الفصل الرابع. زاد الآسمر
الفصل الرابع.
رواية زاد الآسمر.
داخل المشفى، كانت حبيبة تبحث عن ريناد منذ بداية دوامها، بعدما عادت اليوم إلى العمل عقب إجازة استمرت شهرًا كاملًا. لم تجدها في القسم، فالتقت بلبنى، التي أخبرتها أنها حضرت منذ قليل وذهبت لتفطر مع بقية الطبيبات، فرافقتها حبيبة إلى غرفة الأطباء.
وما إن دخلت حتى وجدتهن جميعًا مجتمعات حول مائدة صغيرة، يتبادلن الحديث ويجهزن الإفطار. ابتسمت حبيبة حين وقعت عيناها على ريناد، ثم اتجهت نحوها:
ـ حمد لله على السلامة يا دكتورة ريناد. كده أرجع المستشفى أسأل عليكي، يقولولي واخدة إجازة شهر! ليه بس كده؟
ابتسمت ريناد باعتذار:
ـ سوري يا بيبو، غصب عني والله. ماما عملت عملية فأخدت إجازة علشان أفضل معاها.
جلست حبيبة بجوارها، وتغيرت ملامحها على الفور:
ـ يا خبر! ألف سلامة عليها. والله ما أعرف حاجة زي كده. طمنيني عليها، عاملة إيه دلوقتي؟
ـ الحمد لله، اتحسنت كتير عن الأول.
ـ الحمد لله.
ظلت حبيبة تنظر إليها للحظة، ثم ألقت نظرة سريعة حولها. انشغلت البنات بتجهيز الطعام، وإحداهن كانت تعد الشاي، فاقتربت من أذن ريناد وقالت بصوت منخفض:
ـ أنا والله مش عارفة أبصلك إزاي من آخر مرة. آسفة خالص، والله العظيم ما كانت مقصودة.
انفجرت ريناد في الضحك:
ـ اسكتي، متفكرينيش! دانا كنت في نص هدومي. يلهوي، اتكسفت حتة كسفة!
ضحكت حبيبة هي الأخرى:
ـ أخويا ده مبوظ سمعتي.
ثم تابعت بصدق:
ـ بس فعلًا، مكنش يعرف، والغلط عندي أنا. أنا أصلًا مدهوله الدنيا تحسي إن قدمي نحس على كل اللي يعرفني. متزعليش.
ـ يا بنتي بطلي جنان! هزعل منك ليه؟ هو الموضوع جه صدفة مش أكتر.
ـ آه وحياة نوفل كان صدفة! ولا كنت عارفة إنه هيرجع بدري كده.
تذكرت ريناد رضوان، فضحكت وقالت:
ـ المهم... طبقتي الغسيل ولا لسه؟
ضحكت حبيبة:
ـ هو في غسيل بيتطبق أصلًا؟
ـ يلهوي يا حبيبة! إنتِ من النوع ده؟
ـ أطّبق إيه؟ هي فرهده وخلاص. أنا بعامل المنشر معاملة الدولاب؛ اللي عايز حاجة يروح ياخدها من على الحبل.
انفجرتا في الضحك، حتى جاءت لبنى وقالت:
ـ يلا يا دكتورة ريناد، تعالي يا حبيبة، خلصنا الفطار.
اعترضت ريهام:
ـ محدش من الزملا عنده دم! أنا جهزت الفطار وأنا تعبانة، والدكتورة حبيبة هتاكل على الجاهز؟ ده كان دورك في تجهيز الفطار.
كانت حبيبة تلوك لقمتها بالفعل، فقالت وهي تحاول الكلام:
ـ ما تطفحنيش اللقمة يا ريهام. آكل وهلم الأكل. قشطة كده!
جلست ريهام وهي تهز رأسها:
ـ ده قشطة أوي.
اجتمعن جميعًا حول المائدة في جو خفيف، تناوبت فيه الضحكات والحديث، قبل أن تعود حبيبة إلى قسمها، لتغرق من جديد في ضغط العمل.
---
مرّ اليوم طويلًا ومرهقًا.
توالت الحالات والكشوفات دون أن تجد حبيبة فرصة حقيقية لالتقاط أنفاسها. وحين سمعت أذان العصر، توقفت عن كل شيء، واتجهت لتصلي.
وبعد الصلاة، رن هاتفها.
كان رضوان.
اطمأن عليها وسألها عن يومها، فتحدثت معه دقائق قليلة، ثم أغلقت الهاتف وعادت إلى القسم.
لم تمضِ سوى لحظات حتى دخلت إحدى الممرضات.
ـ دكتورة حبيبة، الدكتور فارس عايزك في مكتبه.
زفرت حبيبة بضيق وهي تنهض.
ـ عايز إيه ده كمان؟ بقالي فترة وأنا متجنبة إني أحتك بيه، ولا عايزة أشوفه أو أتعامل معاه.
قالتها وهي تتذكر طريقته الباردة، وكلماته التي كان يعرف جيدًا كيف يستفزها بها دون أن يرفع صوته أو يفقد هدوءه.
ومع ذلك، لم يكن أمامها خيار.
ذهبت إلى مكتبه على مضض.
كان فارس جالسًا خلف مكتبه، يرتدي نظارته الطبية، وعيناه مثبتتان على شاشة الحاسوب أمامه، وإلى جواره فنجان قهوة تفوح منه رائحتها التي ملأت المكان، بينما تراصّت بعض الملفات إلى جواره.
طرقت الباب ودخلت.
لم يرفع عينيه إليها.
وقفت أمام المكتب، واضعة إحدى يديها في جيب البالطو.
ـ حضرتك طلبتني؟
ـ أيوه.
ـ خير؟ في حاجة؟
نزع نظارته بهدوء، واستقام في جلسته، ثم دفع أحد الملفات أمامه.
ـ الحالة دي إنتِ اللي حولتيها؟
نظرت حبيبة إلى الملف، وقرأت اسمها في أعلاه، ثم رفعت عينيها إليه.
ـ أظن اسمي مكتوب قدام حضرتك أهو، يبقى أنا اللي محولاها... فيها مشكلة ولا حاجة؟
لم يعلّق على سخريتها الخفيفة، بل عاد بظهره إلى الكرسي وشبك يديه أمامه، وقال بثقة هادئة:
ـ الحالة معندهاش مشكلة في اللحمية تستدعي إجراء عملية.
عقدت حبيبة حاجبيها.
ـ أنا حولتها لحضرتك علشان تقيّمها، مش علشان أقرر إذا كانت هتحتاج عملية أو لأ، لأن ده مش دوري.
رفع عينيه إليها، وأشار بإصبعه إلى الملاحظة المكتوبة في الملف.
ـ مكتوب هنا: «تضخم بالناميات مع انسداد أنفي، وتقييم مدى الحاجة للتدخل الجراحي».
سكتت حبيبة لحظة، ثم قالت بثقة:
ـ حضرتك، أنا شفت الطفلة، وكان عندها أعراض تستدعي تقييم الـENT.
ـ تقييم، مش تشخيص.
ثم أضاف بهدوء:
ـ ودي مش مجرد إحالة للكشف يا دكتورة. دي إحالة مبنية على اشتباه إن اللحمية هي سبب الأعراض.
ـ وأنا ما قلتش إنها لازم تعمل عملية. أنا مبقررش من نفسي.
ظل ينظر إليها لثوانٍ، ثم قال:
ـ أنا اتحولتلي طلب استشارة، والملاحظة المكتوبة فيه بتخليني أفهم إنك شايفة إن تضخم اللحمية هو سبب المشكلة. ولا إنتِ مش متأكدة من كتابة ملاحظاتك؟
توقفت حبيبة عن الرد.
اشتد ضيقها من طريقته، لكنها عادت إلى طلب الاستشارة وقرأت الملاحظة مرة أخرى بتمعن.
وبعد ثوانٍ، تذكرت.
ـ آه... أيوه، صح.
رفع حاجبه:
ـ إيه؟ افتكرتي؟
تنهدت بضيق.
ـ ده مش خطي أصلًا.
ـ أمال؟
ـ دكتورة زميلة معايا في القسم. أنا بدأت الحالة، وبعدها معاد المناوبة جه، فقومت وخليتها تكمل الكشف والتحويل.
وضع فارس القلم على المكتب.
ـ يعني سبتي لها الحالة وهي اللي حولتها؟
ـ أيوه.
ـ من غير ما تراجعي اللي كتبته في طلب الاستشارة؟
ـ كان عندي شغل تاني.
نظر إليها بهدوء، ثم قال:
ـ وده يبرر إن اسمك يبقى على الحالة من غير ما تعرفي مكتوب فيها إيه؟
تضايقت حبيبة، وارتفعت نبرتها قليلًا:
ـ أنا ما كنتش أعرف إنها هتقرر حاجة زي دي من دماغها.
ـ ودي المشكلة.
ـ إيه المشكلة بالضبط؟
رفع فارس عينيه إليها أخيرًا، وقال بهدوء شديد:
ـ على فكرة، من حقي أرفع مذكرة بالواقعة.
توقفت حبيبة عن الكلام.
للحظة، ظنت أنه يبالغ فقط في الضغط عليها، لكن ملامحه لم تتغير.
تابع فارس:
ـ لأنك بدأتي الحالة باسمك، وبعدها سبتي زميلتك تكملها، وفي الآخر الإحالة خرجت باسمك من غير ما تراجعي اللي اتكتب فيها.
حاولت حبيبة أن تعترض:
ـ بس أنا ما كنتش عارفة هي كتبت إيه...
قاطعها بهدوء:
ـ ودي مش حُجّة. لما حد يستلم حالة إنتِ بدأتيها، لازم يبقى واضح مين استلمها ومين مسؤول عن استكمالها. والأهم إنك تراجعي التوثيق قبل ما طلب الاستشارة يخرج، خصوصًا إن اسمك لسه موجود عليه.
صمت لحظة، ثم أضاف:
ـ وسهل جدًا أطلب عرض الموضوع على رئيس القسم، ويتفتح فيه تحقيق، ويتسجل في تقييمك كطبيبة مقيمة.
اتسعت عينا حبيبة.
ـ تحقيق؟!
ـ أيوه، تحقيق.
ثم مال إلى الخلف في مقعده، وظل ينظر إليها بهدوء أربكها أكثر.
ـ وكان ممكن كمان أطلب إن أي حالة تبدأيها بعد كده، ما تتسابش لحد يكملها من غير تسليم واضح ومراجعة كاملة للملف.
