قصص وروايات مريم نصار

قصص وروايات مريم نصار: المدونة الرسمية للكاتبة والروائية المصرية مريم نصار. هنا تقرئين حكايات تلمس القلب وتشبه تفاصيل حياتنا: روايات وقصص تجمع بين الرومانسية والدراما والتشويق، بأسلوب قريب من القارئ وشخصيات تعيش معك بعد الفصل الأخير. تُنشر كل رواية فصلًا بفصل بترتيب منظم ومريح للقراءة، وتقدرين تتابعين الفصول الجديدة أولًا بأول. أهلًا بك في عالم مريم نصار.

الفصل الثامن. زاد الآسمر




الفصل الثامن زاد الآسمر.


كان عصام واقفاً خلف منصة بقالته، يمسح الطاولة بخرقة قماش وعيناه معلقتان بمدخل الشارع حيرةً وانتظاراً. لم تمضِ دقائق حتى خطى «كريم» نحو المحل بخطوات سريعة وملامح يملؤها الفضول.

رفع عصام رأسه فوراً وسأله بلهفة:

ـ ها؟ مفيش أخبار؟


هز كريم رأسه وهو يسحب كرسياً ليجلس:

ـ برن على رضوان... بعتلي رسالة إنهم لسه هناك.


عقد كريم حاجبيه وقال متسائلاً:

ـ يا ترى هيوافق ولا لأ؟


رد عصام بتعجب:

ـ وليه ميوافقش؟


عقب كريم بتوجس:

ـ انا بقلق من الناس الأغنية دي!


لوّح عصام بيده معلقاً:

ـ هتعملي زي رضوان؟! من ساعة ما فارس ده راحله وقاله عايز أتجوز أختك، وحكاله هو مين ومين عيلته... من يومها مابينامش وعايز يجيب قراره!


أجابه كريم:

ـ يا سيدي ما إحنا سألنا عليه! 


ثم استرسل بشك: 

- بس أنت متأكد من قريبك ده يا عصام؟!


رد عصام بثقة حاسمة:

ـ يا بني ده قريب حماتي وحتة تقيلة ويعرف ناس تقيلة... ولما بعتناله كل تفاصيل فارس، جابلنا قراره وقال إنه زي الفل وسمعته سبقاه!


مال كريم إلى الأمام وقال مستدركاً:

ـ بس رضوان مهداش برضه... وخلاني أنا وأنت نروح المستشفى الخاص بتاعته!


انفجر عصام ضاحكاً وهو يتذكر الموقف:

ـ أيوه! عملت إنك تعبان بالزايدة!


نفخ كريم بقلة حيلة وقال بنبرة حسرة مضحكة:

ـ اسكت متفكرنيش... ده أنا دفعت دم قلبي في تحاليل وأشعة!


زدادت ضحكة عصام وهو يربط على كتفه:

ـ يا سيدي أهي جت بفايدة... طلع عندك نقص شوية فيتامينات وبتتعالج أهو!


سكت كريم لثوانٍ يتأمل الفراغ، ثم قال باستغراب لا يغادره:

ـ بس برضه اللي مستغربه... إن رضوان عرف قبل مننا كل حاجة عن فارس وقبل ما إحنا نقوله كمان! يا ترى سأل مين؟!


هز عصام كتفيه وقال بعفوية:

ـ علمي علمك يا بني!


تنهد كريم تنهيدة طويلة وقال وهو يعدل جلسته بخفة:

ـ يلا... ربنا يتمملها بخير، يمكن الأستاذ يفوق لنفسه بعد ما يجوزها!


ابتسم عصام بقلة حيلة وأردف بصدق:

ـ يا ريت والله يا كريم... ربنا معاه.



في المطبخ، راحت حبيبة تتنقل بين الموقد والطاولة في ضيق، وكلما حاولت أن تهدأ عادت صورة دخولها على الضيوف إلى ذهنها من جديد؛ ملابس العمل،كلامها العفوي، ثم نظراتهم إليها وهي لا تعرف أصلًا سبب اجتماعهم.


لكن أكثر ما أثار غيظها كان فارس.


جاء إلى بيتها ليتقدم إليها، ولم يكلف نفسه حتى أن يخبرها!


اشتعل الغضب في عينيها، وأكملت إعداد القهوة وهي تتمتم بضيق، حتى وقعت عيناها على الفنجان الذي أعدته له.


توقفت.


نظرت إلى الفنجان، ثم إلى علبتي القرفة والفلفل الأسود الموضوعة أمامها.


وسرعان ما ارتسمت على شفتيها ابتسامة ماكرة.


ـ وحياة أمك لأربيك على عملتك السودا دي!


أحضرت فنجانًا آخر، ووضعت فيه ملعقة كبيرة من القرفة، ثم مدت يدها إلى الفلفل الأسود.


توقفت.


نظرت إلى الباب، وكأنها تتخيل رضوان وهو يكتشف ما فعلته.


تراجعت عن الفكرة في اللحظة الأخيرة.


ـ لأ... الفلفل ده هيجيب أجلي على إيد رضوان.


وضعت نصف ملعقة أخرى من القرفة، ثم تركت الفنجان من دون سكر.


لكنها انتبهت فجأة لعائق قاتل: فنجانه ليس عليه ذلك "الوجه" المعتاد للقهوة المطحونة! فكرت سريعاً واهتدت إلى حيلة شيطانية؛ فأحضرت كنكة ثانية وأعدت فيها قهوة حقيقية، وأضافت إليها رشة خفيفة من «بيكربونات الصوديوم» لتصنع فوراناً ووجهاً كثيفاً وزبداً ثقيلاً. وما إن نضجت، حتى كطفت الوجه بحرص بالغ ووضعته فوق فنجان القرفة، فبدا وكأنه فنجان قهوة مضبوط تماماً على الصينية.


أمسكت الفنجان ورفعته أمام عينيها.


الآن أصبح من الصعب أن يكتشف أحد ما بداخله.


اتسعت ابتسامتها، ورفعت رأسها في زهو طفولي، ثم حملت الصينية واتجهت إلى الصالة.


دخلت وهي تحمل القهوة بملامح بريئة تمامًا، وكأن شيئًا لم يحدث.


قدمت الفناجين إليهم، ثم وصلت إلى فارس.


وضعت فنجانه أمامه، وانحنت قليلًا وهي تبتسم له برقة مصطنعة.


ـ اتفضل يا دكتور فارس... قهوتك سكر زيادة.


رفع فارس عينيه إليها.


توقفت عيناه عند ابتسامتها للحظة أطول من اللازم.


لم تكن حبيبة تبتسم له بهذه البراءة عادةً، خصوصًا بعد الطريقة التي تركها تدخل بها عليهم.


رفع حاجبه في شك، بينما ابتعدت هي وجلست إلى جوار رضوان، وكأنها أدت مهمتها وانتهت.


جلسَت باستقامة زائدة، وأخفت يديها في حجرها حتى لا تفضحها أصابعها التي كانت تعبث بها في توتر. همس فارس لنفسه: 


ـ مش مستريح... دي بتضحكلي! لأ، في حاجة غلط.


حمحمت حبيبة بخجل مصطنع، ثم قالت وهي تنظر إلى الضيوف:


ـ احم... أنا آسفة على اللي حصل. لكن والله أنا مش كده في العادي. بس...


قاطعتها غادة بابتسامة حانية:


ـ حبيبتي، محصلش حاجة. والله دخولك علينا عمل جو مرح وحلو. ولا إيه يا مهاب؟


ابتسم مهاب، وأجابها:


ـ بصراحة يا دكتورة، عندك تلقائية جميلة ومن غير رتوش. أنا متأكد إنك هتسعدي فارس.


تنهد رضوان، ثم أشار إلى الفناجين أمامهم ليتناولوها.


رفع مهاب فنجانه وارتشف منه، ثم أومأ بإعجاب.


ـ أمم... لأ، قهوتك مظبوطة يا دكتورة.


ابتسمت حبيبة ابتسامة هادئة.


ـ ألف هنا لحضرتك.


ارتشفت غادة من فنجانها، ثم قالت بإعجاب:


ـ والله يا حبيبة زي قهوة ماما بالظبط. تسلم إيدك.


ـ شكرًا لحضرتك.


التفت مهاب إلى فارس، الذي ظل فنجانه أمامه دون أن يلمسه.


ـ وإنت يا دكتور فارس مش هتشرب قهوتك ولا إيه؟


مد فارس يده إلى الفنجان، وهو لا يزال يراقب حبيبة بطرف عينه.


ـ لا طبعًا هشربها. تسلم إيدك يا دكتورة.


لمعت عينا حبيبة لحظة.


خفضت وجهها سريعًا حتى لا يرى أحد ابتسامتها، ثم همست:


ـ بالهنا والشفا على معدتك يا دكتور الغبرة.


رفع فارس الفنجان.


اقترب به من فمه، لكنه توقف قبل أن يرتشف.


وصلت إليه الرائحة.


عبس قليلًا، وأبعد الفنجان مسافة صغيرة، ثم نظر إليه مرة أخرى.


ظل صامتًا لحظات.


ثم عادت عيناه إلى حبيبة.


كانت تنظر أمامها في براءة مبالغ فيها.


وعندها فهم.


ارتسمت على شفتيه ابتسامة خافتة لم تلحظها إلا هي.


ـ عملالي مقلب يا دكتورة.


أنزل الفنجان قليلًا وحمحَم، محاولًا أن يخفي ما توصل إليه.


لكن غادة التفتت إليه في اللحظة نفسها.


ـ فارس؟ اشرب... عايزين نعرف رأيك في قهوة عروستنا.


رفع فارس عينيه إليها، ثم نظر إلى مهاب، ثم عاد إلى الفنجان.


كان رضوان يتابعه الآن أيضًا، وقد بدأ يلاحظ تردده.أشار  بشك:


ـ سيبيه على راحته يا مدام غادة. أكيد شرب كتير النهارده.


خفضت حبيبة وجهها إلى الأرض، متظاهرة بالتعاطف، فظنت غادة أنها تشعر بالحرج.


قالت غادة بإصرار:


ـ حتى لو شرب يا باشمهندس، ده أول فنجان من عروستنا، وفال وحش لو مشربش.


رفعت حبيبة عينيها إليها، ولم تستطع منع ابتسامة النصر من الظهور على شفتيها.


همست:


ـ ينصر دينك يا غادة... شكلي هحبك ولا إيه.


لم يعد أمام فارس مفر.


تنفس ببطء، ثم أقنع نفسه أن الأمر لن يتجاوز كوبًا من القرفة، وأن بإمكانه احتماله دون أن يفسد اللحظة.


رفع الفنجان إلى فمه.


ارتشف.


وفي اللحظة نفسها، اتسعت عيناه على نحو مفاجئ.


اشتعل حلقه بحدة القرفة،ابتلعها بصعوبة بالغة بينما جف حلقه تماماً من لذعتها النفاذة. توقف بصره معلقاً في الهواء بذهول، وانقبض وجهه بملامح مضحكة وموجوعة وهو يحاول جاهداً ألا يسعل بصوت عالٍ أمام العائلة!


ضغط شفتيه بقوة، وحبس السعال في صدره، ثم أنزل الفنجان ببطء.


كانت حبيبة تراقبه من طرف عينها، وقد امتلأت عيناها بالشماتة، وهي تكتم ضحكتها بصعوبة.


لاحظت غادة التغير المفاجئ في وجهه، فمالت نحوه بقلق:


ـ إيه يا فارس؟ مالك؟


أجاب من بين أسنانه، وهو يحاول رسم ابتسامة:


ـ مفيش... القهوة جميلة.


نظرت إليه غادة بشيء من الاستغراب، ثم ابتسمت:


ـ طيب الحمد لله عجبتك.


رفع فارس يده بإشارة سريعة، وقال:


ـ هايلة.


ظل ممسكًا بالفنجان لحظات، ثم حاول أن يرتشف منه مرة أخرى.


لكن حلقه لم يسمح له بذلك.


مد يده إلى كوب الماء، وشرب منه على مهل، بينما كانت حبيبة تراقبه في صمت وقد هدأت قليلًا بعد أن رأت نجاح مقلبها.


رفع فارس عينيه إليها.


