قصص وروايات مريم نصار

قصص وروايات مريم نصار: المدونة الرسمية للكاتبة والروائية المصرية مريم نصار. هنا تقرئين حكايات تلمس القلب وتشبه تفاصيل حياتنا: روايات وقصص تجمع بين الرومانسية والدراما والتشويق، بأسلوب قريب من القارئ وشخصيات تعيش معك بعد الفصل الأخير. تُنشر كل رواية فصلًا بفصل بترتيب منظم ومريح للقراءة، وتقدرين تتابعين الفصول الجديدة أولًا بأول. أهلًا بك في عالم مريم نصار.

الفصل التاسع. زاد الآسمر



الفصل التاسع. زاد الاسمر.
الجزء الثاني من رواية (وكأن ذنبي عظيم)

في الصالة الواسعة بمنزل «رضوان»، كانت الاستعدادات للخطوبة قد بلغت ذروتها. هنا من يثبت الزينة، وهناك من يرتب المقاعد، وبينهما كان «رضوان» يقف فوق مقعد خشبي، يحاول تثبيت شريط من الزينة في مكانه، بينما كان «كريم» يقف أسفله، يناوله ما يحتاج إليه بسرعة وحماس.

وبينما كان «رضوان» منشغلاً بما يفعل، تناهت إلى أذنيهما طرقات هادئة على باب الشقة.

توقف للحظة، ثم التفت برأسه نحو الباب، قبل أن ينزل عن المقعد سريعًا ويتجه إليه. وما إن فتحه حتى اتسعت ابتسامته عندما وجد «موسى» واقفًا أمامه، بابتسامته البسيطة ونظرته التي تحمل شيئًا من الحرج.

تهلل وجه «رضوان» وقال بترحاب:

ـ موسى! تعالى ادخل.. إنت عرفت البيت إزاي؟

خطا «موسى» إلى الداخل بخطوات متواضعة، وهو يفرك كفيه في شيء من الخجل، ثم أجاب:

ـ رحتلك المكتبة وسألت الجيران عن حضرتك وعرفت إن عندك مناسبة النهاردة.. فقلت أجي وأقف معاك لو هتتحاجني في أي حاجة.

ابتسم «رضوان» بامتنان، وربت على كتفه قائلًا:

ـ جدع يا موسى، وراجل بجد.

ابتسم «موسى» واتسعت ملامحه فرحًا، ثم قال:

ـ ألف مبروك يا أستاذ رضوان.

ـ حبيبي، الله يبارك فيك.

ثم رفع «موسى» ذراعيه قليلًا، وكأنه يستعرض قوته، وقال بثقة طفولية أضحكت «رضوان»:

ـ اعتبرني مش غريب وقولي بس أساعدك في إيه أنا عضمي ناشف وأقدر أسد في أي شغلانة.

ضحك «رضوان» وربت على كتف الصبي بحنان، ثم أشار له إلى الداخل:

ـ قد القول. تعالى ادخل.. وانتشر في المكان واعتبر البيت بيتك.

تطلع «موسى» حوله باهتمام، وكأنه يبحث عن أول مهمة تقع عليها عيناه، ثم قال:

ـ الله يخليك، يا أستاذ رضوان قولي بس إنت عايزني أعمل إيه وأعمله؟

هز «رضوان» رأسه شاكرًا، وأشار إلى مجموعة من المقاعد:

ـ معلش هتعبك معايا.. هات الكراسي دي.. إنت وعمك عصام اللي هناك ده.

ثم أشار إلى «كريم»:

ـ وده صاحبي كريم؛ فإنت وعصام رصوا الكراسي وظبطوا الدنيا، وأنا..

ثم أشار إلى «كريم» وهو يتحرك مبتعدًا:

ـ تعال معايا يا كريم نظبط الزينة الباقية.

تحرك «موسى» على الفور نحو «عصام»، وراح الاثنان يرتبان المقاعد ويهيئان المكان، بينما عاد «رضوان» إلى مهمته، يعلّق البالونات والزينة واحدة تلو الأخرى، وعيناه تتفقدان كل تفصيلة وكأنه يريد أن يكون كل شيء مثاليًا في الليلة التي انتظرها لأخته طويلًا.

وفي الغرفة الداخلية، كانت الأجواء مختلفة تمامًا.

لم يكن هناك صخب العمل والاستعداد، بل همسات وضحكات متقطعة، تتخللها حالة من التوتر الجميل الذي يسبق اللحظات المهمة.

وقفت «حبيبة» أمام المرآة، وقد ارتدت فستانًا أنيقًا بلون هادئ زاد ملامحها رقة، بقماش انسيابي وقصة راقية تمنحها إطلالة ناعمة وفخمة في الوقت نفسه. وانسدل حجابها بتناسق حول وجهها، بينما كانت «هالة» ـ زوجة «عصام» ـ تضع لها لمسات ماكياج خفيفة وشفافة، تبرز ملامحها الطبيعية دون مبالغة.

كانت «لبنى» و«ريهام» تتأملانها بإعجاب، قبل أن تقول إحداهما بحماس:

ـ يا حبيبة بجد إنتي هتوقعي قلب العريس.. طالعة زي القمر!

اتسعت عينا «حبيبة» بخجل، وتقدمت نحو المرآة بخطوات مترددة، ثم وضعت كفيها على خديها، وكأنها تحاول استيعاب شكلها الجديد، وسألت بخجل طفولي:

ـ الله... أنا طالعة حلوة أوي؟

ضحكت «إيمان» وهي تنظر إليها بحنان:

ـ يعني إنت هتجيبيه من برا؟! إنتي زي القمر يا حبيبة، ما شاء الله!

ثم التفتت «إيمان» إلى الفتيات وقالت:

ـ يلا يا بنات، يدوبك إحنا كمان نلبس زمانهم على وصول.

ساد الغرفة نشاط مفاجئ، وتحركت الفتيات استعدادًا للخروج، بينما بقيت «حبيبة» لثوانٍ أمام المرآة، تحدق في انعكاسها وقلبها يخفق بقوة كلما تذكرت أن فارس سيكون في الخارج بعد قليل.

وفي فيلا «مهاب»، كانت الاستعدادات الأخيرة تسير على قدم وساق.

كان مهاب يقف داخل مكتبه، وقد ارتدى ملابسه استعدادًا للخروج، إلا أن ملامحه كانت تناقض تمامًا هيئة الرجل الذي يستعد لحضور مناسبة سعيدة. ظل يعبث في ساعته بضيق، ثم ألقاها على سطح المكتب قبل أن يزفر بحدة.

لم يكن غاضبًا من الخطوبة نفسها بقدر ما كان غاضبًا من القرار الذي اتخذه فارس دون أن يضع في حساباته شيئًا مما يراه مهاب مهمًا.

طرقٌ خفيف على الباب، ثم دخلت غادة، وما إن وقعت عيناها عليه حتى فهمت أن شيئًا لم يتغير.

قالت وهي تقترب منه:

ـ أنت لسه قافل وشك يا مهاب؟ مش معقول كده.

رفع عينيه إليها بضيق، وقال ببرود متعمد:

ـ هو إيه اللي مش معقول؟ ما أنا ساكت وقافل بوقي أهو.

اقتربت منه أكثر، وألقت عليه نظرة ساخرة قبل أن تقول:

ـ ووشك كمان باين عليه أوي إنك رافض اللي بيحصل وجاي معانا بالعافية.

لم يحاول حتى الإنكار، بل قالها صريحة:

ـ طب ما ده فعلًا! أنا جاي معاكم بالعافية. أنا أصلا مش موافق على الجوازة دي.

أغلقت عينيها للحظة، وكأنها كانت تتوقع أن يعيد نفس الكلام، ثم قالت بضيق:

ـ تاني يا مهاب؟ هنعيده تاني؟

رفع حاجبه وقال بإصرار:

ـ تاني وتالت يا غادة. البنت دي مش مناسبة لفارس.

نظرت إليه باستغراب حقيقي، ثم قالت:

ـ هو أنت مش كنت راجع من عندهم مبسوط وعجبتك هي وأخوها؟ إيه اللي غيرك فجأة كده؟

سكت لحظة، ثم قال وهو يبرر موقفه لنفسه قبل أن يبرره لها:

ـ أيوه كنت. الباشا مستعجل، والموضوع كله حصل بسرعة من غير ما ألحق أفكر.

ثم تحرك في مكانه بعصبية، وأردف:

ـ زائد إني لما جيت أعزم أصدقائي والعيلة ورجال الأعمال، ساعتها رجعت في كلامي. قولت هقولهم إيه؟ تعالوا افرحوا، أخويا خطب واحدة أقل منه وعايشة في مكان لا يشبهنا ولا نشبهه؟

اشتدت نبرته أكثر، وكأنه كلما تخيل الموقف ازداد اقتناعًا باعتراضه:

ـ وبعدين أخوها شغال في مصنع! وقاعد في حي شعبي؟ أقولهم تعالوا اتفرجوا على المهزلة اللي أخويا حطنا فيها!

رمقته غادة بنظرة حادة، ثم أشارت إليه بيدها:

ـ وطي صوتك لـ فارس يسمعك. الكلام ده فات أوانه. وبعدين هرجع وأقولك: فارس حر في اختياراته.

هز رأسه رافضًا:

ـ لأ، مش حر يا غادة.

رفعت غادة حاجبها، وردت عليه بثبات:

ـ لا، حر. قولتلك قبل كده، أنت مش باباه ولا أنا مامته. فارس كبير كفاية إنه ياخد قراراته بنفسه.

نظر إليها مهاب بضيق، ثم قال:

ـ قراره هيقلل مني قدام الناس.

تنهدت غادة، وقالت بهدوء:

ـ رضا الناس غاية لا تُدرك يا مهاب. مهما تعمل، مش هيعجبهم حاجة.

أشاح بوجهه عنها وقال بحدة خفيفة:

ـ خلاص، مادام كلامي ملوش لازمة، اتفضلي سيبيني لوحدي في الخيبة اللي أنا فيها. هلاقيها منين ولا منين؟ مشاكل في البيت والشركة... حاجة تقرف.

سكتت غادة للحظات، ثم تغيرت ملامحها فجأة، وظهرت على شفتيها ابتسامة ماكرة.

قالت وهي تتجه نحو الباب:

ـ طيب خلاص، حقك عليا. أنا مقصديش أضايقك خالص، واللي يريحك اعمله. اتفضل اطلع قوله إنك مش موافق.

توقفت خطواتها، وانتظرت رده، لكنه لم يقل شيئًا.

التفتت إليه، فوجدته ينظر إليها في صمت.

ـ إيه؟ سكت ليه؟

ظل مهاب ساكنًا، فعادت نحوه ببطء وقالت:

ـ أكيد فكرت في رد فعل فارس أول ما يعرف إنك رجعت في كلامك!

تنهد مهاب بعمق، وأخفض عينيه للحظة قبل أن يعترف:

ـ عارف. عارف إنه مش هيسمعني، ولا هيرضى بأي شكل إنه يسيبها.

