قصص وروايات مريم نصار

قصص وروايات مريم نصار: المدونة الرسمية للكاتبة والروائية المصرية مريم نصار. هنا تقرئين حكايات تلمس القلب وتشبه تفاصيل حياتنا: روايات وقصص تجمع بين الرومانسية والدراما والتشويق، بأسلوب قريب من القارئ وشخصيات تعيش معك بعد الفصل الأخير. تُنشر كل رواية فصلًا بفصل بترتيب منظم ومريح للقراءة، وتقدرين تتابعين الفصول الجديدة أولًا بأول. أهلًا بك في عالم مريم نصار.

الفصل السابع عشر. زاد الآسمر


 



الفصل السابع عشر زاد الآسمر الجزء الثاني...

كانت الأجواء داخل الشركة هادئة نسبيًا، بعدما بدأت أزمة السيولة تنحسر تدريجيًا، واستقرت الأمور بفضل التعديلات التي أجراها رضوان بالتعاون مع أمجد، الذي تولّى مراجعة الحسابات ومتابعة تنفيذ التوصيات على أرض الواقع.

جلس مهاب خلف مكتبه، يتابع التقرير الأخير الذي وضعه أمجد أمامه، بينما جلس رضوان إلى جواره، يستمع إلى الشرح النهائي بشأن الميزانية والتدفقات النقدية.

قلب أمجد الصفحة الأخيرة، ثم قال بثقة مهنية:

ـ كده ياشا، إحنا خلصنا مراجعة الحسابات، وكل الأرقام بقت واضحة. قدرنا نحدد أسباب الضغط على السيولة، ونظّمنا مواعيد التحصيل والسداد بما يتناسب مع التدفقات النقدية المتوقعة. كمان راجعنا المخزون، وبدأنا نتعامل مع البضاعة بطيئة الحركة، بحيث نقلل الفلوس المجمّدة فيها.

رفع مهاب عينيه عن التقرير، وسأله:
ـ يعني من وجهة نظرك، إحنا في الوضع الآمن دلوقتي؟

أجاب أمجد:
ـ الوضع اتحسن بشكل واضح، والحمد لله. بس طبعًا لازم نفضل متابعين التحصيل والمخزون باستمرار، لأن أي تهاون فيهم ممكن يرجّع الضغط تاني.

أومأ مهاب برأسه، ثم التفت إلى رضوان.
ـ بصراحة يا رضوان، إنت حليتلي أزمة كبيرة، ومهما قلتلك مش هقدر أوفيك حقك. وكنت أتمنى إنك تكون جزء من الشركة دي، وتفضل معانا على طول..

ابتسم رضوان بهدوء.

ـ أنا مروحتش بعيد يا مهاب.

وقت ما تحتاجني...

صدقني هتلاقيني.

هز مهاب رأسه مبتسمًا.

ـ طيب يا سيدي...

أهو إحنا فيها.

ضيّق رضوان عينيه ونظر إليه بتشكك.

ـ في إيه؟

ابتسم مهاب بمكر.

ـ ما أنا مسافر.

عقد رضوان حاجبيه.

ـ مسافر؟

ـ أيوه.

في شراكة مهمة بره مصر.

ممكن أقعد أسبوع...

أو أكتر شوية.

لسه الوضع مش واضح.

ثم أشار إلى أمجد.

ـ وكنت معتمد إن فارس يرجع الشركة.

بس بعد حوار الحادثة بتاع الأتوبيسين...

ومعظم الحالات اللي راحت المستشفى عنده...

واضح إنه هيفضل مشغول شوية.

هز رضوان رأسه بأسف، وقال:
ـ ربنا يشفيهم ويطمّن أهاليهم عليهم.
ويعدّي الأزمة دي على خير.

أومأ مهاب بتأثر:
ـ يا رب.

سكت مهاب لحظة.

ثم أكمل:

ـ علشان كده...

محتاجك تقف جنب أمجد كام يوم.

على الأقل أبقى مطمن وأنا بره.

تبادل رضوان وأمجد النظرات.

ثم قال رضوان بابتسامة خفيفة:

ـ طب ما تقول من الأول.

أنا افتكرتك بتمهد علشان تمشيني.

ضحك الثلاثة.

ورد مهاب:

ـ لا يا سيدي.

إنت دلوقتي بقيت أمان للشركة دي.

تنهد رضوان وهو يهز رأسه.

ـ طيب مسافر إمتى؟

ـ النهارده بالليل.

ولو تحب تروح ترتاح...

وتيجي من بكرة عادي.

أشار رضوان بيده نافيًا.

ـ لأ خلاص.

أنا هكمل اليوم هنا.

هروح أعمل إيه أصلًا؟

حبيبة موجودة مع فارس في المستشفى.

ولما كلمته أطمن عليهم قالي إنها مشغولة مع الدكاترة في متابعة الحالات.

ابتسم مهاب فورًا.

ـ حبيبة؟

هي هتجيبه من بره يعني؟

دي أخت رضوان.

لازم تطلع جدعة وبمية راجل.

ابتسم رضوان بحب واضح.

ـ تسلم يا مهاب.

ربت مهاب على كتف رضوان بود.
ثم اقترح أن يتناولوا الغداء معًا.
بعدما أخبرهم أنه بدأ يشعر بالجوع.
رحّب رضوان بالفكرة.
واتفق الثلاثة على تناول الغداء سويًا،.
في استراحة قصيرة جمعتهم بعيدًا عن ضغوط العمل.

***

في المستشفى الخاص...

مر الوقت ببطء شديد.

أبطأ بكثير مما اعتاد فارس.

انتهت أكثر الحالات الحرجة.

واستقرت بعض الأوضاع.

لكن ذهنه لم يستقر لحظة واحدة.

فبين كل فترة وأخرى...

كان يترك ما بيده.

ويتجه نحو الغرفة التي ترقد فيها حبيبة.

يطمئن عليها.

ثم يعود لعمله مجددًا.

وقد طلب من لبنى أن تبقى معها حتى تستيقظ.

وبعد ساعات طويلة...

دخل مكتبه أخيرًا.

ثم خلع البالطو الأبيض وألقاه فوق المقعد.

واتجه نحو الحمام.

فتح الماء.

وغسل وجهه ببطء.

رفع رأسه نحو المرآة.

فتأمل انعكاسه للحظات.

كان مرهقًا.

والإجهاد ظاهرًا بوضوح تحت عينيه.

لكن أكثر ما أرهقه. صورة حبيبة.

وهي ترتجف بين ذراعيه.

وتبكي وكأنها تعيش الكابوس نفسه من جديد.

أغمض عينيه للحظة.

ثم جفف وجهه.

ارتدى ساعته.

وأخذ مفاتيحه.

وغادر المكتب.

في الممر...

التقط بعض الهمسات العابرة.

إعجاب الممرضات.

وترحاب العاملين بعودته إلى المستشفى.

لكن شيئًا من ذلك لم يلفت انتباهه.

وكأن العالم كله انكمش في فكرة واحدة فقط.

حبيبة.

وصل إلى غرفتها.

وتوقف أمام الباب.

ثم طرقه بخفة.

ولما لم يصله رد...

فتح الباب ببطء.

كانت ما تزال نائمة.

شاحبة.

هادئة بصورة أوجعت قلبه.

بينما كانت لبنى تقف قرب النافذة تتحدث في الهاتف.

وحين رأته...

أنهت المكالمة فورًا.

ثم اقتربت.

ـ دكتور فارس.

نظر إليها.

ثم سأل:

ـ لسه ما فاقتش؟

هزت رأسها نفيًا.

فتقدم إلى الداخل.

وجلس على المقعد المجاور للسرير.

ومد يده ببطء.

ثم أخذ كفها بين يديه.

وأحاطه بكفيه الاثنتين.

وأسند ذقنه فوق أصابعه.

وظل ينظر إليها بصمت.

لبنى شاهدت المشهد.

وتوترت.

بينما كسر فارس الصمت أخيرًا.

وقال دون أن يرفع عينيه عنها:

ـ حبيبة قالتلي إنك صاحبتها من زمان.

من وأنتوا صغيرين.

وإنكم قضيتوا كل مراحل التعليم سوا.

تنهدت لبنى.

ـ أيوه.

إحنا مولودين في حارة واحدة.

وسنين عمر كاملة مع بعض.

ساد الصمت للحظات.

ثم نهض فارس ببطء.

وأدخل يديه في جيبيه.

ونظر إليها مباشرة.

ـ طيب...

ممكن نتكلم شوية في المكتب؟

لو تسمحي.

ترددت لبنى.

لكنها أومأت بالموافقة.

وخرجت معه.

***

داخل المكتب...

جلس فارس خلف مكتبه.

بينما بقيت لبنى متوترة فوق المقعد المقابل.

ظل صامتًا لثوانٍ.

ثم قال بهدوء واضح:

ـ بصي يا دكتورة لبنى...

أنا شخص واضح.

ومبحبش ألف وأدور.

توترت أكثر.

فأكمل:

ـ اللي حصل النهارده لحبيبة...

أنا مش قادر أتخطاه.

وفي نفس الوقت...

مش هقدر أسألها.

واضح إنها موجوعة جدًا.

وفي حاجة تخص والدتها مخلياها توصل للحالة دي.

أنا مش فاهم...

ومش هقدر أسأل أخوها.

مينفعش أروح أقوله أختك ليه قالت كده.

مش من حقي.

لكن من حقي أطمن عليها.

وحقيقي عايز أفهم إيه اللي حصل.

وبما إنك صديقتها المقربة. أكيد تعرفي اللي حصل.

سكتت لبنى.

وانخفضت عيناها إلى الأرض.

ففهم فارس ترددها.

وقال مباشرة:

ـ لو مش عايزة تتكلمي...

خلاص.

أنا متفهم.

وممكن تكوني خايفة حبيبة تزعل منك.

رفعت رأسها.

وأومأت ببطء.

ـ بصراحة...

آيوه. حبيبه لو عرفت إني حكتيلك حاجه.
ممكن تزعل مني.

تنهد فارس.

ثم وقف واتجه نحو النافذة.

وأعطاها ظهره.

ـ تمام. أنا مقدر موقفك.

تقدري ترجعي لها.

أو ترجعي المستشفى.

اعملي اللي يريحك.

لم يجبرها.

ولم يضغط عليها.

انتظر فقط.

خرجت لبنى فعلًا.

وأغلقت الباب خلفها.

لكنها لم تبتعد.

وقفت في الممر.

وشبكت أصابعها ببعضها.

حائرة.

تائهة.

تفكر.

لو كانت حبيبة مكانها...

هل كانت ستصمت؟

هل كانت ستترك صديقتها تغرق وحدها؟

أغمضت عينيها.

ثم حسمت أمرها أخيرًا.

استدارت.

وعادت سريعًا.

طرقت الباب.

ثم دخلت.

التفت فارس إليها فورًا.

لتقول لبنى ببطء:

ـ أنا هحكيلك كل حاجة.

ساد الصمت.

أما فارس...

فبذل أقصى ما يستطيع كي لا يظهر اللهفة التي اشتعلت داخله.

وأخيرًا...

