الفصل السابع. زاد الآسمر
الفصل السابع
في مكتب فارس بشركة الحسيني، كانت الإضاءة هادئة والهدوء يلف المكان، بينما يجلس فارس خلف مكتبه يراجع بعض الملفات بتركيز. على الكرسي المقابل، كان مهاب يغلق المجلد الذي بين يديه بتعب، ثم يتكئ للخلف ويرفع يديه للهواء متنهداً:
ـ كفاية كده.يافارس.. أنا فصلت مش قادر أكمل! يلا بينا نرجع البيت!
رفع فارس عينيه عن الأوراق، ثم نظر إلى الساعة قبل أن يعيد ترتيب الملفات أمامه.
ـ اسبقني أنت يا مهاب، هخلص كم ملف في إيدي وأحصلك على طول.
قام مهاب، أخذ مفاتيحه وهز رأسه بقلة حيلة:
ـ براحتك، بس متتأخرش.
غادر مهاب وأغلق الباب خلفه. مرت دقائق معدودة قبل أن تُسمع دقات خفيفة ومرحة على الباب، ليدخل بعدها نادر الحسيني.
كان نادر شابًا في أوائل الثلاثينيات، يتمتع بملامح جذابة وملفتة؛ عينان زرقاوان وشعر بني مرتب بعفوية، إلى جانب ابتسامة دائمة تمنحه مظهرًا مرحًا. كان خفيف الظل بطبعه، لا يترك فرصة إلا ويحوّلها إلى مزحة، حتى في أكثر المواقف جدية.
دخل بخطوات واثقة، وأسند يده إلى إطار الباب قبل أن يقول بمزاح:
ـ ابن خالي الغالي!
رفع فارس عينيه من الأوراق، وحين رآه ابتسم بخفة وقال:
ـ تعالي يا صايع... ادخل.
خطا نادر للداخل بثقة، وجلس على الكرسي المقابل وهو يضع يداً على يد قائلاً بتذمر مصنع:
ـ أيوه طبعاً، دلوقتي بقيت صايع لما مصلحتك خلصت معايا! إنما قبل كده: "نادر أرجوك، أنا محتاجلك، اقف جنبي أنا بضيع"!
ضحك فارس بصوت خفيف وهز رأسه بنفي:
ـ بذمتك أنا قلتلك كده؟! دي عمرها ما حصلت ولا هتحصل في حياتي!
لوّح نادر بيده بثقة:
ـ وأكتر من كده كمان! يعني أنا هيكذب يعني؟
أغلق فارس الملف الذي في يده برفق، ونظر إليه بنظرة ساخرة:
ـ لا طبعاً حاشا لله... أنت بس يا دوب معجون بمية الكذب!
رد نادر وهو يضع يده على صدره بفخر:
ـ حبيبي... دي شهادة أعتز بيها والله!
عدل فارس جلسة كرسيّه ثم نظر إليه متفحصًا :
ـ أنت جايلي دلوقتي في حاجة، ولا معدي بالصدفة؟
وضع نادر ساقًا فوق الأخرى، وأراح ظهره إلى المقعد، ثم قال ببساطة:
ـ أبداً، أنا رحتلك البيت عند غادة واتعشيت هناك، وسألت عليك قالتلي إنك لسه في الشركة. قلت بس! أجيلك ونطلع مع بعض على النادي نلعبلنا ماتش ملاكمة على السريع.
ضحك فارس هذه المرة بروقان وقال:
ـ ملاكمة؟! يابني أنت ما بتحرمش! مش خايف على نفسك من أخر مرة؟
هز نادر رأسه باستخفاف، وقال:
ـ سيبك من التكبر اللي عندك ده.إيه يعني؟ كسبتني في كل مرة؟ ما الدنيا كده مكسب وخسارة.
ابتسم فارس بتهكم وهو يسند ظهره للخلف:
ـ أديك قلتها: مكسب وخسارة، مش خسارة على طول. ده البوكس بتاعي علّم على وشك.
فتح نادر عينيه بدهشة مصطنعة، ووضع يده على وجهه كأنه يستعيد ذكرى مؤلمة:
ـ يا لهوي... يا لهوي على الإنسان لما بيغدر! يا جدعان، بقى ده شكلك وإنت جايلي من شهر تقولي: والنبي يا نادر، أرجوك يا نادر، أنا عايز أعرف كل حاجة عن اللي اسمها حبيبة دي يا نادر! وبعد ما جبت لك كل حاجة عنها، ما سمعتش صوتك. مصلحة، مصلحة يعني!
ابتسم فارس، وهز رأسه:
ـ أول خدمة أطلبها منك، وبعدين يا عم اعتبرني بثق فيك وطلبت منك حاجة مهمة.
رفع نادر حاجبه، ثم حك خده بطرف أصابعه وهو ينظر إليه بفضول:
ـ طيب هي البنت دي عملت لك إيه يعني؟ سرقت منك حاجة؟
نظر فارس لنادر لثوانٍ، وتغيرت نبرته للهدوء وهو يجيب:
ـ سرقت؟... أيوه سرقت. ومالكش دعوة بالموضوع، ريح أنت بس.
مال نادر بجسمه للأمام وسأله بفضول:
ـ طب عرفني بس... سرقت منك إيه؟
لم يجبه فارس، بل ابتسم ابتسامة خفيفة ودافئة لم يستطع إخفاءها، لأنها ببساطة سرقت قلبه.
مال قليلًا إلى الأمام، وضيّق عينيه وهو يراقب تغير ملامح فارس، ثم قال بنبرة ذات مغزى:
ـ إيه ده؟ إيه ده؟ أنا ليه شامم ريحة حب وغرام في المكان؟!
عدل فارس ملامحه فوراً ورجع لجديته، محذراً إياه بنبرة صارمة لكن بها مزاح:
ـ طب لِمّ نفسك ولُمّ الدور علشان ما أقلبش غادة عليك.
رفع نادر يديه في الهواء مستسلماً بضحكة:
لا يا عم، خلاص براحتك. يلا بينا على النادي.
نهض فارس من مقعده، وأخذ مفاتيح سيارته من فوق المكتب، ثم ارتدى سترته والتقط هاتفه.
ـ يلا بينا.
خرج الاثنان من المكتب معًا، متجهين إلى النادي، بينما ظل نادر يبتسم بينه وبين نفسه، وكأن شيئًا ما بدأ يتضح له أكثر مما أراد فارس أن يظهره.
في مناوبة الليل الهادئة بالمشفى، كانت الحركة خفيفة والهدوء يلف الممرات. استغلت حبيبة تلك اللحظات وقررت التوجه نحو غرفة الاستراحة حيث تجلس ريناد. دخلت بابتسامة متكلفة وباركت لها قائلة:
ـ مبارك يا دكتورة ريناد! سمعت إنك اتخطبتي، ربنا يتمم لك على خير.
رفعت ريناد وجهها وابتسمت بتلقائية وهي تجيبها:
ـ الله يبارك فيكي يا حبيبة، وعقبالك يا حبيبتي.
تغيرت نبرة حبيبة قليلًا وبدت عليها علامات الغيظ والاستنفار، فقالت بصوت منخفض:
ـ أمال إيه بقى اللي كان بيحصل قبل كده؟!
ردت ريناد بحيرة واستغراب:
ـ إيه اللي كان بيحصل؟! مش فاهمة!
تابعت حبيبة بنبرة مشحونة:
ـ يعني... كنتِ بتحاولي على قد ما تقدري تلفتي نظر رضوان! ولا أنا فهمت غلط ولا إيه؟
هزت ريناد كتفيها بابتسامة هادئة ورزينة وقالت:
ـ مين؟ أنا؟! لا طبعاً مفيش منه الكلام ده، أكيد يا حبيبتي فهمتي غلط. أخوكِ إنسان محترم جداً، وبكره ربنا يرزقه باللي تقدره وتستاهله.
ردت حبيبة بنبرة حملت غصة خفيفة وكبرياءً جريحاً:
ـ فعلاً يا دكتورة... هيلاقي اللي تستاهله، لأنه ماينفعش يرتبط بأي حد!
شعرت ريناد بالضيق والاهانة، فردت بغيظ واضح:
ـ أنتِ بتوجهي الكلام ده لمين يا حبيبة؟ ما تنسيش نفسك، أنا هنا رئيسة القسم وممكن دلوقتي أـ...
قاطعتها حبيبة بسرعة كبرياء:
ـ سوري يا دكتورة ريناد، الظاهر العشم خدني معاكي وخلاني أنسى نفسي. أنا جيت أبارك لحضرتك وأمشي على طول.
تحركت حبيبة فوراً وتركت الغرفة، بينما تأففت ريناد بضيق وجلست مكانها تشعر بالغيظ.
عادت حبيبة إلى غرفة التمريض والأطباء المناوبين، وكانت هناك مجموعة من الزميلات يتحدثن بحماس. وما إن دخلت، حتى انقسم الحديث بينهن وتخللته الهمزات؛ فقالت إحداهن بمكر:
ـ إيه مالك يا حبيبة داخلة كده وقالبة وشك؟ يا ترى حصل إيه بس؟!
ردت الأخرى بضحكة ساخرة:
ـ هيحصل إيه یعنی! أكيد أكيد اتخانقت مع دكتورها المفضل!
ضحك الباقيات بهمس، لتستشيط حبيبة غضباً داخلياً. ثم أردفت زميلة أخرى وهي تمدح فارس بإعجاب واضح:
ـ عارفين يا بنات، يا بخت اللي هيتجوزها دكتور فارس! ما شاء الله عليه شخصية وثقة وجذاب جداً، ده كفاية شكله و عضلاته وهو داخل المستشفى كده... بحسه ظابط والله!
ردت زميلة ثانية ببرود ومكر:
ـ بس يا بنات بقى، أصل ممكن حبيبة تزعل!