ازدادت حيرتها.
ـ حضرتك ممكن تعمل كده؟
ـ ممكن إيه اللي يمنعني!
صمتت حبيبة، وقد بدأت حدة غضبها تختلط بشيء آخر لم تستطع تحديده.
تابع فارس ببرود:
ـ بس علشان إنتِ لسه مقيمة، ولأن الخطأ اتلحق قبل ما يترتب عليه ضرر للمريضة، هكتفي بلفت نظر.
رمشت حبيبة عدة مرات، وكأنها تحاول استيعاب ما سمعته.
ـ لفت نظر بس؟
ـ أيوه.
ـ حضرتك بتتكلم بجد؟
ـ للأسف.
ثم ارتدى نظارته من جديد، وعاد إلى شاشة الحاسوب، وكأن الأمر انتهى بالفعل.
ـ واعتبريه التحذير الأول والأخير.
ظلت حبيبة واقفة مكانها لثوانٍ، تحدق فيه بذهول.
كان الغضب ما زال يشتعل بداخلها، لكنها لم تستطع تجاهل المفاجأة.
كانت تتوقع منه أن يصعّد الأمر، خصوصًا بعد الطريقة التي واجهها بها، لكنها لم تتوقع أن يكتفي بلفت نظر.
ـ حاضر.
قالتها أخيرًا بصوت خافت.
استدارت لتغادر، لكنه أوقفها قبل أن تصل إلى الباب:
ـ وخدي بالك... المرة الجاية لو حد كمل حالة بدأتيها، مش هتخرجي من الموضوع بجملة «أنا ما كنتش أعرف».
حدقت فيه بغيظ.
ـ حاضر فهمت، فهمت يا دكتور.
واتجهت إلى الباب وهي تتمتم بضيق:
ـ ربنا يصبرني عليك.
وضعت يدها على المقبض، وقبل أن تفتحه، جاء صوته من خلفها:
ـ وبالمناسبة، الطفلة عندها علامات أقرب لحساسية الأنف، ومفيش داعي نستعجل في أي قرار جراحي قبل ما نعيّنها ونعمل الفحص المطلوبة في المستشفى هنا.
توقفت حبيبة، ثم التفتت إليه بدهشة:
ـ حساسية؟
أدار فارس كرسيه نحوها، ورفع عينيه إليها.
ـ أيوه. الأعراض لوحدها مش كفاية تقول إن اللحمية هي السبب، خصوصًا إن انسداد الأنف له أسباب تانية كتير. التشخيص الدقيق بيحتاج فحص بالمنظار أو أشعة نقيّم بيها حجم اللحمية صح، ولو اتضح إن الموضوع مجرد حساسية، يبقى تمشى على بخاخ أنف وعلاج مناسب بدل المشرط.
ظل ينظر إليها للحظات، ثم مد يده إلى فنجان القهوة ورفعه ببطء، وكأنه يتعمد زيادة استفزازها. وقبل أن يرتشف منه، قال ببرود:
ـ مش كل انسداد في الأنف يبقى لحمية.
ارتشف رشفة هادئة، ثم رفع حاجبه قليلًا، وأضاف بنبرة تحمل سخرية خفيفة:
ـ ومش كل لحمية محتاجة عملية.
اشتدت أصابع حبيبة حول الملف الذي تحمله، وضغطت عليه دون أن تشعر. رمقته بنظرة غاضبة، بينما ظل هو هادئًا تمامًا، يرتشف قهوته وكأنه لم يقل شيئًا يستحق الجدال.
أضاف فارس، بنبرة باردة تحمل شيئًا من الاستفزاز:
ـ أنا بعرفك حجم الخطأ اللي كنتِ هتقعي فيه، علشان المرة الجاية تعرفي إمتى الحالة تتحول لمين وليه، والأهم... تراجعي اللي مكتوب باسمك قبل ما يطلع من القسم.
ظلت حبيبة صامتة لحظات. كانت تريد أن ترد عليه، أن تجادله لمجرد ألا تمنحه إحساس الانتصار، لكن الكلمات توقفت في حلقها؛ فقد وجدت نفسها تعيد في ذهنها تفاصيل الحالة من البداية، وتدرك أن ملاحظته لم تكن بلا أساس.
رفعت عينيها إليه، ومنحته نظرة ضيقة غاضبة، ثم قالت بامتعاض:
ـ تمام.
لم ينتظر فارس منها أكثر. اكتفى برفع فنجان القهوة إلى شفتيه، وقال ببرود مستفز:
ـ كويس إنك فهمتي.
اشتعل الغضب في عينيها من جديد، فاستدارت دون رد، واتجهت إلى الباب وخرجت، ثم أغلقته خلفها بقوة أكبر مما كانت تنوي.
خرجت حبيبة من عند فارس بخطوات سريعة، والغضب يسبقها، لكن كلماته ظلت تدور في رأسها رغمًا عنها.
كانت تكرهه في تلك اللحظة... أو هكذا أقنعت نفسها، إلا أن أكثر ما أثار ضيقها أنها لم تستطع إنكار شيء واحد:
هو لم يكن مخطئًا تمامًا.
اتجهت إلى غرفة الأطباء، حيث وجدت سهام، وبمجرد أن رأتها بدأت تسألها عن التحويل الذي كتبته لحالة الطفلة، ولماذا سجلت أنها تحتاج إلى تقييم لإجراء عملية للحمية دون أن يكون التشخيص قد تأكد.
حاولت سهام تبرير الأمر بالأعراض التي ظهرت على الطفلة، لكن حبيبة قاطعتها بضيق؛ فالأعراض وحدها لا تكفي لاتخاذ قرار كهذا. كان عليها أن تستكمل الفحص، أو تطلب تقييم التخصص المختص، لا أن تبني قرارًا طبيًا على مجرد احتمال.
ثم أخبرتها بما حدث مع فارس، وكيف كان يمكن للأمر أن يتحول إلى مشكلة أكبر، خصوصًا أن اسم حبيبة كان موجودًا على التحويل. بدا الندم على سهام، واعترفت بأنها نسيت شطب اسمها قبل تسليم طلب الاستشارة.
هدأت حبيبة قليلًا، وأخبرتها أن الأمر انتهى، لكنها طلبت منها ألا يتكرر مرة أخرى.
غادرت الغرفة، وظلت كلمات فارس تدور في رأسها.
كان يستطيع أن يصعّد الأمر.
كان يستطيع أن يرفع مذكرة باسمها، وأن يجعل خطأً كهذا يؤثر في تقييمها، خصوصًا أنها طبيبة مقيمة وما زالت في بداية طريقها.
لكنه لم يفعل.
وبدلًا من ذلك، اكتفى بتوبيخها وتنبيهها إلى خطئها.
توقفت حبيبة للحظة، وكأنها تضايقت من الفكرة نفسها.
لم تكن تريد أن تعترف له بأنه كان محقًا... لكنها لم تستطع أن تكذب على نفسها.
ورغم استفزاز فارس وقسوته، كان هناك شيء واحد لا تستطيع إنكاره؛ أنه لم يستغل سلطته ليؤذيها.
وهذا وحده كان كافيًا ليجعل غضبها منه أقل راحة مما كان عليه قبل دقائق.
انفتح باب باب الفيلا، ودخل فريد بخطوات هادئة، ثم أغلق الباب خلفه.
وما إن رفع عينيه حتى وجدها في انتظاره، ترتدي ثوبًا أنيقًا اختارته بعناية، وما إن رأته حتى اقتربت منه بلهفة، وارتمت في أحضانه:
ـ فريد حبيبي... وحشتيني أوي.
ابتسم وضمها إليه:
ـ وإنتِ كمان وحشتيني.
ابتعد عنها قليلًا ونظر إليها:
ـ رجعتي إمتى من المانيا؟
ابتعدت عنه قليلًا، وظهرت على ملامحها لمحة عتاب:
ـ مانت لو بتسأل كنت عرفت. لكن أنا اللي لازم أتصل بيك وأقولك رجعت مصر وتعالى أشوفك.
ضحك فريد، ثم جلس على أحد المقاعد، وجلست إلى جواره.
رمقها بنظرة عارفة وقال:
ـ أنا عارف إنك هتنزلي ورايا على طول. ما بتصبريش على رزقك.
ضحكت بخفوتٍ ودلال.
ـ علشان أنا مقدرش أعيش من غيرك يا روحي.
نظر إليها وقال:
ـ في غدا ولا إيه؟
وقفت على الفور:
ـ طلبتلك حتة أوردر هيعجبك أوي. قوم معايا.
نهض خلفها، وتناولا الغداء معًا، وتبادلا الحديث في أشياء مختلفة، حتى سألته فجأة:
ـ فريد... إمتى جوازنا هيظهر للنور؟
توقفت يده عن الحركة، ورفع عينيه إليها بنظرة تحذير جعلتها تبتلع ريقها سريعًا.
ـ أوك... مش وقته.
لم يعلّق، وعاد إلى طعامه وكأن السؤال لم يكن.
بعد الغداء، جلسا في غرفة المعيشة، إلى أن جاءت سيرة زاد.
ابتسمت بتشفٍّ وسألته:
ـ بس برضه يا فريد... طول السنين اللي عشتها معاك دي ومش قادرة أفهم تصرفاتك مع زاد! وكل ما أسألك ليه بتعمل كده؟ ما تردش.
ضحك فريد ضحكة قصيرة، ثم قال بهدوء:
ـ وأنا ما يهونش عليّا أسيبك متعلقة كده، بس المرة دي هريحك وأقولك.
توقف لحظة، ثم ابتسم ابتسامة هادئة وهو ينظر إليها:
ـ شيزوفرينيا.
رفعت حاجبها وهي تصب لنفسها قليلًا من الشراب:
ـ بتهزر حضرتك؟ شيزوفرينيا مين! ده عقلك يوزن بلد.
أخذ منها الكأس، وأشار إليها أن تجلس جواره. اقتربت منه، فأحاط كتفها بذراعه، وظل ينظر أمامه بنظرة غامضة قبل أن يقول:
ـ أول ما اتجوزت زاد، قلت لنفسي: خلاص... دي الواجهة بتاعتي في البيت وكل مكان. بس اللي ما كنتش عامل حسابه... قلب زاد.