بدأت لبنى تحكي.

من الجامعة.

من ظهور معاذ.

من الخديعة.

من الفخ.

من الليلة التي كان المقصود فيها حبيبة.

لكن القدر اختار أمها بدلًا منها.

كانت الكلمات تخرج من لبنى بصعوبة.

بينما كان فارس يستمع.

صامتًا.

تمامًا.

لكن ملامحه كانت تتغير مع كل تفصيلة.

ومع أول مرة...

رأت لبنى الغضب على وجهه.

غضبًا حقيقيًا.

صافيًا.

ومخيفًا.

ذلك الرجل الذي عرفه الجميع هادئًا وباردًا...

كان يجلس الآن بفك مشدود.

وعينين امتلأتا بقسوة صامتة.

حتى أقلقها منظره.

ورغم كل ما قالته...

لم يقاطعها سوى مرة واحدة.

حين سأل بصوت منخفض:

ـ اسمه بالكامل؟

ولو تعرفي عنوانه.

أخرجت هاتفها.

وبحثت في صفحته القديمة عبر الفيسبوك.

ثم أعطته الاسم والعنوان.

وأكملت باقي الحكاية.

عن وفاة والدة حبيبة.

وعن انهيارها بعدها.

وعن نوبات الإغماء في الجامعة.

وعن رضوان الذي كان يترك كل شيء ويأتي لأجلها.

وعن حلم الجراحة الذي دفنته خوفًا.

وعن قسم الأطفال الذي اختارته هربًا من ذكرياتها.

كانت حبيبة تحلم بالتخصص في الجراحة.

تحلم بأن تصبح طبيبة مشهورة في مجال كبير.

لكن تلك الحادثة تركت بداخلها خوفًا عميقًا من العمليات الجراحية.

وجعلتها تخشى أن تجد نفسها عاجزة أمام موقف لا تحتمل عواقبه.

لذلك اختارت في النهاية قسم الأطفال.

مبتعدة عن الحلم الذي طالما تمنته.

ــ وبكده أكون وضحت لحضرتك كل حاجة، وعرفت السبب اللي خلّى حبيبة ترفض تحكيلك عن قصة معاذ.

لكن أقسم لك يا دكتور، حبيبة ما بتكرهش حد في الدنيا قدّه.
ما كانش بينهم حب ولا ارتباط، كانت مجرد معرفة وصداقة عادية، وهو اللي فرض نفسه عليها بالعافية.

حبيبة كانت عفوية ومركزة في دراستها وصُحبتها، لحد ما ظهر معاذ، وكان واضح إنه متوجّه ناحيتها بتدبير من حد، خصوصًا إن الموضوع كان وراه عصابة.

رضوان وقتها اتفق مع الشرطة ونصبوا لهم كمين، وقدروا يقبضوا على المجرمين.

أما معاذ، فلأنه ما كانش طرف أساسي في القضية، كان سافر، واتقفل الموضوع عند كده من عشر سنين.

وحين انتهت أخيرًا...

ساد الصمت.

صمت ثقيل.

موجع.

وقف فارس مكانه.

جسده متصلب.

وعقله يعيد رسم المشهد كاملًا.

حبيبة.

والاعتداء.

والدم.

وأمها.

والفقد.

والذنب.

وفجأة...

فهم.

فهم لماذا ارتجفت.

ولماذا رفعت يديها أمام وجهه.

ولماذا قالت:

"ده دم ماما يا رضوان..."

و"أنا السبب يا فارس..."

أغمض عينيه بقوة.

وشعر بوجع حقيقي يعصر قلبه.

ثم استدار فجأة.

وغادر المكتب.

دون كلمة.

***

وصل إلى غرفتها.

فتح الباب.

ودخل.

وجلس على المقعد المجاور لها.

بهدوء.

هذه المرة...

نظر إليها طويلًا.

طويلًا جدًا.

كأنه يراها لأول مرة.

وأخذ يدها بين يديه.

وضغط عليها برفق.

وللمرة الأولى منذ سنوات طويلة...

شعر أن الدموع توشك أن تتحجر في عينيه.

لكنه لم يبكِ.

لم يستطع حتى الكلام.

كل ما شعر به...

هو غضب.

غضب هائل.

على معاذ.

وعلى كل من تسبب في هذا الألم.

أخرج هاتفه فجأة.

واتصل بنادر.

وما إن جاءه الرد حتى قال بصوت حاد لم يسمعه منه نادر من قبل:

ـ نادر.

هَبعتلك اسم واحد.

تجيبهولي من تحت الأرض.

فاهم؟

ساد الصمت للحظة.

ثم جاءه صوت نادر المندهش:

ـ في إيه يا فارس؟

قبض فارس على الهاتف بقوة.

ثم قال بصرامة باردة:

ـ جيبهولي يا نادر.

سمعت؟

الواد ده يكون عندي النهارده...

بأي شكل من الأشكال.

*********

كان الهواء القادم من البحر منعشًا مع اقتراب موعد الغروب.

والشمس تميل ببطء نحو الأفق، ناشرةً ألوانًا ذهبية وبرتقالية انعكست فوق صفحة المياه في مشهدٍ أسر الأبصار وأراح النفوس.

جلس حسين إلى إحدى الطاولات الخارجية للمطعم المطل على البحر، بينما جلست زاد أمامه ترتشف عصيرها بهدوء، مستمتعة بتلك الساعات القليلة التي شعرت خلالها بشيء من الراحة.

أما قاسم...

فكان في عالم آخر تمامًا.

مرة يركض خلف طائرة ورقية يحملها طفل صغير.

ومرة يقف عند الشاطئ يتأمل الأمواج وهي تتكسر فوق الرمال.

ومرة يقفز وسط مجموعة من الأطفال وكأنه يشاركهم بطولة عالمية لا مجرد لعبة عابرة.

راقبته زاد مبتسمة، ثم هزت رأسها بيأس لطيف.

ـ اللعب شاغل قاسم خالص عن الأكل. كل ما أحاول معاه مش عايز ياخد وجبته.

ضحك حسين وهو يتابع الصغير بعينيه.

ـ سيبيه... هياكل لما يجوع من اللعب. الولد مصدق ينطلق. شايفة؟ كان رايح يلعب لوحده، ودلوقتي مكوّن فريق حواليه.

ابتسمت زاد وهي تتابع ضحكاته المتناثرة على الشاطئ.

ـ فعلًا... قاسم اتبسط أوي الفترة دي.

رمقها حسين بنظرة دافئة.

ثم سألهـا بهدوء:

ـ المهم... أم قاسم مبسوطة هي كمان؟

التفتت إليه، وارتسمت ابتسامة صادقة على شفتيها.

ـ إلا مبسوطة. بجد أحلى كام يوم قعدتهم معاك... إحنا متغدناش مرة في البيت من وقت ما زورتك. كل يوم نخرج وتفسحني يا بابا. حقيقي كلامك لما قولت هترجعني بنت صغيرة من تاني.

اتسعت ابتسامته أكثر.

وقال بحب:

ـ مانتي صغيرة من زمان. طول عمري شايفك طفلتي اللي ما بتكبرش أبدًا.

لانت ملامحها فورًا.

وقالت بصوت ملؤه الامتنان:

ـ حبيبي يا بابا. ربنا ما يحرمنيش منك، وتفضل في حياتنا على طول.

ـ ويخليكي ليا يا بنتي.

ثم أشار إلى الطعام أمامها وسأل:

ـ ها... قوليلي، عجبك الغدا؟

ضحكت بخفة.

ـ بصراحة تحفة. أنا كلت ليومين قدام.

ضحك حسين وقال بمحبة:

ـ حبيبتي... ألف هنا.

ارتسمت على وجهه ابتسامة رضا واضحة.

وظل ينظر إليها للحظات.

ثم قال بهدوء:

ـ تعرفي إني مبسوط إنك قضيتي الفترة دي معايا؟

نظرت إليه بعينين دافئتين.

ـ مش أكتر مني والله يا بابا.

صدقني.

ربت على يدها برفق.

ثم سأل بعد لحظة قصيرة:

ـ أمال فريد ما جاش يقضي معانا يوم ليه؟

خفتت ابتسامتها قليلًا.

وتبدلت ملامحها للحظة خاطفة.

قبل أن تستعيد هدوءها سريعًا.

وقالت:

ـ مشغول الفترة دي.

هز حسين رأسه ببطء.

ـ تمام.

هو على طول مشغول كده.

لم تعلق.

واكتفت بتحويل بصرها نحو البحر.

تتأمل الأمواج المتلاحقة أمامها.

وكأنها وجدت فيها مهربًا من الإجابة.

وفي محاولة لتغيير الحديث، أشار حسين نحو قاسم الذي كان يجري فوق الرمل بحماس شديد.

ـ شوفي ابنك... هيوقع نفسه دلوقتي.

التفتت سريعًا.

فضحكت عندما رأته يحاول القفز فوق سور حجري صغير.

فنادت عليه:

ـ قاسم! خلي بالك يا حبيبي.

استدار إليها من بعيد ولوّح بيده.

ـ متخافيش يا مامي... أنا بلعب حلو.

ثم عاد للعب فورًا وكأن التحذير لم يكن موجهًا إليه من الأساس.

ابتسم حسين.

بينما هزت زاد رأسها باستسلام اعتادته من ابنها.

وبعد دقائق...

رن هاتف حسين.

تناوله وأجاب على الاتصال.

وظل يتحدث لعدة دقائق قبل أن يغلق الخط أخيرًا.

ثم نهض من مكانه وهو يلتقط مفاتيحه.

ـ يلا بينا يا زاد يا بنتي.

عقدت حاجبيها باستغراب.

ـ هنمشي دلوقتي؟ حضرتك تعبت من القعدة؟

التفت إليها مبتسمًا.

ـ لأ. بس كارم كلمني، وهطلع على الشركة.

اتسعت عيناها قليلًا.

ـ الشركة دلوقتي؟

ده المغرب على وشك.

ابتسم حسين ابتسامته الهادئة المعتادة.

ـ ما إنتِ عارفة يا حبيبتي. أنا مبقتش أقدر أصحى بدري زي الأول، وصحتي مبقتش تساعدني زي زمان. عندي شغل ضروري... هخلصه وأرجع.

هزت رأسها بتفهم.

وقالت بمحبة صادقة:

ـ ربنا يديك الصحة يا حبيبي.

ابتسم لها بحنان أبوي خالص.

ـ ويخليكي ليا يا بنتي.

ثم أضاف وهو يتحرك باتجاه الخروج:

ـ أنا هوصلكم البيت في طريقي... وأرجع على الشركة.

ـ حاضر يا بابا. بس أوعدني... خلي بالك من نفسك. ولو احتجت أي حاجة أساعدك فيها، حتى لو على اللاب توب، قولي فورًا وأنا أعملها.

ابتسم حسين متأثرًا باهتمامها.

وقال بمزاح لطيف:

ـ وماله... ده يوم المنى. بس حاليًا الدنيا معايا مستقرة الحمد لله.

ابتسمت زاد وهي تلتقط حقيبتها.

ثم اتجهت نحو قاسم.

الذي رفض المغادرة في البداية بكل قوة.

