان في الغرفة البارحة، فضايقها سؤاله بهذه الطريقة التي تطعن في خصوصيتها، وقالت باستنكار:

ـ وإنت مالك؟!


حاول أن يضبط انفعاله ونطق بنبرة واثقة:

ـ أنا مالي إزاي؟! أنا عايز أعرف... مين الراجل ده؟


رفعت حاجبها وربطت ذراعيها إلى صدرها بكبرياء:

ـ تعرف بصفتك إيه؟


توقف فارس للحظة؛ كان يعلم أن سؤالها في محله ومحرج، لكنه لم يجد إجابة تطفئ النار التي في صدره، فقال بنبرة حاول أن يحافظ فيها على هدوئه ورسميته:

ـ بصفتي زميلك، وشوفتك امبارح في موقف خلاني أسأل.


ضيقت حبيبة عينيها بنظرة تهكمية:

ـ دلوقتي بقيت زميلتك؟ هو أنا مش كنت مقيمة من يومين؟ وحضرتك الاستشاري الكبير! سبحان مغير الأحوال!


ثم أكملت بنبرة أشد قسوة:

ـ وبعدين مين قالك إن من حقك تسألني عن حياتي الشخصية أصلاً؟!


مسح وجهه بقلة صبر وهتف:

ـ مقيمة ولا دايمة ده مش موضوعي دلوقتي! أنا سألتك مجرد سؤال... جاوبيني عليه!


ردت بجمود:

ـ ودي مش إجابة سؤالي الأساسي.


سكت فارس لثوانٍ، ثم التمعت عيناه بشرارة الغيرة وقال:

ـ طيب ردي عليا... مين ده وكنتي نازلة ضحك معاه؟


احتدمت أنفاس حبيبة وقالت بصوت يقطر غضباً:

ـ دكتور فارس... لسانك وتلميحاتك دي تتلم! إنت بتتدخل في حاجات مالكش أي علاقة بيها!


صكّ على أسنانه وشخص فيها بنظرة حارقة:

ـ أنا ماسك نفسي بالعافية وسألتك سؤال عادي... أومال لو قولتلك مين اللي كنتِ نايمة على كتفه ده؟!


اشتعل الغضب في عيني حبيبة، واقتربت منه خطوة وهي تشير بأصبعها أمامه بثبات حاد:

ـ أولاً... أنا مسمحلكش تتكلم معايا بالطريقة دي خالص!


 مش علشان اتكلمت معايا مرة ولا اتنين تاخد عليها وتشيل كل التكاليف! لأ... اقف عدل واتكلم معايا عدل برضه! أنا مش أي حد، أنا حبيبة العطار... 


واللي يفكر يجيب سيرتي بكلمة ما تعجبنيش، بأوسخ شبشب في الدنيا أنسله على دماغ أهله! آه... اللي مربهوش أمه وأبوه، تربيه حبيبة العطار!


فتح فارس فمه ليعقب على موشحها البلدي الشرس، ثم أغلقه وهو ينظر إليها بذهول يمتزج بالضيق والاستغراب من هذه السليطة القاسية التي تختفي خلف رداء الطبيبة الرقيقة!


سحب نفساً عميقاً وقال بحدة أخفاها خلف رصانته:

ــ بعيدًا عن القرف اللي بسمعه ده... ومش هاجادلك فيه، أنا بس عايز أعرف هو مين! الراجل اللي كنتِ معاه امبارح ده مين؟ حد قريبك؟ ويا رب يطلع قريبك فعلًا! قولي عمك، أخوكي، خالك، أخوكي في الرضاعة... أي حد من أهلك وأنا هفهم. بس قولي، بدل ما أحط احتمالات من عندي. ردي... هو مين؟


تضايقت حبيبة أكثر من إصراره، وقالت بتحدٍّ:

ـ وإنت مالك أصلًا؟! وإنت لما كنت واقف مع واحدة في مكتبك وماسكة إيديك وإنت بتبحلقلها زي البومة، أنا جيت سألتك وقولتلك مين دي؟!


