الفصل العشرون وكان ذنبي عظيم
الفصل العشرون.
تحركت بسرعة نحو الباب، وبدأت تهبط الدرج بخطوات متسارعة، بينما كان رضوان قد دخل من الباب الرئيسي.
تقابلا في منتصف المسافة.
توقفت زاد أمامه، بينما وقف هو في مواجهتها كأن الطريق كله لم يعد يتسع إلا لهما.
التقت عيناهما، وكانت في عيني كل منهما عاصفة مختلفة.
هي تحمل غضبًا وجرحًا وشكًا، وهو يحمل غضب رجل شعر أن أكثر ما يؤلمه قد أصبح سلاحًا في يد من أحب.
قال بصوت متحشرج من شدة الغضب:
ـ إنت إيه يا شيخة! إيه! جايبة القسوة والغل ده كله منين!
نظرت له زاد ببرود، وقد انتابها الشك بأن حبيبة لها يد في هذا الهجوم مثل المرة الماضية، فردت:
ـ إنت ليك عين تيجي هنا بعد اللي حصل! ويا ترى جاي بقى تقولي الكلمتين اللطاف دول من نفسك ولا حد بعتك؟
صك رضوان على أسنانه بغيظ، وشد أصابعه حتى كادت أظافره تنغرس في راحة يده، محاولًا أن يسيطر على غضبه قبل أن ينفلت منه، وقال بحدة:
ـ أنا لحد دلوقتي ماسك نفسي، ومش عايز أعمل حاجة تخليني أندم عليها. ومش جاي أشاهد جمالك، أنا جاي وعايز أعرف إنت عرفتي إزاي ومين اللي قالك الكلام الخايب ده!
ضحكت زاد بسخرية، واشتعلت عيناها بنظرة نارية وهي تقول:
ـ تقصد موضوع باباك الراجل الحرامي!
توقفت أنفاسه لثانية.
لم تكن الكلمة جديدة عليه، لكنه حين خرجت منها هي تحديدًا، بدت كأنها صفعة أخرى في وجهه.
قبض على يديه أكثر، وقال بصوت خرج من بين أسنانه:
ـ الزمي حدودك في الكلام، إنت زودتيها أوي.
ردت بحدة هي الأخرى:
ـ أنا عارفة حدودي كويس أوي يا رضوان، بس لو كلامي ده غلط كذبني وقولي محصلش وإن باباك راجل محترم ومحامي محترم زي ما قولتلي.
نظر إليها طويلًا.
للحظة، لم يرَ أمامه المرأة الغاضبة التي تقف أمامه، بل رأى كل ما كان بينهما، وكل كلمة صدق قالها لها، وكل مرة وثق فيها بها.
وتسلل إلى داخله سؤال موجع:
هل هذه هي زاد التي أحبها؟
هل يمكن لمن أحبها أن تكون بهذه القسوة معه؟
هربت زاد من نظرة العتاب في عينيه، وسألته مجددًا:
ـ كدبت عليا وقلت حاجات كتير عن والدك مش موجودة فيه من الأساس. بتحاول تجّمل نفسك في عيني وترسم صورة مش بتاعتك يا رضوان. يا ترى كام كذبة كذبتها عليا، وكل ده ليه وعلشان إيه!
ثم أكملت بانفعال:
ـ مثلت علينا دور الشرف والنزاهة وأنت جواك ما يعرفش عنهم حاجة. خططت إنت واللي اسمه صفوت علشان تدمروا سمعة بابا اللي بناها عمر بحاله.
رفع رضوان رأسه إليها، وانفجر صوته غاضبًا:
ـ إنت برده مصدقة الهبل اللي بتقوليه ده! أنا ماليش يد في اللي حصل مع والدك، وتقدري تقوليلي ليه بتربطي كل حاجة ببعض! أنا مالي بصفوت ورباب.
ـ لا، مالك ويخصك أوي. ولو على السبب هقولك! ببساطة علشان رباب قالتلي قبل ما أسيب البيت! وبكل جرأة إنك اتجوزتني علشان تنساها أصلها حب حياتك، يعني إنتِ يا زاد كنتِ لملمة جرح مؤقت ولما يفوق هيرميكي.
أغمض رضوان عينيه للحظة، وكأنه يحاول أن يمنع نفسه من الرد بما قد يندم عليه، ثم فتحهما وقال بحنق:
ـ أنا مش جاي أسمع أسباب عبيطة رباب قالت وإنتِ صدقتيها من غير حتى ما تسأليني مع إني سألتك يومها وإنتِ مجاوبتنيش يبقى خلاص دي حاجة ترجعلك بس مش من حقك تحطيني سبب لكل مصيبة بتحصل.
ثم سكت لثوانٍ، قبل أن يضيف وهو ينظر إليها بمرارة:
ـ وعلشان كده بتنتقمي مني في حبيبة، مش كده يا زاد!
ردت باقتضاب وهي تفرك كفيها بانفعال:
ـ حبيبة! اللي قالتلي كلام زي السم آخر مرة ولحد دلوقتي مش لاقية ليه تفسير! وتتهمني إتهام قاسي،وإنت طردتني بكل بجاحة، أنا لحد دلوقتي بحاول أستوعب اللي بيحصلي معاكم مش لاقياله تفسير.
اشتد الألم في وجهه، وكأنها كلما تحدثت، كانت تضيف جرحًا جديدًا إلى جرحه.
وقال بقهر:
ـ وعلشان كده سواد قلبك وصلك إنك تدمري حياتي، تكشفي سر ممكن يوجع أختي! وحتى لو حبيبة عملت إيه. كان لازم تعذريها، مكانش لازم تبعتي ليها رسالة زي دي، مكانش لازم تبعتي حاجة زي كده أبدًا، حتى لو اللي وصلك كان صح، ما يديكيش الحق إنك تدمري أختي.
عقدت ما بين عينيها باستفسار:
ـ رسالة! رسالة إيه!
أخرج رضوان هاتف شقيقته الذي جلبه معه، بعدما خطر له أنها قد تنكر الأمر، وكان ظنه في محله.
فتح الرسالة، ومد الهاتف أمام عينيها.
وما إن وقعت عيناها على الكلمات حتى تبدلت ملامحها تمامًا.
اتسعت عيناها، وتراجعت خطوة دون وعي.
لم تكن تلك رسالتها.
كانت على وشك أن تتكلم، أن تبرئ نفسها، لكنه لم يمنحها الفرصة. أغلق الهاتف، ورفع عينيه إليها، وكانت ملامحه قد تغيرت؛ لم يعد فيها الغضب وحده، بل شيء أعمق... وجع رجل أنهكه أن يدافع عن نفسه طوال حياته.
وقال:
ـ بصي يا زاد، أنا عندي استعداد إني أتحمل أي حاجة تحصل معايا، لأن الوجع متعود عليه، لأ ده أنا متربي عليه كمان. كان ممكن تيجي وتواجهيني في وشي، مش هديكي ضهري وأهرب منك، بالعكس كنت هجاوبك وهريح قلبك. بس اللي مقدرش أتحمله إن أمي وأختي يتألموا.
ثم نظر إليها، وكأن ذكر أمه أعاد إليه فقدها دفعة واحدة.
انخفض صوته، لكنه صار أثقل:
ـ أمي راحت ومبقاش ليا ولا حيلتي غير أختي. أنا مكدبتش عليكي في أي كلمة قولتها في حق أبويا، بس اللي خبيته عنك كان جزء يخصني أنا وبس، وما يخصش أي حد تاني حتى لو كان هو مين.
ابتلع غصة صعدت إلى حلقه، ثم أكمل:
ـ بس آه يا زاد، بابا كان زي ما سمعتي، ومن غير دخول في تفاصيل، سواء إن كان وقتها مجبر أو أُضّحك عليه أو أي شيء تاني، عايز أقولك إن أنا مش زيه أبدًا، وكفاية بقى إنكوا تحاسبوني على أفعاله. أنا رضوان، مش قاسم.
ارتجفت أنفاسه، ورفع يده مشيرًا إليها، لا تهديدًا، بل كأنه يحاول أن يجعلها ترى الرجل الذي أمامها للمرة الأولى كما هو، بعيدًا عن اسم أبيه.
ثم انفجر بكل ما ظل حبيسًا داخله لسنوات:
ـ أنا واحد فنيت نفسي ونسيتها، أنا قدمت كل اللي أقدر عليه. بصلي وأصوم، وباتقي ربنا حتى مع اللي بيوجعوني. بشتغل ليل نهار علشان ممدش إيدي لحد، ولا عمري مديت إيدي على حاجة مش بتاعتي.
رميت أحلامي كلها في الأرض تحت رجلي، مع إني عمري ما نسيتها. ربيت أختي بحب من قلبي، كبرتها وصرفت عليها دم قلبي، وزرعت فيها إنها بالدنيا كلها، وإنها حلمي ومستقبلي، ونجحت في تحقيق ده.