نظرت إليه بغيرة واضحة:
ـ إزاي؟
ابتسم فريد ابتسامة باردة:
ـ قلبها ما كانش معايا. ويمكن لحد دلوقتي. كنت حاسسها جسد من غير روح. وده استفزني.حاولت معاها باللين... ما نفعش.كل ما كنت أقرب منها، أحس إنها بتبعد أكتر. وكل ما أحاول أفرض وجودي في حياتها، كانت بتقفل على نفسها أكتر. كانت أول ست في حياتي تكسر كبريائي وتخلّي عقلي يتجنن.
أخذ نفسًا هادئًا، ثم تابع:
ـ فكرت وقلت: ليه لأ؟ أخليها تحت سيطرتي وبمزاجي. مرة أقرب منها وأطمنها، ومرة أبعد وأخليها تخاف مني. أخليها طول الوقت مش عارفة أنا هتعامل معاها إزاي، ولا إيه اللي مستنيها مني.
ابتسم ابتسامة باردة، وأكمل:
ـ وبصراحة... عجبني إحساس إني أنا اللي أتحكم في كل حاجة. أعمل اللي أنا عايزه، وبعدين أرجع أهدّيها كأني ما عملتش حاجة. أخليها تتوه بين خوفي عليها وخوفها مني، لحد ما توصل في الآخر إنها ما تعرفش تعيش غير بالطريقة اللي أنا عايزها.
ضحكت بصوت عالٍ:
ـ الله عليك يا فريد! ده إيه الدماغ دي!
ضحك الآخر:
ـ مش كده؟
ثم نظرت إليه بفرحة وفضول:
ـ بس يعني... مش غريبة إنك تحكيلي حاجة زي كده؟
التفت إليها بثقة:
ـ يا روحي، أنا عارف إنك ما تقدريش تطلعي كلمة واحدة من اللي اتقالت هنا لأي مخلوق. الروح غالية برضه ولا إيه؟
ضحكت وأمسكت يده:
ـ حبيبي، أنا عايشه معاك عشر سنين، وعمري ما قصرت رقبتك.
ثم قبضت على يده، وانخفض صوتها، وظهر الشر في عينيها:
ـ بس عايزة الصراحة... بعد اللي سمعته منك ده، زاد المالكي دي تستاهل أكتر من كده. واحدة زيها ما كانتش تحلم إنها تبوس جزمتك. كل ما أتخيل ذُلّك ليها بفرح موت... ما تطلقها وتخلص منها؟
اختفت ابتسامة فريد في لحظة.
نهض فريد فجأة، وصفعها بقوة، فترنحت في مكانها، ووضعت يدها على خدها وهي تحدق فيه بصدمة.
اقترب منها، وعيناه تقدحان غضبًا، وقال بحدة:
ـ إنتِ بتتكلمي عن مراتي كده يا لمامة؟ نسيتي نفسك ولا إيه يا بت؟
تراجعت خطوة، لكنه لم يمنحها فرصة للابتعاد، وتابع باحتقار:
ـ إنتِ واحدة عايشة معايا بورقة ملهاش لازمة، فاهمة؟ ورغم كده، عاملة لنفسك قيمة وبتحاولي تقارني نفسك بزاد؟
ضحك بسخرية مريرة:
ـ زاد صاينة نفسها، وعارفة قيمتها، وعمرها ما رخصت نفسها علشان فلوس ولا جريت ورا راجل. إنما إنتِ؟ حملتي من ورا أهلك، وبعدين فضلتي تدوري على اللي يدفع أكتر ويعيشك أحسن.
اشتد غضبه، وجذبها من شعرها بعنف، وانحنى نحوها، وانخفض صوته إلى نبرة أكثر تهديدًا:
ـ اسمعيها مني كويس... زاد برقبتك. دي مراتي، وأم ابني، واسمها لوحده أكبر من إنك تجيبي سيرته على لسانك بالطريقة دي.
ثم شد على شعرها لحظة أخرى:
ـ دي مرات فريد الشامي. فاهمة يعني إيه؟ الفرق بينك وبينها مش قرابة ولا دم... الفرق إن هي ست أنا اخترتها ورفعت اسمها، وإنتِ واحدة أنا لو حبيت ارميها، مش هتفرق معايا.
ترك شعرها فجأة، واستقام وهو ينظر إليها باشمئزاز:
ـ وأول وآخر مرة اسم زاد يتذكر على لسانك بالشكل ده. المرة الجاية مش هكتفي بكلمتين... فاهمة؟
خرج وأغلق الباب خلفه، وبقيت واقفة في منتصف الغرفة، وصدرها يعلو ويهبط من شدة الغضب، ويدها لا تزال فوق خدها.
ظلت كلماته تتردد في رأسها، وكل كلمة كانت تزيد النار المشتعلة بداخلها.
نظرت إلى الباب الذي خرج منه، وقالت بحقد:
ـ زاد برقبتك يا سما؟!
نعم... إنها سما.
ابنة عم زاد، والمرأة التي اختارت أن تعيش في الظل إلى جوار رجل ثري، وظلت سرًا في حياته طوال تلك السنوات، حتى بعد أن علمت بزواج زاد من الرجل الذي لطالما أرادته لنفسها.
ورغم كل ما تحمله في قلبها، لم تستطع يومًا كسر كلمة فريد؛ فهي تعرف جيدًا أنه قادر على تدمير حياتها كلها.
كان رضوان واقفًا أمام الموقد، يقلب قطع الدجاج في المقلاة حتى اكتسبت لونها الذهبي، ثم رفع الملعقة قليلًا ليتفقدها قبل أن ينادي بصوت مرتفع:
ـ انجزي يا حبيبة، يلا... أنا قربت أخلص أهو.
وقبل أن يسمع ردها، دوّى جرس الباب.
ترك رضوان الملعقة وأطفأ النار، ثم خرج من المطبخ يمسح يديه بالمنشفة المعلقة بجواره. وما إن فتح الباب حتى وجد كريم وإيمان أمامه، يحمل كل منهما عدة أكياس.
اتسعت ابتسامته، وتنحّى جانبًا مرحبًا بهما:
ـ أهلًا أهلًا، تعالوا ادخلوا.
دخلا وهما يلقيان السلام، فأغلق رضوان الباب خلفهما، بينما اتجه كريم إلى طاولة الطعام ووضع الأكياس فوقها.
اقترب رضوان، وتابع ما أخرجه كريم وإيمان من الأكياس بدهشة، حتى ظهرت أمامه أطباق الطعام المختلفة، فعقد حاجبيه مستفهمًا:
ـ إيه يا ابني الحاجات اللي إنت جايبها دي؟ ولا إنتوا كنتوا خارجين وبتتسوقوا وعديتوا عليّا ولا إيه؟
ضحك كريم، وبدأ يفرغ الأكياس، بينما ساعدته إيمان في إخراج الأطباق:
ـ أبدًا يا سيدي، لا بنتسوق ولا حاجة. بس طاقة في دماغي أنا وإيمان نطب عليك.
ظل رضوان واقفًا يتابع الأطباق بدهشة؛ فقد كانت أنواعًا مختلفة من الطعام، وكأنهما لم يأتيا بوجبة عابرة:
ـ أيوه برضه... مش فاهم. إنت جايب الحاجات دي هنا ليه؟
رفع كريم أحد الأطباق ووضعه على الطاولة:
ـ يا سيدي اصبر على رزقك. إيمان طابخه النهارده كوارع وممبار وعارفة إن حبيبة بتحب الممبار، قالت: تعالى نطب عليهم فجأة. وأنا بصراحة عجبتني الفكرة وقلت: يلا بينا.
هز رضوان رأسه ضاحكًا، ثم أشار ناحية المطبخ:
ـ يا ابني أنا عامل أكل. أنت بتهزر؟
سبقتهم إيمان بالرد وهي تضع طبقًا آخر على السفرة:
ـ يا سيدي حطه في التلاجة، مش هيخسر.
التفت إليها رضوان، وكأن اقتراحها لم يخطر له على بال أصلًا:
ـ تلاجة إيه وبتاع إيه؟! هنحط الأكل كله مع بعض. ده أنا عامل غدوة هتطلع من نافوخك!
ضحك كريم:
ـ استر يا رب! إيه؟ عدس برضه؟
ضحك رضوان وهو يهز رأسه:
ـ لأ، رز بشعرية وملوخية وفراخ وطبق سلطة محترم.
ثم أشار بإصبعه ناحية غرفة حبيبة، وقال بنبرة ساخرة:
ـ والدكتورة حبيبة مش عاجبها، عايزاني أطلب من بره. بتقولي: أعملك إيه؟ الملوخية بتكبس على نفسي... ماله السوشي يعني؟
ضحك كريم وهز رأسه:
ـ عامة لا ملوخية ولا سوشي؟! هي هتشوف الممبار هتنسى الصين بحالها.
شاركه رضوان الضحك، ثم التفت إلى إيمان، وقد بدا أنه استسلم للأمر الواقع:
ـ طيب يا إيمان، معلش هتعبك. بما إنك جيتي، ادخلي بقى المطبخ. كل حاجة جاهزة عندك؛ اغرفي في أطباق، وحبيبة تجهز معاكي السفرة.
ابتسمت إيمان وهزت رأسها:
ـ لا، خلي حبيبة مرتاحة. أنا هجهز السفرة وأنادي عليكم.
ـ طيب، ادخلي عرفيها إن كريم هنا.
دخلت إيمان إلى المطبخ، بينما جلس رضوان إلى جوار كريم، وأسند ظهره إلى الكرسي، ثم التفت إليه وسأله:
ـ أمال فين العيال؟ ما جبتهمش ليه؟
ـ لا يا عم، عند جدتهم من امبارح. هم أصلًا ما بيحبوش الأكل ده، وجدّتهم عاملة لهم محشي ومظبطاهم.
أومأ رضوان، ثم ارتسمت على وجهه ابتسامة صغيرة وهو يتذكر مكالمة كريم في وقت سابق، فمد يده إلى هاتفه الموضوع على طرف الطاولة، والتقطه وهو يقول:
ـ اممم، علشان كده اتصلت عليا من ساعة تشوفني في البيت ولا لأ.
ابتسم كريم:
ـ أومال يعني عايزني اشيل على قلبي واجي وملقكش. اقعد انا ومراتي ع السلم استنى جلالتك؟
ضحك رضوان، ثم رفع هاتفه أمامه وهو يقول بعفوية:
ـ يعم موجود هروح فين يعني. أنا هتصل بعصام ييجي يتغدى معانا. الخير كتير، ويجيب عياله ومراته، أهو نخف الحمل شوية على أبوه.