هذه المرة لم تكن في نظرته دهشة ولا ألم.


كانت هادئة... هادئة أكثر مما ينبغي.


تلاقت عيناهما.


توقفت ابتسامتها.


لم يقل شيئًا، ولم يحتج إلى ذلك.


أعاد فنجانه إلى الطاولة بهدوء، ورسم ابتسامة هادئة على شفتيه وهو يستدير إلى بقية الجالسين، متجاهلاً ما حدث وكأن شيئاً لم يكن، بينما تضمر عيناه رداً ساخناً في قادم الأيام.


عاد «مهاب» وعائلته إلى المنزل، وما إن دخلوا حتى تفاجأت «غادة» بأخيها «نادر» جالساً في الصالون يلعب البلايستيشن باندماج مع ابنها «مالك».

التفتت إليه غادة بدهشة وقالت:

ـ نادر! أنت هنا من إمتى؟!


رفع نادر بصره نحو «فارس» وغمز له بعينه بمرح خبيث:

ـ يوووه... أنا هنا من بدري! ها.. عملتوا إيه عند العروسة؟


رمقه فارس بنظرة ضيق وقال:

ـ أسئلتك سخيفة زيك!


فصل نادر جهاز اللعب وقام من مكانه لينضم إليهم وهو يقول باستفزاز:

ـ إيه.. راجع قفاك يقمر عيش ليه؟! اترفضت؟! كنت عارف... أنت أصلاً لا تُطاق!


رد فارس ببرود:

ـ مش قادر أضحك... من تقل دمك يلا! 


تدخلت غادة بضحكة هادئة وهي تحاول تهدئة الأجواء:

ـ ما تهدوا بقى.. خلينا نتكلم جد شوية!


سألها فارس بنبرة متحفظة:

ـ نتكلم في إيه؟


قالت غادة بنبرة ذات مغزى:

ـ الله! نعرف الآراء إيه!


ثم التفتت إلى زوجها وقالت:

ـ مقولتليش يا مهاب.. إيه رأيك في حبيبة؟


هنا اتسعت عينا نادر بصدمة، فالتفت إلى فارس وهمس له بصوت عالٍ نسبياً:

ـ يا قطة! هي حبيبة دي العروسة اللي خلتني مخبر بسببها؟!


جز فارس على أسنانه وقال بهمس حاد:

ـ افصل شوية.. ده كان طلب أسود يوم ما طلبته منك!


عاد مهاب بجلسته ورد بتفكير وتأمل:

ـ والله يا غادة.. ومن غير كذب، في الأول كنت مضايق جداً! وبالذات واحنا رايحين عندهم، كنت حاسس إن عقلي هينفجر.. بقى «فارس الحسيني» يتجوز واحدة في المستوى ده ومتربية في حارة؟! دماغي هيّئتلي سيناريو تاني خالص عنها وعن أخوها... لكن!


تنهد بابتسامة صدق واستطرد:


ـ لكن لما قعدت مع أخوها، وشوفته قد إيه مثقف وراقي ولبق في كلامه، وبيقدر نفسه وبيحترمها.. وقتها فكرتي اتغيرت تماماً!


ثم ضحك بخفة وقال:

ـ واتغيرت أكتر لما شفت العروسة... وقتها عرفت ليه الأستاذ واقع على بوزه بجد!


مال نادر على فارس وهمس له بخبث:

ـ أنت وقعت على بوزك؟!


كان مشغولًا بما قاله مهاب أكثر من سخريته؛ فقد أسعده أن تتغير نظرة أخيه إليهما بمجرد أن رآهما عن قرب، وأن يحكم على رضوان وحبيبة من شخصيتيهما لا من المكان الذي نشآ فيه.


قالت غادة باهتمام:

ـ بصراحة.. أنا حبيت حبيبة قوي، ولاحظت إنها بتعمل حساب لأخوها كأنه أب ليها مش أخوها وبس.


عقب فارس بنبرة يغلفها الفخر والاحترام:

ـ هو فعلاً أبوها يا غادة... رضوان اهتم بحبيبة من يوم ولادتها، وكبرت على إيديه وصرف عليها لحد ما حققت حلمها.


هزت غادة رأسها بتأثر، بينما قال مهاب بنبرة مازحة:

ـ بس يعني إنت روحت المستشفى دي ست شهور... معقول حبتها في الفترة دي؟ طب قول يا أخي تسع شهور حتى!

وانفجر ضاحكًا.


التقط نادر الجملة فورًا، وقال ببراءة مصطنعة:

ـ ليه؟ هو حامل فيها؟


ساد الصمت لثانية.

حدق مهاب فيه بصدمة، بينما ارتبك نادر نفسه، وكأنه أدرك متأخرًا ما قاله.

ـ إيه؟


سارع نادر بتصحيح كلامه:

ـ قصدي... حامل فيه!


ضربه فارس في ذراعه:

ـ إنت بتقول إيه يا بني آدم؟


انفجرت غادة في الضحك، بينما حاول نادر الدفاع عن نفسه:

ـ قصدي ليه تسع شهور مش سبعة!


نظرت إليه غادة باستنكار مصطنع، وقالت:

ـ وليه سبعة مش تمانية؟


التفت مهاب بينهما، ثم نظر إلى فارس، وكأنه بدأ يشك في قدراته العقلية.

ـ هو ده طبيعي ولا أنا مش فاهم وبقيت غبي؟


رد نادر ببرود وسخرية:

ـ لأ.. قيصري!


انفجر الجميع في ضحكة صاخبة ملأت المكان، بينما استند فارس برأسه إلى الخلف، وابتسامة دافئة وهادئة ترتسم على شفتيه، بينما يفكر فيها وفي تفاصيلها التي باتت تملأ عليه عالمه.



ما إن غادر فارس وعائلته، حتى أغلق رضوان الباب خلفهم، ثم استدار مستندًا بكتفه إلى الحائط، عاقدًا ذراعيه أمام صدره، وينظر إليها بنظرة جعلتها تتوقف في مكانها، عاجزة عن الهرب.

توترت حبيبة، وحاولت أن تتجاهل نظراته، لكنها لم تستطع أمام هذا الجمود الفاحص.

ـ إيه يا رضوان؟ مالك بتبصلي كده ليه؟


حرّك رأسه ببطء، وقال بجدية لا تخلو من عتاب:

ـ مش عارفه ببصلك كده ليه؟


ازدادت حيرتها، فهزت رأسها نافية.

اقترب منها رضوان خطوة، وقال بنبرة تفيض بالغيظ المكتوم:

ـ في حد يعمل عمايلك السودا دي! إنتِ كنتِ ناوية تموتي الراجل؟


فتحت حبيبة عينيها بدهشة مصطنعة، محاولة التنصل من فعلتها:

ـ أنا! عملت إيه بس؟ وراجل مين؟


رفع رضوان حاجبه باستنكار:

ـ يا سلام! مش عارفة عملتي إيه ولمين؟!


ارتبكت، وقالت محاولة الدفاع عن نفسها بشتى الطرق:

ـ أنا عملت قهوة والكل شربها!


فعقب بحدّة:

ـ والقرفة؟! بس هو شربها بمزاجه.. أنا لو مكانه كنت طفحتهالك! في واحدة عاقلة في سنك تعمل كده؟!


تنهدت حبيبة بضيق وهي تلوح بيديها:

ـ خلاص يا عم رضوان، أنا كنت أصلًا متوترة ومتضايقة.. وبعدين عجبك الموقف اللي حطتني فيه قدامهم؟ إنت ليه ما قلتليش إن في حد جاي النهارده أصلاً؟!


ابتسم رضوان بمكر أخوي:

ـ أنتِ قايلة عندك شغل، زائد إن كان شكلك مسخرة!


زفرت بضجر:

ـ إيلا مسخرة؟! أنا عمري ما هنسى الموقف ده!


انفجر رضوان ضاحكًا، وقال وهو يمسح وجهه من أثر الضحك:

ـ خصوصًا لما قُلتي لمهاب: «يا عمو»! أنا لحد دلوقتي مش عارف أنسى شكله!


قالت بتبرير مرتبك:

ـ ما أنا كنت متلخبطة! فكرته أبوه!


توقفت ضحكة رضوان فجأة، وحدق فيها بعدم تصديق وكأنها نطقت بكارثة:

ـ أبوه؟! بقى أبوه صغير كده؟!


رفعت حبيبة كتفيها بعفوية مدافعة عن موقفها:

ـ يا عم، وأنا جاية أطلعله بطاقة؟


ضحك رضوان مرة أخرى من منطقها الغريب، ثم أشار إليها بيده:

ـ طب تعالي يا مصيبة.. تعالي اقعدي.


جلست حبيبة على الأريكة، وجلس رضوان إلى جوارها. ظل يتأملها لحظات بعينين فاحصتين، ثم التفت إليها متسائلاً:

ـ هو ده الدكتور فارس.. اللي كل خناقاتك معاه في المستشفى؟


توترت حبيبة، وبدأت تعبث بأصابعها بحرج شديد:

ـ أيوه.. هو. إنت عرفت منين؟!


ابتسم رضوان بهدوء، فازدادت حيرتها وتخبطها.

ـ بتضحك ليه يا رضوان؟ فهمني.. أنا شايفاك إنت والدكتور فارس كأنكوا تعرفوا بعض من زمان!


سكت رضوان لحظة، ثم قال:

ـ فعلاً أعرفه من فترة.


رفعت عينيها إليه في دهشة عارمة:

ـ إزاي؟!


ـ من شهر تقريبًا، جالي فارس المكتبة، وقعد معايا وحكالي عن نفسه، وعن الموقف اللي جمع بينكوا في المستشفى، وشرحلي كل حاجة.


استمعت حبيبة إليه باهتمام بالغ، بينما كان رضوان يسترسل في حديثه عن فارس، حتى توقف فجأة، وكأنه تذكر أمرًا آخر لم يكن قد أخبرها به.


رفع عينيه إليها، وقال بتأنٍّ:


ـ وفي حاجة كمان لازم تعرفيها عنه... لأن محدش يعرفها في المستشفى.


عقدت حبيبة حاجبيها، وقد التقطت من نبرته أن ما سيقوله ليس أمرًا عابرًا.


ـ حاجة إيه؟


ظل رضوان صامتًا للحظات، يطالعها بتردد، ثم أخذ نفسًا هادئًا قبل أن يقول:


ـ فارس من عيلة كبيرة جدًا يا حبيبة.


اتسعت عيناها قليلًا، وظلت تنظر إليه في انتظار أن يكمل.


فأضاف بعد لحظة:


ـ وعنده مستشفى خاص.


تجمدت ملامحها تماماً، وفتحت فاها بذهول:

ـ مستشفى خاص؟!


أومأ رضوان برأسه مؤكداً:

ـ أيوه.


حدقت فيه للحظات طويلة، وكأنها تحاول استيعاب صدمة لا تصدق:

ـ طب إيه اللي جابه يشتغل في مستشفى حكومي وهو أصلًا عنده مستشفى خاصة؟! وليه مخبي الموضوع ده عن الناس هناك؟


ـ أنا هحكيلك كل حاجة بعدين.. الحاجات دي دلوقتي مش مهمة.


هزت رأسها باعتراض وانفعال خفيف:

ـ لأ، مهمة يا رضوان! إزاي مش مهمة؟! أنا كنت مفكراه شاب عادي!


ابتسم رضوان باحتواء:

ـ طب ما هو شاب عادي يا حبيبة.


ـ لأ... الموضوع كده مختلف! أنا كنت مفكراه واحد مناسب ليا، عارفاه وعارفة ظروفه، إنما دلوقتي إنت بتقولي عيلة كبيرة ومستشفى خاصة، وفوق ده كله محدش في المستشفى يعرف عنه حاجة! أكيد في حاجة مستخبيّة... وأنا بصراحة خفت.


ابتسم رضوان ابتسامة قصيرة وهادئة، وقال:

ـ وأنا كمان خفت.


رفعت عينيها إليه بسرعة، وقد غلف القلق نبرتها:

ـ طب وإنت لما خايف ومش مطمّن... إزاي وافقت إنهم يدخلوا بيتنا أصلًا؟!