بسعى في الخير دايمًا، بحسن الظن في كل اللي حواليا. قدمت لأمي كل اللي أقدر عليه علشان تعيش مرتاحة، وأثبت لنفسي إني لا يمكن أكون قاسم.
وبرده الناس مش قادرة تنسى. حبيت رباب، منكرش، واترفضت من أهلها برضه، منكرش. بسبب أبويا. ويشهد الله إني من يومها طلعتها من حياتي، ومن يوم ما إنتِ اتكتبتي على اسمي، هي ما بتيجي على بالي لحظة، ولا يفرق معايا رباب ولا غيرها. وبرده مش عاجب!
اترفضت من المجتمع كله بسبب غلطة أنا ماليش يد فيها، لأن محدش بيختار أبوه.
أنا خلاص مبقتش قادر أتعافى من فكرة إني ضيعت سنين من عمري عشان حاجات حصلتلي، ماليش ذنب فيها غير إنها قدر، بس معرفتش أعديها، ولا عارف أعديها لحد دلوقتي، ومش عارف المفروض أعمل إيه تاني علشان أقدر أعيش حياتي.
كل اللي بدور عليه هو السلام النفسي وراحة بالي وبس. أنا مش طالب كتير.
ياريت نفهم ونعرف إن أحيانًا الدنيا بتحطنا في خانة إحنا مش راضيين عنها، لكن رغم كل ده مش بنيأس، بنحاول وبنعافر علشان نثبت نفسنا للعالم إننا نقدر نتغير، ونطلع من الخانة دي، ونظهر بصورة أحسن.
مش المفروض الناس تفضل تجلدنا وتعايرنا بالماضي.
ارحمونا شوية... إحنا في النهاية بشر.
ساد الصمت.
كان رضوان يلهث قليلًا، وصدره يعلو ويهبط بعنف، وكأن الكلمات لم تخرج من فمه وحده، بل انتُزعت من سنوات كاملة قضاها وهو يحاول أن يثبت للعالم أنه ليس مسؤولًا عن خطيئة لم يرتكبها.
وقف أمامها، وقد انكشف كل شيء.
لم يعد هناك شيء يخفيه.
ولا سر.
ولا تبرير.
ولا صورة يحاول تجميلها.
فقط رضوان... كما هو.
التقط أنفاسه بعدما ألقى كل ما في جعبته. لم يهدأ جرحه، بل ازداد من ألمه، لكنه لم يرغب في إظهار ضعفه أمامها، ولا أراد أن تعتقد أنه يستعطفها لكي تعود معه أو يصححا مسار حياتهما.
كانت زاد قد تأثرت بما سمعته، ولم تستطع إنكار ذلك. ظلت تنظر إليه، وفي عينيها اضطراب واضح، لكنها لم تنطق بكلمة واحدة لتواسيه أو تريح قلبه.
فقط أبعدت عينيها عنه، وظلت صامتة.
مسح رضوان وجهه بيديه، وشعر باختناق شديد. للحظة، بدا كأنه نادم على أنه قال كل ذلك، ليس لأنه كذب، بل لأنه كشف أمامها جانبًا لم يسمح لأحد أن يراه.
ثم استعاد تماسكه.
لم يسمح لضعفه أن ينتصر.
وقطع صمتها قائلًا:
ـ أنا مش جاي أقولك ارجعي، ولا جاي أطلب منك إنك تسامحيني على حاجه أنا معملتهاش. لأني مأذتكيش في حاجة، أنا بس حبيت أوضحلك الحقيقة عشان تعرفي إني مش قاسم. أنا رضوان، وبس.
ثم أكمل بعد لحظة من الصمت:
ـ وزي ما قلت، أنا مستعد أتحمل أي حاجة، لكن اللي مش هتحمله إنك تأذي أختي مرة تانية. وأتمنى تكوني ارتحتي ووصلتك إجابة على السؤال اللي بيدور في دماغك. إنتِ دلوقتي عرفتي عني كل حاجة. أنا فعلًا ممعيش شهادة وشغال حداد، زي ما إنتِ عارفة، بس كل ده ما يفرقش معايا. أختي... اللي يفرق معايا أختي.
وبحذرك إنك تفكري تبعتلها حاجة تانية. واحمدي ربك إني أنا اللي شفت الرسالة، وإلا قسمًا بالله، لو كانت حبيبة شافت الرسالة أو عرفت اللي حصل، ما كانش هيحصلك خير.
نظرت إليه زاد، فتغيرت ملامحها شيئًا فشيئًا، وقد زادها حديثه ضيقًا وغضبًا. لم تكن بحاجة إلى شفقته، ولا إلى أن يتعامل معها وكأنها الطرف الذي يحتاج إلى تفسير أو تبرير، والأهم من ذلك أنها لم ترسل الرسالة من الأساس.
فقالت بضيق:
ـ قولتلك أنا مبعتش رسايل لأختك. عايز تصدق أو لأ، فإنت حر. وبص يا رضوان، بعد كل كلامك ده، أحب أوصلك بس إن أنا لا مهتمة بأختك، ولا بيك، ولا بأي حاجة تخصك. والدك حرامي أو راجل عصامي، برضه ما يخصنيش؛ لأن ببساطة كل حاجة حصلت كانت غلط من الأول.
أنا معاك إن كل اللي حصلك قدر، لكن مش على حساب حياتي أتحمل قدرك. أنا واحدة بتتكلم خمس لغات، خريجة أمريكان، بسافر بلاد كتير، لما في النهاية تكون متجوزة من واحد ممعاهوش الإعدادية، يبقى ظلم.
لما نخلف طفل ويسأل: مين جده؟ أنا هجاوبه بكل فخر، إنما إنت هتحط عينيك في الأرض، مش هتقدر ترد عليه في أبسط حقوقه اللي من حقه إنه يعرفها. هيكون ظلم. ظلم ليك وليا ولأولادك.
ياريت ما تبصلهاش من زاويتك إنت؛ لأن كل اللي إحنا فيه دلوقتي بسببك. أنا انتهيت بسبب جوازي منك، اللي هو أكبر غلطة في حياتي، واللي بابا أجبرني عليه، ولحد دلوقتي كلنا بندفع تمنها.
ـ أنتِ طالق.
خرجت الكلمة من فمه بثقل الجبال، لكنه شعر في تلك اللحظة براحة عميقة رغم الألم. كانت الخيانة أقسى مما تخيل، إلا أنه أدرك أن هذا الطريق لم يعد يحتمل المزيد.
تجمدت زاد في مكانها، واتسعت عيناها، كأنها لم تتوقع أن تسمع الكلمة رغم أنها كانت تطلبها.
أما هو، فبقي ثابتًا، رغم أن قلبه في داخله كان يضرب بعنف كأنه يرفض ما نطق به لسانه.
لقد قالها.
الكلمة التي لم يتخيل يومًا أن تخرج منه تجاهها.
والأغرب أنه، وسط الألم الذي مزق صدره، شعر براحة موجعة؛ راحة رجل وصل أخيرًا إلى نهاية طريق ظل يقاتل فيه وحده.
خفض عينيه للحظة، ثم رفعهما إليها، وقد استقر في ملامحه هدوء غريب أخافها أكثر من غضبه.
لم تسمح كرامته لوجعه أن يظهر، لكن عينيه كانتا تحملان خيبة رجل أدرك أن كل ما فعله لم يكن كافيًا.
صمتت زاد للحظات، وظلت تحدق فيه كأنها تحاول استيعاب ما سمعت.
هذا ما كانت تريده.
أليس كذلك؟
كانت تطلب الخلاص، وتراه نهاية الطريق.
فلماذا ارتجف قلبها الآن؟
لماذا شعرت بغصة حادة احتلت حلقها، وكأن الكلمة التي انتظرتها طويلًا لم تكن بهذا اليسر الذي تخيلته؟
لم تستطع مواجهة عينيه، وقالت بصوت هادئ حاولت أن تجعله ثابتًا:
ـ كده أحسن. أحم، أحسن حاجة إنك قولتها. انتهينا.
ظهرت على ثغره ابتسامة يأس صغيرة وموجعة، وتحجرت دمعة عند طرف عينه، لكنه لم يسمح لها بالسقوط.
وقال:
ـ كده أنا صلحت الغلط، وتقدري تلحقي تصلحي كل اللي ضاع من حياتك بسببي. رجعتك حرة من تاني. وأتمنى إنك تلاقي المثقف المتعلم اللي معاه لغات زيك، ابن ناس مفيهاش غلطة، يشرفك. وتقدري إنتِ وهو تجاوبوا على ابنكم وراسكُم مرفوعة.
إنتِ مخسرتيش حاجة بجوازك مني، أنا اللي خسرت كل حاجة. خسرت الدنيا كلها، والشمس اللي كانت مدفية حياتي وبتشق طريقي. خسرت أمي.
عندها انخفض صوته، وانكسرت ابتسامته تمامًا.
