قصص وروايات مريم نصار

قصص وروايات مريم نصار: المدونة الرسمية للكاتبة والروائية المصرية مريم نصار. هنا تقرئين حكايات تلمس القلب وتشبه تفاصيل حياتنا: روايات وقصص تجمع بين الرومانسية والدراما والتشويق، بأسلوب قريب من القارئ وشخصيات تعيش معك بعد الفصل الأخير. تُنشر كل رواية فصلًا بفصل بترتيب منظم ومريح للقراءة، وتقدرين تتابعين الفصول الجديدة أولًا بأول. أهلًا بك في عالم مريم نصار.

الفصل الخامس عشر. زاد الآسمر


الفصل الخامس عشر. زاد الآسمر



الفصل الخامس عشر زاد الآسمر. الجزء الثاني.

 

لم تكن الصدمة في اختفاء السلاح.

ولا في فشل الخطة نفسها.

بل في حقيقة أكثر إزعاجًا...

أن شخصًا مجهولًا عرف ما لم يكن من المفترض أن يعرفه أحد.

******

ظل فريد جالسًا مكانه.

وعيناه مثبتتان على الصورة المتجمدة أمامه.

صورة الرجل المجهول.

ونظرته المباشرة نحو الكاميرا.

والرسالة الصامتة التي تركها خلفه.

مرت ثوانٍ طويلة.

دون حركة.

ودون كلمة.

بينما كانت الأفكار تتدافع داخل رأسه بسرعة مخيفة.

أحدهم عرف.

أحدهم سبقهم إلى المكتبة.

وأحدهم كان يعلم بالضبط ما الذي يبحث عنه.

تصلب فكه.

ثم أغمض عينيه للحظة.

وأعاد ترتيب الأسماء داخل رأسه.

اسمًا تلو الآخر.

قبل أن يتوقف عند اسم بعينه.

فارس الحسيني.

فمن بين الجميع...

كان الوحيد الذي واجهه صراحة بسبب رضوان.

والوحيد الذي يملك سببًا كافيًا للتدخل.

خصوصًا بعد أن كشف فريد أمامه أكثر مما كان ينبغي.

فتح عينيه ببطء.

ثم التقط هاتفه.

وضغط رقمًا محفوظًا.

جاءه الرد سريعًا:

ـ تحت أمرك يا باشا.

قال فريد ببرود:

ـ تعالى.

***

بعد دقائق...

دفع تايسون باب المكتب ودخل.

لكنه تباطأ فور وقوع عينيه على المكان.

فوضى غير معتادة.

مستندات مبعثرة.

آثار قهوة منسكبة فوق سطح المكتب.

وحاسوب مفتوح على صورة رجل ملثم ينظر مباشرة إلى الكاميرا.

عندها فقط...

أدرك أن أمرًا جللًا قد حدث.

فاستقام في وقفته بصمت منتظرًا الأوامر.

أما فريد...

فظل جالسًا خلف مكتبه.

وعيناه معلقتان بالمباني الممتدة خلف الواجهة الزجاجية.

قبل أن يقول أخيرًا:

ـ عايز مراقبة.

عقد تايسون حاجبيه.

ـ مين يا باشا؟

استدار فريد ببطء.

ثم قال:

ـ فارس الحسيني.

ساد الصمت لثانية.

قبل أن يكمل:

ـ ورضوان العطار.

ازدادت دهشة تايسون.

لكنه التزم الصمت.

فواصل فريد بصوت بارد:

ـ من اللحظة دي...

كل خطوة.

كل مقابلة.

كل مكان يروحوله.

أنا عايز أعرفه.

تقرير كل نص ساعة.

ولو حد منهم اتحرك من مكانه...

أعرف.

ولو قابل حد...

أعرف.

حتى النفس اللي بيتنفسوه...

أعرف.

أومأ تايسون فورًا.

ـ اعتبره حصل يا باشا.

أشار له فريد بالانصراف.

فاستدار الرجل وغادر المكتب.

وأغلق الباب خلفه.

ليعود الصمت من جديد.

***

لم يمر وقت طويل.

حتى انفتح الباب مرة أخرى.

ودخل الجيار بخطوات سريعة.

لكن ما إن وقعت عيناه على شاشة الحاسوب حتى تجمد مكانه.

صورة رجل ملثم.

يقف داخل مكتبة رضوان.

وينظر مباشرة نحو الكاميرا.

اقترب أكثر.

وعيناه معلقتان بالشاشة.

قبل أن يرفع رأسه ببطء نحو فريد.

كان الأخير يقف أمام النافذة.

يعطيه ظهره.

ويداه معقودتان خلف ظهره.

لكن الجيار لم يكن بحاجة إلى رؤية وجهه.

كي يفهم أن الأمر خرج عن السيطرة.

خرج صوت فريد أخيرًا.

هادئًا.

هادئًا بصورة أقلقته أكثر من الصراخ نفسه.

ـ فسرلي اللي حصل يا جيار.

ابتلع الجيار ريقه.

وعاد ينظر إلى الشاشة.

ـ مستحيل اللي شايفه.

سادت لحظة صمت.

ثم تمتم:

ـ مستحيل.

استدار فريد نحوه ببطء.

ـ أنا مش بسألك إذا كنت مصدق أو لأ...

 أنا بسألك إزاي مهمة تافهه زي دي...

 تفشل بالشكل ده.

 وإنت اللي مسؤول عنها من أولها لآخرها!.

رفع الجيار عينيه إليه.

ـ صدقني يا باشا، أنا رتبت لكل حاجة بنفسي. كل واحد كان عارف الجزء المطلوب منه وبس، ومحدش كان عنده صورة كاملة عن الموضوع. الخطة كانت ماشية زي ما رسمناها بالظبط، ومفيش أي حاجة حصلت تدل إن حد عرف إحنا بنعمل إيه. وسيادتك شوفت ده بنفسك. إحتمال يكون......

ضرب فريد بيده فوق المكتب قاطعًا حديثه.

فاهتز الحاسوب قليلًا.

ـ انت لسه هتقولي احتمالات؟ أنا شايف اللي حصل بعيني. والمفروض أصدق إن واحد غريب دخل المكتبة، وخد حاجة محدش يعرف إنها موجودة غيرنا، وخرج بكل بساطة؟! إنت فاهم معنى اللي حصل ده يا جيار؟!

تصلبت ملامح الجيار فورًا.

ـ فاهم يا باشا. وعلشان كده بقول إن فيه حاجة إحنا مش واخدين بالنا منها. أنا واثق في رجالتي، وعمرنا ما اشتغلنا بالطريقة دي قبل كده واتسربت مننا معلومة. بس ده مش معناه إن مفيش احتمال إن حد يكون عرف من بره.

ساد الصمت للحظات.

ثم تحرك الجيار نحو الحاسوب.

وأعاد المقطع.

ظل يراقب الملثم عدة ثوانٍ.

ثم قال:

ـ الراجل ده مش داخل يسرق.

رفع فريد حاجبه.

فأكمل الجيار:

ـ بص عليه.

دخوله هادى.

مش بيتصرف كحرامي.

ولا كواحد دخل صدفة.

الراجل فعلاً كان بيدور على السلاح.

وبس.

اشتد فك فريد.

بينما تابع الجيار:

ـ مين يعرف إن كان فيه سلاح من الأساس؟ مش بس مكانه. مين عنده معلومة إن فيه حاجة مستخبية في المكتبة، علشان يروح يدور عليها ويطلع بيها؟

ساد الصمت داخل المكتب.

صمت ثقيل.

قبل أن يعود فريد ببصره إلى الصورة المتوقفة.

صورة الملثم وهو ينظر إلى الكاميرا.

اقترب من الشاشة.

وتابع بنبرة باردة:

ـ شوف النظرة.

شوف الوقفة.

الراجل ده ما كانش بيهرب.

كان بيتعمد يتشاف.

ارتسم التوتر فوق ملامح الجيار.

لكن فريد أكمل:

ـ كأنه بيوصلي رسالة.

ثم ضحك ضحكة قصيرة خالية تمامًا من المرح.

ـ ونجح... نجح يا جيار.

لأول مرة...

لم يجد الجيار ما يقوله.

ظل صامتًا.

يراقب سيده.

بينما أخذ فريد يحدق في الصورة وكأنها أصبحت إهانة شخصية لا يمكن تجاوزها.

وأخيرًا قال الجيار بحذر:

ـ باشا سعادتك من الاول عايزنا نخلص على رضوان، فلو الموضوع هيطول معانا ويعملنا مشاكل؟ ولو تحب أخلص عليه النهارده قبل بكره. ابعت رجالتي حالًا يخلصوا منه.

ساد الصمت.

ثم ارتسمت ابتسامة باردة فوق شفتي فريد.

ابتسامة أزعجت الجيار أكثر من الغضب نفسه.

هز فريد رأسه ببطء.

ـ لا.

عقد الجيار حاجبيه.

ـ لا؟! انا ما بقتش فاهم حاجه يا باشا؟

«رغم غضبه العاصف...

لم يشك فريد في الجيار. لا لشيء...

 إلا لأنه كان يعرف ولاءه جيدًا

ولذلك تجاوز اسمه سريعًا.

كما تجاوز أسماء رجاله جميعًا.

ووجّه أوامره إلى تايسون بمراقبة فارس الحسيني ورضوان العطار.

فقد أراد أن يعرف ما إذا كانت الإجابة تكمن هناك...

عند فارس.

استدار فريد نحو النافذة.

وأراح يديه داخل جيبيه.

ثم ابتسم.

ابتسامة مظلمة.

أقرب إلى ابتسامة رجل وجد لعبة جديدة تثير اهتمامه.

ـ أنا عجبتني لعبة القط والفار دي يا جيار.

ظل الجيار صامتًا.

بينما أكمل فريد:

ـ واضح إن حد قرر يحط نفسه بيني وبين رضوان.

حد قرر يبقى البطل.

ويجري ينقذه.

ارتفعت زاوية فمه أكثر.

ـ وأنا بحب النوع ده.

بحب الناس اللي تفتكر إنها أذكى مني.

اقترب الجيار خطوة.

ـ طيب سعادتك ناوي تعمل إيه؟

رفع فريد عينيه نحو ضوء الشمس المنعكس على الأبراج البعيدة.

وقال ببطء:

ـ مفيش.

دلوقتي.

خلينا نتفرج.

مرت عدة ثوانٍ.

قبل أن يضيف:

ـ أنا بس عايز أعرف هيقدروا يحموا رضوان لحد إمتى.

أو بالأصح...

الحمامة دي هتفضل ترفرف فوق راسه لحد إمتى.

خفض الجيار رأسه في صمت.

أما فريد...

فظل واقفًا مكانه.

وعيناه مليئتان بذلك البريق المظلم الذي لم يكن يبشر بخير.