لكن قبل أن يفتح الهاتف، اندفع كريم نحو يده وأمسك بها سريعًا.
ـ لأ... احم.
توقف رضوان، ونظر إلى يد كريم التي تمسك بيده، ثم رفع عينيه إليه باستغراب، وأنزل هاتفه قليلًا وقد بدأ يستشعر غرابة تصرفه:
ـ لأ ، لأ ليه؟
سحب كريم يده سريعًا، وقال محاولًا أن يبدو طبيعيًا:
ـ أصل إحنا هنتغدى وننزل أنا وإنت.
قطّب رضوان جبينه.
ـ في إيه؟
ابتسم كريم ابتسامة عابرة، لكنها لم تمر على رضوان بسهولة:
ـ مفيش يا عم. الجايات كتير، نتجمع غير مرة مفيهاش حاجة.
ظل رضوان ينظر إليه لثوانٍ؛ لم تقنعه الإجابة، لكنه لم يجد ما يقوله، فوضع هاتفه أمامه، محتفظًا بشكه في داخله.
بعد قليل، خرجت حبيبة من غرفتها على صوت إيمان، فألقت عليها السلام، ثم لمحت الطعام المرتب على الطاولة.
توقفت في مكانها، واتسعت ابتسامتها في لحظة:
ـ الله الله! والله العظيم أنا قلبي طيب وعامر بالإيمان، كنت هاكل الملوخية وأنا متكدرة!
ضحكت إيمان، بينما رفع رضوان حاجبه، وجلس إلى جوارها على المائدة، ثم نظر إليها:
ـ مالها الملوخية يا حبيبة؟ ما بقتش عاجباكي دلوقتي؟! اللي يشوفك وإنتِ صغيرة كنتِ بتشربيها شرب.
لوت حبيبة فمها وهي تسحب كرسيها:
ـ ما هو من كتر ما أنا شربتها خلاص، المعدة قالت: اكتفينا يا حبيبة... استوب على كده.
ضحكت إيمان وهي تضع آخر طبق:
ـ والله يا حبيبة، الأكلة دي كان فعلًا ناقصها شوية ملوخية، والحمد لله رضوان عاملها وزي السكر.
ابتسم كريم وهو يجلس:
ـ طبعًا... ابننا رضوان طباخ قد الدنيا.
أخذ رضوان لقمة من طبقه، ورد وهو يلوك الطعام:
ـ الحمد لله، بعرف أعمل كل حاجة. مش زيك، تغرق في شبر ميه.
تعالت ضحكاتهم، ومضى وقت الغداء وسط الأحاديث والضحكات، حتى فرغوا من الطعام وبدأت الأطباق تُرفع عن الطاولة.
نهضت حبيبة وهي تجمع بعض الأكواب:
ـ أنا هعمل شاي... مين يشرب؟
وقبل أن يجيب أحد، كان كريم قد نهض من مكانه:
ـ لأ، أنا هاخد رضوان وأنزل. إنتوا اشربوا هنا براحتكم.
رفع رضوان عينيه إليه، وتوقف لحظة عند إصرار كريم، فقد بدا هذه المرة أكثر وضوحًا من أن يتجاهله.
نهض عن كرسيه، التقط مفاتيحه من فوق الطاولة، ثم تبعه إلى الخارج.
في غرفة المعيشة الواسعة داخل فيلا فريد الشامي، كانت زاد تجلس إلى جوار قاسم، تراجِع معه واجباته وتساعده في رسم شجرة طلبتها منه المعلمة.
وعلى الطرف الآخر، كان فريد يجلس واضعًا ساقًا فوق الأخرى، وأمامه حاسوبه المحمول، يتابع عمله بهدوء.
وفجأة، رن هاتف زاد.
رفعت يدها لتتناوله، لكن فريد سبقها إليه.
كان قد لمح الرقم على الشاشة، فرفع طرف عينه إليها وسأل:
ـ رقم مين ده؟
نظرت زاد إلى الشاشة باستغراب:
ـ ما أعرفش... أكيد لما أرد هعرف ده رقم مين.
لكن قبل أن تصل يدها إلى الهاتف، كان فريد قد التقطه بالفعل.
ضغط زر الإجابة، وظلت عيناه معلقتين بزاد وهو يقول:
ـ ألو؟
صمت لحظات، ثم عقد حاجبيه قليلًا:
ـ مين؟
أنصت ثانية، ثم سأل:
ـ أمم، إنتِ مين؟
راقب زاد طوال المكالمة، ولاحظ كيف بدأ التوتر يتسلل إلى ملامحها، حتى ابتلعت ريقها وهي تنتظر أن تعرف من المتصل.
أنهى فريد صمته قائلًا:
ـ واحدة بتقول اسمها عواطف... الدادة بتاعتك.
شهقت زاد، واتسعت عيناها في فرحة لم تستطع إخفاءها، وانتزعت الهاتف من يده بسرعة:
ـ مش معقول!
ثم وضعت الهاتف على أذنها، وكأنها تخشى أن تكون قد سمعت الاسم خطأ:
ـ ألو؟!دادة عواطف؟! مش معقول... أنا مش مصدقة!
جاءها صوت عواطف من الطرف الآخر مصحوبًا بضحكة دافئة:
ـ إزيك يا زاد يا بنتي؟ عاملة إيه؟
ابتسمت زاد، وتغير وجهها بالكامل في لحظة. اختفى كل ما كان عليه من هدوء مصطنع، وظهرت على ملامحها طفلة صغيرة عادت فجأة إلى حضن شخص تحبه.
ـ أنا كويسة يا دادة... إنتِ عاملة إيه؟ وحشاني أوي.
جاءها عتاب عواطف هادئًا:
ـ وأنا لو وحشاكي كنتِ سألتي عليا.
لمعت عينا زاد بالدموع، ووضعت يدها الحرة على صدرها:
ـ سامحيني والله يا دادة... أنا عارفة إني مقصرة معاكي. بس بجد وحشاني أوي.
نهضت من مكانها دون أن تشعر، وأخذت تتحرك في الغرفة ذهابًا وإيابًا، غير قادرة على إخفاء فرحتها.
كان فريد قد أغلق الحاسوب للحظات، وظل يتابعها بعينيه.
لم يرَ زاد بهذه الصورة منذ وقت طويل.
كانت تبتسم من قلبها، تضحك بين الكلمات، وتحرك يدها أثناء حديثها وكأن عواطف تقف أمامها بالفعل، لا على الطرف الآخر من الهاتف.
سألتها زاد فجأة:
ـ إزاي، وجبتي رقمي منين؟
أجابتها عواطف:
ـ حسين بيه بعتلي الشهرية بتاعتي، فاتصلت عليه أشكره وأطمن عليكِ. فرحني وقالي إنك رجعتي . رحت على طول واخده رقمك منه، وما استنيتش. قولت لازم أكلمك واسمع صوتك.
ازداد اتساع ابتسامة زاد، واغرورقت عيناها بالدموع:
ـ أنا مبسوطة أوي يا دادة..إني سمعت صوتك. حقيقي مش مصدقة.
استمرت المكالمة دقائق أخرى، لم تتوقف خلالها ابتسامة زاد، حتى انتهت أخيرًا وأغلقت الهاتف.
ظلت واقفة للحظة، ثم جلست وأخذت تسجل رقم عواطف في هاتفها، وعلى شفتيها ابتسامة واسعة.
جاءها صوت فريد من خلفها:
ـ شايفك مبسوطة يعني.
أجابته دون أن تنظر اليه:
ـ دادة عواطف! دي اللي مربياني. أكيد هفرح لما تفتكرني بعد السنين دي.
تأملها فريد للحظات، ثم سأل بهدوء:
ـ فرحانة إنها كلمتك للدرجة دي؟
توقفت أصابعها عن الحركة، ورفعت عينيها إليه. ثم ضيقت عينيها قليلًا، وأجابته ببرود:
ـ أنا قلتلك إنها اللي مربياني. أكيد كلامي واضح.
عاد فريد إلى حاسوبه، وقال وهو يكتب:
ـ خلاص. لو شايفة إنها مهمة أوي كده بالنسبالك، خليها تيجي هنا تشتغل وتقعد معاكي.
توقفت زاد عن الحركة، وحدقت فيه بدهشة:
ـ بجد؟
رفع عينيه إليها، وابتسم ابتسامة خفيفة:
ـ أيوه، بجد. خليها تيجي، وكمان تاخد بالها من قاسم.
اتسعت عيناها أكثر، لكن قبل أن تتمكن من الرد، عاد ينظر إلى حاسوبه وأضاف:
ـ ولا أقولك... سيبي الموضوع ده عليا.
لمعت الفرحة في عيني زاد، وحاولت أن تخفيها سريعًا، فقد كانت في أمسّ الحاجة إلى شخصٍ تجد معه راحتها في الحديث، ثم عادت إلى جوار قاسم.
تناولت قلمه بحماس، وانحنت فوق كراسته:
ـ يلا يا حبيبي، وريني كده عملت إيه. الشجرة دي عايزين نخلّيها أحلى شوية، يلا هنكمّلها سوا.
ضحك قاسم وبدأ معها من جديد.
أما فريد، فرفع عينيه عن الشاشة ليتابعها.
كانت تحاول الانشغال مع ابنها، لكن ابتسامة صغيرة ظلت عالقة عند طرف فمها، كشفت عن فرحة لم تستطع إخفاءها تمامًا.
التقط فريد تلك الابتسامة، فارتسمت على شفتيه ابتسامة خفيفة، ثم عاد إلى الحاسوب.
بعد أن أدّى رضوان وكريم صلاة العشاء، سارا معًا حتى وصلا إلى منزل كريم. وما إن دخلا جلس كريم، حتى نظر رضوان إليه بضيق، وقد بدأ القلق يتسلل إلى ملامحه:
ـ إيه يا ابني؟ إنت واخدني من شارع لشارع، وماشي عمال تجيبلي كلمة من الشرق وكلمة من الغرب، ودلوقتي جبتني بيتك ومش فاهم حاجة. في إيه بالظبط يا كريم؟
نظر إليه كريم بجدية، وقال:
ـ أنا جبتك هنا ولوحدنا علشان نتكلم براحتنا.
ـ نتكلم في إيه؟
أخذ كريم نفسًا عميقًا، ثم قال:
ـ أولًا... أنا ما كلمتش عصام علشان ما نضغطش عليك، علشان أنا عارف ردك!
