قصص وروايات مريم نصار

قصص وروايات مريم نصار: المدونة الرسمية للكاتبة والروائية المصرية مريم نصار. هنا تقرئين حكايات تلمس القلب وتشبه تفاصيل حياتنا: روايات وقصص تجمع بين الرومانسية والدراما والتشويق، بأسلوب قريب من القارئ وشخصيات تعيش معك بعد الفصل الأخير. تُنشر كل رواية فصلًا بفصل بترتيب منظم ومريح للقراءة، وتقدرين تتابعين الفصول الجديدة أولًا بأول. أهلًا بك في عالم مريم نصار.

الفصل السادس والأخير. نوفيلا كِتارا


 


نوفيلا كِتارا

#عندما يخطط الشيـ.طان.

للتذكير: شهر رجب من الأشهر الحُرُم

{فَلا تَظلِموا فيهِنَّ أَنفُسَكُم}
الحسنات فيه مضاعفة، والسيئات فيه تغلظ !
"شهر رجب شهر الزرع، وشهر شعبان شهرر سُقِي الزرعِ، وشهر رمضان شهر حصادِ الزرع "

✿✿┈┈••⊰✿✿✿✿⊱••┈┈┈┈••⊰✿✿✿✿⊱••┈┈✿✿

بسم الله نبدأ


سراج بلع ريقه بخوف وحرك الكرفته وقال بتلعثم:- أنا،، انا ماعملتش حاجة، اوعا تكون مفكر اني ممكن اقت*لها!! سيادة المقدم ارجوك ولادي جوه ولو سمعوا بحاجه زي دي؟ هيحصل لهم صد*مة.
شهاب ببرود:- لا ما تخافش على الأولاد ، هما دلوقتي في أمان، بيلعبوا مع يوسف ابني، ركز بس في اللي إنت فيه!
وبص لسراج في عينيه قوي وكمل بغموض:- مش يمكن يكون كلام  نوال صح!!! وإنك إنت اللي حطيت الحلق في الروب بتاع نوال!!!،ومش يمكن كمان إنت شوفت الوشم اللي على كتفها وأجبرت الدكتورة كِتارا أنها تكتبه في قلب الامضاء!! علشان تكسب إنت فلوس الوديعه؛ وتضحي بـ نوال جارتك و.....!
وكمل بخبث:- وعشيقتك!!!!! واهو بالمرة تخلص منها وتتحبس؟!!!!


سراج :-...........!!!!!

شهاب رجع بضهره ع الكنبه وقال:- كلامي صح مش كده ياسراج؟

سراج هز راسه برفض واتكلم بهستريا:- استحاله؛  استحاله أعمل كده، ونوال مش عشقيتي أنا معرفهاش حرام عليكم، أكيد نوال اللي قت*لتها بعد كل الادله اللي ضدها دي، انا مستحيل أعمل كده أبداً مستحيل.

نوال بدون وعي:- ليه مستحيل تعمل كده؟ كنت شيخ وانا معرفش؟ أكيد أنت اللي عملت كده؛ وحطيت الحلق في هدومي، أنت أكتر واحد عارف شقتي و الوشم بتاعي ولا نسيت..!
سراج بصلها بزهول لأنها وقعت بالكلام ، وهي أدركت انها فضحت نفسها بنفسها، وحطت ايدها ع بُقها وتنحت،وبكده يكون شهاب نجح في إستفزازهم لكشف أهم لغز في القضيه وقال:- حلو اوي كده ،كده بقى كل حاجه بقت على المكشوف، الدكتور سراج المحترم في علاقة سرية ومشبوهة مع مدام نوال المحترمة جارته.
نوال هزت راسها بنفي واعتراض وقالت:- لأ لأ ما حصلش، لا أنا مقصدش كده انا......!!!