اتسعت عينا غادة باستنكار، وقالت:

ـ ويسيبها ليه؟! البنت عيبها إيه بس؟ دكتورة ومحترمة وبنت ناس برضه.

زفر مهاب بضيق، ولم يجد ما يرد به، فظل صامتًا.

اقتربت منه غادة أكثر، وقالت بنبرة أهدأ، وهي تضع يدها على ذراعه:

ـ مهاب، متنساش إن جد جدك حياته اتغيرت بورقة يانصيب يا حبيبي. مكنش من الأثرياء ولا حاجة.

رفع عينيه إليها بتهكم، فضحكت وقالت:

ـ أنا قولت أفكرك علشان متنساش.

ثم تابعت بجدية بعدما خفتت ابتسامتها:

ـ وبعدين فارس لو عرف حاجة زي كده، أول حاجة هيعملها إنه هيسيبلك البيت ويستقر مع نفسه. وبرضه هيتجوز اللي اختارها. بس في المقابل هتخسرة، فبلاش تخسر أخوك.

مرر مهاب يده على وجهه في ضيق، ثم أخذ نفسًا طويلًا وكأنه يحاول أن يطرد كل ما يدور في رأسه.

اقتربت غادة منه أكثر، وقالت بحنان:

ـ حبيبي، متكسرش فرحة أخوك علشان شكليات. هو لو مش حاسس سعادته معاها، مكنش حبها يا مهاب.

ثم نظرت في عينيه مباشرة، وأضافت:

ـ أنت يهون عليك تكسر قلب فارس؟

ظل مهاب صامتًا للحظات، قبل أن يجيب بصوت خافت يحمل من الصدق أكثر مما يحمل من الغضب:

ـ وأنا ليا غيره يا غادة؟ ده ابني الكبير، مش أخويا وبس.

ابتسمت غادة، وقد وصلت أخيرًا إلى النقطة التي كانت تحاول أن توصله إليها منذ بداية الحديث.

قالت وهي تربت على ذراعه:

ـ طيب، ابنك الكبير النهارده هيعيش أول فرحته. ممكن بقى تطلع تكمل لبس علشان منتأخرش؟

أدرك مهاب أنه لن يستطيع المضي في عناده دون أن يخسر شقيقه، فاستسلم رغمًا عنه، والتفت إليها بضيق ظاهر.

ـ هو بسلامتة خلص ولا لسه؟

أجابته غادة:

ـ بعتله مالك، وقال لسه بياخد شاور وهيلبس.

هز مهاب رأسه بانزعاج:

ـ أنا مش عارف! المفروض هو يكون أول واحد لابس وجاهز.. إحنا نجهز قبله!

ابتسمت غادة:

ـ والله ما أعرفش، أنا برضه استغربت زيك كده. ده أنا قلت هيصحينا من بدري ويقلب البيت! لأ، ده نام وخد راحته خالص.

تنهد مهاب بعمق، ثم قال وكأنه وجد له عذرًا:

ـ ما هي تلاقيها كانت مطيرة النوم من عينيه الفترة اللي فاتت، فاستريح بقى ونام وخد راحته!

ضحكت غادة وهي تهز رأسها:

ـ ما تقلقش، جاي له اللي يفوقه دلوقتي.

رفع مهاب حاجبه باستغراب:

ـ إيه ده؟ هو نادر هنا؟

أومأت غادة بابتسامة:

ـ آه، طبعًا. ده حلف هو اللي يسوق العربية لفارس. إنت عارفه، يحب الهيصة.

ثم لفت حول نفسها لتريه فستانها، وقالت بمكر:

ـ إيه؟ ما خدتش بالك مني يعني؟

رفع مهاب عينيه إليها، وللمرة الأولى منذ بداية الحديث، اختفت حدة التوتر من ملامحه تمامًا، وحل محلها إعجاب واضح.

ابتسم رغماً عنه وقال:

ـ لأ، بسم الله ما شاء الله عليكي.. عيني عليكي باردة، إنتي هتخليهم يفتكروكي العروسة!

ضحكت غادة بدلال:

ـ بطل مجاملة بقى!

قال بصدق وهو يبتسم:

ـ صدقيني، مش بجاملك.

رفعت حاجبها بمكر، ثم قالت:

ـ إيه ده يا مهاب؟ بعد كل اللي عملته فيك لسه بتحبني؟!

ابتسم مهاب، ورد عليها:

ـ مضطر يا حبيبتي.. هعمل إيه؟ أكل العيش مر!

انفجرت غادة بالضحك، ثم أمسكت يده وجذبته معها نحو الخارج.

وفي غرفة «فارس»، كان الاستعداد يسير بوتيرة مختلفة.

كان قد ارتدى سروال البدلة الأنيق وقميصه الأبيض، بينما استقرت سترته بعناية فوق السرير، وبقيت ربطة العنق وساعته وحذاؤه في انتظار اللمسات الأخيرة.

وفجأة، انفتح الباب، ودخل «نادر» وهو يطرق عليه بإيقاع أشبه بالطبلة، ثم هتف بصوت مرح:

ـ ابن خالي العريس!

رفع «فارس» عينيه إليه وأشار له بعينيه أن يدخل دون مزيد من الضجيج، وقف «نادر» وهو يتفحصه بابتسامة واسعة:

ـ أنا جيت لك بدري علشان أساعدك في اللبس يا باشا.. مع إنك مظبط نفسك وجاهز أهو!

ثم أكمل وهو يتراقص عند الباب:

ـ بسم الله الرحمن الرحيم وهنفرح الليله.

زفر «فارس» بضيق مصطنع:

ـ ادخل.. وبطل غلبة!

عقد «نادر» حاجبيه باستغراب وهو يقترب منه:

ـ إيه ده؟ إنت مالك قافل وشك ليه؟ إنت رجعت معقد زي الأول ولا إيه؟! لا أنا جاي وعايز أفرح. إنتوا عيلة كئيبة ومفيهاش أفراح غير كل فين وفين.

رد «فارس» باقتضاب، وهو يتناول محفظته ويضعها في جيب بنطاله:

ـ بطل لوكلك عايز أخلص، مش عايز أتأخر عليهم.

لم يجد «نادر» ما يفعله سوى الاستلقاء على السرير، دون أن ينتبه إلى أنه وضع جسده فوق سترة البدلة.

التقط «فارس» صورته في المرآة، فاستدار إليه فورًا واقترب منه، ثم ضربه بخفة على كتفه ودفعه جانبًا:

ـ الجاكيت يا غبي! هيتكسر!

عدل «نادر» وضعية جلوسه وهو يضحك بلا مبالاة:

ـ يلهوي معلش يا جاكيت، اخص عليا كنت هكسرك. وأضيّع فرحتك!

نظر إليه «فارس» بتحذير هذه المرة:

ـ لأ بص.. إنت أفشاتك النهارده تركنها على جنب خالص!

نظر إليه «نادر» ببلاهة متعمدة:

ـ إيه ده؟ إنت متوتر يا عريس؟! لا أنا عايزاك تهدى خالص.. الموضوع سهل وبسيط، هتروح عند العروسة وهتقرأ الفاتحة عادي!

التقط «فارس» سترته وارتداها، ثم نظر إليه من خلال المرآة:

ـ مش بقولك أفشاتك مش عايزها النهاردة؟ عدي يومك!

فتح درج مكتبه، وأخرج ساعته الفاخرة وارتداها، ثم التقط زجاجة عطره ورش منها نفحات قوية انتشرت في أرجاء الغرفة.

اقترب «نادر» وهو يستنشق العطر بإعجاب:

ـ الله الله! إيه الحاجات الغالية اللي طلعت دي؟!

رد «فارس» ببرود ساخر:

ـ ده على أساس كنت بحط من الرخيص.. يا رخيص؟

ضحك «نادر» وقال بتهكم محبب:

ـ رخيص ماشي يا عم.. أنا صابر عليك بس علشان إنت عريس، عارف لو ما كنتش عريس..؟

نظر إليه «فارس» بطرف عينه:

ـ إيه؟

أجاب «نادر» ببرود ساخر:

ـ ولا هعمل أي حاجة!

ابتسم «فارس»، بينما أكمل «نادر»:

ـ عارف ليه يا فارس؟

ـ ليه؟

ـ علشان ربنا على المفتري!

انفجر الاثنان في ضحكة خافتة، قبل أن يرتدي «فارس» حذاءه الجلدي الأنيق، ثم وقف مستقيمًا وألقى نظرة أخيرة على نفسه في المرآة.

قال بحماس متجدد:

ـ يلا.. يلا علشان ما نتأخرش!

خرجا معًا، ولحق بهما «مهاب» و«غادة» وبقية أفراد العائلة، ثم تحرك الجميع في سياراتهم باتجاه منزل «رضوان».

في منزل «رضوان»، كانت الدقائق تمر على «حبيبة» ببطء شديد.

لم تكن تعرف كم مرة نظرت إلى الباب، ولا كم مرة حاولت أن تأخذ نفسًا طبيعيًا دون أن تشعر بأن قلبها يسبقها إلى الصالة.

وحين تناهت إلى مسامعها أصوات الحركة في الخارج، بدأت دقات قلبها تتسارع أكثر.

ثم علت الزغاريد من مدخل البناية، وتداخلت معها أصوات التهاني والضحكات القادمة من الدرج.

كان «كريم» من أوائل من لمحوا العريس وهو يصعد، فالتفت إلى «رضوان» بعينين لامعتين وقال بحماس:

ـ العريس وصل!

شعر «رضوان» بوخزة فرح في صدره، ثم اتجه بعينيه نحو مدخل الشقة.

وبعد لحظات، ظهر «فارس» حاملاً باقة ورد رائعة، وخلفه «مهاب» و«غادة» و«نادر» و«مالك» و«أسيل».

دخلوا وسط استقبال دافئ، بينما كانت الزينة تملأ المكان، وقد حرص «رضوان» على تجهيز ركن خاص للعروسين، تتوسطه مقاعد أنيقة تحيط بها الورود والبالونات والإضاءة الهادئة.

تقدم «فارس» نحو «رضوان» بابتسامة واسعة، وفتح ذراعيه له، فاستقبله «رضوان» باحتضان حار يعكس فرحته الحقيقية بهذه الخطوة.

ثم التفت «فارس» وصافح «كريم» و«عصام» بحفاوة، وتبادل معهم كلمات الترحيب والتعارف.

وأشار «رضوان» إلى المقاعد المجهزة:

ـ نورت يا فارس.. اتفضل استريح.

جلس «فارس» حيث أشار إليه، بينما راحت عيناه تتفقدان المكان في انتظار شخص واحد فقط.

التفتت «غادة» إلى «رضوان» وسألته بابتسامة:

ـ اومال فين عروستنا الحلوة؟

رد «رضوان» بابتسامة دافئة، وهو ينظر نحو الغرفة الداخلية:

ـ ثواني.. هروح أناديها.

اتجه إلى الغرفة بخطوات هادئة، وكلما اقترب منها شعر بمزيج من الفخر والفرحة ورهبة اللحظة.