ثم قال أخيرًا:

ـ الضربة الأولى فشلت.

ماشي.

لكن الضربة الجاية...

مش هيبقى فيها إنقاذ.

ولا فرصة تانية.

واستقرت عيناه على انعكاس صورته فوق الزجاج.

قبل أن يهمس بصوت خافت...

هادئ على نحو مخيف:

ـ والضربة اللي بعدها...

هتبقى في مقتل يا رضوان.

***********

عند الظهيرة...

كانت زاد جالسة فوق سرير قاسم.

تستند إلى الوسادة خلف ظهرها.

وبين يديها هاتفها المحمول.

بدت أفضل قليلًا من الأيام الماضية.

لكن آثار المرض لم تختفِ تمامًا بعد.

دخلت عواطف الغرفة حاملة كوبًا من العصير.

وما إن رأتها مستيقظة حتى ابتسمت.

ـ عاملة إيه النهارده يا حبيبتي؟

بادلتها زاد ابتسامة صغيرة.

ـ الحمد لله... أحسن شوية.

وضعت عواطف الكوب أمامها.

ثم جلست على طرف السرير.

وقالت بحنان:

ـ الحمد لله.

إحنا كنا فين وبقينا فين.

ده إنتِ كانت حرارتك مولعة يا بنتي.

ابتسمت زاد بهدوء.

لكن عواطف ظلت تتأملها للحظات.

قبل أن تعقد حاجبيها فجأة.

ـ هو أنا كنت عايزة أسألك على حاجة.

رفعت زاد رأسها.

ـ خير يا دادا؟

ـ إنتِ ليه من ساعة ما تعبتي وإنتِ قاعدة هنا؟

يعني أوضتك موجودة.

وسريرك موجود.

وأنا مش فاهمة ليه مصممة تباتي في أوضة قاسم؟

ساد الصمت لثوانٍ.

ثم زفرت زاد ببطء.

وقالت:

ـ من ساعة ما عرفت إن فريد اكتشف إني بعالج قاسم، وأنا شاكّة إنه بيراقبني بالكاميرات. ومن وقتها وأنا مش حاسة بالأمان في البيت ده عموماً.

شهقت عواطف.

ـ يخيبه راجل!

أكملت زاد:

ـ وكنت حاسة إني مخنوقة جوه أوضة النوم...

كأن الحيطان بتطبق عليّا ومش قادرة أتنفس.

حاسة إن كل حركة محسوبة.

وكل نفس محسوب.

لكن خلاص... اتأكدت إن مفيش كاميرات هناك.

 وهقدر أرجع أوضتي عادي.

هزت عواطف رأسها بعدم رضا.

وقالت بضيق:

ـ هو في راجل محترم يعمل العمايل اللي ملهاش وصف دي؟ طيب لما هو مش مركب كاميرات، عرف إزاي؟ ولا يمكن يا بنتي سمع بالصدفة؟

هزت زاد رأسها نافية.

ـ لأ.

طلع رابط حساباتنا بحسابه.

يعني سواء خرجت من الأوضة أو فضلت فيها...

وحتى لو سبت البيت كله، يقدر يعرف أنا بعمل إيه على الموبايل.

وإيه اللي بيحصل على الحسابات اللي رابطها بحسابه.

قطبت عواطف جبينها.

ـ يا ساتر يا رب.

ده عايش معاكي ولا محقق مباحث؟

لم تتمالك زاد نفسها.

فضحكت ضحكة قصيرة.

كانت الأولى منذ أيام.

فابتسمت عواطف فورًا.

سعيدة بأنها استطاعت انتزاعها منها.

ثم قالت بعد لحظة:

ـ على سيرة الزعل ده...

سي حسين بيه كان بييجيلك على طول وأنتِ تعبانه.

اختفت الابتسامة من وجه زاد.

ـ بابا؟

ـ أيوة.

من وقت ما عرف إنك تعبانة، كان ييجي يطمن عليكي.

ولما يعرف إنك نايمة، يقعد شوية مع قاسم.

ويلعب معاه.

وبعدين يمشي.

وميرضاش حد يصحيكي.

شعرت زاد بانقباض دافئ داخل صدرها.

وأخفضت رأسها.

ـ بابا وحشني أوي يا دادا.

نفسي أشوفه وأقعد معاه.

ابتسمت عواطف.

ثم قالت فجأة:

ـ وإيه اللي يمنعك يا بنتي؟ ما تروحيله.

أهو منها تغيري جو شوية.

وتتبسطي.

وتنسي الزعل اللي إنتِ فيه.

أصل كل اللي إنتِ فيه ده.... تعب نفسي.

ظلت زاد صامتة.

ثم رفعت عينيها نحوها.

وقالت بتردد:

ـ فكرك فريد يوافق؟

ابتسمت عواطف ابتسامة صغيرة.

ـ وإنتِ ليه مستعجلة على الرفض؟

كلميه الأول.

وشوفي هيقول إيه.

يمكن ربنا يفك النحس من وشه ويوافق.

تنهدت زاد.

ـ أنا خايفة يرفض.

أو يقلب الموضوع خناقة من غير أي داعي.

ربتت عواطف على يدها.

ـ ولو رفض يبقى رفض.

لكن إنتِ على الأقل حاولتي.

وبعدين يا بنتي...

إنتِ مش هتقوليله إنك عايزة تسافري آخر الدنيا.

إنتِ رايحة بيت أبوكي.

ومن حقك تشوفيه.

وبعدين يا بنتي، فريد بيه نفسه...

 من يوم ما تعبتي وهو مشغول...

 طول الوقت في شغله وصفقاته، وبقى نادرًا لما بييجي البيت.

فمش غريبة إنك تستغلي انشغاله وتروحي تزوري أبوكي.

انخفض بصر زاد إلى الهاتف من جديد.

وظلت أصابعها تتحرك فوق غطائه.

دون أن تفتحه.

كانت تتمنى الذهاب.

أن تجلس إلى جوار أبيها.

أن تتحدث معه بحرية.

أن تشعر، لعدة أيام فقط...

أن العالم توقف عن مراقبتها.

لكنها كانت تعرف فريد جيدًا.

ولم يكن الرفض وحده ما تخشاه.

بل ما قد يأتي بعده.

لاحظت عواطف ترددها.

فابتسمت برفق.

ـ يلا.

اتصلي.

وأهو بدل ما تفضلي تفكري.

تعرفي الرد بنفسك.

ظلت زاد تنظر إلى اسم فريد على الشاشة لثوانٍ طويلة.

ثم أخذت نفسًا عميقًا.

وضغطت زر الاتصال.

************

في الوقت نفسه...

انفتح باب المصعد في مقر شركة الشامي.

وخرج فريد يتقدمه الجيار.

بينما كان عدد من الموظفين يبتعدون من طريقهما فور رؤيتهما.

ظل الاثنان يسيران في الممر الهادئ.

قبل أن يخفض الجيار صوته قائلًا:

ـ الصفقة على وصول يا باشا، وكل حاجة تقريبًا جاهزة. فاضل بس نحدد هنتحرك إمتى.

استمرت خطوات فريد بالوتيرة نفسها.

ثم قال ببساطة:

ـ جاي معاك.

توقف الجيار مكانه لحظة.

وظل ينظر إليه غير مصدق.

ـ تيجي معانا؟

رفع فريد عينيه إليه.

فقال الجيار سريعًا:

ـ يا باشا... إنت عارف الزيات.

والراجل عصبي.

وحضرتك عصبي.

وآخر مرة اتقابلتوا فيها.... كانت هتقلب حرب.

وما تنساش إنك مموتله تلاتة من رجالتـه.

ارتسمت ابتسامة صغيرة على شفتي فريد.

ابتسامة غامضة.

وقال:

ـ متقلقش.

المرة دي هنتفق.

لم تعجب الجيار تلك الابتسامة.

أبدًا.

لأنها كانت تعني أن فريد يخطط لشيء ما.

وفي تلك اللحظة...

اهتز هاتف فريد.

نظر إلى الشاشة.

زاد.

صمت لثانية.

ثم أجاب:

ـ أيوة.

جاءه صوتها مترددًا:

ـ كنت عايزة أستأذنك في حاجة.

واصل سيره دون أن يتوقف.

ـ في إيه؟

ـ كنت بفكر أروح عند بابا كام يوم.

أغير جو شوية.

وأرجع.

ساد الصمت لثوانٍ.

بينما واصل فريد السير.

يفكر في الشحنة.

وفي الزيات.

وفي الرجل الملثم.

وفي رضوان.

وفي عشرات الأمور الأخرى.

أما طلب زاد...

فلم يكن يحتل ولو مساحة صغيرة من اهتمامه الآن.

لذلك جاء رده باردًا.

مختصرًا.

وخاليًا من أي انفعال:

ـ روحي.

تفاجأت زاد.

ـ بجد؟

ـ أيوة.

ولو خلصتي؟

تجمدت ابتسامتها قليلًا.

ـ آه... شكرًا.

ـ تمام.

وأغلق الخط.

ببساطة.

دون أن يضيف كلمة أخرى.

أنزل الهاتف من أمام أذنه.

ثم أعاده إلى جيبه.

ومضى في طريقه كأن المكالمة لم تحدث أصلًا.

أما الجيار...

فنظر إليه بطرف عينه.

دون أن يقول شيئًا.

بينما ارتسمت فوق شفتي فريد ابتسامة باهتة.

باردة.

لأن ذهنه كان منشغلًا بشيء آخر تمامًا.

شيء أخطر بكثير من رحلة زاد إلى بيت والدها.

************

في الناحية الأخرى من المدينة...

كان رضوان يقف في منتصف المكتبة، بعد أن تواصل معه موسى عبر الهاتف فور اكتشافه أن القفل قد عُبث به.

ولم تمضِ سوى دقائق حتى كان كريم وعصام قد وصلا أيضًا.

كانت عينا رضوان تجولان بين الأرفف المبعثرة.

الكتب متناثرة فوق الأرض.

بعض الأدراج مفتوحة.

والأوراق مبعثرة فوق المكتب الصغير.

مشهد كفيل بإزعاج أي صاحب مكان.

أما هو...

فكان يحاول استيعاب ما يراه بهدوء.

وقف عصام إلى جواره وهو ينظر حوله باستغراب.

وقال:

ـ غريبة.

التفت رضوان إلى موسى وسأله:

ـ يعني ما لمحتش حد خرج من المكتبة؟ ولا حد من الجيران اللي سألتهم شاف أي حاجة غريبة؟

هز موسى رأسه سريعًا.

ـ والله يا أستاذ رضوان، أنا جيت لقيت الباب كده. ناديت كذا مرة، ولما محدش رد دخلت. وأول ما شوفت المنظر كلمتك. حتى الجيران... ما فيش أي حد منهم...يعرف أي حاجة.

انحنى رضوان والتقط أحد الكتب من الأرض، ثم نظر إلى بقية الكتب المبعثرة.

