الفصل الثالث والعشرون والأخير وكان ذنبي عظيم
الفصل الثالث والعشرون والأخير..
نظرت إليه بفضول، فأضاف هو بترقب:
ـ أنا... أنا اللي طلبت من رضوان إنه يتجوزك!
ظنت أنه يمزح معها، لكن ملامح وجهه كانت جادة، فاستوعبت ما قاله وصُدمت. وهمّت بالوقوف من شدة الصدمة، وهمست غير مصدقة:
ـ مستحيل... اللي إنت بتقوله ده مستحيل؟
وقف والدها أمامها ليكمل حديثه:
ـ لأ يا بنتي، صدقيني، هي دي الحقيقة.
ظلّت تحدق فيه، وكأنها تنتظر أن يبتسم ويخبرها أنه كان يمزح، لكن وجهه لم يحمل سوى الجدية.
جلست من جديد ببطء، ووضعت يدها على صدرها، تحاول أن تستوعب الحقيقة التي قلبت أمامها العديد من الذكريات.
رضوان...
هي التي ظلت طوال الوقت تظن أنه حصل على فرصة لم يكن يحلم بها، وأنه كان محظوظًا لأنها قبلت به، وأنها تنازلت عن عالمها ومستواها لتعيش معه!
رفعت عينيها إلى والدها، وقالت بصوت مرتبك:
ـ يعني إيه طلبت منه؟! يعني إنت اللي رحتله وقلتله يتجوزني؟
ـ أيوه.
ـ وهو وافق؟
ـ بعد ما رفض في الأول.
شهقت زاد، وكأن الجملة الأخيرة كانت أقسى مما قبلها:
ـ رفض؟!
أومأ والدها، فأشاحت بوجهها عنه، وشعرت بحرارة الخجل تصعد إلى وجهها
نظرت إليه، تتنفس باضطراب، غير قادرة على تصديق أن أباها هو من توسط لها عند رضوان ليتزوجها!
هل هي سيئة إلى هذه الدرجة، حتى يُعرض أمرها للزواج بهذه الطريقة؟ أم أنها لم تكن ناضجة بما يكفي لتتخذ قراراتها بمفردها؟
قالت دون استيعاب:
ـ ليه يا بابا؟ بتقلل مني! أنا بنتك! طيب ليه! لحد دلوقتي مش قادرة أصدق إنك عملت معايا كده.
أجابها بصدق، لينفي ما يدور في ذهنها:
ـ افهميني يا بنتي، أنا مقللتش منك ولا عمري أقدر أعملها. أنا عملت كده بس علشان خايف عليكي. إنتِ كنتِ معمية باللي اسمه باسل.
وكنت شاكك إن عمك نجيب السبب، لأني عارفه كويس وعارف إنه مش هيهدا إلا لما تتجوزي، وساعتها ممكن قوي يتفق مع الشخص اللي هتتجوزيه ويحصل اللي كان بينام ويقوم يفكر فيه. وخصوصًا لما خدك عنده في الفيلا، وأنا عارفك بتحبي عمك قد إيه، وقلت أكيد هيأثر عليكي. ولو قلتلك حذري من عمك؟ مش هتصدقيني.
قلت لأ، لازم أتصرف. ولما رحت أجيبك من عنده، شاء القدر إني أشوف رضوان في الفيديو اللي سجلته كاميرات المراقبة، وشهامته ورفضه إنه ياخد فلوس من عمك علشان يشتري سكوته.
ساعتها بس فكرت إنه هو ده اللي يستاهل وجودك، وعملت اختبار لرضوان، سبتله فيزا فيها مبلغ كبير جدًا، لكن لأمانته رجعهالي. وكمان رفض المكافأة وقال بالحرف: أنا لا يمكن أخد حاجة متعبتش فيها. زاد إعجابي بيه وقلت: بس هو ده اللي هأمن لبنتي تكون معاه، راجل شهم وشريف.
لما اتحجزت في المستشفى حسيت إني خلاص ممكن أموت، وكبر خوفي عليكي، وإنتِ في وسط وحوش هياكلوكي. طلبت رضوان وجالي ما اتأخرش، وطلبت منه يتجوزك يا زاد. و وافق.
شعرت بالدوار مما سمعته، وكادت أن تُغمى عليها، فجلست على مقعدها، وسألته شاردة الذهن:
ـ إزاي. إزاي وبتقول أنه رفض، انا مش قادرة استوعب حاجه من اللي بسمعة؟
جلس أبوها مقابلها وقال:
ـ هو فعلاً رفض في ألاول، لكن مش علشانك إنتِ، بالعكس، هو رحب جدًا ومكنش يحلم إنك توافقي، لكن الفرق بينكم والمستوى المعيشي كبير، وقال إنه مش هيقدر يوفرلك كل متطلباتك. قلت له بسيطة، تعالى عيش معانا، رفض رفض قاطع، وقال إنه مش الراجل اللي يعيش في بيت مراته ويعيش على حسابها.
كل ما ده يزيد إعجابي بيه، لكن ما يئستش لحد ما وافق وكلمني بنفسه، وحط شرط إنه مش هيعيش معانا، وإنك هتروحي معاه على بيته. أنا وافقت. وإنتِ عارفة الباقي، وللأسف يا زاد، كنت أتمنى الجوازة دي تستمر، لأني شفت في رضوان اللي الكل فشل إنه يشوفه، ودي النتيجة.
غمرها الصمت.
كانت تحاول استعادة وعيها، وكأنها غاصت فجأة في عمق محيط لا ترى في قاعه نورًا ولا تعرف كيف تعود إلى سطحه.
انتابتها خيبة أمل موجعة، بعدما ظنت طوال الوقت أن طلب الزواج هذا كان نوعًا من الانتقام منها. تذكرت كل كلمة نعتته بها، وكل إهانة وجهتها إليه، وكل مرة تعمدت فيها أن تشعره بأنه أقل منها.
وضعت وجهها بين كفيها خجلة، غير قادرة على التصرف.
فلم يرَ منها خيرًا قط.
لم يعش معها سوى الإذلال وقلة التقدير، والحقيقة التي تؤلمها الآن أنه هو من تفضّل عليها، وقبل الزواج بها استجابة لطلب أبيها.
لقد كانت طوال الوقت تتعامل مع رضوان وكأنه هو من كان متمسكًا بها، وكأنه حصل عليها لأنها ابنة المالكي، وكأنها هي صاحبة القرار والفضل في هذا الزواج.
بينما الحقيقة...
أنها لم تكن هي التي منحته فرصة.
بل والدها هو الذي طلب منه أن يمنحها هو الفرصة.
ابتلعت غصتها، ثم قالت بصوت خافت:
ـ وأنا كنت فاكرة...
سكتت، ولم تستطع إكمال جملتها.
اقترب حسين منها قليلًا، وقال:
ـ كنتِ فاكرة إيه يا زاد؟
نظرت إليه بعينين امتلأتا بالندم:
ـ كنت فاكرة إني أنا اللي وافقت عليه... إني أنا اللي قبلت أعيش معاه رغم إنه أقل مني في كل حاجة. كنت فاكرة إني اتنازلت عن حاجات كتير علشانه.
توقفت لحظة، ثم ضحكت ضحكة قصيرة موجوعة:
ـ يا بابا... أنا كنت شايفة نفسي بعمل فيه معروف!
خفضت عينيها، وكأنها لم تعد تطيق مواجهة نفسها.
ـ وأنا طول الوقت كنت بعامله على الأساس ده... كنت كل ما أزعل منه أفكره إني أنا اللي اخترته، وإني أنا اللي وافقت عليه، وإني كنت أقدر أعيش أحسن منه وأتجوز واحد من مستوايا.
ارتجف صوتها، وأكملت:
ـ وأنا حتى لما قللت منه وجرحته في تعليمه وشغله... كنت فاكرة إني بقوله الحقيقة اللي هو عارفها عن نفسه.
رفع حسين حاجبه بحزن:
ـ والحقيقة كانت إيه يا زاد؟
رفعت عينيها إليه.
لم تجد إجابة.
فأجاب هو بهدوء:
ـ الحقيقة إن رضوان عمره ما شاف نفسه أقل منك. هو بس كان عارف الفرق بينكم، وعمره ما استغل مكانتك ولا فلوسك علشان يرفع نفسه. بالعكس، كان رافض ياخد منك أي حاجة.
ساد الصمت.
كان حسين يراقب حيرة ابنته، فربت على ظهرها بحنان، مستمرًا في حديثه بروية، عله يساعدها على تجاوز ما حدث، والنظر إلى المستقبل، وربما تجد فرصة لتجديد حياتها.
فهو يرى الحب في عينيها، ويرى في رضوان الرجل المناسب لها.
أغمضت عينيها، مستعيدة ماضيها مع رضوان، بكل ما فيه من لحظات لم تفهم قيمتها إلا بعدما فقدتها، ثم نظرت إلى والدها بحزن شديد، وقالت:
ـ بعد إيه؟ ما خلاص، مش هينفع نرجع يا بابا.
فهم كلامها، لكنه لم يرَ داعيًا إلى تسرعها الآن؛ كان يجب عليها أن تفكر في الأمر بهدوء.