توقف أمام الباب، طرق طرقة خفيفة، ثم فتحه.

التفتت إليه العيون، بينما كانت «حبيبة» تقف وسط صديقاتها.

توقفت عيناه عليها للحظة.

كانت أخته التي يعرفها بكل تفاصيلها تقف أمامه اليوم بصورة مختلفة؛ فستانها الأنيق، حجابها المرتب، وملامحها التي غمرها الخجل جعلته يشعر بأن السنوات كلها مرت أمامه في لحظة واحدة.

ابتسم «رضوان» بحنان، واقترب منها وقبّل قمة رأسها:

ـ بسم الله ما شاء الله.

ـ إيه رأيك يا رضوان حلوة؟

ثم رفعت عينيها إليه، فضحك بحنان وأجاب:

ـ أحلى من كل جميل يا حبيبة.

مد يده إليها:

ـ جاهزة يا حبيبة قلبي؟.. العريس بره مستنيكي.

نظرت إلى يده، ثم وضعت يدها فيها.

أومأت برأسها بخفة، لكن أنفاسها كانت أسرع من المعتاد.

أخذت نفسًا عميقًا محاولة أن تستجمع ثباتها، ثم خرجت معه بخطوات مترددة، بينما كانت صديقاتها يتابعنها بابتسامات مشجعة.

وما إن ظهرت في الصالة حتى انطلقت الزغاريد، وتعالت التصفيقات من كل جانب.

رفعت «حبيبة» عينيها للحظة واحدة، فالتقت مباشرة بعيني «فارس».

توقف كل شيء بالنسبة إليها.

أما «فارس»، فقد نهض من مكانه دون أن يشعر، واستقرت عيناه عليها في دهشة صامتة.

لم يكن يحتاج إلى كلمات كثيرة ليعبّر عما شعر به؛ ابتسامته اتسعت تلقائيًا، وبقي واقفًا يتأملها للحظات، وكأن الضجيج المحيط به أصبح بعيدًا.

تقدم نحوها بخطوات هادئة، بينما ازدادت حبيبة خجلًا، حتى كادت عيناها تفران إلى الأرض.

مدّ لها باقة الورود، ثم وقف أمامها وقال بصوت دافئ:

ـ الف مبروك يا حبيبة..

رفعت عينيها إليه لثانية خاطفة، ثم أخذت منه الباقة وأجابته بصوت خافت:

ـ الله يبارك فيك..

ابتسم «رضوان» وهو يراقبهما، ثم اقترب منهما وقال:

ـ هنفضل واقفين كده؟ يلا يا عريس.. ادخلوا اقعدوا في الكوشة، ارتاحوا.

اقترب «نادر» منهما وهو يتفحص المكان بإعجاب، ثم قال:

ـ لأ بصراحة الأستاذ رضوان مظبط كل حاجة. وأحلى حاجة الأكل. و الجاتوه.

ضحك الجميع، حتى «فارس» ابتسم وهو يهز رأسه.

أشار «فارس» إلى «حبيبة» برفق، وسارا معًا نحو الركن المخصص لهما، ثم جلسا إلى جوار بعضهما وسط الزهور والإضاءة الدافئة.

بدأت التهاني تنهال عليهما من كل جانب.

اقتربت «غادة» من «حبيبة» واحتضنتها بحرارة:

ـ ألف ألف مبروك يا حبيبتي.. أخيرًا وقعتي في شر أعمالك وبقيتي عروسة فارس!

ضحكت «حبيبة» بخفة وخجل:

ـ الله يبارك فيكي يا غادة.

وتوالت تهاني «إيمان» و«لبنى» و«ريهام»، وسط القبلات والضحكات والتعليقات المرحة:

ـ إيه الجمال ده يا حبيبة! حرام عليكِ، هتوقفي سوق البنات من بعدك!

كان «فارس» يستمع إلى إطرائهن لعروسه، وعلى ملامحه ابتسامة صغيرة لم تفارقه.

وفي تلك الأثناء، وقف «مهاب» بجوار «رضوان»، ومال عليه قليلًا، مقدمًا له التهنئة كما يقتضي المقام، رغم الضيق الذي ما زال عالقًا في داخله.

ـ ألف مبروك يا رضوان.. ربنا يفرحك بيها.

نظر «رضوان» إلى أخته، ثم إلى «فارس» الجالس بجوارها، قبل أن يرد بابتسامة صافية:

ـ الله يبارك فيك يا مهاب بيه.. عقبال أولادك.

ابتسم «مهاب» وقال:

ـ وعقبالك انت كمان.

نظر إليه «رضوان» بابتسامة مجاملة، واكتفى بتحريك رأسه له دون أن يرد.

كانت الأجواء تضج بالدفء، والضحكات تملأ المكان، بينما انشغل «موسى» و«كريم» و«عصام» بخدمة الضيوف وتقديم المشروبات والحلوى.

وبدأ الجيران يتوافدون تباعًا، وحضر الدكتور «نوفل» فسلّم عليهم وهنّأهم، ثم وصل «صبحي» وشاركهم التهاني، لتزداد الأجواء دفئًا وحيوية.

أما «حبيبة»، فكانت تجلس إلى جوار «فارس»، تحاول أن تبدو طبيعية، رغم أن أصابعها كانت باردة من شدة التوتر.

لاحظ «فارس» ذلك، ولمح ارتجافة خفيفة في كتفها، فأدرك مدى توترها.

مال قليلًا نحوها وهمس:

ـ مالك؟

حمحمت وهي تحاول إخفاء ارتباكها:

ـ مفيش.

اقترب منها أكثر، وبقي صوته منخفضًا حتى لا يسمعه أحد:

ـ لأ، بجد مالك؟ بتترعشي ليه؟

ترددت لحظة، ثم اعترفت بصوت خافت:

ـ مكسوفه أوي يا فارس. حاسه إني مش عارفه اتكلم ولا اعمل أي رد فعل.

ظهرت ابتسامة هادئة على وجهه، وقال بنفس الهمس:

ـ أنا جنبك، متخافيش. بصيلي... غمضي عينيكي وخدي نفس طويل، احبسيه ثواني، وبعدين طلّعيه براحة... واحدة واحدة. أنا معاكي.

نظرت إليه لثوانٍ، ثم سكتت.

بادلها النظرة، وحرك رأسه مطمئنًا:

ـ هتبقي كويسة، صدقيني.

أغمضت «حبيبة» عينيها، وأخذت شهيقًا عميقًا، ثم أخرجته ببطء كما طلب منها.

وبالفعل، بدأت تشعر بأن توترها يهدأ قليلًا.

ظل «فارس» يتابعها باهتمام، حتى تأكد أن أنفاسها عادت إلى طبيعتها، وعندها ارتخت ملامحه قليلًا، وكأن مجرد رؤيتها وقد هدأت أعاد إليه هو الآخر شيئًا من الطمأنينة.

ثم قطع صمتها قائلًا:

ـ تعرفي لما بتكوني هاديه كده بقلق.

ابتسمت وهي تفتح عينيها:

ـ علشان شوفت جناني. بس صدقني أنا عاقله.

تذكر في لحظة يوم نوبة الهلع التي أصابتها، فظهرت ذكرى ذلك اليوم في عينيه، وقال:

ـ عارف.

ـ عارف إيه!

ابتسم ابتسامة جانبية وقال:

ـ عارف إنك أعقل مجنونة حبيتها.

اتسعت ابتسامتها، ثم خفضت عينيها في خجل ولم ترد.

لكن لحظتهما الهادئة لم تستمر طويلًا.

اقترب «نادر» من «فارس» وانحنى ناحية أذنه، ثم قال بصوت أعلى مما ينبغي:

ـ يا عريس، غادة بتقولك لبس عروستك الشبكة.

أغمض «فارس» عينيه للحظة، وكأنه يحاول التحكم في أعصابه، بينما انفجرت «حبيبة» في الضحك.

ولم يكتفِ «نادر»، بل رفع صوته أكثر:

ـ إنت مبتردش عليا ليه يا عريس؟ اصنجيت ولا إيه يا دكتور الودان؟

هذه المرة، ضحكت «حبيبة» من قلبها، فتبدد توترها تمامًا.

التفت «فارس» إليها، ثم لمح نظرة «نادر»، فاشتعلت في عينيه غيرة ممزوجة بالضيق، وفهمت «حبيبة» النظرة، فازدادت ابتسامتها.

ثم عاد «فارس» إلى «نادر» وقال بتهديد واضح:

ـ أقسم بالله يا نادر لو مظبط نفسك لأظبطك.

ابتسم «نادر» باستفزاز:

ـ هتعمل إيه يعني؟ هتشيلّي اللحمية!

رد «فارس» بمكر:

ـ لأ هتصل بيها!

تجمدت ملامح «نادر» لحظة، ثم حمحم واعتدل في وقفته، وراح يضبط سترته ويصفر وكأنه لم يقل شيئًا، ثم ابتعد وهو يشير بيده إلى شخص وهمي في الجهة الأخرى.

ارتسمت ابتسامة على وجه «فارس»، ثم التفت إلى «حبيبة».

وجدها تنظر بعيدًا وهي تحاول إخفاء ضحكتها.

وفي تلك اللحظة، جاءت «إيمان» تحمل صينية دائرية فاخرة، يغلب عليها اللون الأبيض العاجي وتتخللها تفاصيل ذهبية أنيقة، وقد رُتبت عليها قطع الشبكة في تنسيق عصري يبرز بريقها، بينما أحاطت بها ورود بيضاء صغيرة ولمسات من الكريستال، لتبدو كقطعة ديكور فاخرة تليق بالمناسبة.

ناولتها إلى «غادة» وقالت:

ـ اتفضلي يا مدام غادة، شبكة العرسان.

أخذت «غادة» الصينية وشكرتها، ثم اتجهت بها نحو «فارس» و«حبيبة».

وبمجرد أن ظهرت الشبكة أمامها، عاد التوتر إلى «حبيبة» من جديد.

انحنى «فارس» أمامها، وتناول الخاتم بحرص، ثم أمسك يدها برفق وألبسها إياه.

وفي المقابل، مدت «حبيبة» يدها، وألبسته دبلة الخطوبة.

انطلقت الزغاريد من جديد، وتعالت أصوات التصفيق والتهاني، واختلطت الضحكات بأجواء الفرح والاحتفال.

كان «رضوان» يقف بعيدًا قليلًا، لكنه لم يكن غائبًا عن المشهد لحظة واحدة.

كانت عيناه معلقتين بأخته.

وبعد أن انتهت من ارتداء شبكتها، راحت عينا «حبيبة» تبحثان عنه وسط الحاضرين.

وحين وجدته، أشرقت ابتسامتها.

رفعت يدها قليلًا، وأشارت إليه بخاتمها حتى يراه.

ابتسم «رضوان» لها، وحرك رأسه بهدوء، وكأنه يقول لها إنه كان يراقبها منذ اللحظة الأولى.