تغيرت ملامح رضوان في لحظة، وقال بقلق:
ـ عارف إيه؟ في إيه يا ابني؟ قلقتني.
ـ اقعد بس، وهنتكلم وأنا هوضحلك كل حاجة.
جلس رضوان أمامه، وقد ازدادت حيرته وهو ينتظر أن يفهم أخيرًا سبب هذا الغموض، فقال كريم:
ـ عايز أعرف مالك، ولحد إمتى!
ساد الصمت للحظة.
فهم رضوان أخيرًا إلى أين يقوده كريم، وزفر بضيق، وكأن شيئًا في داخله كان يتمنى لو يتركه الآخر وشأنه. ومع ذلك جلس في مواجهته، مستعدًا للدفاع عن نفسه قبل أن تبدأ الأسئلة.
ـ انا عارف إنك فاهم اقصد إيه. وانا مش بضغط عليك. ولا جابرك تتكلم. بس لحد امتى بجد يارضوان هتفضل كده!
اشتد الضيق في ملامح رضوان، ورد بحدة:
ـ ايه ياكريم مش هنخلص من الموضوع ده! آنتوا مابتزهقوش!
حرك كريم رأسه بالرفض، ولم يتراجع أمام انفعاله:
ـ لأ مبنزهقش. عارف ليه! علشان إحنا واحد. أنا اخوك وخايف عليك!
رفع رضوان عينيه إليه، وكأن الجملة أصابته في موضع لم يكن يريد لأحد أن يقترب منه:
ـ خايف عليا من ايه!
أجابه كريم دون تردد:
ـ الدنيا بتسرقك يارضوان. وخايف يجي اليوم وتفوق وتندم وتلاقي نفسك لوحدك!
لم يجد رضوان ردًا. ظل ينظر إليه، بينما تابع كريم، وقد شعر أن صمته هذه المرة ليس رفضًا بقدر ما هو محاولة للهروب:
ـ رفضك للجواز. رفضك حتى إنك تفتح قلبك لواحده تانيه. رفضك حتى للكلام في الموضوع ده. موقّف حياتك ليه!
تراكمت الأسئلة فوق صدر رضوان دفعة واحدة. شعر بالاختناق منها، وبذلك الشعور القديم الذي يكرهه؛ أن يجد نفسه مضطرًا إلى فتح أبواب أغلقها بإرادته منذ سنوات.
زفر طويلًا، ثم قال محاولًا استعادة هدوئه:
ـ ياكريم انا عايش مرتاح ورايق. انت ليه مش عايز تفهم. انا كده مرتاح.
لكن كريم لم يترك له المساحة التي أرادها.
ـ لسه بتفكر فيها يا رضوان؟
تجمدت ملامحه للحظة، وكأن السؤال أصاب موضعًا ظل يخفيه طويلًا. لم يحتج كريم إلى ذكر اسمها؛ فقد عرف رضوان فورًا من يقصد. رفع عينيه إليه، ثم هرب بهما بعيدًا، محاولًا التمسك بذلك التماسك الذي احتمى به سنوات. ابتلع ريقه، وسأل بتردد:
ـ تقصد مين!
جاءه الرد سريعًا، بلا مقدمات ولا فرصة للمراوغة:
ـ زاد المالكي!
نطق كريم بالاسم وكأنه كان ينتظر هذه اللحظة منذ بدأ الحديث، ثم أردف:
ـ احكيلي وافتحلي قلبك، حرام تشيل كل ده جواك لوحدك. أنت فعلاً متجوزتش لحد دلوقتي علشانها!
ظهرت على شفتي رضوان ابتسامة ساخرة، لكنها لم تصل إلى عينيه:
ـ أنا متجوزتش لأني مش عايز، مش لأني بفكر فيها. وبعدين إيه اللي فكرك بيها بعد كل السنين دي؟
هز كريم رأسه، وظل يراقبه بثبات:
ـ لأنك مترهبن وناسي نفسك. أتكلم يارضوان عايز اعرف الحقيقة.
سكت رضوان.
كانت الإجابة هذه المرة أصعب من كل ما سبقها. أسند ظهره إلى المقعد، وأطرق للحظات، ثم قال بهدوء حاول أن يجعله مقنعًا:
ـ مش عايز اتجوز واحده هاظلمها معايا. مش عايز أشيلها حمل مش بتاعها. وبعدين صدقني... حاولت.
ـ حاولت إيه؟
رفع رضوان عينيه إليه:
ـ حاولت أقنع نفسي إني جاهز، وإن ممكن أبدأ من جديد، بس كل مرة بلاقي نفسي مش جاهز.
ظل كريم صامتًا، فتابع رضوان، وكأنه يسارع إلى إغلاق أي باب يمكن أن يعيد الحديث إلى زاد:
ـ ومش علشان لسه بفكر فيها. زاد اتجوزت، وليها حياتها، وأنا مش هاحجر على حياتي بسبب سراب.
بقيت الكلمات معلقة بينهما.
لم يقتنع كريم تمامًا، لكن رضوان لم يمنحه فرصة للتعقيب، واسترسل:
ـ أنا عايز أتجوز وأنا عارف إني داخل على حياة جديدة، مش داخل أهرب من حياة قديمة. ولحد دلوقتي... أنا مش قادر أعمل ده.
ظل كريم يراقبه طويلًا، يتتبع حركاته ونظراته، حتى تأكد أن كلماته تخفي أكثر مما يقول. وحين أدرك ما يفعله به، واجهه بما كان يحاول الفرار منه:
ـ إنت خايف يا رضوان؟
رفع رضوان عينيه إليه للحظة، ثم أشاح بنظره سريعًا، وكأن السؤال أصاب موضعًا لا يريد الاقتراب منه.
ـ لأ. هخاف من إيه؟
ابتسم كريم ابتسامة صغيرة؛ لم تكن ابتسامة انتصار، بل ابتسامة رجل يعرف صديقه جيدًا، ويعرف أن إجابته ليست الحقيقة.
ـ لأ بجد... إنت خايف؟
لم يرد رضوان.
اقترب كريم منه قليلًا، وقال بجدية:
ـ اتكلم يا رضوان. يمكن ساعتها ترتاح. إنت ما عشتش اللي فات علشان تشيل كل ده في قلبك عشر سنين وتسكت، وتقول أنا خلاص نسيت وعدّيت. وانت لسه واقف هناك.
هبطت عينا رضوان إلى الأرض.
كانت الجملة الأخيرة أثقل عليه من كل ما سبقها؛ لأنها أصابت الحقيقة التي ظل يهرب منها: أنه مضى في حياته، لكنه لم يمضِ منها كلها.
واصل كريم حديثه، ولم يترك له فرصة لاستعادة قناعه القديم:
ـ كملت تعليمك، وبنيت نفسك، وبصيت لمستقبلك، وكل مرة كنت تقول لنفسك: هنسى وهعيش. وفعلاً عشت... بس في حتة جواك لسه ناقصة. ليه يا رضوان؟ ليه تاعب نفسك كده؟
رفع كريم عينيه إليه، وكأنه يحاول أن ينتزع منه الإجابة لا أن يفرضها عليه:
ـ ومن كلامك ونظرة عينيك حسيت إنك تايه وخايف. إنت خايف يا رضوان... بس يا ترى إنت خايف من إيه؟ خايف على حبيبة؟ خايف على نفسك؟ خايف من إيه يا رضوان؟
لم يعد رضوان قادرًا على النظر إليه. أطرق رأسه وأخذ نفسًا عميقًا، لكن شيئًا لم يخفف ذلك الثقل عن صدره. حاصرته الأسئلة، ولم يعد يملك مهربًا منها أو خلف كلمة «أنا بخير».
وحين أدرك أنه لم يعد قادرًا على الإنكار، خرج اعترافه أخيرًا:
ـ أيوه خايف ياكريم.خايف.
رفع كريم عينيه إليه، ولم يقاطعه.
تابع رضوان، وصوته أكثر انخفاضًا:
ـ خايف أتوجع تاني.
ارتجفت ملامحه قليلًا، كأن الجملة أعادت إليه وجعًا ظن أنه دفنه منذ زمن:
ـ خايف أتكسر تاني... خايف أتعلق، وأصدق، وأدي كل اللي عندي، وفي الآخر ألاقي نفسي لوحدي من تاني.
سكت لحظة، وأخذ نفسًا بطيئًا قبل أن يواجه ما ظل يهرب منه:
ـ من وأنا صغير، كل حاجة بحبها بتروح مني. حبيت أبويا... وراح. وما كانش ليا في الدنيا دي غير أمي... وراحت هي كمان.
ابتلع غصته، وظل يحدق أمامه لحظات، ثم قال:
ـ حبيت زاد.
توقفت كلماته عند اسمها، كأن عشر سنوات كاملة عبرت أمام عينيه دفعة واحدة.
ثم أردف بصدق لم يعد يملك أمامه مهربًا:
ـ أنا فعلًا حبيتها يا كريم.
أطرق برأسه، وارتسمت على شفتيه ابتسامة باهتة، يحاول بها استعادة تماسكه:
ـ بس خلاص..راحت ونسيتها.
لم يتكلم كريم، وكان صمته أبلغ من أي اعتراض.
رفع رضوان عينيه إليه، وكأنه اضطر إلى تبرير كلمة لم يصدقها هو نفسه:
ـ أيوه، نسيتها. ده اللي فضلت أقوله لنفسي عشر سنين، وإن اللي فات خلاص انتهى ولازم أكمل حياتي.
استقر الصمت بينهما لحظات، قبل أن يواصل رضوان، وقد هدأت نبرته، بينما ظل الوجع عالقًا بين كلماته:
ـ أنا مش خايف من الحب يا كريم... أنا خايف من اللي ممكن ييجي بعده. خايف أتعلق، وأدي كل اللي عندي، وأبني حياة وأنا فاكر إني أخيرًا لقيت الأمان... وبعدين أصحى في يوم ألاقي كل اللي بنيته انهدم، وألاقي نفسي لوحدي من تاني.
مرر يده على وجهه، ثم أنزلها ببطء:
ـ أنا مش عايز أظلم واحدة مالهاش ذنب في كل اللي أنا عشته. مش عايز أتجوز واحدة تدخل حياتي بقلبها كله، وأنا داخلها بنص قلب... والنص التاني هناك واقف عند باب قديم.