لكنه تعجب من موقفها، فهو يرى الحب في عينيها، وإلا لما جاءت تسأل عن رضوان من الأساس.
فسألها والدها مباشرة:
ـ هسألك سؤال واحد وتجاوبيني عليه بصراحة: إنتِ بتحبي رضوان يا زاد؟
أخذت نفسًا عميقًا.
كان عليها أن تواجه نفسها مرة واحدة على الأقل، لأن الكتمان أصبح مؤلمًا إلى حد لم تعد قادرة على احتماله.
لمعت عيناها بالصدق، وقامت من مكانها، وأعطته ظهرها، ثم أطلقت العنان لما ظل حبيسًا داخلها طويلًا، قائلة:
ـ ـ أيوه، بحبه.
ـ لكن بشكل غريب، لقيت نفسي حبيته من غير ما أعرف إزاي وإمتى.
ـ لما كنت لوحدي في الفيلا، كنت أحيانًا ببقى عايزة أجري وأروح لحد عنده وأقوله: خليني هنا معاك. تعبت وأنا لوحدي.
ـ ولما روحت له في المرة الأخيرة، كنت أقول لنفسي إني هكلمه بأسلوب هادئ، كنت عايزة أني أسمعه بصدق.
ـ بحب طيبته في مشاعره تجاه والدته وأخته.
ـ لكن أول ما بشوفه، بحس إني لو عملت كده، هبيّن ضعفي قدامه.
ـ وإن فعلًا زي الحواديت ما بتقول وتحكي إن البنت الغنية وقعت في حب الشاب الفقير.
ـ وده بيجنني، وبلاقي نفسي حد تاني بيتكلم معاه.
أجابها بعقلانية:
ـ هي دي مشكلتك، وعقدة الخواجة اللي اتربينا عليها، إن الفقير ما ينفعش يناسب أو يجاور الغني، كأنه مذهب ولازم الكل ينفذه.
ـ لأ يا بنتي، أكبر خطأ وجريمة في حق النفس إنه يحكم ويقارن ما بين غني وفقير.
ـ طيب عندك عمك نجيب، أهو أكبر مثال على الحقد والغل، برغم إنه يمتلك ثروة كبيرة، إلا إنه ما شبعش وعايز يسرق حق غيره ومكتفاش.
ـ وفي الناحية التانية، رضوان الشاب المكافح الفقير اللي على قد حاله، إلا إنه رفض يعيش مستوى تاني برغم إن الفرصة جاتله على طبق من دهب، أنا اللي قدمتهاله.
ـ زائد إنه رفض الشيك اللي قدمتهوله مكافأة على وقفته معايا لحد ما أثبت براءتي، في حين ابن أخويا مازن شاب وفي سنه كان شريك أبوه في كل مؤامراته ضدي.
ـ بلاش تفكري بطريقة الغني ما ينفعش مع الفقير.
ـ فكري إنك بتحبي الشخص الصح وسط مجتمع أكتر ما فيه غلط.
ظهرت ابتسامة صغيرة على ثغرها، لكنها كانت محملة بالأوجاع، وقالت:
ـ كلام حضرتك جميل، لكن إنت متعرفش أنا جرحت رضوان قد إيه يا بابا.
أجابها بتفاؤل:
ـ مش مهم، ده من الماضي. رضوان بيحبك وهينسى، ياما في عقبات كتير بتمر على أي زوجين، وبيحصل أحيانًا فراق، لكن بيرجعوا لبعض وبينسوا أي شيء حصل في الماضي.
ـ مش هينفع يا بابا.
ـ ليه مش هينفع؟ جربي إنتِ وابدئي، وبما إنك معترفة إنك غلطتي، روحي لرضوان واتكلمي معاه واطلبي منه إنكم ترجعوا لبعض.
هبطت دموعها بألم:
ـ ما ينفعش يا بابا. حقيقي ما ينفعش.
ـ يا بنتي، هو الإنسان بيعيش كام مرة بس! طيب عندي اقتراح، أتكلّم أنا معاه.
أمسكت يده مسرعة وهي تبكي، وتقول بترجٍّ:
ـ مستحيل تعمل كده يا بابا، اوعدني، أرجوك ما تعملش كده. أنا ورضوان خلاص، مش هينفع نبقى لبعض.
أردف بانفعال، لأنه يرى حبها له، ولمَ البكاء والتكبر، فقال:
ـ ليه يا بنتي؟ ليه مصعبة الأمور عليكي وعليا، وليه مش عايزة تقولي لرضوان على حقيقة مشاعرك؟ وليه رافضة في نفس الوقت ترجعيله؟ مع إنك بتحبيه!
سكتت زاد للحظات، ثم قالت بوهن:
ـ بالعكس يا بابا، أنا مش بصعّب الأمور... أنا اعترفت بغلطي، ومش عايزة أظلمه تاني.
ظل حسين ينظر إليها بحزن، ثم قال بهدوء:
ـ بس يا زاد، الاعتراف بالغلط أول خطوة في إصلاحه.
هزت رأسها، والدموع تلمع في عينيها:
ـ عارفة... بس مش كل غلط بيتصلح بالرجوع يا بابا. أحيانًا بنحب حد جدًا، ونكتشف إن أكتر حاجة نقدر نقدمها له... إننا نبعد عنه.
سكتت قليلاً ثم ابتلعت ريقها بغصة، قائلة بوهن:
ـ و لأني فكرت كويس، وخصوصاً بعد اللي عرفته دلوقتي من حضرتك . ولقيت إن ده أحسن ليا وليه.
ـ بابا، هكلمك بالمنطق وأقولك: أنا ورضوان بعيدين قوي عن بعض. في خط بيننا وحاجز كبير اسمه الكرامة وعزة النفس. رضوان عمره ما هيفكر إنه يستغلني وأنا واثقة من ده، لكنه دايمًا هيعيش يفكر في النقطة دي، نقطة إنه مش قادر، لأن في فرق كبير بيني وبينه في كل حاجة، سواء في التعليم أو المكانة الاجتماعية.
ـ يا بابا، رضوان لا هو هيوافق يطلع معايا لفوق، ولا أنا عندي استعداد أنزل معاه لتحت، ولو حصل ورجعنا لبعض هيبقى ظلم. هبقى بظلم رضوان معايا.
ـ ليه بتصعبيها عليكِ وعليه ليه؟ وفين الظلم في الموضوع!
مسحت دموعها، قائلة:
ـ هظلمه لما يجمعنا سقف واحد، وكل ما هبصله هشوف في عينيه نظرة عجز وقلة حيلة، وكل ما يبص في عينيا هيلاقي عدم رضا ونفور مني على الوضع اللي هنكون فيه.
أنا فعلًا حبيت رضوان، ولو حاولت أرجعله هبقى أنانية، ما بفكرش غير في نفسي وسعادتي وبس، وأنا مش عايزة أكون كده. مش عايزة حياتنا تكون عبارة عن صراع: يا ترى مين هيتحمل التاني.
ـ وفي نقطة مهمة حضرتك مش واخد بالك منها، إننا لو بقى بينا أطفال، أكيد هيقدموك للمجتمع بفخر كبير، جدهم هو حسين المالكي. تفتكر هيقدموا جدهم قاسم إزاي، وقدام باباهم؟ وقتها فعلًا هكون بكسر رضوان بكل قوتي، وبظلمه؛ لأني هكون بحاربه في ماضيه، مش ببني معاه حياة جديدة.
ـ أحيانًا بيكون الأذى ووصمة العار من الأهل ملازمة أولادهم لآخر يوم في عمرهم، واللي عليهم أنهم يتحملوا الذنب اللي ارتكبته ناس غيرهم.
ـ حقيقي يا بابا، أنا بحب رضوان قوي، لكن أنا مش عايزاه يشقى معايا أكتر من كده. كفاية اللي حصله بسببي. أنا عمري ما هقدر أسامح نفسي، زي ما والد رضوان جنى عليه وحاربه في مستقبله! أنا كمان جنيت عليه بخسارته لوالدته، وما عنديش استعداد أظلمه أكتر من كده.
نزع الأب نظارته بحزن شديد، وقال:
ـ طيب وناوية على إيه؟
نظرت أمامها إلى الفراغ، وكأنها كانت ترى في تلك اللحظة طريقًا لم يكن سهلًا، لكنها حسمت أمرها أخيرًا، ورددت مؤكدة:
ـ أيوه، أنا ورضوان مش لبعض، لكن لازم أريح ضميري.
بعدما أنهى رضوان عمله في الورشة، بدّل ملابسه وأغلق الباب الخارجي، وقبل أن يرحل، أتاه كريم يحمل حقائب سفر فارغة.
لم يعرف كريم لماذا طلب منه رضوان شراء هذه الحقائب، لكنه لم يشأ أن يسأله عبر الهاتف، فجاء بها بنفسه، ثم وضعها أمامه على الأرض، وهو يلتقط أنفاسه، وقد بدا عليه الإرهاق.
ضحك رضوان على منظره وقال:
ـ إيه يا عم كريم؟ إحنا عجزنا ولا إيه؟
مسح كريم جبينه بالمنديل، وهو يجيبه بحنق:
ـ مين ده اللي عجز؟ اتكلم عن نفسك بس.