كان يستطيع أن يخفي غضبه، لكنه لم يستطع أن يخفي وجعه.
وخُيّل إليه أن كل ما فقده في حياته وقف أمامه دفعة واحدة؛ أبٌ ترك خلفه اسمًا يطارده، وأمٌّ رحلت، وأختٌ أصبحت كل ما يملك، وامرأة أحبها حتى ظن أنها ستكون بيته الأخير، فإذا بها تنظر إليه وكأن حياته كلها خطأ.
استدار قليلًا، وكأنه يريد أن يلتقط أنفاسه قبل أن يخرج، وفي أعماقه همس قلبه:
"وما لي ذنبٌ إن كان والدي مذنبًا
فهل تُلام الروحُ إن أذنبتها الدنيا؟
أحمل الأوزارَ وحدي، وما لي قوة
غير الصبر، إذ خانني الأحبابُ والأسى.
كانت تلك الكلمات صدىً لما أثقله في قلبه، لا أكثر.
فليس الفقر عيبًا إذا كان يجلب معه القناعة والنقاء، وليس الغنى الحقيقي غنى الجيوب، بل غنى الروح. فالفقير الذي يحمل الحب والصدق في قلبه قد يكون أغنى من ثري يملك كل شيء، ويفتقر إلى المعاني التي تجعل للحياة قيمة.
استدار رضوان وغادر الفيلا.
لم يلتفت خلفه.
كان يمشي بخطوات ثابتة، بينما شيء داخله كان ينهار مع كل خطوة يبتعد بها عنها.
وحين أغلق الباب خلفه، شعرت زاد فجأة بأن المكان أصبح أوسع مما ينبغي... وأشد فراغًا مما يحتمل.
ظلت واقفة في مكانها، تحدق في الباب الذي خرج منه، بينما كان صدرها يعلو ويهبط من شدة الصدمة، وكأن عينيها تنتظران عودته رغم أن عقلها يعرف أنه لن يعود.
ثم جلست على أقرب كرسي، واستندت إلى ظهره ببطء.
لم تبكِ.
لم تستطع.
فقط وضعت يدها على صدرها، محاولة أن تفهم ذلك الخفقان المضطرب الذي لم تعرف له تفسيرًا.
كانت قد قالت: انتهينا.
لكن قلبها لم يكن يبدو مقتنعًا.
ظل السكون يحيط بها، حتى قطعته نغمة رسالة نصية وصلت إلى هاتفها من المحامي، ردًا على ما أرسلته إليه حين كانت بالأعلى.
نظرت إلى الهاتف، ثم أغلقته بإهمال، وعادت إلى صمتها من جديد.
لكن هذه المرة، لم يكن الصمت حولها فقط.
كان يسكنها هي.
كانت حياة رباب مع عزت قد تحولت إلى كابوس مستمر بعدما كشف لها عن وجهه السيئ. عاشت حياة بائسة وخائفة منه، بعدما أصبح يهددها ويعنفها باستمرار.
وفي معظم الأوقات، كانت تفضل الجلوس وحيدة في غرفتها، تشاهد التلفاز بملل واضح، إلى أن شعرت برغبة في الذهاب إلى المرحاض. نهضت بوهن واتجهت إلى خارج الغرفة، لكنها توقفت حين استمعت إلى صوت عزت يتحدث في الغرفة المجاورة.
اقتربت من باب الغرفة بحذر شديد، وأصغت إليه وهو يضحك بصوت عالٍ قائلًا لمن يتحدث معه على الهاتف:
ـ بس كده، من عينيَّ، ربع ساعة وهتلاقيني قدامك يا جناب السفير. مع السلامة يا باشا.
ثم أغلق هاتفه، لكنه لمح فجأة خيال قدميها أمام باب الغرفة. حك ذقنه متوعدًا، ثم اتجه نحو الباب وفتحه فجأة، ليجدها واقفة تحدق به بغيظ.
سألته بنفور:
ـ بتكلم مين ومبسوط كده ياعزت؟ وقافل على نفسك ليه؟
دفعها من كتفها بقسوة قائلًا:
ـ وإنتِ مالك بكلم مين؟ واقفة تتصنتي عليَّ يا رباب!
ثم أشار إليها محذرًا:
ـ ومش هقولك تاني، لو كررتيها وشوفتك واقفة بتتجسسي عليَّ تاني، هكسرلك رجليكِ اللي بتاخدك لطريق اللي يروح ما يرجعش دي.
ردت عليه بجرأة ممزوجة بالألم:
ـ يعني إيه؟ إنت هتفضل تقرفني في عيشتي وتعمل معايا كده؟ دي مش عيشة، طلقني وريحني منك يا شيخ.
لم يتحمل عزت جرأتها، فضربها بقوة على وجهها، وانهال عليها بالتهديد والشتائم، ثم تركها تعاني من ألمها، ونزل مسرعًا لمقابلة الرجل الذي كان يتحدث معه على الهاتف.
---
مشى رضوان بعيدًا عن فيلا زاد، غير نادم على قراره بطلاقها. كان قلبها القاسي وغدرها يجعلانها، في نظره، غير جديرة بحبه. نعم، أحبها بكل جوارحه، لكن كلماتها القاسية وإهانتها له تركتا في قلبه طعنة لم يكن قادرًا على تجاهلها.
استقل سيارة أجرة وانطلق لزيارة حسين في السجن. وبعد أن اطمأن عليه، واساه حسين في وفاة أمه.
قال حسين بصوت مليء بالحزن:
ـ الله يرحمها، كانت ست طيبة.
رد عليه رضوان بحزن دفين:
ـ شكرًا يا حسين بيه. المهم إنك بخير.
ليرد حسين متمنيًا:
ـ أنا بخير يا ابني، بس قلقان على زاد وهي لوحدها وممعهاش حد. هي مالهاش غيرك يا رضوان.
نظر إليه رضوان، وظل يفكر: هل يخبره أنه طلقها، أم يصمت حتى يخرج من أزمته؟ ففضّل الصمت وعدم إخباره، على الأقل لفترة وجيزة، ثم يخبره حتى لا ينزعج أكثر. حرّك رضوان رأسه له ليطمئنه ولا يحمل همًا.
ثم تابع قائلًا:
ـ متشيلش هم حاجة يا حسين بيه. هي بخير. خلينا في المهم، عايز أسألك عن صفوت الدويقي، اتقابلتوا إزاي وأتعاملت معاه من إمتى؟
تنهد حسين بعمق، وبدأ يحكي:
من شهرين تقريبًا، جالي تليفون من توفيق، وقال إن في جزار عايز يتعامل معانا، وهياخد أول مرة كمية محدودة يجرب جودة اللحوم بتاعة مزرعتنا، ولو عجبته هيطلب كمية كبيرة ويوزعها بمعرفته، لأنه يعرف عملاء كتير.
أنا وافقت، لأن ده رزق وجالنا. معرفش مين صفوت ده، ولا سمعت عنه قبل كده. المهم إنه عجبه منتجنا، واتصل عليَّ بنفسه يشكرني.
وقبل الحادثة دي بيومين، كلمني وطلب مني كمية كبيرة. قلت له: أنا مسافر دلوقتي بره مصر ليلة وراجع.
قالي إنه مستعجل.
قلت له: خلاص، أنا هبلغ توفيق، وهات عربياتك تاخد الطلبية من المزرعة بعد ما يتم الكشف عليها وختمها من السلخانة.
وبعدها تم كل شيء كالعاده، لكن حصل اللي حصل... ومش قادر أفهم.
سكت لحظة، ثم تابع، وقد بدا العجز واضحًا في صوته:
ـ اللي هيجنني إن توفيق قال إنهم حمّلوا كل الطلبية بعد ما اتختمت، وحطوها في العربيات اللي اكتشفوا بعدها إنها نفسها العربيات اللي كان فيها اللحوم الفاسدة.
وبعدها ساب المزرعة وراح يخلّص طلبية مع عميل تاني.
وبعد حوالي ساعتين، اتفاجئ إن الشرطة في المزرعة، وبعد التفتيش لقوا كمية كبيرة من اللحوم الفاسدة في المخزن.
لأ... ومش بس كده، دي كمان كانت مختومة بختم مزور.
صمت حسين للحظة، ثم أضاف بحيرة:
ـ في حد بيلعب لعبة قذرة عشان يوقعني. واللي مصعب الموضوع إني ما عنديش فكرة مين اللي بيعمل كده، وليه.
رد رضوان بحدة:
ـ لا، أنت عارف مين اللي بيعمل كده.
تعجب حسين من كلام رضوان، وسأله:
ـ وهعرف منين؟ ولو عارف هسكت ليه؟ عرفني مين هو يا رضوان.
قال رضوان بعيون مليئة بالغضب:
ـ أظن اللعبة اللي بتتعمل عليك، وإنت ليك يد فيها، علشان إنتوا عايزين تورطوني بعد ما أمي اتقتلت.
