البارت الثالث سكربت أميميا غرفة 105
اسكريبت أميميا
AMiMia
رقم 3 والأخير
لا تضيّع شعبان مثل ما ضيّعت رجب وأوهمك الشيطان ب(غدا أنكب على مصحفي وطاعاتي)، فَيأتي الغد بعد الغد وأنت أنت!
البارحة رجب والآن شعبان وغدا رمضان؟
فمتى يأتي ذلك الغد؟
___________________________________________
أهم حاجه إن المريض لازم يثق فيك، لانه لو ما واثقش في الدكتور بتاعه! استحاله أنه يساعدك في أنه يتسجيب ويتعافى، بعد ما قريت كل كلمة كتبها فريد عن عيلته رفضت إني أروح ليهم أو أحاول معاهم تاني، ناس انانيه بجد، هان عليهم ابنهم يرموه في مصح عقلي ، واكيد كلامي معاهم مش هيأثر فيهم،بس فكرت أعمل محاوله مع دكتور حاتم يمكن قلبه يرق ويسمحلي بمعالجة فريد، وأقدر اساعده أنه يرجع الثقه في نفسه من تاني، خبطت على باب مكتبه وأذن ليا بالدخول:- مساء الخير يا دكتور حاتم!
رفع عينيه ليا ورد بعدم لامبالاه:- مساء الخير يا دكتوره.
عينيه وهو بيرد عليا فيها خبث متداري، مش واحد طبيعي أبدا، وخصوصاً بعد ما عرفت أنه مادي لاقصى درجه،وبحسه بيضايق من وجودي، حسيت برهبه وخوف جوايا اني أفشل، قعدت على الكرسي قصاده وحاولت مكشفش كل ورقي قدامه:- دكتور حاتم لو فاضي ممكن اتكلم مع حضرتك شوية!
قفل الدفتر اللي قدامه وكلمني بنفور:- خير يا دكتوره مي؟ لو في أي حاله من الحالات اللي بتباشري معاهم مارس جنونه عليكي؟ قوليلي لو كده ناخده على جلسة الكهرباء فوراً.
حسيته بيلمح لحاجه أو تهديد غير مباشر، بس حاولت اجمع شتاتي ورديت عليه:- أحم، لأ أبدا يادكتور متقلقش، ومفيش حاجه من دي حصلت ولا هتحصل، أنا دكتوره وبعرف أتصرف مع المريض كويس، وآخر حاجه إن تفكيري بيروح لصدمات الكهرباء لأني مبفضلهاش إلا عند اللزوم، ومتخافش أنا بعرف اسيطر كويس لأني عنيده ومبستسلمش بسهوله.
أنا كنت قاصده آخر جمله أوجها ليه علشان مايفتكرش إني ممكن اتهاون وإني أرجع عن اللي في دماغي، بصلي بغموض أكتر كأنه بيفكر في سؤال ليا عقيم مالهوش أجابه علشان انسحب وأخرج من عندو، بس انا اللي سألته المرة دي:- دكتور حاتم ليه مريض غرفه 105 بتعاقبه بصدمات الكهرباء! مع إن في حلول كتيره ممكن نهدي بيها المريض، وخصوصاً لو كان مُدرك و واعي زي الحاله دي!
كشر عينيه وسألني:- تقصدي إيه يا دكتوره مي!
مي:- أظن سؤالي واضح يادكتور حاتم!
هنا بقى هو حب يقلب التربيزه عليا وقام من مكانه و وجه ليا إني بتهمه وزعق كالعاده وقالي:- لأ مش واضح يادكتوره؛ أنتي بكلامك ده فيه إتهام مبطن ليا إني مهمل في علاج الحاله دي بالذات وقاصد إني أديله صدمات كهرباء، وكمان دي مش أول مرة تكلميني عن الحاله دي؟ أنتي كده بتتعدي حدودك وأنا مقبلش أبدا أي حد يتهمني حتى لو كان مين!