نظر رضوان إلى عضلات ذراعه، ثم نظر إلى كريم، وكأنه يقول له بعينيه: «انظر بعينيك وتحقق جيدًا من منا الأكثر شبابًا».
زم كريم شفتيه، وقال معترفًا:
ـ في دي عندك حق يا رضوان، عيني عليك باردة، أنا مش بحسدك، إنت تعبت في حياتك وتستاهل كل خير.
ابتسم رضوان له قائلًا بلطف:
ـ وإنت جدع يا كريم، وربنا عوضني بيك إنت وعصام.
ثم نظر حوله متسائلًا عن عصام، ولِمَ لم يأتِ معه.
فأجابه كريم بابتسامة عريضة:
ـ أبشر يا رضوان، هتبقى عم لرابع مرة.
اتسعت عينا رضوان، وقال مذهولًا:
ـ يخربيتك يا كريم، إيمان حامل في الواد الرابع؟ إنت عايز تخلص عليها، حرام عليك يا بني آدم.
قهقه كريم لقلق صديقه، وقال مصححًا:
ـ إيمان مين بس اللي حامل؟ إنت يا بني مش بتسأل عن عصام؟ أنا جاوبتك، وكل لبيب بالإشارة يفهم.
ابتسم رضوان فرحًا عندما علم أن صديقه عصام سيصبح أبًا عما قريب، وهاتفه ليبارك له.
سرعان ما تحولت اللحظات القليلة إلى ضحكات وتهنئة، وغمرتهم السعادة بهذه الأخبار المفرحة، وكأن الحياة منحتهم للحظات هدنة صغيرة من كل ما أثقل أرواحهم.
وبعد أن أغلق هاتفه، سأله كريم وهو يشير إلى الحقائب:
ـ مقولتليش يا رضوان، إنت عايز الشنط دي في إيه؟
حمل رضوان الحقائب، وسار في الطريق وبجانبه كريم، ثم أجابه بعد صمت خفيف، بصوت يحمل عزمًا يخالطه ألم:
ـ أنا خلاص يا كريم، نويت أسيب الحارة.
توقف كريم مصدومًا، وتحدث بدهشة:
ـ تسيب الحارة؟ طيب ليه يا رضوان؟ وهتروح فين؟ وليه خدت القرار المفاجئ ده؟
توقف رضوان بدوره، ونظر إليه موضحًا ما حسم أمره بشأنه.
لقد سئم هذه الحارة، وكل ما جلبته إليه.
هنا، في كل شارع وركن، تسكن ذكرى تؤلمه. هنا عاش عمرًا كاملًا بين الفرح والتعب، وهنا فقد أمه، وهنا انكسر جزء كبير منه لن يستطيع أن يعيده كما كان.
وبعد موت أمه، لم يعد يرى سببًا يجعله متمسكًا بالبقاء.
كان يريد أن يرحل إلى مكان أكثر هدوءًا، مكان لا يعرفه فيه أحد، ولا يعرف هو فيه أحدًا، ليبدأ من جديد... هو وشقيقته.
قاطعه كريم بغضب واحتقان:
ـ طب وإحنا يا رضوان؟ والناس اللي هنا بتحبك وشغلك... وزاد!
تنهد رضوان، وقال بهدوء مصطنع:
ـ يا كريم، أنا قلتلك هنقل لمكان تاني، مش ههاجر بره مصر.
حبيبة تعبانة من وجودها في المكان اللي كله وجع وقرف، ومش قادرة تتخطى موت أمي، وبتشوف صورتها في كل ركن حواليها، وكل شوية تحلم بكوابيس في البيت. ودي أول سنة لها في الجامعة، وامتحاناتها قربت، ومش عايز أضيع سنين تعبي وتعبها.
عمومًا ده كمان قرار حبيبة، وإن كان عليك إنت وعصام، فإنتوا هتنقلوا معايا، اللي هينفع يتنقل للبيت الجديد، ما هو إنتوا مش صحاب على الفاضي يعني. ومتخفش، أنا مش هسيبك، وكل جمعة أكيد هنتجمع على أي قهوة.
بتر كلامه، وأخذ نفسًا عميقًا، ثم أطلق زفرة واهنة وهو يقول:
ـ أما زاد، خلاص، دي كانت تجربة وانتهت.
نظر إليه كريم طويلًا، ثم قال بوضوح:
ـ بس إنت بتحبها يا رضوان.
خفض رضوان عينيه للحظات، وكأن مجرد سماع اسمها كان كافيًا لإيقاظ شيء يحاول بكل قوته أن يدفنه، ثم قال:
ـ ويفيد بإيه يا كريم؟ أنا واحد جاهل وفقير، والماضي بتاعي مش أحسن حاجة، عيرتني بجهلي وفقري.
تنهد كريم، وقال:
ـ متزعلش مني يا رضوان، زاد معذورة في نقطة واحدة، وإنت غلطان.
رفع رضوان عينيه إليه مستفهمًا:
ـ غلطان في إيه؟
قال كريم بجدية:
ـ غلطان في إنك نسيت نفسك وضحيت بكل حاجة، حتى مستقبلك.
مفيش واحدة دلوقتي مبتدورش على مؤهل الشخص اللي هيرتبط بيها. بالعكس، ده أول سؤال البنت بتسأله: مؤهلك إيه؟ مش زاد بس.
حتى لو قررت تتجوز غيرها، برضه هيحصل نفس اللي حصل معاك قبل كده، وهتفضل في صراع طول الحياة بسبب تضحيتك ونسيان نفسك.
ثم وضع يده على كتف رضوان، ونظر إليه بجدية، وكأنه يحاول أن يصل إليه قبل أن يتمادى في تضحيته، وقال ناصحًا:
ـ محدش هيديك نيشان على تضحيتك يا رضوان. الحق نفسك يا صاحبي.
ظل رضوان صامتًا.
لم يجد ما يجيبه به، وربما لأنه كان يعرف أن بعض الكلمات، مهما حاول الإنسان مقاومتها، تجد طريقها إلى أكثر الأماكن ألمًا في داخله.
أكملا سيرهما، بينما ظلت كلمات كريم عالقة في ذهن رضوان، تلاحقه حتى بعد أن افترقا.
عاد رضوان إلى المنزل، لكن عقله ظل عالقًا فيما دار بينه وبين كريم.
كانت الأفكار تدور في رأسه كأمواج بحر عاتية، تتصادم دون أن تهدأ، وكلما حاول أن يمسك بفكرة، جاءت أخرى لتدفعها بعيدًا.
دخل غرفة والدته، وجلس على فراشها.
كان المكان كما هو، لكن غيابها جعل كل شيء مختلفًا.
الجدران صامتة، والأشياء في أماكنها، ورائحتها تكاد تكون عالقة في تفاصيل الغرفة، وكأن المكان نفسه يرفض أن يصدق أنها رحلت.
شعر وكأن الحياة سلبت منه كل ما هو ثمين، ولم تترك له سوى بقايا أمل محطمة.
وفي صمت الليل العميق، همس لنفسه، وكأن الكلمات كانت تنتزع من أعماق جراحه:
ـ أين الخطأ الذي ارتكبته؟ ضحيت بكل شيء، حتى تعليمي ومستقبلي، من أجل من أحببتهم! ولكن يرى الجميع أنني لم أحصل على شيء في النهاية؟
ـ غير معقول، كنت أظن أن التضحية يمكن أن تكون طريقًا إلى السعادة، لكن اكتشفت الآن أنني ضحيت بكل ما كنت أملكه، حتى نفسي. حتى الفتاة التي أحبها قلبي عندما تطلعت إلى مستقبلي، اكتشفت أنني جاهل وفقير، رحلت. هل كان ذنبي أنني حاولت أن أكون أفضل بتحقيق حلم غيري، وأن أعطي كل ما لدي؟ أم أنني كنت أعيش في وهم!
ـ اعتقدت أن الحب والتضحية يمكن أن يعوضا عن كل نقص؟ والآن، وأنا أواجه الحقيقة القاسية، أرى أنني لم أحصل على أي شيء سوى الألم. ربما كنت أبحث عن شيء لا يمكن العثور عليه، أو ربما كنت أعمى عن رؤية الحقيقة. ماذا أفعل الآن؟ كيف أواجه هذا الفراغ الذي تركته خلفي؟
ظلت الأسئلة تدور في ذهنه، ولا يجد جوابًا يشفي جراحه.
ظل شاردًا في أفكاره، حتى بحثت عنه حبيبة، فوجدته جالسًا في غرفة والدته على فراشها.
نادت عليه، فانتبه إليها، وابتسم حتى لا ترى حزنه، ثم أشار لها بالجلوس أمامه.
جلست، ولم تعلم ما به، فظنت أنه حزين وشارد لأنه سيترك هذا المنزل الذي عاش فيه لسنوات.
قالت بصوت حنون:
ـ لو مش عايز نسيب البيت، إحنا فيها يا رضوان. واحدة واحدة هنتأقلم عليه.
بتر حديثها قائلًا:
ـ لا يا حبيبتي، إحنا خلاص شوفنا شقة تانية وعجبتنا. أنا اتفقت مع الراجل كمان، وهننقل أول الشهر.
ـ طيب مالك من وقت ما رجعت وإنت سرحان وساكت وحابس نفسك هنا؟
ابتسم بحنو، وهو يتنهد، ولم يدرِ ما يقول.