تدخلت "لبنى" وتحدثت بحماس لتدافع عن حبيبة:
ـ وإيه اللي هيزعل حبيبة؟! بصراحة أنتم زودتوها أوي! حبيبة مالها ومال الدكتور فارس؟ اللي عندها كلمة حلوة تقولها، واللي معندهاش تلم لسانها.
ردت الأولى بابتسامة خبيثة:
ـ الله! وإحنا يعني جبنا حاجة من عندنا يا لبنى؟! بس تعرفي؟حبيبة طلعت أنصح واحدة فينا! الأول كانت عاملة حكاية، ومشاكل معاه، وعملت أزمة في القسم... وتشتكيه للمدير، وفي الآخر زي الشطورة وقعت الراجل على بوزه وخلته يلف حوالين نفسه عشان يرضيها!
اتسعت عينا حبيبة بغضب مكتوم، وشعرت بوخزة حادة في كبريائها وكرامتها، فالتفتت إليهن وردت بصوت حاد يقطر دفاعاً عن نفسها:
ـ إيه؟! خلاص مابقاش وراكم غيري تجيبوا في سيرته وتتكلموا عليه؟! بتتهموني في أخلاقي وإني بعمل كده علشان أوقعه؟! ده على أساس إني غريبة عنكم وما تعرفوش طبعي! ما صدقتوا لقيتوا حاجة تمسكوا فيها وتقطعوا في فروتي! أقسم بالله اللي هسمع منها كلمة تمسني ولا تمس أخلاقي لأكون السبب في فصلها من شغلها! أنا قلة أدب مش عايزه، ومحدش فيكم له دعوة أنا كنت بتعامل ليه ولا إزاي! ومحدش يتكلم معايا تاني!
نظرت إليهن باشمئزاز وخرجت بركض وخطوات سريعة.
كانت تشتعل غضباً من فارس؛ فهو السبب الرئيسي في كل هذا الموقف الصعب! اهتمامه المبالغ فيه هذه الفترة، ونظراته أمام الجميع دون أن يخشى أحداً، جعلها محط الشائعات. هو لا يبالي، لكنها هي تخشى على سمعتها وعلى اسم أخيها، وخافت أن يفهم أحدهم الأمر بسوء نية... وحينها لن تغفر لنفسها ولا له أبداً.
اتجهت مسرعة بخطوات غاضبة نحو مكتب فارس لتقول له أن يبعد عنها ولا يعترض طريقها مرة أخرى، ولكن حين دفعت الباب لم تجده بداخل المكتب؛ فلم يكن موجوداً بالمشفى اليوم.
ضربت سطح المكتب بيدها بقوة من شدة الغيظ، ووقفت تتنفس بغضب واضح وشديد من ذلك الفارس.
في فيلا حسين الملكي، كان الجو يمتلئ بالدفء والهدوء. في منتصف الصالة الفسيحة، كان الصغير "قاسم" يركب سيارته اللعبة الصغيرة، يلف بها بضحكات طفولية متقطعة، بينما تجلس زاد إلى جوار والدها يرقبانه بسعادة. كانت زاد تشعر براحة كبيرة وهي ترى طفلها يتغير تدريجياً وتحسن حالته يوماً بعد يوم.
نظر حسين إلى حفيده وابتسامة حنونة تزين وجهه، ثم التفت لزاد وقال بسعادة:
ـ تعرفي يا زاد؟ الكام يوم اللي قضيتيهم معايا دول فرقوا كتير أوي عندي... أنا خايف أحسد نفسي على اللمة دي!
سرت غصة خفيفة في حلق زاد وخالجها تأنيب ضمير حاد؛ فهي ترغب في البقاء بجواره ودعمه، لكن الخوف من فريد كان يكبلها. ردت بنبرة خفيضة أسفة:
ـ سامحني يا بابا... أنا عارفة إني مقصرة معاك كتير، بس غصب عني يا حبيبي. أنا قلت بما إن فريد مسافر، أستغل الفرصة وأجي أقضي الفترة دي كلها معاك، طالما أنت رافض تماماً تيجي تعيش معايا.
تنهد حسين وربط على يدها بحنان:
ـ يا بنتي أنا مابستريحش غير في البيت ده. أي نعم عايش لوحدي، بس بحس فيه بالألفة... ذكريات كتيرة مرت عليا هنا مع ثريا الله يرحمها. يعني أنا زي السمكة، لو طلعت من بيتي أموت!
ابتسمت زاد بقلة حيلة والدعاء يملأ قلبها:
ـ الله يرحمها... وبعد الشر عليك يا حبيبي، ربنا يخليك لينا وما تحرمش منك أبداً.
في تلك اللحظة رن هاتف حسين، فنظر للشاشة وقال:
ـ ده كارم ابن عمك.
ابتسمت زاد وقالت:
ـ بلغه سلامي.
انشغل حسين بالرد على الهاتف، وفي هذه الأثناء كان قاسم يقود سيارته الصغيرة بالقرب من الباب الزجاجي الكبير للفيلا. فجأة، التفت الصغير ورأى والده ينزل من السيارة في الخارج. نزل قاسم بسرعة وركض نحو أمه، ووقف أمامها بملامح مرتبكة.
لاحظت زاد توتر طفلها المفاجئ، وحاولت مداراة الأمر حتى لا يشعر والدها بشيء، فهمست له بحنان:
ـ مالك يا قاسم؟ عايز تروح التواليت؟
هز الصغير رأسه بنفي، وهمس بذعر طفولي:
ـ بابي جه...
تجمّدت زاد مكانها وبلعت ريقها بصعوبة، وسألته بهمس مرعوب:
ـ جه فين؟!
أشار قاسم بيده نحو الباب الخارجي. رفعت زاد عينين متسعتين من الصدمة، لتجد فريد يدخل من باب الفيلا بخطوات ثابتة وثقيلة. نظرت حولها برعب؛ كان والدها ما زال يتحدث في الهاتف. فنادت بسرعة ونبرة مضطربة على الخادمة:
ـ دادة! دادة عواطف!
وقبل أن تطأ قدم عواطف الصالة، كان فريد قد أصبح واقفاً أمامهما تماماً. سقط قلب زاد في قدميها، وحاولت استجماع شتات نفسها بأقصى صعوبة.
نظر فريد إلى ابنه بنظرة ثقيلة، فيما حاولت زاد أن تبدو طبيعية وقالت بارتباك واضح:
ـ سـ... سلم على بابي يا قاسم.
تحرك قاسم خطوتين بخوف واحتضن ساق والده دون أن ينطق بكلمة. انحنى فريد وطبع قبلة ثقيلة على رأس طفله، ثم اعتدل ونظر مباشرة إلى زاد بنظرة كانت كفيلة بإنهاء حياتها مكانها.
حاول فريد الحفاظ على ثباته الظاهري، وقال بنبرة هادئة ومجهدة:
ـ مساء الخير يا عمي.
التفت حسين وهو يغلق هاتفه وابتسامة ترحيب واسعة تعلو وجهه:
ـ أهلاً أهلاً! حمد الله على السلامة يا فريد. طب مش تقول إنك راجع النهاردة؟ كنت بعتلك عربية للمطار!
رد فريد وعيناه تتفحصان زاد بجمود:
ـ تسلم يا عمي... محبتش أزعجك، ورجالتي كانوا في استقبالي ووصلوني لحد هنا.
ابتسم حسين وقال بحفاوة:
ـ نورت القاهرة يا ابني، تعالى استريح.
رد بقطع وجفاف:
ـ لا متشكر، خليها مرة تانية.
قبض فريد على يده بقوة حتى اصطكت أصابعه، فارتجف قلب زاد خوفاً من أن يحدث مكروه لوالدها. في هذه اللحظة أقبلت عواطف، وانقبض صدرها فور رؤية فريد فقالت بوجل:
ـ نعم يا زاد يابنتي؟
حاولت زاد أن ترسم ابتسامة واهية وهي تتنقل بوقفتها لتبعد عين والدها عن فريد قائلة:
ـ خدي قاسم طلعيه فوق يغير هدومه.
ثم التفتت إلى فريد واقتربت منه بابتسامة خائفة:
ـ حـ... حمد الله على سلامتك يا فريد.
نظر إليها بتركيز حاد، لكنها لاحظت حبات العرق الغزيرة التي تكسو جبينه وتنفسه الثقيل المتسارع. صُدمت حين لمحت بقعة دماء دافئة بدأت تتسرب عبر قميصه الأبيض أسفل سترة البدلة، وكان هو يقف بجهد جهيد وزوغَان بسيط في عينيه يشي بأنه ينزف ويقاوم الدوار!
عرفت في توها أن أمراً جليلاً قد حدث. مال عليها فريد وهمس بصوت خفيض، تعبان ومجهد:
ـ زاد... يلا نروح.
استغربت زاد توهانه ونبرته الخالية من البطش المعتاد، ليقطع حسين التردد قائلاً:
ـ لو هتروحي يا زاد مع جوزك، سيبي قاسم معايا يونسني.
وقبل أن يبدي فريد أي اعتراض، اقتربت زاد من فريد بسرعة، خوفاً من أن يؤذي عائلتها إذا رفضت. مدّت يدها بخوف وأغلقت أزرار سترته لتداري بقعة الدم عن عين والدها، ثم نظرت في عينيه وقالت:
ـ أيوه يا بابا... هرجع مع فريد.
نظر إليها فريد بعينين مغيمتين بالتعب. شعرت أنه ليس في حالته الطبيعية إطلاقاً، وعندما أمسك بكف يدها، شعرت ببرودة أصابعه ورجفتها الخفيفة.
خرجت معه بخطوات مرتجفة حتى وصلا للسيارة. استند فريد برأسه على جسم السيارة بتعب شديد ولم يستطع فتح الباب حتى. شعرت زاد بمعاناته وقالت برهبة:
ـ اركب أنت... وأنا هسوق.
أطال النظر إليها بعينين تائهتين. بلعت زاد ريقها بخوف، وشعرت وكأنها تسير معه في طريق بلا عودة، وأن عقابه هذه المرة سيكون أشد من أي وقت مضى. ارتعشت يدها وهي تمتد لتأخذ المفاتيح من يده، وركبت عجلة القيادة دون أن تنطق بكلمة.
