قصص وروايات مريم نصار

قصص وروايات مريم نصار: المدونة الرسمية للكاتبة والروائية المصرية مريم نصار. هنا تقرئين حكايات تلمس القلب وتشبه تفاصيل حياتنا: روايات وقصص تجمع بين الرومانسية والدراما والتشويق، بأسلوب قريب من القارئ وشخصيات تعيش معك بعد الفصل الأخير. تُنشر كل رواية فصلًا بفصل بترتيب منظم ومريح للقراءة، وتقدرين تتابعين الفصول الجديدة أولًا بأول. أهلًا بك في عالم مريم نصار.

الفصل الخامس. نوفيلا كِتارا


 

نوفيلا كِتارا

#عندما يخطط الشيطان.

*❗أخبروا❗*

أخبروا أبنائكم وأجيالكم القادمه أن أمورهم لا تتم إلا بالمحافظة على الصلاة، وأن الصلاة أمَان وحصن من المنكرات وبوابة الرزق، وأن التفريط فيها عظيم عند الله وأنه لا يفلح مَن لا يصلي ولن يقم له أمرٍ من أُمور الدنيا ولا الآخرة
✿✿┈┈••⊰✿✿✿✿⊱••┈┈┈┈••⊰✿✿✿✿⊱••┈┈✿✿

بسم الله نبدأ


سراج ساب الشنط وقفل باب الاوضه ،وراح يفتح واتفاجيء بصدمه:- نوال....!! أنتي؟؟!

نوال رفعت حاجبها وقالت:- ايوه نوال يا سراج؛ إيه كنت عايز تخلع وتسيبني بعد كل اللي عملناه سوا!!!!

سراج بلع ريقه بتوتر وقال:- عـ...... عملناه!!!!! عملنا إيه يا نوال؟! وأنتي عرفتي مكاني إزاي!!! وازاي تجيلك الجرأه إنك تجيلي هنا!!!

نوال ضحكت بجرأه وزقته ودخلت الشقه وقالت:- هو في حاجه في البلد دي بتستخبى يا سوسو.!!!!

شهاب من وراهم بمكر:- على رأيك ما فيش حاجه في البلد دي بتستخبى،، أهلا أهلا نوال هانم.

نوال وسراج بصدمه أكبر:- ميييين،، المقدم شهاب!!
شهاب ابتسم وقال بسخرية:- مفاجأه مش كده!!!
سراج بتوتر:- اء... أيوه، ايوه فعلاً مفاجأه، أحم.
شهاب قعد ع كنبة الانتريه ومد رجليه على التربيزه وقال:- ازيك يا نوال وايه أخبارك؟!
نوال برجفه:- أنا؛؛؛ انا كويسه،بعد اذنكم انا لازم امشي.
وجت تتحرك، شهاب مسك دراعها وقال بثقه:- طبعاً لازم تبقى كويسه بعد ما نفذتي خطتك وقت*لتي كِتارا مش كده يانوال؟

نوال بصدمه:- أنا...!!! قتلت كِتارا؟ أنا ماقتلتش حد ايه اللي أنت بتقوله ده؟
شهاب طلع فردة حلق وحطها ع التربيزه قدامهم ، وسراج فتح عينيه بصدمه، ونوال مش أقل منه في الصدمه وشهاب أتكلم:- تؤ تؤ انتي متعرفيش إن الكدب حرام يا نونو؟!
عموماً إحنا فيها نرجع بالذاكرة لشهرين فاتوا ونشوف ده هيبقى نفس إندفاعك أنتي وسراج باشا ولا لأ..!

فلاش باك.