نظر إليها رضوان طويلًا بنظرة تفيض بالدفء والأبوة، ثم أجاب ببساطة صادقة:

ـ علشانك يا حبيبة.


هربت عيناها من عينيه، محاولة الفرار من نظراته التي تخترق أعماقها.


كان يعرفها أكثر مما تستطيع هي أن تخفي، ويعرف أن شيئًا عظيمًا قد تغير فيها خلال الفترة الأخيرة؛ لم تكن بحاجة إلى أن تقول له ما تشعر به، ففرحتها التي أصبحت تظهر بسهولة، وخروجها من المنزل في وقت أبكر من المعتاد، وتغير مزاجها الملحوظ، كل ذلك لم يمر عليه مرور الكرام.


قال بهدوء يلامس القلب:

ـ حبيبة... أنا مش صغير، ومش محتاجك تقوليلي حاجة علشان أفهمها. أنا شايفك من فترة متغيرة، بتسرحي أكتر، بتنزلي من البيت بدري، وبقيتي مبسوطة من غير سبب واضح... وأنا أكتر واحد واخد باله منك. إنتِ أختي يا حبيبة، وعشتِ قدامي طول عمرك، يعني طبيعي أحس بيكي وأعرف لما يكون في حاجة جديدة دخلت حياتك.


صمت لحظة، ثم تابع:

ـ وفارس لما حكالي عن نفسه وعن كل حاجة تخصه، وعرفت إنه من عيلة كبيرة، أنا ما اكتفيتش بكلامه. سألت عليه بنفسي كويس أوي، وخلّيت عصام وكريم يسألوا عنه ويعملوا تحرياتهم، وكمان ناس من عيلة كبيرة ليهم معرفة بعصام سألوا عليه. وبصراحة... كل اللي سألناهم عنه شهدوا له بأخلاقه وأصله وتربيته.


ازداد توتر حبيبة، ثم نهضت من مكانها:

ـ أنا خايفة يا رضوان... إنت بكلامك ده بتقلقني أكتر! إزاي واحد غني وعنده مستشفى كبيرة، ييجي يشتغل في مستشفى حكومي، ويخبي عن كل اللي حواليه إنه صاحب مستشفى؟! إيه اللي يخليه يعمل كده؟!


رفع رضوان عينيه إليها، ثم أشار بيديه لتجلس بهدوء:

ـ تعالي اقعدي.. وأنا هحكيلك كل حاجة.


ترددت لحظة، ثم عادت بخطى مترددة إلى مكانها.

وبدأ رضوان يحكي لها التفاصيل الكاملة؛ عن المستشفى الخاصة التي يملكها، وعن خلافه مع شقيقه مهاب، وعن المناقصة التي خسرها بسبب موقف فارس، ثم القرار الصارم الذي اتخذه مهاب بإرساله إلى المستشفى الحكومي كنوع من العقاب.


استمعت حبيبة حتى النهاية بتركيز تام، وكلما اتضحت لها صورة فارس أكثر، ازدادت دهشتها وتأثرها.

وحين انتهى رضوان، ساد بينهما صمت قصير محمّل بالتفكير العميق.


ثم التفت إليها وقال:


ـ فارس كان عايز يشرحلك كل حاجة بنفسه، بس أنا عارفك... إنتِ مندفعـة، وممكن من أول كلمة متعجبكيش تقفشي عليه وماتديلوش فرصة يكمل. فقلت له سيب الموضوع ده عليّا، وأنا هحكيلك كل حاجة بنفسي.


نفخت بضيق وحيرة، وشعرت بريبة غامضة.

شعر بها رضوان، فابتسم ليطمئنها وقال:

ـ صدقيني يا حبيبة، لو كان عندي فيه شك واحد في المية، مكنتش سمحتله يعتب باب بيتنا أصلًا. أنا سألت عليه كويس أوي قبل ما أوافق، وعرفت عنه كل اللي يهمني... وإني أجازف بيكي أو أحطك في حاجة مش مطمّن لها، دي حاجة مستحيل أعملها.


تنهدت بارتياح خفيف، وحركت رأسها باقتناع تام بصدق حديثه. فسألها بهدوء:

ـ المهم.. إيه رأيك؟


رمشت حبيبة بحيرة وقد عادت لدوامة الأفكار:

ـ رأيي في إيه؟!


ـ فارس جه لحد باب البيت، وعمل كل حاجة بالأصول، وطلب إيدك مني... ومستني ردي. فإنتِ إيه رأيك؟ موافقة؟


سكتت تماماً.

ظل رضوان ينظر إليها بصبر، منتظرًا جوابها.

مرّت لحظات طويلة دون أن تنطق بحرف.

فقال بهدوء حانٍ:

ـ خلاص.. طالما سكتي، يبقى مش موافقة.


رفعت حبيبة عينيها إليه بسرعة، وقالت بتسرع:

ـ أنا ما قلتش كده يا رضوان!


ابتسم قليلًا، لتستطرد هي بارتباك:

ـ أنا بس محتارة ومتلخبطة.. كل حاجة في دماغي اتقلبت!


تفهم موقفها تماماً، وقال بمرونة:

ـ طيب... إيه رأيك تاخدي وقتك وتفكري على مهلك، ولما تهدي وتبقي عارفة إنتِ عايزة إيه، تردي عليّا؟


ظلت صامتة لبرهة، ثم أومأت برأسها وقالت:

ـ تمام.. أنا فعلاً محتاجة وقت أفكر.


أومأ رضوان برأسه مطمئنًا:

ـ تمام يا بيبو.


تطلع إليها بابتسامة حنونة ودافئة عكست سنوات طويلة قضاها في رعايتها، وقال بصوت يقطر محبة وأبوة:

ـ كبرتي يا حبيبة...


دمعت عينا حبيبة رغماً عنها من حُنوّ أخيها، فحملقت فيه قائلة بصوت مرتعش يمزج بين المزاح والدموع:

ـ بقولك إيه يا رضوان؟ أنا على تكة! أقسم بالله أرفض دلوقتي وأقعد جنبك هنا طول العمر!


ضحك رضوان من قلب، وهز رأسه سريعًا برفض قاطع:

ـ لأ لأ.. طول العمر إيه؟! أنا مش ناقص! كفاية عليا قوي لحد كده، ويا دوبك.. أسلمك لواحد تاني يستحمل جنانك!


اتسعت عيناها باعتراض طفولي:

ـ والله يا سي رضوان.. أنا مجنونة؟!


فقال بابتسامة خبيثة:

ـ طيب هشهدك شهادة! اللي يجيلها عريس محترم وشاريها.. وتعمله قرفة من غير سكر علشان تطلع روحه.. تبقى إيه دي؟!


ردت باقتناع ساخر:

ـ تبقى متخلفة أقسم بالله!


ضحك رضوان حتى استرسل في الضحك:

ـ أهو.. رحم الله امرئٍ عرف قدر نفسه!


ذهلت حبيبة لثانية، ثم انخرطت في ضحكة صافية:

ـ أعمل إيه؟! ما هو ابن حلال ويستاهل!


انفجر رضوان ضاحكًا، ولم تستطع حبيبة أن تتمالك نفسها، فضحكت معه بملء فيها.


وبعد برهة، ولجت حبيبة غرفتها وأغلقت الباب خلفها. جلست على فراشها، وشرعت تفكر بحيرة بالغة؛ فقد كان بداخلها مزيج غريب ومتناقض من الخوف والأمان في آنٍ واحد.


هي حقًا تحب فارس، بل تهيم به وبكل لحظة تراه فيها، وقد ازداد تعلقها به أضعافًا حين جاء إليها بنفسه، طالبًا إياها في الحلال.


تنهدت بعمق، ثم أسندت ظهرها إلى وسائد السرير. فتحت هاتفها، وأخرجت صورته، وراحت تتفحص ملامحه بعينين تفيضان بالشوق؛ تلك الملامح التي جعلت قلبها يتعلق به أكثر فأكثر.


لكن الحيرة عاودتها من جديد، فعادت الأسئلة تتزاحم في رأسها. وفجأة، رن هاتفها معلنًا اتصال صديقتها إيمان.


ردت على الفور، وفتحت لها قلبها، تحكي لها عما تعيشه من حيرة وتردد. استمعت إليها إيمان باهتمام، ثم نصحتها بأن تقطع الشك باليقين وتؤدي صلاة الاستخارة؛ فإن كان في الأمر خير لها، بارك الله لها فيه ويسّر أمره، وإن كان غير ذلك، صرفه الله عنها وقدّر لها الخير حيث كان.

أغلقت حبيبة هاتفها، وقامت على الفور بهمة ونشاط؛ فتوضأت وأحسنت وضوءها، وفرشت سجادة صلاتها، ثم صلّت الاستخارة بقلب خاشع، وهي تدعو ربها أن يختار لها الخير، ويرزقها السعادة حيث كان وكيفما كان.




في نفس الوقت كان رضوان واقفًا في الشرفة، مسندًا ذراعيه إلى سورها، ثم أخرج هاتفه وأجرى اتصالًا ظل للحظات يرن قبل أن يأتيه صوت من الطرف الآخر.


كان حسين الملكي يجلس في مكتبه داخل منزله، وما إن رأى اسم رضوان على شاشة هاتفه حتى ارتسمت على وجهه ابتسامة عارفة، ثم أجاب:


ـ ها، طمّني؟


ابتسم رضوان وقال بنبرة ارتاح فيها شيء من القلق الذي ظل يرافقه:


ـ الحمد لله... عدّت على خير.


ابتسم حسين، وقال:


ـ طيب الحمد لله.


صمت رضوان لحظة، وكأنه كان يبحث عن الكلمات المناسبة، ثم قال بصدق:


ـ حسين بيه، أنا عايز أشكرك على مساعدتك ليا، وإنك جبتلي كل تفصيلة عن فارس.


اتسعت ابتسامة حسين، وهز رأسه نافيًا، ثم أجابه ببساطة:


ـ إنت بتقول إيه يا رضوان! أنا لو أطول أعملك أكتر من كده. أنا معملتش حاجة تستدعي الشكر... وحبيبة دي غالية عندي زيك بالظبط.


تنفّس رضوان، وقال:


ـ متشكر جدًا.


لكن حسين التقط القلق المختبئ خلف كلماته، فعاد صوته أكثر هدوءًا وطمأنينة:


ـ متقلقش يا رضوان. فارس الحسيني اسم على مسمّى... وهيسعد حبيبة.


ظل رضوان صامتًا لثوانٍ، وكأن الجملة الأخيرة وحدها كانت كافية لتزيح عن صدره جزءًا من الحمل الذي ظل يحمله منذ أن عرف أن حبيبة ستصبح لغيره.


ـ إن شاء الله.


أنهى المكالمة، وبقي واقفًا في مكانه.


رفع عينيه إلى السماء، وارتسمت على شفتيه ابتسامة هادئة، قبل أن تأخذه ذاكرته إلى ذلك اليوم الذي ذهب فيه إلى شركة حسين رغمًا عنه، لا من أجل عمل ولا صفقة، وإنما من أجل حبيبة.


يومها كان قد جلس أمام حسين بوجه لا يخفي قلقه، وأخبره بما يريده.


كان يريد أن يعرف كل شيء عن فارس الحسيني.


لم يكتفِ رضوان بما سمعه عنه، ولم يرضَ أن يسلّم حبيبة لرجل لم يعرفه حق المعرفة. لذلك طلب من حسين أن يبحث، وأن يعرف عنه كل ما يمكن معرفته.


وبعد وقت قصير، وصل إلى هاتفه ملف كامل أرسله إليه حسين.


فتح رضوان الملف يومها، فوجد أمامه حياة فارس كما لم يتوقع أن يراها؛ تفاصيل دراسته، عمله، عائلته، علاقاته، وتفاصيل كثيرة عن حياته الشخصية والمهنية.


قرأ كل شيء.


بحث، ودقّق، وسأل عن كل تفصيلة استطاع الوصول إليها...


واليوم، وهو يقف وحده في الشرفة، أدرك أن كل ذلك القلق الذي حمله يومها لم يكن بلا سبب.


فهو لم يكن يبحث عن رجل سيتزوج حبيبة فقط...


كان يبحث عن الرجل الذي سيأتمنه على أكثر شخص يخاف عليه في هذه الحياة.



