قصص وروايات مريم نصار

قصص وروايات مريم نصار: المدونة الرسمية للكاتبة والروائية المصرية مريم نصار. هنا تقرئين حكايات تلمس القلب وتشبه تفاصيل حياتنا: روايات وقصص تجمع بين الرومانسية والدراما والتشويق، بأسلوب قريب من القارئ وشخصيات تعيش معك بعد الفصل الأخير. تُنشر كل رواية فصلًا بفصل بترتيب منظم ومريح للقراءة، وتقدرين تتابعين الفصول الجديدة أولًا بأول. أهلًا بك في عالم مريم نصار.

الفصل الثاني والعشرون. زاد الآسمر


 


الفصل الثاني والعشرون. زاد الآسمر. الجزء الثاني.



في غرفته الخاصة.......


كان فريد يجلس على كرسيه الهزاز، يتحرك ببطء للأمام والخلف في إيقاع هادئ يتناسب مع طبعه البارد.


لا شيء في ملامحه كان يوحي بما يدور داخله.


فريد من أولئك الأشخاص الذين يصعب معرفة ما يفكرون فيه حتى وهم ينظرون مباشرة إلى عينيك.


وبين أصابعه كان يمسك ظرفًا أنيقًا.


ظل يقلبه للحظات.


قبل أن يفتحه أخيرًا.


أخرج منه بطاقة الدعوة.


وما إن وقعت عيناه على الاسم حتى أدرك أنها دعوة لحضور زفاف فارس الحسيني.


استند أكثر إلى ظهر الكرسي.


ورفع البطاقة تحت ذقنه.


وعيناه تستقران عليها في صمت.


لماذا دعاه فارس؟


هذا هو السؤال الذي استقر في رأسه فورًا.


فارس يعلم.


أو على الأقل يعرف جزءًا من الحقيقة.


يعرف أن هناك شيئًا غامضًا جرى خلف ما حدث مع رضوان.


ويعرف أن اسم فريد ليس بعيدًا عن المشهد.


إذًا...


لماذا الدعوة؟


هل هي مجاملة؟


أم رسالة؟


أم محاولة لمعرفة شيء؟


ظل يفكر.


يحرك البطاقة بين أصابعه ببطء.


حتى قطع شروده رنين الهاتف.


نظر إلى الشاشة.


فوجد اسم مهاب.


توقف للحظة.


فهو يتجاهل اتصالاته منذ يومين.


وكان يظن أن فارس أخبره بكل شيء.


لكن يبدو أن الأمور لا تسير بهذا الشكل.


ضغط زر الإجابة.


ووضع الهاتف على أذنه.


وفي اللحظة التالية جاءه صوت مهاب الغاضب:


ــ إيه يا عم فريد؟


ــ بتصل عليك من يومين وسيادتك سايق العوج عليا؟


ــ ولا إنت فاكر من آخر مرة بكلامك الخايب ليا في الشركة إني هقطعك يعني؟


ــ مع إنك بعد عمايلك معايا تستاهل إني ما أعبركش ولا أعرفك في طريق.


ابتسم فريد بهدوء.


وقال:


ــ ليه بس يا مهاب؟


ــ كان عندي شغل مهم.


رد مهاب ساخرًا:


ــ شغل مهم يخليك ما تردش عليا؟


ــ تمام يا فريد.


ــ خليك براحتك.


ارتسمت ابتسامة أخرى على شفتي فريد.


وقال:


ــ حمد لله على سلامتك الأول يا صاحبي.


قال مهاب:


ــ يعني عارف إني كنت مسافر ورجعت...


ــ طيب اسأل عليا.


ــ فين حق الصحوبية يا عم فريد؟


قال فريد:


ــ من آخر مرة إنت قطعت.


ــ فقلت لنفسي أسيبك شوية.


ــ وبعدها أشدك.


ــ بس إنت ما اتأخرتش في اتصالك.


ضحك مهاب.


وقال:


ــ يا أخي يخرب بيت ثقتك اللي هتوديك في داهية دي.


قهقه فريد.


وقال:


ــ صعب جدًا حوار الداهية دي.


ــ احلم يا مهاب.


قال مهاب:


ــ ماشي يا أخويا.


ــ بس ده مش موضوعنا.


ــ ضيعت عليك كتب كتاب فارس؟


ابتسم فريد لنفسه.


فهو يعلم كل شيء.


بل ويعرف تفاصيل أكثر مما يعرفه مهاب نفسه.


ومع ذلك قال متعجبًا:


ــ معقول؟


ــ فارس كتب كتابه؟


ــ ده إمتى ده؟


رد مهاب:


ــ أول إمبارح.


ــ وكان يوم جميل جدًا.


ــ وكنت عايزك معايا.


ــ بس إنت بقى مش فاضي.


ــ أو مش معبرنا بمعنى أصح.


قال فريد بهدوء:


ــ قلبك أبيض يا مهاب.


ــ وتتعوض في الفرح.


ــ المهم بقى الفرح إمتى؟


قال مهاب:


ــ فارس أكيد بعت لك كارت دعوة.


ــ إنت ما شفتوش ولا إيه؟


ــ ولا لسه ما وصلش؟


نظر فريد إلى البطاقة الموجودة في يده.


ثم قال وكأنه يفكر للتو:


ــ آه.


ــ في كارت وصل وموجود على المكتب.


ــ لكن لسه ما فتحتوش.


ــ أكيد هو.


ــ هبقى أبص عليه.


قال مهاب:


ــ تمام.


ــ عمومًا الفرح يا سيدي الخميس الجاي.


ــ أنا اتصلت عليك بنفسي علشان أعزمك مباشر.


ــ جهز نفسك إنت والمدام.


ــ وما تنساش تجيب معاك قاسم الصغير.


قال فريد بنبرة هادئة يصعب تفسيرها:


ــ أكيد هكون هناك على الميعاد.


ــ وألف مبروك.


انتهت المكالمة.


وبقي الهاتف في يده لثوانٍ.


ثم أنزله ببطء.


ونظر مرة أخرى إلى بطاقة الدعوة.


وظل صامتًا.


وعيناه ثابتتان فوق الاسم المكتوب أمامه.


مرر إصبعه فوق اسم فارس.


ثم عاد بذاكرته إلى المكالمة القصيرة التي جمعته بمهاب قبل قليل.


لم يسمع شكًا.


ولا اتهامًا.


ولا حتى تلميحًا واحدًا.


بل على العكس...


كان كل شيء يبدو طبيعيًا بصورة مريحة.


أراح ظهره إلى الكرسي.


وتنفس ببطء.


بينما استقرت ابتسامة صغيرة فوق شفتيه.


ابتسامة واثقة.


هادئة.


وكأنها جاءت لتؤكد ما كان ينتظره.


لو كان فارس يعرف شيئًا...


لما وصله كارت الدعوة أصلًا.


ولو كان رضوان قد اكتشف الحقيقة...


لما سمح له أحد بالاقتراب من ذلك الفرح.


أما مهاب...


فقد بدا كعادته تمامًا.


يتحدث معه بلا حذر.


وبلا شكوك.


وبلا أسئلة.


مال برأسه إلى الخلف.


وأغمض عينيه للحظة.


شاعرًا أن الأمور عادت إلى مسارها الصحيح.


وأن ما حدث خلال الأيام الماضية...


انتهى كما أراد هو أن ينتهي.


وأخيرًا...


ألقى بطاقة الدعوة فوق الطاولة.


وعاد الكرسي الهزاز يتحرك ببطء إلى الأمام والخلف.


بينما ارتسمت فوق شفتي فريد ابتسامة واثقة.


ابتسامة رجل يظن...


أن الجميع ما زالوا يلعبون داخل الدائرة التي رسمها هو بنفسه.


********


على جانب آخر...


كان حسين يجلس في منزله.


هادئًا كعادته.


إلا أن القلق لم يكن يفارق قلبه منذ فترة.


قلق الأب الذي يرى الأمور تخرج من بين يديه شيئًا فشيئًا، دون أن يملك القدرة على إعادتها كما كانت.


وفي تلك اللحظة...


دخل زيدان إلى الغرفة.


وفي يده بطاقة دعوة أنيقة.


تقدم بها نحو حسين في صمت.


فتناولها الأخير.


وألقى نظرة سريعة على ما كُتب بداخلها.


وما إن قرأ الأسماء...


حتى ارتسمت ابتسامة هادئة فوق وجهه.


ابتسامة صغيرة.


لكنها كانت صادقة.


رفع عينيه نحو زيدان.


فقال الأخير على الفور:


ــ أؤمر معاليك.


أعاد حسين نظره إلى بطاقة الدعوة للحظة.


ثم قال بهدوء:


ــ جهز أحلى بوكيه ورد تهنئة.


ــ ابعت واحد على فيلا الحسيني.


ــ وواحد تاني على بيت رضوان.


ــ وكارت التهنئة باسمي على كل بوكيه.


ــ فاهم يا زيدان؟


أومأ زيدان فورًا.


وقال:


ــ فاهم يا باشا.


حرك حسين رأسه برضا.


فاستأذن زيدان وانصرف لتنفيذ ما طُلب منه.


أما حسين...


فظل ممسكًا ببطاقة الدعوة بين يديه.


وأعاد النظر إليها مرة أخرى.


ثم تنهد ببطء.


تنهدة خرجت من أعماق قلبه.


فبرغم كل ما حدث...


وبرغم القلق الذي يسكنه على ابنته...


وبرغم المخاوف التي لا تغادر عقله...


ظل بداخله جزء صغير يتمسك بالأمل.


أمل أن تهدأ العواصف أخيرًا.


وأن تصل الأمور إلى النهاية التي يتمناها.


وأن يكتب الله السعادة لمن يحبهم جميعًا.


خفض عينيه إلى بطاقة الدعوة مرة أخيرة.


ثم وضعها أمامه.


بينما بقيت في قلبه أمنيات كثيرة...


لا يزال ينتظر أن تتحقق.

***********


كانت حبيبة ما تزال نائمة في غرفتها بعمق.


نومًا طويلًا وثقيلًا كأنها تحاول أن تعوض كل السهر الذي عاشته خلال الأيام الماضية.


أما رضوان...


فكان يقف في المطبخ.


منشغلًا بإعداد الطعام الذي تحبه بنفسه.


يتنقل بين الأواني.


ويقطع الخضروات.


ويرتب كل شيء بعناية اعتاد عليها.


رفع عينيه إلى ساعة الحائط.


فوجد العقارب تشير إلى الثالثة عصرًا.


زفر بضيق.


وقال وهو يواصل التقطيع:


ــ وبعدين بقى في البت دي؟


ــ المفروض تصحى وتقعد معايا.


ــ هي هتقضي اليومين اللي باقيين ليها معايا نوم ولا إيه؟


سكت فجأة.


وتوقفت يده عن الحركة.


وظل ممسكًا بالسكين في مكانه للحظات.


شعر أنه على وشك الدخول في دائرة من الحزن لا يريدها.


الدائرة نفسها التي ظل يهرب منها منذ قرر تحديد موعد زفافها.


ابتلع غصته سريعًا.


وهز رأسه لنفسه.


وقال بحزم:


ــ مش وقته يا رضوان.


ــ إنت عندك مسؤولية.


ــ وده اللي لازم يحصل.


ــ حبيبة مسيرها.


ــ في يوم من الأيام هتتجوز وتسيبك.


نفض الفكرة من رأسه.