في قسم الشرطه شهاب بيستجوب الجار اللي ساكن في العماره اللي قصاد عماره كِتارا ونفس الدور تحديداً، وأتكلم شهاب بتساؤل:- أيوه وبعدين يا أستاذ مفيد؛ كمل إيه الغريب اللي لاحظته امبارح؟

مفيد:-زي ما قلت لحضرتك انا دائما بحب المطر، واحب اوي اقف في البلكونه وقت المطر ولحسن الحظ كمان النور كان قاطع، كنت واقف مستمتع، لكن لفت نظري العماره اللي قدامنا وخصوصاً الدور الأخير قصادي،كان في الشقه نور زي نور الكشاف والنور بيتحرك في كل الاتجاهات،وانا لمحت حركه غريبه زي ما يكون اتنين بيشدوا الكشاف من بعض، وبعدها الكشاف وقع على الأرض، أو ممكن يكون انطفى فاجأه، وماشفتش حاجه تاني.
شهاب بتفكير:- اممم، طيب ما شفتش اي حاجه تانيه؟ زي حد كان ع السطح أو البلكونه اي حاجه كده، حاول تفتكر وركز كويس.
مفيد سكت لثواني بيفكر وبعدين قال:- ايوه بعد لحظات طبعاً شوفت بقى الشقه اللي جمب شقة الدكتوره، فيها اضاءه كشاف عاليه، لكن بعد حوالي دقيقه من وقت الاضاءه اتقفل وبعدها النور رجع وعرفنا بعدها من صريخ الناس، إن الدكتوره كِتارا!! رمت نفسها من فوق؛ ربنا يرحمها.

شهاب بيفكر في كلام مفيد وهز راسه وقال:- طيب تمام تقدر تخرج انت يا أستاذ مفيد.

بعد شويه شهاب رجع بالذاكره وافتكر كلام نوال لما قالت في الاستجواب قبل سراج:- انا كنت قاعده في البيت وفاجأه الكهرباء قطعت والمطر اشتغل وصوت البرق والرعد وقتها خوفت ودورت على الكشاف وافتكرت انه مش مشحون، نورت كشاف الموبايل ورحت المطبخ اجيب شمعه وانا معديه جنب باب الشقه سمعت صوت حد ماشي انا علشان كنت لوحدي خفت بس كنت قافله على نفسي كويس، النور جه وقتها بصيت من الباب العين السحريه!! شوفت الباشمهندس فيصل نازل من السلم.

في البيت عند شهاب في مكتبه، هاله بتسأله:- يعني انت شاكك في اللي اسمها نوال دي؟!
شهاب بتفكير:- المشكله يا هاله انها قالت الكشاف مكانش مشحون وشغلت كشاف الموبايل! وطبعاً انتي عارفه فرق الاضاءه بينهم، ومفيد بيقول انه شاف اضاءه واضحه قوي انها كشاف،يعني هنا بقى في ثغره لازم نحط ايدينا عليها.
هاله:- طيب مش يمكن نوال قالت كده من توترها وخوفها!! احيانا في ناس لما بتخاف بتنسى هي كانت بتعمل إيه في الوقت ده؟!
شهاب بتفهم:- تمام لكن انا هاحاول ابعد اي شبهات عن نوال؛ لكن في نفس الوقت هي مشكوك فيها ضمن المشتبه فيهم.

بعد كده شهاب أخد إذن النيابه يفتش العماره كلها، وجه الدور على شقة نوال، شهاب رن الجرس، نوال فتحت واتفاجئت وقالت:- الضابط شهاب!!! خير يا فندم!! هو،، هو في حاجه؟
شهاب بمكر:- متأسف يا مدام نوال أني بزعج حضرتك في الوقت ده!! لكن انا معايا اذن نيابه بتفتيش كل الشقق في العماره، وما فاضلش غير شقتك، وده لزياده التأكيد مش اكتر.
شهاب خلص الكلام وراقب رد فعلها لكن هى واضح أنه كان عندها ثبات انفعالي وقالت بهدوء:- وماله؛ اتفضل حضرتك فتش براحتك خالص.
شهاب ابتسم وقال:- متشكر لتفهمك.
ودخل وبدأ يدور في الليفنج وفي نفس الوقت مراقب تصرفاتها وكان في شويه ارتباك واضحين عليها واتكلم وهو بيفتش وسألها وقال:- اومال جوزك فين يا مدام نوال، مش هنتعرف عليه؟
نوال:- جوزي في الشغل، اصله بيبدل شفتات مع الزملا وهيجي بكره الصبح إن شاء الله.
شهاب:- اممم ربنا معاه، قوليلي يا مدام نوال!!! أنتي ما عندكيش أولاد؟ انا أعرف على حد علمي إنك متجوزه من سنين.
نوال هزت راسها بالرفض وقالت بحزن:- للأسف لأ؛ لسه ربنا ما رزقنيش.
شهاب بصلها وسكت كأنه بيفكر في حاجه، وهي انتبهت وقالت:- يا خبر، انا خدني الكلام ومعزمتش حضرتك على حاجه، تحب تشرب إيه؟ عصير ولا قهوه!!
شهاب:- قهوه ،بس خلي بالك بحبها مضبوط.
نوال:-حاضر خمس دقايق وتكون عندك.
شهاب رايح على أوضة نومها وقال:- خدي راحتك.
نوال راحت على المطبخ، وشهاب بيدور في ادراج التسريحه على رمز الX وفتح الدولاب ودور كويس لكن مفيش حاجه وبيقفل الدولاب بس لفت انتباهه روب ورا الهدوم ومكنش متعلق ع الشماعه، ونزل جابه وفتشه كويس وبيحط ايده في جيب الروب وكان فيه فردة حلق رفعها قدام عينيه وشافها، لكن حطها تاني بعد ما إهتمام، وقفل الدولاب وخرج يدور في الحمام وباقي الشقه، لكن موصلش لأي حاجه وقال:- تمام يا مدام نوال ما فيش اي حاجه وانا بعتذر مرة تانيه اني ازعجتك في وقت زي ده.