وسط هذا الدفء، كان «مهاب» يجلس إلى جوار زوجته «غادة»، لكن عينيه كانتا تعودان إلى هاتفه بين لحظة وأخرى.

لاحظت «غادة» ذلك، فقالت وهي تراقب الأجواء من حولها:

ـ حبيبي بصراحة الأجواء هنا حلوة أوي. والناس فرحانة بجد.

حرك «مهاب» رأسه لها، لكنه لم يبدُ حاضرًا تمامًا معها.

استغربت، وسألته:

ـ في إيه يا مهاب!

زفر بضيق، ثم خفض هاتفه قليلًا وقال:

ـ مفيش يا غادة.. أمجد بعتلي رسالة وقالي أكلمه ضروري.

نظرت إليه باستغراب:

ـ دلوقتي! هو مش عارف إنك في مناسبة!

أعاد «مهاب» النظر إلى الهاتف، وقال بقلق لم يستطع إخفاءه:

ـ هو الشغل فيه مناسبة ولا غيره؟ أنا قلقان بس يكون في جديد وأسوأ من اللي قبله.

تغيرت ملامح «غادة» قليلًا، وحاولت أن تطمئنه:

ـ لأ ربنا يستر إن شاء الله. طيب بص، الأوضة اللي هناك دي فاضية، أنا كنت مع إيمان جوه من شوية. ادخل هناك واتكلم براحتك.

تردد «مهاب» لحظة:

ـ خايف فارس ينتبه.

ابتسمت «غادة» وهي تشير بعينيها نحو «فارس»، الذي كان منشغلًا تمامًا بـ«حبيبة»:

ـ فارس دلوقتي مع خطيبته، مش شايف حد ولا فايق لحد. قوم يا حبيبي، وإن شاء الله ربنا يعدّيها على خير.

نظر «مهاب» إلى زوجته لحظة، ثم نهض.

ابتعد عن صخب الخطوبة وضوضائها، متجهًا إلى الغرفة التي أشارت إليها «غادة». كان صوت الضحكات والزغاريد يبتعد تدريجيًا خلفه مع كل خطوة، حتى وصل إلى الباب وأغلقه بهدوء.

أخرج هاتفه، ثم فتح مكالمة فيديو مع «أمجد»، أحد موظفي الشركة البارزين.

ظهر أمجد أمامه وبجواره مجموعة من الأوراق والبيانات المالية، وبدأ يشرح له المشكلة التي ظهرت في دورة رأس المال العامل؛ فالشركة تحقق مبيعات وأرباحًا جيدة، لكن هناك فجوة بين توقيت تحصيل أموال المبيعات وتوقيت سداد التزاماتها، خاصة مع وجود عملاء يسددون بعد ستين وتسعين يومًا، بينما تستحق مستحقات الموردين قبل ذلك، إلى جانب حاجة الشركة لزيادة المخزون خلال الفترة المقبلة، وهو ما زاد الضغط على السيولة.

عقد مهاب حاجبيه وهو يستمع إليه، ثم سأله عن إمكانية الحصول على تسهيل ائتماني أو قرض قصير الأجل بضمان أصول الشركة لتجاوز الضغط الحالي.

أوضح أمجد أن الأمر يحتاج إلى مراجعة القوائم المالية والتدفقات النقدية والضمانات، إلى جانب حساب تكلفة التمويل قبل اتخاذ القرار.

في تلك اللحظة، فُتح الباب ودخل رضوان بهدوء، متجهًا إلى الشاحن ليأخذ هاتفه. توقف للحظة عندما سمع كلمات أمجد الأخيرة، ثم فصل هاتفه عن الشاحن والتقطه.

رفع مهاب عينيه إليه، وقال بابتسامة محرجة قليلًا:

ـ تعالى يا رضوان.. أنا آسف جاتلي مكالمة مهمة ودخلت أوضتك من غير استئذان. الدوشة بره إنت عارف.

ابتسم رضوان بتلقائية:

ـ يا خبر متقولش كده، البيت بيتك. وأنا اللي آسف والله دخلت مرة واحدة، مكنتش عارف إنك هنا. موبايلي كان على الشاحن دخلت أجيبه.

رفع مهاب عينيه إليه وقال:

ـ إنت سمعت حاجة؟

تردد رضوان لحظة، ثم قال بصراحة:

ـ الحقيقة أيوه سمعت.

أغلق مهاب المكالمة ووضع هاتفه جانبًا، ثم قال بصوت خافت:

ـ أتمنى اللي سمعته ده فارس ما يعرفش عنه حاجة. أنا مش عايز أضيع عليه فرحته.

ـ متقلقش يا مهاب بيه. وإن شاء الله مشكلتك تتحل.

تنهد مهاب وقال:

ـ أتمنى، بس مشكلتي صعب حلها.

ابتسم رضوان قليلًا، ثم قال:

ـ كل مشكلة وليها حل، بس من اللي سمعته، أزمة السيولة عندك غالبًا سببها فجوة في دورة رأس المال العامل.

اتسعت عينا مهاب بدهشة حقيقية:

ـ رضوان... إنت دارس إيه؟!

ـ إدارة أعمال.

ازداد فضول مهاب، فسأله:

ـ طيب رأيك إيه في اللي سمعته؟

قال رضوان بصراحة:

ـ أنا معرفش كل تفاصيل شركتك علشان أقول رأي كامل.

ـ قول اللي فهمته.

ـ من اللي سمعته.. حضرتك عندك مشكلة في توقيت الفلوس، مش في إن الشركة بتكسب. الشركة بتبيع، والعميل بياخد البضاعة، لكن الفلوس بتفضل عنده شهرين أو تلاتة، وإنت في المقابل بتدفع للمورد قبل ما العميل يدفعلك.

هز مهاب رأسه ببطء:

ـ ده اللي بيحصل فعلًا.

سأله رضوان بتركيز:

ـ طيب.. أكبر العملاء عندكم بيدفعوا بعد قد إيه؟

ـ أغلبهم على حسب الاتفاق، وفي عملاء كبار بياخدوا تسعين يوم.

ـ وكلهم ملتزمين بالسداد في المواعيد؟

ـ مش كلهم.

ـ والعميل اللي بيتأخر.. بياخد نفس فترة السداد اللي بياخدها العميل الملتزم؟

توقف مهاب لحظة، ثم أجاب:

ـ تقريبًا.

رفع رضوان حاجبه وقال:

ـ يبقى حضرتك مشكلتك مش حلها القرض.

نظر إليه مهاب باستغراب:

ـ ليه؟!

ـ لأنك لو اقترضت علشان تسد فجوة السيولة، هتضيف تكلفة تمويل، مع إن جزء من الفلوس اللي إنت محتاجها موجود أصلًا، بس لسه ما رجعش للشركة.

ثم تابع:

ـ الأول لازم تبص على العملاء.. مين بيدفع في معاده ومين بيتأخر. العميل الملتزم ممكن تفضل مديه شروط كويسة علشان تحافظ عليه، إنما اللي بيتأخر لازم شروطه تختلف حسب أرقامه وسلوكه؛ تقلل مدة السداد، أو تطلب دفعة مقدمة، أو تقلل الحد الائتماني بتاعه.

ـ ولو عندك عميل كبير ومهم ومش عايز تخسره، ممكن تعمل له خصم بسيط مقابل السداد المبكر، بشرط إن تكلفة الخصم تكون مناسبة مقارنة بتكلفة توفير السيولة وتعجيل التحصيل.

أومأ مهاب باهتمام، فأكمل رضوان:

ـ والموردين برضه. لو المورد بياخد فلوسه منك بعد تلاتين يوم والعميل بيدفع بعد تسعين، يبقى عندك فجوة ستين يوم. لو قدرت تتفاوض مع المورد على مدة سداد أطول، من غير ما تضر علاقتك بيه أو تخسر خصم مهم، هتقلل الضغط على السيولة.

ثم أضاف:

ـ وكمان راجع المخزون. لو فيه بضاعة بطيئة الحركة، جزء من فلوس الشركة هيبقى متجمّد فيها لفترة أطول.

ـ وقبل أي قرار، لازم تشوفوا الأرقام: متوسط مدة تحصيل العملاء، ومتوسط مدة سداد الموردين، وأيام المخزون. ساعتها هتعرفوا حجم الفجوة الحقيقي، وهل محتاجة تمويل فعلًا ولا ممكن تخف بإدارة دورة رأس المال العامل بشكل أحسن.

ظل مهاب ينظر إليه لثوانٍ، ثم مال إلى الخلف في مقعده، وكأنه يعيد ترتيب ما سمعه. لم يتوقع أن يقرأ رضوان المشكلة بهذه السرعة، وهو الذي يعمل محاسبًا في مصنع صغير.

ثم سأله:

ـ طيب وإنت شايف نعمل قرض؟

أجاب رضوان بثقة هادئة:

ـ أنا شايف إن القرض مش أول حل. الأول لازم تعرفوا الفلوس متعطلة فين جوه دورة رأس المال العامل. راجعوا التحصيل والموردين والمخزون، وحددوا حجم الفجوة الحقيقي. لو اكتشفتوا إن الفجوة لسه موجودة بعد كده، يبقى التمويل ساعتها هيبقى قرار مبني على أرقام، مش مجرد رد فعل لضغط السيولة.

ساد الصمت للحظات، بينما ظل مهاب ينظر إليه بإعجاب واضح، وكأنه اكتشف فيه قدرة لم يكن يتوقعها.

ثم ابتسم وقال:

ـ أنت بكره عندك شغل يا رضوان؟

ـ لأ، بكره الجمعة إجازة.

ـ طيب عايزك بكرة تيجي الشركة ينفع؟

رفع رضوان حاجبه بدهشة خفيفة:

ـ أنا! ليه؟!

ـ عايزك يومين.

ـ أيوه بس أفهم ليه؟

ـ تيجي تقعد معانا وتشوف الأرقام والموضوع من جوه الشركة. مش بقولك اشتغل معايا، ولا بديك وظيفة.. عايز أشوف اللي قلته دلوقتي كان مجرد ملاحظة منك، ولا عندك فعلًا دماغ تنفع في الشغل.

ابتسم رضوان بثقة هادئة:

ـ لو على يومين مفيش مشكلة.

هز مهاب رأسه وقال:

ـ بس لو طلع اللي في دماغي صح وأبهرتني، مش هسيبك تمشي بسهولة!

ضحك رضوان ونهض والتقط هاتفه:

ـ أنا راجل غلبان وعلى قد حالي، استأذنك أطلع أشوف الناس اللي برة. وإنت خد راحتك خالص، زي ما قلتلك البيت بيتك.

تابعه مهاب بعينيه حتى اختفى خلف الباب، بينما عاد رضوان إلى أجواء الاحتفال بخطوات واثقة، دون أن يمنح الأمر أكثر مما يستحق في ظاهره، وظل مهاب في مكانه يستعيد تفاصيل حديثهما.

كان قد دخل الغرفة يبحث عن حل لأزمة تؤرق شركته، لكنه خرج من الحديث وهو يرى رضوان بصورة مختلفة تمامًا.