وألقى السكين جانبًا.


ثم خرج من المطبخ قائلًا:


ــ لما أروح أصحيها أحسن.


اتجه إلى غرفتها.


وخبط على الباب مرة.


ثم مرة ثانية.


وقال بصوت مرتفع حتى تسمعه:


ــ حبيبة.....قومي يلا.


ثم خبط مرة أخرى.


فجاءه صوتها النعسان من الداخل:


ــ استنى شوية يا رضوان.


ــ سيبني نايمة.


قال فورًا:


ــ قومي يا دكتوره.


ــ العصر قرب.


ــ وإنتِ نايمة من امبارح.


ــ اخلصي.


نفخت بتعب.


واعتدلت في فراشها بنعاس.


وقالت:


ــ يا سيدي ما تسيبني نايمة... هى الدنيا طارت.


قال رضوان بإصرار:


ــ مفيش نوم.


ــ قومي يا هانم.


ــ أنا قاعد لوحدي من الصبح.


ــ مش معقول كده.


وبعد دقائق...


خرجت أخيرًا.


شعرها مبعثر.


وعيناها نصف مغمضتين.


وهي تتمطى وتفرد ذراعيها.


وقالت وهي تتثاءب:


ــ صباح الخير يا رضوان.


ابتسم.


ثم خبطها بخفة على كتفها.


وقال:


ــ صباح..... قصدكـ مساء الخير يا ست الدكتورة.


مالت برأسها فوق كتفه.


وقالت بنعاس:


ــ وفيها إيه بس؟


ــ ما أنا نايمة الفجر.


هز رأسه ساخرًا.


وقال:


ــ طبعًا.


ــ إحنا نفضل نرغي في التليفون لحد ما شركة الاتصالات إن شاء الله تسحب الخط بتاعك إنتِ وفارس.


ــ عشان تنامي بدري بعد كده واستريح منك ومنه.


حركت كتفيها بلا مبالاة.


وقالت:


ــ بالعكس.


ــ دي شركة الاتصالات المفروض تعمل لنا خصم.


ــ علشان إحنا أكتر ناس بنفعهم.


ضحك رضوان.


وقال:


ــ وماله.


ــ هما بيخصموا منكم الخصم اللي بيدهولكم؟


ــ بس ده للي بيفهم.


ثم أشار ناحية الحمام.


وقال:


ــ اتفضلي.


ــ ادخلي اغسلي وشك.


ــ واتوضي وصلي الضهر.


ــ أكون خلصت الغدا لسيادتك.


عاد إلى المطبخ.


بينما ذهبت هي إلى الحمام.


وظل هو يكمل إعداد الطعام.


ويحاول أن يشغل نفسه بأي شيء.


أي شيء...


عدا التفكير في اليوم الذي سيستيقظ فيه.


ولا يجدها في الغرفة المجاورة.


***


بعد قليل...


خرجت حبيبة بإسدال الصلاة.


وكان رضوان يضع السلطة في الأطباق.


ويغرف باقي الطعام.


اقتربت منه وهي تستنشق الرائحة.


ثم قالت بجوع واضح:


ــ الله.


ــ الريحة الحلوة دي يا رضوان.


ــ أنا جعت أكتر ما أنا جعانة.


ابتسم.


وقال بمكر:


ــ طب حذري فزري.


ــ عملتلك أكل إيه النهارده؟


فكرت قليلًا.


ثم قالت:


ــ أنا شامة ريحة فراخ محمرة.


حرك رأسه بإعجاب.


وقال:


ــ شاطرة.


ــ وعملتلك صينية بطاطس باللحمة.


ــ ورز بشعيرية.


ــ وشوية لسان عصفور.


ــ يستاهلوا بقك.


اتسعت ابتسامتها.


وقالت بفرحة:


ــ الله.


ــ الأكلة دي بحبها قوي.


ثم نظرت إلى كمية الطعام.


وقالت بتعجب:


ــ بس إنت عامل كمية كبيرة.


ــ ده كده الأكل هيكفي يومين تلاته كمان.


نظر إليها بمكر.


وقال:


ــ لا.


ــ ما إحنا مش هنتغدى لوحدنا.


عقدت حاجبيها.


وقالت:


ــ هو في حد جاي؟


ابتسم.


وقال:


ــ فارس جاي يتغدى معانا.


فتحت عينيها بصدمة.


وفي اللحظة نفسها...


رَنَّ جرس الباب.


ابتسم رضوان.


وأشار إلى ساعة يده.


وقال:


ــ مواعيد ع الشعره.


شهقت حبيبة فجأة.


ونظرت إلى نفسها.


فكانت لا تزال ترتدي الإسدال.


ثم قالت بفزع:


ــ يا لهوي.


ــ هيشوفني كده؟


ضحك رضوان.


وقال:


ــ وفيها إيه يعني؟


ــ ده الإسدال كله وقار.


حركت رأسها بسرعة.


وقالت:


ــ لا.


ــ لا يا رضوان.


ــ ما ينفعش يشوفني كده.


ضحك.


وقال:


ــ طيب ادخلي غيري.


ــ وأنا هفتحله.


جرت حبيبة نحو غرفتها هربًا.


وعادت إليها طاقتها كلها دفعة واحدة.


فتحت الدولاب.


فسقط نصف ما بداخله على الأرض.


وظلت تفتش بين الملابس بسرعة.


بحثًا عن شيء مناسب ترتديه.


***


في الخارج...


فتح رضوان الباب.


فابتسم فارس فور رؤيته.


وقال رضوان مرحبًا:


ــ أهلًا يا عريس.


رد فارس ضاحكًا:


ــ ها؟


ــ اتأخرت؟


ــ إنت قلت تلاتة ونص بالظبط.


ضحك رضوان.


وقال:


ــ ده أنا ما بحبش فيك غير انضباطك في المواعيد.


ــ ادخل تعالى.


دلف فارس إلى الداخل.


وكان يحمل بوكيه ورد رقيقًا.


وصندوق هدية صغيرًا.


وضعهما فوق الطاولة.


فقال رضوان:


ــ استريح.


ــ حبيبة جاية دلوقتي.


ــ وأنا هحط الغدا.


وقف فارس مترددًا.


ثم قال:


ــ تحب أساعدك؟


ضحك رضوان.


وقال:


ــ ليك في المطبخ؟


حرك فارس كتفيه.


وقال:


ــ يعني بعرف آكل.


ــ أعرف أحط كوباية في الحوض.


ــ حاجة على قدي كده.


ضحكا معًا.


ثم أشار له رضوان.


وقال:


ــ طيب تعال معايا.


ــ إنت خلاص مش غريب.


دخل معه إلى المطبخ.


وأعطاه صحن الأرز.


ثم قال:


ــ بص.


ــ أنا هديك النواشف.


ــ علشان ما تبهدليش الدنيا.


اعترض فارس فورًا:


ــ لأ.


ــ حاسب إنت كده.


ــ بتهين قدراتي


ــ هات يا عم.


ــ وخش عليّ بقلب جامد.


ــ إديني التقيل ومالكش دعوة.


فضحك رضوان.


وقال:


ــ طيب.


ــ ودي الرز.


ــ وتعال يا بطل.


وبينما كان رضوان يملأ الأطباق...


كان فارس ينقلها إلى السفرة.


لكن عينيه كانتا تدوران في كل الاتجاهات.


باحثتين عنها.


وحدث نفسه:


ــ هي فين كل ده؟


***


في تلك اللحظة...


كانت حبيبة تقف أمام المرآة.


ترتدي فستانًا بسيطًا رقيقًا بحزام عند الخصر.


وحجابًا هادئًا.


ومستحضرات تجميل خفيفة للغاية.


كانت متوترة بصورة لم تتوقعها.


فالأمر اختلف الآن.


قبل أيام كان يأتي لزيارتها كخطيب.


أما الآن...


فهو زوجها.


تنفست بعمق.


وأخرجت الزفير ببطء.


ثم حاولت تهدئة نفسها.


وخرجت.


فرأته واقفًا عند السفرة.


يرتب الأطباق بعناية.


ويضع الشوك والملاعق في أماكنها.


وفي اللحظة التي رفع فيها رأسه...


رآها.


وتوقفت هي أيضًا.


تأملها.


وتأملته.


وظلا للحظات صامتين تمامًا.


يتحدثان بعينيهما فقط.


حتى قطع رضوان الصمت قائلًا:


ــ طيب إيه؟


ــ هنفضل في الوقفة الصامتة دي كتير؟


ــ يلا يا أستاذ منك ليها.


ــ الأكل هيبرد.


لوت حبيبة فمها.


وهمست:


ــ أحسن واحد يغير المود.


فضحك رضوان.


ووضع طبق اللحم على السفرة.


وقال:


ــ تعالى يا فارس اقعد.


ــ يلا يا حبيبة.


تقدمت بخجل.


وقالت:


ــ أهلًا يا دكتور.


رفع رضوان حاجبيه باستنكار.


لكنه لم يعلق.


أما فارس...


فنظر إليها بحب واضح.


وقال:


ــ إزيك يا حبيبة؟


ــ عاملة إيه؟


أخفضت نظرها إلى الأرض.


وقالت:


ــ الحمد لله.


ــ كويسة.


تنهد رضوان.


وقال:


ــ يا رب نخلص من المسلسل التركي ده.


ــ اقعد يا فارس.


ــ أنا طبعا عامل حاجة بسيطه أنا ما ليش في الطواجن والصواني اتفضلوا.


جلس الثلاثة حول المائدة.


وبدأوا في تناول الطعام وسط أجواء هادئة ومريحة.


كان فارس مستمتعًا بالطعام فعلًا.


وأبدى إعجابه بأكثر من صنف.


حتى أنه لم يتوقف عن شكر رضوان على الضيافة.


أما حبيبة...


فكانت تجلس بهدوء واضح.


هادئة أكثر من المعتاد.


بل ومحرجة بعض الشيء.


وكان رضوان يلاحظ ذلك جيدًا.


ويعرف سببه.


لذلك حرص طوال الوقت على إبقاء الحديث مستمرًا مع فارس.


يتنقل بين موضوع وآخر.


ويتحدث عن الطعام.


وعن العمل.


وعن أي شيء يخطر على باله.


فقط حتى يخفف عنها ذلك التوتر الذي يسيطر عليها.


وكان من حين لآخر يطلب منها أن تأكل.


أو يعلق على أحد الأطباق.


ليقحمها في الحديث دون أن يحرجها.


وبالفعل...


بدأ الجو يصبح أكثر راحة مع مرور الوقت.


***


وبعد الانتهاء من الطعام...


انتقلوا إلى غرفة المعيشة.


وجلسوا يحتسون الشاي.


ويتحدثون عن تجهيزات العرس.


وما تبقى من ترتيبات الأيام القادمة.


لكن رغم أن الحديث كان يدور بينهم جميعًا...


إلا أن فارس كان يراقب حبيبة بين الحين والآخر.


وحبيبة بدورها لم تكن أقل منه.


وكانت عيونهما تلتقي أحيانًا.


ثم يهرب كل منهما بنظره سريعًا.


وفي أحيان أخرى...


كانا يلجآن إلى الطريقة الأسهل.


الهاتف.


تبادل الاثنان عدة رسائل قصيرة عبر الواتساب.


بعيدًا عن أعين رضوان.


وكأنهما يسرقان لحظاتهما الخاصة وسط الجلسة.