نوال ابتسمت وقالت:- أبدا ما فيش حاجه لكن حضرتك ما شربتش القهوه.
شهاب أبتسم ليها بتكليف وقال :؛بردت؛ وانا مابشربهاش بارده، عموما نشربها وقت تاني بعد أذنك. خرج شهاب ونزل وهو محتار ومافيش اي دليل في اي مكان لرمز الX.

بعد كده تمت اجراءات دفن كِتارا واتقفلت القضيه أنها انتح*ار، وشهاب راح زرع الميكروفونات في شقه سراج للتنصت عليه والوصول للحقيقه، وهو خارج من البلكون لازم ينط في البلكون المجاور ،ودي كانت بلكونه شقة نوال وكانت الغرفه منوره وقتها وجوزها خارج من الحمام، شهاب رجع بضهره بسرعه علشان محدش يشوفه، لكن المفاجأه بقى اللي ما كانتش في الحسبان!!! إن شهاب شاف في ازاز البلكونه صوره معكوسه لنوال اللي كانت واقفه قدام الدولاب ولفه فوطه حوالين جسمها، والقنبله الموقوته انفجرت وحل اللغز الغامض اتفك لأن كان على كتفها وشم مرسوم بحرف الX جوه دايره!!!!!شهاب بص عليها بسرعه علشان يتأكد؛وفعلاً شاف حرف الX وده دليل قوي في القضيه انها فعلاً كِتارا ما تكونش منت*حره، لكن برده ازاي؟!!! دي هي اللي رمت نفسها وبإرادتها!!! وكاتبه اعتراف بخط أيدها!!! كان واقف بيفكر ومحتار لكن انتبه ومحبش حد يشوفه لأن القضيه بالنسبه للكل اتقفلت، ونزل بسرعه قبل ما يتكشف ورجع لهاله وشرحلها كل اللي حصل وقالت بصدمه:- يعني حرف الX اللي دورنا عليه كل ده!! وشم على كتف نوال؟! يعني ممكن تكون نوال !!
شهاب بتأكيد:؛ أنا دلوقتي متأكد، لكن لازم دليل أقوى من ده يا هاله لازم دليل في أيدي.
هاله بتفكير:- بس بتهايألي مفيش أقوى من دليل ذي ده ياشهاب، كِتارا بنفسها اللي كتباه في الإعتراف.
شهاب هز راسه بالرفض:- لأ برده مش دليل قوي، مش يمكن كِتارا كانت شافت وشم نوال قبل كده! او مثلاً حد هدد كِتارا أنها تكتب الX، بصي حالياً أنا مش شايف أنه دليل يلبسها القضيه دي.

هاله بتفهم :-اممم اوكي ندور تاني، بس ممكن تقولي طيب الميكروفونات هتعمل فيها ايه؟ هتشيلها من عند سراج؟
شهاب :- لأ طبعا لازم أعرف كل حاجه عند سراج، محدش عارف ايه الخبايا اللي لسه هتظهر!!!