انعقد حاجبا فارس للحظة، وانتابته دهشة مفاجئة لأنها ما زالت تحتفظ بأثر ذلك الموقف القديم في ذاكرتها، ومط شفتيه محاولاً كتمان ابتسامة نصر صغيرة تكاد تفر منه، ثم قال ببساطة:

ـ بسيطة... اسألي، وأنا هجاوبك بكل صراحة!


أشارت حبيبة إلى نفسها بسخرية وضحكة باهتة:

ـ أسألك؟! وأسألك بصفتي إيه أصلاً؟!


صمت فارس، وكان السؤال هذه المرة أصعب وأعمق مما توقع.

تابعت حبيبة دون أن تمنحه فرصة للتفكير:

ـ ومين قالك إنني عايزه أعرف أصلاً؟!


رد بمكر ونبرة دافئة انخفصت فجأة:

ـ بما إنك سألتي... يبقى الموضوع في دماغك ومأثر عليكِ، وعايزة تعرفي هي مين.


ثم اقترب خطوة وواصل وهو ينظر مباشرة في أعماق عينيها بثبات آسر:

ـ زي ما أنا راحتي اتقلت، وقلبي مش على بعضه من ساعة ما شوفتك في الموقف ده!


ابتلعت حبيبة لعابها بصعوبة، وشعرت برجة عنيفة تضرب ثباتها وتوتر أرشيف مشاعرها بالكامل، فقالت بلعثمة ارتباك تحاول غزلها بالقسوة:

ـ أنا... أنا مفيش حاجة في دماغي! إنت بتحلم مع نفسك وبتتخيل ولا إيه؟! و... بقولك إيه؟ مالكش دعوة بيا تاني!


اقترب من وجهها أكثر وقال بنبرة جادة وقاطعة يحفها التهديد الصريح:

ـ أقسم بالله لأعرف هو مين... وادعي ربك إنه يكون من أرحامك!


ذهلت حبيبة من تهديده الجسور، لكنها لم تستطع تجاوز كلمته التي صرح بها دون إنذار: (قلبي مش على بعضه).


نظرت إليه ووجهها يشتعل بحمرة الارتباك والخجل، ثم استدارت وغادرت مسرعة دون أن تنطق بكلمة واحدة. كانت تشعر بتناقض عاصف يعصف بكيانها؛ فرحة، انزعاج، انبساط، وتفاؤل ممتزج بالغضب... كل شيء اشتعل في لحظة واحدة! أشارَت لسيارة أجرة وركبت مسرعة لتفر بقلبها الملتهم.


أما فارس... فقد ظل مكانه لثوانٍ، يتنفس بصعوبة وعيناه معلقتان بطيف سيارتها وهي تبتعد. بلغ به الغيظ والتخبط حداً جعله يضرب بيده بعنف على سقف سيارته، ليتصاعد صوت الضربة المعدنية في الممر المفتوح.


مسح وجهه بيده، ونظر نحو الاتجاه الذي اختفت فيه، وقال بنبرة مكتومة تحمل وعداً وتحدياً لا يلين:

ـ ماشي يا حبيبة... ماشي!


لم تكن نبرة التحدي تلك مجرد كلمات عابرة قالها فارس وطوتها الأيام؛ بل تحولت إلى حصار هادئ ومُحكم فرضه على حياة حبيبة داخل المشفى.


على مدار ثلاثة أسابيع، لم يترك فرصة إلا وحاول الاقتراب فيها؛ يهتم بتفاصيل عملها، يربكها بنظراته التي تتتبع خطواتها في الممرات، يبتسم بانتصار كلما رآها تتشتت في وجوده، ويحيطها باهتمام خاص بات يلاحظه الجميع. وفي المقابل، نُصبت من جانب حبيبة كل أسلحة الدفاع؛ تتجنب التواجد معه في مكان واحد، تغادر الغرفة فور دخوله، وترد على كلماته بأقصى درجات الجمود والجفاف لتداري اضطراب قلبها الشديد.