شهاب طلع صورة من جيب الجاكيت ورماها على الترابيزة قدامها وهى فتحت عينيها بصدمة كبيرة وشهاب قال:- ايوه كملي كنتي بتقولي ايه يا نوال!!! أصلي مسمعتكيش كويس!!
الصوره كانت لشخص تالت وده اللي كان معاها في العربيه، نوال أول شافت الصوره قلبها دق بقوة و هزت راسها وهمست:- مستحيل؛ مستحيل.
شهاب بسخرية:- المستحيل هنا مع شهاب الطوخي هيبقى ممكن وسهل خالص.
وبص لسراج وسأله:- تعرفه ده  يا،،،سراج؟
سراج مسك الصورة ودقق النظر فيها، وكشر عينيه وقال:- الشكل ده مش غريب عليا بس مش متذكر شفته فين؟
شهاب طفى السيجاره وقال:- مع إنك فاكره كويس أوي، بس معلش انا هفكرك، ده رامي، راااامي السخاوي ياسراج!! افتكرت ولا لسه ؟
سراج بتعجب:- أيوه، أيوه افتكرته، ده كان خطيب كِتارا قبل ما اعرفها، بس ده ايه علاقته باللي إحنا فيه دلوقتي؟ أنا مبقتش فاهم حاجه!
شهاب بص لنوال بإستهزاء وقال:- ايه!! تحبي اقول ايه علاقة رامي بالموضوع ؟ولا تقولي لعشيقك الاولاني حقيقتك مع عشيقك التاني.
سراج رغم صدمته لكن نفى كلام شهاب وقال:- انا مش عشيقها ارجوك افهمني، انا ماليش دعوه بيها.
شهاب حط رجل على رجل وقال:- اممم، طيب أثبت و فهمني أنت بقى كل حاجه،  لأن كدا كدا القضيه بقت لابساك لابساك أنت، و بما إنك كنت مع علاقه مع نوال ياريت توفر على نفسك وقت و تعترف وتقول اللي حصل، وإلا قسما بالله هاخدك دلوقتي بحكم إنك عارف الوشم، وشقة نوال بحكم انك دخلتها قبل كده كتير، هتتكلم ولا ايييييه؟