بعد فتره هاله راحت شغلها، دخلت على المكتب وقعدت على الكرسي وفتحت ورقه اعتراف كِتارا لزيادة التأكيد، ولبست النضاره وجابت العدسه مررتها على كل حرف في الورقه بتركيز كبير، ولفت انتباهها إن في حروف معينه مضغوطه عليها بالحبر أكتر من مرة لكن بحرص، هاله بتقرأ بصوت مسموع وبتكتب الحروف اللي متعاد عليها وقالت:- أقر أنا (ن) كِتارا موسى(و) بأني سأنت*حر بإرادتي وبكامل(ا) قوايا العقليه(ل) دون تهديد أو أي ضغط من احد.
(ن - و - ا - ل)!!!!!!
جمعت هاله الحروف بالترتيب وكانت الصدمه انها نوال_ وقامت تجري على شهاب في الشغل؛ ودخلت بسرعه على مكتبه وقالت ليه على كل حاجه، شهاب شاف وسمع كل حاجه، رجع بضهره على الكرسي وبيفكر بتركيز وهاله قالت:- أظن كدا أنت مش محتاج لدليل تاني واقوى من ده يا شهاب!!!!!!!! واضح قوي أنها نوال، و أقوى من المجني عليها بنفسها، ولأن كِتارا دكتوره كيميائيه!!! خدت بالها من نقطه مهمه زي دي قبل ما تكتب الإعتراف.
شهاب أقتنع بكلام هاله، لكن قال بتفكير:- بس مش لوحدها أكيد يا هاله!! في مشترك في الجريمة دي.
هاله :- تقصد سراج!!!!
شهاب مط شفايفه وقال:- في عيد ميلاد يوسف هنعرف.
هاله بعدم فهم:- عيد ميلاد يوسف لسه عليه اسبوع يا شهاب!! انت بتفكر في ايه؟!
شهاب بدهاء:-وده وقت حلو قوي؛ وكافي إني أعرف تحركات نوال، جايز يكون سراج شريكها أو ممكن جوزها إحنا مانستبعدش أي حاجه!

في وقت تاني شهاب خارج من اوضته، وهاله كانت في المطبخ وقال:- أنا نازل يا هاله؛ عايزه حاجه؟!
هاله بتعجب:- رايح فين دلوقتي! لسه ما جهزتش الغدا؟
شهاب رايح مشوار مهم وبالمرة هاعدي على إلياس وايلين.
هاله ابتسمت من تفكير جوزها وقالت:- اوكي، ومتنساش سلامي ليهم يا سيادة المقدم الهمام.
شهاب إبتسملها وودعها وخرج، ركب العربيه واتصل على سراج ورد عليه:- الو مين معايا؟
شهاب:- اهلا يا دكتور سراج انا المقدم شهاب الطوخي!
سراج اتوتر:- آه؛ اهلا يا فندم عرفتك دلوقتي من صوتك؛ خير في حاجه!!
شهاب:- لأ مافيش حاجه مهمه، بس انا كنت عند واحد زميلي هنا في المنطقه قريب منك، وكنت عايز اشوف إلياس وايلين،قولت بالمرة بما أني جمب منهم اجي اشوفهم، لأن كده بصراحه وحشوني، ولا عندك مانع ألف وأرجع؟
سراج بنفي:- لأ؛ أبدا، يا خبر تشرف في أي وقت، ده كفايه اللي حضرتك عملته معاهم، وكمان هما متعلقين بيك جداً.
شهاب بإبتسامة:- نفس الشعور ناحيتهم، وربنا يبارك فيهم، خلاص تمام أنا خمس دقايق واكون عندك.

