الفصل العاشر. زاد الآسمر
الفصل العاشر. زاد الآسمر الجزء الثاني من رواية وكأن ذنبي عظيم.
تجمّد فارس للحظة، ثم أخرج هاتفه ببطء.
أضاءت الشاشة في وجهه، وما إن وقعت عيناه على الرسالة حتى تبدّل شيء غامض في ملامحه.
قرأها مرة... ثم أعاد قراءتها، وكأن الكلمات أمامه لم تكن مما توقع أن يراه.:
ـ هدية بسيطة يارب تعجبك؟
اتسعت عيناه للحظة، قبل أن يرفع رأسه ببطء عن الشاشة، وظل صامتًا، عاجزًا عن إخفاء الارتباك الذي تسلل إلى ملامحه.
التقطت الكاميرات صمته.
ثم اهتز الهاتف من جديد.
بوصول رسالة أخرى.
أغلق فارس هاتفه بهدوء، ودسه في جيب سترته، ثم رفع عينيه بثبات ونظرة ساحرة نحو الصحفيين الملتفين حوله.
تقدمت إحدى الصحفيات خطوة نحوه وقالت:
ـ لو سمحت يا دكتور فارس... ممكن توضح لنا إيه اللي بيحصل؟ إحنا عايزين نفهم سبب وجودك هنا.
ظل فارس صامتًا لثوانٍ، يتأمل الوجوه المتطلعة إليه بشغف، قبل أن ترتسم على شفتيه ابتسامة هادئة أسرت الحاضرين.، وقال مستهلًا حديثه:
ـ سألتوني ليه سبت مستشفايا الخاصة وجيت أشتغل هنا؟
سكت قليلًا لتستقر كلماته في أذهانهم، قبل أن يضيف:
ـ والحقيقة إن الموضوع أبسط بكتير مما الناس متخيّلاه... الطب بالنسبة لي عمره ما كان مجرد وظيفة، ولا مشروع بزوّد بيه اسمي أو استثماري. الطب بالنسبة لي رسالة.
صمت للحظة، ونظر إلى الصحفيين نظرة واثقة، ثم قال بنبرة متزنة:
ـ وأنا مؤمن إن قيمة الرسالة مش في المكان اللي بتتقدم فيه... قيمتها في إنك تفضل أمين عليها، مهما كان المكان.
تبادل بعض الصحفيين النظرات الفضولية، بينما تابع هو بثقة:
ـ علشان كده، بالنسبة لي مش مهم أنا بعالج فين... المهم إني بعالج صح.
خفتت نبرته قليلًا، وحملت في طياتها دفئًا إنسانيًا وهو يكمل:
ـ والمريض اللي مش قادر يدفع... مش أقل من اللي يقدر يدفع.
توقف برهة، ثم أضاف بإصرار:
ـ ده يمكن يبقى أغلى عندي كمان... لأنه جايلي وهو معاه حاجة واحدة بس يقدر يدفعها.
رفع عينيه إليهم مباشرة وقال:
ـ ثقته فيّا.
ساد صمت تام بين الحضور، وتبادل المصورون والصحفيون النظرات في دهشة، بينما رسم فارس ابتسامة خفيفة وتابَع:
ـ ودي بالنسبة لي... أغلى من أي أجر ممكن آخده، وأعلى من أي مكانة ممكن أكون فيها.
كان أثر الكلمات جليًا على ملامحهم، وكأن إجابته النبيلة جردتهم من أسئلتهم الهجومية، وحولت الأجواء بلمحة من التربص إلى احترام جارف.
ظل فارس صامتًا لثوانٍ، يتأمل انطباعاتهم، ثم رفع عينيه إليهم من جديد. ارتسمت على وجهه ابتسامة واثقة، تحمل من الغموض والشغف أكثر مما تحمل من الوضوح، وكأنه يستعد لمنحهم إجابة لم يأتوا أصلًا للبحث عنها.
ثم قال:
ـ لو فاكرين إنكم بكده عرفتوا السبب الحقيقي لوجودي هنا... فأحب أقول لكم إنكم لسه ما تعرفوش حاجة.
تبدلت ملامح الحاضرين فورًا، وارتفعت عدسات الكاميرات صوب وجهه من جديد. انتظر الجميع كلمته التالية بترقّب شديد؛ فما الذي يمكن أن يكون أهم من رسالة الطب والإنسانية؟
تعمد ترك السؤال معلقًا في الهواء لبرهة، ثم ابتسم فارس ابتسامة هادئة، وقال بثبات:
ـ علشان حبي.
رفع يده قليلًا أمام عدسات الكاميرات، فظهرت الدبلة في إصبعه، وارتسمت على شفتيه ابتسامة تحمل فرحًا وثقة، قبل أن يقول:
ـ ووصلت.
وفي اللحظة نفسها، انعكس ضوء الفلاشات المتلاحقة على الدبلة، فخطف بريقها الأبصار، بينما سرت همهمة من الدهشة بين الصحفيين، وتبادلت الوجوه النظرات في صمتٍ قصير، قبل أن تتلاحق الكاميرات من جديد لتوثّق تلك اللحظة.
أنزل فارس يده بهدوء وأضاف موضحًا:
ـ أما أي تكهنات عن وجود خلاف بيني وبين أخويا مهاب، أو إن خروجي من المستشفى الخاصة له علاقة بخلاف بيني وبينه، فده مستحيل وبعيد عن الحقيقة.
تغيرت نبرته، وظهرت في عينيه حماية واضحة وهو يختتم هذه الجزئية:
ـ مهاب وفارس الحسيني... روحين في جسد واحد. وعمر ما يكون بينا خلاف يخلي واحد فينا يبعد عن التاني.
انطلقت الأسئلة كالعاصفة، وسأله أحد الصحفيين:
ـ هل نفهم من كلام حضرتك أن وجودك هنا لم يكن بدافع إنساني فقط، بل كان وراءه أيضًا دافع شخصي ورئيسي يتعلق بقصة حب؟ وهل تحوّل هذا الحب بالفعل إلى ارتباط رسمي؟
وتوالت الأسئلة المتداخلة من كل اتجاه، وقد ازداد فضولهم لمعرفة هوية تلك المرأة؛ هل هي قصة حب؟ وما اسمها؟ وهل تنتمي إلى الوسط الطبي أم إلى إحدى العائلات المعروفة؟
وامتدت تساؤلاتهم إلى موعد إعلان الخطوبة، وما إذا كان قد حُدد موعد للزفاف.
لم يبدُ فارس منزعجًا من هذا السيل من الفضول، بل ظل واقفًا بهدوئه المعهود، يستمع إليهم بابتسامة واثقة، قبل أن يقول:
ـ اللي أقدر أقوله إني سعيد جدًا باختياري ليها..
ثم أردف بابتسامة واسعة أذابت الحاضرين:
ـ وسعيد أكتر بوجودها جنبي.
استغلت إحدى الصحفيات الفرصة وسألته سريعًا:
ـ يعني نقدر نفهم إنها قصة حب؟
ابتسم نظرة مليئة بالحُب دون أن يجيب، فتصاعدت فضول الأسئلة:
ـ طب اسمها إيه؟
ـ مين عيلتها؟
ـ الناس من حقها تعرف!
هز فارس رأسه بهدوء ورزانة وقال:
ـ لا... الناس من حقها تعرف أخباري المهنية. أما حياتي الخاصة فدي من حقي أنا.
ثم رسم ابتسامة هادئة، وكأنه وضع حدًا للحديث:
ـ أعتقد كده إني وضحت كل حاجة.
ألقى عليهم تحية مقتضبة برأسه، ثم استدار متجهًا نحو المدخل بوقار وثقة، غير عابئ بالصيحات والأسئلة التي تعالت خلفه.
واصل طريقه بخطوات ثابتة، بينما ظلت عدسات الكاميرات تلاحقه حتى غاب عن أنظارهم.
وما إن انتهت المقابلة، حتى بدأت مقاطع حديثه تنتشر عبر منصات التواصل الاجتماعي بسرعة مذهلة، لتتحول خلال دقائق إلى حديث الناس.
المقابلة التي دخلها الصحفيون بحثًا عن خلاف أو فضيحة، خرجت منها حكاية أخرى تمامًا؛ حكاية رجل لم يكتفِ بأن يتحدث عن مهنته ومبادئه، بل أدهش الجميع حين كشف، دون أن يكشف شيئًا، عن حبٍ اختار أن يقاتل من أجله.
انهالت التعليقات، وتناقلت الفتيات كلماته بإعجاب، بينما وجد كثيرون في موقفه صورة لرجل لم يخجل من الاعتراف بأن قلبه كان سببًا في إحدى أهم خطوات حياته.
لم يعرف أحد اسم المرأة، ولا عائلتها، ولا تفاصيل الحكاية التي جمعته بها، لكن الغموض لم يقلل من سحرها... بل جعله أكبر.
وفي ساعات قليلة، لم تعد الأسئلة تدور حول سبب تركه مستشفاه الخاصة، ولا حول علاقته بشقيقه.
صار السؤال الوحيد الذي يشغل الجميع:
من هي المرأة التي جعلت فارس الحسيني يخوض طريقًا كاملًا ليصل إليها؟
أما هو، فكان قد وصل بالفعل.
فبعض الحروب لا تُخاض من أجل الانتصار...
بل من أجل أن تصل، بعد كل ما قطعت من مسافات، إلى السلام الذي كنت تحارب لأجله.
دخل فارس مكتبه، وجلس إلى مقعده بثبات، ثم أخرج هاتفه وفتح رسالتها. قرأها مرة أخرى، وظهرت على وجهه ابتسامة هادئة تحمل ثقة من يعرف جيدًا تأثيره، قبل أن يكتب:
ـ عجبتني هديتك يا تيماء... بس الأجمل إني قدرت أخلي هديتك تخدمني بالشكل اللي أنا عايزه. أتمنى بقى هديتي أنا تكون عجبتك.
استيقظت حبيبة في الصباح، فوجدت رضوان لا يزال غارقًا في النوم. اقتربت منه وأيقظته، ثم اتجهت إلى المطبخ لتُحضّر له الإفطار.
وبعد أن أدى رضوان صلاته، ارتدت حبيبة ملابسها، وجلسا معًا إلى المائدة. بدأت تحتسي كوب النسكافيه الخاص بها، بينما تناول رضوان إفطاره، قبل أن ينظر إليها قائلًا:
ـ مابتفطريش ليه؟
ـ هفطر في المستشفى؟
ـ طب كُلي أي حاجة عشان النسكافيه اللي بتشربيه على الريق ده.
هزت رأسها وهي تواصل احتساء النسكافيه:
ـ لأ، أنا مش جعانة.
نظر إليها رضوان بضيق، ثم دفع نحوها شيئًا من الطعام.
ـ حتى لو مش جعانة، كلي ساندوتش صغير. معدتك مش ناقصة.
