الفصل الثاني. زاد الآسمر
الفصل الثاني زاد الآسمر ٢.
تنبيه هذا العمل ملكية فكرية خاصة، ويُمنع منعًا باتًا نسخه أو إعادة نشره أو نقله إلى أي مدونة أو منصة أخرى دون إذن. وأنا غير مُسامحة في حقّي، وأي تجاوز سيتم التعامل معه بما يلزم.
بسم الله نبدأ.
كان يمشي في الحارة بخطوات بطيئة، يحمل حقيبة صغيرة في يده، بينما تتحرك عيناه بين الوجوه والبيوت، كأنه يحاول أن يتأكد من أنه عاد فعلًا إلى المكان الذي خرج منه يومًا.
خمس سنوات...
خمس سنوات مرت خلف قضبان السچن، كان خلالها كل شيء يتغير من حوله، بينما ظل هو في مكانه، يعد الأيام ولا يملك شيئًا سوى الانتظار.
لم يعد يعرف أين ذهب أصدقاؤه، ولا من بقي في الحارة، ولا كيف أصبحت حياته التي تركها خلفه.
حتى البيت الذي كان يعود إليه كل يوم لم يعد بيته.
زوجته أصبحت طليقته، وابنته التي دخل السچن وهي لم ترَ النور بعد، كبرت بعيدًا عنه.
خفض عينيه إلى الأرض، وزفر ببطء.
لم يكن يعرف إلى أين يذهب أولًا، وربما لهذا السبب كان يسير بلا وجهة.
أخرج نفسًا طويلًا، ثم أكمل سيره، محاولًا أن يشغل نفسه بأي شيء آخر، لكن عقله كان يعود إليها في كل مرة.
كان يتساءل عن أول كلمة ستقولها له إن رأته.
هل ستعرفه؟
هل ستخاف منه؟
أم ستقف أمامه كأي غريب لا يعني لها شيئًا؟
مرر يده على وجهه بضيق، ثم نظر حوله.
لم يكن يعرف حتى من أين يبدأ.
كان يعرف أنها هنا... في مكان ما داخل هذه الحارة.
يعرف أن أمها ما زالت تسكن هنا، وأن ابنته كبرت بعيدًا عنه، بينما كان هو يقضي سنواته خلف جدران السچن.
ضغط على شفتيه.
كان يريد رؤيتها.
فقط رؤيتها...
حتى لو من بعيد.
لكنه لم يكن يعرف اسمها، ولا أين تذهب، ولا حتى كيف يسأل عنها.
واصل سيره، حتى بدأت أصوات الناس تتردد من أحد البيوت القريبة.
كان هناك تجمع كبير أمام منزل يعرفه من قبل.
توقف قليلًا.
عزاء.
رفع عينيه نحو المنزل، ثم لمح بعض الرجال الذين يعرفهم، فعرف أن الأمر يخص فوزية، زوجة صبحي.
ظل واقفًا للحظات، ثم ابتعد عن المكان.
لم يكن يريد الدخول.
لم يكن يريد أن يراه أحد.
وفي الجهة الأخرى من الحارة، كان رضوان قد جاء بالفعل لتقديم واجب العزاء.
دخل إلى منزل صبحي، وجلس لبعض الوقت، واساه في مصابه، وقدم واجب العزاء، ثم خرج بعد انتهاء العزاء متجهًا إلى عمله.
كان يسير بخطوات هادئة، شارد الذهن، حين وقعت عيناه على الرجل الواقف أمامه.
توقف.
وكأن قدميه تجمدتا في مكانهما.
عزت.
لم يحتج إلى وقت طويل ليتأكد منه؛ حتى بملابسه القديمة عرفه فورًا.
أما عزت، فما إن رفع عينيه ورآه حتى توقف هو الآخر.
ظل الاثنان صامتين.
سنوات كاملة مرت منذ آخر مرة جمعتهما فيها المحكمة، لكنها لم تكن كافية لتمحو شيئًا واحدًا من الذاكرة.
صك رضوان على أسنانه غضبًا من رؤيته، وتحرك من أمامه ليتركه، فلم يكن يريد رؤيته، لكنه توقف ما إن سمع صوته.
قال عزت بصوت خاڤت
رضوان...
الټفت إليه رضوان، وكانت عيناه معلقتين به، جامدتين، لا تحملان أي ترحيب.
اقترب عزت خطوة.
إزيك؟
لم يجبه.
ابتلع عزت ريقه، ثم قال
عارف إنك مش طايق تشوفني.
جاء صوت رضوان باردًا
للأسف شوفتك.
خفض عزت عينيه للحظة، ثم قال
رضوان، أنا مش عارف أبدأ منين، بس عارف إني غلطان.
ابتسم رضوان ساخرًا
غلطان!
ثم اقترب منه، ووضع إصبعه في كتفه، ودفعه قليلًا وهو يصحح
ما اسمهاش غلطان. اسمها خاېن وجبان. فلما تيجي تقولها، قولها صح. تقول أنا خاېن وندل و واطي يا رضوان.
رفع عزت عينيه إليه.
خمس سنين عدوا يا رضوان. دفعت فيهم التمن.
رد رضوان
وأنا دفعت التمن، تمن غالي أوي بسبب خستك وقلة أصلك.
تغير وجه عزت، وقبض يده على مقبض حقيبته، بينما تابع رضوان
إنت مش بس خڼتني يا عزت. إنت بعت صاحبك لأعدائه. بعت عشرة وعيش وملح وسنين كتيرة أوي عشناها، وخليتني أدفع تمن ثقتي فيك.
صمت للحظة، لكن صورة أمه عادت إلى ذاكرته؛ تلك اللحظات الأخيرة في المشفى، والۏجع الذي لم يغادره منذ رحيلها.
قبض يده حتى ابيضت مفاصلها، ثم أمسك عزت من تلابيبه، وجذبه نحوه، وصاح فيه بكل ما يحمله صدره من قهر
أمي ماټت بسببك... راحت وضاعت مني. اتحرمت منها ومن فرحتها اللي كنت بشوفها في عينيها. اتحرمت من صوتها ودعوتها اللي بتخليني أكمل. وأختي كانت هتضيع بسببك. بسبب ندالتك.
ارتجف فك عزت، لكنه ظل صامتًا، بينما ازدادت قبضة رضوان على تلابيبه.
ليه يا عزت؟ ليه توجعني فيهم وانت عارف إنهم أغلى حاجة عندي؟ كنت عايز ټنتقم مني ونجحت في ده.
تحجرت الدموع في عينيه، واسترسل بصوت موجوع
ما لقيتش غير أمي وأختي ټنتقم مني فيهم؟ أمي اللي كانت بتعتبرك ابنها التاني... البيت اللي كان مفتوحلك واللقمة اللي قدمتهالك، والست اللي طبطبت عليك عز وجعك، تستاهل تعمل فيها كده؟ أمي راحت بسببك... ومافيش رجوع.
ارتبك عزت، وابتلع لعابه بصعوبة.
وبعد كل ده واقف قدامي وبتقولي دفعت التمن؟ احمد ربك إني ماليش في الډم، وإلا كنت دفنتك مكانك.
خفض عزت عينيه للحظة، ثم تمتم
صدقني يا رضوان، أنا ندمان... أنا وقتها ما كنتش واعي للي بعمله. الشيطان كان أقوى مني.
دفعه رضوان بعيدًا عنه، وابتسم بسخرية مريرة
الشيطان؟ الحجة اللي دايمًا بنعلّق عليها أنانيتنا وكرهنا وجحودنا لغيرنا. سبت عقلك وقلبك وضميرك، ولزقت غلك وكرهك للشيطان وإنه هو اللي خلاك تضعف وتبيع صاحبك... كأن ما كانش فيك عقل وقتها.
تراجع عزت خطوة، بينما أكمل رضوان بصرامة
بس خلاص... الكلام ده فات أوانه. وبقولك من دلوقتي امشي يا عزت. امشي وما تورينيش وشك تاني. ومش عايز أشوفك حتى لو صدفة.
انزعج عزت، وارتسم الغيظ والاضطراب على ملامحه، قبل أن ينفجر
خلاص يا رضوان، كفاية! أنا فيا اللي مكفيني. وبعدين يا أخي ما كلنا بنغلط! يعني إنت ما بتعملش أي حاجة غلط في حياتك؟ ماشي مستقيم على طول؟ يا أخي حتى افتكرلي أي حاجة حلوة. افتكر إني ياما وقفت جنبك برضه.
اقترب رضوان من وجه عزت، والڠضب واضح في عينيه، وردد بصوت غاضب
اللي اداني بلحة كانت من النخلة اللي زرعتها في بيته، ما تنساش. أنا مش هتكلم في الماضي تاني. وقتي معاك خسارة أضيعه.
ثم تراجع رضوان إلى الخلف، ومسح وجهه وضحك بسخرية، قبل أن يقول
أكبر درس اتعلمته في حياتي إني مهما عملت للناقص ما بيطمرش فيه، وإنت يا عزت عمر ما طمر فيك ولا هيطمر فيك.