ومرت السهرة في أجواء جميلة.


دافئة.


ومليئة بالراحة.


وأثناء الحديث، شكرت حبيبة فارس على الورد والهدية.


فابتسم لها.


واكتفى بنظرة حملت أكثر مما قاله بالكلمات.


ثم التفت رضوان إلى فارس وسأله:


ــ طيب يا فارس.


ــ لما إنت هتستلم الشقة الأسبوع الجاي... يوم الفرح.


ــ هتقضية فين؟


ــ في الفيلا عند أخوك؟


ــ ولا هتحجز غرفة؟


أجاب فارس:


ــ أنا حجزت بالفعل في الفندق. اللي هيكون فيه الفرح..


ــ حجزت..جناح كامل.


ــ والسفر إن شاء الله هيبقى بعد الفرح بيوم.


أومأ رضوان برأسه.


وقال:


ــ تمام.


ــ كده كل حاجة جاهزة.


ــ وإن شاء الله تسافروا وترجعوا بالسلامة.


ابتسم فارس شاكرًا.


ثم ألقى نظرة على ساعته.


فوجد أن الوقت قد تجاوز الثامنه مساءً.


فنهض من مكانه وهو يقول:


ــ أنا كده اتأخرت جدًا على مهاب.


ــ يا دوبك أمشي.


وبدأت ملامح النهاية تتسلل إلى تلك الجلسة الدافئة.


التي تمنّى كل واحد منهم لو امتدت قليلًا أكثر.


قال رضوان وهو ينظر إلى الساعة:


ــ ما لسه بدري يابني؟


هز فارس رأسه معترضًا.


وقال:


ــ لا بدري إيه بقى يا رضوان؟


ــ يا دوبك.


ــ أمشي. مهاب مش بعيد مايدخلنيش البيت. 


ثم ابتسم مضيفًا:


ــ بس بصراحة أنا بشكرك على الغدوة الحلوة دي.


لوّح رضوان بيده ببساطة.


وقال:


ــ يا سيدي.


ــ دي حاجة بسيطة.


ــ علشان خاطر الدكتورة حبيبة.


ابتسمت حبيبة بخجل.


وخفضت عينيها إلى الأرض.


فالتقط رضوان خجلها سريعًا.


وابتسم ابتسامة صغيرة.


ثم قال وهو ينهض:


ــ طيب.


ــ أنا هدخل أجيب تليفوني من على الشاحن.


ــ وأنزل معاك وأطلع تاني.


ــ ماشي.


واختفى داخل الغرفة.


ليتركهما وحدهما للحظات قليلة.


وقف فارس عند باب الشقة.


بينما وقفت حبيبة خلفه.


استدار إليها.


وتأملها لثوانٍ.


ثم قال:


ــ ما سمعتش صوتك النهاردة كتير.


ابتسمت بخفة.


وقالت:


ــ لأ.


ــ عادي.


ــ أنا كنت قاعدة بسمعكوا يعني.


مد فارس يده ببطء.


وأخذ كفها بين يديه.


ثم رفعه إلى شفتيه.


وطبع فوقه قبلة هادئة.


وقال:


ــ وحشتيني.


ارتجف قلبها بعنف.


وسحبت يدها بسرعة.


وقد تلون وجهها بالكامل بالخجل.


وأخفضت بصرها.


وقالت بصوت متحشرج:


ــ وإنت كمان.


مال برأسه ناحيتها.


وقال:


ــ مش سامع.


ــ قلتي إيه؟


ازدادت ارتباكًا.


وقالت:


ــ بقولك وإنت كمان.


رفع حاجبه بمكر.


وقال:


ــ وأنا كمان إيه؟


تأففت بخجل.


وقالت:


ــ خلاص بقى.


ــ متكسفنيش.


ضحك بخفة.


وقال:


ــ تمام.


ــ ماشي.


ــ أنا صابر عليكي بس.


ــ كلها يومين.


ــ وتبقي جنبي ومعايا.


احمرت وجنتاها أكثر.


وفي تلك اللحظة خرج رضوان من الغرفة.


فابتعد فارس تلقائيًا.


وقال رضوان:


ــ يلا يا فارس.


ــ أوصلك لحد العربية.


اعترض فارس فورًا:


ــ لا.


ــ متنزلش.


ــ خليك.


ــ أنا عارف الطريق كويس.


ــ وبعدين أنا مش غريب.


ضحك رضوان.


وقال:


ــ يا عمي يلا بس.


ــ هتمشى معاك.


تنهد فارس.


ثم قال:


ــ صدقني مش هينفع.


ــ خليك مع حبيبة.


ــ يلا سلام.


صافحه.


وسلم على حبيبة.


ثم غادر.


***


أغلق رضوان باب الشقة.


بينما بقيت حبيبة تنظر للحظات نحو المكان الذي اختفى منه فارس.


كانت تشعر أن الوقت يركض كلما كان معها.


وأن الساعات تصبح دقائق.


أما اللحظات...


فتمضي قبل أن تشبع منها.


تنهدت بخفة.


ثم حملت أطباق الفاكهة.


واتجهت إلى المطبخ.


لكن قبل أن تصل إليه...


سمعت صوت رضوان يناديها:


ــ تعالي يا بيبو.


ــ عايزك.


توقفت.


ثم عادت إليه.


وجلست أمامه.


رفع رضوان عينيه إليها.


وظل صامتًا.


يتأملها طويلًا.


وكأنه يرى سنوات عمر كاملة تمر أمامه في تلك اللحظة.


قالت بعد لحظات:


ــ مالك يا رضوان؟


ــ إنت عايز تقول حاجة؟


تنهد ببطء.


ثم نهض من مكانه.


وجلس على طاولة الانتريه أمامها مباشرة.


وأمسك يديها بين يديه.


ثم قال بصوت امتلأ بالحب:


ــ كبرتي بسرعة يا حبيبة.


ــ لسه كنت إمبارح شايلك بين إيديا.


وأكمل بابتسامة دافئة:


ــ وبقول...


ــ هحط الدنيا في كفة.


ــ وإنتِ في كفة.


ــ ونمت.


ــ وصحيت.


ــ وشفتك أحسن دكتورة.


ــ وأجمل عروسة.


لمعت عيناها بالدموع.


وقالت:


ــ كل الفضل ده يرجع لك إنت يا رضوان.


ــ إنت تعبت قوي يا حبيبي علشان ترسم وتبني ليا مستقبل.


ابتسم رضوان.


وقال:


ــ كل تعب الدنيا يهون قصاد اللحظة...


ــ اللي شفتك فيها يوم تخرجك.


ــ ويوم ما لبستي البالطو الأبيض.


ــ ويوم كتب كتابك.


سكت فجأة.


وكأن الكلمات خانته.


وامتلأت عيناه ببريق الدموع.


ثم قال بعد أن ابتلع غصته:


ــ حبيبة...


ــ إنتِ بجد مش أختي.


ــ إنتِ بنتي.


ــ حتة مني.


ــ كبرتي على إيدي يوم بيوم.


ــ وثانية بثانية.


ــ ما فارقتنيش يوم واحد.


ارتجفت شفتاها.


ولم تعد قادرة على منع دموعها.


فقالت باكية:


ــ غصب عني إني أسيبك يا رضوان.


ــ صدقني متعرفش أنا حاسة بإيه.


ــ كل ما يقرب الميعاد.


أسرع الأخر يمسح دموعه.


ثم ضحك بخفة محاولًا التماسك.


وقال:


ــ إنتِ فاكرة إني زعلان إنك هتمشي؟


ــ تبقي خايبة.


ــ لو فكرتي في كده.


ــ إنتِ تفرحي.


ــ لأني كملت مسيرتي معاكي.


ــ أيوة.


ــ حتى لو قصرت معاكي.


ــ بس قدمت اللي أقدر عليه.


رفعت رأسها نحوه بصدمة حقيقية.


وقالت:


ــ قصرت معايا؟


ــ إنت قدمتلي اللي أبهات كتير دلوقتي معرفوش وماقدروش يقدموه لأولادهم.


ــ قدمتلي الحنان.


ــ والأمان.


ــ والحب.


ــ والرعاية.


ــ عمرك ما حسستني إني يتيمة الأب.


ثم انهمرت دموعها أكثر.


وقالت:


ــ صدقني يا رضوان.


ــ أنا نسيت إني يتيمة بوجودك جنبي.


ــ وبحمد ربنا عليك.


وأكملت وسط شهقاتها:


ــ هاتلي أخ يعمل كده لأخته دلوقتي؟


ــ هاتلي أخ ما غيرتوش الظروف على أخواته.


ــ هاتلي أب يقدم كل الحب ده لأولاده من غير مقابل.


ــ في أبهات كتير قوي يا رضوان.


ــ مقدروش يقوموا بالدور اللي إنت قمت بيه.


ــ أنا بشوف وبسمع حاجات تشيب الشعر.


ــ من ناس كتير.


ــ المفروض إنهم يكونوا سند لأولادهم.


ثم هزت رأسها بقوة.


وقالت:


ــ بس إنت غير.


ــ إنت يا حبيبي ما تتقارنش بحد.


ــ أنا شايفاك أحسن واحد.


ــ وأجمل وأعظم صديق وأخ وأب في الدنيا دي.


شعر رضوان بسعادة غامرة وهو يسمع كلماتها.


سعادة أزالت من داخله تعب سنوات كاملة.


فابتسم.


ومسح دمعة أخرى خانته.


ثم ربت على حجابها بحنان.


وقال:


ــ يا حبيبتي...


ــ مهما عملتلك.


ــ قليل عليكي.


ــ ومافيش حاجة في الدنيا اسمها ظروف تغير قلب الأخ أو الأب ناحية أولاده.


ــ بالعكس.


ــ المفروض نقرب من بعض أكتر.


ــ إحنا في احتياج إننا نكون ضهر لبعض.


ــ الدنيا مبقاش فيها أمان.


ــ وعلشان كده.


ــ إحنا المفروض نوفر الأمان والحنان لكل اللي حوالينا.


صمت قليلًا.


ثم نظر إليها من جديد.


وقال بابتسامة متأثرة:


ــ أنا طبعًا مبعرفش أتكلم وأقول إيه في المواقف اللي زي دي.


ــ بس إنتِ بنتي.


ــ وواجب عليا أوصيكي.


نظرت إليه باهتمام.


وقالت:


ــ توصيني على إيه؟


تنهد رضوان.


وأخذ يجمع أفكاره.


ثم قال:


ــ إنتِ داخلة حياة جديدة.


ــ مع شخص يعتبر غريب عنك.


ــ غريب في طبع.


ــ وفي تربية.


ــ وفي كل حاجة.


ــ وإنتِ برضه غريبة عليه.


ــ وعايزك يا حبيبة تبني حياتك معاه صح.


ــ ارسمي طريقك معاه على التفاهم.


ــ اسمعي منه.


ــ وافهميه.


ثم أضاف بهدوء:


ــ أهم حاجة يا حبيبة...


ــ الست تفهم جوزها.


ــ ده هيوفر عليها معاناة كبيرة.


ــ راعي ظروفه.


ــ وهو كمان يراعي مشاعرك.


ــ أنا قلت لفارس نفس الكلام ده.


ــ وبقولهولك إنتِ كمان.


ثم سكت لحظة.


وقال بجدية:


ــ أهم حاجة...


ــ أوعي تكسري جوزك.