كان جرح كتفه ينزف ببطء، فتح الباب وصعد بجوارها، ثم أرجع رأسه للخلف وأغلق عينيه بألم. انطلقت زاد بالسيارة، وطوال الطريق كان عقلهما يموج بالتفكير؛ هي تفكر في العقاب القاسي الذي ينتظرها لأنها كسرت أوامره وذهبت لوالدها، وهو غارق في آلام جسده وصدمة روحه.
وصلت إلى الفيلا ونزلت من السيارة، ونزل هو ببطء وألم يحاول الثبات أمامهما. وما إن دخلا الصالة الداخلية، حتى قبض على يدها بقوة وسحبها نحو الدرج. كانت خطاه متخبطة، يسحبها خَلفه جعلها توشك على السقوط أكثر من مرة، مما أكد لزاد أن نهايتها قد حانت الليلة على يديه.
فتح باب الغرفة وهو يلهث بتعب وقف في منتصفها، ثم أدار جسده ونظر إليها طويلاً وهو قابض على يده.
حاولت زاد الهروب من عينيه الصارمتين وقالت بتلعثم وارتباك:
ـ أ... أنت مجروح! اقعد أغيرلك على جرحك...
اقترب منها بخطوات ثقيلة ومجهدة، فتراجعت هي للخلف بفزع، وظلت تتراجع بخوف حتى اصطدمت حافة السرير بركبتيها وسقطت جالسة.
في حركة بطيئة ومجهدة، خلع سترتة ورماها أرضاً. ثم صعد على السرير، وبيد خائرة لا تملك من قوتها القديمة شيئاً، جذبها من ذراعها ومددها بجواره.
أسند رأسه إلى كتفها وخبأ وجهه بين كتفيها.
كان يتنفس بصعوبة، يشهق أنفاساً متلاحقة كأنه يبحث عن الهواء في وجودها. فتحت فمها لتتكلم، فرفع سبابته المرتعشة ووضعها على شفتيها... حركة واحدة تختصر كل شيء: لا تتكلمي، فقط كوني هنا.
لم يكن في عينيه البطش المعتاد ولا رغبة الانتقام، بل كان فيهما رجاءٌ مكسور وانهيارٌ تام. كان يحتاجها هي بالذات في هذه اللحظة، يبحث في حضورها عن الأمان والهدوء الذي فقده.
أغلق عينيه ونام في لحظات بنومٍ عميق ومجهد، بينما بقيت زاد مستلقية في دهشة وذهول، تُنصت لضربات قلبه السريعة وتستغرب موقفه الغريب واحتياجه المفاجئ لها، والذي لم تتوقعه منه إطلاقاً.
في مكتبه بالمشفى، كان الجو هادئاً والإضاءة دافئة. يجلس فارس خلف مكتبه وأمامه ظرف أبيض مفتوح، يُخرج منه عدة صور ويطالعها بتركيز ورفق. كانت صوراً لحبيبة مع أخيها رضوان وعائلتها.
توقف عند صورةٍ لها، ثم نظر أمامه وهو يتذكر ذلك اليوم الذي ركبت فيه سيارة ذلك الشاب الغريب—والذي علم لاحقاً أنه شقيقها. ابتسم لنفسه بخفة وهو يتذكر كيف اشتعلت غيرته حينها، وضحك بصوت خفيض مسترجعاً جنونه ولوعته الشديدة، حين اتصل بنادر ليطلب منه أمراً خاصاً جداً: أن يجمع له كل معلومة تخص هذه الفتاة حتى تهدأ النار التي في صدره.
عرف عنها كل شيء؛ نشأتها، كيف تربت، ومن كان سندها... عرف أن هذا الرجل هو رضوان. رضوان الذي كافح في الحياة وركض فيها بكل قوته كي يحمي شقيقته ويوفر لها حياة كريمة. رضوان الفقير الذي أصبح في عين فارس رجلاً غنياً جداً بأخلاقه ومواقفه الصلبة. أعجب فارس بشخصية رضوان وحنانه الفائق على أخته، وتذكر دموع حبيبة وهي تقول له بوجع: (وماذا يفعلُ المرءُ إن جَرَحَ يوماً أحداً غاليًا على قلبه؟)... حينها أدرك أن رضوان ليس مجرد أخ، بل هو عائلتها، مأمنها، وكل ما تملكه في هذا العالم.
قطع شروده ونشوة أفكاره صوت خطوات وحركة بالخارج، ورن صوت الممرضة وهي تقول بنبرة رسمية:
ـ يا دكتورة حبيبة، ده وقت البريك بتاع دكتور فارس، وهو نبه عليا محدش يدخل عنده دلوقتي.
بسرعة وحذر، أعاد فارس الصور داخل الظرف وأخفاه في أدراج مكتبه، ثم قام واقفاً.
في الخارج، كانت حبيبة تصز على أسنانها بحدّة من كلام الممرضة. وقبل أن تتراجع، فُتح الباب وظهر فارس وهو ينادي بصوت واضح ودافئ:
ـ حبيبة! تعالي.
اتسعت عينا الممرضة بدهشة من نبرته وإسقاطه للألقاب الرسمية، ثم انصرفت في طريقها. أما حبيبة، فالتفتت نحوه ببطء، وكان وجهها يشتعل بالاحمرار من شدة الغيظ والغضب.
استغرب فارس انفعالها المفاجئ ولم يفهم سر هذا الغضب العارم في عينيها. دخلت إلى المكتب بخطوات غاضبة، وقبل أن يمد يده ليغلق الباب خلفها، التفتت إليه وأشارت بإصبعها بحزم:
ـ سيب الباب مفتوح!
توقف فارس لم يعقب على كلامها، بل ترك الباب موارباً كما طلبت، ووقف أمامها يشبك يديه متسائلاً بهدوء:
ـ مالك؟
نظرت إليه بعينين تشتعلان بالضيق:
ـ مالي؟! إيه هو باين عليا إني مضايقة أوي كده؟!
خطا خطوة صغيرة نحوها وقدم نبرة حنونة:
ـ مش لازم يبان... أنا بحس بيكي.
ضحكت حبيبة بسخرية مريرة وهزت رأسها:
ـ الغوا الترمومتر وجهاز نبض القلب يا جدعان! معانا الحساس باشا بنفسه!
ابتسم فارس ابتسامة هادئة ورزينة، وتراجع بجسده ليتكئ على طرف الأريكة، ثم بدأ يصب لنفسه فنجاناً من القهوة وهو يجيبها بروقان:
ـ مفيش أجهزة تقيم الحب يا دكتورة.
صكت على أسنانها بغضب واقتربت منه خطوة:
ـ يا أخي حبك برص! أنا مشفتش في جرأتك!
وضع فنجان القهوة جانباً ورفع عينيه إليها بابتسامة خفيفة، يتأمل ملامحها الغاضبة وقال:
ـ المفروض بأسلوبك ده تقوليها "بحاجتك"... إيه لازمتها "جرأتك" مع "حبك برص"؟ مش ماشية خالص مع لسانك اللي بينقطـ...
سكت فجأة ولم يكمل الجملة عندما رأى انقباض وجهها، فتنهد ورمى بظهره للخلف قائلاً بجدية:
ـ بلاش... مش عايز دفاع ولا مقاومة، أنا عايز أسمعك. قولي كل اللي أنتِ جاية تقوليه.
استشاطت حبيبة غيظاً من بروده واستقراره، واهتزت نبرة صوتها بالانفعال:
ـ أنت لحد إمتى هتفضل تتعامل معايا كده؟! وقدام طقم المستشفى كله؟!
حرك رأسه بقلة فهم حقيقية:
ـ أتعامل معاكي إزاي؟ مش فاهم!
لوحت بيديها وهي تصرخ بأسى مكتوم:
ـ لأ، أنت فاهم كويس! أسلوبك واهتمامك... تبعتلي قهوة على المكتب، تنادي عليا في أي وقت وأي مكان، تبحلقلي بعينيك قدام أي حد، وكل حاجة بتعملها علشاني... ده كله وتقولي مش فاهم؟!
تنهد فارس ببطء، ثم قام من مكانه ووقف أمامها مباشرة، ونظر في عينيها بثبات وصدق:
ـ والله أنا راجل دغري، وقلتلك على اللي في قلبي بصراحة، وتصرفاتي كلها واضحة وبتقول إني داخل جد. أنتِ بقى اللي بتكابري وبتعاندي وده شيء يرجعلك. أنا ما تعديتش حدودي معاكي... لما بعتلك القهوة، كنتِ في مناوبة ليلية وشوفتك بتسقطي وبتنامي من التعب. ولما بنده عليكي قدام الناس، بيكون عشان طلب في الشغل. وحتى لو كنت عايز أشوفك، فده شيء المفروض يفرحك مش يضايقك... لأني مش بنادي عليكي في السر وكأني بسرق أو بعمل حاجة غلط!
ارتسمت على شفتيها ابتسامة ساخرة مليئة بالوجع والألم، وقالت بصوت يرتجف:
ـ عارف يا دكتور فارس؟ أنت مش فاهم حاجة... أو بتمثل إنك مش فاهم! عاملي فيها البريء اللي جاي من كوكب تاني ومش دريان بالناس بتفكر إزاي!، أو بتمثل عليا إنك جاهل بالأمور اللي بتتعلق بين أي اتنين! تعرف بعمايلك دي أنا بيتقال عليا إيه في القسم من زميلاتي؟! عارف كام واحدة شايفاني إزاي دلوقتي؟! تعرف هما بيقولوا عليا وعليك إيه؟! تعرف بيبصولي إزاي دلوقتي؟
تجمدت ملامح فارس تماماً، وتلاشت ابتسامته وحل محلها الشحوب والصدمة، وكأن أحداً صفعه على وجهه.