كان المشهد مستفزًا أكثر مما توقع.

فالمكتبة لم تكن مجرد محل يبيع فيه الكتب.

بل مكانًا تعب في تأسيسه.

ورتب كل ركن فيه بيده.

أما عصام...

فكان يتلفت حوله بدهشة، قبل أن يضع يديه على خصره ويقول:

ـ لا حول ولا قوة إلا بالله! هو الحرامي ده كان بيسرق ولا بيعمل جرد سنوي للمكتبة؟! ده ناقص يراجع العهدة!

 

ـ ردّ كريم بصوت واطي، وهو بيحاول يكتم ضحكته:

ـ ويمكن كان بيدوّر على ضميره، اللي واضح إنه مش لاقيه من زمان!

لكن سرعان ما انتبه لحجم الفوضى التي أحدثها الحرامي، فرمق عصام بنظرة جانبية، ثم قال:

ـ ياشيخ إحنا في إيه ولا إيه، الراجل مش ناقصك.

ـ يا عم ما أنا مستغرب! يعني لو داخل تسرق، خد اللي إنت عايزه وامشي. إنما يقلب المكتبة من فوقها لتحتيها كده؟

لم يستطع كريم منع ابتسامة صغيرة من الظهور على وجهه.

وقال:

ـ هو إنت عايزه يسرق، ويرصّ ويروق ويكنس ويقفّل المحل، ويسلّم المفتاح لرضوان وهو ماشي؟!

التفت إليه عصام مستنكرًا:

ـ أممم، واضح إنك خبير في شغلهم. أهو الواحد يتعلم منك!

خبطه كريم في كتفه بخفة، ثم جذبه من ذراعه ناحية الأرفف، قائلًا:

ـ طب يلا يا عم الخبير، ساعدنا بدل ما إنت واقف تتريق!

فتحركوا بين الأرفف، وأخذ كل منهم يتفقد ما حوله.

فتح رضوان الأدراج.

وراح يراجع محتويات المكتب.

بينما راح كريم يتأكد من سلامة بقية المقتنيات.

وأخذ عصام يرفع الكتب عن الأرض ويضعها فوق أقرب طاولة.

وبعد دقائق...

فتح رضوان الدرج الذي اعتاد أن يحتفظ فيه بهاتفه.

فتوقف مكانه.

وقال:

ـ التليفون مش موجود.

التفت إليه كريم فورًا.

ـ تليفونك إنت؟

ـ تليفون المكتبة يا كريم.

واصل رضوان تفقد الأدراج.

ثم زفر بضيق حين تذكر المبلغ الذي تركه من إيراد اليوم السابق.

ـ وإيراد امبارح كمان اتاخد.

رفع عصام رأسه بسرعة.

ونظر إليه بصدمة مصطنعة:

ـ إيراد امبارح كمان؟! يا نهار أبيض! ده الحرامي طلع داخل على طمع!

حدق فيه كريم باستنكار.

ـ طمع إيه يا أهبل؟ ده حرامي، مش داخل يعتكف في العشر الأواخر!

اقترب عصام من رضوان.

وربت على كتفه بأسى مبالغ فيه.

ـ معلش يا رضوان. التليفون والقرشين يعوضهم ربنا... بس إنت محظوظ على فكرة!

نظر إليه رضوان بعدم تصديق.

ـ محظوظ؟!

ـ أيوه يا أخي! أمال لو كان دخل سرق الكتب كلها كنت هتعمل إيه؟ ده الواد واضح إنه مقدّر قيمة الثقافة، وسابلك البضاعة! إنت ما تعرفش كيلو الورق بكام دلوقتي؟ حرامي متخلف!

ضرب كريم كفًا بكف وقال:

ـ يا ابني حرام عليك! هو إنت جاي تُقف معانا ولا جاي تحط علينا؟ ولا نظامك إيه بالظبط؟ أنا بقول ترجع على بيتك يا عصام، شكلك مطبّق من امبارح.

رد عصام بغيظ مصطنع:

ـ ده بدل ما تقدر إني بحاول أرفع معنوياته، بتتريق عليّا! ناس ما تعرفش قيمة الصحبة.

ثم التفت كريم إلى رضوان وأضاف بجدية لم تخلُ من السخرية:

ـ بس تصدق عندي تفسير منطقي للموضوع ده.

عقد رضوان حاجبيه.

ـ إيه هو يا كريم؟

اقترب كريم منه قليلًا.

وخفض صوته كأنه يكشف سرًا خطيرًا.

ـ الحرامي عرف إنك لسه قابض جمعية، فقال ياخد النسبة بتاعته!

نظر رضوان إليهما بنفاد صبر.

لكنه لم يستطع منع ابتسامة خاطفة من الظهور على وجهه.

ـ يا جدع منك ليه! أنا مكتبتي اتقلبت فوق دماغي، وإنتوا واقفين تتسلّوا! هو أنا مجمعكم على قهوة؟! بدل ما تساعدوني، قاعدين تحلّلوا شخصية الحرامي!

رفع عصام يديه مستسلمًا.

ـ خلاص يا سيدي، أهو بنهوّن عليك! ما هو لو النكد بيرجّع الفلوس، كنا قعدنا نلطم للصبح.

ابتسم رضوان رغمًا عنه.

لكنه سرعان ما عاد يتأمل المكان حوله.

في الحقيقة...

أزعجه ما حدث.

ليس بسبب الهاتف.

ولا بسبب المال.

فكلاهما يمكن تعويضه.

لكن فكرة أن شخصًا غريبًا دخل المكان في غيابه، وعبث بكل شيء بهذه الطريقة، كانت مستفزة بصورة لم تعجبه.

ومع ذلك...

لم يكن من النوع الذي يقف طويلًا أمام الخسائر الصغيرة.

تنهد بهدوء.

ثم أكمل تفقد المكان.

وبعد دقائق تأكد أن المفقودات تقتصر على هاتف المكتبة وإيراد اليوم السابق.

قال كريم بجدية:

ـ بص يا رضوان، لازم نعمل محضر. مينفعش نسيب الموضوع كده، خصوصًا إن القفل مكسور والمكان متبهدل بالشكل ده.

أيده عصام هذه المرة دون مزاح:

ـ عنده حق. نعمل محضر، حتى لو اللي اتاخد مش مبلغ كبير. يمكن يكون نفس الشخص سرق أماكن تانية، ولازم يبقى فيه بلاغ.

هز رضوان رأسه وهو ينظر إلى الكتب المنتشرة حوله.

ـ يا جماعة، الكتب كلها موجودة، ومفيش حاجة تانية اتاخدت. هو تليفون والإيراد، مبلغ بسيط يعني، الحمد لله إنها جت على قد كده،وربنا يعوض عليّا.

اعترض كريم:

ـ مش حكاية مبلغ يا رضوان. حكاية إن حد دخل مكانك واتجرأ وسرق.

تنهد رضوان ثم قال:

ـ فاهمك. بس مش عايز أكبر الموضوع. هنرتب المكان، وأهو نغير القفل ونخلص.

أشار عصام إلى الباب وقال:

ـ ماشي، بس القفل ده يتغير حالًا. مش هنستنى لما الحرامي يرجع ياخد شاحن التليفون اللي نسيه المرادي!

ضحك موسى بخفة.

بينما هز رضوان رأسه بيأس من تعليقاتهما.

ثم رفع عينيه نحو واجهة المكتبة.

رفع موسى رأسه متسائلًا:

ـ هو مش كان في كاميرات قدام المكتبة؟

حرك رضوان رأسه.

ـ أيوه... بس بقالها فترة بايظة.

نظر عصام إلى أعلى الواجهة، حيث بدت آثار التثبيت القديمة واضحة.

ثم التفت إلى رضوان.

ـ بايظة إزاي والكاميرات مش موجودة أصلًا؟

أجاب رضوان وهو يشير إلى جانب المكتبة:

ـ عارف... المشكلة إن يافطة المكتبة وقعت في الشتا اللي فات. المطر كان شديد جدًا، ولما اليافطة وقعت شدت معاها الكاميرات. ومن ساعتها ما ركبتش أي حاجه.

اتجهت أنظارهم جميعًا نحو اليافطة القديمة.

المسندة إلى الجدار منذ شهور.

وكأنها تنتظر من يعيدها إلى مكانها.

قال كريم بأسف:

ـ يعني لا يافطة ولا كاميرات! إنت سايب المكتبة على البركة يا رضوان؟

رد رضوان بهدوء:

ـ ما هو الواحد بيبقى وراه ألف حاجة يا كريم، وكل مرة أقول هظبطها وأنسى. وبعدين المكتبة على الشارع الرئيسي، ما كنتش متخيل إن حد يدخل يعمل كل ده.

قال عصام وهو ينظر إلى الشارع من خلف الزجاج:

ـ يا عم، الشارع الرئيسي ده الناس فيه رايحة جاية طول الوقت. بس مفيش كاميرات عندنا نقدر نعرف منها مين دخل ومين خرج. يعني لا هنعرف وش الحرامي، ولا حتى راح فين.

ثم التفت إلى رضوان وأضاف بنبرة مازحة:

ـ عوضك على الله بقى يا رضوان. مع إنه حرامي غبي والله... بقى حد يسيب الكتب ويسرق تليفون ما يعملش خمسمية جنيه؟

ضحك كريم.

وضحك موسى أيضًا.

وخف التوتر قليلًا بعدما بدأوا يتعاملون مع الموقف بروحهم المعتادة.

لكن موسى، الذي ظل يتأمل المكتبة المبعثرة، بدا وكأنه يفكر في شيء آخر.

التفت إلى رضوان وقال:

ـ على فكرة يا أستاذ رضوان... إحنا خدنا الإجازة، وكنت بدور على شغل اليومين دول. لو إنت محتاج حد يقف في المكتبة ويساعدك، أنا ممكن أمسكها. وخلي بالي منها والله... أحطها في عيني.

نظر إليه رضوان باهتمام.

كان يفكر بالفعل في حاجته إلى شخص يعتمد عليه.

خصوصًا مع انشغاله بالمصنع.

وتجهيزات شقيقته.

لكنه لم يكن قد حسم الأمر بعد.

أما الآن...

فقد بدا اقتراح موسى مناسبًا للغاية.

ابتسم وقال:

ـ والله فكرة يا موسى.

اتسعت عينا الصغير فورًا.

ـ بجد؟

ـ أيوه. خلاص، من بكرة إنت تمسك المكتبة.

ولم ينتظر موسى حتى ينتهي من كلامه.

بل رد بحماس:

ـ من بكرة ليه بس يا أستاذ رضوان؟! ليه مش النهارده؟

ضحك رضوان من اندفاعه.

ـ يا ابني، إنت شايف المكتبة عاملة إزاي؟ دي عايزة يوم كامل علشان أرص الكتب دي كلها. وأرجع كل حاجه فيها زي ما كانت.

