قصص وروايات مريم نصار

قصص وروايات مريم نصار: المدونة الرسمية للكاتبة والروائية المصرية مريم نصار. هنا تقرئين حكايات تلمس القلب وتشبه تفاصيل حياتنا: روايات وقصص تجمع بين الرومانسية والدراما والتشويق، بأسلوب قريب من القارئ وشخصيات تعيش معك بعد الفصل الأخير. تُنشر كل رواية فصلًا بفصل بترتيب منظم ومريح للقراءة، وتقدرين تتابعين الفصول الجديدة أولًا بأول. أهلًا بك في عالم مريم نصار.

الفصل الثالث. نوفيلا كِتارا



نوفيلا كِتارا

#عندما يخطط الشيـ.طان

قال فضيلة الشيخ محمد بن عثیمین رحمه الله تعالى:
▪︎| لا تعتمد على ما في قلبك من رسوخ الإيمان، وتعتقد أنه لن يتسلط عليك الشيطان، ولن يتسرب إليك هوى النفس الأمارة بالسوء، بل كن دائماً لاجئاً إلى الله سائلاً الثبات.

┈┈••⊰✿✿✿✿⊱••┈┈┈┈••⊰✿✿✿✿⊱••┈┈
بسم الله نبدأ


شهاب نازل من عند مدير المباحث بعد ما أدلى بكل المعلومات والتفاصيل اللي تخص القضيه ورايح المكتب وسمع تليفونه بيرن بإستمرار وفصل، وشاف إن هاله اتصلت كتير عليه واستغرب كمية المكالمات دي واتصل عليها وردت بسرعه:- الو شهاب انت كنت فين كل ده؟!
شهاب:- اهدي يا هاله في ايه؟! انا كنت عند مدير المباحث والتليفون كان في المكتب.
هاله :- طيب،طيب اوكي انت فاضي امتى؟

شهاب بشك:- في إيه يا هاله!! ومال صوتك؟
هاله:- لما نتقابل هتعرف، بس لازم اشوفك ويا ريت دلوقتي ياشهاب.
شهاب بص ف الساعه وقال:-طيب انا هخرج دلوقتي ونتقابل كمان ساعه في البيت.
هاله برفض:- لأ لأ لأ، الياس وايلين في البيت وانا مش عايزاهم يسمعوا اللي انا عايزه اقوله ليك.
شهاب:- اممم، طيب تمام انا هاجيلك على المعمل ونطلع ع اي مكان.
هاله:-اوكي بس ارجوك ما تتاخرش.
شهاب:- مسافه السكه واكون عندك، مع السلامه.
قفل معاها واخد المفاتيح والسلاح وخرج ركب العربيه وراح اخدها من قدام المعمل لأنها كانت منتظراه،وساق بيها لمكان هادي وركن العربيه وقال بتعجب:- هاله!! يعني انتي جايباني من الشغل على هنا علشان تقولي ان خط كِتارا مطابق لخط الإعتراف؟ طيب ما كنتي قلتي الكلمتين دول في المكالمه.
هاله:-اسمعني بس يا شهاب مش ده السبب الاساسي إللي جبتك علشانه،انا اكتشفت حاجه غريبه في الورقه واكيد دي رساله من كِتارا.
شهاب بتركيز:- حاجه ايه يا هاله؟!
هاله:- فتحت الورقه وقالت:-أنا عايزاك تبص في قلب الامضاء كويس اوي.
شهاب بص بتركيز وقال بوجوم:- ايه ده؟! ده حرف ال X جوه دايره.
هاله بإيماء:- بالضبط؛ والحرف ده اكيد حل للغز مهم جداً في القضية.
شهاب مط شفايفه وقال:- يعني ممكن كِتارا تكون انتـ.حرت بسبب شيء غامض وسايبه دليل؟
هاله :- وممكن ما تكونش انتـ.حرت من الأساس يا شهاب؟
شهاب هرش في دقنه وقال:- طيب ايه X ده؟! طيب ده مثلا مفتاح لحاجه غامضه؟! أو اسم حد؟! أو رمز لأي شئ يخص حياة كِتارا؟
حل الصمت بينهم وكل واحد فكر في اللغز الجديد ده؛ وكسر الصمت شهاب وقال بتفكير:- اسمعي يا هاله احنا لازم نروح شقه كِتارا ونفتشها المرادي كويس اوي.
هاله:- موافقه طبعاً، وده رأيي كمان لازم فعلاً نروح و في أسرع وقت.
داس بنزين واتحرك على شقه كِتارا ووصل هناك وطلب من الأمن يفتحوا باب الشقه ودخل هو وهاله، وبدأوا يدوروا في كل حاجه تخصها.
هاله قالت:- أنا هادخل أدور في اوضة النوم بتاعتها.
شهاب بموافقه:- تمام وأنا هادور في مكتبها.
كل واحد راح في اتجاه ،هاله فتحت الدولاب ودورت في كل حاجه وفي وسط هدومها وادراج الدولاب، وراحت عند السرير فتحت درج الكومود، وادراج التسريحه، وشهاب بيدور في ارفف الكتب والمكتب وصور الحائط وما فيش اي خيط يوصل للحرف ده X ولأن كِتارا دكتوره كيميائيه يبقى اكيد تقصد فك شفره وحل اللغز بالرمز ده، شهاب وقف قدام الخزنه وجرب الرمز أكتر من مرة وما فتحتش، هاله بتدور في الحمام،وشهاب بيدور في الليفنج وبعد فتره كبيره ما وصلوش لاي حاجه وكانت النتيجه صفر، شهاب بضجر.
:- طيب وبعدين يا هاله موصلناش لحاجه.
هاله بحيره:-مش عارفه يا شهاب؛بس اكيد الحرف ده وراه لغز كبير وأنا متأكدة أنه هيوصلنا للحقيقه، لحظه واحده كده.
جابت ورقه وقلم وكتبت كل اسماء المحيطين بكِتارا وأصدقائها في الشغل واسم المعمل ومافيش وجود لحرف X واتكلمت بخنقه:- طيب والعمل؟!
شهاب بتفكير:- اكيد هنوصل لحل اللغز ما فيش جريمه كامله،انا بكره هاجيب إذن نيابه بالتفتيش في شقق العماره كلها يمكن نوصل لحل، زائد تقرير الطب الشرعي هيكون هو الفيصل.
هاله:- صح كده ممكن حد من الجيران يفيدنا كمان.
شهاب بتنبيه:- الرمز ده ما حدش يعرف بيه خالص من سكان العماره يا هاله، لانك لو قلتي.......!
هاله كملت:- يبقى انا كده بفتح عين القا.تل بأنه ياخد حذرو كويس.
شهاب:- برافو عليكي ويلا بقى نروح البيت علشان منتأخرش ع الأولاد.
هاله:- يلا بينا