وقبل أن تمنحه فرصةً للرد، التفتت حبيبة لترحل، لكنها توقفت عند الباب ونظرت إليه وعيناها تفيضان بالدموع التي تحبسها بكبرياء جريح، وقالت بصوت خافق يقطر قهراً:
ـ أنت لو قاصد تسوء سمعتي في المستشفى... مش هتعمل كده!
اندفعت خارج المكتب وسحبت الباب خلفها، تاركة فارس واقفا في منتصف الغرفة، يحدق في الفراغ بصدمة وذهول، وكأن كلماتها الأخيرة قطعت أنفاسه وأدارت الأرض من تحته.
فتح فريد عينيه ببطء، ليشعر بثقل في رأسه وآلام تنبض في كتفه. نظر حوله ليرى نفسه مستلقياً على السرير، وقد تُبدلت ملابسه الثقيلة بأخرى خفيفة ونظيفة، بينما جُرحه مُضمد بعناية وذراعه معلقة في حامل طبّي لحمايته من الحركة.
أدار رأسه نحو الساعة الجدارية، ففوجئ أنها الثالثة عصراً! استغرب كثيراً وتساءل في سرّه: من الذي فعل كل هذا وغير ملابسي وجرحي بهذه الدقة؟
في تلك اللحظة، طُرقت الغرفة بضربات خفيفة، ودخلت الخادمة وهي تحمل صينية عليها كاس من العصير وطبق صغير به دواء، وضعتها بحذر على الطاولة المجاورة للسرير.
نظر إليها فريد وسألها مباشرة بنبرة حادة:
ـ زاد فين؟
ردت الخادمة بهدوء:
ـ زاد هانم قاعدة في الجنينة يا فريد بيه.
اعتدل في جلسة خفيفة وسألها بفضول:
ـ ومين اللي غيرلي على الجرح ولبسني كده؟
ابتسمت الخادمة وقالت:
ـ الست زاد...
انتعش قلبه لفكرة اهتمامها به، لكن الخادمة أردفت بسرعة لتوضح الأمر:
ـ قالت نتصل بالحارس الشخصي لحضرتك، لأن حرارتك كانت عالية، وهو جاب الدكتور وخيط الجرح وغيرلك هدومك.
تلاشت فرحته فوراً، ونفخ بضيق مكتوم وهو يشير بيدها للخارج:
ـ خلاص... اطلعي بره.
أخذ الحبة ورشفة ماء بسرعة، ثم قام بصعوبة ودخل الحمام وهو يتنفس بغضب؛ فقد كان يمني نفسه بأنها هي من حنت عليه واهتمت به بنفسها.
وقف أمام مرآة الحوض يحدق في وجهه الشاحب، وفجأة استرجع ذاكرته... تذكر آخر مرة اقترب منها بتهديد وكان على وشك أن يرفع يده عليها ويضربها، لكنها رفعت وجهها بثبات وقالت له بجفاء قاطع:
ـ لو فكرت تمد إيدك عليا تاني... هتموت نفسي!
ضرب المرآة بيده بقوة من شدة الغيظ حتى اهتز الزجاج! هو يحب زاد لدرجة الجنون، لكنه عاجز تماماً عن فهم طريقة تفكيرها أو الوصول لعقلها، وعنادها وكبرياؤها يوشكان على إفقاده صوابه.
في الخارج، كانت زاد تتمشى في الحديقة بخطوات بطيئة جوار حمام السباحة، غير قادرة على استيعاب ما قاله الطبيب؛ فالجرح الذي في كتف فريد لم يكن إصابة حادث أو سقطة عادية كما توهمت، بل كان أثر رصاصة حية!
جلست على أول كرسي قابلها، وهمست لنفسها بحيرة وقلق:
ـ دي مش أول مرة يرجع فيها مضروب أو مجروح... بس المرة دي رصاصة؟! أنا مش قادرة أفهم، هو شغله ده فيه إيه بالظبط يخليه يرجع بالمنظر ده؟!
ثم اعتدلت في جلساتها وقامت تتمشى مجدداً وهي تغرق في تفكير أعمق:
ـ وطريقته إمبارح كانت غريبة ومختلفة خالص... أنا قلت أول ما يعرف إني سبتله البيت بعد ما سافر ويرجع ويعرف، ويشوفني مش هيرحمني. ألاقيه داخل زي الطفل الصغير اللي يدور على أمه.
سكنت خطواتها لحظة ورجعت تفكر بعقلانية:
ـ لأ... اللي زي فريد ده، مش طفل أبداً. أكيد تصرفه ده عشان مضروب بالنار ومتألم ومقدرش يبهدلني... لولا كده كان زماني في خبر كان!
وفيما هي شاردة في أفكارها، ألمحت خياله يقترب نحو الحديقة بخطوات متأنية. بلعت ريقها بصعوبة وشعرت برهبة تتسلل إليها، فدعت في سرها:
ـ أستر يا رب... يا رب أبعده عني واكفيني شره، أنا مبقتش قادرة أستحمله.
ـ زاد!
نَطَقَ اسمها بنبرة خفيضة تُغلفها السيطرة وهو يسحب كرسياً مقابلها ليجلس عليه، ثم أشار إليها بيده كي تجلس هي الأخرى.
زفرت بضيق وحذر، وجلست قبالته ثم قالت:
ـ خير يا فريد؟
ابتسم ابتسامة خفيفة لم تلامس عينيه، ومال بجسده للأمام قليلاً وقال:
ـ اتبسطتي لما رحتي عند أبوكي؟
استشعرت فوراً نبرة التهديد المبطنة في سؤاله، فنظرت إليه بجرأة وثبات دون أن ترمش:
ـ إيه؟! تهديد جديد ده ولا إيه؟ هو حرام يعني إني أزور بابا وأشوفه؟!
هز رأسه بنفي ببطء وقال بهدوء مستفز:
ـ لأ مش حرام... بس خرجتي من غير ما أعرف!
ابتسمت بسخرية وقالت لتداري توترها:
ـ وهنوصل لحضرتك إزاي بقى؟! وأنت بره مصر وما نعرفش حضرتك سافرت فين، وتليفونك دايماً مقفول!
رد بثبات وقسوة خفية:
ـ رقم تايسون معاكي... متصلتيش عليه ليه وكلمتيني؟
ردت بدهاء ومكر وهي تضيّق عينيها:
ـ لأ تايسون مين! أنت بتغير عليا، وخفت أتصل بيه تعملي مشكلة كبيرة.
رفع حاجبه ونظر إليها بشك مكتوم:
ـ والله؟!
أجابت بسرعة وثقة دون أن تتلعثم:
ـ إيه ده! مش ده كلامك ليا دايماً؟! "متتكلميش مع حد ولا تعرفي حد وتعيشي في كهف لوحدك"!
أرجع رأسه للخلف وزفر بقلة صبر:
ـ طيب يا ريت كلامي يتسمع! أنا هعدي خروجتك المرة دي... بس صدقيني لو اتكررت تاني، إنتي عارفة أنا ممكن أعمل إيه! واشكري حظك إني مكنتش فايق وراجع تعبان وإلا...
ثم نظر إليها بمغزى ونبرة تحذيرية حاسمة:
ـ لو خايفة على أبوكي بجد بلاش تختبريني عشان هتزعلي... هتزعلي أوي أوي يا زاد يا مالكي!
انقبض قلبها عند سماع اسمه الأخير، لكنها قاطعته فجأة بسؤال مباشر وصريح كالصاعقة:
ـ أنت ليه راجع مضروب عليك نار يا فريد؟!
توقف الكلام في حلقه لثوانٍ، وجاءه السؤال في منتصف صدره. نظر إليها يحاول استقراء ما يدور في رأسها، ثم قرر أن يبعد الشكوك تماماً عن طبيعة عمله لحمايتها وحماية نفسه، وقال ببرود متصنع:
ـ رصاصة غدر... أنتِ عارفة إني رجل أعمال ناجح وأعدائي كتير في السوق.
مطت شفتيها بعدم اقتناع، ونظرت إليه بتحدٍّ:
ـ اممم... عارفة.
ضيق عينيه وسألها بشك:
ـ عارفة إيه؟
ردت بذكاء واستفزاز:
ـ إنك رجل أعمال ناجح!
ثم أتبعت سؤالها فوراً بندية وثقة تامة تجعله يحاصر نفسه:
ـ طيب... وإزاي أنت كنت بره مصر وجاي مضروب بالرصاص؟! هما أعداءك دول كانوا جوه البلد ولا براها؟!
اتسعت عينا فريد لثوانٍ أمام ذكائها النافذ، ثم ارتسمت على شفتيه ابتسامةٌ هادئة مفعمة ببرودة الأعصاب، صبغها بنبرةٍ تحذيرية ذكية ليُغلق الباب تماماً أمام فضولها:
ـ ده شغل رجال أعمال مع بعض. وبعدين مالك مهتمة بالتفاصيل أوي كده ليه؟ حابة تقفي في ضهري وتساعديني ولا إيه؟
ثبتت زاد عينيها في عينيه وقالت بشك ظاهر:
ـ طيب... مش هتقدم بلاغ في القسم؟!
ابتسم فريد بتهكم ساحر وهو يميل بنصف جسده نحوها، وأجاب بنبرة ذكية:
ـ بلاغ؟! مش بقولك متعرفيش مين هو فريد الشامي؟
قَطَّبت حاجبيها متسائلة:
ـ قصدك إيه؟!
أجاب ببرودٍ صلب وهو يطالعها بثبات:
ـ قصدي إن الصحافة لو شمت خبر هتحصل بلبلة ملهاش لازمة.
سحب سيجارة وأشعلها ببطء، ثم نفث دخانها في الهواء متخلصاً من حصار أسئلتها. التفت إليها وسألها بنبرة ألين:
ـ شايفك يعني مركزة مع الرصاصة أوي! إيه... قلقتي عليا؟
صكت على أسنانها بغيظ مكتوم وقالت:
ـ طبعاً... مقلقش ليه!
ابتسم بتهكم وقال:
ـ لا باين عليكِ أوي! بأمارة إنك بعتي للحرس يغيرولي هدومي ويجيبولي دكتور!