تنهدت حبيبة، وأخذت لقيمات قليلة على مضض، ثم تذكرت شيئًا فسألته:
بقولك يا رضوان... أنا محتارة أروح النهارده الشغل بالآيفون؟ ولا بتليفوني؟
رفع رضوان عينيه إليها وقال ببساطة:
ـ بتليفونك.
قطبت حاجبيها:
ـ ليه بقى؟
ـ بلاش أي حاجة فارس يجيبهالك في فترة الخطوبة تستخدميها على طول.
نظرت إليه باستغراب:
ـ مش فاهمه وجهة نظرك؟
ابتسم رضوان ابتسامة خفيفة، وقال:
ـ علشان إنتِ مش محتاجة كل ما فارس يجيبلك حاجة غالية تستخدميها فورًا، فيبان إنك ما صدقتي لقيتي حد يجيبلك الحاجات دي.
ووجهة نظري إن الغِنى مش في الآيفون يا حبيبة، ولا السعادة في هدية غالية. متخليش الحاجات اللي فارس يقدر يجيبها بسهولة هي اللي تبهرك، وإلا مع الوقت هتبقي بتفرحي بالسعر أكتر من الهدية نفسها.
سكت لحظة، ثم تابع بنبرة أهدأ وأثقل:
ـ الهدية قيمتها مش بسعرها... قيمتها في الشخص اللي اختارها ليكي، وفي المعنى اللي حطه فيها. ولو كل حاجة غالية يجيبها لك استخدمتيها على طول، ممكن من غير ما تاخدي بالك تحسسيه إنك مبهورة بحياته أكتر منه هو.
نظرت إليه حبيبة باهتمام، فابتسم وقال:
ـ خليكي دايمًا عارفة إنك مش أقل من فارس علشان هو معاه أكتر، ومش محتاجة تثبتيله إنك تقدري تعيشي نفس مستواه. بالعكس... خليه هو كل يوم يحس إن أحسن قرار أخده في حياته إنه اختارك إنتِ.
ثم مال قليلًا نحوها وقال بحنان:
ـ خليه يحس إنك مكسب كبير في حياته، مش إنك كنتِ مستنية حد يفتحلك باب حياة مريحة. فاهماني يا حبيبتي؟
ضحكت حبيبة وهي تهز رأسها:
ـ حاضر يا سيدي... وصلت الرسالة. يعني أروح بتليفوني، وأخلي الآيفون يبات في الدرج لحد ما يخلل.
نظر إليها رضوان وضحك:
ـ أهو كده فهمتي.
رفعت حاجبها وقالت بمكر:
ـ بس على فكرة... أنا أصلًا مش مبهورة بالآيفون.
ضحك رضوان:
ـ عارف. طول عمرك قنوعة.
هزت حبيبة كتفيها بابتسامة جانبية، وقالت:
ـ مبحبش أتكلم عن نفسي. وبعدين عادي يعني، نركنه دلوقتي، يمكن ييجيله بيعة ولا حاجة.
ضحك رضوان وهو يلوك الطعام، وأشار لها بيده أن تواصل إفطارها.
وما إن وضعت الطعام في فمها حتى رفعت عينيها إليه فجأة:
ـ صح، نسيت أسألك... مين اللي دخل الهدية أوضتي؟ أنا لقيتها تحت المكتب.
فكر رضوان لحظة، ثم أجاب:
ـ بنت مهاب... اسمها إيه؟ أسيل... ولا إيسل؟
صححت له حبيبة فورًا:
ـ أسيل.
ـ أيوه، هي دي.
ابتسمت حبيبة بصمت، ثم سألته:
ـ هتروح المصنع ولا إجازة؟
تردد رضوان للحظة، وكأنه غيّر قراره في اللحظة الأخيرة، ثم قال:
ـ لأ... هروح الشركة.
رفعت حبيبة عينيها إليه باهتمام:
ـ شركة؟ شركة إيه؟ بتاعة صاحب المصنع؟
حرّك رضوان رأسه نافيًا:
ـ بصي يا حبيبة، هروح شركة مهاب أظبط له حاجة كده، وبعدها هرجع المصنع.
ضيقت عينيها وهي تنظر إليه بشك:
ـ شركة مهاب؟ إشمعنى يعني؟
ابتسم رضوان، وكأنه توقع سؤالها:
ـ عادي. في حسبة صغيرة كده في الشركة، والراجل قصدني فيها. بس أهم حاجة الموضوع ده يفضل بيني وبينك. أنا بعرّفك بس علشان تبقي عارفة خط سيري، عشان لو احتجتيني في أي وقت تكوني عارفة أنا فين.
ابتسمت حبيبة بعفوية:
ـ يا سلام! لو تتوظف هناك بجد.
هز رضوان رأسه ساخرًا:
ـ وظيفة إيه يا مجنونة إنتِ؟ أنا الحمد لله شغال وعندي مكتبتي وزي الفل. أنا بروح علشان خاطرك وخاطر فارس.
أنهى إفطاره، ثم نهض عن مقعده وأشار إليها:
ـ يلا، علشان أوصلك معايا في الطريق.
نهضت حبيبة خلفه، وبعد دقائق غادرا المنزل.
أوصلها رضوان إلى المستشفى، ثم انطلق في طريقه، بينما اتجهت هي إلى الداخل دون أن يخطر ببالها أن شيئًا قد تغير منذ الأمس.
لكن ما إن دخلت إلى المستشفى حتى شعرت بشيء غريب.
تباطأت خطواتها قليلًا، وهي تلاحظ بعض العيون التي اتجهت إليها، وأخرى تابعتها خلسة قبل أن تنصرف سريعًا. كانت هناك همسات متقطعة تدور في المكان، ونظرات تحمل فضولًا واضحًا، وكأن وجودها أصبح فجأة موضع اهتمام الجميع.
نظرت حبيبة حولها باستغراب، ثم عقدت حاجبيها وهي تتابع الوجوه من حولها.
لم تفهم شيئًا.
تابعت طريقها حتى وصلت إلى القسم، وما إن دفعت باب المكتب حتى فوجئت بمجموعة من الطبيبات جالسات معًا، متحلّقات حول الهواتف، يتابعن شيئًا باهتمام شديد. كانت بعضهن تتصفح منشورات على مواقع التواصل الاجتماعي، وأخريات يتابعن مقاطع من المقابلة التي انتشرت خلال ساعات قليلة كالنار في الهشيم.
وكان اسم فارس الحسيني يتصدر كل شيء.
منشورات تصفه ببطل العام، وأخرى تطلق عليه لقب بطل الموسم، وتعليقات من فتيات يتمنين رجلًا يحارب من أجل حبهن كما فعل هو.
دخلت حبيبة وهي لا تزال عاجزة عن فهم سبب تلك اللمة، وقالت بعفوية:
ـ صباح الخير.
وما إن وصل صوتها إلى مسامعهن حتى التفتت الرؤوس جميعًا إليها في اللحظة نفسها.
شهقت أكثر من واحدة، وساد صمت قصير، قبل أن تنهض لبنى مسرعة نحوها، وتقول بارتباك:
ـ إزيك يا عروستنا؟ حمد لله على السلامة!
نظرت إليها حبيبة باستغراب، ثم ابتسمت:
ـ الله يسلمك يا لبنى. إيه يا بنتي اللمة دي؟ في إيه على الصبح؟
اتسعت عينا لبنى، وقالت بدهشة:
ـ إيه ده؟! إنتِ ما تعرفيش اللي حصل؟
هزت حبيبة رأسها:
ـ لأ... حصل إيه؟ نوفل مات؟
انفجرت لبنى بالضحك:
ـ نوفل مين يا بنتي؟! أنا بتكلم عن اللي حصل النهارده الصبح!
توقفت حبيبة عن الابتسام، ونظرت إليها بحيرة:
ـ حصل إيه؟
تبادلت الطبيبات النظرات، قبل أن ترفع إحداهن هاتفها نحوها.
ـ لأ إحنا منقولش، إنتِ تشوفي بنفسك.
اقتربت حبيبة، وعيناها معلقتان بالشاشة، وما إن ظهر أمامها مقطع فارس وهو يقف أمام الصحفيين حتى تجمدت ملامحها.
سمعته يتحدث عن سبب وجوده في المستشفى، وعن الطب، وعن رسالته، وعن المريض الذي لا يستطيع الدفع...
ثم جاء السؤال الذي جعل قلبها يتوقف للحظة.
ومن بين الضجيج، وصلها صوته واضحًا:
ـ علشان حبي.
اتسعت عيناها، وكأنها لم تستوعب الكلمات.
ثم ظهر فارس أمامها على الشاشة، يرفع يده فتلمع الدبلة في إصبعه، قبل أن يقول بثبات:
ـ ووصلت.
شهقت حبيبة دون أن تشعر، ووضعت يدها على فمها.
لم تكن تتخيل أن يفعلها.
لم تتخيل أن يقف فارس أمام الصحافة كلها، ويعلن بهذه الثقة أن وراء وجوده هنا امرأة أحبها، وأنه لم يخجل من الاعتراف بحبه لها أمام الجميع.
كان قلبها يخفق بعنف، وشيء دافئ أخذ يتسلل إلى صدرها رغم محاولتها إخفاء ابتسامتها.
رفعت عينيها عن الهاتف، فوجدت الطبيبات كلهن ينظرن إليها.
ابتسمت لبنى بخبث:
ـ ودلوقتي عرفنا سبب وجود الدكتور هنا يابيبو؟
ازدادت حمرة وجه حبيبة،.
ولأول مرة، شعرت أن حب فارس لها لم يعد مجرد شيء يقوله لها في لحظاتهما الخاصة... بل أصبح شيئًا يعلنه أمام العالم كله، دون خوف أو تردد.
كانت فخورة به.
وفخورة أكثر بأنها المرأة التي اختار فارس أن يقف أمام الجميع ليقول عنها، بكل ثقة:
إنه وصل إليها.
داخل مكتبه، ساد الهدوء بعد صخب الإعلام الذي ملأ المكان في الخارج. وقف فارس أمام مرآة صغيرة بجوار رف الأدوات الطبية، يرتدي معطفه الأبيض بتمهل ورزانة، بينما كان يضبط سماعة البلوتوث البيضاء في أذنه.
كانت نبرته هادئة ومتزنة، تغلفها تلك الابتسامة الباردة المستفزة، وهو يستمع إلى الطرف الآخر من المكالمة.
ـ يعني ما ينفعش أوقعك؟
ابتسم فارس ابتسامة خفيفة لم تتجاوز طرف شفتيه، وهو يرتب ياقة معطفه الأبيض ببرود.
ـ لسه بدري عليكِ يا تيماء علشان تفكري بتكنيك رجال الأعمال.
جاءه صوت تيماء من الجهة الأخرى بنبرة حاولت أن تخفي بها حرجها:
ـ فعلاً لسه شوية عليا، بس أهو بتعلم منك.
نقل فارس عينيه إلى المنظار الطبي الموضوع على مكتبه، وقال بنبرة هادئة تحمل تهكمًا ذكيًا:
ـ أشك... بس تعرفي، غباءك بيرفعني لفوق.