في اليوم التالي، وقبيل الظهر بقليل، وبعد أن أنهت «حبيبة» كشوفاتها الطبية المتعبة، توجهت إلى كافيتريا المستشفى لتلتقط أنفاسها، وطلبت لنفسها عصيرًا بارداً يعيد إليها انتعاشها.

​وما إن رفعت الكوب إلى شفتيها لتشرب حتى فوجئت بفارس يسحب المقعد المقابل لها ويجلس بهدوء.


أنزلت الكوب ببطء، وحدقت فيه بنظرة غاضبة.


ـ نعم، قاعد على ترابيزتي ليه؟


أجابها ببرود مستفز وهو يستند براحتي يديه:


ـ عادي، جاي أشرب قهوة.


ـ أنا هسبلك الكافية كله. 


حاولت النهوض بعصبية، فمد يده محاولاً إمساك معصمها، فانتزعته بقوة شادةً يدها بغضب:


ـ أبعد إيدك! إنت هتخيب ولا إيه!


نفخ فارس بضيق، ثم قال بغيظ:


ـ إنتِ اللي تصرفاتك ملهاش تفسير. أنا جاي عايز أتكلم معاكي. اتفضلي اقعدي.


قالت بعناد وهي تعقد ساعديها:


ـ مش قاعدة.


نظر إليها لحظات، ثم قال بجدية متعمدة:


ـ خلاص، أقسم بالله هتلاقيني في القسم عندك وقدام الكل هقول اللي عايز أقولهولك.


توقفت مكانها، والتفتت إليه بغيظ، بينما أشار لها إلى المقعد:


ـ اقعدي يا حبيبة.


عادت وجلست بضيق، ثم عقدت ذراعيها أمام صدرها وقالت:


ـ حبيبة؟! إنت خدت عليا قوي! احفظ الألقاب، وإلا هقدم فيك شكوى.


رفع فارس حاجبه بدهشة مصطنعة:


ـ شكوى مرة واحدة؟ وأنا اللي عفيت عنك قبل كده واكتفيت بلفت نظر؟ انتِ قلبك أسود.


ـ آه، قلبي مطين بطين. عايز حاجة؟


تنهد فارس، ثم أخرج علبة أنيقة ووضعها أمامها على الطاولة.


ـ اتفضلي، جبتلك حاجة بسيطة.


نظرت حبيبة إلى العلبة، ثم إليه بريبة واضحة.


ـ بمناسبة إيه إن شاء الله؟ وتجيبلي هدية ليه؟ كنت من بقية أهلك وأنا معرفش؟


ابتسم فارس وقال بلا تردد:


ـ لأ، نقول اللي هيكون بحكم خطيبك مثلًا.


ضحكت بسخرية:


ـ هاهاها... احلم يا عسل.


ـ إيه؟  أفهم من كده إني مرفوض!


ـ آه.


ـ طب وكوباية القرفة المعتقة اللي ضحيت وشربتها؟ ضحيت بمعدتي عالفاضي!


حاولت حبيبة كتم ضحكتها، لكنها لم تستطع منع ابتسامة صغيرة من الظهور.


ـ والله على حظك البن خلص. بس نقول إيه؟ في ناس كده قدمها فقر.


حدق فيها فارس لحظة، ثم قال:


ـ كل ده علشان ما قلتلكيش إني جاي أتقدم لك!


تغيرت ملامحها، وعاد الغيظ إلى عينيها:


ـ وهي دي شوية! إنت قللت مني وخلت شكلي قدام عيلتك زبالة.


ابتسم بهدوء يخالف ثورتها:


ـ طيب والله لعله خير فعلًا.


ضيقت عينيها:


ـ قصدك إيه إن شاء الله؟


ـ متتصوريش هما مبهورين بيكي إزاي.


قالت بسخرية لاذعة:


ـ طبعًا! هما الأغنية كده، لما يشوفوا واحدة عاملة زي البلياتشو هيضحكوا ويتبسطوا.


تأملها فارس لحظة، ثم قال:


ـ اممم. يبقى رضوان قالك.


أراحت ظهرها إلى ظهر الكرسي، ثم أجابته بسخرية:

ـ آه، قالي على كل حاجة يا دكتور فارس.


تنفس بعمق وقال بنبرة صادقة:


ـ حبيبة، أنا مخبتش عليكي بقصد مني.


ضحكت بسخرية لاذعة:


ـ ها، أومال إيه اللي حصل؟ حضرتك بعملتك دي قفلتني منك.


ابتسم فارس، ثم مال قليلًا إلى الأمام:

ـ يا بنتي عملت إيه بس؟ إنتِ على طول كده بتحبي تكبّري المواضيع! ليكي حق تضايقي فعلًا لو كنت قاصدها. أنا واحد جاي هنا المستشفى لظروف خارجة عن إرادتي، وهرجع تاني لمكاني الأساسي، وأكيد رضوان وضّحلك. مكنتش أعرف إني هتنيل على عيني وأحبك.


اتسعت عيناها بدهشة:


ـ تتنيل؟ إيه تتنيل دي وإنت كنت تطول؟!


جز على أسنانه بصبر نافد، ثم قال:


ـ الصبر. أنا صابر عليكي علشان شاري يا حبيبة.


قالت بتحدٍ:

ـ ولو مش شاري كنت هتعمل إيه؟!


ـ لا، كنت هعمل كتير... بس علشانك أنا ساكت ومقدّر اللي حصل. وصدقيني، لو كنت أعرف من البداية إني جاي هنا وقلبي هيقع فيكي، كنت قلتلك كل حاجة من أول يوم. هخبي عليكي ليه؟ أنا مفيش حاجة عندي أخاف منها أو أخبيها عنك.


هزت رأسها بضيقلوحت بيدها بضيق مصطنع:

ـ بقولك إيه؟ بطل فلفستك دي! قولت اللي عندك، اتكل بقى من هنا.


أشار للهدية بابتسامة ماكرة:


ـ طيب على الأقل قبل مامشي خدي هديتك؟


نظرت إليها باشمئزاز مصطنع:


ـ قصدك الرشوة.


قطب حاجبيه بذهول:


ـ رشوة؟


ـ آه.. رشوة! دكتورة في مكان عملها بتأدي واجبها، وإنت داخل عليها بكيس هدايا.. تبقى رشوة عيني عينك!


صفق بيديه بخفة وقال بضحكة مكتومة:


ـ يخربيت تخيلاتك يا شيخة.


ثم أشار إلى العلبة:


ـ اسمعي، أنا جبتلك الآيفون ده من يومين وكنت عايز...


انتفضت حبيبة قليلًا:


ـ قولت إيه؟


ـ آيفون.


بللت شفتيها وتغيرت نبرتها دون أن تقصد:


ـ احم... آيفون كام؟


ـ 18 برو ماكس.


اتسعت عيناها قليلًا، ثم حاولت أن تستعيد برودها سريعًا:


ـ احم... أمم... الجديد؟


ـ موديل السنة.


تلعثمت للحظة، ثم سألت دون أن تستطيع إخفاء فضولها:


ـ يعمل كام؟! قصدي يعني... ولا يهمني.


ضحك على ارتباكها الواضح:

ـ عارف.


عادت لترفع ذقنها بتعالي كاذب:


ـ بقولك إيه.. أنا ولا يفرق معايا آيفون ولا فيراري.. اتفضل خد هديتك واتكل على الله!


تنهد بيأس لطيف:


ـ طيب ممكن أعرف إنتِ متعصبة ليه دلوقتي؟


رفعت كتفيها بلا مبالاة:


ـ يا سيدي أنا كده، ربنا خلقني كده.


فعاد لسؤاله الجاد بنبرة هادئة:

– طيب.. عايز أعرف ردك.


​– في إيه؟!


– في طلبي ليكي!


أجابت بسرعة، وكأنها تريد إنهاء الحديث قبل أن يزداد ارتباكها:


ـ مش موافقة، ها ارتحت؟!


وقبل أن يرد، هفهفت نبرة مألوفة وناعمة بقربهم:


ـ هااااي.. فارس!


​تجمدت ملامحه في مكانها بصدمة مفاجئة.


أما حبيبة، فما إن رفعت عينيها حتى اصطدمت بها؛ كانت هي المرأة نفسها التي رأتها من قبل في مكتب فارس، وهي تمسك يده.


اشتد توتر فكها، وصكت أسنانها في ضيق.


تيماء كانت جميلة بصورة لافتة، وأنيقة إلى حد جعل حبيبة تتأملها للحظة قبل أن تنهض من مكانها، لكنها ما إن وقفت حتى انتبهت إلى فارق الطول بينهما؛ كانت تيماء أطول منها بوضوح.


زادها ذلك غيظًا، فرفعت ذقنها قليلًا، وكأنها ترفض أن تمنحها حتى فرصة ملاحظة ارتباكها.


​ابتسمت تيماء ببرود مصطنع ووجّهت بصرها نحو حبيبة:

– هاي.. أنا تيماء! صديقة فارس.


​حاولت حبيبة رسم ابتسامة باهتة مجبرة، ثم رمقت فارس بنظرة حارقـة وقالت متمتمة ببرود:

– أهلا وسهلا.. هسيبكم مع بعض، وأروح أشوف شغلي.


التقطت حبيبة كوب العصير من على الطاولة، ثم غادرت بخطوات سريعة، وما إن ابتعدت عنهما حتى تمتمت بغيظ وسخرية:


ـ أنا تيماء! هي بتسنن ولا إيه؟ ما تقول شيماء عادي.


تابعها فارس بعينيه، ثم أطلق زفرة طويلة وهو يهز رأسه بضيق.


جلست تيماء مكان حبيبة، ومدت يدها تلمس كيس الهدية بفضول وهي تضحك، ثم فتحتها ونظرت إليها بإعجاب:


ـ واو! هنبدتيها بآيفون؟


التفت إليها فارس بضيق:


ـ جاية ليه؟!


رفعت عينيها إليه مبتسمة:


ـ علشان أشوف مين اللي وقعت فارس الحسيني. هي دي بقى!


ـ آه، هي. مالها؟ مش عجباكي؟


ـ المهم إنها تعجبك إنت.


ابتسم فارس دون تردد:


ـ جدًا. دي روحي من جوه.


ضحكت تيماء:


ـ بتغظني حضرتك!


ـ وإنتِ بيحوق فيكي! قوليلي بقى جاية ليه بجد.


ابتسمت وهي تعيد النظر إلى الهدية:


ـ أبدًا، لما عرفت من غادة إنك هتخطب، جيت أباركلك وأشوفها.


نظر إليها فارس وابتسم:


ـ دي غيره بقى؟


ـ بصراحة آه.


هز رأسه ساخرًا:


ـ أنا مشوفتش في جنانك. يا بنتي إنتِ مش مرتبطة!


رفعت إصبعها وكأنها تقدم له إجابة علمية دقيقة:


ـ علميًا آه، عمليًا نو.


ـ علشان خايبة.


قالت بابتسامة خبيثة وهي تضرب على الطاولة بخفة:


ـ طيب قولي أعمل إيه؟


ـ لا، دي حاجات ماليش فيها.


قالت بنبرة تهديد ماكرة:

ـ صدقني لو مساعدتنيش، أنا مش هسيبك في حالك.


رفع فارس حاجبه:


ـ تهديد؟


ابتسمت بثقة:


ـ اعتبره تهديد. هستنى ردك عليّا بليل، ولو متحركتش في ظرف يومين، هتلاقي أحلى هدية خطوبتك.


أجابها ببرود:


ـ أنتِ عارفه اني مباجيش بالعند.


قالت وهي تلوح بيدها بزهو:

ـ هنشوف. يلا روح صالح خطيبتك قبل ما تقلب عليك.


ابتسم فارس:


ـ لأ.. هي مش محتاجة، ومتشكر جداً لزيارتك اللي جت في وقتها! 


ضحكت تيماء وهي تنهض:


ـ اجمد. لسه الطريق طويل، ومتنساش... هستنى ردك.


وفي أروقة القسم، كانت «حبيبة» تمشي جيئة وذهاباً بعصبية مفرطة، بينما حاولت صديقتها «لبنى» تهدئتها:

– اهدي بس يا حبيبة.. مش كده!