اقترب موسى وقال بحماس أكبر:

ـ ما تشيلش هم حاجة! هجيب صحابي ونروق المكان كله، ونرجع الكتب مكانها ونرتب الأرفف. بس إنت هتفهمني الأول كل كتاب مكانه فين، ونظام الترتيب عندك إيه. علشان ما أجيش أحط كتب التاريخ جنب الروايات وألبس في الحيط!

ضحك كريم وقال:

ـ أهو ده الكلام! الواد موسى ده راجل، وداخل على الشغل من أوسع أبوابه. وأهو سبحان الله، الرزق بينادي صاحبه. لو ما كانش حصل كده، ما كانش موسى هيمسك الشغل من النهارده، ولا إيه يا رضوان؟

ابتسم رضوان.

وقد أعجبه حماس موسى وحرصه على التعلم.

وقال:

ـ موسى راجل من صغره ويُعتمد عليه.

ثم أشار إليه بإصبعه مضيفًا:

ـ وأنا هسلمك المكتبة يا موسى... بس اعمل حسابك، مش عايز شباب يقفوا قدام المكتبة. ده مكان أكل عيش، فاهم يا موسى؟

حرك موسى رأسه فورًا.

ـ ما تخافش يا أستاذ رضوان. أنا عارف نظام الشغل هنا كويس قوي. وعارف إنك ما بتحبش أي حاجة تعدي الأصول. وإنت لسه قايل إني راجل يُعتمد عليه... ما تقلقش.

وفي تلك اللحظة...

رفع عصام كتابًا من الأرض.

وتأمل غلافه بتركيز مصطنع.

ثم قرأ عنوان مزيف من تأليفه بصوت مسموع:

«كيف تسرق مكتبة وتنسى كيف تسرق الكتب؟!»

ثم رفع عينيه نحو رضوان.

ـ يا خسارة يا جدع! ده لو كان قرأ الكتاب ده قبل ما ييجي، كان زمانه نسف المكتبة من غير ما يسيب دليل على غبائه!

انفجر كريم ضاحكًا.

بينما التفت إليه رضوان وقال بغيظ مصطنع:

ـ يا أخي غور من وشي! هو إنت هتعملي فيها معلّق رياضي؟

ضحكوا جميعًا.

ثم بدأوا يجمعون الكتب ويرتبونها.

بينما انشغل موسى بالاتصال بأصدقائه ليأتوا ويساعدوه في إعادة المكتبة إلى هيئتها المعتادة.

أما رضوان...

فقد قرر أن يتعامل مع ما حدث باعتباره خسارة بسيطة يمكن تجاوزها.

شيئًا مزعجًا بلا شك...

لكنه لا يستحق أن يعطل حياته أو يشغله طويلًا.

************

بعد ساعات...

توقفت السيارة أمام منزل حسين المالكي.

وما إن ترجلت زاد منها بصحبة قاسم وعواطف...

حتى انفتح الباب الخارجي بسرعة.

وخرج حسين بنفسه.

وفي الوقت نفسه...

تقدم أحد أفراد الحراسة نحو السيارة.

وفتح الصندوق الخلفي.

ثم التقط الحقائب واتجه بها إلى الداخل بخطوات هادئة ومنظمة.

كان رجلًا ضخم البنية.

عريض المنكبين.

وتبدو الجدية سمة ثابتة في ملامحه.

يُدعى زيدان.

وصل إلى جوار حسين بالحقائب.

ثم قال باحترام:

ـ شنط مدام زاد يا باشا.

ربت حسين على كتفه بخفة.

وقال:

ـ تمام يا زيدان.

روح شوف شغلك إنت.

أومأ زيدان برأسه فورًا.

ـ تحت أمرك يا باشا.

ثم ابتعد بهدوء.

وعاد إلى موقعه المعتاد بين أفراد الحراسة.

أما حسين...

فكانت عيناه معلقتين بابنته.

وبمجرد أن وقعت عيناه عليها...

اتسعت ابتسامته.

ـ زاد!

أسرعت نحوه.

ففتح ذراعيه لها فورًا.

واحتضنها بحنان شديد.

ثم ابتعد قليلًا يتأملها.

وكأنه يتأكد بعينيه أنها بخير.

ـ نورتيني يا حبيبتي.

والله لما عواطف قالتلي إنكوا جايين تقضوا معايا كام يوم... ما صدقتش.

ابتسمت زاد.

وشعرت بشيء دافئ يسري داخل صدرها.

شيء افتقدته منذ فترة طويلة.

ـ وإنت كمان وحشتني أوي يا بابا.

ربت حسين على وجنتها بحنان.

ـ أنا طلبت من الشغالين يعملوا كل الأكل اللي بتحبيه.

ضحكت زاد رغمًا عنها.

ـ يا حبيبي يا بابا... ربنا ما يحرمنيش منك.

وآسفة إني ما شوفتكش لما جيتلي.

بس كنت تعبانة خالص.

هز حسين رأسه فورًا.

ـ أيوة يا حبيبتي.

أنا عارف.

أنا شوفتك بنفسي.

والله كنت عايز أخدك للدكتور في وقتها.

بس فريد أصر إنه يبعتلك الدكتور لحد الفيلا.

ثم تأملها بقلق أبوي صادق.

ـ طمنيني عليكي.

عاملة إيه دلوقتي؟

ابتسمت له.

ـ الحمد لله.

بقيت أحسن بكتير.

إنت اللي عامل إيه يا بابا؟ طمني عليك.

اتسعت ابتسامته أكثر.

ـ أنا زي الفل دلوقتي.

طول ما إنتِ قدامي كده أبقى زي الفل.

في تلك اللحظة...

كان قاسم يقف جوارهما يتابع الحديث في صمت.

فانحنى حسين نحوه.

ـ إزيك يا قاسم يا حبيبي؟

ضحك الطفل فورًا.

وقال:

ـ كويس ياجدو.

قبل حسين خده بحب.

ثم نظر إلى زاد قائلًا:

ـ إيه رأيك يا زاد؟

ناخد سي قاسم ده ونروح الملاهي؟

ونفسحه شوية؟

ضحكت زاد.

ـ والله فكرة حلوة أوي يا بابا.

أوي.

هز حسين رأسه بثقة.

ـ خلاص.

سيبي كل حاجة عليّا.

طول ما إنتِ قاعدة هنا...

هخليكي ترجعي بنت ستاشر سنة.

اتسعت ابتسامتها.

ثم اقتربت منه.

وأسندت رأسها فوق كتفه كما كانت تفعل قديمًا.

ـ حبيبي يا بابا.

ربنا ما يحرمنيش منك.

أغمض حسين عينيه للحظة.

وقبل رأسها بحنان.

ثم قال بصوت دافئ:

ـ ولا يحرمني منك يا حبيبة أبوكي.

سادت لحظة هادئة.

بسيطة.

لكنها كانت كافية لتجعل زاد تشعر للمرة الأولى منذ مدة...

أنها عادت ابنة حسين المالكي فقط.

لا شيء أكثر.

ابنة آمنة في بيت أبيها.

********

كانت «حبيبة» تجلس في غرفة الأطباء، وقد وضعت أمامها بعض الملفات التي يفترض أن تراجعها قبل انتهاء نوبتها، لكنها منذ عدة دقائق لم تتجاوز الصفحة نفسها.

كانت عيناها معلقتين بالكلمات، بينما عقلها في مكان آخر تمامًا.

أسبوعان.

أربعة عشر يومًا فقط، وبعدها سيعود «فارس» إلى مستشفاه الخاصة، وتعود هي إلى رؤيته على فترات متباعدة، وفقًا لجدول عمله وانشغالاته التي لا تنتهي.

لم تكن تملك حق الاعتراض.

فهي تعرف طبيعة عمله، وتدرك أنه لا يستطيع ترك مسؤولياته إلى أجل غير مسمى.

لكنها، رغم كل ذلك، لم تستطع منع نفسها من الشعور بالضيق.

أغلقت الملف أمامها.

ثم أسندت ذقنها إلى كفها.

وأطلقت تنهيدة طويلة.

ـ مالك يا دكتورة؟ حيرانة ومضايقة كده ليه؟ ولا اكتشفتي إن الطب مهنة متعبة؟

رفعت رأسها بسرعة.

لتجد «فارس» واقفًا عند الباب، يراقبها بابتسامة صغيرة.

اعتدلت في جلستها.

وسحبت الملف نحوها من جديد.

ـ مفيش حاجة. إنت مش المفروض في عيادة الكشف؟

دخل وجلس على المقعد المقابل لها.

ـ خلصت. بس واضح إن حضرتك عندك حالة محتاجة تدخل عاجل.

ضيقت عينيها باستنكار مصطنع.

ـ حالة إيه إن شاء الله؟

ـ حالة سرحان مزمن، مصحوبة بتنهيدات متكررة، ورفض غير مبرر للتعامل مع الأوراق المسكينة دي.

ابتسمت رغمًا عنها.

ثم أخفت ابتسامتها وهي تعود إلى أوراقها.

ـ شوف شغلك يا دكتور وسيبك مني.

ـ ما أنا جيت أشوف شغلي أهو.

ـ يا سلام! بقيت بتعتبرني من شغلك؟

مال برأسه قليلًا متأملًا إياها.

ـ إنتِ مش من شغلي يا حبيبة... إنتِ الحاجة الوحيدة اللي كل ما أشوفها أعرف إن يومي هيعدي كويس.

توقفت أصابعها فوق الملف.

لم تكن تتوقع أن يقولها بهذه البساطة.

فرفعت عينيها إليه.

وحاولت أن تحتفظ بتعبيرها الهادئ.

لكن ابتسامتها الصغيرة فضحتها.

لاحظ فارس ذلك فابتسم بدوره.

ـ أهو الحمد لله رجعنا نضحك. قوليلي بقى... إيه اللي كان مضايقك؟

هزت رأسها نافية.

ـ مفيش.

ـ حبيبة.

نطقه لاسمها وحده جعلها ترفع عينيها إليه مجددًا.

ـ نعم؟

ـ أنا بسألك لأني بعرفك من نظرة. ومتأكد إن في حاجة مضايقاكي... قوليلي.

عبثت بطرف الورقة أمامها.

ثم قالت بعد تردد:

ـ إنت فاضلك أسبوعين هنا... صح؟

أومأ برأسه.

وفهم أخيرًا ما كانت تحاول إخفاءه طوال الحديث.

فقال بمكر:

ـ أيوه، وبعدها هرجع للمستشفى بتاعتي. ليه؟

حاولت أن تبدو غير مبالية وهي تجيب:

ـ عادي... بسأل.

ظل ينظر إليها لثوانٍ.

ثم مال إلى الخلف في مقعده.

ـ عشان كده بقى؟

عقدت حاجبيها.