جرس الباب رن و إلياس جري فتح وسلم عليه وقال بفرحه:- عمو شهاب، عمو شهاب،حضرتك وحشتني قوي، ايلين، يا ايلين تعالي عمو جه.
بنفس الفرحه جريت ايلين:- عمو شهاااب هييييييه،
وسلمت عليه وكانت حَضنه رجليه.
شهاب نزل لمستواهم وقال بضحكه:- ازيكم يا حلوين عاملين إيه؟
ايلين ببراءه:- إحنا حلوين اوي، وطنط هاله عايزه تشوفني صح!
شهاب باس خدها وقال:- أيوه طبعاً وهى بعتالك البوسه دي لحد ما تشوفك.
سراج قابل شهاب ورحب بيه وقال:- اتفضل حضرتك في الصالون.
إلياس بيبص ورا شهاب بيدور على يوسف وقال بتساؤل:-فين يوسف حضرتك مجبتوش معاك؟! شهاب:- يوسف يا سيدي عند جدته لكن اوعدك المرة الجايه هاجيبه معايا.
إلياس بحزن:-هتجيبه فين بقى يا عمو خلاص، بابا هيبيع الشقه وهنمشي من هنا خالص!!
شهاب طبعا كان عارف كل حاجه من اجهزة التنصت، وبسبب كده هو جاي علشان يشيل كل الاجهزه، لكن مثل التعجب وقال:- ايييه معقول هتبيع الشقه يا دكتور سراج!!!
سراج بتوتر:- والله يا سيادة المقدم انا ماليش غير والدتي في المنصوره، ودلوقتي ما فيش سبب يخليني اعيش بعيد عنها بعد وفاة كِتارا الله يرحمها.
ايلين بعفويه:- بس أنت قلت اننا هنسافر بره مصر يا بابا.
سراج بصلها بنظرة تحذير، كأنه بيقولها ماتتكلمش، وشهاب معلقش ع كلام ايلين، وفضل يتكلم معاهم في مواضيع تانيه وبعد لحظات سراج جاتله مكالمه واستأذن وقام يرد،في نفس الوقت ده شهاب شال كل اجهزه التنصت من عند سراج، وبعد شويه قام وقال:- اتكلمنا كتير ياولاد والوقت خدنا، يادوبك ارجع ع الشغل.
إلياس:- ما تقعد شويه يا عمو
ايلين بترجي:- ايوه يا عمو شهاب ارجوك بليز؛ خليك معانا شوية كتير.
شهاب أبتسم وقال:- معلش يا حبايبي عندي شغل مهم جداً ولازم امشي دلوقتي.
ايلين فكرت وقالت:- ممكن ننزل معاك تحت نوصلك؛ ونرجع تاني، أرجوك.
شهاب بضحكه:- لأ دي بقى تستأذني فيها باباكي.
ايلين راحت وقفت قدام ابوها وقالت:- بليز ممكن توافق يا بابا؟!
سراج هز راسه ليها بموافقه وقال:- ماعنديش أي مانع يا حبيبتي انزلي وخدي الياس معاكي، ولو تحب ياسيادة المقدم أنزل اوصلك بنفسي.

شهاب بسخرية بعض الشيء قال:- لأ متتعبش نفسك أنا عارف طريقي كويس.
خلص كلامه وسلم على سراج،وخرجوا نزلوا في الاسانسير ،وماشيين في مدخل العماره، كان في بنت صغيره قاعده على سلم مدخل العمارة وفي ايديها فرده حلق بتلعب بيها، ايلين شافتها و وقفت مرة واحده وقالت بضجر:- الحلق ده بتاع ماما ايه اللي جابه معاكي؟!
شهاب سمع ايلين وكشر عينيه لكن راح عند البنت ونزل لمستواها ومسك فرده الحلق وسألها انتي بنت مين ياحلوه؟
البنت خافت ومردتش وجاوبته ايلين وقالت:- دي بنت عمو صبحي البواب ياعمو، والحلق ده بتاع ماما.