ثم أضاف بحزم، وسط ذهول حسين الذي لم يفهم سبب هجومه وتغيره فجأة:
ـ ـ بس أنا مش هسكت. مش إنتوا عايزينني أتغير؟ خلاص... ورحمة أمي، لا تشوفوا رضوان تاني خالص.
كان في صوته إصرار حاسم، وكأن قراره قد اتخذ بالفعل. لم يعد مستعدًا للانتظار أو التسامح، وكان على استعداد لفعل كل ما يلزم لكشف الحقيقة والانتقام لأمه.
---
وفي وكرهم الخفي، تجمع الأشرار حول طاولة كبيرة، والجو مشحون بالتآمر والخيانة.
جلس عزت بجوار صفوت، وعلى وجهه نظرات جشعة وطمع واضح، بينما كان صفوت يتظاهر بالهدوء، رغم قسوته التي عُرف بها.
أما باسل، فكان يجلس وهو ينفث دخان التبغ، وقد بدا عليه التوتر منذ ذلك الحادث. فهو نفسه الذي حاول التعدي على حبيبة في ذلك اليوم، بعدما وضع له العقلان المدبران خطة محكمة للقضاء على رضوان، ودفعه إلى تطليق زاد.
وبالقرب منه، جلس مازن يتنقل بنظراته بين الحاضرين، وعلى وجهه ابتسامة خبيثة.
وفي زاوية الغرفة، وقف نجيب المالكي، العقل المدبر الأول للمخطط، وإلى جواره نجله مازن، شريكه في كل ما يُدبّر.
كان نجيب يكره شقيقه حسين بشدة، ويزداد حقده كلما تذكر كيف كان حسين يسبقه بخطوات دائمًا.
ومنذ أن رفض حسين تزويج ابنته زاد لمازن، بدأ نجيب ونجله يخططان لخراب حياته وحياة ابنته. كانت خطتهما أن يوهموا زاد بالحب عن طريق باسل، ثم يستولوا على ثروتها، لكن حسين كان أذكى مما توقعا؛ فقد زوجها لرضوان قبل أن يتمكنا من تنفيذ مخططهما كاملًا.
ضاعف ذلك غضب نجيب، فأعاد باسل من خارج البلاد، وبدأ يراقب حياة رضوان بدقة، حتى عرف عنه كل ما يمكن أن يستغله.
وخلال تلك الفترة، التقى نجيب بعزت، الذي كان يعمل في الورشة، وأغراه بالمال لتحقيق مصالحه. ومن خلاله وصل إلى صفوت.
وحين علم أن صفوت يعمل جزارًا، وجد فيه الأداة المناسبة لتنفيذ آخر أوراقه: الإيقاع بحسين، وتشويه سمعته، والزج به في السجن.
وبصوت حازم ومليء بالشر، قال مازن:
ـ مالكم؟ خايفين من اللي اسمه رضوان ده ليه؟
أجابه باسل بقلق:
ـ الخوف من أخته يا مازن بيه. إنت مش سامع عزت بيقولك رضوان عرف كل حاجة من أخته! ودي لو وصفتني ليه، أو هي اتعرفت عليَّ، هنروح في داهية.
أردف مازن بحنق:
ـ اسمها هتروح إنت في داهية، مش هنروح! وكل اللي إحنا فيه دلوقتي بسبب غبائك، للمرة التانية بتضيعنا. ولا نسيت؟
ثم سكت مفكرًا وهو يحتسي شرابه، قبل أن يقول بترقب:
ـ بس لو البنت دي هتسبب خطر علينا، إحنا ممكن نتخلص منها ونرتاح من وجع الدماغ.
اندهش عزت من جبروت مازن، وقلب أنظاره بينهم بقلق، ليردف نجيب أخيرًا:
ـ بطل تفكيرك ده اللي هيودينا في داهية ويورطنا يا مازن. إنت عارف إننا ملناش في طريق القتل والدم.
تأفف مازن، فلم يعجبه حديث والده، ليكمل نجيب متسائلًا:
ـ ها يا عزت، وصلت لإيه مع رضوان؟ بلغك إنه وصل لمعاذ ولا لسه؟
أردف عزت:
ـ اطمن يا باشا، رضوان مش هيوصل لمعاذ أبدًا.
أشار له نجيب أن يكمل، فابتلع عزت لعابه متوجسًا، ثم تابع:
ـ أنا محاوط رضوان من ساعة ما قالي على كل حاجة يعرفها، ونبهت عليه ميقولش لأي مخلوق علشان الكلام بيتنقل، وممكن لو حد ليه يد في الموضوع، ولو عرف هياخد حذره. وكلفني إني ألاقيله معاذ ده من تحت الأرض، وأنا نيمته في الخط وقلت له بدور عليه، ولما يسأل تاني يكون معاذ طلع بره مصر، زي ما مازن باشا قال.
ثم نظر إليهم جميعًا، وكأنه يطلب الإذن في إضافة ما يدور بخلده. سمح له نجيب بإشارة من يده، فأسرع عزت قائلًا:
ـ أنا بس كنت عايز أقول إن رضوان ولا هيعمل حاجة، أنا بسايره بس لحد ما ينسى الموضوع. وعنده أخته حبيبة دي بالدنيا كلها، ولو حبيبة عرفت إن رضوان بينخور ورا اللي قتلوا أمهم، ساعتها هي هتمنعه.
ـ ياسلام، وإيه اللي مخليك متأكد كده؟
كان هذا مازن، الذي لم يكن مقتنعًا بحديث عزت، فسأله، ليجيبه عزت:
ـ لأنهم مالهمش غير بعض، وأنا عارف رضوان أكتر من نفسي بيحب أخته قد إيه! دي حبيبة نقطة ضعفه.
أسرع عزت ليقطع تفكير مازن، فهو لا يريد أن يختطفوا أحدًا أو يقتلوا أحدًا، قائلًا:
ـ بس إحنا مش هينفع نفكر حتى نخطف حبيبة، علشان لو عملنا كده هنكون بنكرر غلطتنا الأولى، وممكن توصل ساعتها بجد لحبل المشنقة.
سأله مازن بغضب:
ـ عندك حل تاني يا أبو العريف؟
انتفض عزت وقال متلعثمًا:
ـ أنا بقول يعني لو... لو رضوان فضل ينخور كده ورانا! اتصال صغير حد يهدده بأن الدور هيكون على أخته حبيبة، ساعتها هيخاف وينسى الموضوع خالص.
اقترب نجيب من الأمام، جالسًا على كرسيه، لينهي الجدال بحسم:
ـ خلاص، موضوع رضوان وأخته ده مش مشكلتنا دلوقتي، لأنه ما بيشكلش خطر علينا. وكده وكده معاذ مسافر بكرة بالليل بره مصر ومش راجع دلوقتي.
والفيلا اللي قابل فيها باسل الست اللي ماتت كانت متأجرة أسبوع واحد، ودلوقتي مفيهاش مخلوق ولا كاميرات شغالة.
أنا مظبط لكل حاجة، محدش يقلق. أنا كل اللي يهمني دلوقتي ،نخلص من موضوع حسين.
ثم نظر إلى صفوت، الذي كان يتابع مشهدًا عبر هاتفه، منشغلًا به وكأنه غير حاضر معهم. قام نجيب واتجه نحوه، ثم وقف خلفه، ليجده يشاهد عرض أزياء للنساء ويتفحصهن بعينيه.
اقترب نجيب من رأس صفوت، وهمس في أذنه ساخرًا:
ـ عجبك الفستان ده يا صفوت؟ أحجزهولك؟
انتبه صفوت وانتفض، ليجد الجميع يضحكون عليه، حتى مازن الذي يحمل الشر في عينيه.
تكلم صفوت بتوتر وهو يغلق الهاتف ويضعه في جيبه:
ـ نجيب بيه! أنا، أنا كنت بتفرج على حاجة تطري القعدة الناشفة دي.
ثم استرسل ممازحًا بسماجة:
ـ إنت عارف إني جزار، يعني كل شغلي في اللحمة.
لم يضحك سوى عزت، ثم سكت مسرعًا بعدما التقت به نظرات الجميع. ابتلع صفوت لعابه بحرج، وأكمل نجيب حديثه وهو يعود إلى مقعده:
ـ عملت إيه مع الرجالة اللي حطوا اللحمة الفاسدة في مخزن المزرعة؟
أجابه صفوت:
ـ كله تمام يا باشا. الرجالة بعد ما طلعوا من هناك خدوا العربيات على ورشة دهانات يغيروا لونها، واهي تتركن هناك شوية. ونمر العربيات ملعوب فيها واتصلحت، وكل شيء تمام التمام. والرجالة راضيناهم بأعلى سعر، يعني شاريهم وضامنهم.
حرك نجيب رأسه وهو يفكر. كان كل شيء يسير وفق ما خطط له، ولم يتبقَّ سوى إنهاء علاقة زاد بذلك الرضوان. وسيفعل نجيب كل ما بوسعه حتى ينفصل الاثنان، دون أن يعرف أنه نجح بالفعل في تفريقهما بعدما دس السم في ذهن ابنة أخيه.