كان يفضل الصمت الآن، ربما لأن الكلام عن كل ما يؤلمه لن يغير شيئًا، وربما لأنه لم يكن مستعدًا لأن يفتح قلبه مرة أخرى.
شعرت حبيبة أنه يفتقد زاد، فقالت:
ـ أنا عايزة أقولك حاجة يا رضوان، ومتزعلش مني ولا تتضايق.
ابتسم لها، وقال:
ـ ونزعل ليه؟ والدنيا فيها حبيبة؟
ابتسمت بحب له، وقالت بصدق:
ـ أنا عايزاك ترجع لـ زاد. زاد بتحبك وإنت بتحبها.
رفع عينيه إليها، وكأن الجملة أصابته في مكان حاول إغلاقه، وقال:
ـ بتحبني مرة واحدة؟
ـ أيوه، صدقني بتحبك. أنا شفتها يوم المحكمة، كانت كل شوية عينيها بتدور عليك.
تذكر هذه الجملة.
فقد قالتها أمه له من قبل، وكأن صوتها عاد إلى الغرفة للحظة، يردد الكلمات نفسها التي كانت تعرف بها ما يحاول هو إخفاءه حتى عن نفسه.
أكملت حبيبة:
ـ زاد تبان متكبرة، بس والله هي طيبة وقلبها أبيض، ولو إنت رحت دلوقتي و...
قاطعها رضوان:
ـ حبيبة، حبيبة، ممكن تنسي بقى زاد ونجيب ومعاذ والناس دي؟ أنا عايز أروق وأنسى كل اللي فات وأبدأ من جديد.
سكتت حبيبة لحظة، ثم قالت:
ـ طيب وزاد؟
تنهد قائلًا:
ـ زاد ليها عالمها وأنا ليا عالمي. اللي هبنيه من أول وجديد.
عقدت ما بين حاجبيها مستفسرة:
ـ تقصد إيه؟ أنا مش فاهمة كلامك اللي بالألغاز ده.
ربت على وجنتها بابتسامة حنونة، وقال:
ـ بكرة هتفهمي، لكن دلوقتي قومي نامي، علشان في صلاة جمعة بكرة، ومش عايز أتأخر. واعملي حسابك إيمان وهالة جايين بكرة، وكريم وعصام هيبقوا معايا على القهوة، عزموا نفسهم وأنا اتلككت ووافقت بصراحة. وإنتوا التلاتة بقى ورونا شطارتكم في الأكل، ماشي يا بيبو؟
تنهدت حبيبة بحزن عميق.
كانت تعلم أن أخاها لا يريد التحدث في أمر زاد، وأن كل محاولة لفتح الحديث ستدفعه إلى مزيد من الصمت.
حزنت لأجلهما.
كانت ترى الحب في مكان ما بين كلماتهما، رغم كل ما حدث، وكانت تتمنى من أعماق قلبها أن يجمعهما القدر مرة أخرى، قبل أن يصبح الفراق أمرًا لا يمكن إصلاحه.
مضى الوقت، وغفا رضوان على فراش أمه، ثم غط في سبات عميق، بعدما أنهكه التعب طوال الفترة الماضية. كان جسده قد استسلم أخيرًا للإرهاق، وكأن النوم وحده استطاع أن يمنحه هدنة قصيرة من كل ما أثقل قلبه وعقله.
أما حبيبة، فجلست على مقعد مكتبها في غرفتها، تفكر في أمر أخيها، وفي كل ما مر به خلال الأيام الماضية، وتتساءل في صمت إلى أين يمكن أن يقوده كل هذا الألم.
أما زاد، فكانت تقف في شرفة غرفتها الخاصة، ترفع عينيها إلى القمر، بينما تتزاحم في رأسها كل تفاصيل ما حدث معها.
لم تستطع أن تنسى أن والدها هو من طلب من رضوان الزواج منها.
كلما تذكرت ذلك، شعرت بوخزة مؤلمة في قلبها.
كم كانت قاسية معه...
كم عاملته بتكبر وزيف طوال الشهور التي قضتها معه، وهي تظن أنها تعرفه، بينما كانت في الحقيقة لا ترى منه سوى الصورة التي رسمها لها الآخرون.
والآن، بعدما عرفت الحقيقة، لم تعد قادرة على مواجهة نفسها.
شعرت بالخجل الشديد، وتعبت من التفكير، فغادرت الشرفة واتجهت إلى فراشها، وأخلدت إلى النوم.
مضت الليلة في هدوء، حتى أشرقت شمس يوم جديد، معلنة بداية يوم آخر، لا يعرف أحد ما الذي تخبئه ساعاته.
قضى رضوان يومه مع أصدقائه، الذين حاولوا بكل طاقاتهم أن يعوضوه عما شعر به طوال الأيام الماضية.
كانت ضحكاتهم حوله، ومزاحهم، ووجودهم إلى جواره، بمثابة محاولة صادقة منهم لانتشاله من الحزن الذي ظل يحيط به.
وكان يومًا مميزًا لدى رضوان، ربما لأنه شعر للمرة الأولى منذ فترة أن لديه أشخاصًا لا يحتاج إلى شرح وجعه أمامهم كي يفهموه.
وفي اليوم التالي، ذهب إلى الورشة، وبادر إلى عمله الشاق كعادته.
كانت يداه تتحركان بين أدواته بانشغال، ووجهه ملطخًا ببعض آثار العمل، بينما قطرات العرق تتجمع فوق جبينه.
جاءه الصبي الصغير، وأخبره أن هناك شخصًا يريده خارج الورشة.
ترك رضوان الأداة من يده، ومسح جبينه بذراعه، ثم خرج ليرى من الزائر.
لكن خطواته توقفت للحظة.
ودق قلبه بعنف، كأنه تعرف إليها قبل أن تستوعب عيناه وجودها.
كانت زاد تقف أمام سيارتها، تنتظره.
حتى وهي حزينة...
ما زالت أجمل امرأة تسكن قلبه.
ظل واقفًا لثوانٍ، عاجزًا عن إخفاء الاضطراب الذي باغته، ثم تحركت قدماه نحوها.
وفي اللحظة نفسها، تحركت زاد هي الأخرى بضع خطوات.
حتى تقابلا في منتصف الطريق.
وقفا أمام بعضهما.
لم يتحدث أي منهما.
كانت النظرات وحدها كافية لتكشف ما عجزت الكلمات عن قوله.
نظرة طويلة...
امتدت بينهما كأنها تستعيد شهورًا كاملة من الذكريات، وتروي عطش اشتياقٍ ظل مختبئًا خلف الكبرياء والعتاب.
كان في عينيها شيء يشبه الاعتذار، وفي عينيه شيء يشبه الحنين.
قصة حب تريد أن تتنفس...
لكنها دُفنت حيّة في أعماقهما، وظلت تعاني وحدها تحت ركام الخوف والفوارق والكلمات التي قيلت ذات يوم.
لم ينتبها إلى العالم من حولهما لبعض الوقت، حتى مرت سيارة بجوارهما، فحمحم رضوان، وتراجع خطوة إلى الخلف.
وفعلت زاد الشيء نفسه، وكأنهما تذكرا فجأة أنهما يقفان في الطريق، وأن عليهما أن يتحدثا.
بدأ هو الكلام، محاولًا أن يرفع عنها الحرج:
ـ خير يا زاد؟
حاولت أن ترسم ابتسامة صغيرة لتداري حزنها وخجلها، لكنها فشلت.
تذكرت إهانتها له، وكل كلمة قاسية خرجت منها يومًا، فاختارت ألا تهرب هذه المرة، وقالت دون تردد:
ـ رضوان، أنا... أنا جاية علشان أعتذر لك.
كشّر ما بين عينيه، ونظر إليها:
ـ مش فاهم.
أردفت معتذرة:
ـ أنا آسفة، رضوان.
تعجب أكثر، قائلًا:
ـ برضه مش فاهم على إيه؟
اغرورقت عيناها، وجاهدت ألا تسقط دموعها أمامه، وقالت بندم:
ـ على كل حاجة صدرت مني وعملتها معاك، على أسلوبي وتقليلي من ذاتك وشخصيتك، من إني حاسبتك على ذنب مش ذنبك، من إني ما شفتش غير اللي عمو نجيب خلاني أشوفه فيك وبس. آسفة على حاجات كتير قوي عملتها معاك، آسفة إني جرحتك. ورغم كل ده وقفت جنبنا لحد ما أثبتت براءة بابا.
تأجج قلبه بنار الاشتياق.
كان واضحًا في نبرتها شيء لم يستطع أن يتجاهله، شيء يشبه الحب الذي ظل يبحث عنه طوال الوقت.
في تلك اللحظة، تمنى لو يستطيع أن يرمي كل شيء وراء ظهره، أن يقترب منها، يأخذها بين ضلوعه، ويضمها إليه حتى يهدأ ذلك الوجع الذي استوطن قلبه منذ ابتعدت عنه.
لكن الواقع كان أسرع من أمنيته.
تذكر فقره، ومكانته، والفارق بينهما، وتذكر كلماتها الرنانة عن جهله.
ابتلع شوقه، وأخذ نفسًا عميقًا، ثم قال بملامح جدية:
ـ آسفك مقبول.