كانت الشرارة بينهما قد اشتعلت بالفعل؛ غيرة مكتومة منه، وكبرياء متأرجح منها، وكل منهما ينتظر اللحظة التي سيسقط فيها قناع التماسك...


غير أن نيران الغيرة والتوتر لم تكن تشتعل في أروقة المشفى وحدها في هذه الأيام؛ بل كانت هناك نارٌ من نوع آخر تُسعر في الخفاء...



في المكان الخفي الخاص بـ سما، كان الجو مشحوناً بالتوتر ورائحة الدماء والتعقيم.

كان فريد يجلس على مقعد جلدي، عاري الصدر، وغائر العينين من شدة الألم، بينما ينكمش كتفه الأيسر مع كل حركة يجريها الطبيب وهو يستخرج الرصاصة الغائرة في جسده. وقف "الجيار" بجموده المعتاد بجواره، بينما كانت "سما" تقف على مسافة قريبة، تفرك يديها بقلق وذعر لا تخطئه العين.


ما إن انتهى الطبيب وضمد الجرح، حتى ألقى بالأدوات الملوثة في الصينية المعدنية واستأذن مغادراً.

تسللت سما بخطوات سريعة، وجلست على المقعد المجاور لفريد، وامتدت يدها تلمس يده المجهدة بحنان مضطرب:

ـ ألف سلامة عليك يا فريد... سلامتك يا حبيبي!


أمال فريد رأسه نحوها، ونطق بنبرة مبحوحة يحاول بها مغالبة وجعه الخافق:

ـ الله يسلمك...


رفعت سما عينيها إليه، واشتعلت في صوته نبرة قلق ممزوجة بالغيظ:

ـ أنا عايزه اعرف إزاي ضربوا عليك نار؟!


تدخل الجيار بصوته الهادئ الحذر:

ـ شغلنا ده مفيهوش حاجة مضمونة يا مدام سما.


التفتت إليه سما بغضب حاد، وصرخت فيه:

ـ أيوه، بس سلامة فريد أهم من شغلك ده كله! أومال الحرس دول كلهم لازمتهم إيه لما ينضرب عليه نار؟!


رفع فريد يده السليمة بإشارة حاسمة، ونطق بصوت خفيض لكنه يقطع أي حوار:

ـ مش عايز أسمع صوت...


انكمشت سما وسكتت مجبورة.

خطا الجيار وقعد أمامه، ونظر في عينيه بجدية يحثه فيها على التعقل:

ـ يا ريت يا بوص تبطل مجازفة... النهاردة عدت، يعالم  المرة الجاية إيه اللي ممكن يحصل!


رد فريد بغيظ مكتوم وعينين تشتعلان بالشر:

ـ يعني كنت عايزني أسيب لهم البضاعة يا جيار؟! مش فريد اللي حد يضحك عليه أو يلاعبه!


نطق الجيار بإعجاب صادق:

ـ عارف يا بوص... والله أكبر عليك، خلصت عليهم واحد ورا التاني، وما رحمتش حد!


التفت فريد بكامل ثقله نحو سما، وقال بنبرة آمرة لا تقبل النقاش:

ـ تاخدي البضاعة وتسلميها لتايسون بنفسك... مش عايز أي غلطة!


ردت سريعاً بامتثال ناعم:

ـ حاضر يا حبيبي، متقلقش...


حاول فريد النهوض برأس مجهد وجسد متألم، ومدّ يده ببطء ليلتقط قميصه ويحاول ارتداءه، فتقدم الجيار سريعاً لينسق أكمامه ويساعده في ارتدائه بفرط حذر. في تلك اللحظة، فزعت سما وتمسكت بكتفه السليم:

ـ رايح فين؟! أنت تعبان وجرحك بينزف!


تجاهل رجاءها تماماً، ولم ينظر إليها وهو ينادي بنبرة قاطعة:

ـ يلا يا جيار... وصلني البيت.