في الخارج تقدم الجميع لتقديم التهاني والمباركات؛ فاحتضنت «غادة» العروس بحرارة مازحة معها بخفة، بينما ربت «رضوان» على كتف «فارس» بابتسامة فخورة تليق ببداية أمان حقيقي ومستقر. وسط هذه الأجواء العائلية الدافئة، وقف العروسان يتبادلان الكلمات الهامسة والابتسامات الصادقة، وكأنهما يعزلان أنفسهما عن ضجيج الحاضرين احتفاءً بلحظتهما الأولى معاً.

كان «حسين» يجلس في الحديقة إلى جوار «كارم»، يتحدثان بهدوء، حتى نظر إليه «كارم» وسأله فجأة:

ـ حضرتك ليه مروحتش خطوبة أخت رضوان؟ مع إنه عزمك.

ساد الصمت للحظات، قبل أن يبتسم «حسين» ابتسامة صغيرة امتزج فيها الحرج بالحزن، وقال:

ـ مروحتش علشان أنا محرج من رضوان أوي يا كارم. بعد كل اللي عمله معايا، مش عايز أحمّله فوق طاقته أكتر من كده.

سكت قليلًا، ثم تابع:

ـ وبصراحة، أنا خايف زاد تظهر في أي وقت وتعرف... وساعتها هبقى حطيته في موقف صعب من غير ذنب.

نظر إليه كارم بتفهم، ثم قال:

ـ بس رضوان ممكن يزعل إنك ما روحتش.

ابتسم حسين وهز رأسه:

ـ رضوان؟ أكبر من كده بكتير يا كارم. أنا كلمته قبل الخطوبة، وقدمتله عذر قوي يمنعني من المجيء، وهو ما سألش ولا ضغط عليا... تقبل كلامي بكل احترام وقدّر موقفي.

ثم أطرق برأسه لحظة، وتنهد بامتنان قبل أن يقول:

ـ إنت متعرفش رضوان أكرمني بلطفه قد إيه يا كارم يا ابني. أنا مهما حكيتلك، مش هوفيه حقه.

مساء نفس اليوم.

دخلت زاد الغرفة بهدوء بعد أن تأكدت أن قاسم قد استغرق أخيرًا في النوم.
كان فريد يجلس على السرير، ممسكًا بسيجاره، بينما يطالع شيئًا على جهازه اللوحي. رفع عينيه إليها فور دخولها:
ـ قاسم نام؟

ـ أيوة.

ـ كان ماله؟ مش عارف ينام ليه؟

ترددت لحظة قبل أن تجيب:
ـ أبداً... ما كانش جايله نوم. فضلت أتكلم معاه شوية لحد ما نام.

هز رأسه وهو يضع الجهاز اللوحي جانبًا على الكومودينو:
ـ والوضع ده هيفضل كتير؟

عقدت حاجبيها في حيرة:
ـ وضع إيه؟

ـ قاسم. طول ما هو لوحده هيفضل متعلق باللي حواليه كده. الولد محتاج حد من سنه، يلعب معاه ويكبر معاه. غير كده شخصيته هتفضل ضعيفة.

ـ ضعيفة ليه؟ إبنك لسه صغير.

ابتسم ابتسامة جانبية وهو يمد يده ليلامس كتفها:
ـ وعشان كده بالذات محتاج ونيس.

ابتلعت ريقها، وسألته بحذر تخفيه نبرة متوترة:
ـ ونيس؟ إزاي يعني؟

اتسعت ابتسامته قليلًا وهو ينظر إليها مباشرة بعينين لا تفوته فائتة:
ـ نجيب له أخ حلو كده... زيك.

تجمدت للحظة، وشعرت بقشعريرة باردة تسري في جسدها. لم تكن كلماته هي ما أخافها، بقدر ما أخافها ذلك الهدوء الذي قالها به، وكأنه يتحدث عن أمر حُسم بالفعل.
لاحظ تغير ملامحها، فتبدلت ابتسامته إلى نظرة فاحصة:

ـ مالك؟ طلبت طلب غريب ولا إيه؟

أسرعت تخفي ارتباكها، وحاولت رسم هدوء مصطنع، ثم تحركت متوجهة نحو خزانة الملابس:
ـ لأ طبعًا... بس، بس اتفاجئت مش أكتر.

ظل يتابعها بعينيه لحظات، ثم نهض من مكانه.
اقترب منها بخطوات بطيئة، حتى وقف خلفها مباشرة، وحاول أن يحيط خصرها بذراعيه. لكنها تحركت بخفة مباغتة، وكأنها لم تره، وأشاحت بوجهها بعيدًا.

توقفت خطواته.

ظل واقفًا خلفها لثوانٍ، قبل أن يضيق عينيه وهو يراقبها من خلفها. ثم فرك كفيه ببطء، وقال بنبرة حملت ضيقًا واضحًا:
ـ المفروض تكون حسبتك صح! قاسم تم سبع سنين، ويدوبك ولا إيه؟

التفتت إليه بابتسامة خفيفة باهتة رغم ارتجاف قلبها المحبوس بين ضلوعها:
ـ أنت صح طبعاً... بس أنا بفكر نأجل موضوع الخلفة ده شوية بس.

ما إن انتهت من كلامها حتى اختفت ابتسامته.
حدق فيها طويلًا، وكأن الجملة لم تعجبه بقدر ما أثارت داخله شيئًا آخر.
ـ هو إنتِ... مش عايزة تخلفي مني تاني يا زاد؟!

رفعت عينيها لتلتقي بنظراته، وقبل أن تنطق بحرف، تغيرت ملامحه فجأة، وانخفض صوته إلى نبرة أكثر قسوة:
ـ ولا شكلك وحشتك طريقتي معاكِ زمان؟!

اتسعت عيناها بذهول، وتلألأت فيهما دموع متحجرة أبت أن تنزل. للحظة، عاد الماضي كاملًا أمامها، لا كذكرى بعيدة، بل كشيء يمكن أن يعود إليها في أي وقت.
لكنها استجمعت بقايا قوتها، وحاولت ألا تمنحه فرصة لرؤية خوفها، وقالت بصوت خافت يرتجف:
ـ عايزة أخلف منك طبعاً... عايزة أجيب أخ لقاسم ويكونوا سند لبعض.

ظل ينظر إليها، وكأنه يبحث في عينيها عن شيء لم تقله.
ثم اقترب منها بخطوات بطيئة، وارتسمت على وجهه ابتسامة صغيرة لم تطمئنها. حاول التقدم نحوها واحتضانها، لكنها تراجعت بحذر، وألفت ابتسامة واهنة هاربة:
ـ بس لازم أروح للدكتور الأول... ويقولي أبطل الوسيلة أمتى. أوكي؟! تصبح على خير.

أنهت جملتها المتسارعة، وذهبت مسرعة نحو السرير، ودثرت نفسها بالغطاء جيدًا حتى تكاد تخفي وجهها عنه.

مسح وجهه بيده بضيق، ونظر إليها لثوانٍ نظرة مليئة بالتساؤل، ثم استلقى بجانبها على الفراش وأطفأ الإنارة.
وبعد أن هدأت أنفاس فريد وأعلن النوم غلبته.

فتحت زاد عينيها في الظلام، وكانت الدموع تتلألأ فيهما بوجع. تجمعت في ذهنها كلمات فريد القاسية عن الماضي، وانتابها شعور ثقيل بأن خطرًا خفيًا يقترب منها مجددًا، ولا مفر من مواجهته.

مرّت الليلة على البعض بفرحةٍ أراحت قلوبهم، وعلى زاد بمرارةٍ لم تترك لها راحة.

وفي صباح اليوم التالي...

توقفت سيارة أمام منزل «رضوان» في الموعد الذي حدده «مهاب».

كان قد أخبره منذ الليلة السابقة أنه سيرسل إليه سيارة في الصباح لتقله إلى الشركة، بعدما أصر على أن يحضر في الموعد المحدد دون أن يشغل باله بوسيلة الوصول.

خرج «رضوان» من المنزل بهدوء، تاركًا «حبيبة» نائمة، وأغلق الباب خلفه دون أن يحدث ضجة.

كان يرتدي قميصًا باللون الرمادي الفحمي، بأكمام مطوية حتى منتصف ساعديه، وبنطالًا داكن اللون منح إطلالته قدرًا من الأناقة دون مبالغة. بدا جسده الرياضي واضحًا من أسفل القماش، خاصة مع اتساع كتفيه وبروز عضلات ذراعيه، بينما منحت ملامحه الحادة وشعره المرتب هيئة رجل في أوائل الثلاثينيات.

لم يكن في مظهره ما يوحي بالبذخ أو الاستعراض، ومع ذلك، كان حضوره لافتًا.

ذلك النوع من الرجال الذي يمكن أن تراه لأول مرة، فتظنه صاحب عمل اعتاد دخول الاجتماعات واتخاذ القرارات، لا رجلًا جاء إلى شركة ليثبت إن كان قادرًا على حل أزمة.

استقل السيارة، وظل طوال الطريق هادئًا، ينظر من النافذة تارة، ويستعيد في ذهنه ما سمعه من «مهاب» في الليلة الماضية تارة أخرى.

لم يكن يمتلك كل الأرقام والتفاصيل بعد، لكنه كان يعرف نقطة البداية.

وحين توقفت السيارة أمام مقر الشركة، ترجل «رضوان» منها، وألقى نظرة سريعة على المبنى قبل أن يتجه إلى الداخل.

ما إن وصل إلى مكتب الاستقبال، حتى أخبر الموظف باسمه، فأبلغه بأن «مهاب» ينتظره.

صعد إلى الطابق المخصص للإدارة، وما إن خرج من المصعد حتى وجد أحد الموظفين في انتظاره ليدله على مكتب «مهاب».

طرق الباب طرقًا خفيفًا، ثم دخل.

كان «مهاب» واقفًا بجوار مكتبه، وما إن وقعت عيناه عليه حتى ابتسم وتقدم نحوه.

ـ صباح الخير يا رضوان.

صافحه «رضوان» قائلًا:

ـ صباح النور يا مهاب بيه.

رحب به «مهاب» بحرارة، ثم أشار إلى الداخل.

ـ تعالى، الاجتماع جاهز.

توقف «رضوان» لحظة، ونظر إليه باستغراب خفيف.

ـ اجتماع؟

ابتسم «مهاب» وقال:

ـ أيوة. أنا قلت بدل ما أقعد أشرحلك الموضوع لوحدي، تسمع من الموظفين اللي ماسكين الملفات بنفسهم، وتشوف الأرقام قدامك. وأنا عايز أسمع رأيك قدامهم.

هز «رضوان» رأسه بتفهم، ثم دخل معه إلى قاعة الاجتماعات.

كانت القاعة تضم عددًا من مسؤولي الإدارات المعنية.

جلس «أمجد» إلى جانب اثنين من الموظفين المسؤولين عن الحسابات والتحصيل، بينما كان آخرون يتابعون ملفات الشركة وأرقامها أمامهم.