ابتسم نجيب وهو يتذكر كيف أباح لها بسر والد رضوان، حتى تكتشف أنه لعوب وكذوب، وكيف أرسل لحبيبة الرسالة النصية من هاتفها، ثم حذفها منه قبل مغادرة منزلها.
وسيظل خلفهما حتى يقضي على تلك العلاقة التي سببت له المتاعب.
تنهد طويلًا، ونظر أمامه بعينين حادتين، وهو يرسم مستقبله في ذهنه. حسين سيُسجن، وزاد ستتدمر حياتها.
وسيعرف قريبًا من سيكون المنتصر.
اجتمع الأشرار على الشر، وكل واحد منهم يحمل في قلبه نية الانتقام والدناءة. كانت خططهم مدروسة، بينما بدا الأمل في العدل بعيد المنال.
---
ما زالت حبيبة جالسة في البيت وحدها، تحاول التأقلم مع فراق أمها، لكن الألم كان لا يزال يعصف بقلبها. لم تستطع نسيان ما فعله معها معاذ. حاولت الاتصال به، لكن هاتفه كان مغلقًا.
تذكرت النادي الذي يقضي فيه وقته من حين إلى آخر، خاصة كل يوم أربعاء، واليوم هو الأربعاء نفسه. نظرت إلى الساعة، وشعرت بالغضب.
نهضت بسرعة، وارتدت ثياب الخروج، ثم غادرت المنزل على عجل. استقلت سيارة أجرة وتوجهت إلى النادي.
دخلت وعيناها تبحثان عنه، حتى رأته واقفًا هناك، يلوح لأصدقائه مودعًا إياهم. لم تعرف على ماذا يودعهم، ولم تهتم لذلك؛ فكل ما يهمها هو أخذ الثأر.
اقتربت منه بغضب وعزم. وما إن التفت معاذ ورآها حتى بدت على وجهه الدهشة والارتباك.
ـ حبيبة!
دون تردد، صفعته على وجهه أمام الحضور، ولم تهتم بنظراتهم، وقالت بصوت عالٍ، يقطر غضبًا:
ـ أيوه حبيبة، حبيبة اللي ضحكت عليها.
نزع معاذ يده من على وجهه، ونظر حوله مرتبكًا، ثم أمسك بذراع حبيبة محاولًا إبعادها عن ذلك المكان حتى يتمكن من الحديث معها، لكنه فشل. أزاحت يده عنها بكراهية بالغة، وهي تكمل بدموع منسابة:
ـ ضحكت عليَّ وأنا صدقتك، غدرت بيا، ومحستش إنك ممكن تغدر يوم من الأيام. فكرتك راجل محترم، بس للأسف طلعت دون وواطي.
قاطعها قائلًا:
ـ لو سمحتي اهدي يا حبيبة واسمعيني.
ـ اسمعك! هتقولي إيه! أقولك أنا!
وأكملت بغصة جرحت قلبها:
ـ ماما ماتت يا معاذ، ماتت بسببي وسببك.
مسحت دموعها، وأكملت بحقد واضح:
ـ مين الناس دي يا معاذ! وإيه مصلحتك معاهم؟ هما اللي طلبوا منك تبعتني هناك! كان نيتهم يقتلوني أنا! اتكلم.
ابتلع لعابه، وأكمل بتوجس:
ـ إنتِ مجنونة! إنتِ عايزة تلبسيني مصيبة. أنا مش فاهم إنتِ بتتكلمي عن إيه!
ـ عن الناس اللي إنت بعتني ليهم.
ـ أنا بعتك تروحي لبابايا الشركة، وإنتِ مروحتيش.
ـ كذاب! إنت وصفتلي العنوان في المعادي.
ـ أنا مقولتش المعادي، أنا قلتلك الزمالك. يبقى إنتِ رحتي عنوان غلط. ولو مش مصدقة، تعالي معايا شوفي بنفسك.
صرخت به:
ـ أجي معاك تاني! وأكرر نفس الغلط وأخسر حياتي المرة دي؟
أوقفها بصوت حاسم:
ـ بقولك إيه بقى؟ لمي نفسك ووطّي صوتك وامشي من هنا بدل ما أطلب لك الأمن. إنتِ رحتي فين ولمين في اليوم ده، أنا معنديش علم ومعرفش حاجة. ومن دلوقتي كل حاجة بينا تنسيها. فاهمة ولا لا؟
ظلت تنظر إليه في صدمة، غير مصدقة كيف تحول هذا الرجل إلى ذئب بشري يحمل قلبًا قاسيًا وإجراميًا خلف وجهه الملائكي.
ابتلعت ريقها بحسرة، وقالت قبل أن تتركه وتذهب:
ـ اللي بينا انتهى قبل ما يبدأ من يوم غدرك ليا، بس عايزة أقولك أنا مش مسمحاك، وذنب ماما اللي ماتت غدر في رقبتك ليوم الدين.
وبدعي عليك إن صورة ماما وهي غرقانة في دمها تفضل مرافقة وشك ليل ونهار يا معاذ لآخر العمر. والحقيقة مسيرها تبان، وحسبي الله ونعم الوكيل فيك وفي اللي مشغلك لحسابه.
بعدما انتهت من كلامها، والذي فزع قلب معاذ، تركته واقفًا مكسوفًا من نفسه. ابتعدت عنه، بينما ظل ينظر إليها بحزن وقلة حيلة، ثم همس بصوت مكتوم:
ـ سامحيني يا حبيبة، أنا بجد حبيتك وعمري ما هنساكِ، بس غصب عني.
ظلت كلماتها تتردد في رأسه بعد أن غادرت، فخفض عينيه للحظات، ثم أطلق زفرة طويلة.
كان يعرف أن ما حدث لم يكن مجرد نهاية علاقة... بل ثمنًا دفعه الجميع، كلٌّ بطريقته.
---
بعدما خرج رضوان من زيارة السجن، ظلّ يسير لعدة خطوات في صمت، وكلمات حسين لا تزال تتردد في رأسه، قبل أن يخرج هاتفه ويتصل بعزت..
وعندما رأى عزت رقم رضوان على الشاشة، ارتبك وتغير لون وجهه.
سأله مازن بتعجب:
ـ مالك؟ مين بيتصل؟ خلا وشك أصفر كده؟
رد عزت بتوتر:
ـ ده رضوان.
نظروا إلى بعضهم جميعًا بقلق وتوتر. ثم قال نجيب بحذر:
ـ رد عليه، شوفه عايز إيه، بس افتح الاسبيكر خلينا نسمع. يمكن نطلع منه بمعلومة.
بخوف واضح، فتح عزت الخط ووضع الهاتف على مكبر الصوت، لينصت الجميع بتركيز، منتظرين ما سيلقيه رضوان.
ظل رضوان صامتًا للحظات، ثم نظر أمامه طويلًا، وكأن شيئًا داخله قد حسم أمره أخيرًا.
لقد قضى عمره كله يحاول أن يثبت أنه يستحق الاحترام، مرةً بفقره، ومرةً بنسبه، ومرةً بماضي أبيه الذي لم يختره.
لكن كفى.
لن ينتظر بعد اليوم أن يمنحه أحد مكانًا يستحقه، ولن يسمح لأحد أن يقرر بالنيابة عنه إلى أين يذهب.
رفع الهاتف إلى أذنه وقال بثبات:
ـ إنت صح يا عزت.
تجمدت الوجوه للحظة، والجميع ينتظر بتوتر ما سيقوله رضوان بعد ذلك.
ـ كنت دايمًا تقول الفرصة بتيجي مرة واحدة ومش لازم نضيعها.
ـ مالك يا رضوان؟ أنا مش فاهم حاجة.
ـ أنا نويت ألعب مع الناس التقيلة. كفاية فقر وبهدلة بقى.
الجملة بسيطة، لكن ما وراءها لم يكن بسيطًا أبدًا.
فمنذ تلك اللحظة، لم يعد رضوان يريد أن يظل مجرد رجل يحاول النجاة من الحياة... بل قرر أن يدخل لعبتها، وأن يتعلم قواعدها بطريقته
اتسعت عيون الجميع بدهشة، وكأن كلمات رضوان جاءت لتفتح أمامهم بابًا لم يتوقعوه. وسأل عزت بفضول:
ـ هتعمل إيه يا رضوان؟
بصوت حازم وثقة، قال رضوان:
ـ أول حاجة نكسب بنط عند حسين المالكي، وهو بيثق فيَّ، وهخليه هو بنفسه يطلب مني إدارة شركته.
تجمدت وجوه الجميع من الصدمة، وكان الأكثر دهشة عزت، الذي سأله بتعجب:
ـ تدير الشركة! بس إنت هتعرف؟
أجاب رضوان بجزم:
ـ العلم في الراس يا عزت، مش في الكراس. أنا ناوي أوصل واعدي.