ثم ابتسم لها بألم:
ـ بس برضه مكنش في داعي إنك تيجي بنفسك علشان تعتذري من واحد جاهل وفقير زيي.
أردفت بخجل:
ـ رضوان أنا...
قاطعها قائلًا:
ـ أنا مش زعلان منك، إنتِ نورتيني وفتحتي عينيا على حاجات كنت غافل عنها تمامًا ومش شايفها. وأنا عارف إن كل حاجة حصلت معاكي ومريتي بيها كانت غصب عنك. ده لا مكانك ولا مستواكِ ولا حتى بيئتك ولا كمان تعليمك يسمح إنك تهينيه علشان واحد مفيهوش ميزة واحدة.
شعرت بالاستياء من نفسها، وقالت:
ـ رضوان، بخصوص تعليمك و والدك أنا...
ـ مالوش داعي نتكلم في اللي فات، لأنه خلاص بقى من الماضي. وخلاص انسيه زي ما أنا نسيته.
ثم ابتسم لها:
ـ وأنا ما عملتش حاجة غير واجبي. حسين بيه مقامه كبير عندي.
احتل الصمت المسافة بينهما.
كانت زاد تحارب دموعها بكل ما أوتيت من قوة، بينما كان رضوان يحاول أن يبدو ثابتًا، وكأنه لا يرى في وقوفها أمامه الآن سوى لقاء عابر لا يحمل وراءه كل هذا التاريخ.
لكن قلبه كان يعرف الحقيقة.
كانت أمامه المرأة التي أحبها.
وكان عليه أن يتصرف كأنها ليست كذلك.
كسرت زاد ذلك الصمت، وقاومت كل ما أرادت قوله، ثم قالت بابتسامة مزيفة:
ـ حقيقي، يا بخت حبيبة بيك. كنت أتمنى يكون ليا أخ جدع وشهم يقف في ضهري وحنين زيك.
كانت الكلمات بسيطة...
لكنها سقطت على قلبه كأنها حجر.
ضغط على ألمه، وأجابها:
ـ اعتبري نفسك زي حبيبة من دلوقتي، وأنا أخوك الكبير. ولو احتجت أي حاجة هتلاقيني عملت معاكي زي حبيبة بالظبط.
شعرت أن الكلمات تخنقها.
كانت تريد أن تبكي، لكنها ابتسمت أكثر، وفتحت حقيبتها كي تداري مشاعرها، ثم رفعت يدها أمامه ممسكة شيكًا، وقالت:
ـ طيب بما إنك من دلوقتي أخويا، ممكن تقبل الشيك اللي إنت رفضته من بابا؟
ابتسم بوجع:
ـ برضه مصممين إنكم تهينوني! لكن أحب أقولك آسف، أنا لا يمكن أخد حاجة ما تعبتش فيها.
ثم ابتسم ساخرًا من نفسه:
ـ أصل أنا متعود على التعب، أو تقدري تقولي أنا اللي عودت نفسي على التعب.
شعرت بوخزة في قلبها، وصححت له سريعًا:
ـ ما تفهمنيش غلط يا رضوان.
بتر كلامها:
ـ ما تقلقيش، مش فاهمك غلط. أنا عارف إن نفسك تساعديني، بس صدقيني أنا كده مرتاح.
ساد الصمت بينهما من جديد.
لم تجد زاد شيئًا تقوله.
كل الكلمات التي جاءت من أجلها بدت فجأة عاجزة عن الوصول إلى ما تريده حقًا.
فقالت بهدوء:
ـ طيب، أنا لازم أرجع البيت. خلي بالك من نفسك يا رضوان.
أجابها:
ـ وإنتِ كمان خلي بالك من نفسك، وسلامي لحسين بيه.
استدارت زاد، وابتعدت عنه عدة خطوات.
كانت تمشي ببطء، وكأن شيئًا بداخلها يرفض أن يرحل.
ثم توقفت.
لم تستطع أن تمنع نفسها من الالتفات إليه مرة أخرى.
وحين فعلت، وجدته لا يزال واقفًا في مكانه، يتابع أثرها بعينيه.
تلاقت عيناهما من جديد.
ابتسمت له.
وابتسم هو أيضًا.
كانت ابتسامة صغيرة، لكنها حملت من الوجع ما لم تستطع الكلمات حمله.
نظرت إلى عينيه للحظات، ثم سألت السؤال الذي خرج منها قبل أن تتمكن من منعه:
ـ هنتقابل تاني؟
ظل ينظر إليها، وكأن السؤال فتح في قلبه بابًا حاول طوال الوقت أن يغلقه.
ثم ابتسم، وأجابها:
ـ لو لينا نصيب، أكيد هنتقابل.
ركبت زاد السيارة.
أغلقت الباب، ثم أشارت إليه بيدها.
فرفع يده وأشار إليها.
تحركت السيارة ببطء، وظل رضوان واقفًا مكانه، يتابعها بعينيه حتى ابتعدت.
لم يعرف لماذا شعر في تلك اللحظة بأن هذا الوداع مختلف.
لم يكن مجرد وداع لامرأة جاءت لتعتذر ثم رحلت.
كان شيئًا يشبه النهاية...
أو ربما بداية لا يعرفان بعد كيف ستأتي.
وظل واقفًا حتى اختفت السيارة عن ناظريه، ثم عاد إلى ورشته، يحمل في قلبه سؤالها الأخير، وإجابته التي لم يعرف إن كانت وعدًا أم مجرد أمنية:
«لو لينا نصيب، أكيد هنتقابل.»
فمهما كانت الظروف صعبة، تذكر دائمًا أن القادم أفضل.
فالحياة مليئة بالمفاجآت الجميلة التي تنتظر اللحظة المناسبة لتظهر، وما علينا سوى أن نصبر، ونؤمن بأن الغد يحمل في طياته الخير.
والآن، داخل مشفى حكومي، وفي غرفة الأطباء الخاصة، جلست بعض الطبيبات الشابات، تتوسطهن حبيبة، التي كانت ترتدي فوق ثيابها البالطو الأبيض، بينما يتناولن وجبة الإفطار معًا، ويتحدثن عن ما حدث بالأمس مع زميلة لهن.
قالت إحدى الطبيبات الشابات بمزاح:
ـ وحياتكم، لسه بشرب أول شفطة من الفرابوتشينو كراميل ماكياتو بالويبنج كريم فلات وايت سكيمد ميلك دبل كوفي، اتدلدق عليا!
انفجرن جميعًا في الضحك، وردت حبيبة على صديقتها المشاغبة:
ـ ما قلنا الحاجات اللي بتتاخد عَضل دي ماحدش ياخدها عَ الريق.
انفجر الجميع في الضحك من جديد، وقالت أخرى:
ـ ومش واخدة بالك يا حبيبة! بعد كل الكلام الحلو اللي مش مفهوم ده، تقولك اتدلدق!
ردت حبيبة وهي تضحك:
ـ يا بنتي إحنا غلابة بتوع الشاي المغلي، البت دي شكلها بتتعاطى حاجة، كنك مش مظبوطة يا بت.
أردفت أخرى وهي تلوك الطعام:
ـ البت دي بتقول أي كلام وخلاص، أصلًا دول تلات مشاريب مختلفين، إزاي بتشربهم مع بعض؟ إنتِ كويسة؟
تعالت الضحكات في الغرفة، قبل أن تفاجأ الجميع بزميلة لهن تدخل مسرعة، وتقول بلهفة وتحذير:
ـ آنتوا بتعملوا إيه ده وقت أكل! الدكتور الجديد جه، الدكتور فارس وصل، والمدير طالع على هنا، قوموا بسرعة.
نهضت كل واحدة منهن فور سماع تلك الأخبار العاجلة، وبدأن في جمع الطعام وترتيب الغرفة كما كانت من قبل.
ارتدت حبيبة نظارتها الطبية، ووضعت سماعة الكشف الطبي حول عنقها، ثم خرجت إلى الردهة، وهي تحمحم وتسير مسرعة.
لكنها لم تنتبه إلى الشخص القادم أمامها، فاصطدمت به.
وما إن رفعت عينيها حتى وجدته مدير المشفى.
اتسعت عيناها، وارتسمت على وجهها ضحكة بلهاء من شدة الإحراج، ثم أسرعت من أمامه دون أن تنطق بكلمة واحدة.
زمجر المدير وهمهم بضيق منها، ثم أكمل طريقه.
---
وضع موسى كوب الشاي من يده بعدما انتهى منه، ولم يعد يعرف كم كوبًا شرب طوال جلسته،بينما كانت الدهشة تملأ عينيه مما سمعه من ذلك الرجل الذي بدا وكأنه يعلم الكثير، فسأله موسى:
ـ طيب وبعد ما زاد مشيت، رضوان عمل إيه؟ وإيه اللي حصل بعد كده؟
أجابه الرجل:
ـ رضوان نقل لبيت جديد، وبدأ حياة جديدة ببداية مختلفة. أما حبيبة، فاتخرجت من كلية الطب، واتعينت في مستشفى حكومي، وبدأت تخصصها في طب الأطفال كطبيبة مقيمة، ولسه قدامها سنتين تكمّل فيهم تخصصها وتبقى أخصائية أطفال.