أنا مستغربتش هجومه عليا، وده بيأكدلي كل شكوكي جوايا، لكن استخدمت معاه الحرب الباردة وقولتله:- أبدا يادكتور أنا مقصدش خالص اللي أنت استنتجته من كلامي ده، أنا كلامي واضح تماماً، ليه فريد مابياخدش علاج مهدئات من غير صدمات كهربائية! لأن في الحقيقة كده انا مش شايفه إن في داعي فريد يتعالج بالطريقه دي! انا شايفه أنه شخص هادي جداً، لا بيكسر ولا بيتعدى على حد سواء من التمريض أو الدكاترة، ولا بيعمل فوضى تستدعي الخوف اللي بيواجهه من اللي حواليه ده! وكونك كطبيب معالج لازم تسمع منه.
وكملت بمغزى:- مش يمكن لما تسمع منه تكتشف إنك غلطان في تشخيص حالته! وأنه ابعد ما يكون أنه يتصف بالجنون!!
قدرت اني استفزه وقرب مني وكمل هو لكن بنبرة كلها تهديد:- أسمعي يا دكتورة! أنتي زودتيها أوي ،كونك موجوده في مكتبي ف انتي ملزمه تحافظي على الفرق بيني وبينك، وانك لسه مبتدأه ويدوب مكملتيش ست شهور هنا! فماتجيش تدوري على حاجات هتعملك صداع! ياريت تريحي نفسك وتركزي في شغلك، ومالكيش دعوة بمريض غرفه 105 - ده لو انتي عايزه تستمري معانا هنا! أما بقى لو مصممه تنخوري في اللي مالكيش فيه؟! ف استحملي اللي هيجرالك، ياريت تهتمي بنفسك وبمرضاكي وبس!! وحذاري أشوفك أو أسمع إنك قربتي من الغرفه دي! أنتي فاهمه؟!!!!!
طبعاً بعد اللي حصل ده انتوا كمان أكيد بتفكروا نفس تفكيري! وإن فريد معمول عليه لعبه كبيره، وحاتم متورط فيها! أكيد في سر! ولازم أعرفه، خرجت من مكتبه من غير أي رد فعل مني، سبته ومشيت وأنا دماغي فيها ألف سؤال وسؤال، ولازم ألاقي ليهم أجابه! أما بخصوص تهديده إني أبعد عن فريد! فده بيحلم لأنه مش هيحصل، فريد دلوقتي بقى هدف قدامي ولازم أوصله، سمر جاتلي المكتب وكنت مخنوقه قوى واتكلمنا أنا وهى عن أحوال المرضى وجت حالة فريد في نص الكلام ونفسها إني أتابع حالته، لقيتها فرصه وحكتلها إن حاتم هددني إني مقربش من الحاله دي بالذات! لقيتها فكرت معايا ولقينا الحل وإني البس يونيفورم الممرضين واخدت كارنيه سمر ولبست ماسك، وفي أول فرصه روحت لفريد وبقيت بتابعه من وقت للتاني، عدا شهر كامل وكل يوم كنت بتابع مع غرفه 105 وطبعاً كل ده أخد منى شهور تانيه لحد ما بقى واثق فيا تماماً ثقه كامله، وبدأ ياخد مني العلاج وكانت كل حاجه بتتم في السر، وامبارح اتفقت معاه إني هاجيله بالليل وانا نبطشيه وحاتم مش موجود ونقعد براحتنا ونتكلم ولما رحت اتفاجئت بأنه مغير لوك شعره وحسيته أنه مهتم بنفسه شوية على غير العاده، عملت نفسي مش واخده بالي بدأت اتكلم معاه وقلتله يحكيلي وعلشان يصدق اني مابسجلش ليه؟ فتحت شنطتي واديته تليفوني يقفلوا بنفسه، لاني بجد حابه اني أسمعه من غير تشتت، حكالي كل حاجه لكن ده خد وقت طويل لأن كلامه قليل، شرحلي عن تصرفات والدته وانها زهقت منه ومن أسلوبه ومن كلامه البطيء وديما كانت تزهق من تصرفاته، وتتكسف منه قدام قرايبها، وكمان والده اللي دايما كان بيفضل أخوه الصغير عليه، ومرات أخوه كانت بتتريق عليه، وعن البنت اللي حبها لكن ما كانش عارف إزاي يعبر عن مشاعره ودايما في جمود في ملامحه، ومحدش حاول إن يهتم بيه ويعرف إيه السبب،و ده عرفت بيه انه من الاميميا، وانتبهت على كلامه عن اخوه الصغير هاني وأنه دايما ضده في كل حاجه وسألته بفضول:- طيب يا فريد ازاي ضربت مرات أخوك؟ أنت راجل كبير وناضج وما صدقش إنك تعمل كده!