وما إن دخل «مهاب» برفقة «رضوان»، حتى التفتت الأنظار نحوه.

كان بعضهم يعرف أنه الشخص الذي تحدث عنه «مهاب» بالأمس، لكنهم لم يعرفوا بعد ما الذي يستطيع فعله.

جلس «رضوان» في المقعد الذي أشار إليه «مهاب»، ووضع أمامه دفترًا صغيرًا وقلمًا.

لم يتعجل الكلام.

ترك «أمجد» يبدأ بعرض الوضع، ففتح الملف أمامه، وبدأ يستعرض الأرقام المتعلقة بالمبيعات والتحصيل والالتزامات.

كانت المبيعات جيدة، والأرباح في وضع مطمئن، لكن الأموال الداخلة إلى الشركة لم تكن تتحرك بالسرعة نفسها التي تتحرك بها الالتزامات.

رفع «رضوان» عينيه أكثر من مرة أثناء الاستماع، وسجل بعض الملاحظات المختصرة في دفتره.

ثم انتقل «أمجد» إلى تفاصيل التحصيل.

ـ معظم العملاء بياخدوا فترات سداد طويلة، وفي عملاء ملتزمين بالمواعيد، لكن في مجموعة تانية بتتأخر عن المواعيد المتفق عليها، وفي الوقت نفسه التزاماتنا للموردين بييجي موعد سدادها قبل ما جزء كبير من مستحقاتنا يدخل.

ظل «رضوان» صامتًا حتى انتهى.

ثم أغلق القلم بين أصابعه، ورفع عينيه إلى «مهاب».

ـ ممكن أشوف أعمار الديون بالتفصيل؟

ناولَه «أمجد» الملف.

أخذ «رضوان» الأوراق وبدأ يقلبها بهدوء.

لم يكن يقلب الصفحات لمجرد استعراض المعرفة؛ كان يبحث عن نمط.

توقف عند جدول معين، وأعاد النظر في بعض الأرقام، ثم وضع إصبعه على أحد الصفوف.

ـ هنا.

اقترب «أمجد» قليلًا.

ـ فين؟

أشار «رضوان» إلى الأرقام أمامه.

ـ العملاء دول بيدفعوا في المتوسط بعد المدة المتفق عليها، صح؟

أجاب «أمجد»:

ـ أيوة.

ـ يبقى المشكلة مش إن الشركة مفيهاش فلوس. المشكلة إن الفلوس موجودة، لكن مش في الوقت اللي الشركة محتاجاها فيه.

ساد الصمت للحظة.

رفع «مهاب» عينيه إليه باهتمام أكبر.

تابع «رضوان» وهو يقلب صفحة أخرى:

ـ لو خدنا قرض دلوقتي، إحنا هنحل الضغط مؤقتًا، لكن هنضيف التزام جديد على الشركة. وبعد فترة، لو فضل معدل التحصيل زي ما هو، هنرجع لنفس المشكلة تاني.

تحرك أحد الموظفين في مقعده، وقال:

ـ بس إحنا محتاجين سيولة بسرعة.

نظر إليه «رضوان» بهدوء:

ـ وأنا مش بقول ما نجيبش سيولة لو احتجناها. أنا بقول الأول نعرف السيولة بتتسحب فين.

ثم وضع الأوراق أمامه، وبدأ يشرح بصورة أكثر تفصيلًا:

ـ عندنا تلات نقاط لازم تتحط قدامنا: متوسط فترة تحصيل العملاء، ومتوسط فترة سداد الموردين، وعدد الأيام اللي البضاعة بتقعدها في المخازن قبل ما تتحول لمبيعات. لو الفلوس بتدخل بعد تسعين يوم، وإحنا بندفع للموردين قبل كده، والمخزون كمان بياخد وقت، يبقى عندنا فجوة في دورة رأس المال العامل.

نظر «أمجد» إلى مهاب، ثم عاد إلى رضوان باهتمام واضح.

تابع «رضوان»:

ـ نبدأ بالعملاء. مش كل عميل يتعامل بنفس الشروط. العميل الملتزم بالسداد في ميعاده ممكن يفضل على نفس النظام، لكن اللي بيتأخر باستمرار لازم نراجع معاه حد الائتمان وفترة السداد.

قاطعته إحدى الموظفات:

ـ يعني نقلل له فترة السداد؟

أومأ:

ـ لو حجم التعامل يسمح، أيوة. أو نطلب دفعة مقدمة في الطلبات الكبيرة. وممكن ندرس خصم بسيط للسداد المبكر، لكن بشرط نحسب تكلفة الخصم الأول ونشوف هل توفير السيولة يستاهل ولا لأ.

بدأت ملامح الحاضرين تتغير.

لم يعد أحد يستمع إليه باعتباره مجرد شخص جاء مع «مهاب» ليرى المشكلة.

كان يتحدث عن الأرقام وكأنه يعرف الشركة منذ سنوات.

تابع «رضوان»:

ـ وفي الناحية التانية، لازم نتفاوض مع الموردين على مدد أطول، خصوصًا الموردين الأساسيين اللي عندنا معاهم تاريخ تعامل كويس. لو قدرنا نمد فترة السداد، هنقلل الضغط على السيولة من غير ما نضيف قرض جديد.

سأل «مهاب» للمرة الأولى منذ بداية الاجتماع:

ـ وإيه أول حاجة نعملها من وجهة نظرك؟

رفع «رضوان» عينيه إليه مباشرة.

ـ نطلع تقرير واضح النهارده يبين لنا متوسط فترة التحصيل الفعلية لكل عميل، مش المدة المكتوبة في العقود بس. ونقسم العملاء حسب انتظامهم في السداد وحجم تعاملهم مع الشركة.

ثم أشار إلى «أمجد»:

ـ وبعدها نشوف الموردين الأساسيين، ومين فيهم ممكن نتفاوض معاه على مدة أطول.

ثم أضاف:

ـ وبالتوازي نراجع المخزون. لو عندنا أصناف بتتحرك ببطء وفلوس متجمّدة فيها، لازم نعرف ده قبل ما نفكر في أي تمويل جديد.

سادت القاعة لحظة صمت.

كان «مهاب» ينظر إليه بثبات، لكن الدهشة بدأت تظهر بوضوح في عينيه.

لم يكن يتوقع أن الرجل الذي قابله بالأمس مصادفة، واستمع إلى بضع كلمات عن الأزمة، سيجلس اليوم أمام فريقه ويتعامل مع المشكلة بهذا القدر من الهدوء والترتيب.

التفت «مهاب» إلى «أمجد»:

ـ إيه رأيك؟

لم يتردد «أمجد» لحظة.

ـ رأيي إن كلام الباشمهندس رضوان مقنع مية في المية.

ثم فتح الملف أمامه، وأشار إلى بعض الجداول:

ـ بصراحة، الأرقام اللي قدامنا بتقول نفس الكلام. إحنا ركزنا الفترة اللي فاتت على إن المبيعات كويسة وإن الأرباح موجودة، لكن ما بصيناش كفاية على سرعة دوران النقد نفسه. ولو نفذنا اللي قاله، هنقدر نحدد مكان الفجوة بدل ما نغطيها بقرض وخلاص.

نظر «مهاب» إلى بقية الحاضرين.

ـ حد عنده اعتراض؟

تبادل الموظفون النظرات، ثم هز أحدهم رأسه نافيًا.

قال آخر:

ـ لأ، بالعكس. التحليل منطقي جدًا.

أعاد «مهاب» نظره إلى «رضوان».

كانت الدهشة قد تحولت في عينيه إلى إعجاب حقيقي.

قال:

ـ بصراحة يا رضوان، أنا كنت متوقع إنك تفهم المشكلة... لكن مش للدرجة دي.

ابتسم «رضوان» ابتسامة خفيفة:

ـ أنا لسه محتاج أشوف تفاصيل أكتر قبل ما أقول إننا حليناها. اللي اتقال ده بداية بس.

تلك الجملة تحديدًا زادت إعجاب «مهاب» به.

فلم يكن أمامه رجل يحاول استعراض معرفته، بل شخص يعرف حدود ما يعرفه، وفي الوقت نفسه يعرف جيدًا من أين يبدأ.

أغلق «مهاب» الملف أمامه، ثم قال بحسم:

ـ تمام. يبقى نبدأ من دلوقتي.

التفت إلى الموظفين:

ـ أمجد، عايز تقرير تفصيلي عن العملاء والتحصيل، وكل عميل متأخر عن السداد يتصنف لوحده.

ثم نظر إلى مسؤول المشتريات:

ـ وإنت تراجعلي آجال الموردين الأساسيين والتفاوض اللي ممكن نعمله معاهم.

ثم انتقل ببصره إلى مسؤول المخازن:

ـ والمخزون، عايز حركة الأصناف بالتفصيل. إيه اللي بيتحرك بسرعة وإيه اللي واقف، وأي فلوس متجمّدة لازم تظهر قدامنا.

أومأ الجميع وبدأوا بتسجيل التعليمات.

وأضاف «مهاب» بصرامة:

ـ التنفيذ يبدأ من اللحظة دي. مش بكرة. عايز أول تحديث عندي أول ما الأرقام تجهز.

قال «أمجد» بثقة:

ـ حاضر يا مهاب بيه.

بدأت الأوراق تتحرك بين أيدي الموظفين، وارتفعت أصواتهم وهم يتبادلون التعليمات ويحددون ما عليهم إنجازه.

أما «رضوان»، فبقي في مكانه هادئًا، يتابع المشهد بعينين يقظتين.

لم يكن قد جاء إلى الشركة بحثًا عن منصب، ولا ليُثبت لأحد أنه أفضل منهم.

لقد جاء فقط لأن مشكلة طُرحت أمامه، ورأى أن بإمكانه المساعدة في حلها.

لكن حين رفع «مهاب» عينيه إليه مرة أخرى، كان يعرف أن الأمور لن تبقى عند حدود هذا الاجتماع.

فالرجل الذي دخل القاعة بملابس بسيطة وحضور هادئ، استطاع أن يغير طريقة نظر الجميع إلى الأزمة.

والأهم من ذلك كله...

أنه بدأ يلفت انتباه «مهاب» نفسه.

ظل «مهاب» يتأمله لثوانٍ، وفي عينيه شيء لم يكن موجودًا بالأمس.

ذلك الرجل الذي كان يراه منذ البداية أقل منه مستوى، لمجرد أنه جاء من بيئة مختلفة، وأن شقيقته هي الفتاة التي رفض أن يراها زوجةً لأخيه، بدأ يكتشف الآن أنه أخطأ في تقديره.

لم يكن «رضوان» كما تخيله.

وللمرة الأولى، لم ينظر إليه «مهاب» باعتباره مجرد شقيق «حبيبة»... بل كرجل يستحق أن يُعاد حسابه.


جلست «زاد» بمفردها داخل الغرفة بعد أن غادر «فريد» إلى عمله.