​وقفت حبيبة وتكتفت بانفعال:

– أهدي إيه يا لبنى؟! بقولك حاسة إني هتشل من الغيظ!


هزت لبنى رأسها:


ـ إنتِ اللي غلطانة.


ـ أيوه عارفة.. وعايزة أضرب نفسي ميت جزمة كمان! إنتي مكنتيش معايا وأنا بلساني ده بقوله "مش واخداه.. إيه اللي دخل الأيفون في الزعل بس؟! خربت على نفسي بنفسي!


​قالت لبنى ببساطة عملية:

– بسيطة.. روحي قوليله رجعت في كلامي


نظرت إليها حبيبة بريبة:

ـ تفتكري يرضى يدهولي؟!


حدقت بها لبنى لحظة، ثم قالت:

ـ مجنونة رسمي.


هزت رأسها بأسف مصطنع:

– مجنونة إيه بس؟! ما انتي ما شوفتيش شنطة الهدية، ولا ريحتها، ولا جمال الآيفون جواها! آآآه.. هتشل من الغيظ بجد! طب حتى كنت أفتحه أشوفه على الأقل!


ضحكت لبنى وقالت بحنان:

– يخربيت فقرك يا بيبو.. بس تعرفي؟ فرحت أوي إنه طلب إيدك بشكل رسمي.. بجد هو شاريكِ وباين عليه إنه بيحبك أوي.


رفعت حبيبة كتفيها بلا اهتمام، من كلام لبنى محاولة إخفاء ارتباكها، وجذبت هاتفها تفتح متصفح جوجل وبحثت عن سعر الجهاز وهي تقول:

– تفتكري.. لو كنت خدته وبعته.. هكسب فيه كام مثلاً؟!


​رفعت لبنى يديها بيأس:

ـ عايزة تاخدي الهدية اللي خطيبك جايبهالك وتبيعيها يا حبيبة؟ لا لا... أنا هروح أشوف شغلي أحسن، خمس دقايق كمان معاكي وعقلي هيضرب منك!


خرجت لبنى وهي تضحك، فوقفت حبيبة مكانها تنظر لشاشة الهاتف، وما إن رأت السعر الحقيقي حتى تنحت في مكانها وشهقت بصدمة عارمة:

ـ مية وخمسين ألف جنيه؟! يا مصيبتي السودة! ده أنا فرّطت في مرتب عشر سنين على الأقل!



في فخامة فيلا سما، كانت تسير جيئةً وذهابًا كفريسة محبوسة في قفص، يغلي صدرها حنقًا، وتشتعل النيران في قلبها من شدة الغيظ. توقفت فجأة، والتقطت هاتفها لتتصل بفريد، لكنه لم يُجب. وبعد لحظات من الانتظار الثقيل، اكتفى بإرسال رسالة جافة يخبرها فيها:


ـ سما، أنا مشغول الفترة دي، وبحذّرك تتصلي بيا تاني في أي وقت. لما أعوزك، هجيلك أنا. مش عايز صداع ولا إزعاج. عندي شغل مهم محتاج تركيز، وعلى الله أشوف رقمك تاني.


ما إن انتهت من قراءة الرسالة حتى انفجر غضبها، وألقت الهاتف على الأريكة بعنف.


ـ بقى كده يا فريد... ماشي.


ولم تنتظر طويلًا حتى هاتفت جيار، تأمره بالحضور فورًا.


ـ جيار، تعالالي حالًا دلوقتي.


أغلقت الهاتف، وأعادت قراءة الرسالة للمرة الأخيرة، ثم ألقت الهاتف على الأريكة بعصبية مرة أخرى.


وبعد وقت قصير، كان جيار قد وصل إلى الفيلا.


ما إن دخل الصالة حتى وجدها أمامه، تتحرك بعصبية واضحة، والغضب يشتعل في عينيها. نظر إليها باستغراب، ثم قال وهو يقترب منها:


ـ في إيه يا سما؟ جيباني ع ملا وشي ليه؟


استدارت عنه، ثم عادت إلى سيرها في المكان وهي تقول بانفعال:


ـ في إني متغاظة وهفرقع، وحاسة إني عايزة أحرق الدنيا باللي فيها.


استشف ما يدور في ذهنها، وقال بنبرة هادئة، وهو يعقد ذراعيه أمام صدره:


ـ آه... هي الحكاية كده.


التفتت إليه بضيق:


ـ إيه؟


ـ بتغيري على فريد.


احتجت باحتداد وانفعال، وهي تلوح بيديها في الهواء:


ـ ومغرش ليه؟ هو مش جوزي؟


ـ آه جوزك، بس عارفة اللي فيها.


فردت باستهجان، وعيناها تتقدان شررًا:


ـ ماليش دعوة إن كان حبها ولا لأ، أنا ليا دعوة؟ بأني مراته الأولى. يعني هي اللي داخيلة عليا، مش أنا. والموضوع زاد عن حده قوي، وأنا مش هسكت.


تنهد بضيق، محذرًا إياها، ثم اقترب خطوة ليصبح أقرب إليها:


ـ اهدى ومتخليش جنانك يصورلك حاجات ممكن تفتح عليكي بيبان جهنم يا سما.


حدقت فيه سما بغضب:


ـ هو إنت كمان بتهدد يا جيار؟ هو اللي إنت بتقوله ده منطقي؟ مش عايزني أضايق وهو بقاله أسبوعين لازق في الفيلا عندها ومخرجش منها؟


رد بجدية قاطعة، وهو يثبت نظراته الحادة عليها:


ـ هو متصاب، وسبب عدم خروجه الصحافة. لو شمت خبر هتفتح عليه فاتحة مش حلوة، وهتخلي العيون تترصدله. إنتِ عارفة فريد، لحد دلوقتي محدش قدر يمسك عليه شبهة واحدة. والعالم كله عارف إن سمعته زي الجنيه الدهب، ومستحيل بعد السنين والنجاح اللي هو فيه، يضحي بكل ده ويخرج علشان سيادتك مش قادرة على فراقه.


سكت لحظة، ثم نظر إليها بنظرة ذات مغزى، وأضاف:


ـ وبعدين تعالي هنا. أومال كنتي في ألمانيا بتعملي إيه لما كنتي بتشوفيه مرة في الشهر على الأقل؟


هتفت باعتراض وتمرد، وهي تدير ظهرها ثم تلتفت إليه بغضب:


ـ إنت هتفتحلي موشح يا جيار؟ هو أنا علشان استحملت كل السنين دي خلاص فريد هيسوق فيها؟ أنا مراته الأولى، والمفروض دلوقتي أنا اللي ليا أحقية إنه يكون قاعد معايا، وهي اللي تستناه مش أنا.


صاح بها بنبرة حاسمة وصارمة، جعلتها تتسمر في مكانها:


ـ لأ، اصحي وفوقي يا بنت الناس. وافتكري كويس سبب جوازه منك.


قالت بحدة وتحدٍّ:


ـ وإيه يعني! في الآخر بقيت مراته.


اقترب جيار منها قليلًا، ثم قال بجدية أكبر:


ـ لأ، مش وإيه يعني. موضوعك يختلف. إنتِ واحدة لاقاكي مرمية في الشارع غرقانة في دمك، وخدك على بيته، وعرفنا  إن ده كان نزيف وكنتي بتسقطي. ولما عالجك وحكيتي اللي حصل، وإن واحد ضحك عليكي بورقة وهرب لما عرف إنك حامل، وإنتِ هربتي من البيت خوفًا من عيلتك. وعرفتي إن عيلتك اتسجنت، حبيتي تتخلصي من اللي في بطنك. وطلبتي الأمان من فريد واتجوزك.


أجابت بصوت مرتعش يغلفه العناد، وهي تعقد حاجبيها:


ـ لأ، اتجوزني علشان شفته وهو بيقتل يا جيار. علشان عرفت فريد على حقيقته.


ضحك بسخرية لاذعة، ثم قال:


ـ ده على أساس خاف منك! تبقي عبيطة. إنتِ بعد كل اللي شفتيه وعرفتيه عن فريد الشامي، تفتكري إنه ممكن بجد يكون اتجوزك كنوع من إنك تكتمي السر اللي شفتيه؟


ـ أومال إيه؟ حبني مثلًا؟


أجاب بنبرة عملية جافة:


ـ دي هو يعرفها، أنا معرفش خباياه. ولكن اللي متأكد منه إنه بيرتاح معاكي. فمتخربيش على نفسك يا بنت الحلال، واقعدي في بيتك لحد ما هو يحب ييجيلك.


قالت بغل وحقد دفين، وهي تعض على شفتيها:


ـ آه وهو يفضل عند ست الحسن؟ وأنا أستنى المعروف منها ويجيلي.


تحدث بنبرة حادة وناقدة، وهو يشير بإصبعه تحذيرًا:


ـ وست الحسن دي عرفها منين! مش إنتِ اللي حكتيله عن زاد! وكنتي شمتانة فيها لما عرفتي إنها اتطلقت.


قالت بعناد أعمى:


ـ عادي، كانت مجرد دردشة بينا، بس ما قلتلوش يجوزها. ولا كنت أعرف إنه هيشوفها في يوم من الأيام أصلًا.


ـ حظك بقى. هو شافها في الحفل الخيري، ومن ساعتها كلبشت في عقله. وفضل وراها وورا حسين لحد ما خدها. هو حر.


هزت سما رأسها بعناد:


ـ لا، مش حر. وصدقني مش هسكت.


ثبت جيار نظره عليها للحظات، ثم قال بصرامة واضحة:


ـ لايميها يا سما، وبلاش نظرة الانتقام اللي شايفها دي. بلاش تلعبي مع فريد بأي حركة. ساعتها مش هيبقى عليكي لحظة، وهتكوني مدفونة تحت رجليه. أنا نصحتك، وإنتِ براحتك.


أدار جيار ظهره بخطوات واسعة وثابتة، تاركًا إياها تقف وحدها في منتصف الصالة، والغضب المتأجج في صدرها يكاد يعصف بالمكان. وما إن ابتعدت خطواته واختفى صداها في الخارج، حتى التقطت أول ما وقعت عليه يدها من فوق الطاولة، وقذفت به بعنف على الأرض، فتحطم وتناثرت شظاياه في المكان، بينما انطلقت من بين شفتيها صرخة مكتومة عكست مدى قهرها وجنونها.




انتهت «حبيبة» من جدول كشوفاتها الطبية، ولمّت أغراضها الشخصية في غرفتها بالمستشفى استعداداً لمغادرة العمل بعد انتهاء دوامها. وما إن خطت خطواتها نحو الباب حتى اعترضت طريقها إحدى الممرضات باهتمام:

– دكتورة حبيبة.. الدكتور فارس عايزك في مكتبه فوراً.


التوت شفتاها بضيق بالغ، ولوحت بيدها بملل:

ـ أنا خلصت ورديتي، يعني مبقتش مطالبة بحاجة هنا... وبكرة إن شاء الله أبقى أشوفه عايز إيه!


لم تنتظر ردًا، ومضت في طريقها نحو الخارج.

كان فارس يقف خلف باب مكتبه في تلك اللحظة، وقد لمحها من بعيد وهي تغادر. لم يتردد طويلًا؛ فتح الباب، وأسرع خلفها، حتى أدركها قبل أن تبتعد.

ـ حبيبة!


لم تلتفت.

مد يده وأمسك بذراعها، فاستدارت إليه فجأة، وسحبها معه إلى المكتب قبل أن تعترض، ثم أغلق الباب خلفهما.


استشاطت غضبًا، وانتزعت ذراعها من يده، ثم دفعته من صدره بكل ما أوتيت من ضيق:

ـ إنت أخدت عليا أوي! إنت أول وآخر مرة تلمسني، بدل أقسم بالله ما أفضحك في المستشفى هنا.فاهم؟


تراجع فارس نصف خطوة، ورفع كفيه في إشارة إلى أنه لم يقصد استفزازها، بينما ارتسمت على وجهه ابتسامة صغيرة لم يستطع منعها.