تهجم وجه عزت، وشعر بالإهانة، فلم يتمالك نفسه وقال
جرى إيه يا عم رضوان؟ أنا جاي أقولك سامحني وحقك عليّ، بس إنت بكلامك ده بتعاديني يا رضوان.
وضع رضوان يده في جيبه، وتحرك خطوة ليتركه، ثم الټفت إليه وقال كلمته الأخيرة قبل أن يذهب
أنا لما بعادي باستنضف يا عزت.
ثم استدار رضوان ومضى دون أن يلتفت خلفه.
ظل عزت مكانه، يراقب ظهر صديقه القديم وهو يبتعد حتى غاب عن عينيه.
شيئًا فشيئًا، تبدلت ملامحه.
انخفضت عيناه إلى يده، فوجد أصابعه منقبضة بشدة، فشد قبضته أكثر.
كان يعرف أنه أخطأ.
يعرف جيدًا ما فعله.
لكن شيئًا داخله كان يغلي.
خمس سنوات قضاها
---
خلف القضبان...
خمس سنوات دفع فيها الثمن...
ومع ذلك، لم يكن هناك أحد مستعد حتى لأن ينظر إليه كإنسان تغير.
رفع عينيه إلى الطريق الذي اختفى فيه رضوان، ثم ركل حجرًا صغيرًا أمامه بعصبية.
كان جزء منه يعرف أنه يستحق الرفض.
لكن جزءًا آخر داخله كان يغلي من فكرة أن أحدًا لا يريد أن يمنحه فرصة.
لماذا لا يمنحه أحد فرصة؟
كان يمشي بلا وجهة محددة، يطوف بعينيه بين البيوت والوجوه، محاولًا أن يستعيد ملامح المكان الذي غاب عنه سنوات.
لكن فكرة واحدة ظلت تطارده... ابنته.
راح يسأل عنها بحذر بين أهل الحارة، حتى أخبره أحدهم باسمها غزل.
توقف للحظة، وكأن الاسم استقر في قلبه قبل أن يستقر في ذاكرته.
غزل...
ثم تأكد أنها ابنة رباب، وأنها الطفلة التي يبحث عنها، وعرف أنها تذهب إلى الحضانة الموجودة في آخر الحارة.
رفع عينيه نحو المكان الذي أُشير إليه، وتحرك في اتجاهه بخطوات مترددة.
للمرة الأولى منذ خروجه من السچن، لم يعد يمشي بلا هدف.
كان ذاهبًا ليرى ابنته...
الطفلة التي كبرت بعيدًا عنه، بينما مرت سنوات عمرها وهو خلف القضبان.
وقف أمام الحضانة من بعيد.
لم يقترب.
ظل واقفًا خلف سور منخفض، يراقب الأطفال الخارجين مع أمهاتهم.
كلما ظهرت طفلة، شعر بقلبه يضرب پعنف.
حتى ظهرت هي.
توقفت عيناه عليها.
لم يحتج إلى أحد ليخبره.
كانت غزل.
طفلته.
ابنته التي لم يرها منذ سنوات.
ظل يحدق بها عاجزًا عن الحركة.
كانت تحمل حقيبة صغيرة، وتمسك رباب بيدها، بينما تسيران في اتجاه الشارع.
وقعت عيناه على ابنته، ولم يستطع أن يزيح بصره عنها.
كانت صغيرة أمامه، لكن السنوات التي حُرم فيها منها بدت له أكبر من أن يستوعبها.
رفع يده دون وعي.
كاد يناديها
غزل...
لكن صوته لم يخرج.
خفض يده ببطء.
كيف سيناديها؟
وماذا سيقول لها؟
أنا والدك؟
هل تعرف معنى الكلمة أصلًا؟
هل رأت وجهه من قبل؟
ظل واقفًا مكانه حتى ابتعدت الطفلة مع أمها واختفتا عن عينيه.
وللمرة الأولى منذ خروجه من السچن، شعر أن هناك شيئًا واحدًا فقط يريده حقًا...
أن يسمع ابنته تناديه
بابا.
لكنه لم يملك الشجاعة ليقترب.
استدار وغادر المكان ببطء، يحمل في صدره شعورًا لم يستطع أن يسميه.
ندمًا...
اشتياقًا...
وغضبًا أيضًا.
فهو لم يكن رجلًا طيبًا أصبح طيبًا فجأة.
كان عزت يعرف ما فعله، ويعرف أنه أخطأ، لكنه لم يتقبل بعد أن يدفع ثمن أخطائه إلى الأبد.
وبعد عام، كان عزت واقفًا أمام العمارة التي تسكن فيها رباب، يرفع عينيه إلى الطابق الذي تعرفه عيناه جيدًا، وكأنه يستجمع شجاعته قبل أن يواجه كل ما هرب منه لسنوات.
أخذ نفسًا عميقًا، ثم صعد الدرج حتى وقف أمام باب شقتها.
رفع يده وطرق الباب.
لم تمر سوى لحظات حتى فُتح الباب، وما إن وقعت عينا رباب عليه حتى تجمدت ملامحها، وتراجعت خطوة إلى الخلف.
إنت تاني؟ جاي هنا ليه؟ إنت ما بتحرمش!
لم يجبها عزت، بل دخل وأغلق الباب خلفه، ثم استدار إليها وقال
أنا جاي أشوف بنتي يا رباب. بنتي اللي إنتِ حرماني منها، ولا عارف أكلمها منك، ولا تعرف إني أبوها.
اتسعت عيناها غضبًا، وردت عليه دون تردد
إنت مالكش بنات عندي، ياحبيبي. دي بنتي أنا، أنا اللي تعبت فيها وأنا اللي ربيتها. ابعد عني بقى وسيبني في حالي.
اقترب منها عزت، محاولًا أن يجعل صوته هادئًا
يا رباب، أنا اتغيرت. حاولي تصدقيني، بقالي سنة بلف وراكي علشان أثبتلك إني، والله، اتغيرت.
أبعدته عنها بسخرية، وكأن كلماته لا تعني لها شيئًا
الشياطين عمرها ما بتتغير يا عزت. أنا عمري ما أنسى اللي إنت عملته فيا، ولا اللي عملته في رضوان وعيلته.
انقبضت يد عزت، وظهر الضيق على وجهه، ثم قال
إنتِ لسه بتفكري في رضوان؟
ابتسمت رباب بحزن، وهزت رأسها
أنا لا بفكر في رضوان ولا في غيره. إنت خليتني ما أفكرش في حد. كل اللي يهمني دلوقتي بنتي وبس، والمطلوب منك إنك تبعد عنها وتسيبنا في حالنا.
اقترب منها مرة أخرى، وقد بدا في عينيه شيء من التوسل
صدقيني يا رباب، أنا والله العظيم بحبك وشاريكي، واللي حصل مني زمان ده كان ڠصب عني. السچن خلاني أعقل وأحرم. اديني فرصة واحدة بس، فرصة أرجعلك ونعيش أنا وإنتِ وبنتنا.
دفعته رباب بعيدًا عنها، وارتفع صوتها من شدة الڠضب
إيه الجنان اللي إنت بتقوله ده؟ أنا أرجعلك تاني خلاص؟ ما بقاش في الدنيا غيرك؟ ده إنت لو آخر واحد في الدنيا مش هرضى بيك! هو أنا خدتك الأول برضايا علشان دلوقتي أوافق أرجعلك؟ ده أنا أبقى مچنونة!
تراجع عزت خطوة، وقد أصابته كلماتها في كبريائه، ثم قال بضيق
إنتِ ليه مش راضية تسامحيني؟ إنتِ ليه قلبك أسود كده؟ مش كفاية اتسجنت بسببك؟
ضحكت رباب ضحكة قصيرة موجوعة، وقالت
لا يا حبيبي، اتسجنت بسبب أفعالك. ومعلش، اتعلمت السواد ده من قلبك لما كنت بتنزل فيا ضړب وتكسر عضمي. بقولك إيه يا عزت، ارجع مكان ما كنت، وخليني يا خويا أربي بنتي بعيد عنك. غزل دلوقتي عندها سبع سنين، والبنت مؤدبة والناس بتحبها. ما تقربش منها علشان الناس ما تكرههاش. ما توقفش حالها.
توقفت ملامح عزت عند جملتها الأخيرة، وكأنها أصابته في مكان لم يتوقع أن تؤلمه.
يعني الناس هتكره بنتي بوجودي جنبها؟
سكتت رباب قليلًا، ونظرت إليه بنظرة أنهكها كل ما مضى، ثم قالت بهدوء
بص يا ابن الناس، أنا لا عايزاك تأذيني ولا أذيك. كل اللي أنا عايزاه إني أربي بنتي بعيد عن المشاكل. أنا سبت بيت أبويا وأمي وجيت قعدت في بيت جدي علشان أعرف أعيش. سيبني يا عزت، سيبني وروح لحال سبيلك.
وقبل أن يرد، جاء صوت خطوات صغيرة من داخل الشقة.