واضطرت لمساومته أكثر من مرة قبل أن يوافق أخيرًا على الرحيل.

وبعد قليل...

كان حسين قد أوصلهما إلى المنزل.

واطمأن على دخولهما.

ثم استدار بسيارته متجهًا نحو الشركة.

بينما وقفت زاد خلف النافذة للحظات، تتابع ابتعاد سيارته بعينيها.

وقد تسلل إلى قلبها ذلك الشعور القديم...

شعور الطمأنينة الذي كانت تشعر به دائمًا ما دامت تعرف أن والدها بخير.

ثم أغلقت الستارة بهدوء...

وعادت إلى الداخل.

*********

في نفس الوقت تقريبًا...

وقف نادر مستندًا إلى سيارته على الجانب المقابل من الشارع، وعيناه لا تفارقان بوابة الشركة.

رفع معصمه للمرة الثالثة خلال دقائق، وتفقد ساعته بضيق واضح.

ثم تمتم لنفسه:

ـ هو ما خرجش ليه لحد دلوقتي؟ المفروض شغله يخلص في المعاد ده.

أطلق زفرة طويلة.

وأخرج هاتفه.

فتح الصورة التي أرسلها له فارس في وقت سابق، وظل يقارن بينها وبين وجوه الخارجين من البوابة.

واحدًا تلو الآخر.

حتى ظهر أخيرًا.

انتصب نادر في وقفته فورًا.

ونظر إلى الصورة.

ثم إلى الرجل القادم.

نفس الملامح.

نفس الهيئة.

نفس الوجه.

ارتسمت على شفتيه ابتسامة خفيفة.

ـ أهو... أخيرًا.

ضغط على بوق السيارة ضغطتين قصيرتين، ثم أشار بيده.

ـ يا كابتن... يا كابتن!

التفت معاذ باستغراب.

وأشار إلى نفسه.

ـ أنا؟

ـ أيوه إنت.

اقترب معاذ بحذر، وقد بدت الريبة واضحة في عينيه.

ـ خير يا فندم؟

نظر إليه نادر للحظة.

ثم سأله مباشرة:

ـ إنت معاذ منصور؟

عقد معاذ حاجبيه.

ـ أيوه.

ثم أضاف باستغراب:

ـ حضرتك تعرفني؟

فتح نادر الباب المجاور لمقعد السائق.

وأشار إليه.

ـ اركب.

ضحك معاذ بسخرية قصيرة.

ـ الله! هي الثقة دي كلها جاية منين؟

أركب معاك على أساس إيه؟

وحضرتك مين أصلًا؟

رفع نادر حاجبًا ببرود.

ـ اركب الأول وبعدين هنتعرف على بعض... يلا يا حبيبي.

ضيّق معاذ عينيه.

ـ لا... عرفني حضرتك مين الأول.

ارتسمت ابتسامة جانبية على وجه نادر.

ثم قال بهدوء:

ـ أختك اسمها ميرنا.

تجمد معاذ للحظة.

وازداد توجسه.

ـ ميرنا أختي؟

تعرفها منين؟

هز نادر كتفيه.

ـ لا والله ما أعرفهاش شخصيًا.

بس اللي أعرفه إن جوزها اداها علقة محترمة، وهي دلوقتي في المستشفى.

وأول ما فاقت قالت:

هاتولي معاذ... أنا عايزة معاذ.

اتسعت عينا معاذ بصدمة.

ـ إيه؟!

ضربها تاني ابن الـ...

ثم قاطعه بسرعة:

ـ طب قولّي يا أخ... هي في أنهي مستشفى؟

أشار نادر إلى السيارة.

ـ اركب يا عم وأنا أوديك.

أمال أنا جاي لك ليه؟

أختك منهارة وجرحها كبير يا حبة عيني.

ولم يحتج معاذ لأكثر من ذلك.

فتح الباب وركب فورًا.

وانطلقت السيارة.

طوال الطريق، كان معاذ يلتهم الدقائق بقلقٍ متزايد.

بينما كان نادر يقود في هدوء، وعقله مشغول بسؤال واحد.

يا ترى فارس عايزه ليه؟

ثم هز رأسه وهو ينظر للطريق أمامه.

ـ يا ترى هببت إيه يا معاذ؟

بعد دقائق...

توقفت السيارة أمام المستشفى.

فتح معاذ الباب بسرعة وكاد أن يركض.

لكن نادر لحق به.

ـ استنى يا ابني.

ـ فين أختي؟ أنهي دور؟ أنهي أوضة؟

أشار نادر إلى الداخل.

ـ تعال بس وأنا أوديك.

انطلق معاذ أمامه بخطوات متعجلة.

وقلبه يخفق بعنف.

حتى وصلا إلى آخر الممر.

توقف نادر وأشار إلى إحدى الغرف.

ـ هناك.

دخل معاذ بسرعة.

وفي اللحظة التي تجاوز فيها الباب...

أُغلق خلفه.

وأدار المفتاح من الخارج.

التفت معاذ بسرعة.

وعقد حاجبيه باستغراب.

ثم استدار نحو الداخل.

ليكتشف أنها ليست غرفة مرضى أصلًا.

بل مكتب.

واسع.

هادئ.

وأنيق بصورة مريبة.

وفي نهاية الغرفة...

كان هناك رجل يجلس على كرسيه، موليًا ظهره له.

تجمد معاذ في مكانه.

وقال بقلق:

ـ هو في إيه؟

أنا هنا ليه؟

وفين ميرنا؟!

وأنت مين؟

وفي هدوءٍ قاتل...

استدار الكرسي.

ورفع الرجل وجهه نحوه.

شحب وجه معاذ فجأة.

ـ أنت؟!

نهض فارس من مكانه ببطء.

خطوة.

ثم أخرى.

حتى وقف أمامه.

يداه داخل جيبيه.

ونظراته ثابتة عليه بطريقة جعلت الدم يتجمد في عروق معاذ.

ابتلع ريقه.

ثم استدار فجأة نحو الباب.

حاول فتحه.

وجده مغلقًا.

فعاد يلتفت إلى فارس.

وارتفع القلق في صوته.

ـ أنت عايز مني إيه؟

وليه جايبني هنا؟

توقف فارس أمامه.

ثم نطق كلمة واحدة فقط.

كلمة خرجت باردة.

وحادة.

ـ حبيبة.

ارتجف قلب معاذ.

وتوترت ملامحه فورًا.

وقال بسرعة:

ـ كانت صدفة.

والله كانت صدفة.

خليني أمشي من هنا.

رفع فارس حاجبًا.

ـ تمشي؟

ثم اقترب خطوة أخرى.

ـ مش لما تاخد باقي حسابك الأول؟

ازدادت أنفاس معاذ اضطرابًا.

ـ حسـ... حساب إيه؟

أنا ماليش حساب عندك.

أنا أصلًا معرفكش.

ابتسم فارس.

ابتسامة خالية تمامًا من المرح.

ـ للأسف...

أنا عرفتك.

ثم اختفت الابتسامة من وجهه فجأة.

وقال بصوت منخفض مخيف:

ـ واللي عملته زمان...

هتدفع تمنه دلوقتي.

وفي اللحظة التالية...

انطلقت قبضته.

استقرت في وجه معاذ بعنف.

ثم الثانية.

ثم الثالثة.

حتى ترنح الرجل للخلف وهو يشعر بأن رأسه على وشك الانفجار.

لم يترك له فرصة ليلتقط أنفاسه.
وكلما مرت أمام عيني فارس صورة حبيبة وهي منهارة بين يديه...

ازداد غضبه.

وكلما تذكر دموعها...

وشعورها بالذنب...

اشتعل أكثر.

ازداد احتقاره لذلك الواقف أمامه.

حاول معاذ أن يرد الضربة.

لكن فارس كان أسرع.

وأقوى.

دفعه بعنف نحو الحائط.

ثم ضغط ساعده على عنقه.

حتى بدأ وجه معاذ يميل إلى الاحمرار.

واختنق صوته.

اقترب فارس أكثر.

وقال بين أسنانه:

ـ مين اللي زقك عليها؟

وايه اللي رجعك بعد كل السنين دي؟

كان معاذ يضرب ذراع فارس بكل قوته محاولًا التنفس.

حتى دفعه فارس أخيرًا بعيدًا.

فسقط فوق الطاولة.

ثم ارتطم بالأرض.

وأخذ يلهث بعنف.

ـ والله العظيم ندمت!

أقسم بالله ندمت.

واللي حصل كان طيش.

عدم وعي.

ودلوقتي والله العظيم كانت صدفة.

مفيش حد زقني عليها والله.

أقترب فارس ليلكلمه في وجهه. لكن معاذ رفع رأسه بسرعة.

ـ كان فيه واحد اسمه مازن المالكي.

هو اللي هددني زمان.

قال لو ما عملتش اللي هيطلبه...

هيحط أختي مكان حبيبة.

ساد الصمت لثانية.
هو قالي إن الموضوع مجرد ورق!

قالي إنها هتمضي على شوية ورق وخلاص.

وإن مفيش حاجة هتحصل.

أنا ما كنتش أعرف إن كل ده هيوصل للدرجة دي!

توقفت يد فارس في الهواء للحظة، ثم هبطت قبضته على وجهه من جديد.

ثم انفجر غضب فارس بصورة أخافت حتى معاذ نفسه.

اقترب منه.

وجذبه من تلابيب قميصه.

ـ وعلشان تنقذ أختك...

تضحي بواحدة تانية؟!

ثم انهالت عليه اللكمات من جديد.

في وجهه.

وفي بطنه.

وفي أنحاء متفرقة من جسده.

حتى بدأ يفقد القدرة على المقاومة.

في الخارج...

فتح نادر الباب أخيرًا بعدما شعر أن الوضع خرج عن السيطرة.

ودخل مسرعًا.

ليجد فارس بصورة لم يرها منه من قبل.

عينان مشتعـلتان.

ووجه متجهم.

وغضب يكاد يتحول إلى شيء أخطر..

أمسك به سريعًا.

ـ خلاص يا فارس!

الواد هيموت في إيدك!

كان معاذ ملقى على الأرض.

صدره يعلو ويهبط بعنف.

والدم يسيل من فمه.

وإحدى عينيه بدأت تتورم بوضوح.

أما فارس...

فكان يقف في مكانه يتنفس بسرعة.

كأنه يحاول السيطرة على نفسه.

ثم فجأة...

انحنى.

وأمسك معاذ من ياقة قميصه.

وقال بنبرة جعلت الدم يتجمد في عروقه:

ـ اللي حصلك دلوقتي...

اعتبره إنذار صغير.

صغير جدًا.

ولو فكرت...

بس فكرت...

تقرب منها.

أو حتى الصدفة جمعتك بيها مرة تانية...

أقسم بالله...

هتشوف أيام تتمنى بعدها إنك ما تشوفهاش حتى في احلامك.

ارتجف معاذ بالكامل.

وهز رأسه سريعًا.

ـ حاضر...

والله حاضر.

اقترب فارس أكثر.

ـ حبيبة العطار... خط أحمر.

وتحت كل الخطوط الحمرا

فاهم؟

ـ فاهم...