ــ بكلمة تقلل من كرامته.


ــ أو من مشاعره.


ــ صدقيني.


ــ الكرامة يوم ما تتهان.


ــ بيوت كتير بتتهد.


ثم ابتسم.


وقال:


ــ خليكي الصديق لفارس.


ــ زي علاقتك معايا.


ــ اسمعيه وهو يسمعك.


ــ خليكي دايمًا مبتسمة في وشه.


ــ املي حياته سعادة.


ــ وهو بالمقابل هيملي حياتك فرح وهنا.


تنهد بخفة.


ثم قال:


ــ بصي.


ــ أنا مش عارف أرتبلك الكلام.


ــ لكن إنتِ فاهمة المقصد من كلامي.


ــ تكوني السند والدعم ليه.


ــ وهو كمان هيكون سور حماية محاوطك.


ــ فاهمة يا حبيبة؟


هزت رأسها بابتسامة مليئة بالدموع.


وقالت:


ــ فاهمة.


ــ فاهمة يا رضوان.


مال نحوها.


وطبع قبلة حانية فوق قمة رأسها.


ثم مسح دموعها بأصابعه.


وقال:


ــ بتمنالك السعادة من كل قلبي...


ــ يا بنت رضوان.


**********

في أحد الملاهي الليلية...


كان الزيات جالسًا في ركنه المعتاد.


حولَه عدد من رجاله والحرس الخاص به.


وأمامَه طاولة امتلأت بالكؤوس والزجاجات.


بينما كانت الموسيقى الصاخبة تملأ المكان.


وتكاد تغطي على أي صوت آخر.


رفع رأسه عندما لمح سما تقترب.


فابتسم بإعجاب واضح.


وقال:


ــ أهلًا بالبرنسيسة.


جلست سما أمامه.


ثم نظرت حولها بضيق.


وقالت:


ــ أهلًا يا زيات.


ــ ملقتش مكان أهدى من ده شوية؟


انفجر ضاحكًا.


ورفع كأسه قليلًا.


ثم قال:


ــ دي أحلى حاجة في الدوشة هنا.


ــ محدش بيركز مع حد.


ثم مال للأمام قليلًا.


وأضاف:


ــ قوليلي يا قمر.


ــ إيه اللي فكرك بيا؟


ــ الشوق ولا إيه.....؟


قاطعته فورًا.


وقالت:


ــ شوق إيه بس يا زيات؟


ــ إحنا هنضحك على بعض؟


ــ أنا جاية لك في شغل.


ضحك وهو يهز رأسه.


وقال:


ــ خير يا قمر؟


ــ طلباتك أوامر.


ابتسمت.


ثم قالت مباشرة:


ــ المقبرة جهزت ولا لسه؟


نظر حوله سريعًا.


ثم اقترب منها قليلًا.


وقال بخفض صوته:


ــ مقبرة إيه؟


ــ ولا مؤاخذة؟


ارتسمت فوق شفتيها ابتسامة ماكرة.


وقالت:


ــ مقبرة الآثار اللي طلبها منك الشامي.


رفع حاجبيه بدهشة.


وقال:


ــ هو من إمتى الشامي بيعرف اللي شغالين معاه أسرار زي دي؟


غمزت له.


وقالت:


ــ دي ترجع لشطارتي أنا بقى.


ضحك الزيات بصوت مرتفع.


وقال:


ــ يا بنت الإيه.


ــ وقعتي الشامي على بوزه.


ضحكت هي الأخرى.


وقالت بثقة:


ــ وحياتك ما يقدرش يستغنى عني.


تأملها لثوانٍ.


ثم قال:


ــ لا...


ــ في دي أصدقك.


ــ وبصراحة يا بخته.


لوحت له بيدها.


وقالت:


ــ خلينا في المهم.


اعتدل في جلسته.


ورد:


ــ لا معلش.


ــ كلامي مع الشامي.


نظرت إليه بإصرار.


وقالت:


ــ طيب لو قلت لك علشان خاطري؟


ارتسمت فوق شفتيه ابتسامة ذات معنى.


وقال:


ــ خاطرك كده حاف؟


ــ لو عايزة تعرفي...


ــ قابليني في العنوان ده.


وأخرج ورقة صغيرة.


ودفعها نحوها.


ثم أكمل:


ــ وساعتها هكون كتاب مفتوح.


ــ بين الإيدين الناعمة الحلوة دي.


نظرت سما إلى الورقة.


فوجدت عنوانًا لغرفة في أحد الفنادق الخاصة بوسط المدينة.


رفعت رأسها إليه مباشرة.


وقالت:


ــ اللي بتطلبه ده بعيد قوي يا زيات.


ــ أنا أخص الشامي وبس.


رفع كتفيه بلا مبالاة.


وقال:


ــ يبقى الشامي لما يحب يعرف حاجة يكلمني.


ــ أنا اتفاقي معاه وبس.


ــ غير كده...


ــ معنديش حاجة أقولها لك.


هزت رأسها.


وقالت:


ــ أوكي.


ــ براحتك.


ــ إنت الخسران.


نظر إليها باستغراب.


وقال:


ــ هخسر إيه؟


ــ وضحي.


تلاعبت بطرف كأسها للحظات.


ثم قالت بهدوء مدروس:


ــ تجارة الآثار مش سكة الشامي.


ــ وأنا عايزة أبعده عنها.


ــ خايفة عليه.


ضيق الزيات عينيه.


وقال:


ــ خايفة عليه من إيه؟


ارتسمت فوق شفتيها ابتسامة خبيثة.


وقالت:


ــ إنت عارف إن عزام الديب موزع على كل واحد الكار بتاعه.


ــ وإحنا الكار بتاعنا...السلاح.


ــ ولو فريد كسر القاعدة وخرج عن طوع عزام...


ــ ولو بس شم خبر...


ــ مش بعيد يدمر فريد.


ــ ولا أنا كلامي غلط؟


سكت الزيات للحظات.


يفكر فيما قالته.


بينما واصلت هي حديثها بهدوء وثقة.


وقالت:


ــ أنا عارفة طبعًا إن فريد مموتلك ناس تحت إيدك.


ــ بس عارفة برده إنكم تصالحتوا.


ــ وإنت يهمك مصلحة فريد.


ــ مش كده يا زيات؟


هز رأسه ببطء.


وقال:


ــ ها.... آه طبعًا.


ــ طبعًا.


مالت نحوه قليلًا.


وقالت:


ــ طيب...


ــ ياريت تتكلم مع فريد.


ــ وتقوله يرجع عن اللي في دماغه.


ــ علشان ما يدمرناش.


تنهدت كأن الخوف يغلبها.


ثم أضافت:


ــ وأنا بصراحة مقدرش أعيش من غيره.


ــ ما هو ميرضيكش فريد يتسجن.


ــ وغيره يكوش على الساحة.


ــ لما تفضاله.


ــ ولا إيه؟


وفي تلك اللحظة...


لمع شيء داخل عيني الزيات.


شيء أقرب إلى فكرة شيطانية بدأت تتشكل في رأسه.


ابتسم ببطء.


ثم قال:


ــ ما تخافيش.


ــ ده فريد ده حبيبي.


ــ ويهمني مصلحته.


ابتسمت سما في المقابل.


ابتسامة صغيرة.


هادئة.


وممتلئة بالدهاء.


فقد نجحت في إيصال الرسالة التي أرادتها.


وزرعت الفكرة داخل عقل الزيات.


من دون أن تتهم أحدًا.


ومن دون أن تطلب شيئًا بشكل مباشر.


ومن دون أن تتلوث يداها بشيء.


***********


بعد يومان كان المساء يقترب ببطء.


والتحضيرات الخاصة بحفل الزفاف تملأ البيوت والحياة من حول الجميع.


في أحد الأركان الأخرى من المدينة...


كانت حبيبة محاطة بصديقاتها.


لبنى.


وإيمان.


وهالة.


وقد استولوا على البيت بالكامل تقريبًا.


ضحكات متواصلة.


وحقائب متناثرة.


وفساتين معلقة في كل مكان.


وأصوات لا تهدأ.


أما رضوان...


فقد ترك لهم البيت بكامل إرادته.


حتى يمنحهن مساحة من الحرية.


ويسهل عليهن الحركة والتجهيز.


حمل بدلته وملابسه.


واتجه إلى منزل كريم.


حيث كان كريم وعصام في انتظاره.


***


وفي الوقت نفسه...


كان فارس داخل جناحه بالفندق.


يستعد هو الآخر لليلة التي انتظرها طويلًا.


وبصحبته نادر.


ومالك ابن أخيه.


وكان الثلاثة منشغلين بالترتيبات الأخيرة.


وسط حالة من الحماس والمرح.


التي تسبق أي عرس بساعات قليلة.


***


أما عند زاد...


فكان المشهد مختلفًا تمامًا.


كانت مستلقية فوق سريرها.


منهكة.


شاحبة.


تشعر بدوار مستمر بسبب النزيف.


ورأسها يكاد ينفجر من شدة الصداع.


حتى فُتحت باب الغرفة.


ودخل فريد.


توقف عند الباب للحظات.


يتأملها بصمت.


ثم قال بضيق بارد:


ــ إيه؟


ــ هتقضي حياتك نوم ولا إيه؟


حاولت أن تعدل جلستها بصعوبة.


وقالت بإرهاق واضح:


ــ تعبانة يا فريد.


رد دون أي اكتراث:


ــ مش وقته.


ــ اخلصي.


ــ قومي خديلك مسكن واجهزي.


نظرت إليه بدهشة ممزوجة بالتعب.


وقالت:


ــ أجهز ليه؟


ــ وهنروح فين؟


صك على أسنانه.


ثم تحرك نحوها.


وجلس على طرف السرير.


وأمسك فكها بقوة.


وقال:


ــ هو إنتي ما بتحرميش يا زاد؟


أغمضت عينيها.


وقالت بصوت متعب:


ــ فريد...


ــ أرجوك.


أغمض عينيه هو الآخر.


وأخذ نفسًا عميقًا.


ثم أخرجه ببطء.


ولكن بابتسامة جعلت المشهد أكثر إزعاجًا.


خفف قبضته قليلًا.


وأخذ يمرر أصابعه داخل شعرها بحنان زائف.


وقال:


ــ حبيبتي...


ــ النهارده فرح فارس.


فتح اسم فارس بابًا من الذكريات داخلها.


فرفعت عينيها إليه بصدمة.


فأكمل:


ــ إيه؟


ــ مش عايزة تشوفي عروسته؟


ظلت تنظر إليه للحظات.


وعيناها تائهتان داخل وجهه.


ثم قالت:


ــ وإنت عايزني أروح ليه يا فريد؟


ضحك ضحكة قصيرة.


ثم قال:


ــ هو لازم يكون في سبب؟


ــ دي مناسبة.


ــ وإحنا اتعزمنا.


ــ والمفروض نروح.


قالت بصوت واهن:


ــ بس أنا مش عايزة أروح.


ــ عندي أسبابي.


قهقه فجأة.


بصوت مرتفع.


وقال:


ــ أسبابك؟


ــ اللي هي إيه إن شاء الله؟


تشبثت بما تبقى لها من قوة.


وقالت:


ــ أولًا عندي نزيف.


ــ وهكون تعبانة.


ــ ومش مرتاحة.


ــ ثانيًا...


ــ إنت عارف كويس أوي إن الشخص اللي إنت بتكرهه هناك.