استدار عزت ناحية الصوت، فظهرت غزل من غرفتها، ثم ركضت نحو أمها وتعلقت بها، قبل أن ترفع عينيها إلى الرجل الغريب الواقف أمامها.
هو مين ده يا ماما؟
اعتصر قلب عزت.
ظل ينظر إليها كأن العالم كله توقف في تلك اللحظة.
أما رباب، فنزلت على ركبتيها أمام ابنتها، وقد عجزت للحظات عن اختيار الكلمات التي يمكن أن تقولها.
وقبل أن تنطق، اقترب عزت منها، وانحنى قليلًا أمام غزل، وقال بصوت ارتجف رغم محاولته التماسك
أنا يا غزل... أنا أبوكي يا حبيبتي.
رفعت غزل عينيها إليه، ثم التفتت إلى أمها باستغراب
هو إنتِ يا ماما مش قلتِ إن بابا ماټ؟
تجمد عزت في مكانه.
اتسعت عيناه، وكأنه لم يفهم ما سمعه للتو.
ثم الټفت إلى رباب مصدومًا
إنتِ قلتِ لبنتك إني مت يا رباب؟
ارتبكت رباب، ولم تجد ما تقوله.
أسرعت بوضع غزل خلف ظهرها، وكأنها تحاول أن تحميها من كل ما يمثله الرجل الواقف أمامها.
ثم قالت بحزم
امشي يا عزت، امشي دلوقتي وسيبنا في حالنا. ما تجيش تهد اللي أنا ببنيه.
ظل عزت ينظر إليها طويلًا، ثم إلى غزل المختبئة خلفها.
كان في عينيه سؤال، وعتاب، وۏجع أكبر من أن يجد له كلمات.
وفجأة، تبدلت ملامحه.
اشتد فكه، وقبض على يديه، وظل صدره يعلو ويهبط وهو ينظر إليها بنظرة غاضبة، تختلط فيها الخيبة بالمرارة.
لكنه لم يقل شيئًا.
استدار وغادر.
أغلق الباب خلفه، ومشى في الشارع بخطوات ثقيلة، لا يعرف إلى أين يذهب، ولا من أين يبدأ من جديد.
كان قد خرج من السچن وهو يظن
---
أن أصعب ما ينتظره هو مواجهة الماضي...
لكنه لم يتخيل أن يكون أقسى ما يواجهه أن تقف ابنته أمامه ولا تعرفه، وأن تكون الصورة التي تحملها عنه في ذهنها أنه رجل ماټ منذ سنوات.
في الداخل، هوت رباب على ركبتيها، واحتضنت غزل بقوة، بينما كانت الصغيرة تنظر إليها بحيرة.
مررت رباب يدها على شعرها، وانهمرت دموعها دون أن تشعر.
حقك عليا يا بنتي... كان نفسي أختارلك أب تفتخري بيه، بس نصيبي كده، هعمل إيه؟ بس أنا هعمل اللي عليا، وأوصلك لبر الأمان.
عاد عزت إلى الحاضر على صوت صاحب الورشة يوبخه، بعدما أفسد عليه العمل أكثر من مرة بسبب شروده، محذرًا إياه من الطرد إن استمر على هذا الحال.
اكتفى عزت بالصمت، وتنهد في استسلام، ثم عاد إلى عمله؛ فما باليد حيلة، ولم يكن أمامه باب رزق آخر يتمسك به.
كانت تجلس في حديقة الفيلا، تراقب قاسم الذي جلس أمامها برفقة إحدى الخادمات التي كانت تلاعبه وتسلّيه.
وبعد وقت، ألقت نظرة على الساعة، فوجدت أن الثامنة مساءً قد اقتربت، بينما كانت تنتظر زيارة والدها الذي أخبرها أنه سيأتي إليها هذا المساء.
بدأ الملل يتسلل إليها من طول الانتظار، فنهضت وأخبرت الخادمة أن تأخذ قاسم إلى غرفته وتبدل له ملابسه بأخرى نظيفة، ثم ولجت إلى الداخل. وقبل أن تصعد الدرج، صدح هاتفها، فكان والدها يخبرها أنه اقترب من الفيلا، ولكن الطريق مزدحم بعض الشيء، لن يمضي نصف ساعة حتى يصل.
صعدت مسرعة إلى غرفتها، ووقفت أمام المرآة تتفقد هيئتها جيدًا. وضعت بعض مساحيق التجميل، ثم بدلت ملابسها بفستان أنيق أبرز جمالها، وأضافت إليه أحمر شفاه قاتمًا زاد ملامحها جمالًا.
عادت تنظر إلى انعكاسها في المرآة، وأخذت نفسًا عميقًا، ثم زفرته ببطء، قبل أن ترتسم على شفتيها ابتسامة صغيرة.
وما إن سمعت صوت بوابة الفيلا، حتى علمت بوصول والدها، فنزلت مسرعة لاستقباله. وما إن رأته حتى ألقت نفسها بين ذراعيه، وكأن سنوات الغياب لم تكن لتروي شوقها إليه.
ضحك حسين وهو يجلس إلى جوارها قائلًا
يا سلام! بتسلمي عليا كأنك ما كنتيش قاعده معايا، من يومين!
ابتسمت وهي تقول
أعمل إيه بس يا بابا، بتوحشني جدًا.
وإنتِ كمان يا زاد يا بنتي بتوحشيني والله. إنتِ ما تعرفيش قرار رجوعك مصر ده رجع روحي ليا إزاي.
ثم نظر إليها معاتبًا
تمن سنين وأنا بتحايل عليكي ترجعي حتى تعيشي معايا، وجوزك يا ستي يباشر شغله هناك، ويبقى ينزلكم وقت للتاني، بس أعمل إيه بقى؟ اتعودت منك على العناد وبس.
ابتسمت بخفة، وهي تزيح خصلات شعرها خلف أذنها، وقالت
حضرتك عارف إن قاسم لازم يتربى معايا ومع باباه، ما حبيتش إني أحرم قاسم من فريد.
تأملها والدها للحظات، ثم سألها
وبمناسبة سيرة فريد بقى، قوليلي، إنتِ مبسوطة يا زاد؟ مرتاحة معاه يا بنتي؟
ارتجفت شفتاها بارتباك، وحاولت إخفاءه سريعًا، قبل أن تجيبه بفرحة مصطنعة
طبعًا يا بابا، مبسوطة جدًا. حضرتك ما تعرفش بيعمل إيه علشان أكون مبسوطة، مش حارمنا من أي حاجة.
هز حسين رأسه في رضا، وقال
طيب الحمد لله، وأنا مش عايز أكتر من كده. تكوني مبسوطة وبس.
أخذت زاد مفتاح سيارة ووضعته على الطاولة أمام والدها، وهي تقول
اتفضل مفتاح العربية. سوري بقى، حضرتك عارف لما رجعت كل حاجة كانت مكركبة، والعربية كانت مقفول عليها في جراچ الفيلا من تمن سنين. وصعب إني أتصرف وقتها، فطلبت عربيتك أعمل بيها كام مشوار.
تعجب حسين
إنتِ بتهزري يا زاد؟ مستوعبة اللي بتقوليه؟ يا بنتي عربيتك برضه موجودة عندي زي ما هي من قبل ماتتجوزي. زائد إن كل حاجة تحت أمرك وملكك يا حبيبة أبوكي. شيلي المفتاح ومتزعليش.
ابتسمت زاد
حبيبي يا بابا، مقصدش تزعل مني والله. ولكن فريد لما عرف إني أخدت عربيتك اضايق جدًا. وقال طول ما هو موجود هيتكفل بكل حاجة.
وبعد حديث وإقناع زاد له، أخذ المفتاح، ثم نظر حوله وسألها
أمال حفيدي فين؟ أنا جايب له معايا شوية لعب هتعجبه خالص.
ضحكت وأجابته
كان مستنيك في الجنينة، بس بهدل هدومه. الدادة بتغيرله، هينزلك حالًا.
ابتسم حسين بحنين، وقال
تعرفي يا زاد، أول ما شفت حفيدي حسيت إني صغرت عشرين سنة.
دعت له بحب
ربنا يديك الصحة وطول العمر يا حبيبي.
ثم همت بالوقوف قائلة
ثواني هنادي الشغالة تجهز العشاء.
لكن حسين أشار لها أن تنتظر
لا لا، أنا مليش نفس، إنتِ وحشاني. اقعدي معايا.
وقبل أن تجيبه، جاءهما صوت فريد من خلفهما، بعدما عاد من عمله
ودي تيجي برضه يا عمي؟ حضرتك تكون موجود ومتتعشاش معانا.
اقترب منه وصافحه، ثم الټفت إلى زاد.
توقفت عيناه عندها للحظة، وبدا واضحًا أن أناقتها فاجأته. أخذ يتأملها بصمت، وكأن عودتها لم تكن كافية وحدها لتربكه، فجاء حضورها أمامه على تلك الهيئة ليزيد الأمر تعقيدًا.