كان يحترق في صدرها رغبة بالصراخ في وجهه وإخباره بمدى كرهها للمسته وقسوة ضربه لها، لكنها اكتفت بالنطق بنبرة جافة وقاسية:
ـ أنت مش مخلي في جسمي حتة سليمة يا فريد من ضربك فيا عشان أقدر أساعدك!
تلاشت ابتسامته تدريجياً، ونظر إليها بنظرة شابتها خيبة أمل وسط قوة وهشاشة غريبة، ثم نفخ بنفاذ صبر وقال وهو يغير مجرى الحديث ليعيد حواجزه:
ـ عندي اجتماع مهم في مكتبي هنا بالليل... مش عايز ألمح خيالك في الفيلا. تطلعي على جناحك وتفضلي فيه لحد ما أقولك تخرجي منه... مفهوم؟!
نظرت إليه بصمت جاف دون أن تجيب، ثم اتجهت نظراتهما معاً نحو مياه حمام السباحة وصمتا... كان الصمت أثقل من الكلام، بينما يدور في عقل فريد خوف مكتوم من أن تبدأ زاد في كشف أسرار عمله وتكتشف الحقيقة المظلمة التي يخفيها عنها بكل قوته.
دخل فارس إلى الفيلا بخطوات سريعة، وما إن وصل إلى الصالة حتى وجد شقيقه الأكبر مهاب يجلس برفقة زوجته غادة، بينما كان ابنه مالك وابنته اسيل يجلسان في الجهة الأخرى منهم، منشغلين بلعبة على جهاز البلايستيشن.
وما إن لمح مالك عمه، حتى رفع عينيه عن الشاشة، فابتسم فارس وهو يتجه نحوهما، ثم صافحهما وقال بودّ:
ـ عاملين إيه يا ولاد؟
ردّا عليه التحية، ثم عاد كلٌّ منهما إلى اللعب، بينما رفع فارس عينيه إلى مهاب، وقال بنبرة جادة لم تحتمل المواربة:
ـ عايزكم في المكتب يا مهاب.
التقط مهاب نبرة شقيقه غير المعتادة، فتوقف عن حديثه مع غادة، ونظر إليه باهتمام، ثم التفت إلى ابنه وابنته وقال:
ـ خلصوا الدور ده واطلعوا كملوا مذاكرتكم.
حرّك مالك وآسيل رأسيهما بالموافقة، ثم عادا لمتابعة اللعب لدقائق قليلة، قبل أن ينفذا طلب والدهما.
تحركت غادة وتبعتهما بخطوات متسائلة باتجاه المكتب، وهي تمتم بدعاء خفيض:
ـ استر يا رب... فارس شكله وراه سر ومش مريحني!
داخل المكتب، جلس مهاب على الأريكة وجلست غادة إلى جواره، بينما وقف فارس أمامهما لثوانٍ قبل أن يجلس على الكرسي المقابل.
كسر مهاب الصمت متسائلاً بجدية:
ـ خير يا فارس؟ جبتنا المكتب ليه؟
تابعت غادة باهتمام ونظرة متفحصة:
ـ أيوه يا فارس في إيه؟ وشك ما يبشرش بالخير خالص... حصل معاك حاجة؟
لم يرد فارس فوراً؛ بل أخرج هاتفه، وفتح صورة لحبيبة وضعها على الطاولة أمامهما بثبات:
ـ شوفي الصورة دي يا غادة.
التقطت غادة الهاتف وتأملت الصورة بفضول، سرعان ما تحول إلى إعجاب حقيقي وقالت:
ـ بسم الله ما شاء الله... إيه الرقة والجمال ده! لا حقيقي قمر.. لا ميك أب ولا لبس أوفر ومحجبة وطالعة زي القمر حقيقي.. ويا ترى بقى هي حلوة كده في الـحقـ....
قاطعها مهاب قبل أن تُكمل، وهو ينظر إلى الصورة من بعيد بعينين يملؤهما الشك، ثم التفت إلى فارس بنبرة صارمة:
ـ إيه الموضوع بالظبط يا فارس؟
أجابه فارس بهدوء وثقة:
ـ الموضوع إن نويت أتجوز يا مهاب.
اتسعت عينا غادة وراجعت الصورة سريعاً تقارن ملامح حبيبة بملامح فارس، فشعرت بانسجام عجيب بينهما، بينما صُدم مهاب لكنه تمالك نفسه سريعاً وقال بجمود:
ـ خطوة ممتازة يا فارس... بس يا ترى مين سعيدة الحظ دي؟
رد فارس بثبات:
ـ دكتورة زميلة ليا في المستشفى.
سأله مهاب بنبرة مشوبة بالريب:
ـ أي مستشفى؟
ابتسم فارس بتهكم رزين وقال:
ـ شكل «نوفل» مقصر في المراسيل اليومين دول... بس هقولك، المستشفى الحكومي.
اتسعت عينا مهاب صدمةً. لاحظت غادة التوتر الصامت، فأسرعت تلين الجو وتسأل:
ـ المهم هي إسمها إيه؟
رد فارس وعيناه مثبتتان على أخيه:
ـ حبيبة... الدكتورة حبيبة العطار.
علقت غادة بسعادة:
ـ والله جميلة واسمها حلو أوي، أنا بقول نروح نـ...
رمقها مهاب بنظرةٍ حادة وقاطعها بنبرةٍ قاطعة:
ـ ممكن تنقطينا بسكاتك شوية؟ عايز أتكلم... ده موضوع جد مش تهريج!
ردت غادة بنفاذ صبرٍ وضيقٍ جليّ:
ـ هو أنا هزرت؟! اتفضل اتكلم.
التفت مهاب إلى فارس وقال بجدية قاطعة:
ـ إنك ترتبط ده شيء جميل يا فارس... بس الأهم: البنت دي ظروفها إيه؟ عيلتها مين؟ وهل مستوى عيلتها مناسب لمستوانا؟ وما تنساش إنك دكتور وتملك مستشفى خاصة، وعندك الشركة وغير حاجات تانية كتير... هي بقى تملك إيه؟!
زفرت غادة بضيق محاولة التدخل لإنقاذ الموقف، لكن فارس سبقها وقاطع بقوة:
ـ لأ... من حيث تملك، فهي تملك كتير أوي يا مهاب!
تعجب مهاب وابتسم بسخرية:
ـ حلو... سمعني يا سيدي.
ساد الصمت للحظة، قبل أن تتغير ملامح فارس تمامًا.
لم يعد في وجهه شيء من المزاح، وحل محله اعتزاز واضح وهو يقول:
ـ حبيبة عندها اللي أنا مالقتوش في أي واحدة عرفتها... لا في الجامعة، ولا في الشغل، ولا حتى في الستات اللي قابلتهم في حياتي.! حبيبة لا تقارن بأي شكل من الأشكال بأي بنت تانية. تملك جمال طبيعي، أخلاق عالية، احترامها لنفسها ولعيلتها، وإخلاصها لشغلها. حبيبة ممكن تبقى وسط مليون راجل، وبرضه تعرف تحط حدود محدش يقدر يتخطاها... بنت أصل، وعندها عزة نفس مش عند حد، اتربت بتعب وشقى مدفوع تمنه غالي أوي!
تنهد مهاب بقلة حيلة وقال:
ـ كل كلامك ده جميل وأرفعله القبعة، وأحييك على اختيارك... لكن برضه مستواها الاجتماعي إيه؟!
تدخلت غادة باحتجاج:
ـ إيه يا مهاب! بعد كل اللي فارس قاله ده بتسأل عن المستوى والفرق الاجتماعي؟! أكيد واحدة بالأخلاق دي هتكون بنت ناس، وأهم حاجة إنها تصون فارس!
رد مهاب بصرامة:
ـ الفروق الاجتماعية مش مجرد فلوس يا غادة! الفروق دي بتخلق فجوة في التفكير والبيئة... ونظرة الناس لينا وليها!
هنا وقف فارس متأثراً، وظهر الإصرار القاطع في عينيه:
ـ أنا جيت أعرفكم باللي هعمله وناوي عليه... مش عشان أسمع اعتراض أو نقد.
عقد مهاب حاجبيه:
ـ يعني إيه يا فارس؟
رد فارس بثبات:
ـ يعني أنا قررت أتجوز حبيبة، وجيت أقولك عشان أنت أخويا الكبير وتيجي معايا وأنا بتقدم لها.
سأله مهاب:
ـ من غير ما أعرف كل حاجة عن عيلة البنت دي؟
اقترب فارس من الطاولة وطرق بيده عليها بضربة خفيفة ولكن حاسمة:
ـ جوازي ده اختياري وعيلتها تخصني أنا... بس هريحك، مستواها اللي يهمك يا مهاب مش زي مستوانا. ولو شايف إن ده هيحرجك وسط الوسط بتاعنا ويقلل منك... فأنا على أتم الاستعداد إنك تخلي مسؤوليتك مني خالص!
نظر فارس في عيني مهاب مباشرة وأردف بنبرة قاسية:
ـ واللي يسألك فارس عمل كده ليه... قولهم أنا اتبريت منه عشان عصاني واتجوز البنت اللي رفضتها، واللي مستحيل فارس يفكر في أي واحدة غيرها!
ساد الصمت المكتب، وتلاقت نظرات الأخوين بتحدٍّ وعناد واضح. وقفت غادة وسطهما ممتعضة:
ـ إيه يا جماعة في إيه؟ هو أنتو ما تتفقوش على حاجة أبدا؟!
وأنت يا فارس حاول تهدى، أخوك مهاب بيفكر في مصلحتك وخايف عليك.. هو بتتكلم كده عشان لسه ما شافش حبيبة، بس أنا متاكدة إنه لما يقعد مع عيلتها هيرجع في كلامه ويوافق على طول.
نظر إليهما فارس هادئاً وقال:
ـ حبيبة عيلتها كلها بتتلخص في حاجة واحدة بس.