سأل موسى من جديد:
ـ طيب وكريم وعصام وعزت ورباب والناس دي حصل معاهم إيه؟
ـ كريم عايش وسط بيته وولاده حواليه، ومراته لسه بتهتم بيهم زي الأول وأكتر. وعصام عنده ولد وبنت ولسه شغال مع والده. ونجيب وابنه لسه في السجن، وصفوت وعزت خلصوا مدتهم وخرجوا. رباب بقى اتطلقت وبتربي بنتها، وعزت شغال في ورشة حدادة وشقيان، ومحدش بقى يقف جنبه، أي حد بقى يخاف منه بعد غدره بصاحبه.
ظل موسى يستمع إليه باهتمام، ثم قال متسائلًا:
ـ طيب وزاد، إيه حصل معاها؟
أجابه الرجل بصوت خشن:
ـ محدش يعرف، في ناس بتقول إنها سابت البلد ومشيت.
تعجب موسى، وقال:
ـ يعني رضوان طول الـعشر سنين من آخر مرة اتقابلوا فيها ما شافهاش تاني؟
تنهد الرجل من كثرة الأسئلة، وقال:
ـ إنت بتسأل كتير وأنا مخي وجعني منك، والسما غيمت خلاص، على وشك تمطر، بس هريحك للأسف. لا.
لا رضوان حاول إنه يدور عليها، ولا زاد رجعت تسأل عن رضوان.
حزن موسى لأجل رضوان، وكان يتمنى أن تنتهي قصتهما على خير، فقال بحزن:
ـ معلش، آخر سؤال يعني، هو كده رضوان خسر كل حاجة؟
تنهد الرجل، ثم أدرك أنه لا بد أن يقدم له النصيحة، فأجابه:
ـ رضوان ضحى بنفسه، نسى نفسه يا موسى. وعشان كده أنا حكيتلك قصته كلها علشان ما تغلطش غلطته وتبقى زيه.
ـ إنت لازم تكمل تعليمك وتساعد أمك وأخواتك في المصاريف. وعايزك تعرف إنك لو ما كملتش تعليمك هتاكل وهتشرب والحياة هتستمر، وبرضه لو كملت تعليمك هتاكل وتشرب والحياة هتستمر.
ـ بس الفرق بين الاتنين إن الأول هتاكل وتحس بمرارة الشقى والجهل، أما التاني هتحس بطعم النجاح.
سكت قليلًا، ثم أكمل:
ـ رضوان تناسى نفسه وكان عايز يعمل نفسه دور الضحية لحد ما بقى ضحية فعلًا. ظلم نفسه والعمر جري بيه، ولو كل واحد فكر زيه هيبقوا كتير قوي. أي نعم لحق نفسه متأخر، وأي نعم كمل تعليمه، بس كان عمره خلاص وصل الأربعين، يعني كأنه بيجري ورا سراب مالوش آخر، دايمًا يوصل متأخر.
تنهد موسى، وقال بحزن:
ـ بس كده، حرام اللي حصل لرضوان ده ظلم، إيه ذنبه علشان يوصل الحال بيه لكده؟ وليه كل مايقرب من حد ويطلع جدع معاه، يتخذل فيهم بالشكل ده؟
وضع الرجل يده على كتف موسى ناصحًا له، وقال:
ـ الدفا يا موسى، بلاش تديهم كل الدفا اللي جواك، حسسهم بشوية برد علشان يلجأولك ويدفوا فيك.
ـ الحياة علمتنا إن من أجل عيش الآخرين، يجب أن تعيش أنت أولًا.
صمت موسى للحظة، مستوعبًا كلمات الرجل، يعيد التفكير فيما تلقاه رضوان بعد تضحياته المتتالية.
شعر أنه يقف أمام طريقين، وعليه أن يختار الطريق الذي يضمن له مستقبلًا أفضل، له ولعائلته، دون خسائر أو ندم.
نهض موسى، ونظر إلى الرجل، وشكره على نصيحته الغالية، واعدًا إياه بأنه سيتخذ القرار الأفضل دائمًا، ثم ودعه.
ظل الرجل ينظر إليه حتى اختفى عن ناظريه، وقد ارتسمت على وجهه ابتسامة حانية.
وبعد لحظات، دخل شاب إلى المكتبة، وتوجه نحو الرجل، بينما كانت عيناه تتفقدان الكتب، ثم سأله:
ـ جبتلي الكتاب اللي طلبته منك يا أستاذ رضوان؟
ابتسم رضوان، وحرك رأسه بنعم، ثم ذهب ليجلب له الكتاب.
نعم...
هذا الرجل هو رضوان.
بعد مرور عشر سنوات، حدث فيها الكثير والكثير له.
كان أهم ما حدث أنه اتخذ أهم خطوة في حياته، وأكمل تعليمه حتى الجامعة، وحصل الآن على بكالوريوس إدارة أعمال.
ترك العمل في مجال الحدادة، وأصبح يعمل محاسبًا في مصنع، وصنع لنفسه مكتبة خاصة على طريق جانبي، يقضي فيها أيام راحته بين الكتب.
رفض الزواج مرة أخرى، ووهب نفسه لرعاية شقيقته الصغرى، التي أصبحت الآن دكتورة.
كان فخورًا بها، وهو نفسه الذي روى لموسى حكايته، حتى لا يخسر حياته مثلما فعل هو في السابق.
جلب رضوان الكتاب للفتى، وشكره، ثم مضى الفتى في طريقه.
رفع رضوان عينيه إلى السماء، وظل يتطلع إليها للحظات، وشعر بالرضا الكامل في داخله.
لم تكن الشمس قد ظهرت حتى الآن منذ الصباح، وتغير الجو من حوله، وعلم أنها ستمطر قريبًا.
وهكذا، لم تكن حكاية رضوان حكاية رجل خسر كل شيء...
بل حكاية رجل أدرك، وإن كان متأخرًا، أن الإنسان لا يجب أن يضحي بنفسه حتى يعيش الآخرون.
وأن الحب، مهما كان صادقًا، لا ينبغي أن يكون سببًا في ضياع الإنسان لنفسه.
لقد خسر رضوان سنوات من عمره، وخسر حبًا ظن يومًا أنه لن يستطيع الحياة بدونه، لكنه في النهاية ربح شيئًا لم يكن يملكه من قبل...
ربح نفسه.
وربما كانت تلك هي البداية الحقيقية لحياته.
شعر بالبرد، فنفث في يديه محاولًا تدفئتهما قليلًا، ثم دثر عنقه بياقة البالطو الذي يرتديه، ودخل إلى المكتبة ليعد كوبًا من الأعشاب الدافئة، وفي أثناء ذلك شغّل تسجيلًا لأم كلثوم، فصدح صوتها في أرجاء المكان: «سنين ومرت زي الثواني في حبك إنت، وإن كنت أقدر أحب تاني، أحبك إنت»
قبل الغروب بقليل، توقفت سيارة فخمة أمام المكتبة.
نزلت منها امرأة أنيقة، لم يظهر وجهها بوضوح، وكان يبدو عليها الوقار، ثم توجهت نحو المكتبة.
وقفت عند الباب، وسألت بصوت ناعم:
ـ ألاقي عندك كتاب عن تطوير الذات؟
كان رضوان يعطيها ظهره، ممسكًا بملعقة صغيرة يقلب بها كوبه، مستمعًا إلى كلمات المقطع التي لامست جرحًا قديمًا في قلبه.
وما إن رن ذلك الصوت في أذنه، حتى تجمدت يده في مكانها.
ترك الملعقة ببطء، وعادت إلى ذهنه ذكريات قديمة لم ولن تُنسى.
ارتسمت ابتسامة على شفتيه، وتزامنت معها دقات قلبه التي بدأت تتسارع بطريقة لم يعهدها منذ سنوات.
التفت إليها ببطء.
وما إن وقعت عيناه على وجهها، حتى شعر وكأن السنوات العشر الماضية لم تمر.
كانت هي...
لم يتغير وجهها كثيرًا عبر السنين.
ومع اندفاع دقات قلبه، التي كادت تخرج من صدره، وضع يده على قلبه، مسندًا إياه، وكأنه يحاول تهدئته.
نعم...
إنها هي.
زاد.
المرأة التي لم يرها منذ عشر سنوات.
كانت لا تزال واقفة عند عتبة باب المكتبة، وعيناها تلمعان بشوق كبير، بينما قالت بدقة قلب تمردت رغمًا عنها:
ـ رضوان؟
لم يدرِ ماذا يفعل، ولا لماذا يشعر بهذا الحجم من السعادة.
تارة يبتسم، وتارة يضحك، وتارة ينظر إليها غير مصدق.
أعوام كثيرة مضت، وأيام توالت، لكن بداخله كان يقين ما يخبره أنه سيراها مجددًا، حتى يتجدد ما هلك من روحه.
همس إليها في تعجب، وكأنه لا يصدق ما تراه عيناه:
ـ زاد؟
ظنت أنها نسيته، وأن حبه ذهب بعيدًا، لكنها لم تستطع التحكم في قلبها.
حاربت ضربات قلبها حتى لا تنبض له...
حتى هُزمت.