والله فاهم.

أردف فارس مهددًا:

ـ ومتسمحش للصدفة نفسها...

إني أشوفك.

أو أسمع عنك.

وصلت؟

هز رأسه بعنف.

وقد اختفى أي أثر للمقاومة من عينيه.

جذبه فارس من ياقة قميصه.

ثم فتح الباب ودفعه إلى الخارج كأنه يتخلص من شيء لا يريد رؤيته مرة أخرى.

خرج يترنح.

يتعثر.

يسقط.

ثم ينهض من جديد.

ويبتعد بأقصى سرعة يستطيعها.

وكأن الموت نفسه كان يطارده.

ساد الصمت داخل المكتب.

ولعدة ثوانٍ...

لم يتحدث أحد.

كان نادر لا يزال واقفًا في مكانه.

مصدومًا.

ليس مما رآه فقط...

بل مما سمعه أيضًا.

الآن فهم.

فهم سبب تلك النظرة التي كانت تظهر في عيني فارس كلما ذُكر اسم حبيبة.

وفهم لماذا طلب هذا الرجل الهادئ إحضار معاذ بأي طريقة.

لم يكن الأمر غيرة.

ولم يكن غضبًا عابرًا.

بل شيء أعمق.

وأخطر.

شيء جعل فارس يفقد هدوءه النادر.

رفع نادر عينيه إليه.

فوجده واقفًا أمام النافذة.

يحاول استعادة أنفاسه.

وما زالت قبضتاه مشدودتين بقوة.

عندها فقط...

أدرك نادر الحقيقة كاملة.

فارس لا يحب حبيبة فحسب.

بل وصل إلى مرحلة أصبح فيها مستعدًا لتحطيم أي شخص يفكر في إيذائها.

وهي مرحلة...

يعرف نادر جيدًا أنها لا يعود منها أحد كما كان.

**********

كانت الساعة قد اقتربت من الثامنة مساءً.

هدأت حركة الموظفين داخل شركة الحسيني إلى حدٍّ كبير، بعدما غادر أغلبهم منذ أكثر من ساعة، ولم يبقَ سوى عدد قليل من العاملين ينهون ما تبقى من أعمال اليوم.

أما رضوان...

فكان لا يزال جالسًا خلف مكتب أمجد، يتفقد بعض الملفات للمرة الأخيرة قبل أن يغادر.

رفع عينيه إلى ساعة يده.

ثم تنهد ببطء.

وأخرج هاتفه.

ضغط على اسم حبيبة.

ورفع الهاتف إلى أذنه.

وانتظر.

ثانية.

اثنتين.

ثم جاءه الرد الآلي:

"الهاتف المطلوب مغلق حاليًا."

عقد حاجبيه فورًا.

وأعاد الاتصال.

مرة ثانية.

ثم ثالثة.

لكن النتيجة كانت نفسها.

أبعد الهاتف عن أذنه، ونظر إلى الشاشة بضيق خفيف.

ـ مقفول؟

دي عمرها ما قفلت تليفونها.

شعر بانقباض صغير تسلل إلى صدره.

حاول أن يقنع نفسه بأن بطارية الهاتف قد نفدت، أو أن انشغالها بالحالات جعلها تنسى شحنه.

لكن القلق...

كان يعرف طريقه إليه دائمًا حين يتعلق الأمر بها.

نهض من مكانه.

والتقط مفاتيحه وهاتفه.

ـ تلاقيها مسحوله من وقت الحادثة...أروح أشوفها أحسن...

وأهو بالمرة نرجع البيت سوا.

خرج من المكتب.

واتجه نحو المصعد.

وبعد لحظات...

فتحت أبوابه في الطابق الأرضي.

خرج رضوان بخطوات سريعة.

لكن قبل أن يبتعد خطوة واحدة...

اصطدم به شخص يركض بجنون من آخر الممر.

بقوة كادت أن تطرحه أرضًا.

لولا أن رضوان أمسكه في اللحظة الأخيرة.

ـ خلي بالك يا أستاذ!

اعتدل الرجل بصعوبة.

وكان يلهث بشدة.

ـ آسف... آسف لحضرتك.

أنا بس مستعجل.

عايز أوصل للدكتور فارس ضروري.

عقد رضوان حاجبيه.

ـ دكتور فارس؟

بس هو مش موجود في الشركة أصلًا.

هز الرجل رأسه بسرعة.

ـ عارف.

بس لازم أوصل له حالًا.

لو اتأخرت أكتر من كده هتحصل كارثة.

شعر رضوان بانقباض مفاجئ.

ـ يا ساتر يا رب.

كارثة إيه؟

فهمني.

نظر الرجل حوله بتوتر.

ـ بعدين.

أنا مستعجل.

هشوف أي حد من الريسبشن يساعدني.

أوقفه رضوان قائلًا:

ـ يا سيدي فهمني.

يمكن أقدر أساعدك.

تردد الرجل لثوانٍ قليلة.

ثم قال:

ـ أنا شادي... ممرض في مستشفى الدكتور فارس، وحصل عندنا ضغط كبير، ووصل عدد كبير من الأطفال المصابين، وفيه حالات محتاجة رعاية خاصة.

توقف ليلتقط أنفاسه.

ثم أكمل بلهجة متوترة:

ـ عندنا عجز في الأدوية، والإدارة كلفتني أستلم طلبية أدوية ومستلزمات إضافية.

والدكاترة محتاجينها ضروري.

رحت استلمتها فعلًا من المخزن.

بس عربيتي عطلت في الطريق.

وأنا حرفيًا مش عارف أعمل إيه.

وأشار بيده نحو الخارج قبل أن يسترسل:

ـ خليت كذا واحد يساعدوني نزقها لحد هنا، والمشكلة إن المنطقة دي صعب ألاقي فيها تاكسي بسرعة، ولو طلبت أوبر مش عارف هتتأخر قد إيه. وأنا مش عايز أضيع وقت أكتر من كده، خصوصًا إن الدكتور فارس حازم جدًا في الحالات الإنسانية.

كان رضوان يستمع إليه باهتمام، وقد ازدادت ملامحه جدية مع كل كلمة.

وأشار إليه أن يهدأ قليلًا، ثم سأله:

ـ طيب... خد نفسك كده واهدى، وقولي الأدوية فين دلوقتي؟

أجاب شادي بسرعة:

ـ في العربية يا أستاذ. كنت أتمنى لو تقدر تساعدني.
بأنك لو تعرف حد هنا يوصلها للمستشفى.
أو حتى حد من الأمن يساعدني. بس أهم حاجة يكون أمين، لأن دي عهدة وأنا مسؤول عنها.

نظر رضوان إليه لعدة لحظات.

كان أمامه رجل يبدو مرتبكًا وجادًا في الوقت نفسه.

ويتحدث عن أطفال مرضى ينتظرون الأدوية.

تفحص ملامحه جيدًا ولم يرَ ما يدعوه إلى الشك فيه.

خصوصًا أن ذكر اسم فارس ومستشفاه جعل الأمر يبدو طبيعيًا ومألوفًا.

لذلك قال بحسم:

ـ خلاص.

أنا هوصلها.

أنا أصلًا رايح المستشفى.

رفع شادي رأسه بسرعة، وتأمله باستغراب ممزوج بالارتياح.

ـ حضرتك شغال هنا يعني؟ تعرف الدكتور فارس نفسه؟ أصل دي عهدة، وممكن أضُر فيها.

ابتسم رضوان.

ـ ده صاحبي.

متقلقش... وأنا هوصلها بنفسي لإيد دكتور فارس.

تنفس شادي براحة واضحة.

ومد يده يصافحه.

ـ متشكر جدًا.

والله مش عارف أشكرك إزاي.

ثم أضاف بسرعة:

ـ أنا هجيب الصندوق.

حضرتك استناني دقيقة.

ـ اتفضل.

أنا جاي وراك.

***

بعد دقائق...

كانا يقفان بجوار سيارة متوقفة أمام الشركة.

فتح شادي الباب الخلفي.

وأخرج صندوق كرتوني كبير ومغلق.

وبجواره صندوق تبريد صغير.

ـ اتفضل يا أستاذ، دي كل المستلزمات والأدوية. بس خلي بالك، فيه حاجات لازم تفضل في الآيس بوكس ده علشان نحافظ على درجة حرارتها لحد ما توصل المستشفى.

تناول رضوان الصندوق.

لكنه توقف للحظة.

وألقى نظرة متفحصة عليه قبل أن يسأل:

ـ معلش...

ممكن أفتحه؟

من باب العلم بالشيء بس.

لم يبدُ على شادي أي اعتراض.

بل قال فورًا:

ـ حقك طبعًا، اتفضل.

ولو عايز تفضي كل اللي فيه وتشوف كل نوع بنفسك... أنا معاك.

أومأ رضوان برأسه.

ثم رفع الغطاء.

وتحركت عيناه بين العبوات المرتبة بعناية.

علب دوائية مختلفة.

مستلزمات طبية.

عبوات مغلقة تحمل أسماء شركات معروفة.

وبعض الأدوية التي يعرف شكلها من قبل.

لم يكن رضوان طبيبًا ولا صيدليًا ليُراجع كل صنف على حدة.

ولم يكن يتوقع أصلًا أن يواجه ما يدعوه إلى الشك.

كل ما أراده أن يطمئن إلى أن ما يحمله يتفق ـ ولو ظاهريًا ـ مع ما أخبره به شادي.

التقط بعض العبوات.

قرأ أسماءها سريعًا.

ثم أعادها إلى مكانها.

وتأمل بقية المحتويات للحظات قبل أن يغلق الصندوق من جديد ويثبت غطاءه بإحكام.

ثم قال:

ــ تمام.

ورفع عينيه إلى شادي مضيفًا:

ــ وعلى فكرة...

إنت ممكن تيجي معايا وتوصلها بنفسك.

علشان متضرش في شغلك.

هز شادي رأسه بأسف.

ــ ياريت والله.

بس للأسف مش هقدر أسيب العربية هنا، لأني بقضي بيها كل مشاويري.

أنا هتصل بواحد صاحبي ييجي يشدها معايا لأي ميكانيكي.

وأطلع على المستشفى على طول.

ثم أضاف:

ــ وهتصل على الإدارة أعرفهم باللي حصل.

وسكت لحظة.

قبل أن يتذكر أمرًا مهمًا فقال:

ــ بس معلش...

نسيت أسأل حضرتك اسمك إيه؟

علشان لو سألوني في الإدارة.

أجاب رضوان وهو يستعد لحمل الصندوق:

ــ رضوان العطار.

ابتسم شادي بامتنان.

ــ تشرفت بمعرفتك يا أستاذ رضوان.

ومتأسف إني عطلتك.

وحقيقي بشكرك ومش هنسالك الجميل ده.

ابتسم رضوان ابتسامة هادئة.

وقال:

ــ ولا يهمك.

المهم إن الحاجة توصل في وقتها.

حمل الصندوق واتجه به نحو سيارته.

ووضعه في المقعد الخلفي بعناية.

ثم أغلق الباب.

استقر خلف عجلة القيادة.

وأدار المحرك.