تساءلت غادة:
ـ إيه هي؟
أجاب فارس:
ـ أخوها رضوان... رضوان العطار.
قام مهاب مفزوعاً:
ـ وكمان مالهاش غير أخوها؟! دي اتحدفت عليك من أنهي داهية دي؟!
ابتسم فارس لاستفزازه وقال بروقان:
ـ من المستشفى اللي عاقبتني بيها!
رفع مهاب يده في الهواء باستسلام وقال بغيظ:
ـ أنا عارف حظي معاك! كل ما آخدك خطوة لقدام عشان تعقل، ترجع وجايبلي معاك مصيبة! أنا موتي مش هيبقى على إيد مراتي... لأ، موتي هيكون على إيدك أنت!
تمتمت غادة بزعل طفولي:
ـ لا حول ولا قوة إلا بالله... هي غادة لازم تتحط في جملة مفيدة وخلاص؟!
التفت مهاب لشقيقه وقال بنبرة متهدجة:
ـ بتلوي دراعي يا فارس؟
رد فارس بهدوء وثبات:
ـ عمري ما أعملها.
ثم نظر إلى مهاب في عينيه، وبقي صامتًا للحظات، قبل أن يقول بصوتٍ خافت يحمل صدقه:
ـ بحبها يا مهاب.
تأمل مهاب وجه شقيقه طويلًا.
كان يعرف فارس جيدًا؛ وإذا اتخذ قرارًا كهذا، فلن يتراجع عنه بسهولة، وربما لم يكن اعتراضه ليغير شيئًا سوى أنه سيجعل الأمر أصعب عليهما.
زفر مهاب بضيق، ثم أومأ برأسه مستسلماً:
ـ وأنا من إمتى مشيت كلمتي عليك؟
ابتسم فارس بنصر، بينما قالت غادة بفخر:
ـ تربيتي!
نظر لها مهاب بقلة حيلة:
ـ تربية... ولا بلاش!
ضحت غادة وتداركت الأمر:
ـ ها؟ نقول مبروك؟
رد مهاب بحزم أخير:
ـ لأ... لما أسأل عليها الأول.
ابتسم فارس بثقة وغمز لأخيه:
ـ فارس الحسيني سبقك وكل حاجة تمام... حبيبة العطار تشرف أي حد.
ضرب مهاب كفاً بكف وهو يضحك بيأس:
ـ ده إحنا متأخرين أوي يا جدعان!
رد فارس وهو يستعد للخروج:
ـ «نوفل» مش شايف شغله معاك... شد عليه شويه!
تعالت ضحكات مهاب وغادة، وانتهى التوتر الذي ملأ المكتب قبل دقائق، بينما خرج فارس منه وقد ارتسمت على وجهه ابتسامة هادئة؛ فقد حصل على ما جاء من أجله... موافقة أخيه، ولو بعد معركة صغيرة.
خَرَجَت حبيبة من غرفتها كالبركان الثائر، والشرر يتطاير من عينيها غضباً. اتجهت بخطواتٍ غاضبة ومندفعة نحو المطبخ، وفتحت باب الثلاجة بعصبية مفرطة، تقلب في أرجائها بقلة صبر حتى أخرجت بعض أطباق الطعام. وضعت الطعام في الميكروويف لتسخينه، ثم أفرغته في طبقٍ واسع، وخرجت إلى الصالة تجر خطواتها بضيق.
جلست على الأريكة، والتقطت جهاز التحكم عن بُعد، ثم فتحت التلفاز ورفعت الصوت لدرجةٍ صاخبة وهي تنكَبُّ على الطعام تأكل بشراهة وانتقام من غيظها المكتوم!
في هذه اللحظة، فتح رضوان باب الشقة ودخل. وضع يده على أذنه فوراً من شدة الضوضاء المتصاعدة من التلفاز، وعقد حاجبيه باستغراب وهو يقترب منها، ثم جلس بجوارها وقال معاتباً:
ـ إيه يا بنتي الدوشة اللي أنتِ عاملاها دي؟! وطي صوت التلفزيون ده شويه.
التقطت حبيبة جهاز التحكم بانفعال شديد، وضغطت على الزر لتغلقه تماماً، ثم التفتت إليه ونظرت في عينيه بنرفزة قاطعة:
ـ أهو قفلته خالص... استريحت؟!
تطلع إليها رضوان بذهول وتعجب، ووقعت عيناه على كمية الطعام المهولة المكدسة أمامه، مشتكةً في ملامحها المجهزة للبكاء والغيظ، فغمغم بقلة حيلة وضحتكة خفيفة:
ـ يخربيت الهرمونات يا حبيبة! هو أنتِ يا بنتي مش كنتِ ١٠٠ فل و١٤ الصبح ومبسوطة وجايبلك سندوتشات، ومظبطك وتقولي: "حبيبي يا رضوان" و"تسلملي يا رضوان"... ودلوقتي راجعة بمنظرك ده؟! إيه اللي حصل؟!
دفعت حبيبة بالمعلقة في فمها بتحدٍّ، وتحدثت بنبرة مبحوحة ونصف كلامها غير مفهوم من كثرة الطعام في فمها:
ـ هيحصل إيه يعني أكتر من اللي بيحصل معانا؟! إحنا نحس وحظنا نحس في كل حاجة يا رضوان... أنا زهقت، أقسم بالله زهقت!
تراجع رضوان بجسده للوراء يلوح بيده باشمئزاز ومرح:
ـ لما تيجي تتكلمي ابلعي اللي في بوقك الأول... ما تقرفينش، ارحميني وبطلي قرف يا بنتي! أنا بحس إنك واحد صاحبي الأنتيم مش أختي الدكتورة! اعقلي كده ودوسي فرامل شويه، وسيبي الأكل واحكيلي مالك.
نظرت إليه بتحدٍّ وهي تضع المعلقة التالية في فمها بمرارة وقال بصوتٍ متحشرج:
ـ أنت حتى مستكتر عليا الأكل يا رضوان؟! ده إيه العيشة دي يا ربي! الواحد يروح يقعد في دار مسنين بقى!
انفجر رضوان ضاحكاً على دراميتها غير المتوقعة، ومال نحوها بنبرة أهدأ وأكثر حناناً:
ـ ده واضح إن في حد معلم عليكِ علامة إكس! ومخليكِ مش طايقة نفسك،اهدِي بس كده واحكيلي... مين اللي مزعلك... وأنا أروح أندمه إنه بس فكر يضايقك أو يدوسلك على طرف!
في تلك اللحظة، مرت أمام عيني حبيبة صور زميلاتها في المشفى ونظراتهن المسمومة، وتذكرت حركات فارس وإصراره. اعتصر قلبها خوفاً؛ فهي لا تستطيع التصريح بشيء حمايةً لسمعتها، وخشيةً من أن يندفع رضوان بتهور وتحدث مصيبة قد تفقدها شقيقها الوحيد سندها في الحياة.
توقفت يدها عن الطعام، والتقطت محرمة ورقية، مسحت بها فمها بهدوء، محاولةً لملمة شتات نفسها وقالت بنبرة عادية متصنعة:
ـ ما فيش حاجة يا رضوان... مشاكل في الشغل عادية، أنت عارف إني لسه مقيمة وأي غلطة بتتحسب عليا.
هز رضوان رأسه بتفهم وطمأنة دافئة:
ـ حبيبتي، طول ما أنتِ ماشية صح وتعملي اللي عليكِ وتراعي ربنا في شغلك... ما تخافيش من أي حاجة ولا تشيلي هم أي حاجة.
أومأت حبيبة برأسها وصمتت، بينما ابتسم رضوان وابتعد بيده خلف ظهره لثوانٍ، ثم أخرج وردة حمراء جورية، وقدمها لها بحركات مسرحية لطيفة:
ـ اتفضلي يا حبيبة أخوكِ.
اتسعت عينا حبيبة بذهول، ونظرت إلى الوردة ثم إلى وجه رضوان وقالت بنبرة غير مصدقة:
ـ إيه ده يا رضوان؟! جايبلي وردة؟!
ابتسم رضوان بوفاء وأبوة دافئة:
ـ أحلى وردة لأحلى بنوتة... وأنا يعني عندي كام حبيبة عشان اجيب لها؟!
أخذت حبيبة الوردة بلهفة، وقربتها من أنفها تشمها بتركيز، ثم مطت شفتيها بضحكة خبيثة:
ـ الله... ملهاش ريحة!
ضرب رضوان كفاً بكف وضحك بيأس متصنع:
ـ هي دي شكراً؟! والله العظيم أنا غلطان إني عبرتك!
ضحكت حبيبة من قلبها لتداري دموعها وقالت بامتنان حار:
ـ بهزر معاك يا رضوان والله... ريحتها جميلة، تسلملي حبيبي يا رب ما اتحرم منك أبداً، ويحفظك ليا يا أحلى أب وأخ في الدنيا دي كلها.
شعرت بسكينة غريبة تتسلل إلى صدرها، وتنفست الصعداء ثم أردفت بنبرة غارقة في المحبة:
ـ تعرف يا رضوان؟ ساعات بحس إن ربنا راضي عني قوي عشان تكون أنت أخويا.
تنهد رضوان بابتسامة صافية يملؤها الحب والاعتزاز:
ـ ده أنا اللي ربنا بيحبني عشان خلاكِ ونيستي في الدنيا.
ضحكت حبيبة وهي تمسح دمعة تسللت على خدها متأثرة:
ـ أنت أستاذ.. بتعرف إزاي تخليني أعيط!
تأملها رضوان لثوانٍ بنظرة ثاقبة لم تخلُ من الحذق والاهتمام، ثم سالها بنبرة هادئة ورزينة:
ـ حبيبة... أنتِ مش عايزة تقوليلي حاجة؟
بلعت حبيبة ريقها بارتباك، وتوترت نظراتها:
ـ حاجة؟ حاجة زي إيه يعني يا رضوان؟ مش فاهمة!