رأت زاد نظرته إليها، فابتلعت ريقها بتوتر. شعرت برغبة في الابتعاد عنه، لكن وجود والدها منعها من ذلك، فتماسكت وظلت واقفة بابتسامة مصطنعة ترحب به، بينما كانت تحاول جاهدة ألا تفضح عيناها ما تشعر به.
اقترب منها فريد قائلًا
إيه الجمال ده يا زاد؟
ثم قبل وجنتها بابتسامة
لا، ده أنا أجيب عمي يقعد معانا على طول بقى.
سحبت يدها من يده سريعًا، وقالت بأنفاس متوترة تحاول السيطرة عليها
أنا... أنا هروح أقولهم يحضروا العشاء، بعد إذنكم.
ابتعدت، بينما ظل فريد يطالعها بعينيه حتى جلست بعيدًا عنه، ثم جلس أمام حسين.
بجد شرفتني النهاردة يا عمي.
ابتسم حسين وقال
الله يشرف مقدارك يا فريد يا ابني.
وفي تلك اللحظة، هبط قاسم، وما إن رأى والده وجده يجلسان حتى اقترب منهما بهدوء، ووقف واضعًا إصبعه في فمه.
ابتسم له جده وناداه، لكنه لم يجبه، فشجعه فريد على مصافحة جده. اقترب قاسم منه، صافحه، ثم جلس إلى جوار والده يراقبهما في صمت.
داعب فريد شعر صغيره، ثم الټفت إلى حسين قائلًا
الجيار كلمني امبارح.
تقلص وجه حسين وقال
ما تجيبليش سيرته يا فريد، الجيار تعدى حدوده في الشغل معانا.
ابتسم فريد وقال
معلش يا عمي، اديله فرصة تانية.
رد حسين بحزم
يا ابني ما ينفعش، ده كان عايز ياخد رشوة من منافسين ويضحك عليهم كمان، عايز يشوه سمعتنا.
تفهم فريد موقفه وقال
الجيار شرحلي كل حاجة، ومعترف بغلطه وندمان، وأنا كمان مسكتلهوش، وقلتله اللي حضرتك هتقول عليه هيعمله، ولو حضرتك رافض ترجعه فهو حقك، لأن سلامة شركتك وسمعتها أولًا وأخيرًا.
حرك حسين رأسه وقال
ما عنديش استعداد دلوقتي، الشركة مش ناقصة مشاكل. كفاية الجرد السنوي، قرب ودي لوحدها شغلانة.
ثم نظر إلى فريد وسأله
وإنت شغال في إيه دلوقتي؟ أنا عارف إنك بتحب تنوع.
ابتسم فريد وقال
والله يا عمي، آخر صفقة في ألمانيا عملتها كانت تجارة المعدات الثقيلة، ومكسبها ما كانش مجزي، بس دلوقتي اتجهت للسيارات. سوقها حلو وشغال ومكسبها الدوبل.
حرك حسين رأسه بإعجاب
شغال وحلو برضه، ها، بالتوفيق يا ابني.
ابتسم فريد وقال
متشكر يا عمي، حقيقي... نورتنا النهاردة.
جاءت زاد إليهم، وقالت بابتسامة هادئة
اتفضلوا، العشاء جاهز.
نهض حسين من مكانه، واتجه معها نحو غرفة الطعام، بينما
---
تقدمت زاد بخطوات هادئة.
وما إن اقترب منها فريد ومد يده ليمسك يدها، حتى أسرعت هي وأمسكت بيد قاسم، متقدمة عنه بخطوة، ثم أجلسته إلى جوارها على السفرة.
توقفت يد فريد في الهواء للحظة، وبقيت عيناه معلقتين بها. ثم أنزل يده بهدوء، وقد فهم ما تعمدت فعله.
حرك رأسه ببطء، بينما أخفت زاد توترها وهي تنشغل بترتيب مقعد قاسم، متعمدة ألا تلتقي عيناها بعينيه.
لم يتبادلا كلمة واحدة.
كل ما حدث كان في صمت... حتى لا يلحظ حسين شيئًا.
داخل المشفى الحكومي كانت حبيبة تمر على مرضى قسم الأطفال برفقة إحدى الممرضات، تتوقف عند كل سرير لتراجع حالة الأطفال وتطمئن على استقرارهم.
وحين وصلت إلى أحد الأسرة، توقفت أمام طفل في الثامنة من عمره، كان قد خضع قبل يومين لعملية استئصال اللوزتين واللحمية.
نظرت إلى الملف المعلق بجوار السرير، ثم إلى الطفل، فبدت وجنتاه محمرتين وملامحه مرهقة.
وضعت يدها على جبينه، ثم قالت للممرضة
قيسيلي حرارته.
وبعد لحظات، أجابتها الممرضة
تمانية وتلاتين ونص يا دكتورة.
عقدت حبيبة حاجبيها، وفتحت الملف.
من إمتى؟
أجابت الأم بقلق
من حوالي ساعة، وقلت للممرضة.
تابعت حبيبة القراءة، ثم سألت
شرب كويس؟
هزت الأم رأسها.
شوية صغيره بس... حلقه بيوجعه.
نظرت حبيبة إلى الممرضة.
آخر جرعة باراسيتامول إمتى؟
من أربع ساعات.
أغلقت حبيبة الملف بضيق.
استدعوا دكتور الحاله.
وبعد دقائق، ظهر فارس في القسم، اتجه إلى السرير دون عجلة، ومر من أمامها كانه لم يراها ومد يده إلى الملف.
حرارته كام؟
الممرضه
تمانية وتلاتين ونص يا دكتور.
بدأ يفحص الطفل بهدوء، تفقد حلقه، وتأكد من عدم وجود ڼزيف، ثم سأل الأم عن السوائل والقيء والألم.
وضعت حبيبه يدها في جيب البالطو وقالت
شربه قليل من إمبارح.
لم ينظر إليها، واكتفى بمراجعة الملف.
ال، كمية السوائل اللي شربها، محتاج، يشرب كمية أكبر.
رفعت حبيبة حاجبها.
والحرارة؟
نتابعها.
تمانية وتلاتين ونص بعد عملية!
ظل يكتب في الملف وكأنها لم تقل شيئًا.
عارف.
وحضرتك مش شايف إنها محتاجة تدخل؟
رفع عينيه إليها للحظة قصيرة، ثم أعادهما إلى الورقة.
التدخل مش معناه Antibiotic، مضاد حيوي، لمجرد إن الحرارة 5.
وأنا ما قلتش مضاد.
توقفت يده عن الكتابة للحظة.
كنتِ هتقولي.
رمقته بضيق.
أنا بس بقول إن الطفل سخن وشربه قليل.
ودي ملاحظة صح.
نظرت إليه باستغراب.
أهو! يعني أنا صح.
ما قلتش إنك غلطانة.
بس بتتكلم كأني مش فاهمة.
رفع فارس عينيه إليها أخيرًا، نظرة قصيرة وهادئة، ثم قال
إنتِ عايزة الكلام بالطب ولا بالطريقة؟
سكتت لحظة، ثم قالت
بالاتنين.
عاد إلى الملف، وقال ببرود
بالطب حالة الطفل مستقرة، مفيش ڼزيف، ومفيش علامات واضحة دلوقتي تشير لعدوى. نكمل خافض الحرارة حسب الجرعة المحسوبة للوزن، ونركز على السوائل، ونعيد قياس الحرارة ونشوف الاستجابة.
ثم رفع عينيه إليها مرة أخرى.
بالطريقة؟ دي حالتي، وأنا المسؤول عنها.
صكت على أسنانها غيظاً منه؛ قالها ببساطة، ثم أغلق الملف.
اغتاظت حبيبه واستدارت لتغادر، لكنه لمح بطاقة التعريف المعلقة على معطفها الأبيض.
توقف لحظة، ثم قال دون أن ينظر إليها
دكتورة... إنتِ بقالك قد إيه هنا؟
التفتت إليه.
سنتين.
رفع عينيه إلى بطاقة التعريف مرة أخرى، ثم قال ببرود
ولسه مقيمة؟
ضيقت عينيها.
أيوه. ولسه سنة.
أومأ وكأن الأمر تأكد له.
عشان كده.
عشان كده إيه؟
نظر إليها نظرة قصيرة، ثم قال
لسه بدري على الثقة الزايدة.
اتسعت عيناها.
ثقة زايدة؟!
لكنه كان قد أعاد نظره إلى الملف.
لما تخلصي إقامتك وتبقي أخصائية، ابقي جادلي دكتور ال بتاعك براحتك.
ثم ترك الملف مكانه، وتحرك مبتعدًا دون أن ينتظر ردها.
وقفت حبيبة تحدق في ظهره للحظات، وقد احمر وجهها من الغيظ عضت شفتيها بغيظ.
بارد... مستفز... ومغرور.
ثم نظرت إلى بطاقة تعريفها، قبل أن تتمتم
وانا علشان ما تخصصتش يقوليمقيمة... ماشي يا دكتور الغبره أنت. والله ما هعديهالك على خير.