ـ هو أنا مش بعتلك وقولتلك إني عايزك؟ إيه اللي خلاكي تتجاهلي كلامي؟


هزت رأسها بحدة وهي تشير بإصبعها تحذيراً:


ـ الكلام ده في مواعيد شغلي، إنما دلوقتي أنا خلصت دوامي، ومش مطلوب مني أجيلك غير في المواعيد الرسمية... إنما بعد كده، كل واحد يلتزم بوقته وشغله، وأنا مش كل ما تفتكر تناديني، أجيلك جري! 


ظل يتأملها لثوانٍ، ثم أمال رأسه قليلًا، وكأنه أدرك أن الجدال معها بهذه الطريقة لن يقوده إلى شيء.

ـ أنا جبتك هنا علشان نكمل كلامنا.


عقدت حاجبيها باستنكار:

ـ كلام إيه؟! هو في بينا كلام أصلًا علشان نكمّله؟ مفيش بينا حاجة تتقال ولا موضوع يستاهل الكلام من الأساس!


اقترب أكثر حتى شعرت بدفء أنفاسه، وتحدث بنبرة جادة وحاسمة هجرت كل عبثه:

ـ حبيبة... اقعدي. عايز أتكلم معاكي بجد شوية، من غير هزار ولا شد وجذب. أنا مش جاي أصالح بنت أختي الصغيرة، أنا بتكلم معاكي في موضوع يخص مستقبلي ومستقبلك.


رمقته بنظرة ضجرة، ثم استقرت عيناها عليه مباشرة:

ـ إنتَ عايز إيه بالظبط؟!


ـ مشيتي ليه من الكافيه؟


ثبتت عينيها عليه لحظات، ثم ارتفعت زاوية فمها بابتسامة ساخرة.

ـ والله أنا سيبتك براحتك مع الحتة اللامبورجيني اللي جتلك! وقولت أهو أخليكم على راحتكم... ولا إنت عايزني أقعد أحرسكم كمان؟


عقد حاجبيه بذهول تام:

– لامبورجيني؟! هي مين دي؟!


– ـ الست اللي صفّ سنانها طاير من كتر الدلع! وبعدين إيه حكاية «تيماء» دي؟! ما تقول شيماء عادي، ولا هو دلع مايع وخلاص؟!


لم يستطع فارس كبح ابتسامته، وانطلقت منه ضحكة خافتة سرعان ما حاول السيطرة عليها، وهو يهز رأسه مستسلمًا لغرابة تعليقها. بينما رمقته حبيبة بغيظ، واستدارت عنه بضيق.


ـ بقولك إيه... ما تضحكش! أنا مش ماشية بوزّع نُكت في المستشفى علشان كل ما أتكلم تضحك! الموضوع مش لطيف يعني!


عدل جلسته بابتسامة واسعة تخترق أعماقها:

– ـ لأ، أنا بضحك على طريقتك... وهي فعلاً اسمها تيماء، مش شيماء.


تسللت الصدمة إلى ملامحها، وتوردت وجنتاها بالحرج الشديد، فتمتمت مرتبكة:

– أنا.. أنا فكرتها بتسنن!


تابعها بعيون تلمع بالعشق الخفي وقال بنبرة دافئة:

ـ والله خفة دمك دي مشكلة لوحدها يا حبيبة... بس تعالي اقعدي، خلينا نتكلم بهدوء.


راجعت نفسها، ورفعت ذقنها بعناد مكابر:

ـ أنا مش هقعد معاك ولا هتكلم... مفيش بيني وبينك أصلًا حاجة تستدعي إني أقعد معاك القعدة دي دلوقتي!


مسح وجهه بكفه بقلة حيلة، ثم نهض ليقف مواجهاً لها مباشرة:

– ـ يا بنتي... إنتِ فرهدتيني معاكي! أنا دلوقتي راجل معجب بيكي، وأتقدمتلك وطلبت إيدك رسمي، يعني طبيعي أسألك عن الخطوة اللي بعدها... هنفضل واقفين عند نفس النقطة لحد إمتى؟


وضعت حبيبة يدها إلى جانبها، ومالت برأسها قليلًا:

ـ ده اللي هي إيه إن شاء الله؟!


ـ إني عايز أحدد معاد الخطوبة، وبعدها كتب الكتاب... وأعرف في الآخر إحنا هنتجوز إمتى. أنا مش بتكلم معاكي لمجرد الكلام، أنا عايز أعرف إحنا رايحين على فين.


اتسعت عيناها بذهول حقيقي، وتراجع خطوة للوراء:

ـ إيه ده كله؟! وبعدين أنا قلتلك من الأساس إني مش موافقة... إنت بتخطط لكل ده على أي أساس بقى؟!


تلاشت الابتسامة من وجه فارس تدريجيًا.

وقف أمامها، وبقي صامتًا لحظة، ثم واجه عينيها مباشرة، بنظرة لم تحمل هذه المرة أي مزاح:

ـ بجد يا حبيبة... إنتِ مش موافقة؟


هربت عيناها من عينيه، وكأن السؤال أصاب مكانًا لم تكن مستعدة لأن يقترب منه، فاستعادت دفاعها المعتاد بسرعة:

ـ إنت واحد مرتبط.. وبيجيلك بنات تـحل من على حبل المشنقة! مالك ومالي بقى؟! عايز تخطبني أنا ليه؟! ما تروح لست تيماء بتاعتك..


لم يجبها فورًا

تأملها بابتسامة هائمة، وانحنى قليلاً برأسه ليطبع نظراته في وجهها وعينيها مباشرة:

ـ بتغيري عليا يا حبيبة؟!


رفعت حاجبيها بحدة مصطنعة، وضربت كفاً بكف:

– هو إنت بتتنحنح كده ليه؟! ما تظبط كده وأنت واقف وتتكلم عادي! أغير عليك ليه إن شاء الله؟! كنت أخويا، أبويا، خطيبي، حد من عيلتي عشان أغير عليك؟! إنت حيالله مجرد واحد اتقدمتلي.. واترفض.. وخلصنا!


أطرق فارس رأسه للحظة، ثم خرجت منه ضحكة قصيرة وهو يهز رأسه غير مصدق.

ـ بعشق هدوئك ورومانسياتك! 


سرعان ما استقامت ملامحه، وكأن المزاح لم يكن سوى ستار قصير أخفى خلفه شيئًا أكثر جدية.

ـ المهم.. أنا عايز أعترف لك بحاجة.


ربعت ساعديها أمام صدرها بتحدٍ:

ـ أيوة، قول... ما أنا كل يوم باكتشف فيك حاجة جديدة! كل شوية تطلعلي بحاجة ما كنتش أعرفها عنك... يا ترى مخبّي إيه تاني؟


وقف فارس أمامها بهدوء، وأسند يده إلى حافة المكتب، ثم تابع حديثه بنبرة ثابتة:


ـ تيماء مش صديقتي زي ما إنتِ فاكرة. هي بنت رجل أعمال، ووالدها كان عارض عليّا الجواز منها. أنا أعرفها بحكم إننا من نفس الدائرة، وعارف من البداية إنها بتحب شخص تاني، وعشان كده رفضت الموضوع. ولما جت المستشفى وقتها، كانت جاية تشكرني إني رفضت الارتباط بيها، مش علشان بيني وبينها أي حاجة زي ما إنتِ فاهمة.


قاطعت بحدة وغيظ مكتوم:

ـ والله؟! طب ولما هي كانت جاية تشكرك أصلًا، جاتلك تاني ليه؟! هو الشكر عندها بالتقسيط ولا إيه؟!


– لأ.. جات علشان تبارك إني خطبت!


انفلت ضيقها قبل أن تتمكن من إخفائه:

ـ يا دي النيلة! خطبت مين يا عم؟! هو إنت شايف الدبلة في صباعي ولا إنت خطبتني وأنا آخر من يعلم؟!


أدخل يده بهدوء في جيبه، وأخرج علبة مخملية صغيرة فتحها ببطء ليظهر خاتم يخطف الأبصار، وقال بصوت عميق:

ـ لو عايزة... دلوقتي ألبسك الخاتم، وتبقي خطيبتي قدام الدنيا كلها. هعملها يا حبيبة. بس أنا مش عايز أخد منك كلمة وخلاص... أنا عايزك تبصيلي وتختاريني إنتِ، وساعتها هلبّسك الخاتم وأنا أسعد راجل في الدنيا.


تعلقت عيناها بالخاتم رغماً عنها، ثم رفعت نظرها إليه بسرعة، قبل أن تهرب به بعيدًا.

خرجت الكلمات من بين شفتيها همسًا:

ـ يخربيتك! إنتَ جاهز أوي كده ليه؟! آيفون، ودلوقتي خاتم! هو إنتَ خاطبني من ورايا ولا إيه؟! ناقص تطلعلي عقد الشقة وتقولي: «كتب الكتاب يوم الخميس»!


رفع فارس حاجبه، وقد التقط الهمسة رغم خفوتها:

ـ بتقولي حاجة يا حبيبة؟


انتبهت إلى نفسها، فهزت رأسها بسرعة:

ـ لَـ... لا، ما بقولش حاجة! وبعدين إنت داخل عليّا بسرعة كده ليه؟! إنتَ كده خنقتني، مش عارفة آخد نفسي منك!


توقف فارس على مسافة ترك لها فيها مجالًا كافيًا للتراجع، وكأنه أدرك أخيرًا أن كل شيء جاء عليها متلاحقًا؛ من اعترافه بمشاعره، إلى طلبه الزواج منها، ثم حديثه عن الخطوبة والخاتم وموعد الزواج، بينما هي لم تحصل حتى على فرصة تلتقط فيها أنفاسها وتستوعب ما يحدث.


التقط ارتباكها في عينيها، وفهم أنها لم تكن ترفضه بالضرورة بقدر ما كانت تشعر أن الأمور تسارعت أكثر مما تحتمل. لذلك لم يقترب منها أكثر، ولم يحاول انتزاع إجابة منها تحت وطأة اللحظة.


وحين تكلم، تبدلت نبرته تمامًا.


لم يعد فارس الطبيب الذي يمازحها، ولا الرجل الذي يستمتع بإغاظتها واستفزازها كلما تهربت من مشاعرها، ولم يعد حتى ذلك الرجل الواثق الذي يتحدث عن الخطوبة والزواج وكأن الطريق أمامه محسوم. كان أمامها الآن رجل أدرك أن من يحبها قد يخسرها إن جعلها تشعر بأنها محاصرة.


ثبت عينيه عليها بهدوء، وقال بصوت خافت خالٍ من أي ضغط:


ـ طيب... اهدي. خدي نفس الأول، أنا عارف إن كل حاجة حصلت بسرعة، ويمكن أنا استعجلت عليكي من غير ما آخد بالي... بس حبيبة، أنا اتقدمتلك وطبيعي أعرف ردك، والكلام ده مش هزار ولا لحظة حماس. اللي هسمعه منك، أنا هبني عليه حياتي اللي جاية.


سكت لحظة، ثم تابع بنبرة أكثر هدوءًا وصدقًا:


ـ لو وافقتي، هكون مبسوط وفرحان وأسعد واحد في الدنيا... ولو رفضتيني، هحترم قرارك ومش هضغط عليكي. بس صدقيني، إنتِ مش عارفة إنتِ بالنسبالي إيه... لأن لو مش إنتِ، أنا مش شايف نفسي عايش نفس الحياة دي مع واحدة تانية.


ثبت عينيه عليها، وصمت للحظات قبل أن يقول بصوت خافت:


ـ بس صدقيني يا حبيبة، لو رفضتي هعيش تايه طول عمري.


ساد الصمت بينهما.

ثبتت حبيبة عينيها عليه للحظات، ولم تجد في ملامحه هذه المرة ما يدعو إلى السخرية. كان صادقًا بصورة أربكتها، وكأن الرجل الذي اعتادت أن تجادله اختفى للحظات، وظهر أمامها فارس آخر لا يتحدث إلا بما يشعر به فعلًا.

بلعت ريقها، ثم تمتمت لنفسها وهي تحاول كسر ثقل اللحظة:


«يا لاهوي.. هو بيتكلم كده ليه؟! نور الشريف يا ولاد!»


ارتفعت ابتسامة خفيفة على شفتي فارس، لكنه لم يسمح لها بأن تشتته عن الإجابة التي ينتظرها.

ـ ها يا دكتورة حبيبة، ما ردتيش عليا.