وبشكل تلقائي تقريبًا أخرج هاتفه واتصل بحبيبة مرة أخرى.

لكن الهاتف ما زال مغلقًا.

زفر بضيق.

وألقى نظرة على الشاشة قبل أن يتمتم:

ــ أتصل على فارس أشوف إيه الحكاية دي...

وقافلة تليفونها كل ده ليه!

ضغط على اسم فارس.

ورفع الهاتف إلى أذنه.

وانتظر الرد

******
في الجهة الأخرى...

كانت حبيبة قد بدأت تستعيد وعيها أخيرًا بعد نوبة الهلع التي تعرضت لها.

جلست فوق السرير مستندة إلى الوسادة خلفها.

وقد بدت شاحبة على غير عادتها.

أما فارس...

فكان جالسًا أمامها، لا يكاد يرفع عينيه عنها.

منذ أن سقطت بين يديه، ومنذ أن سمع همساتها المرتبكة وكلماتها الموجوعة التي خرجت منها دون وعي...

لم تغب عن ذهنه تفاصيل ما عرفه من لبنى عن ماضيها.

أدرك أخيرًا سر خوفها من الدم، وسر نوبات الهلع التي كانت تطاردها كلما أعادتها الذاكرة إلى تلك الليلة... الليلة التي كادت تفقد فيها عفتها، وفقدت فيها أمها وهي تحاول حمايتها.

فهم أخيرًا كم عانت وحدها.

وكم حملت نفسها ذنبًا لم ترتكبه.

وكان أكثر ما يؤلمه أنه لم يرَ كل ذلك من قبل.

لم ينتبه إلى الوجع المختبئ خلف ضحكاتها العابثة ومشاحناتها اليومية معه.

شعور ثقيل استقر داخل صدره.

يشبه العجز.

ويشبه الغضب.

ويشبه الوجع معًا.

كان يتمنى لو يضمها إليه.

لو يخبرها أن كل شيء انتهى.

وأنها لم تعد وحدها.

لكن معرفته بطبيعتها جعلته يكتفي بالصمت.

فحبيبة ليست من النوع الذي يقبل الشفقة، وأي خطوة يتقدم بها قبل أن تسمح له هي بذلك قد تدفعها إلى الابتعاد أكثر.

لذلك اكتفى بالجلوس أمامها.

يراقبها بصمت.

ويخفي قلقه خلف ذلك الهدوء الذي اعتاد الجميع رؤيته منه.

كانت عيناه لا تفارقان وجهها المتعب.

يتأكد في كل لحظة أنها بخير.

وأنها عادت إليه من تلك الحالة التي أفزعته أكثر مما سيعترف به يومًا.

وأخيرًا...

سألها بصوت هادئ يحمل من الحنان أكثر مما يحمل من الكلمات:

ــ عاملة إيه دلوقتي؟

حركت حبيبة رأسها ببطء.

ثم رفعت يدها إلى جبهتها.

كان الصداع يطرق رأسها بعنف.

أما الساعات الأخيرة.
فبدت لها كقطع زجاج متناثرة لا تستطيع جمعها.
اختلط كل شيء ببعضه.

ردت بصوت واهن:

ــ الحمد لله.

ظل ينظر إليها للحظات.

ثم زفر ببطء وقال:

ــ قلقتيني عليكي يا حبيبة.

أغمضت عينيها قليلًا وضغطت بأصابعها على جانب رأسها.

ــ أنا مش فاكرة إيه اللي حصلي.

مال نحوها قليلًا وقال بهدوء:

ــ أبدًا...

واضح إنك كنتِ مرهقة الفترة اللي فاتت.

وأُغمي عليكي.

بس الدكتورة طمنتني.

فتحت عينيها ببطء.

وألقت نظرة حولها قبل أن تعود ببصرها إليه.

كانت الوجوه المذعورة لا تزال عالقة بذهنها.

الأصوات المختلطة.

والصرخات.

وتلك الطفلة الصغيرة التي أعادت فتح باب ظنت أنها أغلقته منذ سنوات طويلة.

شعرت بانقباض مؤلم يعصر صدرها.

لكنها لم تكن تملك القدرة على مواجهة الذكرى الآن.

ولا حتى على الهروب منها.

أرادت فقط بعض الهدوء.

تتنفس.

وتستعيد توازنها.

حاولت أن تتعامل معه برسمية كعادتها في الأيام الأخيرة.

أن تضع بينهما تلك المسافة التي أصرت عليها.

لكن الإرهاق كان أقوى من قدرتها على التمثيل.

لاحظ فارس شرودها فسأل بهدوء:

ــ حاسة بحاجة؟ فيه دوخة؟ أو صداع زيادة؟

حركت رأسها نفيًا.

ــ لا... أنا كويسة.

في تلك اللحظة...

رن هاتف فارس.

أخرجه من جيبه.

وما إن وقعت عيناه على اسم المتصل حتى قال:

ــ ده رضوان يا حبيبة.

وأكيد بيتصل علشان يطمن عليكي.

تليفونك فصل شحن وموجود في مكتبي.

ولو سأل عليكي كلميه عادي.

هو ما يعرفش أي حاجة عن اللي حصل.

تمام؟

هزت رأسها موافقة.

ثم قالت بصوت خافت:

ــ كويس إنك قلتله كده علشان ما يقلقش.

رد عليه قبل ما يفصل.

أجاب فارس المكالمة.

لكن رضوان لم ينتظر طويلًا.

جاء صوته سريعًا ومشحونًا بالقلق:

ــ أيوه يا فارس... حبيبة عاملة إيه؟

نظر فارس إلى حبيبة للحظة.

ثم قال:

ــ حبيبة كويسة.

في الجهة الأخرى...

خرج نفس طويل من صدر رضوان.

ــ الحمد لله.

طيب ادّهالي أكلمها.

ناولها فارس الهاتف.

فرفعته إلى أذنها.

ــ أيوه يا رضوان.

جاءها صوته ممزوجًا بالعتاب والقلق في آنٍ واحد.

ــ إيه يا دكتورة؟ كده تقلقيني عليكي؟

قافلة تليفونك ليه كل ده؟

ارتسمت ابتسامة باهتة على شفتيها.

ابتسامة صغيرة لم تصل إلى عينيها.

ــ آسفة والله يا رضوان.

تليفوني فصل شحن.

محطوط على الشاحن.

سكت لحظة.

ثم سألها مباشرة:

ــ مال صوتك؟

إنتِ تعبانة؟

ــ لا خالص.

هو اليوم كان مرهق بس.

لم يقتنع بالكامل.

لكنه لم يشأ الضغط عليها عبر الهاتف.

فاكتفى قائلًا:

ــ طيب.

خليكي عندك.

أنا شوية وجاي أخدك ونرجع البيت.

أغمضت عينيها للحظة.

وكأن مجرد سماع صوته أعطاها شيئًا من الطمأنينة.

ثم قالت:

ــ ماشي يا حبيبي...

مستنياك.

ابتسم رضوان رغم القلق الذي لم يفارقه.

ــ طيب اديني فارس.

عايز أكلمه في حاجة.

أعادت حبيبة الهاتف إليه.

ثم بدأت تتحرك ببطء فوق السرير.

لاحظ فارس ذلك فورًا.

ــ رايحة فين؟

ــ هدخل أغسل وشي.

محتاجة أفوق.

نهض في الحال.

وساعدها حتى وقفت.

كانت خطواتها لا تزال متثاقلة.

فبقي يتابعها بعينيه حتى دخلت الحمام وأغلقت الباب خلفها.

عندها فقط...

خرج إلى الممر.

وأعاد الهاتف إلى أذنه.

ــ أيوه يا رضوان معاك.

جاءه صوت رضوان طبيعيًا في البداية:

ــ أنا جاي في الطريق.

والأدوية معايا.

أخدتها من الممرض.

ويا رب ما أكونش اتأخرت عليكم.

عقد فارس حاجباه.

ــ أدوية؟!

أدوية إيه؟

وممرض مين؟

استغرب رضوان نبرة صوته.

ــ يا ابن الحلال...

العلاج اللي فيه عجز عندكم.

الصندوق معايا أهو وهاجبهولك مسافة الطريق.

ساد الصمت للحظة.

لكنها لم تكن لحظة دهشة.

بل لحظة بدأ فيها شيء غير مفهوم يتشكل داخل عقل فارس.

ــ واحدة واحدة بس يا رضوان.

علاج إيه اللي فيه عجز عندنا؟

أنا ما طلبتش أي أدوية.

ومحدش بلغني إن فيه عجز في المستشفى أصلًا.

شعر رضوان بالاستغراب.

ــ إزاي يعني؟

ده الممرض قالي إن موضوع حادثة الأتوبيسين عمل عجز  عندكم وإنكم محتاجين الأدوية بسرعة.

ازداد انعقاد حاجبي فارس.

وشعر بانقباض بارد يهبط إلى صدره.

ــ ممرض مين يا رضوان؟

وإنت جبت الكلام ده منين؟

ــ واحد اسمه شادي.

ممرض عندك.

قابلته في الشركة.

وعربيته عطلت.

وإنه لازم يوصل شحنة الأدوية للمستشفى بسرعة.

ساد الصمت ثانية كاملة.

ثم سأله فارس بنبرة أكثر حدة:

ــ وإنت استلمت منه الصندوق فعلًا؟

ــ أيوه يا سيدي.

منا بقولك الصندوق معايا أهو في العربية.

أنا في الطريق للمستشفى.

ويمكن الإدارة نسيت تبلغك علشان مشغول ولا حاجة؟

ــ رضوان...

إنت متأكد من كلامك؟

بدأ القلق يتسلل إلى صوت رضوان.

ــ أيوه يا فارس.

هي الحاجات دي فيها هزار؟

وأنا بصراحة قلت أساعد وأوصلها بنفسي.

توقف فارس عن الحركة تمامًا.

شعور ثقيل ضرب صدره فجأة.

لم يكن يعلم شيئًا عن أي عجز.

ولا عن أي طلبية.

ولا وقّع على أي أوراق تخص شحنة جديدة.

والأسوأ من ذلك...

أنه لم يفهم لماذا تُسلَّم شحنة طبية إلى شخص خارج إدارة المستشفى أصلًا.

قال بلهجة حاسمة:

ــ رضوان... اسمعني كويس.

إنت ما تفتحش الصندوق.

وما تسلّمش حاجة لأي حد قبل ما أتأكد من الموضوع.

ــ ليه بس؟ فيه إيه يا فارس؟ أنت هتقلقني ليه؟

ــ أنا مش فاهم إيه اللي بيحصل.

مفيش أي شحنة أنا طلبتها.

ومفيش حد بلغني بعجز في الأدوية.
اسمعني...

إنت فين دلوقتي؟

ــ داخل على كمين.

أهو قدامي.

تصلبت ملامح فارس.

وشعر بقلبه يهبط فجأة.

ــ كمين؟!

ــ أيوه.

ثانية بس...

الظاهر هيوقفوني.

وقبل أن يكمل...

جاء صوت الضابط من خارج السيارة:

ــ الرخص.

أجاب رضوان بهدوء:

ــ حاضر يا باشا.