غادر حسين الفيلا بعد سهرة قضاها مع ابنته وحفيده، غير عالمٍ أن الابتسامات التي رآها لم تكن تشبه تمامًا ما يحدث خلف أبواب هذا البيت.
وما إن خرج، حتى نادت زاد الخادمة وطلبت منها أن تأخذ قاسم ليحصل على حمام دافئ ويستعد للنوم، وأخبرتها أنها ستأتي إليه بعد قليل لتساعده على النوم.
أخذت الخادمة قاسم وصعدت به، بينما ظل فريد جالسًا في مكانه ينفث سېجاره، يراقب زاد بعينين صامتتين.
تحركت هي إلى الأعلى، وحين دخلت غرفتها بدلت ملابسها، ثم وقفت أمام المرآة تنزع قرطها من أذنها.
لم تسمع خطواته، لكنها شعرت بوجوده قبل أن تراه.
كان فريد قد أطفأ سيجارته وصعد خلفها.
وما إن انعكست صورته في المرآة حتى فهمت ما يريده، فاستدارت سريعًا وتحركت نحو الخزانة، محاولة أن تخلق بينهما أي مسافة.
أغمض فريد عينيه للحظة، وأخذ نفسًا عميقًا محاولًا أن يكبح الضيق الذي بدأ يتصاعد داخله، ثم فتحهما والټفت إليها.
اقترب منها ببطء وقال
هو مش خير يا زاد!
ابتلعت ريقها، وقالت وهي تحاول أن تبدو هادئة
أنا تعبانة وعايزة أنام. ممكن؟
فرك كفيه ببعضهما، محاولًا امتصاص غضبه، ثم وقف أمامها مباشرة.
حقك طبعًا. بس مش قبل ما أعرف مالك!
تغيرت ملامحها في لحظة، وتجاهلت وجوده أمامها، ثم فتحت الخزانة تبحث عن شيء يشغلها عنه.
اختفى الهدوء من وجهه تمامًا، وحل محله ضيق واضح. كان تجاهلها له بالنسبة إليه استفزازًا لا يستطيع تجاوزه.
صك على أسنانه، ثم تحرك نحوها فجأة، وأمسك بذراعها وجذبها إليه بقوة، حتى شعرت پألم قبضته يخترق ذراعها.
إيه؟ مش بكلمك يا زاد؟ ولا مش سامعة تاني؟
توقفت للحظة، ونظرت إلى يده التي أحكمت قبضتها حول ذراعها.
لم يكن الألم وحده ما ظهر في عينيها.
كان هناك ضيق، ونفور، وتعب بدا وكأنه أقدم من هذه اللحظة بكثير.
حاولت جذب ذراعها من قبضته، وألقت ما في يدها أرضًا، ثم قالت بضجر
لأ، مش سامعة. مش سامعة يا فريد.
نظر إليها فريد بابتسامة هادئة، وكأن غضبه السابق لم يكن موجودًا، ثم ألقى نظرة على ما ألقته أرضًا. حك ذقنه ببطء، وظل يتأملها بتلك النظرة التي جعلتها تتوتر رغمًا عنها.
ثم قال بهدوء
القطة هتخربش ولا إيه؟
وضع يده على وجنتها قائلًا بابتسامة
كنت فاكر إن مفاجأتي هتعجبك، بس واضح غير كده.
نزعت يده عن وجهها فورًا، وكأن لمسته لم تعد تحمل لها أي شيء من الأمان، وردت بسخرية لاذعة
مش لما تكون قاصد إنك تفاجئني بجد، بس أنا عارفة قصدك إيه من عملتك دي.
ظل يتأمل عينيها وجمالها، وكأن كلماتها الغاضبة لم تكن تعنيه بقدر ما يعنيه منظرها أمامه. مد يده إلى خصلات شعرها وأمسك بها بين أصابعه، ثم قال
لا، فهميني قصدي إيه يا روحي؟ أنا حبيت أفاجئك وأفرحك بإني رجعتلك.
أبعدت يده عنها وكأنها شوكة تغرزها في جسدها، وقالت بضيق لم يعد يحتمل المزيد
بطل تكذب على نفسك وعليا، لما عرفت إني عايزة أرجع مصر، قولتلي وماله ارجعي إنتِ وقاسم، وشهرين وهتحصلنا. أنا وقتها صدقتك وقولت يمكن اتغير. ويدوبك أرجع من كام يوم بس وتكلمني وتقولي إنك مشغول الفترة دي ومش راجع، وأرجع ألاقيك قدامي، ده تسميه إيه؟
ابتسم على ڠضبها، وكأنه يستمتع برؤيتها تحاول انتزاع إجابة يعرف أنها لن ترضيها، وقال
سميه حب، عشق، هيام.
ضحكت بسخرية، وبدت المرارة في
---
ضحكتها أكثر مما بدت السخرية، ثم أكملت عنه
أسميه شك، عدم ثقة.
زم شفتيه وقال
أشك فيكِ إنتِ؟ مستحيل أشك فيكِ.
عادت إليها الأعوام العشر دفعة واحدة.
عشر سنوات كاملة قضتها وهي تحاول أن تفهمه، أن تجد تفسيرًا لتصرفاته، أن تصدق حين يطمئنها، وأن تكذب إحساسها حين يخبرها بأن وراء كلماته شيئًا آخر.
نظرت إليه بشرز وعدم رضا، إلا أن فريد اقترب من أذنها أكثر، وهمس ليستفزها، وكأنه يعرف تمامًا أين يضع كلماته حتى تصيب أضعف مواضعها
إنتِ الوحيدة اللي عمري ما أشك فيها، عارفة ليه؟
أغمضت عينيها.
كانت تعرف الإجابة جيدًا.
بل ربما حفظتها أكثر مما حفظت اسمه.
قبضت على يديها بقوة، حتى انغرست أظافرها في راحتيها، فقط لتتماسك وتسمع كلماته التي تعرف أنها ستشق قلبها نصفين.
إنتِ اتجوزتي قبل كده يا زاد... اتجوزتي وعشتي مع راجل تحت سقف بيت واحد، وكان قدامه كل حاجة ممكن أي راجل يتمناها في ست، ومع ذلك خرجتي من جوازك زي ما دخلتيه... من غير ما يلمسك، من غير ما يشوف فيكي الست اللي تستحق تتحب أو حتى تتشاف.
وثبت عينيه في عينيها، ثم ابتسم ابتسامة باردة
وقتها فهمت حاجة مهمة جدًا... إن المشكلة مش فيه، المشكلة فيكي إنتِ. جمالك اللي إنتِ فاكرة إنه يخلي الرجالة تتجنن عليكي، طلع ولا له قيمة. حلاوتك دي كلها ما حركتش فيه شعره، ووجودك قدامه ما كانش كفاية يخليه يشوفك بالشكل اللي إنتِ متخيلاه لنفسك.
ثم نظر إليها من أعلى إلى أسفل، وقال ببرود
إنتِ مش فاشلة كزوجة وبس يا زاد... إنتِ فاشلة كست. فاشلة كحبيبة، وفاشلة كأم، وفاشلة حتى في إنك تخلي الراجل اللي عايش معاكي يحس إنه عايزك.
ولكن....
ثم أكمل بمكر خبيث
أنا بس يا زاد... فريد الشامي، اللي عملتلك قيمة وسعر. أنا اللي خليتك تعرفي إن ليكي مكان، وإن ليكي قيمة، وإنك تستاهلي حد زيي. بس قبلي؟ مفيش حد شاف فيكي اللي أنا شفته... ومفيش حد كان هيديكِ اللي أنا اديتهولك.
توقفت أنفاسها للحظة.
لم تكن الكلمة جديدة.
ولا الاتهام.
ولا الطريقة التي كان يعيد بها تذكيرها بماضٍ لم يكن لها ذنب فيه.
لكن تكرار الشيء المؤلم لا يجعله أقل ألمًا، بل يجعله أعمق.
اقترب منها أكثر، وأمسك فكها بيده، وضغط عليه بقسۏة أجبرتها على رفع وجهها إليه، ثم قال بنبرة حادة
ما تنسيش الكلمتين دول، فريد الشامي هو الوحيد اللي عمل لبنت المالكي سعر.
هبطت دموعها دون استئذان، كأن عينيها عجزتا عن حمل المزيد.
حاولت أن تتماسك، لكنها لم تعد قادرة.
أبعدته بيديها بعيدًا عنها، وصړخت به بعد صبر دام لسنوات قاټلة
كفاية بقى، إنت إيه ما بتحسش بكلامك القذر ده؟ واحد غيرك يفرح، مراتك محدش لمسها غيرك لكن إنت عايشتني في سواد، ضحكت عليا وخدعتني، مثلت عليا دور الشهامة.
ارتجف صوتها، وانهمرت دموعها وهي تنظر إليه پقهر
ومن يوم جوازنا وأنا عايشة في هم، وقلة قيمة، وتعب نفسي ما خلصش! كل يوم بتكسر فيا حاجة، وكل مرة أقوم ألمّ نفسي علشان أقدر أكمل... لحد ما بقيت مش عارفة أنا مين ولا إيه اللي فضل مني!