ارتفع صوتها بغيظ:
ـ بقى كده يا فارس؟
لم يتغير شيء في ملامحه، ورد بهدوء مستفز:
ـ هعملك إيه! في واحدة تعمل عاملة مهببة زي دي في اللي ساعدها؟ حركة مش حلوة على فكرة.
أجابته بمكابرة:
ـ على فكرة بقى أنا كنت مجهّزة لكل حاجة، واقفة بعربيتي بره المستشفى، وكنت هتدخل في آخر لحظة، بس حضرتك طلعت دنجوان كبير وطلعت منها.
اعتدل فارس في وقفته، وارتسمت على وجهه ابتسامة ماكرة:
ـ أحمدي ربك، كان ممكن أدخل أبوكي في الموضوع وأقولهم الشاذلي بينتقم مني علشان رفضت بنته.
شهقت تيماء بانفعال:
ـ إيه؟! كنت أعملها كده! ده أنا كنت قتلتك!
ضحك فارس في صمت، ثم قال بثقة:
ـ كان غيرك أشطر يا حلوة. ومكنش في حاجة تمنعني من إني أقول كده.
تساءلت بسرعة:
ـ إزاي؟
أجابها بمنتهى الثقة:
ـ رسايلك موجودة على التليفون عندي، وده أكبر دليل.
شهقت من جديد، ثم قالت بدهشة ممزوجة بالغيظ:
ـ يخربيت دماغك! مجتش على بالي خالص. إنت مش سهل يا ابن الحسيني.
ساد بينهما صمت قصير، قبل أن تستأنف تيماء حديثها بنبرة أكثر جدية:
ـ المهم إنك عديت منها. وطلعت على قفايا فعلًا إنت بقيت Viral أوي، وطالعلي في كل الـTimeline!
واتشهرت وبقيت فتى أحلام بنات كتير، مش ناوي تساعدني بقى؟
وضع فارس يده في جيب معطفه الأبيض، وقال بلا مبالاة:
ـ بصرف النظر عن موقفك ده، وإنه موقف مش ظريف خالص، بس أنا هعديهالك وهكلمه.
تنفست تيماء براحة واضحة:
ـ ميرسي بجد يا فارس.
ثم صمتت قليلًا، قبل أن تسأله بفضول لم تستطع إخفاءه:
ـ إنت بجد رحت المستشفى علشان حبيبة؟
ارتسمت على وجهه ابتسامة ماكرة، وأجابها ببساطة:
ـ هو في سبب غير ده وأنا معرفش!
ضحكت تيماء وقالت:
ـ سو كيوت يا فارس بجد.
في تلك اللحظة، جاءت طرقات خفيفة على الباب.
التفت فارس نحوه، وقال بصوت هادئ:
ـ ادخل.
انفتح الباب ببطء، وتقدمت حبيبة خطوة إلى الداخل. كان التوتر جليًا على وجهها، وملامحها تنطق بمزيج من السعادة المكتومة والخجل الشديد.
ما إن وقعت عيناه عليها حتى تبدلت ملامحه دون أن يفقد هدوءه؛ لمعت عيناه بنظرة دافئة، وارتسمت على شفتيه ابتسامة أكثر صدقًا.
ـ حبيبة... تعالي ادخلي.
ثم عاد إلى مكالمته، وقال للطرف الآخر:
ـ تمام... هقفل دلوقتي، عندي شغل مهم.
ضحكت تيماء من الجهة الأخرى:
ـ ماشي يا سيدي... روح للمهم يلا، باي.
لمس فارس سماعة البلوتوث بأطراف أصابعه، وأنهى المكالمة، ثم أخرجها من أذنه ووضعها جانبًا.
في تلك الأثناء، خطت حبيبة خطوات مترددة نحو منتصف المكتب، وكأنها لا تعرف كيف تبدأ حديثها. وقفت أمامه، ثم قالت بصوت خافت:
ـ صباح الخير.
جاءها صوته دافئًا هادئًا، ونظراته ثابتة عليها:
ـ صباح النور.
ظلت واقفة أمامه، تفرك أناملها بتوتر، بينما راحت عيناه تراقبان ارتباكها في صمت. كان يعرف أنها جاءت وفي داخلها الكثير، وأن الخجل وحده يمنع الكلمات من الخروج بسهولة.
اقترب منها خطوتين بثبات ورزانة، فقلّت المسافة بينهما، ثم سألها بنبرة مطمئنة:
ـ عاملة إيه النهاردة؟
حركت رأسها بهدوء:
ـ كويسة. وإنت؟
ابتسم ابتسامة صغيرة:
ـ أنا تمام وزي الفل.
صمتت لحظة، وبقيت عيناها تهربان من عينيه، فمال برأسه قليلًا وسألها:
ـ مالك؟ عايزة تقولي حاجة؟
رفعت عينيها إليه أخيرًا، وحاولت أن تستجمع هدوءها، ثم أفصحت عما ظل يلح عليها منذ أن شاهدت المقابلة:
ـ عايزة أقول إنك فاجئتني... وكل يوم بتفاجئني، وكل مرة بكتشف فيك حاجة جديدة.
انعقد حاجباه بدهشة هادئة:
ـ أنا؟! ليه كل ده؟
أخذت نفسًا عميقًا، وكأنها تبحث عن الكلمات التي تليق بما تشعر به:
ـ أنا شفت الفيديو وسمعت كل كلامك... وإني حلمك وحبك ووصلت ليه. بجد يا فارس، مش عارفة أوصف لك إحساسي.
ابتسم فارس بهدوء، ونظر إليها بصدق وعمق، دون أن تفارقه هيبته:
ـ أنا ما كذبتش يا حبيبة في أي كلمة قلتها... أنا لما جيت هنا فعلًا كنت جاي في تأدية شغل وهمشي، لكن وقفت في نص الطريق لما شفتك، وقلت لازم أكمل... ووصلتلك.
احمرت وجنتاها فورًا، وأطرقت برأسها نحو الأرض للهروب من حدة نظراته الصادقة، فسارعت إلى الهروب من وقع كلماتها المكشوفة:
ـ ده إنت بقيت ترند السوشيال!
ابتسم بثبات، وهز رأسه نافيًا:
ـ كل ده شغل شو ولا يفرق معايا، اللي يفرق معايا هو إنتِ وبس.
ازداد خجلها رقة وجمالاً، وقالت بصوت خفيض محاولة التخفيف من حرجها:
ـ إزاي بقى! ده الناس هنا بتشاور عليا دلوقتي وتقولي: دي خطيبة روميو... بقيت روميو يا دكتور فارس!
ضحكت بخفوت، فضحك هو الآخر، ثم اقترب منها خطوة متزنة وقال بنبرة واثقة ودافئة:
ـ لا... أنا فارس، وإنتِ حبيبة، وإحنا قصتنا أقوى من أي حد. خليكِ دايمًا مقتنعة بده.
شعرت أن ارتباكها يزداد، فبحثت سريعًا عن موضوع آخر يخرجها من تلك المساحة التي أربكتها كلماته فيها، لكنها في الوقت نفسه كانت تريد الاطمئنان عليه:
ـ هو إيه اللي عرف الصحافة إنك موجود هنا؟! مين ابن البوبي اللي عايز يأذيك ده؟
تأملها فارس لثوانٍ، ثم انفلتت منه ضحكة قصيرة:
ـ ابن البوبي.
اشتعلت ملامحها بالغيظ، وأكملت:
ـ آه طبعًا! ابن بوبي يحمد ربنا إني قلت عليه كده بس. وبعدين ده واحد شكله منفسن منك.
ابتسم فارس، ثم سألها فجأة:
ـ خايفة عليا؟
توقفت للحظة، وكأن السؤال باغتها، ثم ابتلعت ريقها وقالت بتوتر حاولت إخفاءه:
ـ أيوه طبعًا... ما أخافش عليك ليه يعني؟
ثم نظرت إليه بضيق مصطنع، وكأنها أدركت أنه يحاول الهروب من السؤال الحقيقي:
ـ وبعدين هو إنت في إيه ولا إيه؟ لازم تطلعني من الموضوع على طول؟ أنا بسألك مين ابن البوبي ده؟
تنهد فارس، ثم أجابها بنبرة مطمئنة:
ـ ما فيش حاجة يا ستي، ده هزار تقيل من حد كده، بس أنا كلمته وعرفته حدوده كويس.
ضيقت عينيها قليلًا:
ـ يعني حد عمل فيك المقلب ده؟
أومأ برأسه:
ـ أيوه، بالضبط. مقلب بس اتقلب على دماغه.
هزت رأسها باستنكار:
ـ هو في حد يهزر هزار البوابين ده؟
ثم هدأت ملامحها، وقالت:
ـ يلا على العموم، تلاقيه ابن حلال ويستاهل. المهم إنك طلعت منها على خير.
حرك فارس رأسه موافقًا:
ـ فعلًا، الحمد لله.
شعرت حبيبة أن الحديث انتهى، ولم تجد سببًا منطقيًا يجعلها تستمر في الوقوف أمامه، فتنفست بهدوء وقالت:
ـ طيب... أنا لازم أمشي دلوقتي، أروح أكمل شغلي. وأكيد عندك شغل، مش عايزة أعطلك.
أومأ لها بتفهم ورزانة:
ـ فعلًا عندي شغل. أخلص ونتقابل في الكافتيريا.
استدارت حبيبة، وخطت خطوتين نحو الباب، لكنها توقفت قبل أن تلمس المقبض. بقيت للحظة مترددة، ثم التفتت إليه وعيناها تلمعان ببريق رقيق، وقالت:
ـ على فكرة... أخويا رضوان عرف باللي حصل وفرح إنك ما وقعتش في فخ الصحافة. وكمان استأذنت منه، وممكن نخرج مع بعض أنا وإنت نشرب قهوة في أي مكان مفتوح!
استقرت كلماتها في قلبه قبل أن تمس أذنيه.
استقرت يده فوق موضعه الهادئ على صدره، وانعكست على وجهه إشراقة فرحة حقيقية لم يحاول حجبها، بينما اتسعت ابتسامته الدافئة:
ـ وأخيرًا! يا ريت الصحافة جت من زمان!
ابتسمت حبيبة بخجل، ثم سارعت بالخروج لترمم ما تبقى من ثباتها.
ظل فارس واقفًا مكانه، يتابع موضع خطواتها عند الباب المغلق، بابتسامة متزنة وممتلئة بالرضا... ابتسامة رجل أدرك أن كل العواصف التي خاضها بالخارج لم تذهب سدى، ما دامت قد أثمرت أخيرًا خطوة واحدة صادقة منها نحو عالمه.
في فيلا فريد، كانت الأغصان تتمايل في تناغمٍ هادئ، والنسيم يعبث بأوراق الشجر كأنه يهمس لها.
وتحت ظل الأشجار الكثيف، كانت "زاد" تخطو ببطء، خطوات مترددة، متأملة. عيناها تتنقل بين ألوان الطبيعة، لكن يدها كانت تقبض على شيء واحد فقط.. كُتيّب صغير، أطرافه دافئة من حرارة كفها.