ــ ليه مصمم تحطني في دايرة المشاكل؟


ــ وأكيد إنت مش هتعدي اليوم ده على خير.


اختفت الابتسامة للحظة.


ثم ظهرت من جديد.


لكن هذه المرة كانت أخبث.


وقال:


ــ إيه؟


ــ مش عايزة تشوفيه؟


همست بتعب:


ــ كفاية بقى.


ــ حرام عليك.


ــ المفروض إنت اللي تقولي متروحيش.


ــ مش العكس.


وضع يده فوق خدها.


وقال بنبرة هادئة مرعبة:


ــ بالعكس.


ــ ده أنا مستني اليوم ده بفارغ الصبر.


ثم ابتسم.


وأكمل:


ــ وكمان جبت لك فستان هيعجبك قوي.


ــ طلبته مخصوص علشانك.


ــ وزمانه على وصول.


ــ قومي يا حبيبتي.


ــ خدي شاور.


ــ وفوقي.


ــ علشان عايزك تكوني ملكة الحفلة النهارده.


كانت تحدق إليه.


عاجزة عن فهمه.


أو الوصول لما يدور داخل رأسه.


ثم أغمضت عينيها بيأس.


وقالت:


ــ فريد لو سمحت أنا...


رفع إصبعه إلى شفتيها.


وأوقفها.


ثم هز رأسه ببطء.


وقال:


ــ أنا لحد دلوقتي رحيم بيكي.


ــ وسمحت لك تتكلمي.


ــ وسمعتك.


ــ وأعذارك تافهة زيك.


ثم انحنى قليلًا نحوها.


وأضاف:


ــ عايزك تثبتيلي العكس يا زاد.


ــ عايز أشوفك وإنتِ بتبصي لرضوان في عينيه.


ــ ومستني أشوفه.


ــ بيبصلك إزاي.


ثم ابتسم.


وأردف:


ــ مش بقولك؟


ــ بعد الأيام.


اتسعت عيناها بذهول.


لم تعد تملك طاقة للشرح.


ولا للدفاع.


ولا للتبرير.


فهو لم يكن يسمع أصلًا.


ولم يكن يريد أن يفهم.


لقد بنى قناعاته.


وأقام حولها جدرانًا وسجونًا.


ثم تركها بداخلها.


وفي أثناء ذلك...


وصلت العاملة.


ودخلت حاملة صندوقًا كبيرًا.


وضعته داخل الغرفة.


ثم غادرت.


نهض فريد.


واتجه إلى الصندوق.


وفتحه أمامها ببطء.


ثم أخرج الفستان.


وما إن وقع بصر زاد عليه...


حتى شهقت بقوة.


واتسعت عيناها بصدمة صريحة.


كان الفستان مكشوفًا بصورة أبعد كثيرًا مما يمكنها تقبله.


ظهره شبه عارٍ.


وتفاصيله صادمة بالنسبة لها.


نهضت من مكانها فورًا.


وقالت بجمود:


ــ إيه الفستان ده يا فريد؟


ــ أنا لا يمكن ألبس حاجة زي دي.


وفي لحظة واحدة...


امتدت يده إلى شعرها.


وجذبه بعنف.


فصرخت متألمة.


بينما قال:


ــ ماحدش سألك عن رأيك.


ــ الفستان عاجبني.


ــ أنا.


ــ مش مهم يعجبك.


ــ إنتِ فاهمة؟


انهمرت دموعها.


وقالت برجاء:


ــ أنا ما بلبسش بالطريقة دي يا فريد.


ــ من يوم ما اتجوزتني وإنت عارف طريقة لبسي.


اقترب من أذنها.


وقال بصوت منخفض:


ــ أكيد ده كان ذوق رضوان.


ــ صح؟


ثم ابتسم.


وأضاف:


ــ كان عايزك تلبسي دايمًا مقفول.


ــ أنا النهارده هوريله إني كسرت كل قواعده معاكي يا بنت المالكي.


دفعها بعيدًا.


فتراجعت.


لكنها عادت نحوه فورًا.


وقالت متوسلة:


ــ أرجوك يا فريد.


ــ هروح معاك أي مكان.


ــ ومش هعارضك.


ــ بس بلاش.


ــ بلاش تكسرني بالشكل ده.


ــ إنت ما ترضاش عليا كده.


ضحك.


وكانت ضحكته هذه المرة أشبه بفحيح أفعى.


ثم قال:


ــ مين قالك إني كنت راضي عن لبسك؟


ــ إنتِ لازم تظهري مفاتنك قدام الكل.


ــ لازم تكوني ملكة وسطهم.


ثم تابع:


ــ أنا أحب دايمًا.


ــ مرات الشامي تكون مميزة.


ــ وتكون العيون كلها عليها.


هزت رأسها بصدمة.


وقالت:


ــ أنا مراتك.


ــ أنا مراتك يا فريد.


ــ فوق أرجوك.


ــ أنا مش واحدة جايبها من الشارع. علشان تستعرض جسمها للناس...


ــ اللبس ده ما يناسبش مرات فريد الشامي.


وفي لحظة غضب مفاجئة...


أمسك رقبتها بعنف.


فشهقت من الألم.


وقال:


ــ كل ده عاملة حساب لرضوان.


بدأت تسعل بقوة.


وحاولت إبعاد يده.


وقالت:


ــ أبدًا والله.


ــ ملوش أي علاقة.


ــ وما تدخلوش في حاجة تخصني.


ــ أنا عمري ما لبست كده.


ــ وإنت بنفسك عمرك ما شفتني لابسة حاجة مكشوفة زي دي.


ــ صدقني مش هكون مرتاحة.


ــ إنت كده بتدمر كل ذرة فيا.


نظر إليها للحظات.


ثم قال ببرود مخيف:


ــ مش مهم إنتِ.


ــ المهم أكون أنا مرتاح.


ثم اتجه ناحية الباب.


ورمى الفستان فوق السرير.


وقال:


ــ اتحركي.


ــ يلا.


ــ بدل ما ألبسك أنا بطريقتي الخاصة.


ثم أشار إلى الفستان.


وأضاف:


ــ قدامك ساعتين.


ــ تخلصي.


ــ وتنزليلي ملكة.


ــ فاهمة يا حرمي المصون؟


وغادر الغرفة.


مغلقًا الباب خلفه.


لتبقى زاد وحدها.


في منتصف الغرفة.


تحدق في الفستان.


وتحدق في الباب.


وتحدق في حياتها كلها.


بعينين غارقتين بالهزيمة.


وعاجزة حتى عن معرفة...


ماذا يجب أن تفعل.


********

كانت شقة حبيبة تعيش حالة من الفوضى الجميلة.


ضحكات في كل مكان.


وأصوات متداخلة.


وأحاديث لا تنتهي.


بينما كانت حبيبة تقف في منتصف الغرفة كالأميرة.


بفستانها الأبيض.


وحجابها الأنيق.


ولمساتها الهادئة الرقيقة.


لم تكن متكلفة.


ولا مبالغًا في زينتها.


ومع ذلك...


كانت تخطف الأنظار دون مجهود.


وكأن الفستان صُنع لها وحدها.


أما لبنى.


وإيمان.


وهالة.


فلكل واحدة منهن جمالها الخاص وحضورها المختلف.


وكانت الأجواء مفعمة بالسعادة والحماس.


***


في الجهة الأخرى...


وصل رضوان بصحبة كريم وعصام.


وكان الثلاثة يقفون أسفل البناية للحظات قبل أن يصعدوا.


وما إن دخل رضوان الشقة...


حتى وقعت عيناه على حبيبة.


فتوقف مكانه.


واتسعت ابتسامته تلقائيًا.


ودق قلبه بقوة.


ليس لأنها جميلة فحسب...


بل لأنها بدت أمامه فجأة بعيدة وقريبة في الوقت نفسه.


كأن الطفلة التي كان يحملها بين ذراعيه منذ سنوات...


اختفت.


وحلت محلها عروس كاملة.


اقترب منها.


وقف وقال:


ــ ما شاء الله.


ــ الله أكبر.


ــ زي القمر يا حبيبة.


سألته بفرحة طفولية:


ــ بجد حلوة يا رضوان؟


ــ شفتني وأنا عروسة؟


نظر إليها بعينين امتلأتا بالفخر.


وقال:


ــ حلوة؟


ــ دي كلمة قليلة قوي.


ــ ما شاء الله.


ــ قمر بجد.


تأملته هي الأخرى بانبهار.


وقالت:


ــ وإنت الله أكبر عليك.


ــ أقسم بالله قمرين.


ــ إنت هتسرق مني اللقطة النهاردة؟


ثم ضحكت وأكملت:


ــ بص؟


ــ أنا ما عنديش مانع تسرقها.


ــ والله يا ابني أنا بتحسد عليك.


ضحك رضوان.


وقال:


ــ يا بكاشة.


ــ إنت محدش في جمالك.


ومن بعيد تدخلت إيمان قائلة:


ــ إيه بقى؟


ــ ارحمونا شوية.


ــ في سناجل هنا.


ثم أشارت إلى لبنى.


التي رفعت يدها فورًا وقالت:


ــ هما دول بيراعوا مشاعر حد؟


ــ أنا أمي قالت مترجعيش البيت إلا وإنتِ جايبة عريس في إيدك.


ثم أشارت إلى رضوان وقالت:


ــ شكلي كده اخترت خلاص.


انفجر الجميع بالضحك.


أما رضوان فقال:


ــ العبي غيرها يا دكتورة لبنى.


ــ اسمعي كلام الحاجة بس بعيد عني.


وتجددت الضحكات من جديد.


***


وفجأة...


ارتفع صوت من الشرفة.


وكانت ريم ابنة إيمان.


تركض بحماس شديد.


وتقول:


ــ العريس وصل.


ــ وشكله حلو أوي.


في اللحظة نفسها...


شعرت حبيبة بقلبها يخفق بعنف.


واحتل الخجل ملامحها فورًا.


فاقتربت من إيمان وقالت بغيرة طفولية:


ــ لمّي بنتك يا إيمان.


تعالت الضحكات حولها.


وفي ثوانٍ قليلة...


ظهر فارس.


وكان يحمل بوكيه ورد أنيقًا.


وما إن رآها...


حتى توقف مكانه.


وشعر بقلبه يقفز بين ضلوعه.


بدت أجمل مما تخيل.


وأجمل مما رسم في عقله طوال الأيام الماضية.


اقترب منها وسط الزغاريد.


وعيناه لا تفارقانها.


ثم انحنى قليلًا.


وقبل جبينها.


فاشتعلت الزغاريد أكثر.


وامتلأ المكان بالتصفيق والضحك.


بينما غاصت حبيبة في خجلها المعتاد.


أما فارس...


فلم يكن يستطيع إخفاء سعادته.


وضع يدها داخل ذراعه.


ثم غادرا وسط زغاريد النساء وأصوات التهاني.


***


وفي تلك اللحظة...


كان رضوان واقفًا بجوار السيارة.


يفتح لها الباب.


ويعدل طرف الفستان حتى لا يعلق أثناء ركوبها.


ولأول مرة...


شعر بذلك الإحساس الغريب.


إحساس الفقد الممزوج بالسعادة.


السعادة لأنها وجدت من يستحقها.


والحزن لأنها ستغادر عالمه الصغير قريبًا.


ركبت حبيبة.


وجلس فارس بجوارها.