وأجابته بابتسامة مترددة:
ـ أيوه، زاد. إزيك يا رضوان؟
اقترب عدة خطوات، حتى وقف أمامها مباشرة، وكأنه يريد أن يتأكد أنها حقيقة وليست خيالًا من خيالات الماضي.
وتيقن أنها أمامه فعلًا، فأجاب:
ـ بخير، الحمد لله.
ساد الصمت بينهما.
شعرت زاد بالتوتر والارتباك، بينما انتبه رضوان إلى نفسه أخيرًا، ولملم أعصابه المتفرقة، ثم تحدث:
ـ إنتِ إزيك وعاملة إيه؟
ـ بخير، الحمد لله.
ـ إزاي؟
ـ إيه؟
ـ قصدي، إزاي عرفتي إني هنا؟
ثم خبط على جبينه، لاعنًا نفسه، وقال:
ـ آسف، نسيت أقولك: اتفضلي، تعالي اقعدي.
جلست بتحفظ وهي تشكره، ثم أكملت حديثها مجيبة:
ـ أنا نزلت مصر من كام يوم بس بعد تسع سنين سفر، وبفكر أستقر هنا على طول.
اتسعت ابتسامته فرحًا.
ثم نظر إليها رضوان طويلًا، وكأنه يقارن صورتها أمامه الآن بتلك التي احتفظ بها في ذاكرته طوال السنوات الماضية. لم يجد فرقًا كبيرًا؛ نفس الملامح الهادئة، ونفس الهيئة التي ما زالت عالقة في ذاكرته.
تنهد وقال:
ـ عشر سنين عدوا بس لسه زي ما إنتِ.
ابتسمت، وقد فهمت ما يقصده، ثم تأملته هي الأخرى للحظات، وكأنها تستعيد صورته القديمة في ذاكرتها، قبل أن تقول:
ـ ميرسي، وإنت كمان متغيرتش كتير.
لكن فرحته لم تدم طويلًا.
فما إن وقعت عيناه على الخاتم في إصبعها الأيسر، حتى تراجع ذلك الشعور داخله.
حتماً هي متزوجة الآن.
ولا يجب عليه أن يسمح لنفسه بأن يفرح أكثر من ذلك.
تحطم قلبه مرة أخرى، وعاد إلى الواقع، لكنه حافظ على رباطة جأشه، وسألها:
ـ وحسين بيه أخباره إيه دلوقتي؟
حركت رأسها مبتسمة:
ـ بيحاول يكون كويس، صحته مبقتش زي الأول، لكن بيلاقي نفسه في شغله. إنت عارفه، عنيد.
حرك رأسه موافقًا على كلامها بابتسامة.
ثم نظرت زاد إلى المكتبة بانبهار، رغم صغر حجمها، وقالت:
ـ جميلة المكتبة، ورقيقة، وكل شيء تحس إنه في مكانه. مترتبه حلو اوي.
ـ متشكر جدًا، حاجة كده على قدي.
ثم سألته:
ـ طمني على حبيبة، عاملة إيه؟
أجابها رضوان بفخر عن كل ما وصلت إليه شقيقته.
فرحت زاد لأجل حبيبة، ثم سألها رضوان كيف وجدته، فأجابته أنها مرت بالصدفة و وجدت المكتبة وكانت تريد كتابا.
كانت تحدثه، بينما كانت عيناها تسترقان النظر إلى يديه، تبحثان عن خاتم الزواج.
أرادت أن تعرف...
أن تطمئن...
وازداد فضولها، فقالت بأسلوب مبطن:
ـ عشر سنين عدت بسرعة، أكيد دلوقتي ولادك في المدرسة؟
ابتسم إليها وقال:
ـ لا، ولاد إيه! أنا متجوزتش.
صُدمت بحزن شديد لأجله، وسألته عن سبب عدم زواجه، لكنه فضل الصمت وعدم الإجابة.
شعرت بالذنب، وظنت أنها السبب في جعله وحيدًا كل تلك السنوات.
ثم سألها هو أيضًا، حتى يطمئن قلبه:
ـ وإنتِ اتجوزتي؟
ابتسمت وأجابته:
ـ ومعايا قاسم، سبع سنين.
تجلى قلبه، واعتدل في جلسته، وقال:
ـ ما شاء الله، ربنا يحفظه.
ثم حمحم وقال:
ـ تشربي إيه؟ عندي قهوة وشاي وأعشاب، تحبي إيه؟
تنهدت مبتسمة، وقالت:
ـ أحب إنك تتعرف على قاسم إذا ما فيش عندك مانع.
رحب جدًا، منتظرًا أن تفتح هاتفها حتى يرى صورته.
لكنها قامت من مكانها، ثم نادت على صبي يجلس داخل السيارة، يمارس الألعاب على هاتفه:
ـ قاسم، تعالى يا حبيبي.
نزل طفل صغير في السابعة من عمره، لديه شعر ناعم يغطي جبينه، ويرث النمش في وجنتيه مثل أمه، ويبدو عليه الهدوء الشديد، ثم توجه نحو المكتبة.
نظرت زاد إلى رضوان وقالت:
ـ ابني، قاسم.
نظر رضوان إلى الطفل بابتسامة دافئة، ومد يده كي يصافحه.
لكن الطفل ارتبك واختبأ خلف أمه، واضعًا إصبعه في فمه.
تعجب رضوان، ثم ابتسم، ظنًا منه أنه صبي خجول.
نزلت زاد إلى مستوى طفلها، وهمست إليه برفق حتى يصافح الرجل الذي يقف أمامه.
مد الطفل يده، وقال بنبرة هادئة:
ـ هاي عمو.
صافحه رضوان بابتسامة، ثم مسح على شعره الناعم وقال:
ـ هاي يا قاسم، تعرفي إنه شبهك أوي، بس خجول حبتين، ربنا يحفظهولك.
ـ ميرسي يا رضوان، هو قاسم فعلًا بيحب يكون ساكت أكتر الوقت.
ـ طيب تعالوا اقعدوا وأنا هعمل حاجة تشربوها بسرعة.
ردت مسرعة:
ـ لا ميرسي، خليها مرة تانية، أنا اتأخرت ولازم أمشي.
ابتسم لها، ثم تذكر شيئًا، وطلب منها الانتظار.
ذهب إلى زاوية في المكتبة، وأخرج كتيبًا متوسط الحجم من صندوق صغير، ثم قدمه لها قائلًا:
ـ اتفضلي. الكتاب ده.
شكرته على لطفه، وقامت لتدفع ثمن الكتيب، لكنه رفض بشدة أن يأخذ ثمنه، معترفًا لها بأن تعتبره هدية لقاسم الصغير.
شكرته ثانية لشدة ذوقه، ثم ودعته لتذهب.
مسح على شعر الصبي قبل ذهابه.
ومدت زاد يدها لأول مرة لتصافح رضوان.
نظر إليها في ارتباك، ثم مد يده، واضعًا كفه في كفها.
في تلك اللحظة، دقت قلوبهما بدقات متمردة، وكأن عشر سنوات كاملة لم تستطع أن تطفئ شيئًا ظل حيًا بداخلهما.
ودعته، وأشارت له وهي تستقل السيارة، بينما جلس الصبي بجانبها، ثم تحركت وذهبت بعيدًا.
ظلت عيناه تتبعان أثر السيارة حتى اختفت.
ظل واقفًا للحظات، مستوعبًا كيف تغيرت حياتهما خلال السنوات التي مرت.
كان الغروب ينسج ألوانه الجميلة على أفق المدينة، والسماء تكاد تمطر.
وعلم الآن لماذا لم تسطع الشمس منذ الصباح...
فنورها يضاهي كل شمس تمر عليها.
همس إلى نفسه وقال:
ـ حقًا لم أتوقع أن تجمعنا الأقدار هنا مرة أخرى.
تذكر ما حدث له في الماضي، وجلس على مقعده شاردًا في فكره، وغارقًا فيه.
---
وعلى جانب الطريق، توقفت زاد بسيارتها بعدما ابتعدت عن المكان الذي يوجد فيه رضوان.
نظرت إلى الكتاب الذي أعطاه لها.
أمسكته، وقرأت عنوان الكتاب:
«عندما تبتسم النجوم».
تعجبت من الاسم، ثم قلبت بين صفحاته، لتجد ورقة مطوية نصفين بداخله.
فتحتها بفضول، وقرأت ما تحتويه:
"في يوم من الأيام سألت الفتاة الثرية الفتى الفقير: كيف تصلي وتشكر الله وأنت في هذه الحال من الفقر والعوز؟
أجاب الفتى: أصلي وأشكر الله لأن الإيمان والتقوى ليسا مرتبطين بحالتي المادية، والشكر لله واجب في كل حال، فقد كان النبي محمد صلى الله عليه وسلم يقول: عجبًا لأمر المؤمن، إن أمره كله له خير، وليس ذلك لأحد إلا للمؤمن؛ إن أصابته سراء شكر فكان خيرًا له، وإن أصابته ضراء صبر فكان خيرًا له. (رواه مسلم).
في كل صباح أستيقظ فيه وأرى الشمس تشرق، وفي كل ليلة أنام فيها بسلام، أعلم أن لديَّ هبة عظيمة لا يملكها كثيرون.
أملك سماءً أرفع إليها دعائي، وأرضًا تحملني بثبات.