شهاب طبطب على ايلين تهدا وسأل البنت بهدوء وقال:- الحلق ده بتاعك يا حلوه؟ وقولي الحقيقه وانا هديكي حاجه حلوه.
البنت هزت راسها بالرفض من غير ما تتكلم وواضح انها لسه خايفه.
كان مركز قوي في الحلق ومتأكد انه شافه قبل كده وبعدها فتح عينيه بدهشه وافتكر انه نفس الحلق اللي كان في روب نوال، وقال للبنت:- طيب شاطرة خدي بقى بقى الفلوس دي وجيبي حاجه حلوه ليكي، بس عايزك تركزي معايا ومتخافيش من حاجه، الحلق ده جبتيه منين بالضبط!!!
البنت بخوف شاورت على الشارع، شهاب مسك ايدها وقال:- تعالي وريني انتي لقيتيه فين بالظبط!! البنت خرجت وشهاب ماشي وراها و وقفت مكان حادث كِتارا، شهاب لف ل ايلين وسألها:- أنتي متأكده إن ده حلق مامتك يا ايلين؟
ايلين بقسم:- والله ايوه صدقني وأسأل إلياس. الياس بتأكيد:- ايوه ياعمو صدق ايلين ، ده حلق ماما، وكانت لابساه آخر مرة شفناها فيها قبل ما طنط نوال جارتنا تخبط علينا.
شهاب انتبه لكلام إلياس وشر عينيه بتركيز وقال:- لااا، كده بقى انا عايزك تحكيلي ايه اللي حصل يومها بالظبط ومن غير ما تنسى كلمه.
إلياس:- كل اللي فاكره إن ماما كانت متضايقه جداً لأنها اتخانقت هى وبابا في اليوم ده، وبليل كانت وقفه قدام التسريحه بتلبس الحلق ده، حتى عجبني انا وايلين لأنه كان جديد، وبعد كده سمعنا صوت المطر والنور قطع وبعدها الباب خبط وانا جريت افتح علشان كنت فاكره بابا، لكن كانت طنط نوال، كانت جايبه عصير ليا انا وايلين، وصممت اننا لازم نشربوا كله وكانت بتلعب معانا، وبعدها نمنا وصحينا لقينا نفسنا في المكان اللي حضرتك جيت خدتنا منه، ويقصد (قسم الشرطه).
شهاب حط ايده تحت دقنه وبيفكر وبيرتب الأحداث وكل الادله كده ضد نوال، لكن برده ازاي وليه وايه الغرض وأهم سؤال إزاي انت*حرت بإرادتها وفي نفس الوقت مق*توله؟ في علامات استفهام❓❓❓ كتير عايزه تتوضح، وهو واقف محتار لمح عربيه واقفه ع بُعد مسافه فيها واحد وكانت راكبه جمبه نوال وبيتكلموا مع بعض، وشكلهم كانوا بيتخانقوا ، ولأنه شاف زوج نوال قبل كده لما كان واقف البلكونه والصور!! وشاف الشخص اللي معاها ده غير جوزها خالص، وأبتسم بخبث لأنه كده قرب يفك شفره القضيه، وقرر أنه يراقب الشاب ده، وراقب نوال وبعد كده عرف هو مين، وساكن فين! وايه علاقته بـ نوال، وكان الشخص ده ع ميعاد مع نوال في فندق خمس نجوم، وشهاب عمل فيه عيد ميلاد يوسف إبنه كنوع من المراقبة والترفيه في نفس الوقت،و كل اللي حصل كان متراقب تحت عيون شهاب الطوخي، وراقب تحركات سراج اللي كان متأجر شقه مفروش لفترة صغيرة علشان يظبط أموره قبل ما يسافر ، راقب تحركات نوال ومشي وراها لحد ما وصلت عند سراج اللي هى كمان كانت مرقباه علشان.......!!!!

ونقول باك

شهاب بيحكي كل اللي حصل وسراج ونوال واقفين بيسمعوا وملامحهم بتجيب ميت لون، لكن سراج بعد ما سمع الادله اللي ضد نوال، أتكلم بعصبيه وقال:- يعني نوال هي السبب في قت*ل مراتي!!!!

نوال صكت على أسنانها بغيظ واضح من الاتهامات الموجهة ليها وقالت بزعيق:- انا ما قت*لتش حد اكيد في حاجه غلط؛ انا بريئه من كل الاتهامات دي،انا ما عملتش حاجه غلط، و كل اللي اتقال ده ما حصلش، انتوا عايزين تلبسوني تهمه انا بعيده عنها؟

شهاب بينفث الدخان وقال:- ماشي يا نوال؛ هاعمل اني مصدقك، بس تقدري تفسريلي سبب وجودك هنا!!! ايه اللي جابك دلوقتي شقة واحد غريب عنك؟!