ظلت للحظات تنظر إلى الباب المغلق، كأنها تتأكد للمرة الأخيرة من رحيله، ثم سحبت حاسوبها المحمول ووضعته أمامها على السرير.

ترددت قليلًا قبل أن تفتحه.

كان الأمر أشبه بطقس سري اعتادت عليه مؤخرًا؛ دقائق قليلة تقتنصها لنفسها بعيدًا عن أعين الجميع.

فتحت التطبيق المشفر وبدأت المكالمة الصوتية مع معالجتها النفسية، حريصة كعادتها على ألا تذكر أي أسماء أو تفاصيل قد تكشف هويتها أو هوية من تتحدث عنهم.

جاءها صوت المعالجة هادئًا ودافئًا:

– طمنيني يا مدام، أخبارك إيه؟ قلقت عليكي لما متواصلتيش معايا بقالك فترة.

تنهدت «زاد» ببطء وقالت:

– سوري يا دكتورة... جوزي كان موجود كل الفترة دي في البيت، وكان صعب جدًا أتواصل مع حضرتك.

ساد صمت قصير قبل أن تسألها الطبيبة:

– طيب طمنيني عليكي... ماشية على العلاج؟

خفضت «زاد» بصرها إلى الأرض وقالت بتردد:

– بصراحة... أنا مش عايزة أمشي على علاج دوائي. عايزة أي طريقة تانية تخرجني من اللي أنا فيه.

تغيرت نبرة المعالجة قليلًا، وأصبحت أكثر انتباهًا.

– حاسة من صوتك إنك محتارة... في حاجة حصلت في الفترة اللي فاتت؟

أخذت «زاد» نفسًا عميقًا، ثم أطلقت الزفير ببطء، وكأنها تحاول إخراج ما يثقل صدرها.

وبدأت تحكي.

حكت عن شعورها المستمر بالاختناق، وعن المراقبة التي لا تنتهي، وعن إحساسها الدائم بأنها محاصرة داخل حياة لا تمتلك فيها قرارًا حقيقيًا.

ثم قالت بصوت خافت ومتعب:

– أنا تعبانة أوي من طريقته... هو مش سايبني أتنفس. طول الوقت عايز يسيطر على كل حاجة تخصني ويمتلكني تمامًا.

استمعت المعالجة دون أن تقاطعها، ثم قالت بعد لحظة تفكير:

– من اللي بتحكيه، اللي باين لي دلوقتي إن عنده سلوكيات تملكية وتحكمية أكتر مما هي صفات نرجسية، لكن طبعًا مقدرش أشخصه من خلال كلامك بس.

أغمضت «زاد» عينيها للحظة، ثم هزت رأسها في استسلام.

– والعمل؟ أنا مستحيل أقول هو مين. أنا شرحت لحضرتك قبل كده وضعي... وممكن أتأذي. مفيش أي طريقة أكمل بيها؟ أنا مبقتش قادرة أتحمل الوضع ده.

شعرت المعالجة بحجم الإرهاق المختبئ خلف كلماتها، فأجابت بهدوء عملي:

– بصي، علشان تقدري تتعاملي معاه بهدوء وتخرجي من الدايرة دي، هتمشي على التكتيك اللي قولتلك عليه قبل كده.

وسكتت لحظة ثم تابعت:

– أولًا: بطلي تمامًا تبرري أفعالك أو تدافعي عن نفسك، لأن كثرة التبرير بتديله مساحة أكبر للتحكم.

– ثانيًا: خلي كلامك وإجاباتك معاه مختصرة وفي الموضوع، وكلك ثقة وهدوء، من غير ما تديله تفاصيل زيادة يمسكها عليكي.

– ثالثًا: حاولي تخرجي كتير، تروحي الجيم وتفرغي الطاقة السلبية دي بره البيت، عشان تقدري تحافظي على صفاء ذهنك وثباتك النفسي.

شعرت «زاد» بشيء من الهدوء يتسلل إليها.

لم تكن تلك حلولًا سحرية، لكنها على الأقل خطوات تستطيع التمسك بها وسط الفوضى التي تعيشها.

أومأت برأسها وقالت بهدوء:

– تمام يا دكتورة.

انتهت المكالمة بعد دقائق قليلة.

وبمجرد أن أغلقتها، سارعت إلى حذف التطبيق كعادتها، ثم أغلقت الحاسوب وأبعدته عنها.

بعدها أسندت ظهرها إلى رأس السرير ووضعت وجهها بين كفيها بإرهاق.

ارتفعت يدها تلقائيًا لتزيح خصلات شعرها عن عنقها، فظهر أثر جرح طفيف على بشرتها.

توقفت أصابعها فوقه لثوانٍ قبل أن تغمض عينيها.

كانت تبحث عن لحظة سكينة واحدة... لا أكثر.

وفي تلك اللحظة تمامًا، فُتح الباب بهدوء.

دخلت «عواطف» تحمل كوبًا من العصير، واتجهت نحوها قبل أن تضعه على الطاولة الصغيرة المجاورة.

وما إن وقعت عيناها على ملامح «زاد» الشاحبة، حتى جلست بجوارها قائلة بحنان:

– نفسي أعرف مالك ومخبية عليا إيه تاني!

رفعت «زاد» رأسها ونظرت إليها بعينين مضطربتين.

– ليه شايفة إني مخبية عليكي حاجة يا داده؟

ابتسمت «عواطف» ابتسامة حنونة مليئة بالخبرة وقالت:

– اللي ربّى خير من اللي اشترى يا بنتي، وأنا حافظاكي... أعرف من نظرة عينك إمتى بتقولي كل اللي جواكي، وإمتى بتقولي نص المستخبي.

ابتلعت «زاد» ريقها وشعرت بانقباض خفيف في صدرها.

ثم قالت محاولة التماسك:

– أنا... أنا قلتلك كل حاجة جوايا يا داده، حتى إني ما مخبتش عليكي إني بدأت أتعالج أنا وقاسم.

ربتت «عواطف» على يدها بحنان وقالت:

– ماشي يا حبيبتي... مش هضغط عليكي. وقت ما تحسي إنك خلاص مش قادرة وعايزة تتكلمي، قلبي مفتوحلك وهسمعك في أي وقت.

ثم مسحت على شعرها برفق وأضافت:

– ربنا يهدي بالك يا زاد يا بنت حوا وآدم.

نهضت بعدها وغادرت الغرفة في هدوء.

وبمجرد أن أُغلق الباب خلفها، عادت الوحدة تزحف إلى المكان من جديد.

بقيت «زاد» جالسة مكانها تحدق في سقف الغرفة بشرود.

ومع كل دقيقة تمر، كانت الذكريات التي تحاول دفنها تعود إلى السطح واحدة تلو الأخرى.

وفجأة انهارت مقاومتها.

انهمرت دموعها حارة وصامتة وهي تغطي وجهها بكفيها.

فقد عاد ذلك السر الثقيل يطرق رأسها من جديد...

السر الذي لم تجرؤ يومًا على البوح به لأحد.

السر الذي كان مجرد تذكره كافيًا لأن يملأ قلبها ألمًا وخوفًا وتوجسًا.

....

كانت الساعة قد تجاوزت الثانية ظهرًا بقليل، وكانت «حبيبة» لا تزال غارقة في النوم، بعدما قضت ليلة طويلة لم تستطع خلالها أن تنام بسهولة.

رن هاتفها للمرة الأولى، فعبست وهي تتململ في فراشها، ومدت يدها تبحث عنه دون أن تفتح عينيها.

توقف الرنين.

وبعد ثوانٍ قليلة، عاد الهاتف يرن من جديد.

فتحت عينيها بتثاقل، ومدت يدها نحو الهاتف، وما إن وقعت عيناها على اسم المتصل حتى اعتدلت في جلستها بسرعة.

«فارس».

رفعت يدها إلى شعرها بحركة تلقائية، وكأنها تذكرت فجأة هيئتها، ثم حاولت أن تكح أكثر من مرة حتى تستعيد صوتها الطبيعي، قبل أن تضغط على زر الإجابة.

ـ ألو؟

جاءها صوته هادئًا:

ـ صباح الخير.

ابتسمت رغمًا عنها، وقالت:

ـ صباح النور.

ضحك بخفة وقال:

ـ إيه كل ده؟ نايمة لحد دلوقتي؟

ـ يعني...

ـ نامُسيتك كحلي يا دكتوره.

ـ لا والله أبداً، أنا بس علشان نمت متأخر.

كان «فارس» وقتها قد انتهى لتوه من تمرينه، وجلس على أحد المقاعد في صالة الجيم، يلتقط أنفاسه ويمسح العرق عن جبينه بالمنشفة. كان صدره لا يزال يعلو ويهبط من أثر المجهود، ومع ذلك لم ينتظر حتى يستعيد أنفاسه بالكامل، والتقط هاتفه واتصل بها.

قال وهو يلتقط أنفاسه:

ـ نمتي كويس يعني؟

ـ آه، كويس.

سكتت لحظة، ثم وصل إليها صوت أنفاسه المتسارعة بوضوح، فعقدت حاجبيها وسألته باستغراب:

ـ إنت في حد بيجري وراك! هربان من ايه!

ضحك فارس، وقال:

ـ هربان مرة واحدة؟ أنا في الجيم. لسه مخلص تمرين ورنيت عليكي على طول.

ـ آه... تمام.

وضع المنشفة على كتفه، ثم نهض من مكانه واتجه نحو خزانته، بينما كانت «حبيبة» لا تزال جالسة في فراشها، تضم ركبتيها إليها وتعبث بطرف الغطاء بين أصابعها.

ـ وراكي إيه النهارده؟

ـ ولا حاجة.

ثم أضافت بعد لحظة:

ـ إنت عارف إني ما رحتش الشغل النهارده... ما قدرتش بصراحة.

ابتسم فارس وهو يفتح خزانته، وقال:

ـ ولا أنا. صحيت متأخر، فقلت خلاص... اليوم كده كده ضاع.

سكتت حبيبة، ولم تعرف ماذا تقول. كان بينهما صمت قصير، لكنه لم يكن ثقيلًا هذه المرة؛ كانت فقط تحاول أن تخفي ابتسامتها التي ظهرت على وجهها دون إرادة منها.

قطع فارس الصمت:

ـ ناوية على إيه؟

رفعت عينيها باستغراب، وقالت:

ـ مش فاهمة... ناوي على إيه؟

أردف ضاحكًا:

ـ أيوه، عايزين نخرج.

اتسعت عيناها قليلًا، وقالت بحرج:

ـ نخرج؟ نخرج نروح فين؟

ـ نتغدى سوا، ونتكلم شوية... نفهم بعض أكتر.

سكتت لحظة، ثم قالت بتردد:

ـ ما أخويا رضوان كلمك في الموضوع ده؟ وقالك لو عايز نخرج! هيخرج معانا.

ضحك فارس بخفة، وهو يخرج من الخزانة حقيبته الرياضية:

ـ بصراحة، هو منطقه حلو وكل حاجة...

توقف لحظة، ثم أكمل بنبرة هادئة وواضحة:

ـ بس أنا عايز أخرج معاكي.