ـ عشان إيه؟

ـ عشان فاضلي أسبوعين وأمشي.

رفعت كتفيها بحركة عابرة.

ـ كده كده كنت هتمشي فعلًا، إيه المشكلة؟

لم يجبها فورًا.

بل اكتفى بمراقبة محاولتها الواضحة لإنهاء الحديث.

قبل أن يقول:

ـ طب ما إنتِ عارفة من الأول إني مش هفضل هنا على طول.

ـ عارفة.

ـ وعارفة إني عندي مسؤوليات لازم أرجعلها.

ـ عارفة يا فارس. ما أنا مش معترضة على شغلك.

ـ أومال؟

سكتت.

كانت تعرف أن اعتراضها لن يغير شيئًا.

وأنه لن يتخلى عن مسؤولياته من أجل أسبوعين إضافيين.

لكنها لم تكن تريد أن تبدو وكأنها تطالبه بشيء لا يحق لها طلبه.

قالت أخيرًا وهي تنظر إلى الملف أمامها:

ـ أنا بس كنت فاكرة إن الوقت هيبقى أطول شوية.

اختفت ابتسامته تدريجيًا.

وحل محلها اهتمام حقيقي.

ـ أطول إزاي؟

رفعت عينيها إليه.

ثم قالت بصراحة لم تستطع إخفاءها هذه المرة:

ـ يعني... لما بتكون موجود هنا، بشوفك كل يوم. حتى لو مش بنتكلم كتير، وحتى لو كل واحد فينا مشغول في تخصصه، ببقى عارفة إنك قريب. إنما لما تمشي من هنا، هترجع تنشغل، ومش هنعرف نشوف بعض بنفس السهولة.

توقفت لحظة.

ثم أضافت بسرعة، وكأنها تحاول التراجع عن اعترافها:

ـ بس عادي طبعًا. إنت كنت جاي هنا مؤقتًا، وأنا فاهمة ده كويس.

ظل فارس صامتًا لثوانٍ.

لكنه شعر بشيء من الدفء وهو يستوعب أنها، من دون أن تقصد، اعترفت له بأنها أصبحت تتعلق بوجوده في تفاصيل يومها.

ورغم قلة اعترافها الصريح له بحبها...

فإن ما رآه في عينيها الآن كان كافيًا ليجعله يشعر أن كل ما يفعله يستحق العناء.

داهمه حنين مفاجئ إليها.

لكنه سرعان ما استعاد رباطة جأشه.

وقال بهدوء:

ـ طب ما تقولي كده من الأول... إنك مش قادرة على بُعدي.

ضحكت رغمًا عنها.

ثم دفعته بخفة.

ـ إنت مستفز على فكرة.

ـ عارف.

ـ وواثق من نفسك أوي.

ـ دي كمان عارفها.

هزت رأسها بيأس مصطنع.

بينما اتسعت ابتسامته.

ثم اعتدل في جلسته وقال بنبرة أكثر جدية:

ـ بصي يا حبيبة، أنا مش هكدب عليكي وأقولك إني هرجع ألاقي وقت فاضي طول اليوم زي دلوقتي. إنتِ عارفة طبيعة شغلي. هكون بين المستشفى والشركة. وأنا مش عايز أوعدك بحاجة وأرجع أخلف وعدي.

انطفأت ابتسامتها قليلًا.

لكنه أكمل قبل أن تفسر كلامه على نحو آخر:

ـ بس ده مش معناه إنك هتشوفي وشي كل أسبوع مرة. أنا أصلًا ما أقدرش أبعد عنك الفترة دي كلها.

ابتسمت وقالت:

ـ لما نشوف يا سيادة الدكتور.

أسند يديه على المكتب أمامها.

ونظر في عينيها مباشرة.

وقال:

ـ وبعدين يا ستي، إنتِ مفكرة إني هسيبك مستمرة في شغلك هنا على طول؟

رفعت حبيبة عينيها إليه باستغراب.

ـ مش فاهمة.

ابتسم فارس بثقة.

ـ طبيعي أول ما تخلصي فترة تدريبك، هتاخدي حاجتك وتيجي تشتغلي معايا في المستشفى.

ـ لأ طبعًا، مش هينفع!

ـ لأ، هينفع. ما هو مش معقول يبقى عندك مستشفى كاملة تحت تصرفك وتروحي تشتغلي بره!

ضيقت عينيها بمكر.

ـ مستشفى كاملة تحت تصرفي أنا؟!

ابتسم فارس وهو ينظر إليها.

ـ أمال هتبقى تحت تصرف مين؟ دي مش بس المستشفى بتاعتي يا حبيبة. ده مكانك اللي عايز أشوفك بتكبري فيه وتحققي كل اللي بتحلمي بيه. وبعدين أنا مش هبقى مطمن على قسم الأطفال غير لما أعرف إن أحسن دكتورة فيه هي إنتِ.

ابتسمت حبيبة رغمًا عنها.

ثم قالت بمشاكسة:

ـ أحسن دكتورة مرة واحدة؟! ده إنت بتوزع مجاملات بالجملة يا دكتور!

ضحك فارس وقال بمكر:

ـ معاكي إنتِ بالذات، أنا مش بجامل يا دكتورة، أنا بقول الحقيقة.. ودي مشكلتي معاكي، إنك حلوة لدرجة بتخليني أقول كلام عمري ما قلته لحد قبلك.

ابتسمت حبيبة وهي تنظر إليه بحب، وقالت بهدوء:

ـ بدعي من قلبي...يفضل قلبك حلو كده معايا على طول.

ابتسم فارس، محاولًا إخفاء ما أثارته كلماتها في نفسه، ثم نهض من مقعده وقال:

 ـ احم.... عندك شغل تاني ولا خلصتي؟

أغلقت حبيبة الملف أمامها.

ثم وقفت بدورها.

ـ لا، خلصت.

ـ تمام. يلا أوصلك.

رفعت حاجبها.

ـ مش ضروري. هكلم رضوان ييجي ياخدني.

زفر فارس بضيق مصطنع.

ـ حبيبة...

ـ نعم؟

ـ إنتِ بجد بقيتي متعبة الفترة الأخيرة. يلا أوصلك، وندردش شوية في الطريق.

تسللت ابتسامة صغيرة إلى شفتيها.

ثم التقطت حقيبتها.

ـ ماشي.

---

بعد دقائق...

كانا يجلسان داخل السيارة.

ينطلقان وسط زحام الظهيرة.

ساد الصمت للحظات.

قبل أن يقول فارس:

ـ ما فيش جديد في موضوع المكتبة؟

تغيرت ملامح حبيبة فورًا.

وتنهدت بضيق.

ـ ما تفكرنيش يا فارس.

كل ما أفتكر الموضوع ده.... ببقى نفسي أجيب الحرامي ده وأشقه نصين.

انفجر ضاحكًا.

ـ تشقيه نصين مرة واحدة؟ وأنا موجود؟

التفتت نحوه.

ـ آه. وفيها إيه؟! ده ربنا هيولع فيه إن شاء الله.

ـ يا ستي ما أنا قلت لأخوكي رضوان نعمل محضر وندور عليه.

وكنت واثق إننا هنوصله.

بس أخوكي اللي رفض.

هزت رأسها.

ـ أصل رضوان أخويا..مسالم جدًا.

ما بيحبش المشاكل.

اختفت ابتسامة فارس قليلًا.

ثم ألقى عليها نظرة جانبية.

ـ إنتِ متأكدة إن رضوان مسالم؟

التفتت نحوه باستغراب.

ـ ليه بتقول كده؟

عندك شك؟

حرك كتفيه بخفة.

وتوقف بالسيارة أمام الإشارة.

ـ مش عارف.

بس حاسس إن كلمة "مسالم" مش لايقة على رضوان.

عقدت حاجبيها.

ـ مش فاهمة.

ـ يعني حاسس إن فيه قوة تانية خالص جواه.

غير الصورة اللي بيظهر بيها للناس.

ظلت تنظر إليه لحظة.

ثم قالت:

ـ تقصد إيه؟

إن رضوان بيمثل يعني؟

 أخويا مش بوشين يا فارس.

ضحك فورًا.

ـ لا يا بنتي!

إنتِ رُحتي بخيالك لحتة بعيدة جدًا.

أنا بتكلم في المطلق.

حسيت إنه شخص أقوى بكتير من غير ما يبين.

بس كده.

عقدت ذراعيها أمام صدرها.

ـ وفر إحساسك لنفسك. محدش قالك تحس...

أخويا رضوان أطيب واحد في الدنيا.

وما يحبش يعمل مشاكل.

ابتسم فارس مستسلمًا.

ـ خلاص يا ستي.

ما تزعليش.

هو أنا شتمت الراجل؟

وبعدين أنا وهو أصحاب على فكرة.

يعني اطلعي إنتِ منها بس، وهى هتعمر.

لوت فمها.

ـ خلاص. ياخويا طلعت منها.

بص بقى...

إنت ضايقتني دلوقتي. رفعت ضغطي.

نظر إليها فارس لثوانٍ.

ثم قال بجدية مصطنعة:

ـ فيها شاورما؟

اختفى العبوس فورًا.

وحلت محلها ابتسامة واسعة.

ـ ليك مستقبل معايا والله.

ضحك.

ـ يعني فيها؟ وكمان بطاطس.

ـ لأ وماشاء الله عليك.... لماح.

هز رأسه بفخر.

ـ كنت حاسس.

ابتسمت وهي تنظر أمامها.

ـ كويس إنك عارف.

أنا بحب جدًا الشخص اللي يفهمني من غير ما أتكلم.

نظر إليها لحظة قصيرة.

قبل أن يقول بصوت أكثر دفئًا:

ـ ومش بس كده... نحبس بـ البيبسي كمان؟

ضحكت حبيبة.

ـ أيوة كده.

إنت كده فعلًا بدأت تفهمني... مش بقول ليك مستقبل معايا..

هز رأسه بفخر أكبر.

ـ أهو الواحد بيتعلم. لازم يمشي حاله معاكم.

---

بعد دقائق...

أوقف فارس السيارة أمام أحد المطاعم.

ثم التفت إليها.

ـ تحبي ننزل نتغدى جوه في المطعم؟

هزت رأسها فورًا.

ـ لا.

مش هقدر أنزل بصراحة.

عايزة آكل وأنام.

ابتسم.

ـ واضح فعلًا.

ـ هاتلي الأوردر بتاعي واتكل على الله على بيتكم.

رفع حاجبه.

ـ بيتنا؟

اتسعت عيناها.

ـ قصدي لو عايز تروح يعني.

ثم فكرت للحظات.

وأضافت:

ـ لا استنى.

عندي فكرة أحسن.

ـ قولي.

ـ هات الأكل ونطلع على المكتبة.

نتغدى مع رضوان.

وأرجع أنا البيت. وأنت أتكل..