رد عليا:- هي دي الحاجه الوحيده____ اللي انا____ مش عارف افسرها.
مسكت ايديه:- طيب ممكن تحكيلي إيه اللي حصل يومها؟
فريد:- في اليوم ده____ انا كنت راجع______ من بره وطالع ______البيت وهاني نده عليا____ أطلع عنده شقته _______ وقعدنا مع بعض نتكلم_____ ومراته جابت كوباية________ عصير شربتها______ هاني قالي أنه_______ نازل ثواني وجاي_______ وساب الباب مفتوح________ خرجت مراته_______ واتكلمت معايا_______ وما حستش غير _______ وهما بينقذوها مني______ وكنت فعلاً بضربها________ لكن حقيقي مش عارف _______إيه اللي جرالي.
سمعت منه وحسيته أنه اضايق من الذكرى دي، حط وشه بين ايديه ورفض انه يكمل، مسكت كف أيده ورفعتها قدامي وقولتله:- لو مش عايز تكمل وحسيت إنك تعبت، شاور بإيدك كده وقولي لأ.
حاولت وهو حاول معايا لكن حرك أيده معايا وفهمت أنه مش عايز يتكلم تاني،سابني وقام ينام كنوع من الهروب، وأنا سبته وخرجت افكر في المشهد ده واكيد في حاجه حصلت خلت فريد مغيب ومايحسش أنه اتعدى عليهم بالضرب ، وفي جلسه تانيه سألته نفس السؤال بس عن والدته:- قولي يا فريد ومامتك! إيه اللي يوصلك انك ترفع ايدك عليها! مع انك لبق ومش باين عليك خالص أن انت ممكن تعمل حاجه زي كده!!
صمت تام وكأنه بيفكر مسك ايديا وحطها على وشه وعايز مني إني اعملة اشاره وكانت الإشارة دي بالرفض مش عايز يتكلم ، لكن أنا كالعاده ماستسلمتش واترجيته يكمل وقال:- برده ماعرفش اليوم ده______ كنا قاعدين على_____ السفره كلنا وماما ____________ بتتكلم معانا ما حسيتش بنفسي غير وانا ________ بزعق وهجمت عليها______ وبابا وهاني________ شدوني بعيد حتى بابا _______ وقتها ضربني بالقلم______ حاولت اشرحلهم بس مبعرفش_______ يومها جريت وسبتهم _______ ومش عارف انا عملت كده إزاي________ بعدها لقيت ناس_______ جت تاخدني وزعقت ليهم______ لاني فهمت انهم_____ هياخدوني المصحه اللي_____ كان دايما هاني ________ يهددني بيها.
اكتفيت بالجلسه دي لأنه خلص كلامه بأعجوبه وسابني و وقف في ركن الغرفه، ورسم على الحيطه وش حزين وقلب مكسور، فهمت أنه في حالة إنهيار داخلي، اديتله علاجه وسبته وخرجت وبفكر في كل كلمه فريد قالها لكن كل اللي لفت نظري في القصه دي "هاني" لاني حسيت في كل حكايه هو وراها؛ وبعدها قررت بدل معالج فريد في الضلمه!!! لازم يتعالج في النور، فريد مش مجرم ولا انا مجرمه علشان اعمل كل حاجه في الضلمه؛ واخدت قراري إني لازم أتكلم،ورحت للدكتور حاتم و واجهته وقلتله:- أنا شخصت حالة فريد وهو مش مجنون هو بيعاني من أميميا وده مرض نادر، مرض عضوي مش نفسي!!! وملهوش علاقه بالجنون ولا بجلسة الكهرباء، فريد بيتعالج بالطريقه الغلط!