توقفت عند شجرةٍ عتيقة، شجرةٍ وارفة الظلال، وجلست تحتها. أسندت ظهرها إلى جذعها، ورفعت الكتيب أمام عينيها.
كان العنوان وحده كافياً ليثير فضولها منذ مدة، فضولاً كانت تقاومه، لكن الاشتياق كان أقوى منها.
تنفست بعمق، وعادت تتطلع إليه مرة أخرى، كأنها تريد أن تتأكد أن ما تقرأه حقيقي:
"عندما تبتسم النجوم"
أخذت نفساً عميقاً، مرتجفاً، وفتحت الصفحة الأولى.
هناك.. وقعت عيناها على المقدمة.
قرأتها برويّة.. ببطءٍ شديد.. حرفاً حرفاً، كأنها لا تقرأ كلماتٍ مطبوعة، بل تسمع صوته هو. كان حضوره المهيب يحيط بها، تشعر بأنفاسه قريبة، بنظراته الثقيلة فوق كلماته، وكأنه يجلس أمامها تماماً.
وهمست، بصوتٍ بالكاد خرج:
لم أكتب لأنني أردت أن أكتب، كتبت لأن الصمت أصبح أثقل من الحديد الذي كنت أطرقه.
كنت أظن أن الحياة تُقاس بما نملكه، ثم اكتشفت أنها تُقاس بما نتحمله ونحن صامتين.
تعلمت مبكراً أن الفقد لا يطرق الباب، يدخل ويجلس، يأخذ أغلى ما عندك ويمضي، وأنت مطالب أن تكمل يومك كأن شيئاً لم يكن.
أمي علمتني كيف أقف، ولم تعلمني كيف أقف بعدها.
في تلك الورشة، كانت النار تعلمني أن كل شيء قاسٍ يمكن أن يلين إذا احترق بما فيه الكفاية، إلا كرامة الرجل، إن لانت انكسرت.
لم أكن أكره الظلام، الظلام كان صادقاً معي، لا يدّعي أنه نور. كنت أكره النجوم التي تبتسم وهي بعيدة، ترى كل شيء ولا تفعل شيئاً.
هذا الكتاب ليس عن الحب، الحب كلمة أصغر من أن تصف ما يبقى في القلب بعد أن يذهب كل شيء.
هذا الكتاب عن الليالي التي تظن فيها أنك انتهيت، ثم تكتشف أنك فقط بدأت من جديد، وحدك، بيدين خشنتين وقلب حاولت كثيراً أن تجعله خشناً مثلهما وفشلت.
لا أبحث عن شفقة، ولا عن اعتذار، ولا عن عودة.
أنا فقط تركت الباب موارباً بيني وبين نفسي، وكتبت ما وجدته هناك.
توقفت.
لم تكمل قراءة السطر الأخير، كأن الحروف فجأةً أصبحت أثقل من أن تحملها عيناها.
أخفضت الكتيب ببطء.. ببطء شديد، حتى استقر على حجرها، ويدها ترتجف فوق الغلاف.
"أمي علمتني كيف أقف، ولم تعلمني كيف أقف بعدها."
همست الجملة بصوتٍ لم تسمعه هي نفسها، لكن قلبها سمعه.
عرفت.
لم يكن يتحدث عن أمه.
كان يتحدث عنها هي.
في تلك اللحظة فقط، فهمت أن تلك المقدمة التي كانت تظنها خواطر رجلٍ أرهقته الحياة، وأثقلته بما يكفي ليكتب كل هذا الوجع... لم تكن مجرد كلمات، بل كانت رسالةً موجهةً إليها وحدها، من السطر الأول إلى الأخير.
الصمت الذي أثقل من الحديد.. هو صمته بعد ما تركته.
الحياة التي تُقاس بما نتحمله صامتين.. هي السنوات العشر التي عاشها بعيداً عنها.
وكرامة الرجل التي إن لانت انكسرت... هي اللحظة التي وقف فيها أمامها، وهو يطلقها، ولم ينحنِ.
والنجوم التي تبتسم وهي بعيدة، ترى كل شيء ولا تفعل شيئًا... هي هي... زاد.
كانت تظن نفسها نجمةً في سمائه، حتى اكتشفت أنها كانت بعيدة عنه، ترى وجعه ولا تفعل شيئًا.
نزلت رأسها.
لم تبكِ مرة واحدة، بل على دفعتين.
في الأولى، سالت دمعة حارة صامتة على خدها، وسقطت فوق الصفحة، فوق كلمة «وفشلت». مسحتها بسرعة بذعر، كأنها تخاف أن تمحوه.
وفي الثانية، انهار كل شيء.
شهقت شهقة مكتومة، وضمت الكتيب إلى صدرها بقوة، كأنها تضمه هو، وكأنها تحاول أن تدخل كلماته إلى قلبها لتعتذر نيابةً عن كل السنوات.
ارتجف كتفاها، وظلت تبكي بلا صوت، بينما ظلت الأغصان فوقها تتمايل في هدوء، والشمس تتسلل من بينها لتستقر على غلاف الكتاب.
ـ كنت فاكرة إنك عشت بعدي... طلعت أنا اللي كنت عايشة بعيد عن وجعك.
رفعت وجهها أخيرًا؛ عيناها حمراوان، لكن نظرتها لم تعد فضولًا، بل يقينًا موجعًا.
ولأول مرة منذ عشر سنوات، لم تبتسم النجوم... بل بكت معها.
كانت شركة فريد الشامي تعج بحركة العمل المعتادة، إلا أن مكتبه في ذلك الوقت كان أكثر هدوءًا.
جلس فريد خلف مكتبه، بينما جلس ثلاثة من موظفيه أمامه حول الطاولة الصغيرة الملاصقة للمكتب، يتابعون معه بعض تفاصيل العمل. كان يتحدث بهدوء وتركيز، يقلب بعض الأوراق أمامه، ثم يرفع عينيه إليهم بين الحين والآخر.
وفجأة، فُتح باب المكتب بعنف، ودخلت سما بخطوات سريعة، وكأنها لم تحتمل الانتظار لحظة أخرى.
رفع فريد عينيه إليها، ولم تتغير ملامحه كثيرًا.
توقفت أمامه للحظة، تنتظر منه كلمة، بينما نظر هو إلى الموظفين الثلاثة، ثم ابتسم ابتسامة هادئة وقال:
ـ طيب اتفضلوا إنتوا، نكمل شغلنا بعدين.
نهض الموظفون على الفور، وأخذ كل واحد منهم أوراقه، ثم خرجوا من المكتب وأغلقوا الباب خلفهم.
انتظر فريد حتى ابتعدت خطواتهم، ثم نهض من مكانه واتجه إلى مكتبه، وجلس خلفه بمنتهى الهدوء، كأن دخول سما المفاجئ لم يكن يعني له شيئًا.
رفع عينيه إليها وقال ببرود:
ـ إزيك يا سما؟
اشتعلت ملامحها غيظًا.
ـ والله يا فريد... إزيك يا سما؟ هو ده اللي ربنا أقدرك عليه؟
رفع حاجبه قليلًا، وقال بهدوء مستفز:
ـ أقولك إيه؟ عايزاني آخدك بالحضن وأشيلك ونروح على بيتنا؟ هنا مكان شغلي يا مدام.
ـ لأ، أنا مش عايزاك تشيلني ولا تودينا على بيتنا. أنا عايزة أفهم وضعي إيه بالظبط.
نظر إليها باستغراب مصطنع.
ـ وضعك إيه؟ مش فاهم.
اقتربت منه خطوة، وقد بدأ غضبها يخرج دفعة واحدة:
ـ الوضع اللي إحنا فيه! حضرتك من يوم ما اتضرب عليك نار وإنت قاعد عند المدام اللي إنت ضربتني بالقلم علشان ما أجيبش سيرتها، واتصل بيك طول الأسبوعين دول وإنت مش معبرني! تبعتلي بس رسايل... روحي مشوار الفلاني، روحي ودي ده، روحي اعملي ده! السكرتيرة بتاعت حضرتك! ولا كأني مراتك، ولا كأن ليا حقوق عليك!
هبطت يد فريد فجأة على سطح المكتب بقوة، فانتفضت سما في مكانها.
ساد الصمت.
أغمض فريد عينيه للحظات، وأخذ نفسًا عميقًا، ثم أخرجه ببطء، قبل أن يرفع عينيه إليها من جديد.
ـ بصي يا سما... إنتِ لو قلتي كلامك ده في بيتنا، كنتِ ومتأكدة عارفة إيه اللي هيجرالك.
ابتلعت ريقها، وظلت تنظر إليه في صمت.
تابع بنبرة هادئة، لكنها تحمل تحذيرًا واضحًا:
ـ مشكلتك إنك جايالي الشركة. الشركة اللي ممنوع حد يغلط فيها غلطة واحدة، وراسم لها بروتوكول معين. هتيجي هنا تتكلمي كلام ملوش أي لازمة، هحط إيدك في إيدي، وهقولك: اتفضلي يا روحي، قدام الناس، ونخرج كأننا عرسان في شهر العسل.
مال قليلًا إلى الأمام، واستقرت عيناه عليها بثبات.
ـ وأول ما نوصل بيتنا، هخليكي تعرفي إن الله حق، وما تعرفيش تتكلمي كلمتين على بعض.
بلعت سما ريقها، وشعرت بالخوف يتسلل إليها رغم محاولتها إخفاءه.
صمتت لحظات، قبل أن تقول بصوت أخفض:
ـ هي بقت كده يافريد؟!
رفع فريد عينيه إليها.
- جايه لية؟!
اقتربت منه أكثر، وقد بدأت الدموع تتجمع في عينيها رغمًا عنها.
ـ وحشتني يا فريد... حرام يعني إني أجي وأشوفك؟ إنت ليه بتعمل معايا كده؟
ظل ينظر إليها للحظات، ثم مد يده إلى علبة سجائره، أخرج سيجارة وأشعلها بهدوء، قبل أن يقول:
ـ ارجعي على البيت يا سما.
نظرت إليه بقوة.
ـ يعني مش هتيجي تقعد معايا؟
رفع عينيه إلى ساعته، ثم قال بمنتهى البساطة:
ـ أرجعي دلوقتي، وساعة كده أكون عندك.
اتسعت عيناها.
ـ بجد! يعني ساعة وهتيجي تقعد معايا يا فريد؟
رفع عينيه إليها دون أن يجيب.
كانت نظرة واحدة كافية لتفهم أنه لن يناقشها أكثر.
تنهدت باستسلام وقالت:
ـ خلاص ماشي... هستناك.
استدارت وغادرت، لكنها لم تبتعد سوى خطوتين حتى جاء صوته خلفها:
ـ سما.
توقفت، ثم التفتت إليه.
كان ما يزال جالسًا خلف مكتبه، ينفث دخان سيجارته بهدوء.
ـ عندك مشوار بكرة اتنين الفجر.