وفي تلك اللحظة اقترب نادر من رضوان.


وقال:


ــ ألف مبروك يا رضوان.


ابتسم رضوان.


وقال:


ــ الله يبارك فيك يا نادر.


ــ عقبالك.


كان نادر لا يزال يمسك مفاتيح السيارة.


فسأله:


ــ إنت اللي هتسوق ولا أنا؟


أشار رضوان إلى سيارته.


وقال:


ــ لا يا عم.


ــ سوق إنت.


ــ أنا هجيب البنات في عربيتي.


ــ وأمشي وراك.


هز نادر رأسه موافقًا.


ثم استدار.


لكن عينيه توقفت فجأة.


كانت لبنى تقف مع إيمان.


وتضحك.


وفستانها بدا مختلفًا الليلة.


جميلًا بشكل لفت نظره رغمًا عنه.


وشعر بلخبطة غريبة.


حتى أنه لم ينتبه لصوت رضوان وهو يقول:


ــ إنت يابني روحت فين؟


انتفض نادر.


وقال مرتبكًا:


ــ ها؟


ــ لا معاك.


ــ آه ماشي.


ثم مد يده بمفاتيحه.


وقال:


ــ اركب إنت.


ــ وأنا هجيب البنات وجاي وراك.


ووضع مفاتيح سيارته في يد رضوان.


وأخذ منه مفاتيح سيارته هو.


ثم تحرك سريعًا.


وسط نظرات الاستغراب.


فابتسم رضوان بتعجب.


وقال:


ــ الواد ده مجنون رسمي.


ثم ركب مع العروسين.


وقال:


ــ معلش بقى يا فارس.


ــ صاحبك سلمني ليكم.


ضحكت حبيبة فورًا.


وقالت:


ــ ودي أحلى حاجة عملها.


ــ والله خليك معانا يا رضوان.


ثم أضافت بمشاكسة:


ــ وكمان يا ريت تيجي معانا شهر العسل.


همس فارس من بين أسنانه:


ــ فلّتري.


ــ يجي معانا فين؟


ــ إنتِ أي كلام بيقع منك وخلاص.


التفتت إليه بسرعة.


وقالت:


ــ عارف؟


ــ إنت لو مش فرحك النهاردة..


ــ كنت نكدت عليك.


ضحك.


وقال:


ــ لا.


ــ وأنا مش هديكي الفرصة دي أصلًا.


ضحك رضوان.


وأدار السيارة.


وانطلقت المواكب في الطريق.


***


أما نادر...


فاتجه مباشرة إلى سيارة رضوان.


وتوقف أمام لبنى.


وقال:


ــ إيه؟


ــ هتفضلي واقفة كده؟


ــ ولا هتوقفي تاكسي؟


ــ اتفضلي اركبي.


نظرت إليه بدهشة.


وقالت:


ــ إنت بتكلمني أنا؟


قال ببرود:


ــ لا.


ــ بكلم أمي.


عقدت ذراعيها.


وقالت:


ــ طيب؟


جز على أسنانه.


وقال:


ــ طيب إيه يا بنتي؟


ــ اركبي اخلصي.


رفعت حاجبها.


وقالت:


ــ ما تتكلم بأدب يا جدع إنت.


ــ إنت مش بتقول بتكلم أمك؟


تنهد نادر بقهر.


وقال:


ــ الصبر من عندك يا رب.


ــ دي بلاء مش ابتلاء.


أشارت إليه بيدها.


وقالت:


ــ زق عجلك من هنا يا جدع إنت.


ــ وما تقفلنيش منك.


ــ وبعدين استنى هنا.


ثم نظرت للسيارة وقالت:


ــ هي دي مش عربية رضوان؟


ــ المفروض هركب فيها أنا وصاحبتي.


رد نادر فورًا:


ــ ما هو رضوان عشان مش طايقك.


ــ قالي يا نادر اعمل فيا معروف.


ــ ووصل البلوة اللي هناك دي.


ــ قلت خلاص بجملة المعروف اللي بعمله.


وضعت يدها في خصرها.


وقالت:


ــ وحياة طنط.


ــ يخرب بيت تقل دمك.


ــ يالا.


ابتسم ساخرًا.


وقال:


ــ يالا...؟!


ــ ماشي.


ــ طب يلا تعالي اركبي.


ــ وفين صاحبتك؟


ــ أكيد سابتك.


ــ إنتِ محدش بيطيقك ثانية على بعضها صراحة.


أخذت تلف حولها باحثة عن صديقتها.


وهي تتمتم:


ــ لا اسم الله.


ــ إنت اللي تتحب قوي.


ــ الله يكون في عون أهلك منك.


ــ مش عارفة مستحملينك إزاي.


رد فورًا:


ــ زي ما اللي خلفوكي مستحملينك عادي.


ــ وبعدين هتركبي ولا أمشي؟


صرخت بعصبية:


ــ وأنا هركب معاك لوحدي؟


ــ إنت عبيط ولا إيه؟


استغرب:


ــ وفيها إيه يعني؟


قالت بجدية كاملة:


ــ لا يا حبيبي.


ــ الكلام ده عندكم في إيچيبت.


ــ إنما هنا في مصر.


ــ لا يا روح طنط.


ــ إنت لا قريبي ولا جوزي علشان أركب معاك لوحدي.


صمت نادر فجأة.


لثوانٍ طويلة.


كلماتها مرت داخله بشكل غريب.


وأعادت إلى رأسه صورًا أخرى.


وصورًا أخرى.


ولحظات لم يكن يفكر فيها من تلك الزاوية من قبل.


لكن صوت باب السيارة أعاده للواقع.


فالتفت.


ليجد أسيل ابنة غادة تقفز إلى المقعد الأمامي بجواره.


وقال:


ــ يا ساتر.


ــ اللي جابك هنا.


قالت أسيل بغيظ:


ــ سوق يا خالو.


ــ. الزفت مالك؟


ــ جاب صحابه وخلاهم يركبوا معاه في عربية بابي.


ــ ومش عارفة أركب مع مين.


ــ لقيتك إنت بقى.


نفخ نادر بضيق.


وفي تلك اللحظة...


وصلت صديقة لبنى.


فركبت أولًا.


ثم صعدت لبنى بجوارها.


أغلق نادر باب السيارة.


ثم أدار المحرك وانطلق ببطء.


وبينما كان يراقب الطريق، وقعت عيناه مصادفة على المرآة الأمامية.


فوجد لبنى تتحدث مع صديقتها بحماس، وتضحك بعفوية.


ظل يتأملها لثوانٍ قصيرة.


قبل أن ترفع بصرها فجأة.


فتلاقت عيناهما عبر المرآة.


ارتبكت لبنى للحظة.


ثم أشاحت بنظرها سريعًا، وعادت تكمل حديثها مع صديقتها، وكأن شيئًا لم يحدث.


لكن ابتسامة صغيرة خانتها.


أما نادر...


فوجد نفسه يبتسم دون أن يشعر.


ثم أعاد نظره إلى الطريق، محاولًا التركيز أمامه، إلا أن ابتسامتها ظلت عالقة في ذهنه أكثر مما ينبغي.


*********


بعد انتهاء جلسة التصوير...


استقل الجميع السيارات متجهين إلى الفندق الذي سيقام فيه حفل الزفاف.


ومع حلول المساء...


كانت واجهة الفندق تتلألأ تحت الأضواء الذهبية المنعكسة على واجهته الزجاجية الضخمة، فيما اصطف موظفو الاستقبال عند المدخل الرئيسي لاستقبال الضيوف وإرشادهم إلى الداخل.


توقفت السيارات الواحدة تلو الأخرى أمام المدخل.


وترجل الجميع وسط أجواء من البهجة والضحكات والزغاريد.


ومرة أخرى...


خطفت حبيبة الأنظار فور ظهورها.


بدت كأنها خرجت للتو من إحدى الحكايات.


هادئة.


رقيقة.


ومضيئة بصورة لفتت القلوب قبل العيون.


أما فارس...


فلم يكن ينظر إلى أحد أصلًا.


كانت عيناه معلقتين بها وحدها.


وكأن العالم كله اختفى من حوله تمامًا.


***


داخل القاعة...


كانت الورود البيضاء تنتشر فوق الطاولات.


وتنساب أضواء الثريات الكريستالية الدافئة فوق المكان في مشهد أنيق ومريح للعين.


وامتزجت الموسيقى الهادئة بأصوات الترحيب والتهاني.


بينما تنقل العروسان لبعض الوقت بين الحضور.


يستقبلان المباركات.


ويلتقطان الصور التذكارية.


قبل أن يستقرا في مكانهما المخصص.


أما عند المدخل...


فكان رضوان يقف بصحبة مهاب.


يستقبلان الضيوف القادمين.


ويصافحان الجميع.


ويرحبان بهم واحدًا تلو الآخر.


وكان مهاب يعرف رضوان على بعض أصدقائه ومعارفه.


بينما لم تفارق الابتسامة وجه رضوان.


فهو يرى الليلة تسير كما حلم بها تمامًا.


***


لكن تلك الابتسامة اختفت فجأة.


حين توقفت سيارة سوداء فخمة أمام الفندق.


نزل فريد أولًا.


بأناقته المعتادة.


وهدوئه البارد.


وخطورته التي لا تحتاج إلى جهد لتظهر.


ثم استدار ناحية الباب الآخر.


ومد يده.


لتخرج زاد.


ورفع رضوان عينيه نحوهما تلقائيًا.


وفي اللحظة التالية...


تلاشت ابتسامته بالكامل.


توقفت عيناه عندها.


لثوانٍ فقط.


لكنها كانت كافية.


كافية ليشعر بشيء ينقبض بعنف داخل صدره.


الفستان الذي ترتديه...


لم يكن يشبه زاد.


ولا اللون.


ولا التصميم.


ولا حتى تلك الهيئة التي تقف بها الآن.


بدت مختلفة.


غريبة.


وكأن أحدهم انتزع منها شيئًا لا يراه سواه.


هبطت عيناه دون إرادة إلى كتفيها المكشوفين.


ثم إلى ظهر الفستان العاري تقريبًا.


فشد فكه بقوة.


وتشنجت عضلات يديه حتى ابيضت مفاصلهما.


وابتلع ريقه بصعوبة.


شعر بنار الغيرة والغضب تشتعل داخل صدره دفعة واحدة.


غضب لم يكن يخص الحب وحده.


بل شيئًا أعمق.


شيئًا يشبه الإحساس بأن شخصًا ما يتعمد كسر شيء يعرف كم كان ثمينًا.


لكن رغم ذلك...


لم يسمح لأي انفعال أن يظهر على وجهه.


خصوصًا أمام فريد.


صرف عينيه عنها فورًا.


ثم التفت إلى مهاب وقال بهدوء سريع:


ــ ثانية وجاي.


ــ استقبل المعازيم لحد ما أرجع.


نظر إليه مهاب باستغراب.


لكنه هز رأسه موافقًا.


بينما تحرك رضوان إلى الداخل بخطوات سريعة.


***


ابتعد عدة أمتار عن المدخل.


ثم توقف فجأة.


وأغمض عينيه.


ووضع يده فوق صدره.


يشعر بنبضات قلبه المتسارعة.


لم يكن حبًا.


ولم يكن اشتياقًا.


كان غضبًا.


وغيرة.


وشعورًا بالعجز يحاول خنقه منذ اللحظة التي رآها بها.


أخذ نفسًا عميقًا.