الياس بيلعب مع يوسف واللعب عباره عن مسدسات واسلحه كلبشات وكلها ادوات في مجال الشرطه وكانوا مبسوطين مع بعض والياس ويوسف اتعودوا على بعض بوجودهم، لكن ايلين قاعده مع والده هاله قدام التلفزيون وحاسه بالملل لأن ما فيش اي لعبه تلعب بيها من لعب البنات الصغيره وراحت عند الياس وقالت:-الياس انا عايزه لعبه.
الياس:-تعالي العبي معانا.
ايلين برفض:- نو، دي كلها لعب شرطه انا عايزه عروسه.
الياس:- طيب لما نرجع البيت العبي بالعرايس بتاعتك.
ايلين بزهق:- اوف بقى انا عايزه ماما وبابا راحوا فين كل ده؟ هم نسيونا يا الياس؟
شهاب من وراها بابتسامة:- هو في حد ينسى بنوته زي القمر زيك يا ايلين؟!
وطلع ايده من ورا ضهره وكانت معاه العروسه بتاعتها، ورجعت ليها الفرحه من تاني واخدت العروسه وقالت بفرحه:- واو دي عروستي، عرووستي، حضرتك جبتهالي يا عمو شهاب؟
شهاب ابتسم:- ايوه يا حبيبتي انا عارف إنك قاعده وحاسه بالملل أكيد،وعلشان كده انا رحت مخصوص اجيبهالك.
ايلين ببراءه:- بابا وماما رجعوا البيت؟
شهاب نزل لمستواها وقال:- انتي زهقتي من عمه شهاب وطنط هاله اللي بيحبوكي؟
ايلين هزت راسها بطفوليه ورفض وقالت:- نو بس انا زعلانه كتير من ماما ،هي كل يوم تقولنا انا عمري ما هاسيبكم في يوم تبعدوا عني، دلوقت سابتنا خمس ايام اهو، تعرف ياعمو؟ انا بعد الايام على صوابعي علشان لما تيجي ماما هزعل منها بس انا عارفه انها هتصالحني.
هاله مشفقه عليهم جداً وشهاب بإبتسامة مصطنعه:- اكيد هتصالحك يا حبيبتي انا مش عايزك تزعلي من ماما وبابا اوكي؟
ايلين هزت راسها:- اوكي يا عمو.
هاله باستها من خدها وقالت :- هي دي ايلين الشجاعة برافو عليكي يا حبيبتي، يلا بقى روحي العبي بالعروسه بتاعتك اكون جهزت الغدا.
ايلين راحت تلعب، شهاب راح في اتجاه الحمام لكن وقف لما سمع إلياس وهو بيقول:- اكيد ماما زعلانه من بابا.
شهاب انتبه وراجع يسأله لكن هاله شاورتله ان هى هتتصرف وراحت عند إلياس وقالت بدهاء:- لأ طبعا يا إلياس مامتك عمرها ما هتزعل من باباك، وايه يعني اللي هيزعلها؟
إلياس ببراءه:- علشان اتخانقوا مع بعض، وبابا قال لماما انا زهقت منك ونفسي اخلص منك النهارده قبل بكره.