قطبت حاجبيها بدهشة.
ـ اتنين الفجر؟ مشوار إيه ده؟
ـ فيه بوكيه ورد بتصميم جديد جه، وعايزك توديه لحد غالي عليا لحد باب بيتة.
ثبتت عيناها عليه للحظة.
كانت تعرف جيدًا أن «بوكيه الورد» في قاموس عملهم لم يكن مجرد ورد.
ـ وهودي البوكية ده لمين؟
قالها فريد بمنتهى الهدوء:
ـ عزام الديب.
انفتحت عيناها في صدمة، وتجمدت في مكانها.
ـ عزام الديب؟
حرّك فريد رأسه مؤكدًا.
اقتربت منه بخطوات سريعة، وقد تحول الذهول إلى خوف صريح:
ـ إنت عايز مراتك تروح برجلها لوكر عزام نفسه؟
رفع عينيه إليها، وكأنه لم يرَ في الأمر ما يستحق كل هذا الذعر.
ـ ده شغل.
ضحكت ضحكة قصيرة خرجت من شدة توترها.
ـ لأ، مش شغل... ده كده عملية انتحارية! إنت مش عارف إن أي خطوة قدام القصر بتاعه بس ممكن يموتوني فيها؟ ده مفيش دبانه بتعدي من هناك من رجالته. إنت مش عارف عزام الديب وخطورته؟
هزت رأسها برفض قاطع.
ـ آسفة يا فريد. شوفلك حد تاني يودي الأمانة دي.
أجابها بلا تردد:
ـ أنا مش هبعت حد ما بثقش فيه.
نظرت إليه لحظة، ثم ضحكت بسخرية.
ـ وإنت بتثق فيا؟
نفخ فريد دخان سيجارته ببطء، وقال ببرود:
ـ يعني... على حسب.
اشتعل غضبها من جديد.
ـ فريد، بطل استفزاز. اللي إنت بتطلبه مني ده مستحيل يحصل! ابعت تايسون، ابعت الجيار... أي حد غيري.
ابتسم ابتسامة خفيفة، ثم قال:
ـ حبيبتي، أنا عارف أنا بعمل إيه.
ـ هتروحي تسلمي البوكيه لإيد عزام نفسه، وأنا هكون مستنيكي في البيت.
حدقت فيه غير مصدقة.
ـ إنت بتتكلم بجد؟
نظر إليها بثبات، ثم قال:
ـ سما... ما تخافيش. أنا عامل حسابي على كل حاجة. والموضوع لحد هنا ومات.
في جراج الشركة، وقف مهاب بجوار سيارته برفقة رضوان، يتبادلان الضحكات بعد أن انتهيا من الحديث عن الأزمة التي تعرض لها فارس من الصحافة، وكادت تقلب الأمور داخل الشركة والمشفى وعائلتهم رأسًا على عقب.
قال مهاب وهو يهز رأسه:
ـ الحمد لله... أنا اتصدمت لما شفت الصحافة على النت. بجد فارس أنقذ الموقف.
ضحك رضوان وقال:
ـ فعلًا، الحمد لله إنها عدّت على خير... وأهم حاجة إنه ما وقعش في فخ الصحافة.
تنهد مهاب، ثم قال وهو يفتح باب سيارته دون أن يركب:
ـ نفسي أعرف مين ده اللي عمل الموقف السخيف ده ضدنا. دي كانت هتبقى فضيحة.
ابتسم رضوان:
ـ عدّت بفضل من ربنا، وفارس قالك كمان إن حد من صحابه كان بيهزر معاه، ورد فعله عجبني؛ لأنه اتصرف بحكمة وعقل.
ـ فعلًا قلب الدفة عليهم. وده مش جديد على فارس.
أغلق مهاب باب السيارة، ثم استدار إلى رضوان، ونظر إليه لحظات قبل أن يقول بنبرة أكثر جدية:
ـ بس بجد... بعيدًا عن موضوع الصحافة، أنا مش عارف أشكرك إزاي يا رضوان. إنت خلّفت كل توقعاتي بوقفتك معايا.
ابتسم رضوان بهدوء:
ـ أنا ما عملتش حاجة تستاهل كل الكلام ده. وكل ده توفيق من ربنا، لأنك إنسان طيب، والمشكلة إن شاء الله قريب أوي هتتحل.
تنفس مهاب براحة، ثم قال:
ـ يسمع منك ربنا يا سيدي. وساعتها ليك عليا.
ثم ابتسم وأضاف بنبرة مازحة:
ـ هعرض عليك منصب حلو جدًا في الشركة.
ضحك رضوان وهز رأسه:
ـ لأ معلش... أنا لحد هنا كده. مهمتي خلصت.
ابتسم مهاب، وكأنه كان يتوقع منه هذا الرد:
ـ عمومًا الكلام ده سابق لأوانه أوي، وأنا مش هتنازل عنك بسهولة. خلي بالك... إنت وشك حلو جدًا على الشركة.
ضحك رضوان:
ـ الله يكرمك. دي ضربة حظ مش أكتر.
ـ يا راجل، أنت مش عارف قيمة نفسك ولا إيه!
توقفت ابتسامة مهاب قليلًا، ثم قال:
ـ على فكرة يا رضوان، أنا عايزك الأسبوعين الجايين تكون موجود معايا.
نظر إليه رضوان باستغراب:
ـ الأسبوعين الجايين؟
ـ أيوه.
صمت رضوان لحظة، ثم قال:
ـ الموضوع هيبقى صعب ما بين المصنع وشغلي.
أومأ مهاب متفهمًا، وقال:
ـ عارف، وأنا مش عايز أسببلك أي أذى في شغلك. بس كنت أتمنى إنك تفضل معايا الفترة دي... لأني بجد محتاجك. أنت فتحت عينيا على حاجات كنت غافل عنها.
ثم نظر إليه مباشرة وأضاف:
ـ والمشكلة دي اتحلت على إيدك، وأنا حاسس إن لسه في حاجات كتير محتاجة وجودك معايا.
لم يجب رضوان فورًا.
كان يعلم أن مهاب لا يطلب منه ذلك من باب المجاملة، وأن وراء كلماته ضغطًا حقيقيًا يتحمله وحده. وقد كان يستطيع ببساطة أن يعتذر وينصرف، لكنه لم يستطع أن يفعلها وهو يرى رجلًا يطلب منه الوقوف بجانبه في وقت يحتاج فيه إلى من يسنده.
تنهد رضوان، ثم ابتسم ابتسامة قصيرة:
ـ خلاص... تمام. الأسبوعين دول وبس.
اتسعت ابتسامة مهاب، وربت على كتفه بحماس:
ـ أيوه كده... هو ده رضوان ابن البلد والجدع.
ثم أشار إلى سيارته:
ـ يلا تعال اركب، أوصلك معايا.
ضحك رضوان:
ـ لأ، متشكر. معايا عربيتي بره.
ـ ما ينفعش. لازم أوصلك لحد البيت.
هز رضوان رأسه:
ـ لأ، أنا هطلع على الشغل. ومتشكر جدًا ليك.
صافحه مهاب بقوة، ثم ابتعد رضوان عنه واتجه إلى سيارته.
فتح الباب، وجلس خلف المقود، ثم أغلقه بهدوء.
ظل للحظة ينظر أمامه دون أن يشغل المحرك. لم يكن يعرف هل كان تصرفه صحيحًا أم أخطأ حين وافق على طلب مهاب. زفر بحيرة.
ثم أدار السيارة، وغادر الجراج متجهًا إلى عمله.
وفي مكانٍ آخر، كان فارس يجلس مع حبيبة في أحد المطاعم.
كان المكان مفتوحًا وبسيطًا، تعلوه إضاءة دافئة، وحركة الناس فيه غير منقطعة. جلس فارس على المقعد الخشبي المريح، يجيل بصره حول الجدران والديكورات البسيطة بتعجب هادئ؛ فلم تعتد عيناه على ارتياد هذه الأجواء الشعبية أو البسيطة من قبل.
لاحظت حبيبة نظراته الاستكشافية، فمالت برأسها قليلًا وسألته بابتسامة:
ـ ها... إيه رأيك في المكان؟ عجبك؟
نظر إليها فارس، ونقل عينيه بين الطاولات المجاورة، ثم قال بنبرة متزنة تحمل تعجبًا لطيفًا:
ـ حلو... شغال يعني.
ابتسمت حبيبة وقالت بيقين:
ـ طبعًا... إنت الأماكن دي ما رحتهاش قبل كده.
ابتسم فارس ابتسامة خفيفة ورزينة، ورد بهدوء:
ـ لأ، عمري ما جيت أماكن زي دي... كنت مشغول في فترة التعليم، وبعدين مسكت المستشفى على طول.
لوحت حبيبة بيدها بعفوية وقالت بثقة مرحة:
ـ آه... لأ، ما تقلقش، أنا هعوضك، وكل فترة كده هبقى آخدك أفسحك!
انطلقت منه ضحكة خفيفة، وسألها بتهكم لطيف:
ـ إنتِ اللي هتعوضيني؟ وهتفسحيني يعني مش أنا؟
ردت ببساطة ولطف:
ـ وفيها إيه؟ عادي. إنت خليك في شغلك وانشغالك وأنا أفسحك... هخليك تلف وتشوف مصر كلها!
اتسعت ابتسامته الصادقة وهو ينظر إلى عينيها الشغوفتين، وقال بنبرة دافئة:
ـ والله موافق جدًا... إنتِ خليني أشوف مصر، وأنا هخليكِ تشوفي العالم كله.
ابتسمت بخجل محبب، وسارعت بتغيير مجرى الحديث:
ـ ها... تحب تشرب إيه؟
امتدت يد فارس ليلتقط قوائم الطعام الموضوعة على جانب الطاولة.
فاستغربت حبيبة وقطبت حاجبيها بقليل من الدهشة:
ـ لأ... أنا قايلة تعالى نشرب قهوة في حتة بعيدة، ماسك منيو المشويات ليه؟!
ضحك فارس بهدوء، وقال بنبرة واثقة وممازحة:
ـ إنتِ مفكرة إني بخيل؟ أعزمك على الغدا طبعًا!
فتحت عينيها باستغراب وقالت:
ـ بجد؟!
رد بتعجب هادئ:
ـ إيه؟ مستغربة ليه؟ الساعة خمسة، والمفروض ده وقت غدا. وخارج مع خطيبتي، فطبيعي إني أطلب أكل؟
قالت بعفوية ومرح:
ـ لأ... مش مستغربة، بس كنت خدتك مطعم أغلى من كده!
ضحك فارس بقلبه، واعتدل في جلسته قائلًا بكرم ورزانة:
ـ إحنا فيها... قومي معايا وأنا هوديكي مكان ما حصلش، فيه جميع الأكلات اللي موجودة في العالم.
احمرت وجنتاها، وشعرت بالخجل من جرأته، فقالت بسرعة وارتباك لطيف:
ـ لأ... خلينا هنا أحسن!