ثم عاد إلى الهاتف:

ــ ثانية يا فارس.

هطلع من الكمين وأكلمك.

ــ لأ، استنى يا رضوان.

خليك معايا.

وما تسلّمش الصندوق لحد.

لكن صوت رضوان ابتعد قليلًا وهو يخرج أوراق السيارة من محفظته.

ــ اتفضل يا باشا.

قبض فارس على الهاتف بقوة.

وشيء بداخله كان يخبره أن الأمور تتجه في اتجاه سيئ.

سيئ جدًا.

***

أخذ الضابط الرخص.

وفحصها سريعًا.

قبل أن تقع عيناه على الصندوق الموجود في المقعد الخلفي.

ــ إيه الصندوق اللي وراك ده؟

ــ أدوية وشوية مستلزمات طبية.

أشار الضابط إلى أحد الأمناء.

ــ افتح الصندوق ده يا ابني.

وشوفلنا إيه اللي جواه.

في تلك اللحظة...

شعر فارس بأن قلبه هبط إلى معدته.

ــ رضوان...

ــ رضوان... إنت لسه معايا؟

ــ أيوه يا فارس.

ثانية بس، الظاهر إنهم عايزين يفتشوا العربية.

ــ رضوان اسمعني...

لكن أحد أفراد القوة طلب منه الابتعاد عن السيارة.

فقال:

ــ معلش يا فارس هكلمك بعد ما أخلص.

وانقطع الاتصال.

ابتعد فارس بالهاتف عن أذنه ببطء.

وبقي يحدق في الشاشة السوداء للحظات.

شعور سيئ للغاية كان يعتصر صدره.

شعور لم يعرف سببه.

لكن حدسه لم يهدأ لحظة.

***

وقف رضوان بجوار سيارته ينتظر انتهاء التفتيش.

هادئًا من الخارج.

لكن شيئًا داخله بدأ يضطرب.

اقترب ضابط آخر من السيارة.

وألقى نظرة على الصندوق.

ــ إيه اللي في الصندوق ده؟

ــ أدوية يا فندم.

رايح أوصلها للمستشفى.

ــ أدوية إيه؟

ــ أدوية ومستلزمات طبية.

واحد سلّمهالي علشان أوصلها للمستشفى.

ــ تعرف الشخص اللي سلّمهولك؟

ــ بصراحه.... لا أول مرة أشوفه.

بس هو قال إنه ممرض في المستشفى.

وعربيته عطلت في الطريق.

تأمله الضابط للحظات.

ثم سأله:

ــ يعني إنت بتوصل أي طرد مقفول من غير ما تعرف محتوياته بالتفصيل؟

تردد رضوان قليلًا.

ــ أنا فتحته وبصيت عليه يا فندم.

لقيت فيه علب أدوية عادية ومستلزمات طبية.

وما كانش عندي سبب أشك في حاجة.

أشار الضابط إلى أحد الأفراد.

ــ هات الصندوق.

وساعتها هنعرف إن كانت عادية ولا لأ.

تقدم العسكري.

وأخرج الصندوق.

ووضعه أمامهم.

تابع رضوان كل ما يحدث بهدوء.

وكان يظن أن الأمر سينتهي خلال دقائق.

لكن...

كل شيء تغير.

فتح العسكري إحدى العلب.

فتوقف.

ثم فتح ثانية.

وثالثة.

وبدأت ملامحه تتبدل ببطء.

رفع رأسه نحو الضابط.

وقال:

ــ يا فندم...

لازم حضرتك تشوف بنفسك.

اقترب الضابط.

وتناول العبوة من يده.

وبمجرد أن تفحص ما بداخلها...

تغيرت نظرته بالكامل.

فتح عبوة أخرى.

ثم ثالثة.

ثم أمر بفحص البقية.

ومع كل دقيقة...

كان وجهه يزداد صرامة.

أما رضوان...

فبدأ يشعر بأن الأرض تميد تحته.

بعض العلب احتوت بالفعل على أدوية حقيقية.

لكن البعض الآخر...

كان يحتوي على مواد مخدرة.

وأقراص محظورة.

وحقن وسرنجات مغلقة.

كمية كبيرة.

منظمة.

ومخبأة باحتراف.

توقف الضابط أخيرًا.

ثم رفع رأسه نحو رضوان.

ــ إيه ده يا باشمهندس؟

تجمد رضوان في مكانه.

ــ إيه يا فندم؟

رفع الضابط إحدى العبوات أمامه.

ــ إنت قلتلي إن ده صندوق أدوية....

مش مخدرات؟!

نظر رضوان إلى العبوة.

ثم إلى ما أُخرج من الصندوق.

ثم عاد ينظر إليها مرة أخرى.

وكأنه لا يستوعب ما يراه.

ــ لأ...

ثواني يا فندم.

إيه ده؟

ــ إيه...؟! متعرفش إن الصندوق ده فيه مخدرات؟

اتسعت عيناه بصورة مرعبة.

ــ مخدرات؟!

خرجت الكلمة من فمه مشبعة بصدمة حقيقية.

صدمة رجل يرى الكارثة تتكشف أمام عينيه ولا يفهم كيف وصل إليها.

ــ مخدرات إيه يا فندم؟!

أشار الضابط إلى الصندوق.

ــ أهي قدامك يا باشمهندس.

علب أدوية من برّه...

ومن جوّه شابو، وأقراص مخدرة، ومواد تانية محظورة.

ومش كمية صغيرة علشان نقول سوء تفاهم ولا غلطة.

دي كمية كبيرة.

كمية كافية تودّي صاحبها في ستين داهيه.

فإنت دلوقتي عايزني أصدق إنك ما تعرفش عنها حاجة؟

وإنك كنت مجرد بتوصل أدوية للمستشفى؟

اقترب رضوان خطوة دون وعي.

ــ لا يا فندم...

لا.

أكيد فيه حاجة غلط.

أنا معرفش حاجة عن الكلام ده!

ــ إنت اللي كنت سايق العربية والصندوق معاك. مش بتبلى عليك.

أعاد النظر إلى الصندوق، ثم إلى الضابط.

ــ  والله العظيم ما أعرف إن فيه مخدرات.
أنا فتحت الصندوق وشفت محتوياته بنفسي.
كانت علب أدوية ومستلزمات طبية.
وكل حاجة كانت طبيعية.
ما جاش في بالي حتى مجرد شك إن ممكن يكون فيه حاجة بالشكل ده.
أنا اتخدعت زيي زيكم بالظبط.

قال الضابط بلهجة حازمة لا تحمل أي انفعال:

ـ الكلام ده مكانه التحقيق، وهناك هتقول كل اللي عندك بالتفصيل.

إنما دلوقتي، قدامنا مضبوطات لازم تتحرز، وإجراءات لازم تتم، ومصدر الحاجات دي لازم يتحدد.

شعر رضوان وكأن الهواء من حوله أصبح أثقل فجأة.

كأن صدره لم يعد قادرًا على التقاط أنفاسه بشكل طبيعي.

قبل دقائق فقط...

كان كل ما يشغل تفكيره هو سبب إغلاق حبيبة لهاتفها.

وكان يظن أنه يؤدي معروفًا عابرًا لرجل تقطعت به السبل، ويساعد في إيصال أدوية يحتاجها أطفال مرضى.

لكن المشهد انقلب بالكامل.

فوجد نفسه واقفًا أمام صندوق مخدرات.

وتحت نظرات لا ترى فيه رجلًا حاول المساعدة...

بل مشتبهًا به.

كأن الكارثة خرجت من العدم لتقف بجواره وتضع يدها على كتفه.

حاول أن يتكلم.

أن يشرح.

أن يجد تفسيرًا منطقيًا لكل ما يحدث.

لكن الكلمات خرجت متعثرة ومضطربة على غير عادته.

ــ سيادتك، أنا راجل بسيط، مجرد محاسب في مصنع، وعمري ما اتورطت في حاجة زي دي أبدًا. والله ما أعرف عن الصندوق ده أي حاجة غير اللي الراجل قالهولي.

ثم هز رأسه بعدم تصديق، وكأنه ما زال عاجزًا عن استيعاب ما يراه أمامه، وأردف بصوت اختلطت فيه الصدمة بالرجاء:

ـ يا فندم، والله العظيم أنا اتخدعت. كنت فاكر إني بساعد واحد محتاج يوصل أدوية للمستشفى، وما خطرش في بالي لحظة إن الموضوع فيه حاجة غلط. كل اللي أعرفه إن الراجل طلب مني المساعدة، وأنا وافقت بحسن نية... بس.

ظل الضابط ينظر إليه لثوانٍ دون أن يعلّق.

كانت تلك الجمل من أكثر ما يسمعه في عمله.

قسمات وجهه لم تتغير، ولم يظهر عليه إن كان يصدق ما يقوله أم لا.

اكتفى بالنظر مرة أخرى إلى المضبوطات المفرغة أمامه، ثم أشار إلى أحد أفراد القوة لاستكمال إجراءات التحفظ عليها وتوثيقها.

وبعدها التفت إلى رضوان قائلًا بعملية واضحة:

ــ هات بطاقتك.

أنزل رضوان يده ببطء إلى جيبه.

وأخرج بطاقته الشخصية.

لأول مرة منذ سنوات طويلة شعر أن أصابعه ترتجف بهذا الشكل.

مدها إلى الضابط الذي أخذها منه وبدأ في تسجيل بياناته.

الاسم.

العنوان.

المهنة.

رقم الهاتف.

أسئلة متتالية كان رضوان يجيب عنها بصورة آلية، بينما بقي عقله عالقًا في مكان آخر تمامًا.

في الصندوق.

في المضبوطات التي تتكشف أمامه شيئًا فشيئًا.

في أسماء لمواد لم يسمع بها من قبل، وكميات كان الضباط يتعاملون معها بجدية متزايدة كلما تقدم الفحص.

كل عبارة كان يسمعها منهم كانت تهبط فوق رأسه كضربة جديدة.

مواد محظورة.

عقاقير شديدة الخطورة.

وأصناف لا تُضبط عادة إلا في القضايا الكبيرة.

وقف يراقب كل ما يحدث وكأنه يشاهد كابوسًا لا يخصه.

لكن الكارثة كانت أمامه.

وفي سيارته.

وتحت اسمه.

في كل مرة يقع بصره على المضبوطات كان يشعر بصدمة جديدة.

كيف حدث هذا؟

كيف؟

رآه بعينيه.

فتح الصندوق بنفسه.

تفحص محتوياته.

قرأ أسماء بعض الأدوية.

وكان كل شيء يبدو طبيعيًا.

فكيف تحولت الأدوية فجأة إلى كارثة؟

كيف لم ينتبه؟

كيف لم يشك؟

راح عقله يعيد المشهد مرة بعد أخرى.

كل كلمة.

كل نظرة.

كل حركة صدرت من شادي.

باحثًا عن تفصيلة واحدة تفضح الكذبة التي لم يرها.

لكن شيئًا لم يكن يبدو غريبًا.

وجه مرتبك.

صوت صادق.

حديث عن أطفال مصابين.

واستعجال لرجل يخشى أن يتأخر الدواء عن مرضاه.