بهذا الإيمان، أشعر بأنني أغنى إنسان على وجه الأرض.
الإيمان ليس بما نملك من مال، بل بما نملك من رضا وقناعة.
الفقر هو امتحان من الله، وبه نثبت صبرنا وشكرنا له.
أجد في صلاتي وسيلة للتواصل مع الله، أطلب منه الرحمة والرزق، وأشكره على ما أنعم به عليَّ من نعمة الإيمان والصحة، وأثق أن الله كريم ويعوضني بما هو خير."
أغلقت الورقة، وأغمضت عينيها، لتتذكر عندما سألت هذا السؤال إلى حبيبة قبل أن تنقلب حياتها، ولم تجد إجابة إلى الآن، حتى أجابها رضوان.
تنهدت بعمق.
وفجأة، صدح الهاتف في يد الصبي، فسقط منه على أرضية السيارة.
انتبهت له زاد، وخفضت رأسها لتأتي بالهاتف، وهي تقول:
ـ على مهلك يا قاسم، مين بيتصل يا حبيبي؟
وضع الصبي إصبعه في فمه، وقال:
ـ بابي.
جلبت الهاتف، وأجابت على الاتصال، وهي تقول:
ـ أنا في الطريق، نص ساعة ونوصل البيت.
أغلقت الهاتف، ونظرت إلى صغيرها مبتسمة، وهي تنزع إصبعه من فمه برفق، وتقول:
ـ خلاص، كل حاجة هتكون كويسة.
ـ مامي، أنا هافتح إزاز الشباك.
ضغط الصغير على الزر، وكان الهواء شديدًا بسبب سوء الأحوال الجوية، فجاء مباشرة على وجه الصبي وزاد، حتى تطاير شعرها وظهرت ندبات على عنقها.
همت مسرعة لتغلق الزجاج، وهي تقول منفعلة:
ـ قاسم، ميت مرة قلتلك متعملش أي حاجة من غير ما تقولي، إنت فاهم؟
أجابها الصبي وهو ينظر إلى الأرض بخجل:
ـ سوري مامي.
تنهدت بضيق، واحتقن وجهها، ثم أعادت رأسها مستندة إلى مقعد السيارة، ونظرت إلى الطريق، وشغلت المحرك، وذهبت.
---
تغيرت السحب في لحظة، وعلا صوت الرعد لينذر الناس، ويتأهبوا لمطر غزير.
اشتد البرد على رضوان، وقلت الخطى في الشوارع لسوء الأحوال الجوية، فرأى أنه من الأفضل أن يعود إلى البيت الآن، فقد اقترب موعد عودة حبيبة.
قام ليضع كل شيء في مكانه ويرتبه.
رن هاتفه، فأجاب شقيقته دون تردد، قائلًا:
ـ إيه يا بيبو، خلصتي ولا لسه؟
أجابته وهي جالسة على فراش المرضى، وترتدي جوربها إثر الصقيع، برجفة واستياء:
ـ بيبو إيه بس يا رضوان يا جدعان، أنا دكتورة، دكتورة. أغنيهالك؟
ضحك وقال متسائلًا:
ـ ماشي يا دكتورة، ها، بقى مالك متعفرة ليه ومزاجك قالب وشه الناحية التانية؟
أجابته بضجر:
ـ أقسم بالله يا رضوان، أنا خلاص زهقت من الشغل الحكومي. إمتى بس أتخصص وأفتح مستشفى خاصة ليا؟
قهقه عاليًا من سقف طموحاتها الذي ليس له حدود، وقال:
ـ مستشفى خاصة مرة واحدة؟ طيب قولي، أوضة مشتركة في مركز، وبعدها ربنا يفرجها وتفتحي عيادة محندقة. إنما مستشفى خاصة، يا بجاحة أحلامك يا شيخة.
قالت بمكر:
ـ ومنحلمش ليه والدنيا فيها رضوان؟
ـ يا بكاشة، أنا آخري معاكي جبته. اعتمدي على نفسك، وبعدين بطلي رغي بقى، أنا حاسس إني هتجمد من البرد ولازم أرجع البيت. وإنتِ كمان هتخلصي وترجعي إمتى؟ ولا أجي أجيبك؟
نهضت مسرعة، ترتدي حذاءها وتجمع أغراضها، وأخبرته بعدم المجيء، فهي لم تعد صغيرة.
وقالت إنها ستعود الآن، لكنها تشعر بالجوع الشديد.
فأخبرها أنه أعد الطعام قبل مجيئه إلى المكتبة.
تحمست وسألته ماذا أعد اليوم على العشاء.
جلب رضوان المظلة، وأخذ مفاتيحه، وأجابها بتلقائية:
ـ هو في غيره اللي مشرفنا ومدفينا في التلج ده؟ طبق عدس محترم هتاكليه من هنا، وكمية كوابيس هتكبس عليكي، ولا أجدعها حكومة.
هبطت درج المشفى لتخرج خارجها، وهي تقول بضجر وإحباط:
ـ عدس يا رضوان! الله يسامحك والله، بقى أنا اللي عاملة حسابي على عشا معتبر منك، وصحابي فضلوا يحلفوا عليا أفطر معاهم الصبح، وأنا أقول أبدًا، يمين عظيم ما أكل غير مع أخويا اللي مربيني.
لم يمل من مشاغبتها، فهو يعلم أنها تواري عليه بالحديث، ويعلم أيضًا أنها لا تفضل هذا النوع من الطعام.
خرج من المكتبة، واضعًا مظلته تحت إبطه، وسحب الباب ليغلقه، وأخبرها بحب وحنان:
ـ وأنا ما يهونش عليا أسيبك تنامي من غير عشا. تعالي بس وهعملك اللي إنتِ عايزاه، واخلصي بقى واقفلي علشان الدنيا هتمطر، لعله مطر خير.
أشارت إلى السيارة بابتسامة عريضة، وهي تخبر أخاها:
ـ ربنا ما يحرمنيش منك يا أجمل رضوان ربنا خلقه.
هطل المطر فجأة بغزارة.
أغلقت حبيبة الهاتف مسرعة، وركبت السيارة بعدما تبللت نسبيًا.
بينما اعتدل رضوان مسرعًا ليفتح المظلة، واضعًا إياها فوق رأسه، وتحرك مسرعًا يجري هروبًا من زوبعة الأمطار.
فتح باب سيارته القديمة، وهو يشعر بالرضا نحوها؛ فهي تفي بالغرض وتؤدي جميع متطلباته.
سار بها وذهب.
تساقطت مياه الأمطار بكثرة على اليافطة الخشبية بجانب المكتبة، وأزالت المياه الغبار الكثيف عنها، وتبين اسم المكتبة أكثر وضوحًا الآن.
كانت اليافطة مكتوبًا عليها:
«مكتبة زاد الأسمر».
تلمع تحت المطر، لتشهد على فصل جديد في حياة رضوان.
وما إن وصل إلى المنزل، حتى صعد وأغلق الباب خلفه.
تبدلت ملامحه إلى العبوس.
ذهب إلى غرفته الخاصة، وفتح خزانته، وبحث في درجها الخاص، ليخرج صورة.
كانت صورة لزاد.
ظل ينظر إليها بوجهه المبلل، وعيناه اللتان غلب دمعهما مياه المطر.
فهو الآن ليس لديه الحق في الاحتفاظ بها، بعدما علم أنها أصبحت لغيره، ومنذ سنوات عدة.
خرج إلى الشرفة.
غطت المياه الصورة التي في يده، ثم مزقها نصفين.
ومعها، تمزق قلبه كالصورة أمامه.
رضي بما قسمه الله له، وابتسم بعد ذلك برضا.
فهو الآن يشعر بأنه لن ينقصه شيء من الحياة.
في حقل الحب، كنت وردة في يديك، لكن الرياح الباردة من خيباتك قد هبت بقوة، تتركني هنا وحيدًا، أتألم وسط حقول الذكريات الجافة.
---
وقفت سيارة زاد أمام منزلها.
كان منزلًا عريقًا وكبيرًا.
نزلت وهي تضع الوشاح على كتفيها لتشعر بالدفء، وأشارت إلى ابنها ليسير بجانبها، بينما كانت ترفع المظلة لتحميه من مياه المطر.
وما إن ولجا المنزل، حتى صعد قاسم مسرعًا إلى غرفته، والخادمة خلفه لتبدل له ملابسه.
أما زاد، فصعدت إلى غرفتها.
وما إن وطأت قدماها الغرفة، حتى انقبض قلبها، واتسعت عيناها، وارتجف بدنها بالكامل أمام من يقف داخل غرفتها الخاصة.
واستمعت إلى نبرته التي تبغضها أكثر من أي شيء آخر:
ـ إيه مالك يا زاد، مفاجأة حلوة مش كده!
من هذا الرجل؟
الذي ما إن رأته زاد حتى فزعت، وجف حلقها، وارتجف قلبها؟
ولماذا صرخت بصغيرها قبل ذلك؟
وبمن تزوجت؟
وماذا يحدث؟
كل هذا سنعرفه وأكثر من خلال أحداث الجزء الثاني من «زاد الأسمر».
النهاية
تم بحمد الله.

تعليقات✍️ أضف تعليقًا
إرسال تعليق