ـ أيوة يا رضوان، بس متزعلش مني في اللي هقوله، إنت لا متعلم ولا معاك شهادة، وأقل اجتماع في الشركات اللي زي دي بيبقى فيه لغات وحاجات معقدة إحنا منعرفهاش. حتى لو فرضنا وحصل، بس أفرض كمان إن حسين بيه رفض! هتعمل إيه؟
صمت رضوان مفكرًا. فعزت معه حق في هذه المرة؛ فهو لم يعرف شيئًا عن إدارة الشركات، وقد يفشل في بداية الأمر.
ثم رد بتفكير:
ـ مش عارف يا عزت، اللي أعرفه إني عايز أوصل. عايز أطلع من بؤرة الفقر والذل. نفسي أدوس على الناس زي ما داسوا عليَّ وذلوني.
بعدما أنهى رضوان المكالمة، ابتسم نجيب، وسرت على وجهه علامات السعادة. بدا له أن رضوان يسهل عليهم الطريق نحو الانتقام القادم.
تفاجأ مازن من بهجة أبيه، واقترب منه ليسأله بصوت خافت:
ـ بتفكر في إيه يا بابا؟
أجابه نجيب، والشر يتلألأ في عينيه:
ـ رضوان.
ـ ماله؟
ـ لازم أقابل رضوان.
صُدم مازن، متسائلًا:
ـ إيه؟ طب ليه؟
ـ بكرة تعرف.
ـ بابا، إنت مش لازم تثق في رضوان ولا عزت. شغلنا مفيهوش ثقة، وبصراحة، خايف يكون الواد رضوان ده مراقبنا، ودي حركة منه علشان يوقعنا.
ـ متبقاش غبي يا مازن. إحنا اللي مراقبين رضوان، وعارفين كل تحركاته، وعارف كمان هو فين دلوقتي.
استراح قلق مازن قليلًا، وسأل:
ـ أممم، بس تفتكر إنه هيرضى يقابلك بعد آخر مرة لما بهدلته في الورشة؟
ـ المسامح كريم يا مازن، ورضوان قلبه أبيض، مش كده ولا إيه؟
ضحكا سويًا بصوت مرتفع، فقد بدا لهما أن انتصارهما قد اقترب.
مضت الأيام، ولم تعرف زاد سبب تأخير زيارتها الأسبوعية لوالدها، سوى ما أخبرها به عمها. وحين وصلت، أخبرتها الخادمة بأن عمها ينتظرها بالأسفل.
هبطت إليه، وجلست معه، وما إن أخبرته بانفصالها عن رضوان، حتى أخفى نجيب فرحته خلف ملامح القلق والدهشة، مرتديًا قناع العم الحنون الذي اعتادته زاد.
كانت تحكي له بحزن، وهي تظن أنه يحبها مثل أبيها، وأنه تفهّم رفضها لابنه، فلم تكن تعلم أنه يتسلل إلى حياتها بهدوء، ليفسدها دون أن يثير شكوكها.
وبعد أن انتهت من حديثها، نصحها ألا تخبر والدها بما حدث حتى يخرج من محنته على خير، مؤكدًا أنه يحمل همها ولا يريد أن يزيد قلقه عليها.
استجابت زاد لكلامه كعادتها، وحين فتح لها ذراعيه، ارتمت في حضنه مطمئنة، بينما لمعت عيناه بمكر وهو يفكر في خطوته التالية.
حان الوقت ليذهب إلى رضوان... ويؤدي أمامه دور العم الذي جاء ليؤازره بعد موت أمه.وفجأة الخبر كان بمثابة صدمة له. ركب السيارة، وفي طريقه أخذ يرتب حديثه، حتى لا يخطئ في شيء يثير الشك داخل رضوان. فحتماً يتسم بالذكاء، لكن نجيب لم يكن ينسى أن رضوان لم يكن خصمًا سهلًا منذ البداية.
فقد سبق أن حاول كسر هذا الزواج قبل أن تتعقد الأمور، ولم ينسَ ما حدث يوم ذهب إلى الورشة ليطلب من رضوان أن يطلّق زاد.
فلاش باك ـ بعد زواج رضوان بأيام قليلة.
كان رضوان يقف داخل الورشة...وهو يطرق على الحديد بلا رحمة، والشرر يتطاير أمامه:
ـ إنت بقى جاي وتاعب نفسك علشان تقولي الكلمتين دول! طيب، ما أنا عارف الفرق بيني وبين زاد كويس. حد قالك إني ما عنديش خبر ولا إيه؟
ليرد نجيب متهكمًا:
ـ بتتريق؟ الظاهر إنت مش مستوعب مين اللي واقف قدامك، لكن هقول إيه، هتفضل طول عمرك إنت وعينتك تتعامل بحقد دفين مع أسيادك.
كان رضوان يطرق بقوة، لكنه توقف عند سماع آخر كلمة نطق بها نجيب، ونظر إليه بقوة مقاطعًا حديثه السام:
ـ اسمع يا نجيب بيه كلمتين أبرك من عشرة، الحمد لله. العبد لله اللي قدامك ده سيد نفسه. مفيش حد ليه فضل عليَّ بعد ربنا وأمي. غير كده مافيش. وإن كنت بقى شايف إننا بنحقد على الأغنياء، فدي مشكلتك إنت، ما تحكمش على حد معاشرتوش. وآخرة الكلام طلاق، مش هطلق، فريح نفسك.
ليرد نجيب بعصبية:
ـ هتطلقها ورجلك فوق رقبتك وتمشي زي ما أنا عايز، أحسن لك.
نظر رضوان إلى يد نجيب، ووجه له سؤالًا غامضًا:
ـ هو فين؟
تعجب نجيب وسأله دون فهم:
ـ هو إيه ده؟
رد رضوان بابتسامة باردة:
ـ الشيك اللي فيه مبلغ كبير وجاي تساومني بيه عشان أطلقها. مش هما الناس الأغنياء بيعملوا كده في الأفلام؟
غضب نجيب وازداد غضبه:
ـ إنت بتهزر، ولا إنت عايز إيه بالضبط!
ثم نظر إليه بشك:
ـ بس أيوه كده، أظهر وبان على حقيقتك. الفلوس أهم شيء عندك، يبقى ده كان هدفك من الأول.
سكت وهو يطالعه من أعلاه إلى أخمص قدميه، ثم وضع يده في جيبه بتكبر وسأله بتفاخر:
ـ قولي عايز كام ونخلص الليلة دي كلها وتطلق زاد.
ضحك رضوان ساخرًا، وأمسك بمطرقته وعاد إلى عمله، وهو يقول:
ـ يفتح الله يا باشا. أنا مش في مزاد علشان أطلق. وبعدين، أبوها لسه عايش. لما أبوها يطلب مني أطلق، وقتها أفكر.
ثم نظر إليه رضوان وأكمل:
ـ شرفتنا يا نجيب بيه، خطوة عزيزة. خلي بالك وإنت خارج من الورشة، في بلاعة مفتوحة، اوعى تقع فيها.
نظر نجيب إليه بغضب واضح، وقال بوعيد:
ـ كده يا رضوان! تمام، افتكر بعد كده مين اللي بدأ.
خرج نجيب مسرعًا، والغضب يتملكه، وركض خلفه عزت، الذي كان يستمع إلى حديثهما خارج الورشة، ليتحدث معه. رأى نجيب حينها المكر في عيني عزت، ومنذ ذلك الوقت عملا سويًا على تدمير رضوان.
عاد المشهد إلى الحاضر، حيث كان نجيب يستعيد تفاصيل ذلك اللقاء، قبل أن ينهض متجهًا إلى منزل رضوان.
هذه المرة لم يكن ذاهبًا ليطلب منه الطلاق...
بل كان ذاهبًا ليعرض عليه صفقة يظن أنها ستجعله في قبضته.
توقفت السيارة أمام منزل رضوان. فتح له السائق باب السيارة، فترجل منها وصعد إلى منزل رضوان وهو يشعر بالاشمئزاز لمجرد وجوده في هذا المكان لأول مرة.
طرق عدة طرقات، ففتح له رضوان، وكان مرتديًا جلبابه الأبيض استعدادًا للذهاب إلى المسجد. وحين رآه، تملكه التعجب. كيف له أن يأتي بعد أن انتهى كل شيء بينه وبين زاد؟
حمحم نجيب محاولًا إخفاء حرج مصطنع، واستأذن بالدخول، فسمح له رضوان. وبعد أن رحب به وجلس، سأله رضوان عن نوع شرابه المفضل، إن كان يريد قهوة أم أي نوع من العصائر.
رفض نجيب، وهو يتفحص المنزل المتهالك، ويشعر بالضيق والضجر، ثم أشار إلى رضوان بالجلوس ليتحدثا قليلًا.