ارتبكت، وأخذت تعبث بطرف حقيبتها قبل أن ترفع عينيها إليه للحظة قصيرة:

ـ بص، أنا قلت هفكر وأرد على أخويا رضوان، وهو اللي يكلمك. ولو سمحت ما تتكلميش معايا في الموضوع ده تاني.


أومأ برأس حانٍ واحترام صادق:

– تمام يا حبيبة.. أنا هحترم رغبتك.


رمقته بنظرة أخيرة محملة بكل مشاعر الارتباك:

– خلاص كده خلصت؟! أمشي بقى!


قال بابتسامة خبيثة وهو يشير للجانب الآخر من المكتب:

– طيب.. قبل ما تمشي.. مش هتاخدي الهدية بتاعتك؟!


التفتت برأسها لتلمح كيس الآيفون الموضوع على الحافة، ثم أعادت بصرها إليه بنظرة حاسمة:

– مش عايزة منك حاجة!


استدارت وفتحت الباب وخطت خارجة بخطوات سريعة، تاركة إياه يقف في منتصف المكتب واضعاً يده في جنبه، ليطلق تنهيدة عميقة وهو يتمتم بابتسامة واسعة:

– أقسم بالله مجنونة.. أنا ما شوفتش في حياتي كده! شكلك هتتعبيني أوي يا بنت العطار!



قبل سنوات...


كانت إحدى القاعات الفخمة تضج بالحضور في حفل خيري كبير، تتداخل فيه الأحاديث مع الموسيقى الهادئة، بينما توزعت الشخصيات المهمة بين أرجاء المكان. كان حسين الملكي من بين الحاضرين، وإلى جواره عدد من رجال الأعمال والشخصيات المعروفة.


وبعيدًا عن صخب القاعة، وقفت زاد وحدها.


كانت ترتدي فستانًا أسود بسيطًا وأنيقًا، وتركت شعرها ينسدل حول كتفيها دون تكلف. لم تكن تشارك أحدًا الحديث، ولا يبدو أنها تسمع شيئًا مما يدور حولها. كانت عيناها معلقتين بالأرض، وملامح الحزن واضحة على وجهها، كأنها موجودة بجسدها فقط، بينما عقلها في مكان آخر.


في تلك اللحظة، توقفت عدة سيارات فارهة أمام مدخل القاعة.


ترجل فريد من إحداها، وتبعه عدد من الحرس. دخل بخطوات ثابتة، فالتفتت إليه الأنظار من مختلف الجهات، وبدأت الهمسات تتنقل بين الحاضرين.


لم يهتم.


توقف لحظة، وأخذ يتفقد المكان بعين اعتادت مراقبة كل شيء، حتى استقرت عيناه عليها.


زاد.


لم يعرف اسمها وقتها، لكنه لم يستطع أن يبعد نظره عنها.


كانت مختلفة عن الجميع.


الجميع كان يراقبه... إلا هي.


اتجه إلى الطاولة القريبة، تناول كأس عصير، ثم تحرك بين الحاضرين متعمدًا أن يمر من جوارها.


وحين وصل إليها، اصطدم كتفه بكتفها اصطدامًا خفيفًا.


رفعت زاد رأسها على الفور.


التقت عيناها بعينيه للحظة.


نظر إليها فريد من جانب عينيه، وكأنه ينتظر منها رد فعل؛ اعتذارًا، غضبًا، حتى نظرة فضول.


لكنها لم تفعل شيئًا.


أنزلت عينيها مرة أخرى، وعادت إلى شرودها، وكأن الرجل الذي يقف أمامها لم يكن يعني لها شيئًا.


توقف فريد للحظة.


لأول مرة منذ دخوله، شعر أن شيئًا ما في المكان استوقفه فعلًا.


التفت إليها مرة أخرى، أطال النظر إليها، ثم ابتعد ببطء، بينما بقيت هي في مكانها، غارقة في حزنها، لا تدري أنها تركت في قلب رجلٍ مثل فريد أثرًا لن يزول بسهولة.


---


عاد إلى الحاضر.


كان فريد جالسًا خلف مكتبه في الفيلا، وقد استند إلى ظهر كرسيه، بينما استقرت المسدس بين يديه.


أخرج الخزنة، تفقدها بعناية، ثم أعاد تركيبها قبل أن يضع السلاح فوق سطح المكتب.


رفع عينيه أمامه، وبقي صامتًا للحظات.


وكأن صورة قديمة لم تفارقه طوال تلك السنوات، مهما حاول.



مرت عدة أيام ثقيلة على «حبيبة»، عاشت خلالها دوامة من التفكير المشتت بين كبرياشها وخفقات قلبها الخفية، دون أن تحسم أمرها بقرار نهائي.


وفي إحدى الأمسيات، عاد «رضوان» إلى المنزل بعد يوم عمل شاق وطويل في المصنع. التم الشمل حول طاولة العشاء، وما إن انفض الطعام حتى فاتحها رضوان بالأمر بجدية بالغة:

– ها ياحبيبة مقولتليش قررتي إيه في موضوع فارس؟!


تنهدت وهي تعبث بطرف الملعقة بين أصابعها.

ـ لسه يا رضوان. مش عارفه اخد قرار. 


نظر إليها رضوان باستغراب ممزوج بالعتاب.

ـ  حبيبتي لو إنتي رافضة من البداية عرفيني.. إنما عيب مكونش قد كلمتي! الراجل اتصل عليا قلتله يومين وهرد عليك، والمفروض كنت اتصلت عليه امبارح وخلصت.. يا آ آه يا لأ!


نفخت بضيق وحيرة واضحة، وعجزت عن الرد الفوري، فسألها بنبرة حنونة يحاول فهم ما يدور في عقلها:

ـ افتحيلي قلبك ما حدش هيخاف عليكِ قدي قوليلي يا حبيبتي إنتِ مرتاحة؟


رفعت عينيها إليه وقالت بصراحة:

ـ بصراحة... آه. بس خايفة.


ابتسم رضوان، وكأنه عرف الإجابة قبل أن تسأله:

ـ على فارس؟


رمقته بنظرة حادة وضحكت بصدمة مصطنعة:

– بتهزر يا رضوان؟!


ترك ملعقته جانباً على الطاولة، واستند بوعيه كاملاً نحوها بملامح جادة وصارمة:

– حبيبة.. لو خايفة من فارس بجد، بلاش منها الجوازة دي من أساسه!


أطرقـت برأسها قليلاً ثم نظرت إليه بصدق:

– بصراحة.. لما بشوف معاملة فارس واحترامه ليا.. بخاف أرفض أكون خسرت حد شاريني بجد، وخصوصاً إنه أكيد عدى عليه بنات ياما ومن نفس بيئته ومستواه!


هنا.. استدعى ذكر الماضي ظلاله الثقيلة على ملامح رضوان، فتغيرت نبرته وتحدث بغصة وخنقة واضحة:

– أنا ما بحبش أتكلم في السيرة دي. بلا مستوى بلا زفت. قفلي عليها خالص، وقوليلي.. أقول للراجل إيه دلوقتي؟! انا عايزه أخد دلوقتي حالا ردك انا مش هفضل امرجح في الراجل كل ده. احنا مش هنهزر ده جواز مش لعب عيال. 


وحين رأت أنه دخل في الجد وأنهى العبث، حاولت تلطف الجو بلمحتها الكوميدية المعهودة لتكسر حدة التوتر:

– خلاص.. هضحي اتكل على الله وقوله اتحايلت عليها علشان توافق.


ضحك من قلبه على رد فعلها المشاكس، وقال بنبرة تفيض دفئاً واحتواء:

– من غير ما تقولي يا حبيبة أخوكِ.. إنتي فعلاً طلعتي عيني علشان توافقي! وبعدين.. إنتي أي حد؟! إنتي حبيبة بنت رضوان. 


ثم ابتسم لها بحنان أبوي وقال:

– يعني.. نقول مبروك؟!


تنهدت بعمق، وقد تسللت دقات قلبها المترددة إلى صفاء وجهها المشتعل بالخجل، وأمأت رأسها موافقة بصمت ناطق بألف كلمة.


ابتسم رضوان، وكأن تلك الإيماءة الصغيرة كانت كافية ليحمل بها فرحة كبيرة.

ـ ألف مبروك يا حبيبتي.




جلس «فارس» في غرفته، وقد استوطنت وجهه ابتسامة هادئة ودافئة، يغمرها شعور عارم بالانتصار والاستقرار بعدما وصله نبأ موافقة «حبيبة». لم يتردد لحظة، فالتف هاتفياً بـ «رضوان» يطلب لقاءه عاجلاً لترتيب كافة التفاصيل وحسم الموعد. أخبره رضوان بوجوده في المكتبة، فما لبث فارس أن هبط السلالم بخطوات سريعة متلهفة.

​وفي طريقه للخروج، اعترضته «غادة» بلهفة ممتزجة بالفضول:

– ها يا فارس.. طمني! لسه مفيش جديد من عند حبيبه! لو تحب هاتلي رقمها واتكلم معاها انا.


ابتسم فارس، وتوقفت عيناه للحظة وكأنه تذكر شيئًا طريفًا وسط فرحته؛ حتى الآن، لم يكن يملك رقم هاتف حبيبة أصلًا.


لكنه أخفى الأمر بابتسامة وقال:


ـ اطمني يا غاده رضوان كلمني وقالي حبيبة وافقت.


اتسعت عينا غادة، وما إن استوعبت الخبر حتى انطلقت فرحتها دون تردد.


ـ والله ألف ألف مبروك يافارس.


واسترسلت بحماس مستبق للأحداث:


ـ بص بقى. حفلة الخطوبه ايه رأيك نعملها هنا! ولا نجحز في قاعه كبيره! ولا اقولك..


رفع فارس يده مقاطعًا إياها، وضحك وهو يعرف جيدًا أن تركها تسترسل الآن يعني أن حفلة الخطوبة ستُقام قبل أن يصل إلى رضوان.


ـ حيلك حيلك يا غاده. انا لسه متكلمش مع اخوها في أي تفاصيل.


هدأت غادة قليلًا، لكنها لم تتخلَّ عن حماسها.


ـ مفيش مشكلة أول ما تتفق معاه. بلغني انت بس ومالكش دعوه.


اكتفى فارس بابتسامة، ثم اتجه إلى سيارته.


كان يعرف أن الخطوة الأصعب ليست أن يطلب حبيبة، فقد فعلها، ولا أن يسمع موافقتها، وقد حصل عليها. الأصعب الآن أن يجلس أمام الرجل الذي عاش عمره كله مسؤولًا عنها، ويخبره أنه يريد أن يأخذ منه تلك المسؤولية.


---


حين وصل إلى مكتبة رضوان، دخل بهدوء، ووضع رضوان كوب القهوة أمام فارس، وابتسم.


ـ امسك يافارس قهوة اصلي مش مغشوشة قرفه.


ضحك فارس، وكانت ضحكته هذه المرة تحمل راحة رجل انتهى لتوه من انتظار طويل.


ـ تسلم ايدك يا رضوان. والله شكلي هحب القرفه واسيب البن قريب.


ضحك رضوان، ولم تفته الفرصة.


ـ لأ من جهة هتحب. فأنت هتحب حجات كتير مع حبيبه.


ابتسم فارس، ولم يحتج إلى التفكير في الرد.


ـ من غير ما تقول. هى موقفه المستشفى على رجل. بس تعرف.


توقفت ابتسامته قليلًا، وتحولت نبرته إلى إعجاب حقيقي.


ـ ايه؟


ـ اللي حبيبه بتعمله ده الصح. معندهاش تهاون في شغلها. عايزه كل حاجه تمشي زي المسطره. ود نادر جداً لما تلاقيه في حد اليومين دول.


كان فارس يتحدث عن حبيبة بثقة، يعدد التزامها في عملها وحرصها ومسؤوليتها، وهي أشياء يعرفها رضوان جيدًا.


استمع إليه في صمت، فأعادته كلماته إلى سنوات طويلة عاشها معها؛ من طفلة كبرت أمام عينيه، إلى امرأة سيأتي يوم يسلّم مسؤوليتها لرجل آخر.