خرجت منه ابتسامة مريرة:
ـ ولا عايز أظلم نفسي وأقول خلاص يا رضوان، كفاية خوف... اتجوز وخلاص. علشان إيه؟ علشان أرضي الناس وأثبت لهم إني عرفت أكمل؟ أنا مش عايز أعيش لمجرد إني أعيش... أنا عايز أعيش وأنا مرتاح، مش أدخل حياة وأنا من جوايا عارف إني مش قادر أكون فيها.
سكت قليلًا، ثم تابع:
ـ أنا مش معقد يا كريم، ومش بقول إني ضيعت عمري علشان واحدة. أنا عارف إن الحياة ما بتقفش على حد، وعارف إن زاد كملت حياتها، وأنا كمان كملت حياتي.
هز رأسه ببطء، وكأنه يحاول للمرة الأولى أن يكون صادقًا مع نفسه:
ـ بس يمكن المشكلة عمرها ما كانت فيها... يمكن المشكلة كانت فيا أنا.
ظل كريم منصتًا إليه، فاسترسل رضوان:
ـ بقيت أخاف من كل حاجة ممكن أحبها، وكل ما أقرب من حد أبدأ أفكر في اليوم اللي ممكن أخسره فيه. بقيت أبعد قبل ما أتعلق، وأمشي قبل ما أتوجع... مش علشان أنا قوي، بالعكس، علشان أنا عارف الوجع ده ممكن يعمل إيه في الواحد.
ساد الصمت بينهما.
وبدا رضوان كأنه استنفد كل ما أخفاه طوال السنوات الماضية، ثم رفع عينيه إلى كريم وقال بصوت هادئ، لكنه حاسم:
ـ خايف أدي قلبي لحد... وأصحى في يوم ألاقيه راح مني هو كمان. والحقيقة أصلا مش هعرف ادي قلبي لحد تاني، أنا خسرت ناس وحاجات كتير... ومش عايز أعيش مستني الخسارة الجاية.
ترك كريم كلماته تستقر بينهما، دون أن يقاطعه أو يحاول التخفيف عنه.
وبعد لحظات، عاد شيء من تماسك رضوان إلى ملامحه، وقال:
ـ ولو ليا غلاوة عندك يا كريم، ما تفتحش معايا موضوع الجوازة تاني. أنا مش محتاج حد ينقذني من حياة أنا اخترتها، ولا يقنعني إني ناقصني حاجة. ولو في يوم غيرت رأيي، هتكون أول واحد يعرف... لكن لحد ما اليوم ده ييجي، سيبني أعيش بالطريقة اللي أنا شايفها مناسبة ليا.
ساد الصمت بينهما للحظات، ثم أومأ كريم برأسه، وقد فهم أخيرًا أن إصراره لن يغيّر شيئًا. أما رضوان، فظل ساكنًا في مكانه، بعينين تخفيان من الوجع أكثر مما استطاع أن يقوله.
كانت حبيبة تقف في القسم تراجع الحالات التي مرّت عليها خلال مناوبتها، بينما جلست ريهام إلى جوارها تقلب في بعض الأوراق.
رفعت ريهام عينيها عن الأوراق فجأة، وقالت:
ـ على فكرة يا حبيبة، إنتِ المفروض تشكري الدكتور فارس على اللي عمله معاكي.
رفعت حبيبة عينيها عن الملف.
ـ أشكره على إيه يعني؟ خلاص، الموضوع عدى.
هزت ريهام رأسها، وكأنها لم تقتنع بردها.
ـ لا يا بنتي، ما عداش بالبساطة دي. إنتِ كان ممكن تتحولي للتحقيق فعلًا.
ـ بس ما اتحولتش.
ـ لأن الدكتور فارس اكتفى بلفت نظر.
وضعت ريهام الأوراق جانبًا، ثم مالت نحوها قليلًا.
ـ إنتِ عارفة يعني إيه تتحولي للتحقيق وإنتِ لسه مقيمة؟ الموضوع كان ممكن يسيب علامه زفت في تقييمك وفي ملفك المهني، حتى لو الغلطة نفسها اتقفلت. و كان ممكن يصعّد الموضوع، خصوصًا إن الورقة كانت باسمك، ومع ذلك معملش حاجه.
أنزلت حبيبة عينيها إلى الملف، وظلت لحظات صامتة قبل أن تقول:
ـ انا عارفه انها كارثه لكن هو فعلًا كان ممكن يعمل كده؟
ـ طبعًا. وبعدين متنسيش إنك قبل كده تنشنتي معاه واشتكيتيه للمدير. يعني موقفك ده جاله على طبق من ذهب انه يأذيكي لكن ما عملهاش.
رفعت حبيبة حاجبها، وقد بدأ كلام ريهام يضعها أمام جانب لم تفكر فيه من قبل.
ـ اممم كان ممكن يستغل الموضوع ضدي؟
ـ أنا مش بقول يستغل، أنا بقول كان عنده سبب يخليه يتعامل معاكي بشكل أشد، ومع ذلك ما عملش.
سكتت حبيبة، وأخذت تعبث بطرف الورقة بين أصابعها.
ـ تفتكري كده؟
ابتسمت ريهام بثقة.
ـ أيوه. وأنا لو مكانك، كنت رحت شكرته.
ـ أشكره على إيه؟ بت انزلي من على وداني انا مش فايقه لك
ضحكت ريهام، لكنها لم تتراجع.
ـ على فكره انا بتكلم بجد، لازم تشكريه إنه اختار يعديها، بدل ما تكبري دماغك وتعاملي الموضوع كأنه حق مكتسب.
نظرت إليها حبيبة بضيق.
ـ يشخيه منك لله بتعرفي تقنعي الواحد.بوجهة نظرك
انفجرت ريهام بالضحك.
ـ روحي بس، دانتي مطلعه عينه من أول يوم ليه.
ظلت حبيبة لحظات تفكر، ثم أغلقت الملف بحسم.
ـ ماشي.لما نشوف اخرتها مع ابو فصاده ده.
نهضت وهي تتمتم:
ـ واهو أخلص من زنّك انتِ التانيه.
---
لم تكن حبيبة مقتنعة تمامًا بما تفعله وهي تسير باتجاه مكتب فارس، لكنها أرادت أن تنهي الأمر وتعود إلى عملها.
توقفت أمام الباب، أخذت نفسًا قصيرًا، ثم طرقت طرقات خفيفة.
لم يصلها رد واضح، فدفعت الباب قليلًا.
وما إن وقعت عيناها على ما بالداخل حتى توقفت.
كان فارس واقفًا أمام مكتبه، وأمامه امرأة أنيقة للغاية، تبدو من هيئتها وكأنها جاءت خصيصًا لرؤيته.
لكن ما لفت انتباه حبيبة أكثر كان يدها المستندة إلى يده.
تجمدت للحظة.
لم تعرف لماذا شعرت بحرارة مفاجئة في وجهها، ولا لماذا بدت لها تلك اللحظة أطول مما ينبغي.
رفع فارس عينيه نحو الباب، والتقت عيناه بعينيها.
ابتعدت المرأة قليلًا، وسحب فارس يده بهدوء.
ـ في حاجة يا دكتورة؟
شعرت حبيبة أن وجودها في المكان أصبح محرجًا على نحو لا تفهم سببه. نظرت إلى فارس، ثم إلى المرأة، قبل أن تعود إليه سريعًا.
ـ لأ لا... أبدا مفيش.
عقد فارس حاجبيه.
ـ إزاي مفيش؟ إنتِ خبطتي ودخلتي.
ـ أنا... كنت...
بحثت عن أي إجابة تنقذها من الموقف، فلم تجد سوى أول شيء جاء إلى ذهنها.
ـ خبطت على المكتب بالغلط.
ظل فارس ينظر إليها لحظات، وكأنه يحاول استيعاب ما قالته.
ارتبكت أكثر، وارتسمت على شفتيها ابتسامة صغيرة لم تستطع منعها.
ـ احم. سوري.
ثم استدارت سريعًا وغادرت قبل أن يزداد الموقف إحراجًا.
أغلقت الباب خلفها، وظلت واقفة في الممر لثوانٍ، قبل أن ترفع يدها إلى خدها.
كان ساخنًا.
قطبت حاجبيها، وهمست لنفسها:
ـ هو أنا وشي احمر كده ليه؟
أنزلت يدها ونظرت حولها، وكأنها تبحث عن إجابة في الممر الخالي.
ـ وأنا مالي أصلًا؟
ثم تحركت مبتعدة عن المكتب، وهي تزفر بضيق.
ـ وانا اللي رايحة أشكره... أشكره على إيه بقى؟ يا ريتني ما سمعت كلامك يا ريهام. ده عاملي فيها فالنتينو.
---
في الداخل، ظلت المرأة واقفة أمام فارس، تتابع الباب الذي خرجت منه حبيبة.
قالت بابتسامة خفيفة:
ـ سوري بقى، شكلي جيت لك في وقت غلط.
ألقى فارس نظرة قصيرة ناحية الباب، ثم عاد إليها.
ـ لا، مفيش حاجة.
تناول ملفًا من فوق مكتبه وقال بهدوء:
ـ روحي على البيت دلوقتي، وبالليل نبقى نتكلم.
ابتسمت المرأة وأومأت برأسها.
ـ اوكي. سي يو.
غادرت، فأعاد فارس الملف إلى مكانه وانشغل بعمله، وكأن شيئًا لم يحدث.
أما حبيبة، فعادت إلى مكانها وجلست، وأخرجت هاتفها.
راحت تمرر إصبعها على الشاشة بسرعة، تنتقل من شيء إلى آخر دون أن تستقر عيناها على شيء.
كانت تحاول أن تشغل نفسها بأي شيء.
لكن الضيق الذي استقر داخلها لم يكن يريد أن يزول.
كان رضوان يقف داخل المكتبة، يعيد ترتيب الكتب فوق الأرفف واحدًا تلو الآخر، حتى انتهى من آخر ما كان بيده. ألقى نظرة سريعة على المكان، ثم تناول مفاتيحه استعدادًا للانصراف.
لكن ما إن استدار نحو الباب حتى توقفت خطواته.
كان هناك رجل يقف أمامه.
رجل يعرفه جيدًا، رغم أن السنوات تركت بصمتها الثقيلة على ملامحه.
توقف رضوان للحظات، وظل ينظر إليه في صمت، وكأن عقله يحاول أن يستوعب كيف أعادته السنوات إليه بهذه الطريقة.