جلس رضوان، وقال نجيب متصنعًا حزنًا شديدًا:
ـ أنا طبعًا بعتذر إني جاي من غير ميعاد، لكن اعذرني يا رضوان يا ابني. أنا لسه عارف حالًا إن والدتك توفاها الله. الله يرحمها برحمته، والبقية في حياتك.
كان أول ما تعجب له رضوان أنه تلفظ بكلمة «ابني». فمنذ أن رآه، وهو يوبخه ويكرهه، فمنذ متى نزل الحنين إلى قلبه بهذا الشكل؟ وتعجب أيضًا لتأدية واجب العزاء، فأمه فارقت الحياة منذ عدة أيام، لكنه ترك تفكيره جانبًا ليرد بلطف:
ـ الله يرحمها. متشكر يا نجيب بيه، وخطوتك لنا عزيزة.
أكمل نجيب وهو ينظر إليه باختلاس:
ـ متشكر يا ابني، لكن أتمنى ما تكونش متضايق من وجودي، وخصوصًا إني جاي بدري كده.
أجابه رضوان نافيًا:
ـ أبدًا، وإيه اللي هيضايقني؟ إنت تشرف في أي وقت.
أردف نجيب بسخرية وأسلوب مبطن:
ـ يمكن مثلًا أكون معطلك عن شغلك ولا حاجة؟
رد رضوان:
ـ لا، مافيش شغل. إنت عارف إن النهارده الجمعة، وده يوم راحتنا أنا والصنايعية.
تنهد نجيب وشعر بالنفور، لكنه رسم على محياه ابتسامة حتى يخفي شعوره بالانزعاج من رضوان ومستواه المتدني، محاولًا التحدث معه في بعض الأمور. ثم سأله في وسط الحديث بأسلوب مبطن:
ـ قولي يا رضوان، هي والدتك فعلًا ماتت في حادثة؟
تنهد رضوان عندما تذكر ذلك اليوم المشؤوم، ولم يُرد أن يبيح له بالحقيقة، فهو غريب عنه، وأيضًا لا يشعر بالراحة تجاهه، فاختصر حديثه قائلًا بحزن واضح:
ـ للأسف، أيوة.
ـ طيب، وما عرفتش مين اللي تسبب في الحادثة دي؟
ـ لا، للأسف الناس قالوا إنهم ما لحقوش ياخدوا نمرة العربية، لأن السواق كان سايق بسرعة.
أكمل رضوان بتوعد:
ـ بس هيروح من ربنا فين! إن شاء الله هيولع، إن ما كانش دلوقتي هيبقى في الآخرة. هو ربنا بيسيب حق حد؟
ابتلع نجيب ريقه متوجسًا، ونفض الفكرة كما أمره شيطانه، ثم أكمل:
ـ آه، طبعًا، مافيش حق بيضيع. سيبك من الموضوع ده، قولي بس، إنت ناوي تعمل إيه؟
نظر إليه رضوان:
ـ مش فاهم قصدك إيه؟
ليرد نجيب بتعجب:
ـ هو إنت مش عارف اللي حصل لحماك؟
ابتسم رضوان مصححًا:
ـ آه، قصدك اللي كان حمايا.
ابتسم نجيب بثقة، وأخبره بنظراته أنه يعلم كل شيء، قائلًا:
ـ عارف، زاد قالتلي كل حاجة.
تنهد رضوان قائلًا:
ـ الله يفك سجنه، بس تعرف يا نجيب بيه، اللي مضايقني إن حسين بيه زمانه عرف وأكيد زعل مني، بس كنت أعمل إيه؟ بصراحة، بنته دي ما تتعاشرش.
ربت نجيب على فخذ رضوان، قائلًا بابتسامة:
ـ ما تخافش، حسين ما عرفش، ومش هيعرف دلوقتي. أنا طلبت من زاد ما تتكلمش في الموضوع ده دلوقتي، لأنه قلقان عليها من غير أي حاجة.
ابتسم رضوان ساخرًا:
ـ ودي حد يقلق عليها! أبوها مزودها معاها شوية. دي واحدة غنية، ما يتخافش عليها، ده غير لسانها المبرد، مايتوصاش.
نظر نجيب إليه وهو يفكر. كان يريد أن يدخل في صلب الموضوع مباشرة، لكنه لم يجد ثغرة يدخل منها حتى اللحظة، فتابع بتفكير، مغيرًا مجرى الحديث:
ـ سيبك من كل ده. أنا لحد دلوقتي ملاحظ إنك لسه زعلان مني من آخر مرة جيتلك فيها الورشة.
تذكر رضوان ذلك اليوم، وابتسم بإحباط:
ـ لا، عادي، أنا بنسى بسرعة. وإنت كان عندك حق، لأن في فرق كبير بين الغني والفقير. بس تعرف اللي مزعلني إيه؟
تأفف نجيب قائلًا:
ـ إيه اللي مزعلك؟
ردد رضوان:
ـ إني طلعت من المولد بلا حمص، يعني ما طلعتش بجنيه واحد من الجوازة السودة دي. بس هقول إيه، حظنا هباب والحمد لله.
راقبه نجيب للحظات، ولاحظ الفرق الذي صنعته الأيام الأخيرة في ملامحه. لم يعد ذلك الشاب الذي ذهب إليه منذ سنوات ليهدده بالطلاق؛ فقد أصبح أكثر هدوءًا وصلابة، ولم يعد يتعامل معه من موقع الضعف.
ورأى نجيب في ذلك فرصة مناسبة، فالرجل الذي خسر أمه وخرج من زواجه خالي الوفاض، قد يكون مستعدًا لصفقة تعوّضه عما خسره.
وكان نجيب مستعدًا لاستغلال ذلك:
ـ هو أنا ليه حاسس إنني ما بتكلمش مع رضوان اللي عرفته أول مرة قابلته فيها؟ مالك يا رضوان، وإيه غيرك كده؟
وقف رضوان، واستند بيديه خلف الأريكة، ناظرًا إليه بوضوح:
ـ مخبيش عليك، تعبت. تعبت من الظلم والذل والفقر اللي كل الناس بتحاسبني عليه. يعني عندك مثلًا أمي اللي ماتت غدر دي، لو أنا راجل مقتدر وعندي فلوس، مش كان زمان اللي خبطها ده أخد إعدام؟
زم نجيب شفتيه، محاولًا أن يقنع نفسه بتصديقه، وقال:
ـ أمم، طبعًا، الفلوس لها عامل كبير في رسمك لحياتك وللمستقبل.
تنهد رضوان مرة أخرى، وقال مؤكدًا:
ـ شفت بقى، يعني أنا عندي حق. لو كنت سمعت كلامك وطلقت زاد وأخدتلي قرشين حلوين، على الأقل كنت قدرت أطلع من جلابية الفقر دي. بس زي ما قلتلك، خلصت خلاص، شكلي أنا واللي زيي مكتوب علينا الفقر.
تكلم نجيب بمكر وخبث:
ـ لا، ما خلصتش لسه يا رضوان.
كشر رضوان بين عينيه، وعاد إلى الجلوس مرة أخرى قائلًا:
ـ مش فاهم قصدك إيه؟
أخرج نجيب علبة التبغ من جيبه، وأشعل واحدة وهو يقول:
ـ اللي فهمته منك يا رضوان، إنك عندك استعداد تعوض أي شيء خسرته بسبب الفقر في إنك يكون عندك ثروة وأملاك.
ضحك رضوان، ظانًا أن نجيب يسخر منه:
ـ ثروة وأملاك مرة واحدة! هو إنت بتتنقور عليَّ يا نجيب بيه؟ وبعدين، قلتلك خلاص طلقت زاد، وده السبب الوحيد اللي كنت ممكن أطلع من وراه بقرشين.
نظر إليه نجيب وهو ينفث الدخان، ثم قال:
ـ لا، في طريقة، بس تسمعني وما تقولش لا.
ـ سامعك.
قال نجيب:
ـ أنا عندي خطة تكسبنا إحنا الاتنين ملايين. بس أنا مش عارف رد فعلك هيكون إيه؟
انتبه رضوان بتركيز واضح:
ـ خطة إيه دي؟
تراجع نجيب على الفور، قلقًا، فهو لم يثق برضوان الثقة الكاملة، وقال موضحًا دون كذب:
ـ بصراحة يا رضوان، أنا قلقان لأنك في الأول كنت شهم وشجاع وجدع، وفجأة كده اتغيرت؟ مش غريبة دي؟
رد رضوان:
ـ غريبة في إيه؟ عمرك ما شفت حد صحي من غفلته وفاق لنفسه! حصلت كتير. وأديك قلتها بنفسك، كنت قبل ما أتعرض للإهانة والظلم، وأمي تروح هدر بدم بارد، لقيت إن الشهامة والجدعنة ما بيوكلوش عيش في الزمن ده. وعموماً لو قلقان، متقولش، أنا مجبرتش حد على حاجة.