وكان كلامه بصوت جهوري وسراج خاف من طريقة شهاب واتكلم بنبره فيها دفاع وقال:- لأ، لأ هما مرتين بس اللي روحت فيهم لنوال، ارجوك أنا......!
ونزل راسه في الأرض وكمل:-أنا هاعترف بكل حاجه.
نوال بصتله وقالت باستنكار:- هتعترف بأيه؟! أنت واحد كذاب من دلوقتي ،أنت كل اللي هتقوله كذب في كذب، يا ريت تخرس خالص.
وبصت لشهاب وكملت:- انا ماعملتش حاجه!!! ولازم امشي من هنا حالاً.
شهاب بص في الساعه وقال بخبث:- زمان إبن السخاوي دلوقتي بيتروق في القسم، أصل أنتي ما تعرفيش يا نونو.....!
نوال ارتبكت واتنفست بتوتر وسألته:- ماعرفش إيه؟
شهاب شاورلها تسكت وبص لسراج وقال:- سمعني بقى بنفسك، مع اني عارف كل حاجه بس حابب اسمع منك أنت، مش يمكن تنقذ نفسك من التهمه الموجهه ليك وتحل من ع رقبتك حبل مشـ.نقه مستنيك!!!
سراج مسح وشه واتنهد بندم وتكلم بإحباط وقال:-  انا إتجوزت كِتارا عن حب، بس قبل كده هي كانت مخطوبة لرامي السخاوي قبل مني واللي اعرفه منها لما كنت أنا وهى اصدقاء وقتها،انها كانت بتحبه وبرده والدها رفضه وهي كانت بتمر بأزمة عاطفية، انا حاولت اخرجها من قصة حبها لرامي، و واحدة واحدة لقيتني انا اللي اتعلقت بيها واتقلبت الصداقة اللي بينا لحب، وكان اهلها رافضيني رفض قاطع، لاني كنت لسه في أخر سنه طب كنت لسه هابدأ حياتي وإن حالتي المادية ما كانتش هى اللي تليق بواحدة زي كِتارا ومستواها ، بس اللي قلب الموازين المرة دي!! إن كِتارا صممت عليا واتجوزنا لكن أهلها اللي هما والدتها واخواتها قاطعوا صلتهم بينا ومبيسالوش وسافروا بره مصر، ولا يعرفوا عننا أي حاجه لحد دلوقتي،مفيش بس غير باباها بيعرف أخبارنا من بعيد لبعيد بحكم أنه عايش في مصر، وخلفنا الأولاد، وكانت حياتنا مستقره لكن من خمس شهور بدأت تدخل المشاكل حياتنا لأن اكتشفت ان كِتارا محتفظة بصوره قديمه ليها هي ورامي، هى كانت صوره عادية ولما واجهتها!! قالت دي اول صورة كذكرى بينهم، ورامي ما لهوش اي مكانه في قلبها،وقتها خرجت في اليوم ده وانا متضايق وقابلت نوال على السلم بالصدفه، وقفت سلمت عليا وشافت اني متضايق واتحايلت عليا ما اخرجش وانا في الحاله دي، وطلبت مني رقم تلفوني علشان تتطمن عليا بحكم الجيره، أنا اديتلها الرقم عادي لأني دكتور واي حد مسموح ياخد رقمي، بعدها بفترة بقت تتصل بيا بإستمرار وواحدة واحدة اخدنا على بعض، وتدريجيا بعدت عن كِتارا، وحصل فجوة بينا، وحسيت اني لقيت  عند نوال اللي مش عند كِتارا، وقربنا من بعض أكتر وهي عزمتني على العشا في بيتها وانا رفضت علشان جوزها والجيران، هي قالت إن جوزها في الشغل ومش هيجي غير تاني يوم الصبح، وده هيكون عشا عادي وهتمشي على طول، قلتلها طيب والكاميرات والجيران!!! قالت انا هاطفي نور الدور كله وانت تدخل الشقة عندي؛وانا هاشغل النور تاني، وفعلاً حصل ودخلت واتعشينا مع بعض، ومن جرأة نوال في معاملتها معايا ما حسيتش بنفسي غير بعد ما وقعت في الخط*يئة معاها،وماحسيتش انها كانت خا*يفة او متضا*يقة، سهرنا مع بعض وبدأنا نحكي لبعض مشا*كلنا، ومن ضمن كلامي معاها حكتلها مشا*كلي مع كِتارا، وهى قالتلي خلاص طلقها، رديت عليها وقولتلها مش هينفع علشان الولاد والوديعة، سألتني وديعة إيه؟ قولتلها دي وديعة بـ اتنين مليون جنيه هى عملتها إثبات على حبها ليا، لكن مقدرش اتصرف فيها غير بعد وفاتها، وهي حكت ليا عن اهمال جوزها ليها وأنه ساذج وطيب زياده عن اللزوم وهى اتخنقت منه ،وقبل الفجر، خرجت زي ما جيت، واتقابلنا مرة كمان في شقتها برده سهرنا للفجر واتكلمنا كتير حسيت اني مخنو*ق بعدها، ومش مرتاح وبعد كده قلتلها انا مش هاقدر اكمل لأن إحساس الخيانة انا مش قادر اتحمله، كنت متضايق من مجرد صورة على تليفون مراتي!! دلوقتي بقيت انا المذنب وهي الضحية!! أنا مش هاكمل يا نوال ارجوكي بلاش تتواصلي معايا تاني، وهى وافقت واحترمت رغبتي وقتها، وعدى الوقت على الموضوع ده حوالي شهرين واكتر ومقربتش من بيت نوال تاني ولا كلمتها، غير في حدود الجيرة مش أكتر، ويوم الحا*دثه كنت راجع من المنصوره و اتخانقت انا وكِتارا وسبتها ونزلت، كنت بلف بالعربيه وسط المطر ورجعت لما هديت شوية وبركن العربية في الجراچ وقتها سمعت صوت وجريت بسرعه وسط الناس ولقيت الكارثه الحقيقية إن كِتارا انت*حرت!!! ولما سمعت إن كلنا هنطلع ع القسم، شكيت إن أول حاجة هتحصل إن تليفوني هيتفتش، قومت حذفت رقم نوال وكل خنقاتي انا وكِتارا ونسيت تماماً إن خنقاتنا وكل حاجه حصلت موجوده ع تليفون كِتارا، لكن لحسن الحظ لما عرفت بعد كده إن تليفونها كمان مش موجود عليه أي حاجه، واستنتجت أنها تكون تعبت من المشاكل ونهت حياتها بأيديها، وبعدها قررت ابيع الشقه وابعد، لكن آخر مرة لما نوال قابلتني على السلم شفت في عينيها نفس نظراتها ليا وقت ما اتقابلنا في الشقه أول مرة،واتأكدت انها ممكن ترجع تتواصل معايا تاني، وممكن تعملي مشكلة، وكذبت عليها وقلتلها إن أنا رايح المنصورة عند والدتي، علشان ما تحاولش تتواصل معايا، ولو حاولت! اكون انا سافرت بره مصر وأبدا حياتي من جديد، واعوض اولادي عن اللي فات، لكن صدقني ماعرفش هي عرفت مكاني ازاي!  هو ده كل اللي حصل، انا ند*مت اني عملت علاقة معاها وحاولت اصلح من نفسي، لأني عمري ما كنت هعوض كِتارا، ومستحيل اقت*ل مراتي مستحيل، اقسملك بحياة ولادي هو ده كل اللي حصل.