ردت بتوتر:

ـ هو لازم يعني!

ـ أيوه طبعاً لازم. في حجات كتير عايزين نتكلم فيها!

استندت برأسها إلى الوسادة، وارتسمت على شفتيها ابتسامة عذبة وهي تسأله:
ـ زي إيه!

ابتسم:

ـ زي الشقة، العفش هتختاري إيه والحاجات دي.

أومأت برأسها وقالت:
ـ أيوه صح. فاتتني دي.

سكت فارس لحظة، ثم قال بنبرة أكثر جدية، وكأنه أراد أن يوضح لها ما يقصده فعلًا:

ـ حبيبة أنا محتاج أقعد معاكي بجد. عايز أفهمك، أعرفك. تعرفيني وتفهميني. نختار مع بعض الحاجات اللي تحبي تكون موجودة في بيتك. يا إما بقى نكتب الكتاب، وأخرج معاكي براحتي.

ضحكت بخفة، وقالت بمشاكسة:

ـ وانت فاكر لو كتبنا كتابنا هنخرج!

ـ اومال!

ضحكت مرة أخرى، وهزت رأسها وهي تنظر أمامها بمكر:

ـ إنت كده بتصعبها على نفسك اكتر يا دكتور فارس.

توقف فارس عن الحركة للحظة، ثم قال:

ـ يعني إيه!

ـ يعني رضوان مش هيوافق أبدا أبدا نخرج وإحنا مكتوب كتابنا.

زفر فارس بضيق، وألقى حقيبته الرياضية على المقعد، ثم قال:

ـ أيوه يعني لو عايز أعزم خطيبتي على العشا أو حابب أخرج معاها إيه العمل دلوقتي؟

التقطت نبرة الضيق في صوته، فقالت محاولةً تهدئته:
ـ طيب ممكن تهدا دلوقتي؟ أنا فرحانه ومش عايزه فرحتي تضيع. سيب كل حاجه بظروفها.

التقط فارس أنفاسه، وحاول أن يتجاوز ضيقه حتى لا يفسد عليها فرحتها، ثم قال بنبرة أكثر هدوءًا:

ـ هتيجي بكره المستشفى!

قالت بمكر:

ـ مش عارفه إنت عايزني أجي ولا لا.

رد بمكر أكبر:

ـ أنا محبش أجبرك على حاجة. لو شايفة إنك مش قادرة خليكي متجيش.

كشرت عينيها وقالت بغيظ:

ـ آه طبعاً براحتي. ومش جاية ها...

ابتسم، وقال:

ـ بس أنا هروح. دي حياة ناس يا دكتورة.

ردت بتمتمة وهي تضغط شفتيها:

ـ هيقفلني منه الواد ده.

ضحك فارس، وهو يلتقط حقيبته من جديد:

ـ نفسي أعرف بتوشوشي نفسك بتقولي إيه!

قالت بسرعة:

ـ مبقولش حاجة.

توجه نحو باب الجيم، ثم توقف فجأة وكأنه تذكر شيئًا مهمًا.

ـ على فكرة...

قالت:

ـ نعم!

ابتسم ابتسامة صغيرة وقال:

ـ هديتك تحت مكتبك من امبارح.

عقدت حاجبيها بدهشة وقالت:

ـ هديتي أنا!

ـ اممم.

ـ مكتبي أنا!

ـ أيوه والله. مكتب أوضتك.

ما إن أنهى جملته حتى انتفضت من مكانها.

ـ طب استنى!

لم تنتظر رده، وضعت الهاتف على المكتب، وسحبت الكرسي بسرعة، ثم انحنت أسفل المكتب تبحث بعينيها حتى لمحت شيئًا في الخلف.

وبعد ثوانٍ، توقفت فجأة.

كان هناك صندوق هدايا أنيق مخبأ بعناية تحت المكتب.

فتحت عينيها بدهشة، وسحبته بسرعة، ثم وضعته فوق السرير، والتقطت هاتفها من جديد وفتحت مكبر الصوت.

قالت بلخبطة من شدة مفاجأتها:

ـ فارس... ده بجد في بوكس تحت المكتب.

ابتسم وهو يخرج من الجيم.

ـ أيوه، افتحيه وأنا معاكي.

خرج إلى موقف السيارات، واتجه نحو سيارته، بينما جلست «حبيبة» على طرف السرير، والصندوق أمامها، تحدق فيه بفضول لا يخلو من الترقب.

فتحت الصندوق ببطء.

توقفت أنفاسها للحظة.

كان بداخله هديتان.

هاتف آيفون جديد، وبجواره علبة صغيرة أنيقة، تتناثر حولهما قطع من الشوكولاتة، وتتوسطها وردة رقيقة.

امتدت يدها أولًا نحو الوردة، رفعتها برفق إلى أنفها واستنشقت عطرها، ثم ضمتها إلى صدرها بابتسامة واسعة. بعدها التقطت الهاتف، وقلبته بين يديها بفرحة واضحة، قبل أن تفتح العلبة الصغيرة لتجد الخاتم، فتوقفت لحظة وقد اتسعت عيناها أكثر، وارتسمت على وجهها دهشة ممزوجة بفرحة صافية لم تستطع إخفاءها.

وفي الجهة الأخرى، كان فارس قد جلس خلف عجلة القيادة، وأغلق باب السيارة، لكنه لم يشغلها بعد. ظل يستمع إلى صوتها عبر الهاتف، وكأنه ينتظر اللحظة التي تصل فيها إلى الخاتم.

جاءه صوتها أخيرًا، متقطعًا من شدة فرحتها:

ـ مش معقول... الآيفون! والخاتم!

ابتسم فارس، وأدار محرك السيارة، ثم انطلق بها في الطريق.

وقال بهدوء، وكأنه كان يحتفظ بهذه الجملة لهذه اللحظة تحديدًا:

ـ الخاتم ده جبته أول حاجة ليكِ، ومكتوب عليه أول حرف من اسمي واسمك، وتاريخ اليوم اللي قلبي حبك فيه.
توقفت حبيبة عن الكلام.

نظرت إلى الخاتم من جديد، وأخذت تقلبه بين أصابعها، تبحث عن النقش بعينين امتلأتا بالدهشة. وحين وجدته، ابتسمت ابتسامة واسعة، بينما تسارعت دقات قلبها على نحو جعلها تشعر أن الفرحة أكبر من أن تستوعبها في لحظتها.

لم يكن الأمر مجرد هاتف أو خاتم...

كان إحساسًا بأن فارس فكّر فيها، واختار لها، واحتفظ بتاريخٍ يعني له الكثير، ثم ترك لها مفاجأة كاملة لتكتشفها بنفسها.

شعرت للحظة أنها ملكة هذا الكون بأسره.

وبقي صوت فارس يأتيها من الهاتف، هادئًا ودافئًا:

ـ ألف مبروك يا حبيبة.

ابتسمت، ورفعت الخاتم أمام عينيها، وقالت بصوت غلبته الفرحة:

ـ الله يبارك يا فارس.

وانتهت المكالمة على ضحكتهما الهادئة، تاركةً في قلب كلٍ منهما فرحةً تشبه البدايات الجميلة.

في صباح اليوم التالي، توقفت سيارة «فارس» أمام المستشفى، وما إن فتح بابها ونزل منها حتى فوجئ بعدد من الصحفيين والمصورين ينتظرونه أمام المدخل.

توقفت خطواته للحظة، وعقد حاجبيه باستغراب وهو ينظر إلى التجمع الذي اتجه نحوه سريعًا.

ارتفعت الكاميرات، وتعالت أصوات الصحفيين بالأسئلة، حتى تقدمت منه إحدى الصحفيات ووجهت إليه سؤالها مباشرة:

ـ دكتور فارس الحسيني... حضرتك اسم كبير في الوسط الطبي، وعندك مستشفى خاصة لها اسمها ومكانتها، وبتتمتع بمكانة مهنية مش محتاجة تعريف. فخليني أسألك السؤال اللي أكيد ناس كتير هتسأله: إيه اللي يخلي طبيب في مكانتك يسيب مكانه الخاص، وييجي يشتغل في مستشفى تانية؟ وليه اخترت تحديدًا المستشفى دي؟

توالت أصوات المصورين من حوله، فأكملت الصحفية، مستغلة صمته:

ـ هل قرارك بالعمل هنا له علاقة بخلافات أو مشاكل بينك وبين أخوك، رجل الأعمال مهاب الحسيني، وصلت لدرجة إنك تسيب المستشفى الخاصة؟ ولا فيه سبب تاني محدش يعرفه؟

وقبل أن يجيب، تدخلت صحفية أخرى من بين الحشد، وقالت:

ـ وليه تسيب مستشفاك الخاص، بكل إمكانياته ومكانته، وتقرر تشتغل في مستشفى حكومي؟ هل القرار ده مجرد خطوة مهنية، ولا وراه سبب تاني مجهول؟

توقّف فارس أمامهم، وبدا عليه الهدوء رغم المفاجأة، بينما كانت عدسات الكاميرات كلها موجهة إليه، تنتظر أول كلمة منه.

مرّت ثانية… ثم ثانية أخرى، وبدأ الهمس يتصاعد بين الواقفين. أحد الصحفيين رفع ميكروفونه أكثر، وآخر تقدّم خطوة، كأن اقترابهم قد ينتزع منه الإجابة بالقوة.

رفع فارس عينيه أخيرًا، وجال بنظره بينهم. بدا كأنه حسم أمره، وكأن كلمة واحدة على وشك أن تقلب المشهد كله.

لكن قبل أن ينطق، اهتز هاتفه في جيبه.


تجمّد فارس للحظة، ثم أخرج هاتفه ببطء. أضاءت الشاشة في وجهه، وما إن وقعت عيناه على الرسالة حتى تبدّل شيء غامض في ملامحه.

قرأها مرة... ثم أعاد قراءتها، وكأن الكلمات أمامه لم تكن مما توقع أن يراه.

اتسعت عيناه للحظة، قبل أن يرفع رأسه ببطء عن الشاشة، وظل صامتًا، عاجزًا عن إخفاء الارتباك الذي تسلل إلى ملامحه.

التقطت الكاميرات صمته، وتعلقت به الأنظار، بينما بقي هو محدقًا في هاتفه.

ثم اهتز الهاتف من جديد.

بوصول رسالة أخرى.

يتبع......




© قصص وروايات مريم نصار — جميع الحقوق محفوظة. يُمنع نسخ هذا الفصل أو إعادة نشره كليًا أو جزئيًا دون إذن كتابي مسبق من الكاتبة.

🔔 عجبك الفصل؟ تابعي المدونةعشان توصلك الفصول الجديدة أول بأول🔔 متابعة المدونةاضغطي، سجّلي بحساب جوجل، وخلاص ✔

تعليقات✍️ أضف تعليقًا

  1. روعه روعه روعه 🎉🎉🎉🎉🎉❤️❤️❤️❤️❤️❤️

    ردحذف

إرسال تعليق

بحث هذه المدونة الإلكترونية