نظر إليها فارس بصدمة مصطنعة.

ـ حبيبة...

ـ نعم؟

ـ إنتِ بتطرديني؟

انفجرت ضاحكة.

ـ والله أبدًا.

بس إنت ما تعرفش السر...

- عرفيني ياترى إيه السر الفظيع اللي يخليكي مهيبره كده.

ـ طول ما أنا جعانة... مفيش بربع جنية تركيز. تقولش سكري بيتحرق..

هز رأسه.

ـ لا.

ده أنا شكلي داخل على مخاطرة.

بصراحة لما بتجوعي بتفقدي نص عقلك.

شهقت معترضة.

ـ نص عقلي إيه؟

أنا بفقده كله.

فتح عينيه على اتساعهما.

ـ يا ساتر...

ثم نزل من السيارة وهو يضحك.

وأشار إليها من الخارج.

ـ استنيني هنا.

هجيب الأوردر.

ونطلع على رضوان. أنا هتصل عليه... اوكي!

ضحكت وهي تتابعه بعينيها.

بينما اتجه هو نحو المطعم. وهو يتحدث عبر هاتفه..

واكتفت حبيبه بالاستناد إلى المقعد خلفها.

والابتسامة ما تزال مستقرة فوق شفتيها.

لأن بعض اللحظات...

تكفي وحدها لتجعل اليوم أجمل.

**********

ومع مرور الساعات...

انسحب وهج النهار تدريجيًا.

وأخذت الشمس رحلتها الأخيرة خلف الأفق.

حتى ابتلعت العتمة المدينة شيئًا فشيئًا.

وأضاءت الأنوار طرقاتها وشوارعها.

بينما كانت أماكن أخرى...

بعيدة عن أعين الجميع.

تستعد لأحداث من نوع مختلف تمامًا.

**********

في قلب الصحراء المترامية الأطراف، حيث الصمت لا يقطعه سوى حفيف الرياح المحملة بالرمال، كانت أربع سيارات دفع رباعي سوداء، معتمة النوافذ بالكامل، تصطف في تناغم مهيب.

أما المكان فكان محطة قطار قديمة مهجورة، تحولت جدرانها المتآكلة إلى شواهد صامتة على صفقات مظلمة تُحاك بعيدًا عن أعين الجميع.

على بعد خطوات، جلس الزيات فوق مقعد جلدي فاخر أُحضر خصيصًا له، محاطًا بطوق بشري من عشرة رجال مدججين بالسلاح.

كانت وجوههم مكشوفة بلا خوف، فهم يعلمون أنهم يحمون صاحب النفوذ الحقيقي هنا، الرجل الذي تمتلئ حقائبه بأموال طائلة تنتظر استلام البضاعة.

 

وفجأة...

شق صوت محركات السيارات المكان.

توقفت السيارات تباعًا.

وترجل فريد الشامي من سيارته بخطوات ثابتة وبطيئة عمدًا، مرتديًا بدلة سوداء كاملة تفوح منها فخامة طاغية، فيما فرض طوله الفارع وعرض منكبيه هيبة مرعبة على المكان.

أما القفاز الجلدي الأسود الذي لم يفارق يديه يومًا، فكان يزيده برودة وغموضًا.

وترجلت من خلفه سما، التي اعتادت مرافقة بعض الصفقات الكبرى.

هبطت بهدوء وثبات، مرتدية بنطالًا جلديًا أسود يلتف حول قوامها برشاقة، وسترة عملية قاتمة تلائم طبيعة المهمة، بينما راحت عيناها تمسحان المكان بيقظة تامة.

وعلى مسافة قريبة، وقف الجيار إلى جوار تايسون يتبادلان حديثًا مقتضبًا، بينما ظل الأخير يتفحص الموقع بعينين يقظتين.

كانت ملامحه خشنة، وجسده الضخم يوحي بقوة لا يستهان بها، أما الجيار فاحتفظ بهدوئه المعتاد، يراقب محيطه بحذر وكأنه لا يريد أن تفوته حركة واحدة.

نظر الزيات إليهم.

ثم ابتسم ابتسامة امتزجت فيها السخرية بالجدية، وهو يشعل سيجارته ببطء وينفث دخانها في الهواء.

وقال بصوته الأجش:

ـ مش مصدق نفسي...

ثم تابع:

ـ فريد الشامي بنفسه! تواضع وتنازل وجِه بنفسه يسلّم البضاعة للعبد الفقير؟

اقترب فريد منه بخطوات هادئة.

ثم نفض كم سترته بإصبعيه فوق القفاز.

وتقدم حتى وقف أمامه بكل استقامته.

وقال بصوته البارد الهادئ الذي حمل استعلاءً واضحًا:

ـ علشان تعرف إني كريم يا زيات... ودي ما بعملهاش مع أي حد، عد الجمايل.

جز الزيات على أسنانه بغيظ خفي سرعان ما ابتلعه.

ثم لوّح بيده ببرود وقال:

ـ ماشي يا شامي... البضاعة جاهزة؟

ألقى فريد عليه نظرة حادة.

وثبت عينيه في عينيه بلا رمشة.

ثم أشار بإصبعين للجيار ورجاله ليتقدموا بالصناديق.

وبمجرد أن أستقر فريد في مكانه...

تقدم تايسون خطوة واحدة إلى الأمام.

ثم استقر خلفه مباشرة.

بمسافة محسوبة بدقة.

هادئًا.

صامتًا.

لكن وجوده وحده كان كافيًا ليفرض شعورًا غير مريح على من حوله.

وقف كالجدار.

عيناه تمسحان المكان بيقظة مستمرة.

وكل حركة تصدر في محيط فريد كانت تقع تحت مراقبته فورًا.

وكأن مهمته الوحيدة في العالم...

ألا يسمح لشيء بالوصول إليه.

بعدها أومأ فريد برأسه نحو الزيات.

فنهض الأخير، وتبعه اثنان من حرسه الخاص.

بينما بقي بقية رجاله في أماكنهم.

وأسلحتهم مرفوعة وموجهة نحو فريد ورجاله بحذر شديد.

اقترب الزيات.

وفُتحت صناديق السلاح.

وبدأ يمرر يديه وعينيه فوق محتوياتها، يفحص البضاعة بدقة بالغة.

وعلى الجانب الآخر، ظلت سما واقفة بجوار الجيار، تشبك ذراعيها أمام صدرها.

وكانت عينا الزيات ترتفعان نحوها بين الحين والآخر.

يتفحصها بنظرات لم يحاول إخفاءها تمامًا.

لاحظت سما ذلك.

فالتقت عيناهما للحظة.

ثم منحته ابتسامة صغيرة واثقة.

قبل أن تعيد نظرها نحو الصناديق، وكأن الأمر لا يعنيها في شيء.

أما الجيار...

فظل مترقبًا، يتنقل بنظراته بين الزيات وفريد.

مدركًا أن إتمام الصفقة لا يعني بالضرورة أن الجميع سيغادرون المكان بالهدوء نفسه الذي حضروا به.

وحين تأكد الزيات أن كل قطعة سلاح مطابقة للمواصفات، طرقع بأصابعه إشارةً لرجاله.

فتحركوا على الفور لإحضار حقائب الأموال الضخمة.

وقال بنبرة مقتضبة:

ـ كده تمام يا شامي... ودي فلوسك كاملة، بص عليها.

نظر إليه فريد مطولًا.

ثم ابتسم ببرود وقال:

ـ الدار أمان يا زيات... وده مش أول ولا آخر تعامل.

وما إن أنهى جملته حتى أطلق الزيات ضحكة قصيرة وقال:

ـ يا راجل، إنت كل فين وفين لما بتظهر!

على حين غرة...

تحرك فريد خطوتين سريعتين.

واقترب منه حتى أصبح بينهما بضعة سنتيمترات فقط.

ثم قال بنبرة خفيضة كفيلة بتجميد الدم في العروق:

ـ ما أنا علشان كده جاي.

سرى شعور مفاجئ بالقلق في صدر الزيات.

فهو يعرف جيدًا طباع فريد.

ويعرف أن الرجل لا يتحرك خطوة واحدة بلا هدف.

وفي اللحظة نفسها...

ارتفعت الأسلحة من الجانبين في جزء من الثانية.

رجال الزيات رفعوا بنادقهم.

ورجال فريد والجيار وتايسون صوبوا أسلحتهم بحركة متزامنة.

وكأن الحرب على وشك الاندلاع.

لكن فريد...

وبهدوء أعصاب يثير الأعصاب أكثر مما يطمئنها...

رفع يده مشيرًا بإشارته الخاصة.

فانخفضت أسلحة رجاله فورًا.

وحين رأى الزيات ذلك، زفر أنفاسه ببطء.

ثم أشار لحرسه بخفض أسلحتهم هم أيضًا.

وثبت عينيه في عيني فريد قائلًا بحذر:

ـ في كلام عايز تقوله... صح؟

حرك فريد رأسه إيجابًا ببطء.

ثم اقترب أكثر حتى كاد همسه يلامس أذن الزيات.

وقال:

ـ عايزك في شغل يا زيات.

عقد الزيات حاجبيه باستغراب:

ـ شغل؟! ما إحنا شغالين أهو!

ـ لأ... شغل تاني.

ـ شغل إيه؟

ـ آثار.

اتسعت عينا الزيات بصدمة حقيقية.

وابتعد عنه خطوة وهو يهتف:

ـ آثار؟! بس دي مش سكتك يا شامي!

رد فريد بابتسامة ثقيلة واثقة.

ثم أخرج سيجارة ببطء.

وأشعلها من خلف القفاز.

وأخذ منها نفسًا عميقًا قبل أن يقول:

ـ من اللحظة دي... كل حاجة بقت سكتي.

رفع الزيات حاجبه وقال:

ـ والمطلوب... حتة ولا اتنين؟

ضحك فريد ضحكة خافتة ومرعبة.

وقال بثبات:

ـ مقبرة.

راقب الزيات ملامح فريد للحظات، محاولًا أن يستشف مدى جديّته، قبل أن يضيّق عينيه قليلًا ويقول بنبرة تحمل شيئًا من التحذير:

ـ بس إنت مش هتقدر عليها يا فريد.

لم تتغير ملامح فريد، بل رفع حاجبه في هدوء مستفز، ثم أمال رأسه قليلًا وهو ينفث دخان سيجاره، وقال بثقة لا تقبل التشكيك:

ـ أنا لو مش قدّها، ما كنتش طلبتها.

حرّك الزيات فكه ببطء، وألقى نظرة عابرة على الرجال المحيطين بهم، قبل أن يعيد عينيه إلى فريد، موضحًا مقصده بنبرة أكثر جدية:

ـ أنا مش قصدي على كده، أنا قصدي على التصريفة نفسها.

الموضوع مش سهل زي ما إنت فاكر.