شهاب كان بيسمع سراج وف نفس الوقت كان بيبص على تفاصيل نوال وهي على حافة الإنهيار، وكمل وقال:- تمام، تمام ياسراج.
وبص لنوال وسألها:- ها يانوال هانم!! تحبي تحكيلي أنتي بنفسك عملتي إيه؟ ولا اجيب رامي يكمل عنك ويقول انتي وصلتي ليه إزاي وليه؟ وكملتي مخططك الشيـ.طاني!!  وخلي بالك أنتي واقعه واقعه، لأن كل الادلة ضدك يا نوال، بأمارة المنوم اللي حطيتيه في العصير لـ إلياس هو و ايلين!!!.
نوال شافت إن لا مفر وأنها انكشفت وحطت ايديها على وشها وعيطت بهستيريا وقالت:- انتوا عايزززززييين منننننني اييييييه!!!! ايوه انا اللي قت*لت كِتارا، انا اللي قت*لتها!!!
سراج فتح عينيه بصدمة كبيرة؛ ومكانش مصدق، نوال كملت وعينيها كلها شر:- أنا استكترت كل حاجة على كِتارا، دكتورة وليها إسم و متجوزه واحد بيحبها وكمان غنية!!!  ولما سراج كلمني على الوديعة وأنها بـ اتنين مليون جنية،زاد طمعي، وكان نفسي اقت*لها وقتها وأخد الفلوس واهرب بيها واعيش حياتي، و لما سراج رفض انه يكمل معايا علشانها!! زادت غيرتي منها، قلت طول ما هي عايشة سراج هيفضل بعيد عني هو وفلوسه، وفكرت إزاي اوصل لهدفي وخططت اني لازم اوصل لرامي، وفعلا رحت عند كِتارا بحجة أن البوتاجاز عندي مش شغال ولسه هجيب الصيانه، ورحت اكمل عندها الاكل وهي كانت مشغولة بتسجل في ملفات على اللاب توب و الولاد بيلعبوا حواليها، ، انا  بسرعة مضيعتش الفرصة دي، و أخدت تليفونها ودورت على رقم رامي، لكن ما لقتوش متسجل عندها، دخلت على ملف الصور دورت على صورته اللي سراج وصفهالي ولقيتها فعلاً، وبعتها ليا على الواتس وحذفتها من عندها،وبعد اسبوع سمعت سراج  نازل ع السلم، نزلت وراه بسرعة وطلبت منه يوصلني في طريقه، وحاولت اثبتله أني بقيت عادي من ناحيته لحد ما خطتي تتم، وفي الطريق طلبت منه تليفونه أعمل مكالمه لماما،واخدت تليفونه وكنت عايزة أدور فيه، لكن سراج كان جمبي ولحسن الحظ نزل في الطريق يشتري طلبات من سوبر ماركت على الطريق، انا دورت في الواتس عنده وكانت أغلب خناقاته مع كِتارا على الواتساب موجوده،و وصلت لرقم رامي من خلال المحادثات، كِتارا كانت باعتاه ل سراج في خناقة بينهم وبتقوله رقمه اهو اتصل عليه واسأله، لو كنت لسه بكلمه او لأ؟ لقيت الخطه معايا ماشية كويس قوي، اتصلت برامي وكانت دماغه زي دماغي، ورحت عنده الشقه كتير واتفقنا على طريقه نهدد بيها كِتارا علشان تكسر الوديعه ونتمتع بالفلوس،بس من غير مـ.وت  اي حد ما كانتش الفكره موجودة، رامي فكر كتير وقال، انا معايا فيديو خاص ليا مع كِتارا، كانت شبه علاقة لكن مش كاملة، بس ده من سنين كتير فاتت،وخططنا انه يتواصل معاها ويهددها بالفيديو ده، يبعتوا لجوزها، ولانه بيغير عليها وهي بتحبه مش مستعدة انها تخسره!! وممكن تتنازل عن الفلوس؛ وفعلاً رامي اتصل عليها من رقم مجهول وردت وطلب انه يقابلها ،هي رفضت في الاول لكن بعتلها الفيديو كنوع من التهد.يد؛ بصراحة احنا كنا خايفين انها ماتجيش ولا تقابله، لكن خوفها على سمعتها وجوزها راحت وقابلته وزعقت ليه وكمان ضربته بالقلم، وقالت ليه انها ندمانة انها عرفته في يوم من الأيام، ورامي كان متفق معايا اصور كل  اللي بيحصل وقتها، ولما ضربته هجم عليها في محاوله اغتـ.