أوضح رضوان شكوكه اللطيفة وهو يميل نحوها:
ـ يعني بحس إنك الفترة دي مش على طبيعتك.
تأتيها نبرة التوتر أوضح، فتسأله بمحاولة للهروب:
ـ إزاي؟ مش فاهمة!
رد رضوان بجدية أخوية يتفحص تعابيرها:
ـ يعني ترجعي من شغلك تدخلي على أوضتك على طول، تصحي من النوم قبل ميعادك وتنزلي بدري... حاسس إنك متغيرة كده وفيكِ حاجة مش طبيعية.
احمرت وجنتا حبيبة وتلعثمت لثوانٍ، ثم حاولت جاهدة التملص من الموضوع بنبرة طبيعية قدر الإمكان:
ـ أبداً يا رضوان... ما فيش حاجة والله، الموضوع عادي! كل الفكرة إني بكون مفرهدة وعايزة أنام بدري، وعندي شوية مراجع محتاجة أراجعهم، وبنزل بدري عشان ألحق المواصلات مش أكتر... يعني ما فيش حاجة مريبة خالص.
حرك رضوان رأسه ببطء متفهماً موقفها وقال براحة:
ـ تمام... أنا بس بحب أطمن عليكِ.
تطلعت إليه حبيبة، واستغلت الفرصة لتقلب الدائرة عليه بذكاء وتبعد الشبهات عن نفسها، فسألته بمكر:
ـ وبعدين أنت بتسأل... طب ما أنت بقالك كم يوم كده مختفي ومش ظاهر وما بتجيش غير على النوم؟ أقولك بقى في إيه ومالك وايه اللي مغيرك؟!
ابتسم رضوان بثبات وهدوء ساحر، واعتدل في جلسته:
ـ أبداً... أنتِ عارفة إن في جرد في الشركة بتاعة صاحب المصنع، وكان عايزني معاه الفترة دي.
أومأت حبيبة برأسها بقبول واطمئنان:
ـ تمام.
استدار نحوها رضوان بابتسامة حنونة وسألها:
ـ أنتِ أحسن دلوقتي؟
نظرت حبيبة إلى الوردة الحمراء بين يديها، ثم رفعت عينيها المليئتين بالحب والامتنان لشقيقها وقالت بصداقة وثبات:
ـ طول ما أنت في ضهري... أنا زي الفل.
ابتسم الشقيقان لبعضهما في صمت دافئ، بينما احتضنت حبيبة الوردة بيديها، وساد المنزل هدوء مريح أذاب كل توتر اليوم وقهر المشفى.
في تمام الساعة الثالثة فجراً، كان الظلام يبتلع الطريق كوحشٍ رابض. توقفت السيارة السوداء في مساحتها المحددة بعيداً عن أضواء المدينة.
ترجلت «سما» من مقعد القيادة ببطءٍ مدروس، كمن يتحرك وسط حقل ألغام. كانت هيئتها مجرد أشباح امرأة؛ شعر مستعار أسود قصير حتى غيّرت ملامح شعرها المعروف، نظارة شمسية داكنة رغم قتمة الليل، وكمامة طبية تغطي نصف وجهها، فلا يظهر منها سوى حذر عينيها المتنقلتين في العتمة.
أشارت بيدها إشارة قصيرة وجافة للحارسين الواقفين بجوارها. دون كلمة واحدة، تحرك الرجلان كالآلات، وسحبا من المقعد الخلفي شنتين كبيرتين من القماش المقوى الثقيل، وأودعاهما بدقة في صندوق السيارة الخلفي. أغلقت سما الصندوق بنفسها، وصعدت إلى عجلة القيادة، ثم تابعت الخريطة الرقمية (GPS) وهي تنطلق بالسيارة نحو نقطة اللقاء الحرج.
توقفت على بعد أمتار من التبة الصحراوية. أطفأت المصابيح الإضافية، وأعطت إشارتين متتاليتين بوميض ضوئي قصير من السيارة.. لم تمر ثوانٍ حتى لمع في العتمة وميض ضوئي أحمر رداً على إشارتها.
تقدمت سيارة دفع رباعي بخطواتٍ وئيدة، ونزل منها «تايسون» برفقة ثلاثة من رجاله المسلحين. اتجه تايسون مباشرة إلى خلفية سيارة سما، وفتح الشنطة دون مقدمات. سحب السحاب الخاص بإحدى الحقائب، وانعكس بريق المعدن البارد تحت ضوء كشاف يده؛ كانت أسلحة أوتوماتيكية حديثة متراصة بعناية. قلّب تايسون بضعة قطع بيديه الخشنتين، تفحص الأرقام المتسلسلة وجاهزية الخزنات، ثم أومأ لرجليه بنقل البضاعة فوراً.
في هذه اللحظة، فتحت سما باب السيارة ونزلت، وخطت خطوتين للأمام وهي تنادي بنبرة قاطعة:
ـ تايسون!
التفت إليها تايسون بجسده الضخم، وحافظ على مسافة أمان احترافية وهو يجيب بصوتٍ منخفض:
ـ أيوه يا مدام؟
عقدت ذراعيها أمام صدرها وسألته بنبرة استجوابية يخالطها الشك:
ـ البضاعة دي هتتسلم لمين؟
نقل تايسون نظره بين الحقائب والظلام المحيط قبل أن يرد ببرود:
ـ لسه التعليمات ما جتش من البوص.
عدّلت نظارتها بأصابع ترتعش غضباً وسألته بصوتٍ أتى خشناً من خلف الكمامة:
ـ وفريد؟ ما شفتوش؟ ما تعرفش عنه حاجة؟
توقف تايسون عن الحركة لثانية، ونكس رأسه قليلاً ليخفي تعابير وجهه، ثم قال بثبات حذر:
ـ لأ ـ يا مدام... آخر مرة شوفته وقت الإصابة، ومن ساعتها بقالنا أسبوع ما اتقابلناش. وأنا معرفش أكتر من كده.
خطت خطوة إضافية ونبرتها تزداد حدة:
ـ ما تعرفش فعلًا... ولا إنت اللي مش عايز تقول؟
ساد صمتٌ ثقيل بينهما، لم تسمع فيه سوى صوت الريح الجافة. نظرت إليه سما تنتظر إجابة، لكن تايسون التزم الصمت التام ورجليه يكملون تحميل الحقائب. وقال بنبرة رسمية مغلقة لا تحتمل النقاش:
ـ يا مدام أنا ما عنديش أي معلومات أقولها لحضرتك، وأنا دلوقتي جاي استلم البضاعة وأمشي.
استدار تايسون ليركب سيارته بعد أن أخذ رجاله الشحنة، دون أن ينتظر منها إذنًا. ظلت سما تتابعه بغيظ، قبل أن تعود إلى سيارتها وتغلق الباب بعنف. كانت أكثر ما يؤرقها فكرة واحدة؛ أسبوع كامل وفريد لا يرد على اتصالاتها، بينما هي واثقة أنه يقضي هذا الوقت مع زاد.
ضربت عجلة القيادة بقبضتها، ثم انطلقت بالسيارة مسرعة وسط الظلام.
في تمام الساعة التاسعة مساءً، عادت حبيبة من عملها بالإرهاق المعتاد. خطت إلى داخل الشقة وأغلقت الباب خلفها بثقل، وما إن أتمت إغلاقه حتى استوقفتها رائحة عطر ساحرة، نفاذة وفاخرة، ملأت أرجاء المكان.
استنشقتها باندهاش، وانطلق صوتها بعفوية:
ـ الله! إيه الريحة الحلوة دي؟!
استدارت وهي تنادي بصوت عالٍ:
ـ رضوان! يا رضوان!
لم يأتِها أي رد.
اتجهت إلى الداخل، لتتسمر فجأة أمام طاولة السفرة؛ كانت هناك باقة ورد أنيقة إلى جوار علبة شوكولاتة فاخرة، يحمل غلافها توقيع ماركة عالمية شهيرة.
اتسعت عيناها بدهشة، وقالت بصوت متهلل:
ـ إيه ده! صلاة النبي يا صلاة النبي... إيه الورد والشوكولاتة دي؟ ده شكلها من النوع النضيف كمان! هو في حد نضيف جالنا ولا إيه؟!
اقتربت من الباقة، واستنشقت عبيرها، ثم هزت رأسها بحيرة:
ـ آه... الريحة الأصلية للورد! بس برضه في ريحة أجمَد منها مش قادرة ألقطها!
ثم التفتت إلى علبة الشوكولاتة، وقالت باستغراب لا يخلو من الطرافة:
ـ هو رضوان قبض الجمعية وهيخربها ولا إيه؟
وضعت أغراضها جانبًا، ثم اتجهت نحو غرفة أخيها وهي تتذمر:
ـ يا رضوان، إنت فين يا عم؟ بنادي عليك... أنا ميتة من الجوع! على لحم بطني من الضهر.
خطت خطوة لتطرق الباب، لكنها توقفت فجأة كأن صاعقة ضربتها.
كانت ضلفة الباب مواربة، ومن الداخل ظهرت لها غرفة المجلس التي امتلأت بالضيوف.
في المنتصف كان فارس يجلس بهدوئه المعتاد، وإلى جواره غادة، بينما جلس مهاب على الناحية الأخرى. أما رضوان، فكان يضع يده على جبهته بإحباط قاتل من تصرفات أخته التي أُذيعت على الهواء مباشرة!
اندفعت الدماء إلى وجه حبيبة، واتسمرت عيناها في مكانهما، وهمست بذهول مرعوب:
ـ ياليلة سودا!
كان الجميع قد تابع المشهد منذ لحظة دخولها الشقة.
كان فارس يبتلع ضحكته بصعوبة وهو يراقب ذهولها، بينما مالت غادة نحوه وهمست بابتسامة متسلية:
ـ هي دي العروسة يا فارس؟
حرك رأسه بهدوء وقال لها بنبرة خفية:
ـ أيوه يا غادة.
عقدت غادة حاجبيها وهمست مجددًا:
ـ هي دي الدكتورة الرقيقة الكيوت؟!