وطبعاً زي كل مرة يقلل من تقييمي، ولأن حاتم مرتكب خطيئه وحاجه كبيره ما عرفش يعمل حاجه بعدها غير أنه يثور عليا، وشد معايا بأسلوب غليظ جداً، وهددني بأني لو اتكلمت انا هكون مرفوده، وقتها فكرت إيه الغلط اللي انا عملته يوصلني للرفد؟!!! وقتها بس اتأكدت إن حاتم ممكن يكون مشترك مع هاني! ملهاش تفسير غير كده؛ جريت بسرعه على مدام بثينه لأنها أمه ولازم تعرف، وحتى لو كانت بتضايق منه لكن دي مهما كان أم ومستحيل تسيب أبنها يتدمر كده، ولأن الأم دايما اكتر واحده بتخاف على أولادها هتحميه منهم، واتكلمت معاها وشرحت لها حاله فريد وقلتلها:- إبنك مصاب بحالة نادرة بتصيب بعض الاشخاص وأسمه الأميميا وده شلل في عضلات الوجه،بيعاني فيه الشخص بعدم القدرة عن التعبير بأفكاره ومشاعرة الداخلية وبيظهر أنه غير مبالي لكل اللي بيحصل حواليه، بس ده بيكون غير اللي حاسس بيه جواه من حب وعاطفة وحزن مابيقدرش يعبر بيه ولا بيقدر يتحكم في إشاراته بردود الفعل، وممكن يتفهم غلط من الناس وده بيسبب مشاكل نفسية ليه كبيرة وبتؤدي ليه للعزلة عن الناس وتجنبهم، فريد مرضه عضوي مش نفسي أبدا، ارجوكي انقذي إبنك، إبنك هناك بيتعذب صدقيني.
خلصت كلامي واستنيت رد فعلها، والمصيبه أنها ما تأثرتش وبتكدبني في كل كلمه بقولها، والظاهر كده إن مرات أخوه بلغت جوزها بأني موجوده ، و أول ما عرف جه بسرعه وسأل بثينه وقالتله كل الكلام اللي انا قلته وأنها حقيقي مكنتش مصدقاني، وكمان أخوه رده عليا كان قاسي وقالي:- أسمعي يا دكتوره مي!! أنتي تبعدي خالص عن فريد أخويا، و بلاش تصحي الوحش اللي جواه بعد ما خمد ونام، أنتي ما عشتيش اللي إحنا عشناه معاه، وما شفتيش اللي احنا شوفناه، وتشخيصك ده غلط في غلط، وفريد أخويا، وانا عارف أنا بعمل إيه! وأحنا مستغنيين عن خدماتك، ولو حاولتي تقربي من فريد! أنا هخليكي تندمي! الحركات دي انا فاهمها كويس! إنك تيجي هنا وتشوفي العز اللي عايش فيه فريد! تقومي تفكري في حيله خايبه وتفكري أنها هتدخل علينا ونصدقك! وبعدها تكملي في تمثيلك وتضحكي على فريد وتحطيه تحت جناحك بصفتك دكتوره! الشغل ده اتعمل في أفلام كتيره، لو بتحلمي بقرشين؟ فحلمك صعب يتحقق.
مش هكدب عليكم الصدمة كانت شديده اوي عليا، عينيا كانت على كل واحد فيهم وكأن ربنا كشفهم كلهم قدامي، صعب عليا أوي فريد! قلبي انقسم علشانه! هو في ناس كده؟ وحبي لفريد قواني حسيت إني أقوى من قبل واخدت نفس عميق ،ووقفت في وشهم كلهم وعريت كل واحد قدام نفسه لأني فهمت كل حاجه وقلتلهم بغضب:- انا كده فهمت كل حاجه، ايــــوه كل حاجه بقت واضحه زي الشمس!!! أنت يا هاني العقل المدبر والمنفذ!! ايوه العصير!!! العصـــير اللي أنت شربته لاخوك في بيتك وسبته مع مراتك! واكيد أنت حاطط في العصير حاجه يخليه يكون في حاله هستريا ومش مدرك ولا واعي للي هو بيعمله! سبته لوحده بحيث إنك تطلع تلاقي الصدمه دي وتتصرف تصرف ضد أخوك ومحدش يلومك عليه!! ونفس اللي أنت عملته على الغدا مع مامته وأنه يثور عليها ده في حد ذاته محدش هيتحمل يسمعه؛ أنت استخدمت مرض أخوك في مصلحتك أنت وبس! وطبعاً رحت اتفقت مع دكتور حاتم انكم تخلصوا من فريد تدريجياً،وتتهموه بالجنون، مع إن أخوك مش مجنون ولا ليه ذنب في معاناته دي! فريد قدر يكبر ويتعلم ويدرس زيه زي اي حد تاني، بس أنت استكترت عليه فلوس والدك! ومسكته من نقطة ضعفه ولعبت عليها، وأنه مدام كلامه قليل وعنده شلل في عضلات الوجه؟ يبقى لازم تعاقب أخوك على مرضه ده وتخلص منه مش كده يا أستاذ هاني؟ فريد عنده حق، انتوا اللي مجانين، انتوا اللي مرضى نفسيين مش هو، أنت اشتريت سكوت والدتك بكام؟ وآثرت عليها إزاي انها تبيع أبنها وترميه؟ و أبوه ازاي وافق على تصرفاتك دي وسلم حتة منه للمصحه؟ قد كده المظهر الخارجي والفلوس أهم من البني آدم عندكم؟ هو ده مش إبنكم؟ ذنبه ايـــه!!! ذنبه ايـــه أنه اتولد مريض؟ نفسي أعرف الجحود اللي جواكم ده إيه؟ ترموا ابنكم في مصحه بسبب مرض نادر وما لوش يد فيه؟ لكن انتم ما فهمتوش فريد ما فهمتوش قلبه ودي حاجه غصب عنه، إحساسه ومشاعره كلها داخليه، انتوا ما حاولتوش توصلوا للاعماق، انتوا بس اخدته الظاهر واستغنيته عن ابنكم! بس عايزاكوا تعرفوا ان الفلوس مش كل حاجه، وهيجي عليكم يوم وتندموا كلكم.
هاني:- اطلعي بره وكلمه زياده هطلبلك البوليس؛ بـــــره.
طردني من البيت وسط سكوت والدته وابوه وكأنهم بيقولوا إن فريد خارج عن حياتنا، خلاص مالناش علاقه بيه ولا في صلة دم بتربطنا ببعض، جريت في الشارع بعيط قلبي موجوع عليه، نفسي اخده في حضني واقوله أنا امانك،لو الكل باعك انا شارياك، لو الكل ضدك انا منصفتك الوحيده، جريت من شارع لشارع ومكان لمكان لحد ما وصلت المستشفى وطلعت مكتبي، الحزن كان مأثر عليا وما رحتش أشوف فريد، هوااجهه إزاي؟ هقوله إيه؟ اهلك هما السبب أنهم رموك هنا؟
جت سمر الممرضه تجري:- الحقي يادكتوره الحاله في غرفه 105 خدوه على جلسة الكهرباء وبينده بإسمك.
جريت بسرعه وكان قلبي بيدق كأني بصارع الزمن وبحارب الوقت، نزلت السلم وروحي بتسبقني مش قادره اوصل حاسه اني نفسي انقطع، لكن وصلت، وصلت متأخر أوي، فريد بيتهز جامد من الصاعقة الكهربائية، شالوه وجرجروه من الغرفه، دموعي نازله وحاسه بالعجز والقهر، حاتم بصلي وكان بيضحك وشمتان فيا وحاسس بالانتصار، عرفت وقتها أنه أكيد عرف إني روحت لعيلته وخذلوني، مشيت مسلوبة الاراده حاسه باليأس والإحباط، وقفت قدام الأوضه بصيت عليه، كان نايم متخدر من البنج، كان عرقان، بيتجازى ليه وعلى إيه؟ علشان ملامح وشه اللي مبتتغيرش! بصيت عليه أكتر وكان في آثار ضرب وعرفت أنهم ضربوه، طيب ليه؟!!! رفعت أيدي على الباب ومقدرتش اتحكم في مشاعري ، انفجرت في بكاء هستيري، بكيت بحرقة و وجع قلب، رجعت مكتبي تعبانه وبكتب في الاستقالة، الباب خبط ودخلت سمر ومعاها محمد مساعد الارشيف وكان شكله خايف، وسمر قالتلي إن محمد قالها حاجه مهمه، سبت القلم وركزت معاه، وقالي على كارثه كبيره، وأنهم هيحوله حالة غرفة 105 بكره الصبح مستشفى العباسيه.