بعد اسبوع تقريبا من الحادث.

في الحبس كان في مجموعه من الرجال والشباب من المقبوض عليهم في تهم وجرائم مختلفه وموجود فيصل وموسى،في وسطهم سراج قاعد في ركن وساكت تماما، وفيصل دائما متوتر وخايف من هاجس الإعدام، لكن موسى رايح جاي زي المجنون وخبط وزعق بجنون:- افتحوووولي انا لازم اخرج من هنا حالا، انا ابوهاااا ومستحيل اقتـ.لها، افتحوووولي انا لازم اجيب حق بنتي اللي ضاااااع.
ولف بص على سراج وعيونه كلها شر، وقرب عليه بهجوم وحاول يخنقه وهو بيتكلم بجنون:- انا هاجيب حق بنتي ودلوقتي ،مش انت عايزني اتسجن؟ انت تقتـ.ل بنتي وتتهمني اني انا قتـ.لتها؟! صحيح تقـ.تل القتـ.يل وتمشي في جنازته،انا اشرفلي اتسجن بس بعد ما اقتلك واخلص منك انت كمان.
الكل واقف يتفرج وفيصل خايف، سراج بيحاول يتنفس وفك ايديه من حوالين رقبته وبيكح وزعق وهو بينهج:- انت مجنوووون.؟ انت هتفوق امتى من اوهامك دي؟ انا ما قتـ.لتش حد انت اللي قتـ.لتها؛ انت السبب في كل حاجه حصلت؛ يا ريتني ما عرفتك انت وبنتك؛ اخرتها اتسجن ويمكن اتعدم ظلم كمان!!! ومش انا اللي اقت*ل القت*يل وامشي في جنازته ده أنت!!!! انت بعد ما طلقت مراتك، وأولادك بعدوا عنك واختاروا يعيشوا مع امهم لقيت نفسك وحيد، ولما حسيت انك خلاص هتفلس فكرت في قت*ل بنتك مش كده يا موسى؟! وبعدين اهو انت لسه قايلها بعضمة لسانك ومعترف على نفسك أنك هاتخلص مني انا كمان،!!!! معنى كلامك ده إيه؟
موسى باندفاع:- اخرس يا حيوا*ن، بقى ده اسلوب تتكلم بيه مع واحد في عمر ابوك؟طول عمرك همجي ومتسول ولفيت على بنتي علشان تتجوزها،وأنت خلصت على بنتي وانا هاخلص عليك، انت مريض بحب المال.
سراج:- لو انا فعلاً مريض بحب المال؟! فاعايز افكرك بس اني متجوز كِتارا من 9 سنين.
باب الزنزانه اتفتح والعسكري نده وقال:- موسى وسراج وفيصل قدامي على مكتب المقدم شهاب. راحوا المكتب وكل واحد حزين ومخنوق وخايفين في نفس الوقت، شهاب قاعد على طرف المكتب وماسك التقارير وقالهم:- نتيجة تقرير الطب الشرعي وصلت النهارده!!!
موسى جري عليه وقال بلهفه:- بنتي ما انتح*رتش مش كده بنتي اتقت*لت على ايد الوغد ده.