بل إن كل شيء بدا طبيعيًا أكثر مما ينبغي.

متقنًا...

بدرجة مخيفة.

وفجأة...

شعر بشيء يهبط فوق صدره بثقل.

فارس.

اتسعت عيناه قليلًا.

فارس لم يكن يعرف شيئًا.

لم يطلب شحنة.

ولم يسمع أصلًا عن أي نقص في الأدوية.

وهنا فقط...

بدأت الصورة تتشكل أمامه.

لم يكن المستشفى هو الهدف.

ولا الأطفال.

ولا الأدوية.

بل كان هناك هدف آخر منذ البداية.

هدف واحد.

هو.

شعر ببرودة حادة تسري في أطرافه.

وكأن الحقيقة خرجت أخيرًا من الظلام لتقف أمامه.

لقد خُدع.

ووقع في فخ نُصب له بإحكام.

بل واختير بعناية ليقع فيه.

أخرج هاتفه بسرعة، وكأن عقله تشبث بذلك الخيط الأخير.

اتصل بفارس.

وبمجرد أن سمع فارس ما حدث...

تصلب جسده بالكامل.

اختفت ألوان وجهه تدريجيًا.

وشعر وكأن أحدهم سحب الأرض من تحت قدميه.

لثوانٍ طويلة لم يجد ما يقوله.

كل ما كان يتردد داخل رأسه جملة واحدة:

"الصندوق طلع فيه مخدرات."

مخدرات؟

ورضوان هو من يحملها؟

رضوان تحديدًا؟

أغلق عينيه للحظة.

وداخل صدره بدأ شعور ثقيل بالذنب والغضب والخوف يتضخم بصورة مخيفة.

كان مقتنعًا أن هناك شيئًا غير طبيعي.

شيئًا مدبرًا بعناية.

لكنه لم يكن يملك أي دليل.

ولا كان يملك طريقة لإيقاف ما يحدث.

وفي داخل الغرفة...

كانت حبيبة لا تزال تجهل كل شيء.

لا تعرف أن الرجل الذي وعدها قبل دقائق بأنه سيأتي ليعود بها إلى المنزل...

يجلس الآن وسط قوة شرطة يُعامل باعتباره متهمًا.

أما رضوان...

فكان ينظر حوله وكأنه يبحث عن مخرج لا يراه أحد سواه.

أي خيط.

أي دليل.

أي شيء يمكن أن يخرجه من هذه الورطة.

لكن القلق لم يعد مجرد خوف من التحقيق.

ولا حتى من السجن.

لقد بدأ يدرك حجم الكارثة الحقيقية.

فإذا سُجلت الواقعة باعتبارها حيازة مواد مخدرة بقصد الاتجار...

فلن يدافع عن نفسه أمام تهمة فقط.

بل أمام مصير كامل قد ينهار في لحظة.

وكان أكثر ما يرعبه...

أنه لا يملك شيئًا.

لا شاهدًا.

ولا دليلًا.

ولا حتى أثرًا لذلك الرجل الذي سلّمه الصندوق.

لا يملك سوى كلمته.

وكلمات شخص اختفى فجأة وكأنه لم يكن موجودًا من الأساس.

اقترب أحد أفراد القوة منه.

وطلب منه التوجه إلى سيارة الشرطة لاستكمال الإجراءات.

تراجع رضوان خطوة دون وعي.

وهبطت يده التي تمسك بالهاتف إلى جواره.

ثم قال بصوت امتزج فيه الذهول بالرجاء:

ــ أنا ما عملتش أي حاجة علشان توجهوا لي التهمة. في كاميرات في الشركة، وتقدروا حضراتكم تراجعوها؟

أجابه الضابط بهدوء:

ــ الواقعة هتتثبت بالمضبوطات وأقوالك، والجهات المختصة هي اللي هتحدد الوصف القانوني بعد استكمال التحقيق.

كانت إجابة قانونية ومنطقية.

لكنها لم تمنحه أي شعور بالأمان.

بل زادت الإحساس بالعجز داخله.

فهو يعلم جيدًا أن المخدرات وُجدت في سيارته.

وأن الصندوق كان بحوزته.

وأن الحقيقة التي يعرفها وحده لا تكفي الآن.

ألقى نظرة أخيرة على الصندوق.

ثم رفع عينيه إلى الضابط، وقد امتلأ وجهه بالذهول والانكسار.

ــ والله العظيم ما أعرف حاجة عن اللي جواه.

لم يرد أحد.

ولم يجد في الوجوه المحيطة به ما يدل على أن أحدًا صدقه.

وبعد دقائق...

تم التحفظ على المضبوطات.

وتوثيقها.

واستكمال الإجراءات الأولية.

ثم نُقل رضوان لاستكمال التحقيق معه.

جلس داخل سيارة الشرطة.

شاحب الوجه.

صامتًا.

ينظر أمامه دون أن يرى الطريق.

ولا السيارات.

ولا الأضواء المارة خلف الزجاج.

كانت كلمات فارس تتردد في رأسه بلا توقف:

"مفيش أي شحنة أنا طلبتها."

أعادها مرة.

ثم مرة أخرى.

ومع كل مرة كان حجم الورطة يتضح أكثر.

إذا كان فارس لا يعرف شيئًا...

فمن يكون شادي؟

ومن أرسله؟

ولماذا اختاره هو بالذات؟

ولماذا كل هذا التخطيط؟

أسئلة كثيرة راحت تضرب عقله الواحد تلو الآخر.

لكن لم تكن هناك إجابة.

ثم تذكر حبيبة.

وفجأة انقبض قلبه بقوة.

تذكر أنها كانت تنتظره.

تذكر أنه وعدها أن يأتي ليأخذها ويعودا إلى المنزل معًا.

تذكر ضحكتها عبر الهاتف قبل دقائق قليلة.

وأنها قالت له:

"مستنياك."

أغمض عينيه للحظة.

وشعر بشيء يحترق داخل صدره.

لم يكن خائفًا على نفسه بقدر خوفه عليها.

يعرف حبيبة جيدًا.

ويعرف أنها لن تتحمل سماع مثل هذا الخبر.

ويعرف كيف يمكن أن تهدمها الصدمة.

ضغط على شفتيه بقوة.

وكأنه يحاول حبس خوفه داخل صدره.

لكنه فشل.

ولأول مرة منذ سنوات طويلة...

شعر أن الأرض تنسحب من تحت قدميه ببطء.

لا يعرف ماذا ينتظره في القسم.

ولا ماذا سيحدث بعد ساعات.

ولا كيف سيخرج من هذه الورطة.

ولا كيف سيثبت براءته.

ولا من الذي قرر أن يحوله بين لحظة وأخرى من رجل يسعى لمساعدة الآخرين...

إلى متهم في قضية قد تدمر حياته كلها.

لكنه كان يعلم شيئًا واحدًا فقط.

أنه دخل ذلك الكمين حاملًا أمانة ظنها دواءً...

وخرج منه متهمًا يحمل فوق كتفيه كارثة لا يعرف كيف ينجو منها.
********

أما فارس...

فظل واقفًا مكانه للحظات طويلة.

مذهولًا.

كأن الكلمات التي سمعها قبل لحظات سحبت الهواء من رئتيه دفعة واحدة.

لم يتحرك.

ولم يستطع حتى استيعاب ما حدث بصورة كاملة.

رضوان...

رضوان بالذات؟

أطبق فكيه بقوة.

وحاول أن يعيد ترتيب أفكاره.

لكن الصدمة كانت أقوى من أي محاولة للتركيز.

كل ما كان يراه أمامه هو صورة رضوان.

هادئًا كعادته.

يساعد الجميع.

يضع نفسه في آخر القائمة دائمًا.

ويتحمل ما لا يطيقه غيره دون أن يشتكي.

ثم يجد نفسه فجأة متهمًا في قضية مخدرات.

مرر يده على وجهه بعنف.

وكأنه يحاول إيقاظ نفسه من كابوس ثقيل.

ثم استدار ببطء.

ونظر نحو غرفة حبيبة.

وهنا فقط...

شعر بقلبه ينقبض بقوة.

لو عرفت الآن...

ستنهار.

فبالنسبة لحبيبة...

لم يكن رضوان مجرد أخ.

بل كان الأب الذي لم تعرف غيره.

واليد التي أمسكت بها كلما تعثرت.

والسند الذي لم يتأخر عنها يومًا.

يعرف جيدًا ماذا يعني رضوان بالنسبة لها.

ويعرف أن سماعها لهذا الخبر وهي بهذه الحالة قد يحطمها تمامًا.

أغمض عينيه بقوة.

وقبض على يديه حتى برزت عروقه.

ثم أجبر نفسه على التماسك.

لا وقت للصدمة.

ولا وقت للغضب.

رضوان يحتاجه الآن.

وحبيبة تحتاجه أيضًا.

وهو مضطر أن يكون قويًا من أجل الاثنين.

فتح عينيه أخيرًا.

وارتدى قناعه المعتاد.

ذلك الهدوء الذي يراه الناس دائمًا...

ولا يعرفون كم يكلفه الحفاظ عليه.

***

بعد دقائق...

فتحت حبيبة باب الحمام وخرجت.

توقفت مكانها للحظة.

لتجده جالسًا أمام صينية طعام رتبها بنفسه.

وكأن شيئًا لم يحدث.

وكأن العالم ما زال طبيعيًا.

رفع رأسه إليها.

وابتسم ابتسامة خفيفة.

ابتسامة لم تكشف شيئًا مما كان يشتعل داخله.

جلست على طرف السرير بصمت.

دون أن تنطق بكلمة.

اقترب منها قليلًا وقال بهدوء:

ــ يلا علشان تاكلي.

هزت رأسها.

ــ لأ. مش عايزة.

رفع حاجبه بخفة وقال:

ــ يعني ينفع رضوان يجي دلوقتي ويقولي: سايب أختي من غير أكل كل ده يا فارس؟ هي دي وصيتي ليك؟ أنتِ ناسية ولا إيه؟

نظرت إليه طويلًا.

وشعرت بشيء غريب يتحرك داخل قلبها.

شيء لم تستطع أن تمنحه اسمًا.

تذكرت كلام لبنى.

وتذكرت كل المواقف التي كان فيها أول من يظهر بجوارها.

تذكرت خوفه عليها اليوم.

وارتباكه وهو يحملها.

ونظراته التي حاول إخفاءها طوال الوقت.

وتذكرت أيضًا أنها تعبت من الهروب.

تعبت من دفن كل شيء داخلها.

وتعبت من حمل هذا الثقل وحدها.

أغمضت عينيها.

وأخذت نفسًا طويلًا.

ثم رفعت رأسها نحوه قائلة:

ــ فارس... أنا عايزة أتكلم معاك.

وأقولك اللي جوايا.

ساد الصمت بينهما للحظة.

وكان جزء بداخله يتمنى أن يسمع كل شيء.

أن يترك لها المجال لتتكلم.

لتبوح.

لتزيح الحمل عن قلبها أخيرًا.

لكنه لم يستطع.

ليس الآن.

ليس وهي مرهقة بهذا الشكل.