انتوا متخيلين الجحود ومــ.وت الضمير وصل لفين؟ صدمتي كانت أكبر من أي تحمل وما عرفتش أفكر او أعمل إيه؟ مش عارفه أعمل حاجه، فضلت رايحه جايه ودماغي هتتفرتك من التفكير، أنا في حرب لوحدي وما معيش حد، أعمل إيه؟ اهربه طيب؟ بس هاهربه إزاي؟!!! خــــالي!!! فاجأه افتكرت خالي اللي في المزرعه! اتصلت عليه وكنت منهاره من العياط وحكيتله كل حاجه وطلبت منه إني يساعدني نتصرف إزاي او نعمل ايه وأخيراً لقيت الحل..
رحت المستشفى وكنت نبطشيه الساعه 3:00 الفجر وباقي ساعتين والنور يطلع وياخدوا فريد على العباسيه وقتها هيدمروا فريد نهائياً، جريت عليه وكان نايم ،دخلت صحيته وقعدت قدامه، اتعدل وسألني:- كنتي فين_____ ناديت عليكي كتير ______ بس أنتي اتخليتي عني_____ سبتيهم ياخدوني____ ضربوني كتير ومش____ عارف ليه بيعذبوني ______ مقدرتش أدافع عن نفسي ________ علشان انتي_____ قولتيلي متعملش فوضى_______سمعت كلامك بس______ لما سمعت كلامك؟_____ أذوني اكتر.
مسكت وشه بأيديا ودموعي نازله، كلامة حرفياً بيدبــ.حني، حاولت أتكلم بس عياطي كان مستمر ، قد إيه الظلم والقهر وحش، رفع ايديه على خدي وكأنه مستغرب ليه بعيط بالشكل ده! شفت فعلاً في عينيه حب كبير ليا، حركت راسي وارسه كمان بالرفض وقولتله بصوت مبحوح:- لأ ، عمري ما اتخلي عنك،بس آسفه غصب عني اللي حصل.
حسيت أنه عايز يقولي دموعك بتوجع قلبي، رفضت الفكره ومسحت دموعي،ونزلت على ارض الواقع لأن ما فيش وقت لأي مشاعر، مسكت وشه بأيديا تاني بقوه أكبر وسألته بجديه:- بتثق فيا؟
حط أيده على ايدي وحاول وهز راسه ببطء وحركه صغيره خالص بالموافقة، من غير ما يتكلم، ابتسمت وسط دموعي ، لأن دي أول خطوه ونجاح ليا وليه،جبتله لبس دكتور وفهمته يعمل إيه بالظبط وده لمصلحته ولو رفض هياخدوه العباسيه لبس بسرعه وكمان لبس ماسك علشان ما حدش يشوفه، وريته صورة ورقم العربيه اللي مستنياه على أول الشارع، وانا خرجت وهو مشي ورايا، محمد كان واقف يشغل الأمن، شاورت لفريد على العربيه وركب فيها ومتحركتش غير لما العربيه اتحركت وفي طريقها دلوقتي على الإسماعيليه، ورجعت نبطشيتي وكنسلت الاستقالة دلوقتي، الصبح طلع والخبر انتشر بسرعة الصاروخ، حاتم كان ثاير وزي المجنون لما عرف إن فريد هرب، هاني جه ووالده جه وعملوا مشكله كبيره في المستشفى، وانا واقفه اتفرج مع باقي الزميلات، وحملوا حاتم المسؤوليه الكامله، طيب هرب فين وراح فين؟ ما حدش يعرف! هاني كان بيبصلي نظرات كره واضحه ومن نظراته كأنه واثق إني أنا السبب في هروب أخوه! لكن مقدرش يوجه ليا أي كلمه لأنه بالطريقة دي هيفتح على نفسه باب صعب أنه يتقفل غير وهو في السجن؛ وباطنياً الشكوك كلها كانت ضدي، بس أنا كنت واخده حذري كويس اوي، لأني زي ما قلتلكم الفلوس دلوقتي تقدر تعمل أي حاجه! ومكنش في طريقه غير كده إني أنقذ بيها حياة شخص لأن النفوس المريضة كتير، اطمنت من خالي بأن فريد في امان، وبلغته بالعلاج اللازم لأني أكيد هكون متراقبه ومش هينفع أنزل الاسماعيليه الفترة دي، حاتم كان واقفلي على أي غلطه وكان ند ليا في المصح، عدى شهر واكتر وانا متراقبه كنت بروح البيت في المنصوره والمستشفى زي كل يوم عادي، وبقعد النبطشيه بتاعتي، ومارحتش اي مكان وما حدش عارف يوصل لفريد، واللي وجع قلبي انهم نزلوا صورته في الجرنال من ضمن المجانين الهربانين، لكن نبهت على خالي ما يعرفوش أي حاجه من دي،لحد ما اشوفه بنفسي واطمن عليه، كنت بسمع صوته في التليفون وده كان كافي بالنسبالي علشان اوصله لبر الأمان، وكنت لما بروح بكلمه واكمل معاه جلسات وانبه عليه انه ياخد علاجه، وكان ديما يسألني هيشوفني امتى؟!