دفع فارس قائمة الطعام نحوها ببطء وقال بنبرة هادئة:
ـ تمام، اختاري اللي إنتِ عايزاه.
أخذتها منه بتردد، ثم راحت تتصفحها للحظات قبل أن تغلقها وتضعها أمامها.
ـ أنا حاسة إن أنا مش جعانة خالص.
فهم فارس فورًا توترها وإحراجها من الموقف، فأراد أن يزيل الحواجز ويريحها بأسلوبه الذكي، فقال ببساطة وود:
ـ بس بصراحة أنا جعان... ناكل ونشرب القهوة وأفوق، علشان عايز أتكلم معاكِ شوية.
رفعت عينيها إليه وسألته بفضول:
ـ تتكلم معايا في إيه؟
توقف فارس لحظة، ثم وضع القائمة جانبًا، وأسند ذراعه إلى الطاولة، وقال بهدوء:
ـ عايز أحكيلك عن نفسي وأسمعك وإنتِ بتحكيلي عن نفسك... حبيبة، أنا عايز أعرف عنك كل حاجة، وإنتِ كمان من حقك تعرفي عني كل حاجة.
هزت رأسها باقتناع وتأثر هادئ، وقالت بابتسامة خفيفة:
ـ تمام... موافقة. أنا بقى عايزة أسمعك الأول.
بعد فترة قصيرة، جاء النادل ووضع الأطباق على الطاولة؛ حيث طلب لها فارس تشكيلة من المشويات الرفيعة والأطباق الخفيفة.
في البداية، كانت حبيبة تأكل بحرج وارتباك شديدين، غير أن ملاطفات فارس الهادئة وضحكاته المتزنة أذابت الجليد بينهما، حتى بدأت تتصرف على طبيعتها وتأكل براحة.
وبعد برهة، استقرت القهوة أمام فارس، بينما وضعت حبيبة كوب العصير بين يديها، ثم رفعت عينيها إليه في انتظار أن يبدأ.
استند فارس بساعديه إلى الطاولة، ونظر إليها لحظات، وكأنه يرتب أفكاره قبل أن يقول:
ـ طيب... أبدأ منين؟
ابتسمت:
ـ من البداية.
ضحك بخفة، ثم أسند ظهره إلى المقعد.
ـ البداية عندي بسيطة أوي... أنا جيت الدنيا دي وما شوفتش والدتي.
اختفت ابتسامتها تدريجيًا.
ـ ماتت وأنا صغير، ومفيش ذكريات حقيقية أقدر أقولك إنها جمعتني بيها. أما بابا بقى، اهتم بتربيتي بعد وفاتها. كان إنسان عملي جدًا.
سكت لحظة، ثم تابع:
ـ مهاب أخويا الكبير، ومنكرش إنه اهتم بيا كأني ابن ليه. ولما كان عندي ١٤ سنة، غادة بنت عمتي دخلت حياتنا، وما اكتفتش إنها تكون مرات أخويا... دي اهتمت بيا وربتني كأني واحد من ولادها.
ابتسم فارس ابتسامة دافئة وهو يتذكرها.
ـ غادة إنسانة كويسة وطيبة جدًا. دايمًا بتحاول تبقى في صفي، ولحد دلوقتي عندها هاجس غريب... كل ما يحصل بيني وبين مهاب خلاف، تفضل خايفة إني أزعل وأسيب البيت وأمشي.
ضحكت حبيبة:
ـ شكلها بتحبك أوي.
ـ وأنا كمان بحبها. هي طول عمرها كان نفسها تعمل عيلة كبيرة، وربنا رزقها بولد وبنت، وفضل عندها إحساس إن كان نفسها في أولاد أكتر.
ثم أخذ رشفة من قهوته.
ـ وأخوها نادر... وده صاحبي قبل ما يكون أخوها وقريبي. قريب مني جدًا، صحيح اللي يشوفه يفتكره تافه ورامي الدنيا ورا ضهره، بس حقيقي يعتمد عليه في حاجات كتير.
رفعت حبيبة حاجبها باهتمام:
ـ نادر ده مش متجوز؟
ضحك فارس:
ـ لأ.
ـ ليه؟ المفروض واحد زي ده يكون اتجوز.
ـ هو عايز يكون نفسه الأول.
نظرت إليه حبيبة بذهول حقيقي:
ـ نعم؟! ما شاء الله، يعني اللهم لا حسد! كل ده، ولسه عايز يكون نفسه؟!
ضحك فارس:
ـ الموضوع مش كده. عنده شوية لخبطة في الورث، وحاجات مكتوبة باسم مامته، وحاجات لغادة، وحاجات ليه... والدنيا مش أحسن حاجة معاه. هو عايز يستقل بنفسه ويفتح مشروع خاص بيه.
هزت حبيبة رأسها بأسى مصطنع:
ـ مشاكل الأغنياء دي ما لناش دعوة بيها. الحمد لله الذي عافانا.
ضحك فارس، ثم أشار إليها بيده:
ـ يعني بقالي ساعة بحكيلك عني، وقولت الدمعة هتفر من عينك، وسبتِ كل حاجة ومسكتِ في حتة الأغنياء دول.
قالت:
ـ ما أنا بحب المشاكل اللي أعرف أحلها. إيه اللي يورطني في وسط مشاكلكوا دي؟ بس ما علينا، كمل ومتخافش، الدمعة هتفر... ده أنا أعجبك!
ضحك مرة أخرى، ثم تابع:
ـ المهم... أنا كملت تعليمي ودخلت طب. بعدها بابا اتوفى. ومن وأنا في التعليم، مهاب كان دايمًا مصمم إني أروح معاه الشركة من وقت للتاني، وأنا بصراحة ما كنتش بحب الموضوع.
ـ ليه؟
ـ كنت عايز أركز في حاجة واحدة بس. كنت شايف إن الطب لوحده كفاية، ومش عايز أتشتت في حاجة تانية. بس مهاب كان بيصر، وأنا ما كنتش بحب أزعله، فكنت بروح معاه.
ارتشف من قهوته، ثم ابتسم:
ـ مهاب طيب جدًا وكويس، بس عصبي واندفاعي، ودي كانت دايمًا نقطة خلافي معاه. بعد ما كبرت وشفت شغله ومسؤوليات الشركة، فهمته أكتر. عذرته... لأن الحمل اللي على كتافه كبير.
هزت حبيبة رأسها موافقة.
ـ طب ومالك وأسيل؟
ابتسم فارس فورًا:
ـ دول بقى حبايب قلبي. قريبين مني جدًا، ومكانتهم عندي كبيرة.
ثم تنفس بهدوء وأكمل:
ـ بعد ما خلصت دراستي، عملت الماجستير والدكتوراه، وبعدها رحت المستشفى على طول واشتغلت فيها. وحياتي كانت ما بين الشركة والمستشفى والچيم والنادي. نادرًا لما بخرج. وفضلت مكمل لحد ما حصلت المشكلة مع مهاب، وبعتني المستشفى الحكومي.
ابتسمت حبيبة:
ـ طبعًا ندمت إنك جيت المستشفى عندنا؟
رفع فارس عينيه إليها مباشرة.
كانت نظرته هادئة، لكنها جعلتها تشعر أن السؤال لم يعد عن المستشفى وحدها.
ـ ساعات الشخص بيكون فاكر إنه اترمى في النار... وبعد خطوة يلاقي نفسه في قلب الجنة.
توقفت حبيبة عن الحركة.
اتسعت عيناها قليلًا، ثم شعرت بحرارة تصعد إلى وجهها.
خفضت عينيها بسرعة إلى كوب العصير، وأخذت رشفة طويلة، كأنها تذكرت فجأة أنها عطشى.
ضحك فارس بهدوء، ثم عدّل جلسته.
ـ أنا كده حكيت لك كل حاجة عني، ولو عندك أي استفسار أنا معاكي.
وضعت حبيبة كوبها على الطاولة، ثم شبكت يديها أمامها، وظلت تنظر إلى نقطة بعيدة للحظات.
تنفست بعمق.
ـ أبدأ حكايتي منين؟
ـ من البداية برضه.
ابتسمت ابتسامة صغيرة، لكنها لم تستطع أن تخفي ما خلفها.
ـ حكايتي بسيطة أوي... وفيها شوية صعوبات. مش شوية بالمعنى. بس كان فيها حبة وجع.
سكتت لحظة، ثم قالت:
ـ أنا اتولدت في حارة. وأول ما فتحت عيني على الدنيا، ما شفتش قدامي غير ماما ورضوان.
تغيرت ملامح فارس قليلًا، وظل يستمع دون مقاطعة.
ـ بابا ما شفتوش. رضوان قالي إنه مات، وماما كانت حامل ومكانتش تعرف.
ظهرت لمعة خفيفة في عينيها وهي تبتسم.
ـ ماما بقى... دي كانت الحنية كلها. كانت مدلعانا، بتحب رضوان أوي وبتحبني، وكانت بتخاف علينا بشكل يخليها طول الوقت توصينا على بعض.
ضحكت فجأة، ثم رفعت يدها تمسح دمعة صغيرة تسللت من عينها.
ـ تخيل... كانت بتوصيني على رضوان، أنا اللي كنت بغرق في شبر ميه!
ابتسم فارس رغم تأثره.
ضحكت هي أيضًا، ثم هزت رأسها.
ـ تخيل، أنا البنت الصغيرة أم ضفاير، كانت بتوصيني على الأب والأخ والصاحب اللي رباني... واللي خد باله مني.
سكتت قليلًا، ثم أخذت نفسًا طويلًا وزفرته ببطء.
ـ رضوان...
خرج الاسم منها بنبرة مختلفة.
ـ رضوان ده بقى يا سيدي حكاية لوحده.
نظرت أمامها، وكأنها تستعيد سنوات كاملة دفعة واحدة.
ـ من وقت ما بابا مات، رضوان خد قرار إنه يربيني ويكبرني تحت ضله وجناحه. ضحى بنفسه، وضحى بحلمه، علشان خاطر يكبرني أنا.
ارتجف صوتها قليلًا.
حاولت أن تكمل، لكنها لم تستطع.
انحدرت دموعها دون استئذان.
رفع فارس يده في هدوء:
ـ خلاص... ما تكمليش لو مش قادرة.
ناولها منديلًا.
أخذته ومسحت دموعها، ثم حركت رأسها بالنفي.
ـ لأ... أنا حقيقي نفسي أتكلم.
نظر إليها باهتمام.
ـ طيب... أنا معاك وهسمعك. بتعيطي ليه دلوقتي؟ اتكلمي من غير ما تعيطي.
تساقطت دموعها أكثر، ثم قالت:
ـ علشان مش عارفة إزاي هعيش من غير أخويا لما أتجوز.
توقفت، ثم ابتلعت غصتها.
ـ إنت متعرفش يومي بيعدي إزاي معاه. عارف من وأنا صغيرة لحد دلوقتي، بيجيبلي حاجة حلوة وهو راجع.
ابتسمت رغم دموعها.