صاب، لكن كِتارا ضربته بالڤاظة على راسة وجريت بس أنا!!! ما استسلمتش، فضلنا وراها نهددها بصور ليها خاصة انا كنت واخداها من فونها من غير ما تعرف، وبعتها لرامي علشان يهددها بيها وتخاف اكتر، وعلشان كدة هى اتحولت من انسانة هادية، لواحدة عصبيه، وده سبب انها كانت عصبية الشهرين اللي فاتوا، ولما هى اتصلت على رامي وقالت انها مش هتكسر الوديعة لأي سبب وإن كل الرجالة زي بعض، وهي ناوية تكسرها علشان تحولها لصالح اولادها الياس وايلين وماحدش له حق التصرف فيهم، أول ما قالت كده احنا اتجننا واتفقنا على خطة تانية إن لما سراج يسافر انا هاهد*دها بأولادها اني هاقتلهم ونكشف ورقنا قدامها، بس هي هت*خاف اكيد تتكلم علشان سمعتها وسلامة أولادها، انا كنت مجهزه عندي عصير وعندي منوم  رامي جابه، ولما شفت من العين السحرية سراج نازل يوم الحادثة بعد الخناقة قعدت افكر فإني اخد كِتارا ونخرج بأي حجة علشان توافق بعد التهديد، لكن وانا بافكر سمعت صوت المطر والر*عد والب*رق والنور قطع، حسيت بقو*ة ش*ر جوايا قمت لبست جوانتي وحطيت المنوم في العصير ورحت عند كِتارا وشربت الاولاد العصير وناموا، كِتارا كانت قاعده على المكتب ومعاها الكشاف في اوضتها ومش شاكة فيا خالص كان كل تركيزها ازاي تطلع من مشكلة رامي ودخلت عندها وانا حاطه الس*كينة على رقبة ايلين وهي نايمة، كِتارا اتفز*عت وجت تجري عليا لكن قولتلها........!!!!
فلاش باك
:-اقفي عندك يا كِتارا، ومش عايزة اي حركة.
كِتارا بعيا*ط هست*يري:- نوال ايه اللي جرالك!!! سيبي بنتي أرجوكي وهي ما بتردش ليه؟ ايلين، ايلين ردي عليا، وفين إلياس؟
نوال بش*ر:- ومش هترد عليكي لانها نايمة، نايمة بمنوم ولو ما سمعتيش كلامي انا همو*تها.
كِتارا بخوف ع بنتها قالت:-طيب حاضر، شوفي أنتي  عايزه ايه وسيبي بنتي.
وكانت كِتارا بتبص بره على باب اوضة إلياس يمكن يكون صاحي ويجي يلحقها، لكن نوال شافتها وضحكت بشر وقالت:- عارفة؟!!! انا كنت عايزة الوديعة بس دلوقتي عايزاكي تموتي ي كِتارا ،وما تخافيش مش هتحسي بأي حاجة، وكمان بطلي تبصي بره إلياس نايم هو كمان، ومش هيحسوا بحاجة حتى لو أنا قط*عتك، ولو ما سمعتيش كلامي صدقيني هاق*تل*هما الاتنين قدامك، وخلي الوديعة تنفعك.
كِتارا هزت راسها بصد*مة وقالت:- الوديعة!!!  الوديعة، رامي!!!!! انتي، انتي معقول تكوني متفقة مع رامي؟
نوال بضحكة:- ايوة يا حبيبتي انا اللي موصله لرامي كل حاجة عنك, وكمان كل الصور بتاعتك!!!  انا اللي كنت ببعتهاله، عارفة كمان عرفت منين؟ من سراج جوزك،،  ااااه اصل انتي ما تعرفيش ان سراج جالي الشقه مرتين،وحصل بينا......! ههههههههه زي ما انتي عارفة بقى، لو مش مصدقة تبقى أساليه، بس لو كنتي لسه عايشة وقتها.
رغم صد*متها في جوزها أنه خا*نها لكن قالت بتوسل:- طيب طيب اهدي خالص وسيبي بنتي وانا هاعمل لك كل حاجه، ارجوكي يا نوال سيبيها.
نوال بجدية:- اقعدي هنا واكتبي اللي هاقولك عليه، وإلا أقسم بالله اخلص عليها دلوقتي.
كِتارا هزت راسها بخوف:-حاضر ؛حاضر، هعمل كل اللي أنتي عايزاه.
قعدت على الكرسي ونوال اتحركت عند البلكون وقالت بشر:- اكتبي يا حلوة اعتراف على نفسك بإنك منتحرة بإرادتك.
كِتارا رفعت راسها بصد*مة:- ايييه، انت*حار!!! أنتي اكيد اتجننتي يا نوال، واسمعي بقى؟ خدي الفلوس خدي كل حاجة بس سيبي بنتي،بس صدقيني بعدها هت*ند*مي ندم عمرك لاني مش هاسكت.