نوال بلعت ريقها وقالت بإرتباك:- أنا،، أحم، أنا جيت علشان!!! علشان اطمن على إلياس وايلين.
شهاب ضحك بسخريه وقال:- تصدقي طلع قلبك كبير يا نوال، مع إن إلياس وايلين من وقت وفاة مامتهم، وهما قاعدين عندي فترة كبيرة،وكانوا في أشد وقت كاانوا محتاجين فيه لأي حد يسأل عليهم، لكن محدش سأل.
ومط شفايفه وكمل بإستهزاء:- امممم، اكيد إنتي ما تعرفيش عنوان البيت! وعلشان كدا مكنش في مجال تسألي عليهم، تؤ؛؛ شوفتي أنا ظلمتك يا نوال.
نوال هزت راسها بعدم تصديق ،وقلبها بيدق من طريقة شهاب وقالت بخوف:- أنت بتلمح لايه ياحضرة الظابط! اوعى تكون مفكر اني قت*لت كِتارا، أو كان عندي حلقها في الروب زي ما قولت؛ أنا لحد دلوقتي معرفش إزاي جه عندي، أو ممكن مايكونش كان عندي من الأساس، وكمان مش معنى أني عامله وشم تجيبوها فيا؛ وأهم سؤال إيه مصلحتي من أني اقتلها وأنا مفيش بيني وبينها أي حاجه غير الاحترام!!! أنا واحده بتخاف من خيالها، مش معقول اللي بيحصل ده.
وبصت على سراج وكشرت عينيها وكملت بتوضيح:- مش يمكن جوزها سراج اللي عمل كل ده؟! ايوه أكيد هو، لأنه أكتر واحد مستفيد من قت*لها!!!

سراج بصلها وقال بدفاع:- اخرسي قط*ع لسانك، يا عديمة المروءه !! أنا ازاي اتجرأ واعمل حاجه زي دي؟! أنتي واحده معدومة الضمير.

ضحك شهاب بصوت مسموع وقال:- سبحان الله، مين اللي بينصح!!! دكتور سراج!!! أنا مش مستوعب بصراحه، عارف!!! كان نفسي الناس تتعلم منك المروءه والضمير، بس معلش ملحوقه وهناخد كمان عندك كورسات نتعلم فيها المروءة والضمير، وكمان الاحتراف.

سراج بلع ريقه بخوف وحرك الكرفته وقال بتلعثم:- أنا،، انا ماعملتش حاجه، اوعا تكون مفكر اني ممكن اقت*لها، سيادة المقدم ارجوك ولادي جوه ولو سمعوا بحاجه زي دي هيحصل لهم صدمه.
شهاب ببرود:- لا ما تخافش على الاولاد، هما دلوقتي في أمان، بيلعبوا مع يوسف ابني، ركز بس في اللي أنت فيه!
وبص لسراج في عينيه قوي وقال بغموض:- مش يمكن يكون كلام نوال صح!!! وإنك أنت اللي حطيت الحلق في الروب بتاع نوال!!!،ومش يمكن كمان أنت شوفت الوشم اللي على كتفها وأجبرت الدكتورة كِتارا أنها تكتبه في قلب الامضاء؟!! علشان تكسب أنت فلوس الوديعه؛ وتضحي بـ نوال جارتك و....!
وكمل بخبث:- وعشيقتك تخلص منها وتتحبس؟!!!!

سراج :-...........!!!!!

-هل فعلاً نوال هى اللي قتـ.لت كِتارا؟!
-هل سراج هو المتهم الأساسي وحب يثبت التهمة ع جارته نوال علشان يبعد عنه الشكوك!!!

:-كل ده هنعرفه في الفصل الأخير انتظروني. -----------يتبع

كِتارا بقلم:- مريم نصار
غلاف:- زهرة


© قصص وروايات مريم نصار — جميع الحقوق محفوظة. يُمنع نسخ هذا الفصل أو إعادة نشره كليًا أو جزئيًا دون إذن كتابي مسبق من الكاتبة.

🔔 عجبك الفصل؟ تابعي المدونةعشان توصلك الفصول الجديدة أول بأول🔔 متابعة المدونةاضغطي، سجّلي بحساب جوجل، وخلاص ✔

تعليقات✍️ أضف تعليقًا

بحث هذه المدونة الإلكترونية