ـ أقوله: كبرت يا رضوان خلاص... يقولي: لحد ما تروحي بيت جوزك. إنتِ حبيبتي الصغيرة اللي هجيب لها كل حاجة حلوة.
ابتسم فارس بحزن.
أما هي، فتابعت بصوت أكثر هدوءًا:
ـ رضوان مش بس أخويا يا فارس... لأ. ده أبويا، وصاحبي، وابني.
نظر إليها بتأثر، لكنه لم يقاطعها.
ـ عارف يعني إيه تبقى بتتكلم قدام حد من غير ما تتكلف؟ عارف يعني إيه تقول كل اللي جواك وإنت مش خايف؟ تبقى واثق إنك هتلاقي الأمان حتى لو كنت غلطان؟
مسحت دمعة أخرى.
ـ عارف يعني إيه مهما حصل، هيفضل في ضهري؟
سكتت لحظة، ثم انخفض صوتها:
ـ حرم نفسه عشاني.
لم يعلق فارس.
ـ ساعات أوي كنت بكره نفسي... وأقول: يا ريتني ما جيت الدنيا وقتها. كان هيكمل حياته بشكل طبيعي، من غير ما يشيل همي... ومن غير ما أكون عبء كبير عليه.
نظر إليها فارس طويلًا.
ـ إنتِ مش عبء يا حبيبة.
رفعت عينيها إليه.
ـ بالنسباله يمكن لأ... بس أنا كنت بشوف نفسي كده ساعات.
ساد صمت قصير، قبل أن تستجمع نفسها وتقول:
ـ المهم كملت تعليمي وقدامك أهو، واللي وصلت له لحد دلوقتي بفضل ربنا ثم رضوان.
ابتسمت، وكأنها تستعيد شيئًا من خفتها المعتادة:
ـ دايمًا مجنونة. تعبت رضوان وطلعت عينيه معايا كتير. بدلع عليه كتير كأني بنته بالظبط، وعلى قلبه زي العسل، عمره ما اشتكى.
ثم نظرت إليه وأضافت:
ـ ضهري وسندي هو رضوان.
سكتت لحظة، ثم ابتسمت ابتسامة شاردة:
ـ كنت عايشة الحياة بجنون.
ثم قالت، وكأنها تحاول أن تخرج من ثقل الذكرى:
ـ بس بعد وفاة ماما، حاجات كتير اتغيرت فيا.
ـ زي إيه؟
ـ الثقة.
أجابت دون تردد:
ـ أنا أصلًا اندفاعية. بحب الناس بسرعة، وبثق في أي حد بسهولة، وبحب أساعد وأقرب من الناس من غير ما أفكر كتير. بس بعد وفاة ماما... بقيت أخاف أكتر. الثقة عندي قلت جدًا.
ابتسم فارس:
ـ على فكرة... أنا شايف إنك لسه اندفاعية.
ضحكت ومسحت دموعها:
ـ لسه؟ ده أنا كنت بقولك من شوية إني هلففك مصر كلها!
ضحك.
ـ بس يمكن دي أحلى حاجة فيكي.
ابتسمت له، ثم سألته:
ـ وإنت؟ إيه أكتر حاجة بتحبها؟
فكر لحظة.
ـ الهدوء... وإن كل حاجة تبقى واضحة قدامي. بحب الشغل، وبحب الناس اللي أقدر أثق فيها. وأكتر حاجة بكرهها... إني أحس إن حد بيكذب عليا أو بيخبي عني حاجة مهمة.
هزت رأسها ببطء:
ـ وأنا أكتر حاجة بكرهها إن حد يستهين بحد تاني أو يستغل طيبته.
تبادلا النظرات للحظة، ثم ابتسم كل منهما للآخر.
قال فارس:
ـ وإنتِ؟ أكتر حاجة بتحبيها؟
ـ الناس اللي بحبهم.
ـ دي إجابة حلوة، بس واسعة شوية.
ضحكت:
ـ ما هو أنا كده... بحب كتير.
ـ واضح.
سكت قليلًا، ثم سألها:
ـ قولتي رضوان كان متجوز قبل كده؟
توقفت حبيبة لحظة.
ـ اممم...
لاحظ فارس التغير الطفيف في ملامحها.
ـ وبعدين؟
هزت رأسها:
ـ مفيش. ما حصلش نصيب...
نظر إليها لحظات، ثم قال:
ـ مالك؟ حسيتك افتكرتي حاجة ضايقتك.
ـ أبدًا.
ظل صامتًا لحظة، ثم سأل:
ـ غربية، رضوان ما اتجوزش لحد دلوقتي؟ معقول يكون لسه بيحبها؟
تنهدت وقالت:
ـ بص، هي حكاية رضوان وطليقته دي حكاية غريبة فعلاً. ومش هقدر أتكلم فيها، لأن رضوان الموضوع ده بالذات بيكره أي حد يتكلم فيه.
ـ ياه، للدرجة دي؟
أخفضت عينيها قليلًا، ثم قالت:
ـ وأكتر. إنت متعرفش هي وصلته لإيه. ورغم كل ده، لحد دلوقتي عمره ما نسيها.
- سبحان الله، أنا ماليش في الفضول، لكن رضوان دايمًا بيخليني أحس إنه مخبي جواه حاجات كتير، كأنه شايل قصة كاملة ومش حابب يحكيها.
ـ رضوان من الناس اللي وشهم هادي، لكن عيونهم بتقول إن جواهم كلام كتير... ولو اتكلمت عنه هحتاج وقت طويل عشان أحكي، فخلينا نأجل الحكاية دي لوقت تاني.
حرك رأسه بتفهم، وفهم أيضًا من نبرتها أنها لا تريد الخوض أكثر، فلم يسأل.
وبعد لحظات، انتقل الحديث إلى شيء أخف.
ـ سيبك بقى من كل ده... نتكلم عن بيتنا. نفسك بيتنا يبقى عامل إزاي؟
اتسعت ابتسامة حبيبة.
ـ يا سلام... بيتنا! عارف حلم حياتي إني أقعد في شقة مية وعشرين متر.
ضحك فارس، وهو يمسح على شعره.
حدقت فيه باستنكار:
ـ بتضحك على إيه؟
ـ مفيش... بس حبيت الرقم.
ـ ليه يعني؟
ـ ما أعرفش... حاسس إنك حاطة سقف لأحلامك على قد المساحة.
ـ يا ابني، أنا عايزة بيت واسع. مش شقة ٨٥ متر. لأ يا عم، هي ناقصة خنقة! عايزة أفسح على نفسي كده.
ابتسم فارس:
ـ طيب لو قلتلك بدل الشقة الواسعة قوي دي اللي راسماها في خيالك، إيه رأيك نقعد في فيلا محندقة كده؟
ترددت قليلًا.
ـ إيه! هو إنت ناوي نتجوز في بيت أخوك؟
ـ لأ، طبعًا. أنا مش هاخد راحتي. وكفاية أوي كده عليهم.
تنهدت بارتياح:
ـ طيب، خطوة حلوة واهو برضه ما نزهقش الناس مننا. إيه رأيك نجيب شقة في مكان حلو كده؟ بصراحة حوار الفيلل ده بيخنقني.
تعجب من طريقة تفكيرها، لكنه قال:
ـ حبيبة... أنا عندي عمارة.
نظرت إليه باهتمام.
ـ احلف.
ضحك:
ـ يا بنتي، صدقي أي كلمة أقولهالك. لأ، ومش بس كده... الدور على شقتين.
ـ الشقة كام متر؟
ابتسم فارس:
ـ ميتين متر.
اتسعت عيناها.
ـ ميتين؟!
ضحك:
ـ أهو بدل مية وعشرين. صغيرة، مش كده؟
ـ صغيرة إيه؟ دي ملعب!
قال:
ـ بما إن حضرتك مش عاوزة فيلا، أنا فكرت حاليًا إني اخد الدور كله وأفتح الشقتين على بعض.
فتحت عينيها بدهشة:
ـ نقعد في شقة ٤٠٠ متر؟ ده قصر النيل ده ولا إيه؟
نظرت إليه وقالت:
ـ بس ده كتير أوي يا فارس. أنا كان حلمي شقة مية وعشرين متر. والله أنت كبرت الموضوع أوي.
ـ مفيش حاجة اسمها كتير عليكي، إنتِ بس تتمني وأنا ربنا يقدرني وأحققلك كل أحلامك. وأنا عايزك تحلمي أكبر من كده.
ساد بينهما صمت مريح لثوانٍ.
ذلك النوع من الصمت الذي لا يولد من الحرج، بل من الألفة التي تبدأ في التسلل بهدوء بين شخصين يتعرفان إلى بعضهما للمرة الأولى بحق.
نظر فارس إلى ساعته ثم أعاد نظره إليها مبتسمًا.
ـ إيه رأيك نتمشى شوية؟
نهضت من مكانها.
ـ ياريت.
وقف فارس وهو يلتقط مفاتيحه.
ـ طب يلا بينا.
كان هواء المساء لطيفًا على كورنيش النيل.
الأضواء المنعكسة فوق المياه كانت تهتز مع حركة الأمواج الصغيرة، بينما انشغل المارة بأحاديثهم وضحكاتهم العابرة.
سارا جنبًا إلى جنب.
المسافة بينهما متحفظة.
ثم بدأت الأحاديث الصغيرة تملأ الطريق.
مرة يتحدثان عن العمل.
ومرة عن الدراسة.
ومرة عن مواقف طريفة مرت بهما.
ومرة يضحكان دون سبب حقيقي.
اكتشفت حبيبة للمرة الأولى أن فارس مختلف عن الصورة التي رسمتها له في عقلها.
لم يكن جادًا ولا بارداً طوال الوقت كما ظنت.
ولم يكن متعاليًا كما توقعت.
بل كان يملك خفة مفاجئة تظهر حين يشعر بالارتياح.
أما فارس...
فكان يكتشف كل دقيقة جانبًا جديدًا فيها.
براءتها.
اندفاعها.
طريقة حديثها السريعة حين تتحمس.
وضحكتها التي تسبقها عيناها قبل شفتيها.
حتى وجد نفسه يستمتع بكل دقيقة تمر معها.
دون أن يشعر بالوقت.
حين اقتربت الساعة من العاشرة، كان يقف بسيارته أمام منزلها.
التفتت نحوه مبتسمة.
ـ شكراً يا فارس.
نظر إليها باستغراب مفتعل.
ـ شكراً على إيه؟
أبتسمت.
ـ على اليوم الحلو ده.
هز رأسه بهدوء.
ـ أنا اللي المفروض أشكرك.
سكت لحظة ثم أضاف:
ـ أنا انبسطت أوي.
ارتبكت قليلًا.
واتسعت ابتسامتها دون إرادة منها.
ـ وأنا كمان.
تعلقت عيناه بها لثوانٍ قصيرة.
قبل أن يقول بهدوء:
ـ يلا اطلعي عشان الوقت اتأخر.
فتحت الباب ثم توقفت قبل أن تنزل.
واستدارت نحوه من جديد.
ـ تصبح على خير.