أبعد فريد السيجار عن فمه، وثبّت عينيه في عيني الزيات، وكأن تحذيره لم يزد الأمر بالنسبة إليه إلا إصرارًا.

ثم ارتسمت على شفتيه ابتسامة باردة، وقال بلهجة حاسمة:

ـ وده مش تخصصك يا زيات...

تخصصي أنا.

تأمله الزيات طويلًا.

ثم أشاح بنظره قليلًا، وكأنه يجري حسابات سريعة داخل رأسه.

ـ بس إنت عارف إن طلب بالحجم ده هيكلفك حاجات كتير.

اقترب فريد خطوة أخرى، وثبّت عينيه في عينيه.

ثم قال بحسم:

ـ عارف يا زيات...

إيه أكتر حاجة فريد الشامي بيكرهها؟

إنه يضطر يعيد كلامه لحد.

بس الظاهر إن المرادي لازم أعمل استثناء.

فاسمع كويس...

لأني مش هقوله مرتين.

عايز مقبرة كاملة.

مقفولة.

وتتفتح قدام عيني.

ظل الزيات ساكنًا للحظات، واختفت ابتسامته تدريجيًا، بينما راحت عيناه تتفحصان ملامح فريد، محاولًا أن يحدد إن كان يتحدث بجدية كاملة أم يختبر حدود الصفقة.

وبعد لحظات من الصمت، ارتسمت على شفتيه ابتسامة مائلة، وقال بنبرة امتزج فيها الاستغراب بالإعجاب:

ـ تصدق بالله يا فريد... إنت ابن حلال!

 

ضحك فريد بخفة بعدما أدرك مغزى كلماته.

ثم قال:

ـ إيه... هتقولي إنها جاهزة؟

ضحك الزيات بدوره.

وألقى سيجارته التي انتهت بين أصابعه.

ثم داس عليها بطرف حذائه.

وقال:

ـ حبيبي اللي فاهمني! حضّر نفسك... والحاجة جاهزة ومجهزة، بس نريح عليها اليومين دول... علشان ريحتنا متطلعش.

عندها...

انحنى فريد قليلًا.

ونفث دخان سيجارته مباشرة في وجه الزيات بتعجرف متعمد.

ثم قال بصوت هادئ:

ـ ده إنت نام وريح واتعشى كمان.

ولما أقرر أتحرك...

هتلاقيني كلمتك.

أومأ الزيات برأسه برضا مرغم.

وبإشارة سريعة أخذ كل طرف ما يخصه من سلاح ومال.

ثم استدار كل فريق في طريقه.

بينما ظلت نظرات فريد تحمل وعيدًا خفيًا.

وكانت خطواته تسحق الرمال خلفه بثقة مطلقة...

لرجل لا يعرف المستحيل.

*********

في أواخر ليلٍ يلفّه السكون، شقّت سيارات فريد الشامي طريقها نحو الفيلا، وتوقفت أمام بوابتها الكبيرة. ترجل فريد بخطوات ثابتة، بينما نزلت سما خلفه بهدوء.

وقبل أن يتحرك نحو الداخل، ترجل الجيار سريعًا من سيارته، واقترب منه قائلًا بإلحاح:

ـ معلش يا باشا.. عايزك في كلمتين.

ألقى فريد عليه نظرة جانبية حادة، ثم أشار برأسه ببرود:

ـ بعدين يا جيار، بعدين.

هز الجيار رأسه رافضًا، واقترب أكثر:

ـ لا يا باشا، مش بعدين.. اسمحلي، الموضوع ما ينفعش يتأجل.

تأمله فريد للحظات، ثم ابتسم ابتسامة خفيفة تخفي ضيقه.

ـ عارفك عنيد ومش هتسكت. تعالى.

دلفا إلى الفيلا، وما إن وصلا إلى الردهة حتى التفت فريد نحو سما.

ـ اطلعي على أوضتك.

ابتسمت له وأجابته بصوت منخفض:

ـ حاضر يا حبيبي.. تصبح على خير.

صعدت سما إلى جناحها، بينما اتجه فريد إلى مكتبه، وتبعه الجيار وأغلق الباب خلفه.

وقف فريد أمام مكتبه، وأشار إليه أن يتحدث، فبادر الجيار بقلق واضح:

ـ أنا مش مطمن يا باشا.. خالص.

ثبت فريد عينيه عليه، ثم استند إلى حافة المكتب قائلًا بهدوء مستفز:

 ـ وأنا بقول لك اطمن يا جيار.كل حاجة ماشية زي ما أنا عايز.

نفخ الجيار بضيق، ولوّح بيده معترضًا:

ـ اطمن إزاي بس؟! الآثار مش سكتنا يا باشا! دي لعبة ناس تانية خالص. إحنا كده بنحط رجلينا في مكان كله ألغام... وغلطه واحدة هتدفننا كلنا.

لم تتغير ملامح فريد، ورد ببرود:

ـ بس أنا مش خايف.

اقترب الجيار خطوة أخرى، وقد ازدادت نبرة التحذير في صوته:

ـ يا باشا الموضوع مش خوف! عزام الديب لو عرف باللي بتفكر فيه مش هيسكت! أنت عارف كويس إنه هو اللي ماسك الدايرة دي كلها بإيده، وهو اللي موزع الشغل علينا وعلى غيرنا.. الشغلانة دي مش تخصصنا، وهتفتح علينا أبواب جهنم.

أشعل فريد سيجارته بهدوء.وانتظر حتى انتهى الجيار من حديثه.

ثم قال ببساطة:

ـ خلصت؟

تردد الجيار للحظة، ثم أجاب:

ـ أيوه يا باشا، بس أنا بقول لك الكلام ده علشان مصلحتك ومصلحتنا كلنا.

ـ وأنا سمعتك.

نهض فريد من مكانه، وأشار بيده نحو الباب، منهِيًا النقاش بنبرة آمرة:

ـ أرجع على مكانك اللي هتتدارى فيه الليلة...وروح نام يا جيار.. اليوم كان طويل ومتعب، وأنا بصراحة عايز أفضي دماغي وأنام.. ورانا شغل كتير أوي الفترة اللي جاية، ومش فاضي لوجع الدماغ ده.

قطّب الجيار حاجبيه باستنكار، وقال:

ـ شغل إيه يا باشا اللي ورانا؟ هو إحنا لحقنا نخلص من مصيبة عشان ندخل في غيرها؟!

رفع فريد عينيه إليه، واختفت ابتسامته الخفيفة، ثم قال بنبرة حاسمة:

ـ هو أنت ناسي رضوان العطار؟!

أغمض الجيار عينيه لثانية.

وكأنه يحاول استيعاب أن فريد فتح على نفسه حربين في الوقت نفسه.

رضوان من ناحية.

والآثار من ناحية أخرى.

ثم أطلق زفرة طويلة وقال:

ـ ماشي يا باشا، اللي تشوفه.. بس أنا قلبي مش مطمن للموضوع ده، وربنا يسترها في اللي جاي.

اكتفى فريد بنظرة باردة.

ثم أطفأ سيجارته بهدوء.

واستدار متجهًا نحو باب المكتب.

دون أن يضيف كلمة أخرى.

مرّ بجوار الجيار.

وصعد الدرج المؤدي إلى الطابق العلوي بخطوات هادئة.

وكأن النقاش انتهى بالنسبة إليه منذ البداية.

أما الجيار...

فظل واقفًا مكانه للحظات.

يراقب اختفاءه أعلى الدرج.

مدركًا أن إصرار فريد لن يتغير بسهولة.

فزفر بضيق.

ثم استدار أخيرًا وغادر المكان.

**********

في صباح اليوم التالي...

توقفت سيارة رضوان أمام بوابة المستشفى.

نزلت حبيبة وهي تحمل حقيبتها فوق كتفها، ثم انحنت قليلًا نحو النافذة قبل أن تغلق الباب.

ـ هتطلع المصنع النهارده يا برو؟

هز رضوان رأسه.

ـ لا يا حبيبتي. عندي مشوار في شركة مهاب.

ابتسمت.

ـ خلي بالك من نفسك.

ابتسم هو الآخر.

ـ وإنتِ كمان.

لوحت له بيدها.

ثم استدارت متجهة نحو المدخل.

لكنها لم تكن قد قطعت سوى بضع خطوات حين اخترق أذنها صوت مألوف...

صوت لم تسمعه منذ سنوات.

ـ معقول... دكتورة حبيبة؟!

توقفت في مكانها.

والتفتت ببطء.

رأت شابًا يتقدم نحوها بابتسامة واسعة.

حدقت في وجهه لثوانٍ، تحاول التقاط اسمه من بين ضباب السنوات.

حتى اتضحت الملامح.

وتجمدت أنفاسها فجأة.

معاذ.

اتسعت عيناها بصدمة لم تستطع إخفاءها.

ـ مش معقول... إنت؟!

وفي اللحظة نفسها...

اندفعت الذكريات نحوها بلا رحمة.

ذكريات حاولت دفنها سنوات طويلة.

ليلة سوداء.

صرخات.

دموع.

ووفاة والدتها...

الوفاة التي ارتبط اسمه بها في عقلها للأبد.

أما معاذ...

فبدا مرتبكًا وسعيدًا في الوقت نفسه.

وقال وهو يهز رأسه بعدم تصديق:

ـ والله مش مصدق.

أقسم بالله مش مصدق إني شوفتك.

شعرت حبيبة وكأن الدم تجمد داخل عروقها.

تدفق طوفان جارف من الذكريات الأليمة...

 ليجتاح كيانها..

ذكريات ذلك اليوم المشؤوم...

وموت أمها الذي حدث بسبب طيشه وتلاعبه.

لا.

ليس الآن.

وليس هو.

بالذات هو.

انعقد فكها بقوة.

وقالت بحدة:

ـ إنت بتعمل إيه هنا؟

ارتبك قليلًا أمام قسوة نظراتها.

ـ ولا حاجة... كنت معدي بالصدفة وشوفتك.

اشتعلت عيناها بشرار الغضب، وصاحت بنبرة تقطر احتقارًا:

ـ وحتى لو شوفتني.. إيه اللي يخليك تنادي عليا أصلاً؟! إزاي عندك الجرأة تقف قدامي بعد كل اللي عملته؟ ده إنت إنسان معندوش دم!

اختفت ابتسامته فورًا.

وحل محلها شيء من الألم.

ـ حبيبة...

إنتِ لسه ما نسيتيش؟

صدقيني...

اللي حصل وقتها كان غصب عني. عايزك تديني فرصة أشرحلك وقتها اللي حصل.

اقترب خطوة أخرى، ومد يده متوسلاً بنبرة لزجة:

ـ حبيبة... أنا...

أنا معرفتش قيمتك الحقيقية غير بعد ما سبتيني.

شهقت حبيبة فجأة، واتسعت عيناها بذهول ورعب حقيقي..