نوال بضحكة،:- وانتي فاكرة اني هاسيبك؟ يبقى بتحلمي!!! دي فرصة،والفرصة ما بتجيش غير مرة واحدة بس ؛وكمان انتي بنفسك اللي هتر*مي نفسك من البلكونة دي، اكتبي واخلصي.

كِتارا حاولت تسيطر ع نفسها وبتفكر علشان تنقذ بنتها وبرده خا*فت يحصلها حاجة، وأنها تم*وت هى وأولادها ونوال تخرج منها زي الشعرة من العجينة ،ومسكت القلم وكتبت الإعتراف وحاولت تسيب دليل  وإسم نوال بين السطور ؛وافتكرت الوشم اللي شافته على كتفها قبل كده، وكتبت الإعتراف وكتبت الرمز في الامضاء ومسكت الورقة وشاورت ليها وقالت بجمود:- اتفضلي الاعتراف أهو.
نوال بضحكه:- وانا هبلة علشان اجي لعندك؟ تعالي انتي وحطي الورقة هناك ع السرير علشان تر*مي نفسك، بس قبل ما تتحركي!!! افتحي تليفونك دلوقت واحذفي منه كل حاجة اخلصي!!!! وحطت الس*كي*نه على رقبة البنت زيادة تهديد، وكِتارا قلبها دق بقوة من الخوف على ايلين وقالت:- حاضر حاضر اهو، وفتحت التليفون فعلاً وحذفت كل حاجة تخص رامي وحتى المشاكل اللي بينها وبين سراج جوزها، كان كل اللي يهمها سلامة أولادها، بعد ما مسحت كل حاجة كِتارا فكرت شوية انها تسلط الضوء على عيون نوال وتجري عليها وتشد بنتها وكمان قلعت فرده حلق وحطتها في أيدها التانية وقامت  وكرمشت الورقه في ايدها ومسكت الكشاف صدرته على وش نوال وراحت عندها تشد منها البنت وهي بتحط فردة الحلق في جيب الروب بتاعها وقالت:- ابعدي سيبي بنتي وخدي الاعتراف الغبي ده، بس اعرفي اني مش هاسيبك، أنتي هتند*مي على كل حاجة فكرتي فيها يا نوال، انا هوديكي في 60 دا*هيه انتي ورامي بتاعك ده!!
كانوا بيزقوا بعض ونوال سابت البنت وقعت على الارض لأنها نايمة، ومن غير ادراك منها زقت ودفعت كِتارا ووقعت من البلكونه، نوال الشيطان اتملك منها وبصت ع كِتارا وهى بتقع، ومن غير تفكير شالت ايلين من على الارض وراحت نيمتها مكانها في سريرها، وبسرعه رجعت كل حاجه متكركبه مكانها وحطت الكشاف على الترابيزه وقفلته ورجعت السك*ينه المطبخ وقفلت باب الاوضه، وأخدت  علب العصير وأخفت اي اثر ليها وخرجت بسرعه ودخلت شقتها وقلعت الروب بإستعجال وحدفته في الدولاب،وغسلت ايديها وكانت بتنهج وغسلت علب العصير علشان تمحي أثر المخدر وسمعت صوت باب السطح بيتقفل، وقربت شغلت الكشاف وجريت بخوف تكون كِتارا ما*ما*تتش، وبصت من العين السحرية وكان فيصل نازل وقتها ع السلم, وفي لحظه نوال ومن غير تفكير فتحت الباب بحيث تثبت انها كانت في شقتها وقت الجريمة،  وكلمت فيصل ودخلت واتصلت على رامي بلغته بكل حاجة وطلبت منه انه يختفي اليومين دول ويحذفوا كل حاجه بينهم وبين بعض.
وانها فكرت تحط فيصل في القضية اللي تبعد الشكوك عنها وبعد ما سراج اتحبس كانت نوال متضايقة جدا وعايزاه يخرج علشان يكسر الوديعة وياخذها وهي ترجعله من تاني، وكانت خايفه انها تكون سايبه دليل لكن اللي مطمنها انها كانت لابسه جوانتي،وان الس*كين ما علمش على رقبة ايلين، بعد ما سراج خرج من القضيه نوال كانت فرحانة وقالت هتسكت فتره لحد ما كل حاجة تاخد مجراها وترجع لمجراها الطبيعي، وقابلت رامي وهو بيوصلها بعربيته كانت بتتخانق معاه علشان سراج هيسافر بره مصر وهياخد الفلوس وبكده خطتهم تكون ما كانش لها اي لازمه، لكن مش لازم يطلعوا خسرانين رامي قالها راقبي تحركات سراج وانا كمان هاراقبه ويوم ما ياخد الفلوس  انتي تروحيله وتتكلمي معاه, وافق يقسم الفلوس؟ وافق، موافقش! نعمل فيه زي ما عملتي  في المرحومه، وفعلا راقبه سراج ونوال وصلت لحد البيت علشان تكمل مخططها الشيطاني.