وضعت يدها على صدرها، كأنها تحاول التقاط أنفاسها
أنا کرهت حياتي معاك. کرهت كل يوم عشته وأنا مراتك، وکرهت نفسي وأنا بقبل أعيش بالطريقة دي!
ثم رفعت عينيها إليه، وقالت من بين دموعها
طلقني يا فريد... خلي عندك ډم مرة واحدة في حياتك، وطلقني. سيبني أعيش باقي عمري من غير ما أفضل كل يوم أدفع تمن غلطة ارتكبتها في حق نفسي وإني وافقت عليك.
خرجت الكلمات من صدرها دفعة واحدة، محملة بكل ما ابتلعته طوال السنوات الماضية.
كانت ترتجف.
لا من الخۏف وحده، بل من الإنهاك أيضًا.
إنهاك امرأة ظلت سنوات تحاول أن تحافظ على شيء يصر الطرف الآخر على هدمه كل يوم، ثم يعود في اليوم التالي ليطلب منها أن تتصرف وكأن شيئًا لم يحدث.
فتح عينيه بدهشة.
بدت كلمة طلاق وكأنها نزعت عنه للحظة كل أقنعته الهادئة.
اقترب منها مسرعًا، وساعدها في النهوض، ثم أجلسها على الفراش وجلس أمامها ممسكًا بيدها، وكأن الرجل الذي كان منذ لحظات يضغط على فكها لم يكن هو نفسه الجالس الآن أمامها بهذه النبرة الراجية.
مسح دموعها وقال
إيه اللي إنتِ بتقوليه ده يا زاد؟ عايزاني أطلقك؟ إنتِ مش عارفة إني ما أقدرش أعيش من غيرك، إنتِ مراتي وحبيبتي ومستحيل أبعدك عني.
نظرت إليه بعينين غارقتين في الدموع، عاجزة عن استيعاب التناقض الذي يقف أمامها.
كيف يستطيع الرجل نفسه أن ېجرحها إلى هذا الحد، ثم يمسك يدها بهذه الرقة؟
كيف يستطيع أن يخبرها أنها لا تساوي شيئًا، ثم يخبرها بعد لحظات أنه لا يستطيع الحياة من دونها؟
وكأن الألم والحنان عنده وجهان لشيء واحد.
رفع ذقنها برفق هذه المرة، محاولًا أن يعيد إليها هدوءها، وقال بنبرة طبيعية، كأنه يريد إغلاق الحديث قبل أن يتسع أكثر
يلا يلا يا حبيبتي امسحي دموعك. وخدي دش ونامي، إنتِ تعبانة ومرهقة. وبكره هتبقى زي الفل.
ظلت تنظر إليه.
لم تجد في نفسها طاقة للرد.
كان التعب قد أثقل روحها قبل جسدها، وأصبحت حتى الكلمات تحتاج منها إلى مجهود لم يعد لديها.
نظرت إليه بوهن، ثم أغمضت عينيها، وسقطت دموعها كعادتها.
كالعادة...
تلك الكلمة وحدها كانت تختصر عشر سنوات كاملة.
عشر سنوات لم تكن تبكي فيها بسبب موقف واحد، وإنما بسبب حياة كاملة ضاقت بها يومًا بعد يوم، حتى أصبح وجود فريد بجانبها جزءًا من ذلك الضيق، وأصبح الخروج منه يبدو لها كطريق لا تعرف كيف تصل إليه.
وعلمت، مع مرور السنوات، أنه لا مفر منه...
ولا من جنونه الذي لم تستطع يومًا أن تجد له تفسيرًا.
ظلت حبيبة تسير في ممر المستشفى بخطوات سريعة، وملامح الضيق مرتسمة بوضوح على وجهها، وقد عقدت عزمها على الذهاب إلى مدير المستشفى لتضع حدًا فاصلًا مع هذا الطبيب الذي سيتسبب لها بذبحة صدرية من ردود أفعاله معها. بينما كانت لبنى وريهام تسيران إلى جوارها، تحاولان مجاراتها وتهدئتها في الوقت نفسه.
وما إن أخبرهما الممرض بما دار بينها وبين الطبيب فارس، حتى أسرعت لبنى إلى تهدئتها، وهي تربت على ذراعها
اهدَي يا حبيبة، تشتكيه إيه بس؟ الموضوع مش مستاهل تتعفرتي كده.
توقفت حبيبة فجأة، وتأبطت ذراعها، ثم التفتت إليها بنظرة مستنكرة، وكأنها لا تصدق أنها تقول ذلك، وقالت بانفعال
نعم يا أختي! مش مستاهل؟! ده قلل مني قدام الممرضات. والمصېبة الأكبر قدام أهالي الأطفال! يعني بيضرب مفك في مهنتي قدامهم وبيشوّه صورتي قدامهم. وبكره يقولوا عليَّا الدكتورة اللي مش عارفة حاجة أهي!
اتسعت عينا ريهام بدهشة، ثم قالت وهي تحاول كتم ضحكتها
يخربيت دماغك! كل السيناريوهات دي في دماغك من كلمتين قالهملك؟
نظرت إليها حبيبة بغيظ أكبر، ولوحت بيدها أمامها
لأ يا حبيبتي، دول مش كلمتين! دي مش أول مرة ېحرق دمي. فاكرة أول حالة حوّلتهاله برضه؟ سمعني كلمتين حلوين، لدرجة إني كنت عايزة أديله روسية في البطاطساية بتاعته دي!
اڼفجرتا بالضحك، بينما رمقتهما حبيبة بنظرة غاضبة، وقد ازداد ضيقها من عدم أخذهما ڠضبها على محمل الجد، قبل أن تحاول
---
هي الأخرى السيطرة على انفعالها.
وبعد لحظات، استعادت لبنى جديتها، وقالت بنبرة عملية
حبيبة، مش عايزاكي تاخدي كل حاجة بقفش كده. الدكتور فارس استشاري، وواضح عليه إنه شاطر جدًا.
ثم تابعت، وقد بدا عليها الإعجاب وهي تتذكر ما سمعته عنه
يا بنتي، إنتِ ما بتشوفيش المدير بيستقبله إزاي؟ وكمان قال فيه شعر، وقال إن الدكتور فارس شاطر وموهوب جدًا، وما فيش حالة واحدة ولا عملية عملها حد اشتكى منها.
ثم تنهدت، وأردفت بنبرة أكثر صراحة
وبرضه ما تزعليش مني يا حبيبة، هو أكبر منك سنًّا وتعليمًا. ما ينفعش كل شوية تتجادلي معاه يا بنتي. دي مش أول مشكلة ليكي في المستشفى. إنتِ آخر مرة متخانقة مع المدير نفسه! بطلي مشاكل بقى وركزي في شغلك، تعبتيني.
لم تهدئ كلمات لبنى حبيبة، بل زادت ڠضبها أكثر، خصوصًا مع دفاعهما المتواصل عنه. التفتت إليهما، وقد بدا أن صبرها بدأ ينفد، وقالت
بقولك إيه إنتِ وهي؟ أنا دمي محروق، محدش يدافع ولا يجيب سيرته قدامي. متفرعن على إيه ده؟ لا شكل ولا منظر!
ما أنهت كلماتها حتى اتسعت عينا ريهام ولبنى، وتبادلت كل منهما نظرة سريعة؛ ففارس، على عكس وصف حبيبة تمامًا، كان جميلًا جدًا وجذابًا ووسيمًا.
فردت ريهام بدهشة
لا شكل ولا منظر؟ إنتِ شوفتيه بقفاكي ولا إيه؟
أكملت لبنى
يا بنتي اللهم بارك، والله ما قصدي حاجة، بس هو حلو. حلو أوي كمان. إنتِ بس علشان متنرفزة بتقولي كده.
نظرت إليهما حبيبة، والدم يغلي في رأسها، وقد بدا أنها على وشك الانفجار من جديد
إنتوا صحاب عرر أقسم بالله. غوري إنتِ وهي على مناوبتكم، وأنا هروح للمدير إن ما جابش حقي. هولع فيه وفيكم، وكمان في أبو قلقاسه الحليوة بتاعكوا ده.
وما إن أنهت جملتها حتى عادت إلى ذهنها طريقته المستفزة معها، فتقلصت ملامحها، وقبضت يديها بجوار جسدها، وهي تستعيد كلماته بغيظ
لسه مقيمة... لما تتخصصي ابقي جادليني.
اشتعلت عيناها بالضيق، وتمتمت
هو مين قاله إني مستنية شهادته أصلًا؟
وفي اللحظة نفسها، لمحت فارس يخرج من الممر متجهًا إلى مكتبه.
توقفت في مكانها للحظة، وكأن ظهور فارس أمام عينيها أشعل ڠضبها من جديد. تابعت خطواته بعينيها، ثم تركت ذراع لبنى واتجهت خلفه مباشرة، وقد حسمت أمرها هذه المرة.