وجه اليوم اللي سافرت فيه لفريد وكان واحشني قوي، جريت عليه لكن كانت دقنه طويله وشكله متغير، عينيه كانت مفتقداني، سلمت عليه وحاولت على قد ما اقدر إني اعالجه، بدأت أعالجه بطريقتي واني لازم افسر كلامه بطريقه ابسط من كده وابعد تماماً عن ملامح وشه لأنها مالهاش علاقه بالشعور الداخلي جواه وده مش بأيديه، صعب يفسر كل حاجه جواه حزن او فرح ضحكه او تكشيره بس هو بدا يستجيب، لكن ملامحه زي ما هي، أشتغل مع خالي في المزرعه وبدأ يتعايش معانا، بنفذله اي طلب يطلبه كان عايز تليفون وجبتله واحد هديه، ووصلت لفكره حلوه قوي علشان أعرف إزاي إن كان مبسوط أو حزين؟، بدأنا نتكلم شات لما بيبقى حزين بيبعتلي ايموشن حزين، ولما بيبقى مبسوط بيبعتلي ايموشن مبسوط، والفكره دي ريحت فريد نوعاً ما، ويحكيلي عن حاجه جواه عن طريق الكتابه، بعد ست شهور كمان طلبت اتنقل في مستشفى في نفس محافظتي والحمد لله اتوافق على النقل وبعدت تماماً عن حاتم وشره،كنت بروح المستشفى وبرجع اتابع مع فريد لحد ما اتغير تماماً، لكن عضلات الوجه لسه فيها شلل، لكن داخليا فريده اتحسن كتير، وزي ما اهله نسيوه هو كمان نسيهم، وبدأ يشتغل وعمل مشروع صغير مع خالي اللي شجعه وانا كمان شجعته، هو كان مفتقد الأمان والحنان ولقاهم معايا.
ساجد عنده تلات سنين بيجري في المزرعه وجالي وقالي:- ماما أنا جعان وبابا كمان عايز ياكل.
ضحكت وقولتله:- قلب الماما جعان! ثواني والأكل يكون جاهز في الجنينه.
ده ساجد أبني من فريد، أيوه زي ما قريتوا كده بالظبط ، أصله طلب أيدي في الشات عبر عن كل حاجه جواه عن طريق الكتابه وصور الايموشن، طبعاً مترددتش، أنا مش هلاقي لا أطيب ولا أحن منه، وده كان حلمي من البدايه،واتعامل معايا بكل حب واحترام، هو إنسان عادي جداً ، قادر يتعلم ويدرس ويعيش حياة كامله، لكن اللي بيعثر مطبات الحياة إنك تتنمر أو تتريق على شخص، إنك تقلل من قيمة حد وتدمره داخلياً، إنك تحاول تشوية كل حاجه حلوه في حياة اي شخص؛ إنك تحس بالنفور لمجرد إن يكون ليك أخ معاق أو مريض ودي حاجه مش بأيديهم، ياريت نرتقي ونتقي ربنا لأن لابد وحتماً تدور الدائره، بلاش نكون بشر معاق ومعيق ويعيق، الدنيا أبسط من كده بكتير.
ظبطت الغدا وندهت على فريد:- فريد تعالى ياحبيبي الغدا جاهز.
ساب اللي في أيده وجه وقالي:- ساجد راح ينده _____ جده وجدته وجاي.
مي:- ماشي تعالى بقى أغسل إيديك واقولك أنا عملالكم حلو إيه النهارده.