ابتسم.
ـ وإنتِ من أهله.
أغلقت الباب أخيرًا.
وسارت نحو العمارة بخطوات خفيفة.
خفيفة أكثر مما كانت عليه منذ شهور طويلة.
ولم يكن شعورها بالسعادة يفارقها طوال الأيام التالية.
كانت تلتقط نظرات فارس إليها وسط العمل، واهتمامه الدائم بتفاصيلها الصغيرة، وسؤاله عنها إذا غابت.
وطريقته الهادئة في جعلها تشعر أنها مهمة.
شيئًا فشيئًا...
كان يدخل إلى قلبها أكثر.
دون استئذان.
ودون مقاومة حقيقية منها.
كانت تحبه.
تعرف ذلك جيدًا.
بل ربما عرفته منذ فترة أطول مما تعترف به لنفسها.
لكنها كانت كلما وصلت إلى حافة الاعتراف...
تتراجع.
ويغلبها خجلها.
فتكتفي بالصمت.
وتترك لقلبها أن يعيش تلك السعادة سرًا.
أما فارس...
فكان يرى ابتسامتها كلما اقترب منها.
ويرى الارتباك الذي يلمع في عينيها أحيانًا.
لكنه لم يكن مستعجلًا شيئًا.
كان يفضل أن تأتي مشاعرها إليه بكامل إرادتها.
دون ضغط.
دون سؤال.
ودون أن يطالبها باعتراف لم يحن وقته بعد.
وفي تلك الفترة...
عاشت حبيبة واحدة من أهدأ وأجمل مراحل عمرها.
محاطة بحب أخيها.
واهتمام فارس.
وأحلام صغيرة بدأت تُبنى داخل قلبها يومًا بعد يوم.
دون أن تدري...
أن الحياة كانت تخبئ للجميع ما لم يكن في الحسبان.
ومع مرور الأيام، لم تكن التغييرات تحدث في حياة حبيبة وحدها.
خلال الأسبوع الأول، بدأت خطوات رضوان تؤتي ثمارها؛ تم تحريك بعض المستحقات المتأخرة، وإعادة تنظيم المخزون، والوصول إلى اتفاقات أفضل مع عدد من الموردين، دون أن تخسر الشركة عميلًا مهمًا أو تفسد علاقتها بأي مورد أساسي.
وبمرور الأيام، بدأت فجوة السيولة تضيق تدريجيًا، وبدأت حصيلة المبيعات تدخل الشركة بوتيرة أسرع، بعدما ظلت لفترات طويلة معلقة بين آجال السداد الطويلة وحركة التشغيل اليومية.
كما تراجع الضغط على النقدية شيئًا فشيئًا، وأصبحت الشركة أكثر قدرة على الوفاء بالتزاماتها دون الحاجة إلى اللجوء السريع لتمويل إضافي.
ومع نهاية الأسبوع الثاني، جلس مهاب يراجع التقرير الأخير، ثم رفع عينيه إلى رضوان وقال بإعجاب واضح:
ـ الفجوة قلت بشكل كبير، والسيولة اتحسنت فعلًا.
ابتسم رضوان، لكنه لم يبدُ مكتفيًا بالنتيجة:
ـ كويس... بس لسه آخر مرحلة.
عقد مهاب حاجبيه مستفسرًا:
ـ آخر مرحلة إيه؟
ـ نثبت اللي عملناه. مش مهم إن الفجوة قلت مرة، المهم إنها تفضل تحت السيطرة، ونشوف دورة رأس المال العامل هتستقر على إيه خلال الفترة الجاية.
ثم أضاف بهدوء:
ـ لو رجعنا لنفس أسلوب التحصيل ونفس إدارة المخزون، هتبدأ المشكلة ترجع تاني بالتدريج. إنما لو الأرقام تتابعت باستمرار، يبقى اللي عملناه يتحول لنظام شغال مش مجرد حل مؤقت.
ظل مهاب ينظر إليه للحظات، ثم أومأ برأسه في اقتناع.
كان واضحًا أمامه الآن أن رضوان لم يكن محقًا في تشخيص المشكلة فقط، بل كان يعرف أيضًا أن علاجها الحقيقي يحتاج إلى متابعة وانضباط مستمر، لا إلى نتيجة مؤقتة تظهر في تقرير ثم تختفي بعد أسابيع قليلة.
ومع استقرار الأوضاع تدريجيًا داخل الشركة، حل أخيرًا موعد الاحتفال السنوي الذي اعتاد الجميع انتظاره كل عام.
كان مدخل فيلا مهاب يشبه بوابة من الضوء.
الأشجار العالية على الجانبين كانت تتدلى منها عناقيد صغيرة من النجوم الذهبية، تضيء وتطفئ في تناغم هادئ، كأنها ترحب بالقادمين. الأرض مفروشة بالزلط الأبيض، والهواء كله رائحة عطر ليلي.
أما من الداخل، فكانت الفيلا بسيطة وراقية. الإضاءة دافئة، والديكور هادئ بألوان خشبية، وموسيقى ناعمة تملأ الصالة الواسعة. حفلة صغيرة، أنيقة، على قدر أصحاب الشركة والمقربين فقط.
توقفت سيارة فريد أمام البوابة.
نزل فريد أولاً، ببدلته الأنيقة، ودار حول السيارة ليفتح لها الباب.
نزلت زاد.
كانت ترتدي فستاناً مخملياً بلون عنابي عميق، ينساب على جسدها بفخامة، لون يليق بامرأة اعتادت أن تُرى ولا تُنسى. سلسلة رقيقة تلمع على عنقها، وشعرها ملموم بعناية خلف رأسها، يبرز ملامحها الهادئة. كانت تبدو متزنة، راقية، كأنها لا تنتمي لصخب الحفلات، بل لهدوئها.
دخلت وهي تمسك ذراع زوجها فريد، لكنها لم تكن تستند عليه، كانت تتشبث به.
ما إن خطت داخل الصاله، حتى أقبلت غادة، بابتسامة واسعة وذراعين مفتوحتين.
- يا روحي! أهلا أهلا! إيه القمر ده يا زاد! والله منورة الدنيا كلها!
ابتسمت زاد ابتسامة مجاملة، تلك الابتسامة التي تدربت عليها طويلا لتخفي بها ارتباكها.
- حبيبتي يا غادة، تسلميلي، إنتي اللي قمر طول عمرك.
اقترب مهاب ببدلته الأنيقة، يصافح فريد بحرارة.
- يا أهلا يا أهلا.. نورت يا فريد باشا.
رد فريد بثقة:
- حفلة جميلة كالعادة يا مهاب.
خبط مهاب كتف فريد مازحاً:
- أخيراً يا عم! إيه رأيك؟
ضحك فريد وهو ينظر حوله بإعجاب:
ـ اختيار موفق يا مهاب... المكان هادي ورايق، والجو كله مريح، والموسيقى تهدي الأعصاب.
- يا ابني أنا صارف ومكلف، عايزك تنبهر يعني.
ضحكا سويا.
ثم التفت مهاب إلى زاد بابتسامة رسمية:
- منورة يا مدام زاد.
أومأت برأسها:
- ميرسي لحضرتك.
قالت غادة بابتسامة ودودة:
ـ حبيبتي، أتمنى تكون الحفلة والمكان عجبوكي.
ردت زاد بابتسامة رقيقة:
ـ حبيبتي يا غادة، الفيلا تجنن ما شاء الله.
مرّت عاملة تحمل صينية فضية عليها كؤوس العصير الباردة.
مدّ مهاب يده أولًا، ثم فريد، ثم غادة. أخذت غادة كأسًا وناولته لزاد، فمدّت زاد يدها لتأخذه.
كانت أصابعها ترتجف. ارتجافة صغيرة لا يراها أحد، لكنها كانت تشعر بها تسري من قلبها حتى أطرافها. وانفرج الجرح الصغير عند طرف سبابتها من جديد، ذلك الجرح الذي لم يلتئم بعد، فشعرت بوخزة خفيفة وهي تحاول تجاهلها. أمسكت الكأس، وضمتها كأنها تحاول أن تثبت يدها بشيء.
وكان كل شيء يمضي طبيعيا.. عاديا جدا.. للحظة واحدة فقط.
حتى فُتح باب الفيلا الداخلي مرة أخرى.
لم يكن دخولا عاديا.
خطوة ثابتة.. ثقيلة.. لها صدى.
دخل رضوان.
ببدلته السوداء البسيطة، وهيئته التي عرفتها عن ظهر قلب.
لم يتغير كثيرًا...
إلا أن الحزن صار أوضح في عينيه.
رفع رأسه بتلقائية ليُحيّي صاحب الدعوة.
فالتقت عيناه بعينيها.
تجمد الزمن.
الموسيقى ما زالت تعزف، والناس ما زالوا يضحكون، والكؤوس ما زالت تلمع تحت الضوء، لكن في البقعة الصغيرة التي وقف فيها هو وهي.. سكت كل شيء. انعزل العالم
في لحظة واحدة، انقطع نفس زاد.
شعرت بدقات قلبها ترتفع حتى كادت تسمعها في أذنيها. الموسيقى اختفت. صوت مهاب وفريد تلاشى. كل الوجوه من حولها ذابت.
وهو.. وقف مكانه.
لم يتحرك قيد أنملة. عيناه لم ترمش. لم تكن نظرته عتابا ولا لوما، كانت ذهولا صافيا، ذهول رجل كان يظن أن نجمته البعيدة التي يكتب عنها ليلا.. لن يراها أبدا، فإذا بها أمامه، على بعد أمتار، تمسك ذراع رجل آخر.
- رضوان؟
همستها زاد أخيرا، بصوت لم يسمعه أحد سواها.
بدأت ترتعش يدها بلا إرادة. وفي تلك اللحظة، خانتها يدها تماما.
ارتخت أصابعها.
وسقط الكأس.
لم يسقط بهدوء، بل ارتطم بالأرض الرخامية وانفجر.
_تشظّى._
صوت زجاج يتكسر عاليا، حادا، قاطعا، مزق صمت الموسيقى الناعمة.
تناثر العصير، وتناثرت مئة شظية لامعة تحت قدميها.
التفت الجميع نحو الصوت.
شهقت غادة بفزع:
- يا ساتر يا رب! حاسبي يا زاد!
أمسك فريد بذراعها بسرعة ولهفة أمام الناس:
- زاد! خلي بالك! إيدك كويسة؟ اتعورتي؟
لكن زاد لم تكن تسمعه.
لم تكن ترى الزجاج المتناثر، ولا العصير المسكوب على فستانها، ولا نظرات الناس الفضولية.
كانت عيناها ما زالتا معلقتين في عيني رضوان.
وكأنهما وحدهما في الحفلة.
وكأن الكأس لم ينكسر على الأرض، بل انكسر بينهما.
يتبع......

تحفه يا مريم انا قلبي كان بيدق بسرعه معاهم🙂
ردحذفروعه روعه تسلم ايدك ياقمر ❤️❤️❤️❤️
ردحذف