حبيبة!
جاءها صوت لبنى من خلفها، ثم تبعته ريهام
حبيبة، استني!
لكنها لم تلتفت، ولم تجب. كان ڠضبها قد سبقها إلى باب مكتبه.
وصلت إليه، وطرقت الباب طرقة سريعة، ثم فتحته ودخلت دون أن تنتظر الرد.
رفع فارس عينيه إليها للحظة، ثم عاد إلى الأوراق الملقاة أمامه، وكأن دخولها المفاجئ لم يلفت انتباهه كثيرًا.
خير؟
أغلقت حبيبة الباب خلفها، ثم استدارت إليه ووقفت أمام مكتبه، وقد انعقد حاجباها من شدة الضيق.
حضرتك شايف نفسك إيه بالظبط؟
توقفت يده فوق الورقة التي كان يكتب فيها، ثم رفع عينيه إليها بهدوء تام.
دكتور.
نظرت إليه بغيظ واضح.
أنا بتكلم جد.
وأنا مهزرتش.
حدقت فيه للحظة، ثم قالت بنبرة أكثر حدة
طريقتك في القسم معايا كانت فيها إهانة ليا.
عاد إلى أوراقه وكأن الأمر لا يستحق كل هذا الانفعال.
آسف.
اتسعت عيناها بدهشة.
آسف؟!
أيوه.
حضرتك بتاخدني على قد عقلي؟
رفع عينيه إليها ببطء، وكأنه التقط الكلمة الأخيرة وحدها
عقلك؟
كادت تفقد أعصابها أمام بروده المستفز، وقالت
إنت بتستفزني قصد! صح؟
واضح إنك بتستفزي نفسك أكتر مني.
يعني إيه؟
يعني أنا قلتلك ملاحظة في شغلك، وإنتِ حوّلتيها لمعركة شخصية.
اقتربت خطوة من مكتبه، وقد ازدادت حدة نظراتها
ملاحظة؟! إنت قللت مني قدام الناس. وأنا ما أقبلش كده أبدًا.
ما قللتش منك.
لما تقولي لسه مقيمة تبقى بتقلل مني.
رفع عينيه إليها مرة أخرى، وقال ببساطة شديدة، وكأنه يقرر حقيقة لا تحتمل النقاش
إنتِ فعلًا لسه مقيمة.
ثم عاد إلى الكتابة من جديد، تاركًا كلماتِه معلقة في الهواء.
حدقت فيه حبيبة للحظات، وكأنها تحاول استيعاب مدى بروده، ثم قالت
لا، لا... حضرتك سوري، يعني مش طبيعي.
شكرًا.
أنا مش بجاملك علشان تشكرني.
عارف.
ساد الصمت لثوانٍ، قبل أن تقول بعناد، وكأنها تحاول إثبات وجهة نظرها بأي طريقة
وعلى فكرة، أنا كلي ثقه في كل كشف حوّلته لحضرتك، زائد حالة النهارده.
توقف عن الكتابة، ثم رفع عينيه إليها.
وأنا قلت إنك غلطانة؟
طريقتك قالت. حسستني إني ما بفهمش.
مشكلتك إنك بتركزي في طريقتي أكتر من كلامي.
لأن طريقتك بتضايق!
ظهرت على جانب فمه ابتسامة صغيرة، بالكاد ظهرت قبل أن تختفي، وقال بهدوء
دي مشكلتك، مش مشكلتي.
كادت حبيبة تفقد أعصابها تمامًا.
مشكلتي فعلًا.
ظلت واقفة أمامه لحظات، تنتظر منه أي رد آخر، لكنه لم يمنحها إياه. اكتفى بالعودة إلى أوراقه، وكأن الحديث بالنسبة إليه انتهى بالفعل، وكأن وجودها أمامه لم يعد يعني له شيئًا.
وحين طال صمتها، رفع يده مشيرًا إلى الباب دون أن يرفع صوته
لو خلصتي شكوى، اطلعي بره مكتبي يا دكتورة، عندي شغل مهم.
شهقت حبيبة بضيق، وشعرت پالدم يغلي في عروقها، وحدقت فيه لحظة أخيرة قبل أن تستدير بعصبية.
فتحت الباب، ثم خرجت وأغلقته خلفها بقوة، حتى ارتد صوت إغلاقه في الممر.
في الخارج، وقفت لثانية وهي تحاول التقاط أنفاسها، ثم تمتمت بغيظ
بارد... مستفز... شايف نفسه على إيه؟ آه يناري والله لاروح للمدير يشوف حل يا إما هتكون خړاب ع الكل.
أما في الداخل، فظل فارس يحدق في الورقة أمامه للحظات، دون أن يكتب شيئًا.
ثم ارتفع طرف فمه في ابتسامة صغيرة، قبل أن يهز رأسه ويتمتم
مچنونة دي ولا إيه؟
كان رضوان يقف خلف مكتبه في مكتبته، يراجع بعض الأوراق ويبيعها لأحد الزبائن، قبل أن يرفع عينيه مع دخول الصبي موسى.
ما إن رآه حتى ارتسمت ابتسامة صغيرة على وجهه، وقال
تعالى يا موسى.
اقترب الصبي منه، وصافحه بأدب، ثم قال
أنا جيت لحضرتك امبارح، وكنت قافل.
آه، كان عندي مشوار مهم.
ثم أشار له بالجلوس، وقال
استناني أخلص البيعة دي، وجايلك.
جلس موسى، وأخذ يتطلع إلى الكتب من حوله، يستنشق رائحتها العبقة التي ملأت المكان، بينما أنهى رضوان بيعته مع الشاب، وأخذ المال ووضعه داخل الدرج، ثم أغلقه واقترب من موسى، وجلس أمامه.
نظر إليه باهتمام، وسأله
إيه تاني يا موسى؟
ابتسم موسى ابتسامة صغيرة، وهز رأسه قائلًا
لأ، معملتش حاجه المرادي. أنا جاي أقولك القرار اللي أنا فكرت فيه.
اعتدل رضوان في جلسته، وركز عينيه عليه، وكأن كلمات الصبي القادمة تعنيه أكثر مما أراد أن يُظهر.
عايز أسمع قرارك الأخير يا موسى.
نظر موسى إليه للحظات، ثم أخذ نفسًا عميقًا، وكأنه يرتب أفكاره قبل أن يبدأ، وقال
اليومين اللي فاتوا وأنا بفكر في اللي حصل مع رضوان، نزلت بنفسي وشوفت بعيني ولاد كتير في الشارع نفس سني تقريباً.. واحد واقف في إشارة بيبيع، وواحد بيسرق ويجري، وواحد الحكومة مسكاه، وواحد بيتعاطى.
سكت لحظة، ثم تابع بصوت أكثر هدوءًا
وقتها خفت... خفت أكون واحد منهم في يوم من الأيام. لو سبت نفسي لشيطاني، وفشلت في إني أساعد أهلي، وقررت أسيب دراستي علشانهم، ممكن أخسر مستقبلي وألاقي نفسي في نفس المكان ده.
تنفس بعمق، ثم
---
ابتسم ابتسامة صغيرة
ساعتها افتكرت كلامك... افتكرت لما قلتلي لازم تعيش إنت الأول.
رفع عينيه إليه وقال
وعندك حق برضه لما قولت... ليه أضحي بحاجة بحبها، وأسيب فرصة ممكن تغيّر حياتي لمجرد إني أتنازل عن حاجة أنا مؤمن بيها؟ ليه أوقف مستقبلي بإيدي، وأنا ممكن ربنا يوفقني فيها وتكون سبب إن حياتنا تتغير للأفضل، ونقدر نعيش في مكان أحسن في المستقبل؟ أنا مش أناني علشان أفكر في نفسي ومستقبلي... أنا بس لازم أدي لنفسي فرصة أعيش الحياة اللي بحلم بيها.
صمت قليلًا، ثم أكمل
فضلت أفكر في كل كلمة إنت قلتها عن رضوان، وفهمت إن زي ما غيري من حقه يعيش ويكمل حياته، أنا كمان من حقي أعيش. مش معنى إني عايز أساعد أهلي إني أضيع نفسي.
ثم قال بثقة أكبر
وعلى رأيك في الآخر، كل حاجة بتحصل وهتحصل قدر ومكتوب عند ربنا..
ظل رضوان صامتًا طوال حديثه، لا يقاطعه، لكن عينيه كانتا تتابعان كل كلمة تخرج من فم الصبي. ومع آخر جملة، لانت ملامحه أكثر، وكأن شيئًا في داخله اطمأن.
ثم نظر موسى إليه وقال
أنا أخدت قرار إني أكمل تعليمي.
ابتسم رضوان بصدق، وبدت السعادة هادئة في عينيه، قبل أن تمتد يده تربت برفق على ركبة الصبي.