خلصت كلامها وكانت واقفه ومسحت دموعها وقالت:- هي دي كل الحكايه.
سراج واقف مصدوم من كمية الشر اللي عندها، وأنها كمان حرمتة من مراته،شهاب سقف وقال بإعجاب:- برافو، برافو يانوال تخطيط شيطاني ما فيش بعد كده؛ كل ده علشان غيرتك وحقدك وعلشان الفلوس حاولتي تفض*حي وحاولتي تد*مري وتفر*قي بينهم وفي الاخر هتدفعي تمن كل اللي انتي عملتيه.
نوال بدفاع:- كل الناس بتغلط.
شهاب بصوت جهوري:- فعلاً كل الناس بتغلط وكل الناس هتتعاقب على اغلاطها ؛انتي  قت*لتي نفس بريئة حاولت تعيش بسلام هي واولادها وزوجها، دكتورة كيميائية محترمة عندها ولد وبنت كان نفسها تشوفهم بيكبروا قدام عينيها، عندها جوزها اللي خا*نها وهي ما تعرفش وحاولت تثبتله مدي نقاء قلبها، لكن انتي هديتي كل حاجه،كل حاجه استغليتي جوزك الإنسان البسيط المتواضع، اللي بيثق فيكي واللي ما يعرفش إن مراتة!!!! مقضياها كل شوية مع واحد شكل، أنتي جنيتي على نفسك بطمعك وغلك وشرك، ويتمتي ولد وبنت ما لهمش اي ذنب , وفعلا تخطيط في منتهى الدقه تخطيط ما يطلعش غير من تفكير شيطان، شيطان وبس!! واللي زيك لازم يتعاقب اشد عقوبة.

وبص لسراج وكمل بنفس النبرة:- وأنت!!!  أنت السبب الأول والأخير في اللي حصل ده، لو ما كنتش ضعفت لنزواتك ومشيت ورا شهواتك، وعقلك زينلك ان اللي عند نوال مش عند زوجتك كِتارا؟ مع ان الدكتورة  كانت في منتهى الجمال، انت ما قدرتش النعمه اللي كانت في ايدك، ورحت خن*تها مع ست متجوزة، كفاية انها ما*تت وارتاحت ما*تت ضحية دفاع عن بنتها، علشان تحمي بنتها من المو*ت، لكن أنت!!!!!! هتعيش طول العمر في تأنيب ضمير، وضميرك ده هيعذبك طول مانت عايش ياسراج.

سراج نزل راسه في الارض، ولأول مرة دموع ندم تنزل على خده، لكن نوال كانت واقفه وعينيها كلها شر وكانت عايزه كمان تنتقم وتزود في انتقامها وقالت:- بما انه تخطيطي شيطاني!!! وعجبك كده!! صدقني انا هانتقم منكم كلكم.
شهاب مردش عليها وطلع التليفون واتصل على القوة وقال:- اطلعوا حالا.
طلعت القوة ومسكت نوال وهي بتعا*فر علشان تز*قهم، شهاب قرب منها وصفعة قوية نزلت على وشها وقال بتوعد:-دي البداية يانوال!!! و إن كنتي انتي عندك تخطيط شيطاني؟ فأنا شهاب الطوخي اللي روض الشيطان، انا طريقك الجاي للعذ*اب، هتشوفي كل الش*ر اللي جواكي ده!! انا هاخده منك واطلعه عليكي ما تقلقيش، انتي هتكوني في رحله ممتعة لان اللي ماسك قضيتك مش اي حد، ده أنا!!! شهاب الطوخي اللي يوعد وينفذ، خدوها من وشي وحبس انفرادي لحد ما اجيلها بنفسي.
القوة اخدت نوال اللي بتصرخ وعايزة تهرب لكن شتان ما بين قوتها وقوة رجال الشرطه اللي اخدوها على القسم ،شهاب خارج من الشقة، سراج نده عليه وقال بحزن:- أنا ندمان.
شهاب بصله وقال بحده:- فات وقت الندم يا سراج, لكن ممكن تلحق نفسك وتعوض أولادك عن اللي انت عملته.
سراج بندم حقيقي:- انا هحقق طلب كِتارا وهحول الفلوس للولاد، انا مش عايز حاجه تاني انا ظلمتها، انا مذ*نب فعلاً، لكن هاحاول على قد ما اقدر ادعيلها من كل قلبي، واربي اولادها واكبرهم واوصلهم لبر الامان زي ما هي كانت بتتمنى و اكتر.
شهاب بتنهيده:- اتمنى.
خرج شهاب وسراج قعد بتهالك وشاف الحلق على الترابيزة ومسكوا وحط أيديه على وشه وفضل يعيط بندم كبير، دخل عليه من بره إلياس وايلين جريوا عليه، وحضنوه وعيطوا في حضنه، وسراج اتكلم وقال بحنين:- ما تخافوش يا ولادي انا هافضل دايما جمبكم ؛وهاحاول اعوضكم عن كل اللي فات، وهخلي كِتارا مبسوطه لأني هحقق حلمها،بحبكوا يا ولادي.
إلياس وايلين:- وأحنا كمان بنحبك يا بابا.