وليس بينما رضوان يمر بما يمر به.

سحب كرسيًا وجلس أمامها مباشرة.

ثم قال برفق:

ــ حبيبتي... كلي الأول.

وأنا هسمعك للآخر.

أنا كمان عندي كلام كتير عايز أقولهولك.

بس بعد ما تاكلي.

اتفقنا؟

هزت رأسها معترضة.

وقد بدا الإصرار واضحًا في عينيها.

ــ لا يا فارس. أرجوك اسمعني.

موضوع معاذ مش زي ما أنت فاهم...

قاطعها فورًا.

لكن صوته هذه المرة خرج حنونًا على غير عادته.

ــ هشش... مش عايز أسمع حاجة دلوقتي.

أنتِ تعبانة.

ولما تبقي كويسة وأطمن عليكي... هسمعك.

صدقيني.

بس لازم تاكلي الأول.

الدكتورة كتبتلك على محلول مغذي.

لازم أعلقهولك قبل ما رضوان يجي ويشوفك.

مش عايزه يقلق عليكي.

اتفقنا؟

وبكرة نتكلم زي ما إنتِ عايزة.

تمام؟

ظلت تنظر إليه لثوانٍ.

وكأنها تحاول قراءة ما يخفيه خلف هدوئه.

لكنها لم تجد سوى ذلك الحائط الصلب الذي اعتاد دائمًا إقامته حول مشاعره.

فزفرت باستسلام.

ــ تمام.

ابتسم ابتسامة صغيرة.

ابتسامة لم تصل إلى عينيه.

لأن عقله كان ما يزال عالقًا في مكان آخر.

في تلك المصيدة التي أغلقت حولهم فجأة.

ثم قال:

ــ حاولي تاكلي.

وأنا هجهزلك المحلول.

***

بدأت حبيبة تتناول بضع لقيمات بصعوبة.

بينما انشغل فارس بتجهيز المحلول.

كانت يداه تعملان باحتراف الطبيب المعتاد على هذه الأمور.

أما عقله...

فكان بعيدًا تمامًا.

يعيد تحليل كل كلمة قالها رضوان.

وكل تفصيلة رواها.

وكل احتمال ممكن.

من يكون شادي؟

وأين اختفى؟

ولماذا اختير رضوان تحديدًا؟

كلما فكر أكثر...

ازداد اقتناعًا أن ما حدث لم يكن صدفة.

بل خطة أُعدت بدقة.

شخص ما أراد إيقاع رضوان.

وشخص ما نجح.

اقترب منها بعد أن انتهى.

ووصل المحلول في يدها برفق.

ثم جلس يراقبها بصمت.

صامتًا بعينيه.

وعاصفًا من الداخل.

***

وبعد وقت قصير...

بدأ الدواء يؤدي مفعوله.

شعرت حبيبة بثقل في جفونها.

ونظرت إليه بنعاس.

ــ فارس... أنا دايخة.

نهض فورًا واقترب منها.

ثم أمسك يدها بحنان.

وقال بصوت خافت:

ــ نامي.

متفكريش في حاجة.

استكانت ملامحها تدريجيًا.

وأغلقت عينيها ببطء.

حتى استسلمت للنوم تمامًا.

ظل ممسكًا بيدها للحظات.

يتأمل وجهها الهادئ.

ويدعو في داخله ألا تستيقظ قبل أن يجد حلًا لما حدث.

ثم همس بصوت بالكاد سُمع:

ــ أنا آسف يا حبيبة... آسف.

معنديش استعداد أخسرك.

عدل الوسادة خلف رأسها.

ثم شد الغطاء عليها بعناية.

كأنها شيء ثمين يخشى عليه من العالم كله.

وبعدها نهض أخيرًا.

وغادر الغرفة.

***

في الخارج...

وجد لبنى تقف في الممر.

فتوقف أمامها مباشرة.

وقال بنبرة جادة لم تعتدها منه:

ــ دكتورة لبنى... حبيبة أمانة في رقبتك.

خلي بالك منها.

مش عايزها تلاحظ غيابي لحد ما أرجع.

اتفقنا؟

فهمت لبنى من نظرته أن هناك أمرًا خطيرًا حدث.

شيئًا أكبر مما يبدو على السطح.

لكنها لم تسأله.

واكتفت بالإيماء قائلة:

ــ متقلقش يا دكتور.

حبيبة في عينيا.

هز رأسه شاكرًا.

ثم استدار وغادر المستشفى.

***

كانت خطواته سريعة.

حادة.

تزداد سرعة مع كل ثانية تمر.

وعيناه تشتعلان بغضب لم يعد قادرًا على إخفائه.

غضب على ما حدث.

وعلى عجزه عن منع حدوثه.

وعلى الشخص الذي قرر أن يزج برضوان في تلك الكارثة.

أخرج هاتفه أثناء سيره.

وضغط على اسم نادر.

رن الهاتف مرات قليلة.

ثم جاءه صوته من الطرف الآخر.

بدا مسترخيًا.

منشغلًا بالاستعداد لتناول طعامه.

لكن ذلك الاسترخاء تلاشى تمامًا بمجرد أن سمع نبرة فارس.

ــ حصلني على قسم الـ....

لم يكمل فارس جملته.

لكن نادر اعتدل في جلسته فورًا.

واتسعت عيناه.

فهو يعرف تلك النبرة جيدًا.

نبرة لا تخرج من فارس إلا عندما تكون هناك مصيبة حقيقية.

نهض من مكانه دفعة واحدة.

والتقط مفاتيحه وهو يقول:

ــ يا دي الليلة اللي مش معدية النهارده. هو أنا ناقص..!

********

في مكان آخر...

كان فريد يجلس خلف مكتبه في هدوءٍ مريب.

تستقر بين أصابعه قداحة معدنية يقلبها ببطء، حركة متكررة ومنتظمة كأنها جزء من طقس اعتاده كلما انشغل عقله بشيء ما.

ملامحه كانت ساكنة كعادتها.

ساكنة إلى حد يصعب معه معرفة ما يدور خلفها.

أما عيناه...

فكانتا مثبتتين أمامه دون استعجال.

كرجل يعرف جيدًا أن الأمور تسير كما خطط لها تمامًا.

رن هاتفه.

فالتقطه بهدوء.

ورفعه إلى أذنه.

ليأتيه صوت الجيار من الطرف الآخر:

ــ حصل معاليك.

ساد الصمت لثوانٍ.

لم يبدُ خلالها على فريد أي رد فعل.

فقط استمرت أصابعه في الدوران حول القداحة المعدنية.

ثم سأل بهدوء:

ــ والكمين؟

جاءه الرد فورًا:

ــ لقوا كل حاجة. زي ما خططت بالظبط يا باشا.

وكلبشوه وفي طريقهم على القسم.

ويقابلنا بقى لو طلع منها.

توقفت القداحة بين أصابع فريد.

وارتسمت على شفتيه ابتسامة باهتة.

لم تكن ابتسامة فرح.

ولا انتصار.

بل شيئًا أكثر برودة.

وأخطر.

ابتسامة رجل لم يفاجئه شيء لأنه كان يعرف النتيجة مسبقًا.

ثم أردف بكلمة واحدة:

ــ شادي.

فهم الجيار ما يقصده على الفور.

فقال:

ــ أيوه.

ده الدليل الوحيد.

هنسفره على أي مكنة لحد ما...

قاطعه فريد.

بصوت منخفض.

هادئ.

لكن القسوة التي حملها كانت كفيلة بتجميد الدم في العروق.

ــ خلّص عليه.

ساد الصمت للحظة.

ثم جاء صوت الجيار مترددًا:

ــ أيوه يا باشا... بس...

رفع فريد عينيه ببطء.

وضيّقهما.

وقال بالنبرة نفسها:

ــ سمعتني يا جيار؟!

ابتلع الرجل ريقه على الطرف الآخر.

ورد بسرعة:

ــ أوامرك معاليك.

اعتبره حصل.

أنهى فريد المكالمة.

ووضع الهاتف فوق سطح المكتب بهدوء شديد.

ثم أمال رأسه إلى الخلف قليلًا.

وأطلق ضحكة خافتة.

هادئة.

لكنها كانت كافية لتبعث القشعريرة في جسد أي شخص يسمعها.

ضحكة خالية من أي مشاعر حقيقية.

لا غضب فيها.

ولا حماس.

ولا حتى شماتة.

وكأن ما حدث لم يكن أكثر من خطوة صغيرة في لعبة طويلة.

مرر إبهامه فوق حافة القداحة.

ثم همس بصوت منخفض:

ــ تعرف الفرق بينك وبيني يا رضوان؟

توقفت أنفاس المكان وكأنها تنتظر بقية حديثه.

فأكمل وعيناه تلمعان ببرود مخيف:

ــ إنك طول عمرك بتثق في الناس...

وأنا طول عمري بستخدم الثقة دي.

نهض من مقعده ببطء.

واتجه نحو النافذة.

ووقف أمام الزجاج العريض.

ينظر إلى ظلام الليل الممتد في الخارج.

أضواء بعيدة.

وشوارع هادئة.

وعالم كامل لا يعلم شيئًا عما يجري في الخفاء.

أما هو...

فكان ينظر إلى ذلك الظلام وكأنه يرى ما هو أبعد منه.

وعلى شفتيه بقايا تلك الابتسامة الباردة.

بينما حملت عيناه وعدًا صريحًا ومخيفًا في الوقت نفسه.

وعدًا بأن ما حدث الليلة...

لم يكن نهاية شيء.

بل بدايته فقط.

يتبع.......


© قصص وروايات مريم نصار — جميع الحقوق محفوظة. يُمنع نسخ هذا الفصل أو إعادة نشره كليًا أو جزئيًا دون إذن كتابي مسبق من الكاتبة.

🔔 عجبك الفصل؟ تابعي المدونةعشان توصلك الفصول الجديدة أول بأول🔔 متابعة المدونةاضغطي، سجّلي بحساب جوجل، وخلاص ✔

تعليقات✍️ أضف تعليقًا

  1. البارت تحفه كالعادة بس زعلت على رضوان اوووى براحه عليه يا مريومه

    ردحذف
  2. حلو البارت يامريوم بس هتبقي حزن الايام الجايه الله ينتقم منه فريد اول مشوفت موضوع الصندوق قلت هو الي وراها 😥😥

    ردحذف
  3. مش لاقيه كلمات تعبر عن روعه وجمال البارت وخوف فارس على
    حبيبه ورضوان يبين أصله الطيب

    ردحذف
  4. تسلم ايدك يا قمر 🎉🎉🎉
    الحلقه جامده اوي اوي فيها تشويق منك لله يا فريد يا بوبي 🤣🤣

    ردحذف
  5. راضوان صعبان عليه اوي امتي هيرتاح ويفرح بقي

    ردحذف
  6. تسلمي يا مبدعه تحفه❤️❤️
    طمنينا علي رضوان يا مريم مش كدا قلبي هيقف مش عارفه افكر🥺💜❤️

    ردحذف
  7. منك لله يا فريد الكلب حرام يا مريومه والله 😭

    ردحذف

إرسال تعليق

بحث هذه المدونة الإلكترونية