وكأن أحدهم وجّه إليها لكمة مباشرة في صدرها أوقفت أنفاسها.

لم تكن تشهق من كلمات معاذ، بل حين وقعت عيناها خلفه، فرأت «فارس»..

يقف هناك بكامل هيبته وجموده..

يتابع كل حرف وكل نظرة بعينين تشتعلان بشرار الغضب والصمت القاتل.

جاء صوت فارس باردًا، قاطعًا، ومخيفًا من خلفه مباشرة:

ـ وأنا عندي الوقت الكافي أسمعك.

تجمد معاذ في مكانه.

واستدار ببطء.

ليجد فارس واقفًا خلفه مباشرة.

هادئًا كعادته.

يداه داخل جيبيه.

وملامحه مسترخية بصورة مستفزة.

لكن نظراته...

كانت كافية لانتزاع الراحة من أي شخص.

نظر أولًا إلى حبيبة.

ثم أعاد بصره إلى معاذ.

أما معاذ فقد نظر إلى حبيبة باستغراب.

وسأل:

ـ مين ده يا حبيبة؟

شعرت حبيبة أنها سقطت في مأزق حقيقي.

أما فارس...

فتقدم خطوة أخرى.

وتعمد أن يقف بينهما.

ثم قال بهدوء:

ـ لا...

سيبك مني دلوقتي.

عرفني الأول.

أنت مين؟

وواقف مع الدكتورة حبيبة ليه؟

نظر إليه معاذ من أعلى لأسفل.

وقال بفتور:

ـ حضرتك...

الموضوع ده خاص بيني وبين صديقتي.

ولو عندك شغل جوه المستشفى أو براها ياريت تتفضل.

ابتسم فارس.

ابتسامة صغيرة هادئة.

ثم التفت إلى حبيبة.

ـ ده عايزني أتفضل.

أغمضت حبيبة عينيها للحظة.

وأطلقت زفرة ضيق طويلة.

ثم فتحت عينيها ونظرت إلى معاذ بغضب.

ـ امشي يا معاذ، وما تحاولش تيجي هنا تاني.

وإلا أقسم بالله ها طلبلك الشرطة!

ضحك فارس بخفة.

ـ معاذ؟

اسم حلو.

​ثم التفت إلى معاذ مجددًا.

وأضاف بهدوء مخيف:

ـ والشرطة ليه؟ هو أنا هنا عمود نور واقف؟

عجزت حبيبة عن النطق.

فالأحداث كانت تتلاحق بصورة أسرع مما تستطيع استيعابه.

وفي المقابل...

اقترب فارس من معاذ خطوة أخرى.

ثم انحنى نحوه قليلًا.

وقال بصوت خافت...

لكنه حمل تهديدًا صريحًا لا يحتمل التأويل:

ـ أكيد سمعت كلام الدكتورة.

وصدقني، لو لمحتك أو شفتك أو سمعتك بتنطق اسمها تاني، مش هيحصل لك خير أبدًا.

لا هتشوف، ولا هتسمع، ولا هتتكلم.

وصدقني، لو عايزك تجرّب... قرب.

لم يرفع فارس صوته.

ولم يحتج إلى ذلك أصلًا.

كانت نبرته وحدها كافية لتبعث القشعريرة في الأجساد.

تردد معاذ.

وألقى نظرة سريعة على حبيبة.

ثم وقعت عيناه على الخاتم في يدها.

ظل يحدق فيه لثوانٍ.

قبل أن يعود ببصره إلى فارس.

وقد بدأ يفهم طبيعة العلاقة بينهما.

ابتلع ريقه بصعوبة بالغة.

 حاول استعادة بعضٍ من كبريائه المهزوز.

ـ أنا آسف لو ضايقتكم.

ما كنتش أقصد أعمل مشكلة.

لم يرد فارس.

اكتفى بالنظر إليه.

ذلك النوع من النظرات الذي يجعل الطرف الآخر يتمنى إنهاء الموقف والرحيل.

وبالفعل...

تراجع معاذ خطوة.

ثم استدار وغادر المكان بخطوات متعجلة.

وظلت حبيبة تراقب ظهره المبتعد.

حتى اختفى تمامًا.

عندها فقط التفتت نحو فارس.

ـ فارس... أنا...

لكنه تجاوزها.

وكأنها لم تنطق حرفًا.

ودخل إلى المستشفى.

فأغمضت عينيها بضيق.

وشعرت أن يومها بدأ أسوأ مما توقعت.

************

بقية الصباح...

حاولت حبيبة إقناع نفسها أن كل شيء انتهى.

لكن عقلها ظل عالقًا عند بوابة المستشفى.

عالقًا عند ظهور معاذ المفاجئ.

وعند نظرة فارس الأخيرة.

لم تكن خائفة من مواجهة الماضي.

بل من اضطرارها لشرحه.

فالحديث عن معاذ...

كان يعني الحديث عن أمها.

وعن أكثر فترة مؤلمة مرت بها في حياتها.

ولهذا...

ادعت التركيز في عملها.

تنقلت بين المرضى.

راجعت الملفات.

وكتبت الملاحظات.

لكن ذهنها ظل بعيدًا.

حتى طرق باب غرفة الكشف.

رفعت رأسها.

لتجد إحدى الممرضات.

ـ دكتورة حبيبة.

ـ نعم؟

ـ دكتور فارس عايز حضرتك في مكتبه.

شعرت بانقباض خفيف في معدتها.

كأنها كانت تنتظر هذه اللحظة منذ الصباح.

بلعت ريقها.

ثم نهضت.

واتجهت نحو مكتب فارس.

وقفت أمام الباب لثوانٍ.

قبل أن ترفعه يدها أخيرًا وتطرقه.

جاءها صوته من الداخل:

ـ ادخلي.

دفعت الباب ودخلت بهدوء.

فوجدته واقفًا أمام النافذة.

يعطيها ظهره.

ويداه في جيبيه.

كان ينظر إلى الخارج بشرود غريب.

قبل أن يستدير إليها أخيرًا.

وتستقر عيناه عليها.

تأملها للحظات طويلة.

ثم قال:

ـ كنت منتظر منك تبادري وتفهميني اللي شوفته الصبح.

لم تجبه.

فظل ينظر إليها بصبر بارد.

قبل أن يتابع بنبرة جادة:

ـ عايز منك.... توضيح للي حصل؟

عقدت ذراعيها أمام صدرها.

وكأنها تبني حاجزًا بينها وبينه.

ثم قالت محاولة إنهاء الحديث بسرعة:

ـ مفيش حاجة حصلت علشان أوضحها.

مجرد زميل شافني بالصدفة.

رفع فارس أحد حاجبيه.

ـ زميل؟!

بس على ما أعتقد.... أنه كان بيقول إنها صداقة مش زمالة؟

ردي عليَّ.

أشاحت حبيبة بوجهها.

وقالت بضيق واضح:

ـ فارس...

أنا مش عايزة أتكلم في الموضوع ده.

تقدم خطوة واحدة.

وظلت عيناه مثبتتين عليها.

ـ ده قالك بعد ما سبتيه؟

يعني كان في بينكم حاجة؟

تضايقت وقالت بسرعة:

ـ ما كانش يا فارس... ما كانش!

رد بحدة هادئة:

ـ إزاي ما كنش يا دكتورة؟

ده بيقولك عندي كلام كتير عايز أقولهولك، وعرفت قيمتك بعد ما سبتيـني.

دي مش جملة زميل أبدًا.

صمتت حبيبة.

فازداد يقينه أن هناك شيئًا تخفيه.

وتعمقت نظراته أكثر.

قبل أن يسألها مباشرة:

ـ إنتِ مخبية عليَّ إيه؟

رفعت عينيها إليه.

وقد بدأ الضيق يتسلل إلى ملامحها بوضوح.

ـ مخبيتش عليك حاجة.

بس الموضوع ده بالذات مش عايزة أتكلم فيه.

ـ ليه؟

رفعت رأسها نحوه بالكامل هذه المرة.

وقالت بحدة حقيقية:

ـ علشان دي حياتي السابقة!

وأنا حرة فيها..

ومش من حقك أصلًا تحقق معايا في حاجات من الماضي.

أنا قافلة عليها ومش عايزة أتكلم فيها!

ساد الصمت في الغرفة.

صمت طويل.

وثقيل.

ظل فارس ينظر إليها خلاله دون أن يتكلم.

يحاول قراءة ما خلف كلماتها.

وما خلف دفاعها المستميت عن ذلك الجزء من حياتها.

أما هي...

فثبتت نظراتها فيه بعناد.

رافضة التراجع.

ورافضة الشرح.

ورافضة العودة إلى هناك.

إلى الماضي.

إلى معاذ.

إلى كل ما تحاول نسيانه.

أخيرًا...

تنفس فارس ببطء.

ثم قال بهدوء غريب لم تستطع تفسيره:

ـ روحي على شغلك يا دكتورة.

تفاجأت.

كانت تتوقع سؤالًا آخر.

ضغطًا أكبر.

أو حتى شجارًا.

لكنها لم تجد شيئًا من ذلك.

اكتفى بهذه الجملة.

فقط.

لذلك ظلت تنظر إليه لحظة قصيرة.

قبل أن تستدير.

وتغادر المكتب.

بينما بقي فارس في مكانه.

صامتًا.

وعيناه مثبتتان على الباب بعد خروجها.

يفكر في شيء واحد فقط...

أن حبيبة تخفي عنه أكثر مما كان يتصور.

يتبع.......


© قصص وروايات مريم نصار — جميع الحقوق محفوظة. يُمنع نسخ هذا الفصل أو إعادة نشره كليًا أو جزئيًا دون إذن كتابي مسبق من الكاتبة.

🔔 عجبك الفصل؟ تابعي المدونةعشان توصلك الفصول الجديدة أول بأول🔔 متابعة المدونةاضغطي، سجّلي بحساب جوجل، وخلاص ✔

تعليقات✍️ أضف تعليقًا

  1. فصل تحفة ودايما متألقة ومبدعة يا فاتنة القلوب 🩷🩷🩷

    ردحذف
  2. بجد ابدعتي يا مريم 🫶❤️🙏

    ردحذف
  3. كالعادة مبدعة يا مريومه 💕💕

    ردحذف
  4. روعااااااااتك تسلم ايدك يا مريومه منتظرين الجديد الرواية روعة

    ردحذف
  5. ما شاء الله الحلقه جميله جدا 🎉🎉🎉🎉🎉🎉🎉🎉🎉❤️❤️❤️❤️❤️❤️❤️❤️

    ردحذف
  6. نفسي اعرف مييين للي انقذ رضوان في المكتبه...احداث الروايه رهيبه

    ردحذف
  7. تسلم ايدك يا مريومه ❤️❤️

    ردحذف

إرسال تعليق

بحث هذه المدونة الإلكترونية