تحرك فريد بخطوات ثقيلة يسانده الجيار، بينما وقفت سما في منتصف الغرفة، تقبض على يديها بعنف حتى ابيضت مفصلها، واشتعلت عيناها بشرارة غل قاتلة، وهمست لنفسها بمرارة وغيظ:

ـ حتى وأنت بتواجه الموت ما بتفكرش غير فيها يا فريد؟! اصبري عليا يا زاد... إن ما وديتك ورا الشمس مبقاش سما الملكي!


في طريق العودة...

كانت السيارة تقطع الليل بسرعة هادئة. فريد متكئ على النافذة، يضغط بيده على جرحه المتألم، وعيناه زائغتان في المدى.

كسر الجيار الصمت متسائلاً بنبرة عمليّة:

ـ هنعمل إيه مع حسين الملكي يا كبير؟


أنّ فريد بألم خفيف، وقال دون أن يفتح عينيه:

ـ خليك جنبه... وساعده في شغله.


انعقد حاجبا الجيار باستغراب شديد، وقال:

ـ أنا واحد مهندس... غير إنني دراعك اليمين! حاططني في شركة حسين ليه مدام عايز مصلحته؟!


سخر فريد بابتسامة باهتة وميتة ونطق بتهكم:

ـ مصلحة مين يا عبيط؟! أنا حاطك العين بتاعتي هناك... علشان لو حصل حاجة مش على مزاجي، أقولك: خلص!


رد الجيار بثبات وطاعة مطلقة:

ـ وأنا تحت أمرك يا بوص.


وصلت السيارة إلى القصر.


هبط فريد بخطوات بطيئة ومجهدة، يحاول كتمان وجعه وصك أسانه لكي لا يظهر ضعفه أمام أحد.


في هذه اللحظة بالذات، وسط ألم جرحه ونزيف جسده، شعر بحاجة عاتية لـ زاد... كان محتاجاً لحضنها، لنظرتها الخائفة، ولأن ينام في أمانها. مهما كانت سما تمنحه من اهتمام ودلال، إلا أنه لا يأتمنها ولا يشعر بالسكينة معها... الأمان بالنسبة له كان زاد، وزاد فقط.


دخل البهو، واستقبلته العاملة برعب حين رأت وجهه الشاحب، فاستند على درابزين السلم وقال بصوت مجهد ومبحوح:

ـ زاد... زاد فين؟


تراجعت العاملة خطوة إلى الخلف، وارتجفت شفتان برعب وهي تجيبه:

ـ ا، الست هانم.. سابت البيت ومشيت يا فريد بيه!


فُتحت عينا فريد على وسعهما، وشخصتا بنظرة جحيمية تُكذّب ما سمعته أذناه... طارت من عينيه كل آثار التعب والإرهاق لِيحلّ محلها جنونٌ عاتٍ وظلامٌ داكن.

قَبَض بيده على درابزين السلم بصلابةٍ غاشمة، وضغط عليه بكل ما أُوتي من غلٍّ وغضب، حتى اصطكت عظام أصابعه تحت وطأة قبضته.

ومع تلك الفورة العنيفة التي هزت جسده بالكامل، انفتحت غُرَزُ جرحه الغائر في كتفه، وتسربت الدماء من تحت الضمادة البيضاء لتصبغ ثيابه باللون الأحمر القاني، دون أن يرف له جفنٌ أو يشعر بقطرة ألمٍ واحدة من جرحه؛ فقد كان الجرح الذي انفتح في صدره أشد وأعتى من رصاصة الغدر.

يتبع......

© قصص وروايات مريم نصار — جميع الحقوق محفوظة. يُمنع نسخ هذا الفصل أو إعادة نشره كليًا أو جزئيًا دون إذن كتابي مسبق من الكاتبة.

🔔 عجبك الفصل؟ تابعي المدونةعشان توصلك الفصول الجديدة أول بأول🔔 متابعة المدونةاضغطي، سجّلي بحساب جوجل، وخلاص ✔

تعليقات✍️ أضف تعليقًا

إرسال تعليق

بحث هذه المدونة الإلكترونية