برافو عليك يا موسى. ما تتخيلش أنا مبسوط بيك قد إيه... مش علشان هتكمل تعليمك وبس، لكن علشان إنت بنفسك وصلت للقرار ده. أنا قدرت أغيّر فيك حاجة مهمة جدًا، حاجة يمكن دلوقتي مش حاسس بقيمتها، لكن هتعرفها كويس في المستقبل. وصدقني يا موسى، القرار اللي خدته النهارده ممكن يغيّر حياتك كلها. إنت اخترت لنفسك طريق أحسن... وده أهم قرار ممكن تاخده.
ابتسم موسى، وشعر بشيء من الارتياح، ثم نهض من مكانه وقال
أنا لازم أمشي، علشان عندي مدرسة الصبح.
ابتسم له رضوان، ومدّ موسى يده لمصافحته، قبل أن يسأله بفضول
أنا لحد دلوقتي ما أعرفش اسمك.
صافحه رضوان، وظلت ابتسامته هادئة، بينما ثبت عينيه في عيني الصبي للحظات، ثم قال
رضوان.
كان حسين يجلس خلف مكتبه في شركته، يتابع بعض الملفات أمامه، حين طرق أحد الموظفين الباب، ثم دخل حاملًا بعض الأوراق.
رفع حسين عينيه إليه، فاقترب الموظف وقال
حسين باشا، العربية المرسيدس بتاعة حضرتك عليها مخالفة، وأنا خلصت إجراءاتها ودفعتها.
قطّب حسين حاجبيه باستغراب، ورفع رأسه عن الأوراق
مخالفة؟ مخالفة إيه؟ أنا لسه من شهر دافع المخالفات، والعربية دي ما بخرجش بيها غير نادرًا.
أجابه الموظف
والله ده اللي حصل يا باشا. كنت براجع أوراق العربيات، فلقيت المخالفة مسجلة، فقلت أخلصها لحضرتك. وأنا عارف إن سيادتك ما بتحبش يكون عليك مخالفات.
ترك حسين القلم من يده، وقال
من فترة قد إيه؟
من حوالي ٢٠ يوم.
رفع حسين عينيه إليه باهتمام
٢٠ يوم؟ بتاريخ كام؟
ذكر له الموظف التاريخ.
تغيرت ملامح حسين قليلًا، وأخذ يعيد التاريخ في ذهنه، ثم سأله
والعربية كانت فين يومها؟
المخالفة متسجلة في إشارة...
ذكر الموظف اسم الإشارة.
توقف حسين للحظات، ثم رفع عينيه إليه
الإشارة دي فين بالظبط؟
في المنطقة اللي بعد الطريق الرئيسي، وقريبة من...
ذكر له الموظف العنوان.
انعقد حاجبا حسين، وكأنه يحاول أن يستعيد شكل المكان في ذاكرته، ثم قال
هاتلي كل تفاصيل المخالفة.
أوامرك.
اسمع.
تحت أمرك.
أكمل حسين بنبرة أكثر جدية
عايز وقت المخالفة بالظبط، ومكانها، وكل البيانات اللي متسجلة عنها، وكمان شوف العربية كانت موجوده فين في اليوم ده.
تردد الموظف قليلًا، ثم قال
أقدر أراجع سجلات المرور يا باشا، وأشوف كل البيانات المسجلة عندهم عن المخالفة والعربية.
اعمل كده.
ثم نظر إليه حسين وأضاف
تروح بكرة المرور بنفسك، وراجع كل حاجة. عايز المعلومات كاملة، التاريخ والوقت والمكان، وأي بيانات تقدر توصل لها عن حركة العربية في اليوم ده.
. وبكره يكون كل اللي طلبته عندي.
تحت أمرك يا باشا.
خرج الموظف، وبقي حسين وحده خلف مكتبه.
حاول أن يعيد عينيه إلى الملفات أمامه، لكن ذهنه ظل معلقًا بذلك التاريخ والمكان.
لماذا كانت سيارته هناك؟
ولماذا في ذلك اليوم تحديدًا؟
في اليوم التالي، دخل الموظف إلى منزل حسين حاملًا ملفًا صغيرًا، ووضعه أمامه قائلًا
اتفضل يا باشا. أنا رحت المرور، وراجعت بيانات المخالفة، ودي كل المعلومات اللي قدرت أوصل لها. التاريخ والوقت والمكان، وكل البيانات المسجلة عن العربية في اليوم ده.
مد حسين يده إلى الملف، وفتحه دون كلمة.
بدأ يتتبع البيانات بعينيه في صمت.
مكان...
ثم وقت...
ثم عنوان آخر...
إلى أن توقف إصبعه فوق أحد العناوين.
ثبتت عيناه عليه لثوانٍ.
قرأه مرة...
ثم أعاد قراءته مرة أخرى.
اقترب بالورقة منه، وكأن عينيه ترفضان تصديق ما تقرآنه.
رفع رأسه ببطء، واتسعت عيناه قليلًا.
ذلك المكان...
يعرفه.
عاد ينظر إلى الورقة، وبدأت ذاكرته تربط العنوان بمكان قديم يعرفه جيدًا.
همس، وقد بدأ الشك يتسلل إلى صوته
مش معقول..
بعد أن أنهى رضوان زيارته لزوجة عمه، خرج من البيت واتجه إلى الطريق، قبل أن يلمح صبحي واقفًا أمام البناية التي كان يعيش فيها رضوان قديمًا.
توقف رضوان ما إن رآه، واقترب منه مبتسمًا، فصافحه صبحي بحرارة، وتبادلا التحية والاطمئنان عن الحال، قبل أن يناديه صبحي متذكرًا
صح قولي يا رضوان، هي الست جاتلك؟
توقفت ابتسامة رضوان، ونظر إليه باستغراب
ست، ست مين؟
ارتبك صبحي للحظة، ثم لوّح بيده قائلًا
لا، لا... خلاص، يبقى أنا بتهيألي.
حدق رضوان في وجهه، وقد أثار كلامه فضوله
مالك يا عم صبحي؟
تنهد صبحي، وهز رأسه
يا ابني ما فيش، أنا ممكن تكون ذاكرتي خانّتني ولا حاجة. ولا كنت بحلم، والله ما أنا عارف.
اقترب منه رضوان خطوة، وقال باهتمام
في إيه؟ إيه اللي حصل كده بالراحة، وفهمني... وست مين دي؟
أبدًا. من فترة كده جيت العمارة دي، إنت عارف إنها قديمة والسكان بدأت تشتكي، بعمل فيها شوية تظبيطات وترميمات. نازل من على السطح أنا والعمال، لقيت واحدة ست كده، تحس إنها مش من هنا، وبتخبط على شقتكم اللي كنت ساكن فيها قبل ما تعزل.
ظل رضوان يستمع إليه دون أن يقاطعه.
تابع صبحي
روحت ليها وسألتها إنتِ عايزة مين يابنتي؟ قالتلي بسأل عن رضوان، مش هو ساكن هنا؟ قلت لها أيوه، بس رضوان عزل من زمان.
تغيرت ملامح رضوان قليلًا.
ثم تابع صبحي
حسيتها اتضايقت كده، كأني قولتلها حاجة زعلتها.. بس بيني وبينك صعبت عليا والله. فقلت لها متزعليش، أنا معايا عنوان بيته والمكتبة بتاعته لو إنتِ عايزاه.
توقف صبحي لحظة، ثم ابتسم
طلبته بسرعة، كأنها مصدقت،واديتها العنوان، وبعدها مشيت.
ظل رضوان صامتًا للحظات، وكأن شيئًا ما بدأ يتحرك في رأسه.
ثم سأل، محاولًا أن يبدو عاديًا
الست دي كانت معاها عربية مرسيدس سودا!
اندهش صبحي مرددًا
آه... يبقى أنا مش بتهيألي بقى.
صمت رضوان قليلًا، ثم سأل
كان معاها طفل صغير؟
ابتسم صبحي، وكأنه تذكره في الحال
الله ينور عليك. أنا نزلت معاها لحد الشارع، وكان معاها عيل صغير كده، قاعد في العربية وماسك التليفون.
ثبتت عينا رضوان أمامه، وكأن الكلمات الأخيرة أصابته في موضع لم يكن مستعدًا له. وكأن ما سمعه للتو أعاد ترتيب كل تفاصيل لقائهما في المكتبة.
قالت إنها كانت تمر بالمصادفة... لكنها لم
تكن مصادفة.
بعد عشر سنوات، كانت زاد قد جاءت إلى المكان الذي يعمل فيه، بعدما بحثت وسألت عنه بالاسم.
تعلقت الفكرة في رأسه، وتزاحمت معها عشرات الأسئلة.
لماذا جاءت؟
ولماذا الآن؟
وماذا كانت تريد منه؟
هل كان مروراً عابراً ؟
أم كان احتياج ؟
ظل ينظر أمامه شاردًا، عاجزًا عن الوصول إلى إجابة واحدة.
زاد لم تأتِ إلى المكتبة مصادفة... لقد جاءت إليه عن قصد.
يتبع.......

تحفه تسلم ايدك يا قمر ❤️❤️
ردحذف