ثم أخرجه ببطء.


مرة.


ثم مرة أخرى.


وأعاد ترتيب رابطة عنقه رغم أنها كانت مرتبة بالفعل.


كان بحاجة إلى أي شيء يشتت به نفسه.


أي شيء يعيد إليه رباطة جأشه.


رفع رأسه أخيرًا.


وأجبر نفسه على الهدوء.


ثم عاد إلى المدخل من جديد.


بملامح هادئة.


ولكن الوصول إلى هذا الهدوء لم يكن سهلًا أبدًا.


***


في تلك اللحظة...


كان فريد وزاد قد وصلا إلى باب القاعة.


كانت زاد تخفض بصرها نحو الأرض.


وتسير إلى جوار فريد وكأنها تتحرك بقوة غير قوتها.


أو كأنها تسير داخل ضباب لا تراه سواها.


أما فريد...


فكانت عيناه تراقبان كل شيء.


وبالأخص رضوان.


يراقب رد فعله.


يتابع تعبيرات وجهه.


ويبحث عن أي إشارة صغيرة تكشف ما بداخله.


لكن رضوان لم يمنحه شيئًا.


اقترب منهما.


ومد يده أولًا نحو فريد.


وقال بابتسامة رسمية ثابتة:


ــ أهلًا أهلًا...


ــ فريد باشا.


ــ نورتنا.


ابتسم فريد ابتسامته الغامضة المعتادة.


وصافحه.


بينما كانت عيناه تراقبان رضوان بدقة شديدة.


ثم قال:


ــ أهلًا يا رضوان.


ــ مبروك.


هز رضوان رأسه شاكرًا.


ثم رفع عينيه نحو زاد.


مد يده إليها بعملية تامة.


وقال بهدوء:


ــ نورتينا يا فندم.


لم ترفع زاد عينيها نحوه.


كانت متعبة.


ومرهقة.


لكنها كانت تخوض حربًا أخرى داخلها.


حربًا صامتة.


تحاول فيها أن تمنع كل ما بداخلها من الظهور.


من أجل سلامة رضوان.


ومن أجل ألا تمنح فريد ما يريده.


رسمت ابتسامة رسمية فوق شفتيها.


ومدت يدها تصافحه.


وقالت:


ــ متشكرة.


لم تستمر المصافحة أكثر من لحظة.


فسحبت يدها سريعًا.


ثم وضعتها داخل ذراع فريد.


أما فريد...


فكان يستمتع بذلك التوتر الذي تشعر به زوجته.


كأنها لذة خاصة لا يشعر بها إلا أصحاب النفوس المريضة.


وفي تلك الأثناء، اقترب مهاب منهما، وصافح فريد بود، ثم ابتسم قائلًا:


ــ نورتنا يا فريد.


احتضنه فريد بحرارة، وهو ما يزال ممسكًا بيد زاد، ثم أجابه:

ــ بنورك يا حبيبي.


ابتسم مهاب، وأشار إلى الداخل قائلًا:


ــ أنا حاجز ترابيزة ليا أنا وإنت ورضوان مخصوص.


ــ ومدام زاد تقعد مع غادة والبنات.


ــ علشان بصراحة إنت واحشني.


ــ وليا عندك عتاب كبير.


ضحك فريد.


لكن عينيه ظلتا تراقبان رضوان.


وكأنه ما زال يبحث عن شيء ما.


ثم قال:


ــ وماله.


ــ نقعد مع بعض.


أما رضوان...


فكان قد عاد بالفعل لاستقبال الضيوف الآخرين.


وكأن وجود زاد لم يلفت انتباهه أصلًا.


الأمر الذي أزعج فريد أكثر مما أسعده.


فهو كان يريد رد فعل.


أي رد فعل.


لكن رضوان لم يمنحه شيئًا.


***


وأشار رضوان بيده نحو الداخل.


وقال باحترام:


ــ اتفضلوا.


دخل فريد وبجواره زاد، بينما تبعهما مهاب بعد أن تبادل بعض الكلمات مع رضوان.


ولم يفت مهاب أن يلاحظ هيئة زاد وملابسها التي بدت مختلفة تمامًا عما اعتاد رؤيتها به.


انعقد حاجباه للحظة، وشعر بأن هناك شيئًا غير مريح في الأمر، لكنه سرعان ما نفض تلك الأفكار عن ذهنه، مفضلًا ألا يسمح لأي شيء أن يعكر فرحته بأخيه الصغير.


*********


جلست زاد إلى جوار غادة.

ورغم برودة القاعة وتكييفها المرتفع...

كانت تشعر أن جسدها يحترق.

أو ربما العكس.

لم تعد تعرف.

كانت تشعر ببرودة مؤلمة تزحف تحت جلدها.

برودة تجعل أصابعها ترتجف كلما تحركت.

وتجعلها أكثر وعيًا بذلك الفستان الذي ترتديه رغمًا عنها.

كل حركة.

كل نظرة.

كل التفاتة.

كانت تشعر معها وكأن الجميع يراها.

وكأنها تقف عارية وسط القاعة.

ورغم الألم الذي كان يضرب أسفل بطنها من النزيف...

إلا أن الألم الحقيقي كان أعمق من ذلك بكثير.

أعمق من الجسد.

وأقسى.

لم تجرؤ حتى على رفع عينيها ناحية رضوان.

ليس خوفًا من فريد كما اعتادت.

بل خجلًا من نفسها.

خجلًا من أن يراها بذلك الشكل.

بتلك الهيئة.

في ذلك الفستان الذي لا يشبهها.

كانت تتمنى لو تنشق الأرض وتبتلعها قبل أن تضطر لمواجهة عينيه.


*****

في الجهة الأخرى...


جلس فريد إلى جوار مهاب.


بينما أخذ رضوان مكانه المقابل له مباشرة.


وكأنها مصادفة.


لكن لا أحد كان يصدق أنها كذلك.


أشار رضوان لأحد العاملين.


وبعد دقائق وُضعت المشروبات أمام الجميع.


كلٌ حسب ما يفضله.


أما فريد...


فلم يكن يشرب فعلًا.


ولم يكن يتابع الحفل.


كانت عيناه تتنقلان فقط بين شخصين.


زاد...


التي أصبح ظهرها في مواجهتهما.


ورضوان.


يراقب الأولى.


ويختبر الثاني.


وينتظر.


أي شرخ.


أي نظرة.


أي لحظة ضعف.


لكن رضوان لم يمنحه شيئًا.


على الأقل حتى الآن.


قال مهاب وهو ينظر حوله:


ــ ياه.


ــ من زمان الواحد ما حضرش فرح.


ــ كله يا إما عشا عمل.


ــ يا حفلات رسمية.


ابتسم رضوان.


وقال:


ــ ومين سمعك يا مهاب.


ثم التفت إلى فريد.


وقال:


ــ بس الفضل كله في الفرحة دي يرجع لفريد بيه.


رفع فريد حاجبه.


وقال:


ــ مش فاهم.


ــ أنا اتعزمت زيي زي غيري.


اعتدل رضوان في جلسته.


ثم أسند ذراعيه فوق الطاولة.


ونظر مباشرة إلى عيني فريد.


وقال:


ــ أفهمك أنا.


ثم وضع الكأس أمامه.


وأكمل:


ــ لولاك.... كان زماني في السجن.


ــ وبفضلك إنت أنا خرجت.


ــ والفرح اتعمل زي ما حضرتك شايف.


ــ يبقى مين صاحب الفضل؟


لأول مرة...


شعر مهاب أن هناك شيئًا غير طبيعي في النبرة.


أما فريد...


فاكتفى بابتسامة صغيرة بالكاد ظهرت.


وقال:


ــ لا...


ــ بتعرف تميز يا رضوان.


قال مهاب بسرعة:


"بصراحة يا فريد، رضوان بيشكر فيك قوي."


أراح فريد ظهره إلى المقعد.


ثم وضع ساقًا فوق الأخرى في هدوء.


وأخرج سيجارة وأشعلها ببطء.


سحب منها نفسًا طويلًا.


ثم أطلق الدخان أمامه دون أن يرفع عينيه عن رضوان.


وقال:


ــ يا راجل؟


ــ ليه كل ده؟


أجابه مهاب بحماس صادق:


"الله! هو بالساهل اللي أنت عملته. ده لما رضوان حكالي إنك اللي خرجته من محنته أنا نفسي اندهشت. بس أنا عارفك... طول عمرك بتحب تعمل الخير."


اكتفى فريد بإيماءة بسيطة.


بينما ظلت عيناه معلقتين بوجه رضوان.


أما مهاب فأكمل:


"تعرف يا رضوان؟ مع إني مش طايق فريد دلوقتي وليا عتاب عنده... بس هعديه. فريد أكتر واحد بينا بيهتم بالحفلات الخيرية وتبرعات لدور الأيتام والعجزة."


رفع رضوان حاجبيه بإعجاب مصطنع.


وقال:


"أنا حقيقي منبهر. بس أصدقك طبعًا بعد اللي عمله معايا."


ثم سكت لحظة.


قبل أن يعود وينظر مباشرة إلى عيني فريد.


وقال:


"تخيل... ما فيش بينا صداقة صريحه، وجه بنفسه القسم علشاني."


كانت الجملة بسيطة.


لكن وقعها لم يكن كذلك.


لأن رضوان لم يكن يشكره.


بل كان يذكره.


يذكره بمن يعرف الحقيقة كاملة.


ضحك فريد وقال:


"ما تكبرش الموضوع يا رضوان. وبعدين صاحب مهاب صاحبي... وأنت مش غريب."


"ولا إيه يا مهاب؟"


أسرع مهاب بالإجابة:


"طبعًا... رضوان دلوقتي من العيلة."


هنا مال رضوان قليلًا للأمام.


وقال وكأنه يسأل بدافع الفضول فقط:


"بصراحة أحسدكم على صداقتكم... اللي يشوفكم يقول إن فريد باشا الأخ التالت لعيلة الحسيني، مش مجرد أصحاب."


في اللحظة نفسها...


توقف فريد عن تحريك السيجارة بين أصابعه.


لثانية عابرة.


ثانية واحدة فقط.


لكنها لم تمر على رضوان.


مال رضوان بجسده إلى الخلف مستندًا براحة إلى المقعد.


ثم وضع قدمًا فوق الأخرى.


ورفع كأسه بهدوء.


وكأن السؤال التالي مجرد حديث عابر.


بينما كانت عيناه تراقبان فريد بدقة.


وقال:


"أكيد أنتم أصحاب من وإنتوا صغيرين... مش كده؟"


صمت فريد.


واستقرت عيناه فوق وجه رضوان.


بلا إجابة.


ضحك مهاب وقال:


"لا دي قصة طويلة يا رضوان."


ابتسم رضوان.


وقال:


"بصراحة عندي حماس أسمعها... وأتمنى ما أكونش بزعج فريد بيه."


أطلق فريد ضحكة قصيرة جدًا.


ضحكة بلا دفء.


وبلا قبول.


وبلا رفض.


ثم ترك لمهاب الحديث.


تنهد مهاب وقال:


"بصراحة يا رضوان... فريد كان ليه أخ اسمه قاسم..."


في تلك اللحظة...


لمعت عينا رضوان لجزء من الثانية.


ثم عاد إلى هدوئه المعتاد.


"... أنا وقاسم كنا صحاب قوي..."


واستمر مهاب يتحدث.