أما حسين، فظل واقفًا مكانه، يحمل عكازه بيد، وفي عينيه كلام كثير لم يجد طريقه إلى لسانه بعد.
كان الحرج حاضرًا بينهما.
رضوان لأنه انقطعت أخباره عنهم تمامًا، ولم يحاول طوال تلك السنوات أن يقترب أو يسأل عنهم، وحسين لأنه لم يسأل عنه هو الآخر، وكأن كليهما ترك المسافة بينهما تكبر يومًا بعد يوم، حتى أصبحت اليوم تقف أمامهما كحاجز ثقيل لا يعرف أيٌّ منهما كيف يتجاوزه.
قطع حسين الصمت أخيرًا، بصوت مبحوح أثقلته السنوات:
ـ إزيك يا رضوان؟
تأمله رضوان للحظات.
تغير كثيرًا.
كان شعره قد غزاه البياض بالكامل، وبدت على وجهه آثار سنوات لم تكن موجودة من قبل، بينما استند جسده إلى عكاز يمسكه بيده.
ومع ذلك، حاول رضوان أن يبتسم.
تقدم نحوه بخطوات هادئة، ومد يده إليه قائلًا:
ـ أهلًا، حسين بيه. إيه المفاجأة الحلوه دي!
صافحه حسين، لكن يده ظلت معلقة بيد رضوان للحظات أطول مما ينبغي، وكأن المصافحة وحدها لم تكن كافية لاختصار كل ما حدث بينهما.
ترك يده ببطء، ثم تنهد وقال:
ـ تحب نقعد هنا ولا أخدك مكان نقعد نتكلم فيه بهدوء؟
شعر رضوان أن وراء تلك الزيارة شيئًا أكبر من مجرد لقاء عابر، لكنه لم يسأله.
اكتفى بأن قال:
ـ زي ما تحب. عايز تتفضل هنا مكانك ومطرحك.
هز حسين رأسه.
ـ لأ... تعال نروح أي مكان هادي. محتاج أتكلم معاك شوية، ومش عايز حاجة تشغلنا.
حرك رضوان رأسه موافقًا.
ـ تمام. ثواني بس أقفل المكتبة.
أغلق رضوان المكتبة، ثم اتجه إلى حيث كانت سيارة حسين تنتظره. كان حسين بداخلها، وبمجرد أن وقعت عيناه على اليافطة الموضوعة بجوار المكتبة، توقفت عيناه عند الاسم طويلًا.
«زاد الأسمر».
لم يكن مجرد اسم بالنسبة إليه.
كان بابًا إلى سنوات كاملة...
إلى ابنته.
إلى رضوان.
إلى كل شيء ظن أن الزمن قادر على دفنه، فاكتشف أن بعض الأشياء لا تموت... فقط تصمت.
أخذ حسين نفسًا عميقًا، ثم ركب رضوان إلى جواره.
وبمجرد أن استقر رضوان في مقعده، أشار حسين إلى السائق بالانطلاق، فتحركت السيارة، بينما ظل الصمت يخيّم عليهما.
في غرفة النوم، كانت زاد تجلس إلى جوار عواطف، وقد مضت عدة أيام منذ أحضرها فريد إلى الفيلا لتبقى معها.
كان الحديث بينهما قد بدأ عابرًا، ثم أخذ يتشعب شيئًا فشيئًا، حتى ساقتهما الذكريات القديمة إلى سنوات مضت. كانت عواطف تتحدث، بينما راحت عيناها تتفحصان زاد من وقت إلى آخر، تلتقطان ما تحاول الأخيرة إخفاءه خلف صمتها.
فقد تغيرت زاد.
لم تعد تلك المرأة التي تعرفها عواطف؛ صارت أكثر صمتًا، أقل حديثًا، وكأن شيئًا ثقيلًا يجثم على صدرها. حتى ابتسامتها، حين تظهر، لم تكن تصل إلى عينيها.
وكان ما سمعته عواطف من بعض العاملات عن معاملة فريد لها يزيد قلقها، لكنها لم ترد أن تسأل قبل أن تتأكد منها بنفسها.
ترددت لحظة، ثم قالت بحنان:
ـ مالك يا زاد؟ إنتِ متغيرة أوي من ساعة ما جيت. ساكتة ومش على بعضك... هو صحيح اللي سمعته؟ اللي اسمه فريد ده بيعاملك زي ما قالوا؟
توقفت زاد عن العبث بأصابعها، وبقيت عيناها معلقتين أمامها.
لم تجب.
كان سؤال عواطف أشبه بيد امتدت إلى جرح ظل مغلقًا سنوات. شعرت زاد بغصة تصعد إلى حلقها، وحاولت أن تبتلعها، لكن شيئًا في داخلها كان قد تعب من الصمت.
منذ سنوات وهي تحمل كل شيء وحدها.
تخفي خوفها، وتدفن إهانتها، وتبتلع دموعها قبل أن يراها أحد. لم تجد شخصًا تستطيع أن تضع أمامه كل هذا الثقل دون أن تخشى أن يُستخدم ضدها يومًا.
أما عواطف، فكانت تعرفها منذ زمن، وتعرف أهلها، وكانت زاد واثقة أنها لن تخرج بكلمة واحدة مما ستسمعه منها.
رفعت عينيها إليها أخيرًا.
كانت نظرتها مثقلة بشيء لم تحتج إلى قوله؛ كأنها تسألها بصمت إن كان بإمكانها أن تتكلم.
وحين لم تجد في وجه عواطف سوى الاحتواء، أخذت نفسًا عميقًا، وبدأت تحكي.
خرجت الكلمات مترددة في البداية، ثم أخذت تتتابع كلما شعرت أنها تفرغ شيئًا من صدرها.
حكت لها عن معاملة فريد لها، وأكدت أن ما سمعته كان صحيحًا، وعن طريقته المتناقضة معها؛ كيف يمكن أن يعاملها بلطف في لحظة، ثم ينقلب عليها في اللحظة التالية، وعن تحكمه فيها وإهانته لها وضربه إياها، وعن تفاصيل كثيرة ظلت تخفيها حتى عن نفسها.
كانت عواطف تستمع دون مقاطعة.
ومع كل كلمة كانت ملامحها تتبدل أكثر، حتى لم تعد قادرة على إخفاء صدمتها.
وحين انتهت زاد، رفعت عواطف يدها وضربت على صدرها من هول ما سمعت.
ـ يضربك! تتقطع إيده اللي يرفعها عليكي.
ثم أمسكت يد زاد، ونظرت إلى عينيها وكأنها لا تزال غير مصدقة:
ـ ليه يا زاد يا بنتي؟ ليه متحملة كل ده وساكتة؟
أخفضت زاد عينيها، وقالت بحزن:
ـ عايزاني أعمل إيه يا دادة؟
اتسعت عينا عواطف، ولم يزدها رد زاد إلا غضبًا وحيرة.
ـ تعملي إيه؟ هو إيه اللي تعملي إيه؟ إنتِ عندك أبوكي! ده لو عرف، مش هيسكت. هو إنتِ مفكرة نفسك قليلة ولا إيه؟ إزاي تستحملي الذل والإهانة دي؟
نهضت زاد من مكانها دفعة واحدة.
لم يكن في حركتها غضب، بقدر ما كان فيها اختناق. راحت تمسح دمعة أفلتت من عينيها، ثم قالت:
ـ أنا عارفة كل ده يا دادة، وعارفة إن بابا يقدر يرجع لي حقي، لكن خوفًا على بابا سكت. أنا مش ضامنة فريد، بطريقته دي ممكن يعمل إيه في بابا. أنا مهما حكيت لك عن فريد، إنتِ مش هتستوعبي اللي بقوله.
نهضت عواطف أمامها، وأمسكت بذراعها برفق، وقد بدا عليها أنها تريد أن تنتزعها من هذا الخوف الذي حبسها داخله.
ـ إنتِ بتحطي افتراضات يا بنتي من دماغك! جربي. إزاي عايشة معاه؟ اخلعيه. لو ضاقت بيكي الدنيا اخلعيه، إنما تتحملي ضرب؟ ده إنتِ أبوكي عمره ما عملها، وأمك الله يرحمها عمرها ما عملتها. أنا برضه لما شفته ما استريحتش، كان عليكي بإيه ده كله؟ اخلعيه ونجي نفسك.
ارتسمت على شفتي زاد ابتسامة قصيرة، لكنها كانت خالية تمامًا من الفرح.
هزت رأسها، وقالت:
ـ وإنتِ مفكرة إني محاولتش؟ أنا حاولت أكتر من مرة أنزل مصر وأسيبه وأخلعه، ولكن هو فهم أنا ناوية أعمل إيه، وهددني.
توقفت عواطف.
اختفت كل ملامح الغضب من وجهها، وحل محلها القلق.
ـ هددك؟ هددك بإيه إن شاء الله؟
نظرت زاد إليها.
لم تجب فورًا.
امتلأت عيناها بالدموع، وبدت الكلمة التي ستقولها أثقل من أن تخرج بسهولة. ثم قالت:
ـ هددني بقاسم.
شهقت عواطف، ورفعت يدها إلى فمها:
ـ يا نهار أسود! هو في حد ممكن يأذي ابنه؟
صمتت لحظات، ثم حاولت أن تجد تفسيرًا آخر، شيئًا يطمئنها ويطمئن زاد معها.
ـ ما يمكن يا بنتي بيقولك كده، أي كلام وخلاص يخوفك بيه، عشان عارف إن إنتِ روحك في ابنك.
هزت زاد رأسها ببطء.
كانت الدموع تنساب الآن على خديها، لكن صوتها ظل ثابتًا بصعوبة.
ـ مضمنش يا دادة. أنا إيه اللي يضمنلي؟ ما يمكن بيتكلم صح. اللي زي فريد ده تتوقعي منه أي حاجة.
ربتت عواطف على ظهرها، وقد رق قلبها لرؤية الخوف في عينيها.
ـ طب جربي. قولي لأبوكي، قوليله وفكروا في حل. إنتِ مش لازم تعيشي معاه أكتر من كده. أنا أول مرة أحط إيدي على جسمك وألاقيكي بتتألمي، يا ضنايا... أتاريه ضربك؟ منه لله.
أغمضت زاد عينيها للحظة.
ثم ابتسمت ابتسامة موجوعة، وأدارت ظهرها لعواطف، وأخذت تمشي ببطء في الغرفة.