تم فتح القضيه مع الادله والمقدم شهاب الطوخي قدم كل شيء بالصوت والصورة مع الاعتراف الكامل لنوال وهي مدركة تماماً اللي قالته،وموسى والد كِتارا تابع القضيه وبيحضر الجلسات مع سراج واحتوى احفاده،ونوال ورامي كل واحد فيهم خدوا جزائهم.، والمدير أعتذر من شهاب وقدمله مكافاة لتفانيه في العمل.

بعد فترة كبيرة.

سراج وموسى والولاد واقفين قدام قبر كِتارا بيدعولها بالرحمه، وإلياس وايلين حطوا بوكيه ورد قدام إسمها، وخرجوا ركبوا العربية وسراج قال لموسى:- برده مصمم متسافرش معانا ياعمي؟
موسى أبتسم وهو بيلاعب شعر ايلين وقال بتنهيده:- مش هينفع ياسراج، انا هفضل هنا جمب كِتارا لحد ما نتقابل انا وهى فى يوم من الايام علشان أعتذر عن كل حاجه وحشه صدرت مني ليها، انا لو كنت احتوتها و وقفت جمبها مكنش كل ده هيحصل ، لكن لا مفر من إرادة الله ، كِتارا متتعوضش وأنا السبب الأول والأخير في خُسراتها.
سراج هز راسه بأسف هو كمان وسكت، ايلين بحماس:- يلا بقى ياعمو السواق اطلع ع المطار عايزه اركب الطياره.
كلهم ابتسموا والسواق اتحرك ع المطار.

شهاب كان في المكتب وجاله اتصال من حماته ورد بإبتسامة :- الو يا ماما.
حماته بقلب أم:- الحقني يا شهاب هالة تعبت وخدناها ع المستشفى بتولد.
شهاب قام بسرعه وركب العربية وطلع على المستشفى ودخل الغرفة وكانت هالة في سريرها وشايله البيبي وابتسمت وقالت:- تعالى شوف القمر اللي نور حياتنا.

شهاب قرب منهم وقعد جمبها وباس جبين هالة وقال:؛ حمدلله ع سلامتك ياحبيبتي.
هالة :- الله يسلمك ياحبيبي.
شهاب باس جبين البيبي وقلبه دق وقال:- جميله قوي يا هالة.
هالة بإبتسامة:- فيها شبه من يوسف أول ما اتولد صح يا شهاب؟بس دي على بنوته هتبقى قمر.
شهاب بضحكه:- ايوه كلها يوسف، ويوسف كله مامته يعني هي هتطلع قمر في كل الحالات.
هالة بسعاده:- تسلملي ياحبيبي.
شهاب بتفكير:-، امممم طيب فكرتي.هنسميها ايه؟
هاله :- هزت كتفها وقالت بثقه:- طبعا ودي عايزه كلام.
شهاب بإبتسامة:- وهنسميها إيه؟!

هاله بصت للبنوته وقالت بإبتسامة حب:- ( كِـتارا).

                         النهايه.

أتمنى تكون نالت اعجابكم ، دمتم بخير ❤️💙

كِتارا:- بقلم مريم نصار
غلاف:- زهرة


© قصص وروايات مريم نصار — جميع الحقوق محفوظة. يُمنع نسخ هذا الفصل أو إعادة نشره كليًا أو جزئيًا دون إذن كتابي مسبق من الكاتبة.

🔔 عجبك الفصل؟ تابعي المدونةعشان توصلك الفصول الجديدة أول بأول🔔 متابعة المدونةاضغطي، سجّلي بحساب جوجل، وخلاص ✔

تعليقات✍️ أضف تعليقًا

بحث هذه المدونة الإلكترونية