بينما كان رضوان ينصت لكل كلمة.


أما فريد...


فكان ينصت لرضوان أكثر مما ينصت لمهاب.


وكلما استمر الحديث...


ازداد شعوره بأن الأسئلة ليست عفوية كما تبدو.


وأن الرجل الجالس أمامه يبحث عن شيء بعينه.


شيء لم يكتشفه بعد.


"... قاسم توفى من 11 سنة."


تجهم وجه رضوان.


وسأل ببساطة:


"إزاي؟"


لأول مرة منذ بداية الجلسة...


تحركت ملامح فريد فعلًا.


ليس بما يكفي ليلحظه أحد.


لكن بما يكفي ليلحظه رضوان.


أبطأ فريد حركة السيجارة بين أصابعه.


ثم عادت كما كانت.


وأكمل مهاب حديثه دون أن ينتبه لشيء.


ــ ومن وقتها ما قطعتش علاقتي بفريد، وفضلنا أصحاب. بس الشهادة لله، فريد عوضني كتير عن فقدان قاسم، لأنه صاحب جدع وما يتعوضش.


انتهى الكلام أخيرًا.


أما رضوان...


فقال وهو ينظر إلى مهاب:


"ما فيش أحلى من الصداقة."


نظر إليه فريد.


وقال بابتسامة غامضة:


"يا ريت ما تحسدناش بقى يا رضوان."


اقتربت ابتسامة صغيرة من شفتي رضوان.


ابتسامة جعلت فريد يضيق عينيه دون أن يشعر.


وقال:


"لا طبعًا... اللي يحسدك بيكون عدوك. بس أنا صديق جديد ولا اتسرعت في طلبي؟"


ضحك فريد.


لكن شيئًا في داخله لم يكن يضحك.


وقال:


ــ إنت داخل على طمع بقى.


ثبت رضوان عينيه في عينيه.


وظهرت فوق شفتيه ابتسامة خفيفة.


وقال:


ــ مش أنا اللي أطمع يا فريد بيه، ولا أفرض نفسي على حد. إنت بنفسك قلت: صاحب مهاب صاحبي... ولا إيه؟


ظل فريد ينظر إليه دون إجابة.


كان يشعر أن هذا الرجل يتحرك حوله في دوائر ضيقة جدًا.


دوائر لا يفهم هدفها بعد.


لكنها تثير انتباهه بصورة غير مريحة.


***


على الجانب الآخر...


كانت زاد تعيش حربًا من نوع آخر.


كل دقيقة كانت تشد فستانها أكثر.


تعيد شعرها للخلف.


ثم تتركه ينسدل فوق كتفيها ليغطي جزءًا من ظهرها.


ثم تعود لتعدله من جديد.


كأنها تبحث عن ساتر يحميها من نظرات العالم كله.


حتى لم تعد قادرة على الاحتمال.


فاستأذنت أخيرًا.


مالت قليلًا نحو غادة.


وقالت بصوت منخفض:


ــ بعد إذنك، هقوم شوية.


التفتت إليها غادة.


وسألتها:


ــ رايحة فين يا زاد؟


أجابتها بهدوء:


ــ هروح الحمام، بعد إذنكم. مش هتأخر.


التقطت حقيبتها الصغيرة.


ثم نهضت وتحركت مبتعدة عن الطاولة.


في اللحظة نفسها...


تتبعتها عينا فريد.


بهدوء.


وباهتمام شديد.


ثم انتقل بنظره إلى رضوان.


منتظرًا.


مترقبًا.


يريد أن يرى إن كان سينتبه لرحيلها أم لا.


لكن رضوان استمر في حديثه مع مهاب.


وكأن الأمر لا يعنيه.


وكأن خروج زاد أو بقاؤها سواء.


ورغم ذلك...


لسبب لم يفهمه فريد...


لم يقتنع.


***


ارتفعت أصوات التصفيق فجأة.


فالتفت الجميع.


ليجدوا فارس يمد يده إلى عروسه ويقودها إلى ساحة الرقص.


بدأت الموسيقى الهادئة تداعب أرجاء القاعة.


وتحرك الاثنان في رقصة بطيئة وسط أجواء دافئة ومليئة بالمشاعر.


ابتسم رضوان.


وصفق مع الجميع.


بينما قال مهاب بعد رشفة من عصيره:


"بس حلوة أجواء الفرح... فتحت نفس الواحد على الجواز."


ابتسم فريد.


وقال:


"وماله... اعملها يا مهاب."


ضحك مهاب:


"أنت يا راجل دايمًا بتشجعني على الانتحار ليه؟ ما تخليك محضر خير."


ضحكوا.


عدا شخصًا واحدًا.


كان يراقب.


وينتظر.


ثم قال فريد فجأة وهو يلتفت إلى رضوان:


"على رأيك... إحنا عملناها خلاص. الدور والباقي على رضوان."


ووضع كأسه على الطاولة.


ثم قال بنبرة أكثر حدة:


"ما اتجوزتش ليه لحد دلوقتي يا رضوان؟"


ساد الصمت للحظة.


وشعر مهاب بالمفاجأة من حدة السؤال.


أما رضوان...


فلم يتغير شيء في ملامحه.


بقيت الابتسامة الهادئة نفسها فوق شفتيه.


وقال:


"عندك عروسة؟"


أبطأ فريد حركة إصبعه حول حافة الكأس.


ثم قال ببرود حاد:


"أنا بسألك سؤال... ترد عليا بسؤال...؟ إيه؟ ما عندكش إجابة؟"


ضحك رضوان بخفة.


وقال:


"بصراحة يا فريد بيه... وما أعرفش إذا كان عندك علم ولا لا... بس أنا جربت حظي في الجواز مرة. ومن بعدها حرمت."


شعر فريد بأن شيئًا ما يغلي داخله.


لكنه حافظ على ملامحه كما هي.


وقال:


"ياه... للدرجة دي بتحبها؟"


هنا...


ضحك رضوان فعلًا.


ضحكة حقيقية.


حتى إن مهاب استغربها.


أما فريد...


فأدرك للمرة الأولى أن أمامه رجلًا لا يسير كما توقع.


رفع رضوان عينيه إليه.


وقال بثبات:


"أنا لو بحبها كنت هسيبها ليه؟"


ثم أضاف:


"كل الموضوع إني كرهت الجواز."


سأله فريد فورًا:


"كرهت الجواز بسببها؟ ولا هي بتفكرك بحاجة؟"


حدق رضوان فيه لثوانٍ.


ثم قال:


"هو في راجل عاقل يتجوز مرة ويكررها؟"


وأشار إلى مهاب.


وقال:


"عندك مهاب أهو... لسه قايلك إنه انتحار."


ضحك مهاب بخفة.


أما رضوان فاقترب قليلًا للأمام.


وثبت عينيه داخل عيني فريد.


وقال:


"صدقني يا فريد بيه... ما فيش أحسن من إنك تعيش حر. ولا واحدة تتحكم فيك. رحت فين؟ جيت منين؟"


ثم ارتسمت ابتسامة خفيفة فوق شفتيه.


وأضاف:


"أنا طير حر... وما بحبش حد يقيدني أبدًا."


صمت فريد لثوانٍ.


وكانت عيناه حادتين بصورة ملحوظة.


ثم قال:


"متأكد إن ده سبب رفضك للجواز تاني؟"


صمت رضوان لثوانٍ.


واستقرت عيناه فوق فريد.


كأنه يحاول فهم المغزى الحقيقي من السؤال.


ثم قال بهدوء:


"لو تعرف السبب الحقيقي عني وأنا ما أعرفوش... قولي. يمكن حد موصلك عني حاجة أنا مش عارفها."


ساد الصمت للحظة قصيرة.


وبقيت نظرة رضوان معلقة فوق فريد.


كأنه ينتظر شيئًا آخر.


أو تفسيرًا لما قاله.


لكن حين لم يأتِ رد...


التفت إلى مهاب فجأة.


وضاعت الجدية من ملامحه.


وقال ضاحكًا:


"أنت قايل لصاحبك إيه عني يا عم؟ بتشوه صورتي ليه؟"


انفجر مهاب ضاحكًا.


وقال:


"وحياتك أبدًا... أنت تعرف عني كده."


ثم نظر إلى فريد وأضاف:


"وبعدين ما تاخدش على كلامه. هو لما بيتقل في الشرب بيبدّع زي ما أنت شايف كده."


حرك رضوان رأسه مبتسمًا.


وسكت.


أما فريد...


فظل ينظر إليه.


بلا كلام.


وبلا ابتسامة.


وبلا أي تعبير واضح.


لكن خلف ذلك الوجه الهادئ...


كانت أفكاره تتحرك بسرعة لم يعتدها.


لأنه للمرة الأولى منذ زمن طويل...


لم يستطع قراءة الرجل الجالس أمامه.


ولأن فريد كان يثق دائمًا في قدرته على قراءة الجميع...


فقد كان ذلك وحده كافيًا ليجعله يشعر بالخطر.


وعبر الطاولة...


استمرت النظرات المتبادلة بينهما.


هادئة من الخارج.


ومشحونة في الداخل.


كأن كل واحد منهما يحاول اقتحام عقل الآخر.


دون أن يتحرك من مكانه.


حرب باردة...


لم يعلم أحد في القاعة أنها بدأت بالفعل.


يتبع ........



© قصص وروايات مريم نصار — جميع الحقوق محفوظة. يُمنع نسخ هذا الفصل أو إعادة نشره كليًا أو جزئيًا دون إذن كتابي مسبق من الكاتبة.

🔔 عجبك الفصل؟ تابعي المدونةعشان توصلك الفصول الجديدة أول بأول🔔 متابعة المدونةاضغطي، سجّلي بحساب جوجل، وخلاص ✔

تعليقات✍️ أضف تعليقًا

  1. تسلم ايدك يا مريومه ابدعتي ❤️❤️

    ردحذف
  2. روعه ومشوق تسلم إيدك ❤️❤️❤️❤️

    ردحذف
  3. الفصل روووووووعه وتحفه بكل المقاييس

    ردحذف
  4. فريد ده ديوث معندوش غيره على أهل بيته ونهايته ان شاء الله حتمون وخيمه

    ردحذف
  5. بجد روووووووووووعه تسلمى يا قمر

    ردحذف
  6. تسلم ايدك يا حبيبتى جميله جدا

    ردحذف
  7. تسلم ايدك يامريوم يامريوم كنت فاكره ان فريد بيحب زاد طلع ولا اي حاجه مجرد تملك وبس ان حاجتي محدش يمتلكها غيري انسان مريض فعلا

    ردحذف
  8. بجد رائع.اول مرة اندم اني اقرا روايه حصري مش منتهية من جما احداثها المشوقة.بجد احسنتي.

    ردحذف
  9. تحفه تحفه تسلم يا قلبي ❤️

    ردحذف
  10. الحلقه في منتهي الجمال تسلمي يا حبيبتي 🎉🎉🎉🎉🎉🎉🎉❤️❤️❤️❤️❤️

    ردحذف
  11. جميلة متحمسة كتييررر

    ردحذف
  12. تسلم ايدك يا مريومه دايما مبدعه

    ردحذف
  13. ايوااااااا يا مريمومة هوا دا الكلااااام انا مبسوطة اوي اوي بجد🥰🥰❤️❤️تسلم ايدككك

    ردحذف

إرسال تعليق

بحث هذه المدونة الإلكترونية