شعر نجيب بالاطمئنان نوعًا ما، وقال:
ـ يعني عندك استعداد تسمعني وتنفذ اللي هقول عليه؟
حرك رضوان كتفيه قائلًا:
ـ والله لو في مقدرتي، تمام، ليه لا؟
اعتدل نجيب في جلسته، وأطفأ التبغ، ثم قال:
ـ اسمع يا سيدي، حسين دلوقتي عارف إنك لسه جوز بنته، وما عندوش علم بطلاقها. ومحدش غيرنا إحنا التلاتة يعرف، ولا إنت قلت لحد تاني؟
أجابه رضوان بتأكيد:
ـ لا، ما فيش غيري أنا وزاد بس، حتى أختي متعرفش.
رد نجيب بارتياح:
ـ تمام، وأنا التالت اللي أنا عايزه منك، إنك هتروح لحسين زيارة كالعاده، وتتكلم معاه بقلب حنين وخايف عليه، وتقف جمبه، وتثبتله إنه اختار لبنته الراجل الصح، واختار ابن ليه يقدر يثق فيه، وتفهمه إنك هتعمل المستحيل علشان يطلع براءة. وحسين أخويا، أنا عارفه، من غير ما إنت تطلب، هو هيطلب منك يعملك توكيل عام بكل أملاكه.
اندهش رضوان، ورجع إلى الخلف قائلًا بدهشة:
ـ إيه ده؟ إنت كنت معانا ولا إيه؟
كشر نجيب بين حاجبيه، وسأله مستفسرًا بفضول:
ـ في إيه؟ فهمني.
ليسرد إليه رضوان:
ـ آخر مرة فعلًا حسين بيه طلب مني إنه يعملي توكيل عام.
اقترب منه نجيب، وأمسك ذراعه بلهفة واضحة، متسائلًا:
ـ ها، وبعدين؟
صدمه رضوان قائلًا:
ـ رفضت طبعًا.
كاد يجن جنون نجيب، وقال بصوت عالٍ دون أن يتحكم في غضبه:
ـ ليه؟ ليه رفضت؟ حد يتصرف بالغباء ده؟
تعجب رضوان من غضبه غير المفسر، وقال:
ـ اهدا يا نجيب بيه، إنت اتضايقت قوي ليه كده؟ وأنا هعمل إيه بالتوكيل؟ وبعدين دي مسؤولية كبيرة عليَّ، ما أقدرش عليها.
مسح نجيب وجهه محاولًا أن يهدأ، وفكر أن ما زالت أمامه فرصة، وقال:
ـ لا، مفيش حاجة. اسمع، ما تحملش هم، إنت مش هتكون لوحدك، أنا هشيل معاك المسؤولية دي.
سأله رضوان بفضول:
ـ إزاي؟ مش فاهم؟
ثم كشر بين عينيه، وتملكه الشك، وقال بوضوح:
ـ أنا شامم ريحة لعب من تحت الترابيزة. ما تجيب من الآخر يا نجيب بيه، وقول على اللي إنت عايزه على طول؟
نظر إليه نجيب بقوة وتهديد في الوقت نفسه، وقال:
ـ أنا يلزمني التوكيل ده يا رضوان.
يبدو أن الأمر اتضح بقدر كبير أمام رضوان، فهز رأسه قائلًا:
ـ تقريبًا أنا فهمت. إنت مش طايل من أخوك حاجة، ويلزمك التوكيل باللي فيه، صح كده؟
تنهد الآخر، واصطنع الحزن قائلًا مبررًا:
ـ المشكلة إنك ما تعرفش حاجة يا رضوان غير اللي إنت شايفه. كل الأملاك اللي عند حسين دي ترجع ليا أنا، بفضلي أنا، وملكي أنا مش حد غيري.
اتسعت عينا رضوان متسائلًا بصدمة:
ـ معقول! إزاي الكلام ده؟
تكلم نجيب، وبدأ يسرد بيأس واضح أن حسين، أخوه الأكبر، أتى إليه منذ أعوام كثيرة وطلب منه المشاركة في شركته الجديدة حتى يزيد الربح بينهما، ويحصل كل منهما على النصف. وعندما تمت الشراكة بينهما، زاد الربح للضعف، واستثمرا أموالهما في شركات أخرى.
بعد ذلك، خدعه حسين بعدما كتب له نجيب توكيلًا عامًا، لأنه كان مشغولًا مع زوجته المريضة التي كانت تضع مولودها الأخير كارم. وبعد شهور، اكتشف نجيب أنه لا يملك سوى الشركة فقط، وأن حسين أخذ منه كل شيء وكل أمواله. وعندما طالب نجيب بحقه، قال له حسين إنه ليس لديه شيء له.
استسلم نجيب وبدأ من جديد بعد رفض حسين أن يعيد له أمواله، ومضت السنوات بينهما، وضمد الجرح من أجل الأولاد حتى لا يتنازعوا في المستقبل. لكنه فكر جيدًا أن حسين لم ينجب ولدًا، وأن من حقه أن يستعيد كل هذا المال الذي هو حقه منذ البداية.
تعجب رضوان من سماع هذه القصة، وظل يفكر في طلب نجيب منه. وقال لنفسه إنه لن يخسر شيئًا في النهاية؛ فهو مجرد توكيل، ولكنه يحق له التصرف فيه كيفما يشاء.
ثم ردد قائلًا وهو يفكر:
ـ يعني إنت عايز مني بعد ما أخد التوكيل ويتسجل، أبيعلك كل حاجة بيع وشراء، صح كده؟
ابتسم نجيب، لأنه فهم أخيرًا مبتغاه، وقال:
ـ أيوه، الله ينور عليك، هو ده بالضبط اللي أنا عايزه.
ابتسم رضوان، وأخبر نجيب:
ـ موافق، بس على شرط.
تهللت أسارير نجيب، فأكمل رضوان:
ـ حقي في الصفقة دي ما يقلش عن مية وخمسين مليون، ويتحطوا باسمي في البنك.
انتفض نجيب واقفًا، وصاح:
ـ إنت بتقول إيه! مية وخمسين مليون! إنت عارف إنت بتطلب كام يا رضوان؟ إنت أصلًا مش مستوعب الرقم، ما تعرفش تعد الفلوس اللي إنت عايزها دي؟
وقف رضوان أمامه، وأعطاه ظهره، وقال بثقة:
ـ والله، أنا هيبقى معايا توكيل لأملاك مش بعيد تكون قربت على المليار، يعني اللي أنا بطلبه ده ما يجيش إبرة في كوم قش، وكل الفلوس والأملاك هترجعلك في الآخر. لكن عمومًا ما تزعلش نفسك قوي كده، ولا كأنك طلبت مني حاجة. أنا كده كده رافض الفكرة من البداية.
ثم نظر إليه رضوان، وأكمل بتفكير، وكأنه جاءتْه فكرة:
ـ بس تصدق يا نجيب بيه، إنت فتحت عيني على حاجة مهمة أنا ما كنتش واخد بالي منها!
سأله نجيب من بين أسنانه مغتاظًا:
ـ إيه هي!
رد رضوان بذكاء:
ـ إن كل حاجة في الآخر هتكون لزاد، وزاد مراتي، يعني أنا الكسبان. أنا بقى هعمل إيه! هرد زاد لعصمتي النهاردة قبل بكرة، وأعمل كل حاجة هي عايزاها. وأبوها بيثق فيا، يعني من غير توكيل الراجل ممكن يحطلي مبلغ زي ده وأكتر في البنك، ومن غير لا خطة ولا يحزنون، ومن غير كمان ما أعرض نفسي للمساءلة القانونية، ودي فيها سجن، ما تنساش!
ضرب نجيب عكازه في الأرض بقوة من شدة غضبه، وقال:
ـ إنت بتفتح مخك عليَّ يا رضوان؟
رد رضوان:
ـ والله، ده اللي عندي. فكر إنت بقى ورد عليَّ، الكورة دلوقتي في ملعبك.
تنهد نجيب باستسلام، وقال:
ـ من غير تفكير، موافق طبعًا. هقول إيه غير إني موافق!
ساد الصمت للحظات.
كان نجيب ينظر إليه، يحاول أن يفهم كيف تحولت الصفقة التي جاء بها ليحكم قبضته على رضوان إلى قرار أصبح هو نفسه مضطرًا إلى التفكير فيه.
أما رضوان، فظل هادئًا، وكأنه لم يقل شيئًا يستحق كل ذلك الغضب.
وفي النهاية، ابتسم رضوان ابتسامة خفيفة وقال:
ـ طيب كده فل وتمام، اتفقنا. يلا بقى، يدوبك ألحق صلاة الجمعة. ما تيجي معايا تسمع الخطبة!
خرجت الكلمات منه ببساطة غريبة، بينما ظل نجيب مكانه للحظات، عاجزًا عن تحديد أيهما أخطر... غضب رضوان، أم هدوؤه.
يتبع.....

تعليقات✍️ أضف تعليقًا
إرسال تعليق