لم يكن بحاجة إلى سماع المزيد؛ هو يعرف حبيبة أكثر من أي أحد، ويعرف تعبها وعنَادها وكل ما مرت به حتى أصبحت ما هي عليه الآن.


تنهد رضوان بعمق، ثم رفع عينيه إلى فارس وقال بنبرة جادة:


ـ عايزك توعدني إنك تخلي بالك من حبيبه يا فارس. صدقني انت متعرفش هى عندي إيه! لو في يوم زعلتها! مش هبقى على قعدتنا دي ولا العيش والملح اللي بينا.


ـ ​ابتسم فارس بثقة راسخة ونظرة واثقة وكأنه كان يتوقع هذا الكلام منذ اللحظة التي جلس فيها أمامه.


ـ إنت متعرفش مين فارس الحسيني يا رضوان... وأنا مقدّر خوفك عليها، وأعرف إنك مش هتسلّمها لأي حد. بس اطمن... المفروض تاخد بالك مني أنا، وتوصي حبيبة عليّا، وتخليك في ضهري... أصل أنا حاسس إن اللي محتاج يتوصّى عليه فعلًا هو أنا!


ضحك رضوان، لكن خلف ضحكته كان هناك شيء من الارتياح.


ـ فدي عندك حق راحت عليا خالص. الله يقويك.


استقام فارس في جلسته وانتقل إلى نبرة الجدية المطلقة:


ـ طيب نتكلم في الجد.  وشوف؟ طلباتك وطلبات حبيبة كلها أوامر. اي حاجه تقول عليها اعتبرني موافق عليها من غير نقاش.


تنهد رضوان وتحدث بصراحة بالغة:

ـ بص يا فارس مش هنضحك على بعض أنا عارف الفرق بينا طبعاً ولكن أنا هعمل بالأصول.


لم ير فارس في الجملة اعتراضًا، بل رأى فيها كرامة رجل يريد أن يؤدي واجبه تجاه أخته حتى النهاية.


ـ وانا هعمل بالشرع يارضوان.


ـ قصدك ايه؟


قال له بثبات:


ـ الشرع بيقول إن الراجل ملزم بكل تكاليف الجواز.


يرد رضوان بنخوة واعتزاز:

ـ فارس انا عارف إنك بتقول كده علشان متحطنيش في موقف حرج معاك. لكن أحب اطمنك أنا هاجهز حبيبة بكل مليم معايا ومش هخليها تدخل عندك ناقصها ابره.


لم يبتسم فارس هذه المرة. كان يريد أن يفهمه أن الأمر بالنسبة إليه ليس استعراضًا للقدرة ولا محاولة لإحراج الرجل.


ـ صدقني والله مابتكلم كده علشانك. انا فعلاً هتجوز زي الشرع ما قال. انا مش بقول كده علشان ابان الشهم في نظرك. أنت عملت اللي عليك وزياده مع حبيبه يارضوان ودلوقتي جه دوري..


أردف رضوان بغصة حب وإخلاص:

ـ مهما أعمل لأختي عمري ما هكون كفيت و وفيت معاها. دي مسؤوله مني فاهم يافارس.


ـ فاهم وعلشان كده بقولك هشاركك مسؤليتك واخد حبيبة زي ما شرع ربنا قال.


ساد الصمت.


وللمرة الأولى منذ بدأ الحديث، لم يجد رضوان ردًا جاهزًا.

احتار رضوان من كلامه؛ فهو لا يريد أن يبدو كمن يقدم أخته بلا ثمن، ولا يود أن يمنح احداً سيطرة مطلقة عليها. صمت طويلاً، تطرقت إلى ذهنه أفكار شتى ومخاوف لا تنتهي؛ فحتى لو كتب القائمة، يدرك تماماً أن رجلاً بحجم فارس وقدراته المالية قادر على تجاوزها ببساطة إن أراد. كانت المرة الأولى التي يقف فيها حائراً هكذا عاجزاً عن اتخاذ القرار الفوري.


​فارس، الذي أدرك بذكائه صمت رضوان، التمس له كل العذر؛ فحبيبة ليست مجرد أخت، بل هي قطعة من روح رضوان وحقها الأصيل أن تُصان.


 كسر فارس الصمت بهدوء:

– انا عارف إنك خايف عليها مني.. وحقك.. ولو مكنتش خفت انا اللي كنت هخاف منك.. مش سهل إنك تفرط في حد مشي في ضلك عمره كله.. وأنا مش هضيع حبيبه من أيدي علشان عادات وتقاليد.. وشوف يارضوان اللي انت عايزه انا معاك فيه.. ولو عايزيني اضمنلك حقها.. هيحصل.. انا ناوي اكتب ليها البيت اللي هنعيش فيه باسمها..



​قاطعه رضوان بحدة نبيلة:

ـ انا مسكتش علشان تفكر كده يافارس. انا آه من حقي اضمن حقوق اختي بس مش اللي وصلك ده.


لم يشعر فارس بالإهانة، بل احترم أكثر الرجل الذي أمامه.


ـ انا فاهم ومقدر والله. وصدقني دي عادتنا يعني الفيلا اللي عايشين فيها دي بإسم غاده مهاب كتبها ليها قبل الجواز. وانا في نيتي من زمان اعمل كده من قبل ما اشوف حبيبه ولا اعرفها.


زفر رضوان بحيرة متقبضة:

ـ والله دي حاجه ترجعلك الموضوع هيبقى بينك وبينها بعد كده.


ابتسم فارس، وكأنه تعمد أن يخفف ثقل الحديث.


ـ طيب حلو اتفقنا على حاجه اهو. نتفق على الخطوبه هنعملها امتى وفين!


انتقل الحديث إلى التفاصيل، وبدأ التوتر الذي حمله رضوان طوال الدقائق السابقة يخف شيئًا فشيئًا.


ـ الوقت اللي يناسبك. أما فين بقى فهيبقى في البيت عندي.


فارس باقتراح هادئ:

– انا عن نفسي الخميس الجاي مناسب اوى معايا.. بس ايه رايك لو نعملها في الفيلا عندنا.. و...


 لكن رضوان رفض بهدوء:


ـ بص يا فارس، أنا هعمل حاجة على قد ظروفي، وأنا عارف إن موقفك صعب. بس أنا هعمل بالأصول، وهفرّح أختي في بيتها، وسط أصحابها وقرايبها، وطبعًا عيلتك. ولو مشالتهمش الأرض، أشيلهم على راسي. غير كده مش هينفع. إنت ما يرضيكش أجيبلك أختي لحد عندك علشان تلبسها الدبلة ولا إيه؟


ابتسم فارس. كان يستطيع أن يقيم احتفالًا يليق بثروته، لكنه لم يرَ في ذلك سببًا يجعله ينتزع من رضوان حقه في أن يفرح بأخته بطريقته.


– تمام يارضوان أنا موافق ويهمني الموضوع يتم.. بس معلش في الفرح بقى...


نطق رضوان بابتسامة:

– لأ وعد مني.. إن شاله تعمله في المريخ أنت حر.


وفي النهاية، قال فارس إنه سيرسل إلى حبيبة أحد العاملين من محل المجوهرات لتختار شبكتها بنفسها.


وحين سأله رضوان:


ـ طيب وانت مش هتكون موجود وهى بتختار؟


أجابه فارس ببساطة:


ـ دي هديتها هى يارضوان هسيبها تختار براحتها.


نظر إليه رضوان للحظات.


لم يقل شيئًا، لكن شيئًا من الفخر والاطمئنان تسلل إلى قلبه.


---

وانتهت الجلسة باتفاق تام. عاد فارس إلى البيت ليواجه عائلته. وما إن وطأت قدمه عتبة الدار حتى استقبله «مهاب» الذي أخبرته غادة بكل التفاصيل.


حاول مهاب أن يقترح إقامة الخطوبة مع احتفالية عيد ميلاد الشركة في الشهر المقبل، لكن فارس أخبره بما حدث، وأنه حددها في الأسبوع التالي.


استمع مهاب حتى النهاية، ثم قال بعد لحظة تفكير:


ـ تصرّف رضوان كبّرَه في نظري... لأنه تصرّف منطقي من راجل عنده عِزّة نفس ونخوة.


أما غادة، فلم تكن منشغلة بالحسابات ولا بالأصول؛ كانت منشغلة بفستانها.


ـ أسبوع واحد يا فارس؟! أنا لحد دلوقتي ما فصّلتش فستان، ولا جهّزت لأي حاجة!


ضحك فارس:


ـ مش لازم تفصّلي، اشتري يا ماما. وبعدين أنا عايزك تاخدي حبيبة معاكي تشتري لها فستان الخطوبة.


وحين سألته غادة إن كان سيذهب معهما، تبدلت ملامحه بضيق مصطنع:


ـ اخوها رفض إني اخرج معاها.


انفجر مهاب ضاحكًا:


ـ رضوان هيربّيك يا فارس، وهيبقى زي اللقمة اللي واقفة في زورك!


فرد فارس بلا تردد:


ـ علشان كده أنا حددت الجواز في أسرع وقت.


ضحكت غادة، وباركت له مرة أخرى.


لكن وسط الضحكات، لمح فارس شرود أخيه.


ـ مالك يا مهاب سرحان ليه!


حاول مهاب إخفاء الأمر، وتدخلت غادة لتطمئن فارس: 

تدخلت غادة بقلق خفيف:

– اخوك عنده شوية مشاكل في الشغل بس بتعدي.. انت متقلقش.


 بينما أخبره مهاب أن المشكلة انتهت.


لم يقتنع فارس تمامًا.


ـ متأكد؟


تنهد مهاب وأجابه بما يكفي لإغلاق الحديث:


ـ طبعاً. وألف مبروك يا فارس.


ـ الله يبارك فيك.


ومضى الاحتفال بفرحة فارس، بينما بقيت مشكلة مهاب في الخفاء، تنتظر وقتها.


---


ومرت الأيام كأطياف سريعة. وفي صباح يوم الخطوبة.


منذ الساعات الأولى، كان رضوان قد تحول إلى خلية نحل. راجع الطعام والشراب والحلوى أكثر من مرة، وعمل عصام وكريم إلى جواره، ولم يسمحا له بأن يتحمل كل شيء وحده.


وفي غرفة المعيشة، صنع لحبيبة ركنًا صغيرًا لتجلس فيه إلى جوار فارس، وحاول أن يجعل البيت يبدو مختلفًا في ذلك اليوم؛ ليس فخمًا، لكنه دافئ، يشبهها ويشبهه.


وفي غرفتها، كانت حبيبة تستعد.


إيمان وهالة ولبنى وريهام يحيطن بها، يعدلن حجابها وثوبها، بينما كانت هي تحاول أن تبدو هادئة.


لكن قلبها لم يكن هادئًا.


كانت تستوعب شيئًا فشيئًا أن اليوم الذي ظل فارس يتحدث عنه بثقة أصبح واقعًا.


أنها بعد ساعات قليلة ستجلس إلى جواره أمام الجميع.


أنها ستصبح خطيبته رسميًا.


وفجأة، وصلت إليها أصوات الزغاريد من خارج الغرفة.


توقفت أنفاسها للحظة.


رفعت عينيها إلى صديقاتها، ثم جاء صوت كريم من الخارج، مرتفعًا وهو يعلن وصول العريس المنتظر:


ـ العريس وصل!


ارتجف قلب حبيبة.


لم تكن تعرف أن مجرد سماع تلك الكلمة سيجعل كل خوفها القديم يتراجع للحظة أمام فرحة واحدة... فرحة أن فارس جاء فعلًا من أجلها.


يتبع.......



© قصص وروايات مريم نصار — جميع الحقوق محفوظة. يُمنع نسخ هذا الفصل أو إعادة نشره كليًا أو جزئيًا دون إذن كتابي مسبق من الكاتبة.

🔔 عجبك الفصل؟ تابعي المدونةعشان توصلك الفصول الجديدة أول بأول🔔 متابعة المدونةاضغطي، سجّلي بحساب جوجل، وخلاص ✔

تعليقات✍️ أضف تعليقًا

  1. روعه روعه تسلم ايدك يا قمر 🎉🎉🎉🎉❤️❤️❤️❤️

    ردحذف

إرسال تعليق

بحث هذه المدونة الإلكترونية