مشي معايا و وقف مرة واحدة ومسك التليفون، سمعت صوت رساله، فتحتها وقلبي دق لأنه فاكر عيد ميلادي وكتبلي.
:- أنا مش ناسي عيد ميلادك، كل سنه وانتي النور اللي منور وريدي يا مي، بحبك.
فرحت جدا وجريت عليه وحضنته، ماليش دعوه بملامحه الجامده أنا ليا بس بقلبه اللي بيدق علشاني، هو كمان ضمني بحنان وهمس ليا أنه بيحبني، كنت طايره م الفرحه، واحتفلنا أنا وهو بعيد ميلادي الرابع معاه، وتاني يوم قاعده براجع كتب لمناقشه مهمه وكنت في الجنينه، اتفاجئت بفريد بينادي عليا وكان واقف عند شجره، رحت ليه وسألته خير يا فريد؟
شاورلي على الشجره لقيته راسم وش مبسوط وقالي:- دي انتي_____ أنتي خليتيني كده______ على طول، جوايا بقى _____شبهك أوى يامي.
وقتها فرحت جدآ وقعدت جمبه لقيته مسك ايديا وسألني سؤال خلي قلبي يدق وقالي:- أنتي بتفهميني إزاي؟! _____ أنتي الوحيده اللي فهمتيني ______ من غير ما اضحك______ من غير ما ازعل ______ من غير ما اكشر ____ فهمتيني ازاي يا مي______ انا بحس انك فهماني ______ أكتر من نفسي!!
ابتسمت وقلتله:- انا هقولك؛ لاني شايفاك من جواك يا فريد، قلبي اختارك من زمان وانا إحساسي كان صح، إنك كنت في المكان الغلط، حاولت اوصلك لكن وانا بوصلك وصلت لقلبك؛ عرفت أنت فيك إيه؟ وبتعاني من إيه؟ وقررت إني أثبت ليك قبل العالم إنك طبيعي جداً وتقدر تتفوق على أي حد تاني، أنت أهو اجمل زوج وأحسن أب، مفيش أي حاجه تخليك فاقد الثقه بنفسك، أنت فريد التهامي خريج آثار مش أي حد.
بعتلي ايموشن أنه مبتسم وقلب بيدق وقالي:- يعني انا مش مجنون؟
ابتسمت:- عمرك ؛عمرك ما كنت مجنون؛ وهي دي الاجابه اللي انت كنت بتدور عليها؛ لأن اللي بيعاني من الأميميا مش مجنون.
جه ساجد بيجري وقال:- بابا هنخرج نتفسح امتى؟
فريد بص ل مي:- شوف ماما تحب إيه____ وأنا معاها في أي حاجه.
أنا ضحكت وضميت ساجد لحضني، لقيت فريد رفع أيدي وحط راسه هو كمان في حضني وحط أيدي على قلبه وغمض عينيه، سألته:- مبسوط يافريد.
فريد:- انا لقيت نفسي__يوم مالقيتيني_ ياريتني قابلتك____ من زمان يامي.
النهايه.
انا طبعاً ممكن أكون فشلت في إني قدرت اوصل المعلومه بشكل صحيح! لكن حاولت على قد ما اقدر، واللي عايزه اوصله ليا وليكم من الاسكريبت ده، إننا منحكمش على أي حد من خلال شكله و ملامحه مهما كان، وكمان بلاش نقلل من أي حد مهما كانت ظروفه، أنت متعرفش هو في ايه او بيمر بإيه، و إننا نحمد ربنا على اللي إحنا فيه، نحمد ربنا لو عيطنا لو ضحكنا لو بكينا لو كشرنا لو اتكلمنا بسرعه لو انفعلنا وبان علينا، لان في ناس كتير محرومه من النعم دي و بتعاني تبقى بتضحك من جواها؟ والناس شايفاها انها ما بتضحكش، تبقى حزينه من جواها والناس متجنباها تماماً، ناس عايشه لكن ما دقوش طعم الحياه، اتمنى ان الكل يحمد ربنا على اللي هو فيه فالحمد لله دائما وأبدا.
دمتم بخير، مريم نصار.

رووووعه
ردحذففصل تحفه جميل جدا 🤍🤍🤍
ردحذف