ـ عايزاني أقول لبابا إيه؟ أقوله إن أنا فشلت تاني مرة في قراراتي؟ أقوله كان معاك حق يا بابا في كل كلمة قلتهالي قبل كده؟ عايزاني أقوله إني دفعت تمن كبير أوي. ده ممكن يجراله حاجة بسببي. وقتها مستحيل أسامح نفسي.
توقفت أمام النافذة، ومسحت دموعها بطرف أصابعها، ثم قالت بصوت أكثر انكسارًا:
ـ أنا خدت قرار على نفسي إني أتحمل نتيجة أخطائي. كفاية اللي عملته قبل كده.
نظرت إليها عواطف طويلًا، ثم قالت بضيق ممزوج بالألم:
ـ وبرضه مش مبرر يا زاد. مش مبرر! هي دي حياة دي؟
ضحكت زاد.
خرجت الضحكة مكسورة، أقرب إلى شهقة موجوعة، ثم استدارت إليها بعينين غارقتين في التعب.
ـ حياة؟ أنا بقالي عشر سنين مش عارفة أعيش. من وقت موت ماما ، وبُعدي عن رضوان لحد النهارده، والدنيا أدتلي ضهرها. عاقبتني على قرارات خدتها غلط.
لم تعد قادرة على الوقوف أمامها أكثر من ذلك.
اتجهت إليها بخطوات متعثرة، ثم ارتمت في حضنها وانفجرت في البكاء.
ـ كنت غلطانة في كل حاجة اخترتها يا دادة. أنا تعبانة... تعبانة قوي.
اغرورقت عينا عواطف بالدموع، واحتضنتها بقوة، وراحت تربت على ظهرها كما لو كانت تعيد إليها شيئًا من الأمان الذي فقدته منذ سنوات.
ـ وحدي الله يا بنتي واهدي. ارحمي نفسك.
ظلّت زاد تبكي في حضنها، حتى خفت شهقاتها قليلًا.
ابتعدت عنها ومسحت وجهها بكفيها، لكن آثار الانهيار بقيت واضحة في عينيها.
ـ طيب إنتِ اتجوزتيه ليه يا زاد؟ أنا فاكرة إنك وافقتي عليه من غير ما تفكري.
سكتت زاد لحظات، وكأنها عادت بذاكرتها إلى ذلك القرار، ثم قالت بصوت خافت:
ـ علشان خاطر بابا. شوفت قد إيه كان حزين علشاني، وقد إيه كان مشيل نفسه مسؤولية اللي حصلي. خصوصًا بعد حكايتي مع رضوان... حسّيت إنه فقد الأمل، وخاب ظنه فيا. وإن أكتر حاجة كانت بتوجعه إنه حاسس إنه فشل في بنته. حبيت أريحه وأطمنه.
سكتت لحظة، ثم ابتسمت ابتسامة موجوعة:
ـ وحبيت أنسى... كنت عايزة أعيش بعيد عن كل اللي بيفكرني برضوان. كنت مفكرة إن البُعد هيخليني أنسى، وإن قلبي هيرتاح.
انخفض صوتها، وامتلأت عيناها بالدموع:
ـ لكني كنت غلطانة. أنا ما ريحتش قلبي... أنا دمرته. دخلت حياة ما كنتش مستعدة لها، وكل يوم فيها كنت بدفع تمن قرار أخدته وأنا فاكرة إني بصلّح كل حاجة.
مسحت دموعها، ثم قالت بانكسار:
ـ أنا اللي اخترت الطريق ده يا دادة. محدش أجبرني عليه... ودي أكتر حاجة بتوجعني. لو كنت وقفت وقتها وفكرت بقلبي، واخترت رضوان... كان زمان حياتي كلها مختلفة.
أطرقت برأسها، وانسابت دمعة على خدها:
ـ أنا ندمت... ندمت على القرار اللي غيّر حياتي كلها. كنت فاكرة إني هنسى، لكني خسرت أكتر. خسرت راحتي، وخسرت نفسي، ودخلت في وجع أنا اللي اخترته بإيدي.
رفعت عينيها إليها، وقد انكسر صوتها:
ـ وأنا دلوقتي مش عارفة أصلّح اللي بوظته.
سكتت لحظة، ثم قالت بمرارة:
ـ أنا لا أصلُح لأي حاجة يا دادة... لا زوجة، ولا أم، ولا حتى لنفسي. فريد كان عنده حق لما قال إني فاشله.
نظرت إليها عواطف بحزن، ثم سألتها:
ـ متقوليش كده. هتتعدل إن شاء الله. بس عرفيني ناوية على إيه يا زاد يا بنتي؟
هزت زاد رأسها بيأس.
بدت للحظة كأنها تبحث في ذهنها عن إجابة، لكنها لم تجد سوى الفراغ.
ـ مش عارفة يا دادة... حقيقي ما أعرفش. كل اللي بتمناه إن تحصل معجزة من عند ربنا وتخلصني من فريد وشره.
وضعت عواطف يدها على قلب زاد وقالت بصدق دافئ:
ـ المعجزات والأبواب المقفولة دي مش هتتفتح بالدموع يا زاد... هتتفتح لما تقفي على باب اللي خلقك وتطلبيها منه بقلب صافي. ارجعي لربنا، وهو يتكفل بفريد وبغيره.
رفعت زاد عينيها إليها.
كانت نظرتها هذه المرة مختلفة؛ لم يكن فيها اعتراض، بل إنصات كامل ينبض برغبة دفينة في النجاة.
استغلت عواطف تلك اللحظة وواصلت بحديث يخرج من القلب إلى القلب:
ـ اسجدي لربك يا زاد واتكلمي... قوليله على الوجع اللي ما حدش حاسس بيه غيره. ربنا كريم أوي يا بنتي، ووعدنا وقال: ﴿ٱدۡعُونِيۤ أَسۡتَجِبۡ لَكُمۡ﴾... ارمي حمولك عليه وهو بكلمة منه «كُن» يقدر يخلصك من فريد وشره ويجبر خاطرك في غمضة عين.
بقيت زاد صامتة.
دخلت كلمات عواطف إلى أعماق قلبها المنهك، واستقرت في مكان لم تطأه من قبل.
وفجأة، لاح في ذاكرتها طيف رسالة رضوان عن الصلاة.
عادت كلماته إلى أذنها واضحة ناصعة، وكأنها تسمعها للمرة الأولى.
خفضت عينيها، وشعرت بشيء يستيقظ في داخلها؛ رغبة صادقة في أن تتوقف عن التوسل لبشر لا يملكون لها نفعاً، وأن ترفع كل ما عجزت عن قوله إلى الله.
رفعت عينيها إلى عواطف وقالت بصوت خافت مكسور:
ـ عندك حق يا دادة... كل حلول الأرض اتقفلت في وشي. لازم ألجأ لربنا.
ابتسمت عواطف بتمهل، وربتت على كتفها بحنان أمومي، ثم اتجهت إلى الباب.
وضعت يدها على المقبض، لكنها توقفت فجأة.
التفتت إليها بنظرة يملؤها الحذر والرجاء، وكأن سؤالاً ظل ينهشها طوال حديثهما:
ـ إنتِ رحتي لرضوان ليه يا زاد؟
رفعت زاد عينيها إليها.
سكن وجهها للحظة، وكأن السؤال أعادها إلى شيء آخر لم تكن مستعدة للكلام عنه.
ثم قالت ببساطة، بصوت خافت يحمل كل ما عجزت عن شرحه:
ـ كنت عايزة أتنفس.
في فيلا مهاب الحسيني، كان مهاب يجلس في الصالة، وأمامه حاسوبه المحمول، بينما ظل هاتفه في يده وهو يتحدث مع أمجد بشأن المناقصة التي استحوذت على تفكيره بالكامل.
كانت تلك المناقصة تعني له الكثير؛ فإذا رست عليه، ستفتح أمامه أبوابًا جديدة، وتنهي عددًا من المشكلات التي ظلت تثقل كاهله طوال الفترة الماضية.
إلى جواره، جلست غادة، زوجته، تراقب توتره في صمت، قبل أن تحاول تهدئته بابتسامة مطمئنة:
ـ اهدى بس يا مهاب، إن شاء الله خير يا حبيبي.
أنهى مهاب حديثه مع أمجد للحظات، ثم التفت إليها بضيق:
ـ ما أنا هادي أهو يا غادة. شايفاني بشد في شعري؟
ابتسمت غادة رغم توتره:
ـ يا حبيبي، خلي عندك ثقة في ربنا. إنت عملت اللي عليك خلاص، مالهاش لازمة العصبية.
أغلق مهاب حاسوبه بعصبية، ثم زفر بضيق:
ـ إنتِ هتخليني عصبي بالعافية؟
نظرت إليه غادة باستغراب:
ـ اللاه! وأنا اتكلمت ولا عملت حاجة؟
التفت إليها مهاب، وقد بدأ ضيقه يتحول إلى غضب:
ـ إنتِ؟ دانتِ بالذات سبب اللي بيحصل معايا ده!
قطبت غادة حاجبيها:
ـ ليه بقى إن شاء الله؟
ـ لولا دلعك فيه! وكل شوية: سيبه يا مهاب، مالكش دعوة بيه يا مهاب، أخوك حر يا مهاب... لحد ما فرعنتيه عليّا!
اشتد انفعاله، وضرب كفه على ذراع المقعد، ثم تابع:
ـ ولولا حضرته ما اتدخل في الاجتماع وعملي فيها سبع البرمبة، وفاهم في كل حاجة، وعمل مشكلة، ما كانوش الناس لغوا الاتفاق معانا. واللي أنا فيه دلوقتي، وكل حاجة بتحصل بسببه... هو!
همّت غادة بالرد، لكن صوتًا هادئًا جاء من خلفهما:
ـ فيه إيه؟ صوتكم عالي ليه؟
ساد الصمت للحظة.
التفتت غادة إلى مصدر الصوت، وما إن رأته حتى تنفست براحة، ثم قالت بنبرة ساخرة:
ـ أهو اتفضل... أخوك وصل. اتكلم معاه وحل مشاكلك معاه إنت بقى.
رفع مهاب عينيه إليه ببطء، وظل ينظر إليه لحظة، قبل أن ترتسم على شفتيه ابتسامة ساخرة:
ـ أهلًا..أهلًا... بالدكتور فارس الحسيني.
يتبع......

تسلمي يا حبيبتي 🎉🎉🎉🎉
ردحذف