هز رأسه، وقال بعينين تلمعان بالعبث:
ـ أيوه يا غادة... مش واضح عليها؟
حركت غادة رأسها بسخرية لطيفة:
ـ لا واضح... واضح قوي كمان، دي بسكوتة!
رد فارس بهمس أشد عبثًا:
ـ لا... دي رافايلو!
ضحكت غادة بصمت، وكتمت ضحكتها بصعوبة، ثم التفتت إلى مهاب الذي كان يراقب الموقف بملامح مذهولة.
مال مهاب على أذن فارس وقال بنبرة متهكمة:
ـ هي دي عروستك يا فارس؟
أومأ فارس بثبات:
ـ أيوه يا مهاب.
استطرد مهاب وهو يضيق عينيه:
ـ هي دي العروسة اللي صوتها مابيطلعش بره بقها؟
حرك فارس رأسه بنبرة بريئة مستفزة:
ـ أيوه... مش واضح عليها يا مهاب؟
رد مهاب بغيظ مكتوم:
ـ لا واضح يا حبيبي... ده واضح إنها خرسا! كان نفسنا نسمع صوتها!
كانت غادة تكافح كي لا تنفجر ضاحكة، بينما كان فارس يشعر بشيء من الشماتة اللطيفة في حبيبة.
في تلك اللحظة، رفع رضوان يده عن وجهه، وتطلع إلى أخته التي كانت تتمنى لو تنشق الأرض وتبتلعها، ثم قال محاولًا السيطرة على الموقف:
ـ تعالي يا دكتورة.
شعرت حبيبة كأن قدميها قد غُرستا في الأرض، وهزت رأسها بعفوية، وكأنها تقول له: لا... مش جاية!
ابتسم رضوان للضيوف بقلة حيلة، وقال:
ـ ثواني...
ثم قام متجهًا نحو أخته، ووقف أمامها مباشرة، وقال بين أسنانه بهمس حاد:
ـ إنتِ يا بت، مش قايلة إنك مناوبة ليلية النهاردة؟!
رفعت حبيبة رأسها وقالت بالذهول نفسه:
ـ هما مين الناس دي يا رضوان؟!
رفع حاجبيه باستنكار:
ـ بجد مش عارفة مين دول؟!
هزت رأسها دون أن تنبس بكلمة، ثم تابعت بالهمس المرتعد نفسه:
ـ بص... اعتبرني ماجيتش! أنا هلف بضهري دلوقتي وطيران على المستشفى... أقسم بالله ما هتشوف وشي لحد بكره؟
ازداد ضغط رضوان على أسنانه، وقال بهمس كاللهب:
ـ بعد إيه؟! بعد ما جَرستيني؟! كلمة زيادة وهناولك حتة قلم على وشك يخلي قفاكي مكانه!
ثم أردف بأمر لا يقبل النقاش:
ـ تدخلي تسلمي على الضيوف عادي خالص، وأنا بعد ما يمشوا هفهمك!
نظرت إليه بعينين تفيضان بالدموع المصطنعة:
ـ لازم؟!
رد بقسوة أخوية متسلية:
ـ بعد الفضيحة اللي عملتيها؟ مقدرش أفيدك يا فضحاني في كل حتة!
ثم تنحنح بصوت عالٍ، وكأنه يعيد رسم وقار الموقف، وقال:
ـ تعالي يا دكتورة.
تحرك رضوان ليعود إلى مقعده، بينما خطت هي خلفه بخطى ثقيلة، كأنها تُساق إلى حبل الإعدام.
وحين وقفت أمامهم، حاولت إخراج صوتها، فخرج رقيقًا ومبتورًا:
ـ مساء الخير...
ضم فارس حاجبيه، وكتمت غادة ابتسامتها، بينما نظر مهاب إليها باستغراب، وردوا جميعًا:
ـ مساء الخير.
بدأ رضوان يعرفها إليهم متداركًا التوتر:
ـ الباشمهندس مهاب وحرمه...
قالت حبيبة ببراءة ودون تفكير:
ـ أهلًا بحضرتك يا عمو...
فتحت عينا مهاب على اتساعهما، وهمس لنفسه بذهول:
ـ عمو؟!
كانت غادة على وشك الانهيار ضحكًا في مكانها، بينما أصابت فارس موجة كحة مفاجئة ليخفي بها ضحكته المكتومة على ملامح أخيه.
مال فارس على غادة وهمس:
ـ عمو مهاب طاير من الفرحة!
همست غادة بصدمة ومرح:
ـ يا نهار! لما أخوك «عمو»... أنا هكون إيه؟!
همس فارس ببرود مستفز:
ـ طنط!
نظرت إليه غادة بصدمة، فقال لها حاسمًا:
ـ اتحركي بسرعه وأنقذي حبيبة... لاتقع مننا!
حركت غادة رأسها وقامت فورًا لتكسر جمود الموقف، وقالت بابتسامة دافئة:
ـ بسم الله ما شاء الله... إنتِ حبيبة؟ بجد زي القمر!
وقبل أن تفتح حبيبة فمها، تابعت غادة بسرعة، محاولة احتواء الموقف:
ـ أنا غادة... قوليلي غادة وبس، اتفقنا؟
هزت حبيبة رأسها بخجل:
ـ احم... تمام.
أشار إليها رضوان نحو المساحة المجاورة له:
ـ تعالي اقعدي جمبي يا حبيبة.
قبل أن تتحرك، رفعت حبيبة عينيها نحو فارس، فتلاقت نظراتهما.
رأى في عينيها غيظًا مكتومًا ووعيدًا واضحًا، بينما ضيّق عينيه بدهشة، وقال في نفسه:
ـ هو أنا ليه حاسس إني خايف منها؟ البت دي مش طبيعية!
جلست حبيبة بجوار أخيها، وقلبها يخفق كالطبول؛ مزيج من مفاجأة الزيارة وحرج الموقف الذي وجدت نفسها فيه.
مالت غادة برأسها نحو مهاب وهمست:
ـ إيه يا «عمو»... مش هتقول حاجة للبنت؟
رمقها مهاب بنظرة غيظ، ثم استقام في جلسته وتطلع إلى حبيبة.
ساد صمت قصير، قبل أن يتنهد ويبتسم بوقار:
ـ تعرفي يا دكتورة حبيبة...
تطلعت إليه بتوهان وقالت بعفوية:
ـ ها؟ حضرتك بتكلمني؟
ابتسم مهاب أكثر، ثم التفت إلى رضوان:
ـ والله يا أستاذ رضوان، أنا بعد ما شفت أخت حضرتك متتصورش أنا سعيد قد إيه!
ابتسم رضوان بامتنان، وأجاب:
ـ حبيبة على طبيعتها يا جماعة، وهى معذوره، لانها ما كانتش عارفة إن حضراتكم هتشرفونا النهارده. لو كانت تعرف، كانت أكيد هتستقبلكم بشكل أحسن من كده.
رد مهاب بأريحية:
ـ لا لا بالعكس ،دي أجمل حاجة إنها تكون على طبيعتها.
وأضافت غادة بلطافة:
ـ فعلًا... حبيبة، إنتِ لذيذة أوي، والله دخلتي قلبي من أول ما شوفتك.
تطلعت حبيبة إلى رضوان وقالت بنبرة هامسة وعفوية:
ـ هو في إيه؟ هو أنا ليه حاسة إني بتشقـ...
وقبل أن تتم جملتها، سعل رضوان بقوة ليقاطعها، ثم قال مبتسمًا:
ـ حبيبة... تعرفي إنك جيتي في وقتك. قومي كده اعملي لنا دور قهوة حلو، أنا والناس الحلوة دي.
فهمت فورًا أن أخاها يصرفها بلباقة.
هزت رأسها وقامت، وقبل أن تغادر المجلس، رمقت فارس بنظرة حادة، ملتهبة بالوعيد.
كانت النظرة تقول بوضوح:
ـ حسابك معايا بعدين.
ولم يحتج فارس إلى مترجم.
اتسعت ابتسامته قليلًا، وكأنه استمتع بالتهديد أكثر مما ينبغي.
ثم اختفت نحو المطبخ.
تحدث رضوان برصانة:
ـ أنا بعتذر عن الموقف اللي حصل... لكن نتكلم بصراحة، حبيبة هي صوت البيت، هي اللي عاملة روح في المكان ومهونة عليا كتير، وأنا بتقبل منها أي حاجة.
أجابه فارس بجدية وتقدير:
ـ الدكتورة حبيبة على طبيعتها فعلًا يا رضوان، وده شيء مش سهل تلاقيه في الزمن ده. وأنا بصراحة ارتحت لطريقتها أكتر مما توقعت... وعشان كده أتمنى منك ترد عليّا في طلبي في أقرب وقت.
رد رضوان بابتسامة متزنة:
ـ أكيد يا فارس... أنا هتكلم معاها الأول وآخد رأيها، وإن شاء الله أبلغك في أقرب وقت.
كانت حبيبة تقف على مقربة من المطبخ، تسترق السمع إلى حديثهم، حتى وصل إليها طلب فارس.
اتسعت عيناها، وانقبض قلبها لحظة، قبل أن تغمرها فرحة مفاجئة لم تستطع منعها.
فارس جاء بنفسه ليطلب يدها!
لكن الفرحة لم تدم طويلًا.
تذكرت أنه لم يخبرها بشيء، وتركها تدخل عليهم بتلك الطريقة، وتقول كل ما قالته أمامه وأمام عائلته.
اشتعل الغيظ في عينيها، وعادت إلى إعداد القهوة وهي تتمتم بضيق.
وحين وصلت إلى فنجان فارس، توقفت لحظة.
نظرت إلى الفنجان، ثم إلى علبة الفلفل الأسود والقرفة.
ارتسمت على شفتيها ابتسامة صغيرة خبيثة.
ـ وحياة أمك لأربيك على عملتك السودا دي!
يتبع...

رائع جدا جدا 🎉🎉🎉🎉
ردحذف