سراج بنفاذ صبر:- انت لحد امتى هتفضل تتهمني ظلم وكمان الضابط شهاب اتهمني ظلم انا يستحيل اقت*ل حد.
فيصل واقف برجفه قدام شهاب وقال:- ارجوك، ارجوك يافندم قول إن التقرير بيقول وفاه طبيعيه مش قت*ل، هي انتح*رت بإرادتها مش كده؟!
موسى برفض:- لأ بنتي اتق*لت عمد.
شهاب هز راسه وقال بحزم:- سكووووت أنت وهو خلوني اتكلم.
وبص لموسى وكمل:- لأ، التقرير مكتوب فيه إن حالة الوفاه بسبب تهشم في الجمجمة نتيجة الاصطدام بجسم صلب وان مافيش اي اعتداءات او خدوش في الجثه تدل عن الدفاع عن النفس،والدكتوره كِتارا قبل ما تنت*حر كتبت اعتراف على نفسها بخط ايدها بانها هتنت*حر بكامل إرادتها.
فيصل بفرحه:- يحيا العدل يحيا العدل، يحيا ال..... احم.
وسكت من نظرات شهاب وموسى. وسراج نفخ بأريحية ومسح وشه بأيديه وهى متكلبشه،موسى اتكلم بتيه:- مش ممكن مستحيل انتم اكيد غلطانين، سراج هو اللي قت*لها هو اللي قت*لها.
شهاب قام وراح عند كرسي المكتب وقال:- انا ليا بالأدلة والبراهين يا سيد موسى، هاتلي دليل وانا هاسجنه،لكن دلوقت انتوا التلاته هيتم اخلاء طرفكم من القضيه.
موسى بهستريا:- يعني ايه هيخرج منها؟! انا باقول لحضرتك ان بنتي ما ما*تتش بإرادتها؛بنتي اتق*تلت يا حضرة الضابط وما فيش غير سراج اللي ورا العامله دي، واكبر دليل الوديعه، ارجوك افهمني.
سراج بتنهيدة:- انا مقدر موقفك علشان هي بنتك لكن تقرير الطب الشرعي مش هيكون كذب وانا ما كنتش موجود وقت الحادثه يا ريت تفهم وبسرعه، واعرف إن اللي راحت دي تبقى مراتي وام أولادي.

موسى بدموع اب بص لشهاب وهو بيشاور على سراج وقال بقهر:- انت هتسيبه يفلت بعملته دي يا سيادة الضابط؟!
شهاب بتنهيده وقال:- انا ما قدر شعورك كأب فقد بنته ،لكن صدقني ما فيش اي دليل او حتى بصمه او اي شيء يثير الشك في الحادثه دي، احنا كنا منتظرين التقرير لانه بيكون الفيصل في الحالات اللي زي دي، وغير كده بنت حضرتك كاتبه اعتراف على نفسها بخط ايدها، والاعتراف متطابق لنفس خط الدكتورة، يعني انا بنفذ المطلوب مني، والنهارده كل واحد هيرجع على بيته لكن بعد شوية اجراءات، وبكره هايتم اجراءات الدفن وبكده هتتقفل القضيه.

وبص لسراج وكمل:- وانت يا سراج اولادك هتاخدهم بس بعد إجراءات الد.فن، لكن هتمضي بإقرار ضمان سلامتهم.
سراج بحزن:- اللي تشوفه حضرتك هاعمله.
شهاب:- الأولاد لحد دلوقتي ما يعرفوش ان والدتهم تو*فت ويا ريت تمهد لهم الخبر واحده واحده علشان الصدمه هتكون كبيره عليهم لأنهم من الواضح كانوا متعلقين بيها.
سراج بتنهيده:- أكيد، أكيد يا سيادة الضابط.
شهاب:- انا هاجيبهم لحد عندك في البيت.
سراج:- متشكر جدا ياسيادة الضابط.
موسى قعد بتهالك ودموعه نازله وقال بوجع:- يعني كده خلاص؟! حق بنتي ضاع!! يعني هتتأيد انت*حار؟ يعني كِتارا كده حقها راح!!!! حسبي الله ونعم الوكيل، حسبي الله ونعم الوكيل.
بعد فتره تمت الاجراءات وطلع التصريح وتم دفن كِتارا موسى وتم معاها قفل القضيه بأنها انتح*ار.

هاله باصه من شباك اوضتها ع الشارع وكانت ماسكه ورقة الاعتراف باصه فيها بشرود.

هل فعلاً كِتارا انتحـ.رت؟!
هل كانت جريمة وبفعل فاعل؟ -----------يتبع

كِتارا بقلم: مريم نصار
غلاف: زهرة

© قصص وروايات مريم نصار — جميع الحقوق محفوظة. يُمنع نسخ هذا الفصل أو إعادة نشره كليًا أو جزئيًا دون إذن كتابي مسبق من الكاتبة.

🔔 عجبك الفصل؟ تابعي المدونةعشان توصلك الفصول الجديدة أول بأول🔔 متابعة المدونةاضغطي، سجّلي بحساب جوجل، وخلاص ✔

تعليقات✍️ أضف تعليقًا

بحث هذه المدونة الإلكترونية